Di Yehowa Ƒe Yayra Vevie
“[Mawu zua] teƒeɖola na ame siwo dinɛ vevie.”—HEB. 11:6.
1, 2. (a) Aleke ame geɖewo dia Mawu ƒe yayrae? (b) Nu ka tae wòle be míadi vevie be míaxɔ Yehowa ƒe yayra?
LE DUKƆ aɖewo me la, enye nu si bɔ be, ne ame aɖe nyè la, ame bubu aɖe si menya kura o la ate ŋu agblɔ nɛ be, “Mawu neyra wò!” Subɔsubɔha vovovowo ƒe ŋgɔnɔlawo yraa amewo, lãwo, kple nu siwo me agbe mele o gɔ̃ hã. Amewo tea ŋu zɔa mɔ yia tadeaguƒe aɖewo le esi wogblɔ na wo be woakpɔ yayra ta. Enuenu la, dunyahelawo biaa Mawu ƒe yayra na woƒe dukɔa. Èsusu be esɔ be woanɔ yayra mawo biama? Ðe yayra siwo wobiana la sua wo sia? Ame kawoe Mawu yrana ŋutɔŋutɔ, eye nu ka tae?
2 Yehowa gblɔe ɖi be le ŋkeke mamlɛawo me la, ame dzadzɛ siwo nye ŋutifafamewo, siwo atso dukɔwo katã me la anɔ ye si, eye woaɖe gbeƒã Fiaɖuƒe ŋuti nya nyuia va se ɖe anyigba ƒe seƒe ke, togbɔ be amewo alé fu wo ahatsi tsitre ɖe wo ŋu hã. (Yes. 2:2-4; Mat. 24:14; Nyaɖ. 7:9, 14) Mí ame siwo lɔ̃ be míakpɔ gome le Mawu ƒe dɔ sia me la míedi be Mawu nayra mí, eye míehiã na eƒe yayra hã hafi míate ŋu akpɔ mɔ be míakpɔ dzidzedze le dɔ sia me. (Ps. 127:1) Gake nu kae míawɔ hafi axɔ Mawu ƒe yayra?
Yehowa Yraa Toɖolawo Godoo
3. Ne ɖe Israel viwo ɖo to la, anye ne nu kae ado tso eme na wo?
3 Mixlẽ Lododowo 10:6, 7. Do ŋgɔ teti na Israel dukɔa ƒe Ŋugbedodonyigbaa dzi yiyi la, Yehowa gblɔ na wo be ne woɖo to yeƒe gbe la, nu adze edzi na wo eye yeakpɔ wo ta etɔxɛe. (5 Mose 28:1, 2) Ɛ̃, kakaɖedzi blibo li be ne woɖo to Yehowa la, ayra wo godoo.
4. Nu kae toɖoɖo anukwaretɔe bia?
4 Nɔnɔme kae wònɔ na Israel viwo be woaɖe afia le toɖoɖo Mawu me? Mawu ƒe Se la gblɔ be, ne dukɔa “metsɔ dzidzɔ kple dzi kpɔdzidzɔ, NW” subɔ Mawu o la, woƒe nu madze eŋu o. (Mixlẽ 5 Mose 28:45-47.) Yehowa dze na toɖoɖo tso dzi blibo me. Medze be woaɖo to le esi wobiae tso wo si ko ta o, elabena lãwo kple gbɔgbɔ vɔ̃wo gɔ̃ hã ate ŋu awɔ esia. (Mar. 1:27; Yak. 3:3) Toɖoɖo Mawu anukwaretɔe nye lɔlɔ̃ na Mawu ɖeɖe fia. Ebia be ame naɖo to kple dzidzɔ le esi wòxɔe se be Yehowa ƒe sewo menye agba o eye be “ezua teƒeɖola na ame siwo dinɛ vevie la” ta.—Heb. 11:6; 1 Yoh. 5:3.
5. Aleke kaka ɖe ŋugbe si Yehowa do dzi akpe ɖe Israel viwo ŋu woawɔ ɖe sedede si le 5 Mose 15:7, 8 dzi?
5 Bu nu si tae wòahiã be ame nanye toɖola si ka ɖe edzi be, ne yeɖo to la, Mawu aɖo eteƒe na ye hafi wòate ŋu awɔ ɖe sedede si le 5 Mose 15:7, 8 dzi la ŋu kpɔ. (Mixlẽe.) Ele eme be ne ame aɖe wɔ ɖe se ma dzi kple vevesese la, esia ahe gbɔdzɔe aɖe si nu avae na ame dahe la enumake ya, gake ɖe ewɔwɔ alea ana ƒomedodo nyui kple lɔlɔ̃ nanɔ Mawu ƒe amewo domea? Gawu la, ɖe esia aɖee afia be amea xɔ ŋutete si le Yehowa si be wòakpɔ esubɔlawo ƒe nuhiahiãwo gbɔ na wo la dzi sea? Eye ɖe esia aɖee afia be ekpɔ ŋudzedze ɖe mɔnukpɔkpɔ si su esi be wòasrɔ̃ Yehowa ƒe dɔmenyonyo la ŋua? Kura o! Mawu dea dzesi dzi ƒe nɔnɔme si le dɔmenyola vavã si, eye edo ŋugbe be yeayra ɖe eƒe agbagbadzedzewo kple dɔwɔna ɖe sia ɖe dzi. (5 Mose 15:10) Ŋugbedodo ma dzi xɔxɔ se ana ame naɖe afɔ si hiã eye yayra geɖe ado tso esia wɔwɔ me.—Lod. 28:20.
6. Kakaɖedzi kae wòle be Hebritɔwo 11:6 nana mí?
6 Ehiã be ame naxɔe ase be Yehowa nye Teƒeɖola, eye gakpe ɖe eŋu la, Hebritɔwo 11:6 he susu yi nɔnɔme bubu aɖe si hiã hafi woaxɔ Mawu ƒe yayra la dzi. De dzesii be Yehowa ɖoa eteƒe na ame siwo “dinɛ vevie.” Helagbe me nya si wozã le afi sia la hea susu yia veviedodonu kple kutrikuku dzi. Ðe nya sia mena kakaɖedzi mí be, ne míedii vevie la, ayra mí godoo oa? Mawu vavã ɖeka la, “si mate ŋu aka aʋatso o” la gbɔe ŋugbedodoa tso. (Tito 1:2) Eɖee fia le ƒe akpe geɖe siwo va yi me be míate ŋu aka ɖe eƒe ŋugbedodowo dzi bliboe. Eƒe nyawo medoa kpo emevava gbeɖe o; wovaa eme godoo. (Yes. 55:11) Eya ta míate ŋu aka ɖe edzi bliboe be, ne míeɖea xɔse vavã fiana la, anye Teƒeɖola na mí.
7. Nu kae míate ŋu awɔ be míaƒe asi nasu Mawu ƒe yayra dzi to Abraham ƒe ‘dzidzimevia’ dzi?
7 Yesu Kristoe nye Abraham ƒe ‘dzidzimevia’ ƒe akpa vevitɔ. Kristotɔ amesiaminawoe nye ‘dzidzimevi’ sia si ŋugbe wodo la ƒe akpa evelia. Wode dɔ asi na wo be woaɖe “gbeƒã ame si yɔ [wo] tso viviti me va eƒe kekeli wɔnukua me la ƒe nɔnɔme nyuiwo.” (Gal. 3:7-9, 14, 16, 26-29; 1 Pet. 2:9) Ne míeɖoa to ame siwo Yesu tsɔ ɖo eƒe nuwo nu o la, míate ŋu akpɔ mɔ be ƒomedodo nyui nanɔ mía kple Yehowa dome o. “Kluvi nyateƒetɔ kple aɖaŋudzela” ƒe kpekpeɖeŋu manɔmee la, míate ŋu ase nu siwo míexlẽna le Mawu ƒe Nyaa me la gɔme nyuie alo anya ale si míawɔ emenyawo dzi o. (Mat. 24:45-47) Ne míetsɔa nu siwo míesrɔ̃na le Ŋɔŋlɔawo me dea dɔwɔwɔ me la, míaƒe asi ate ŋu asu Mawu ƒe yayra dzi.
Na Mawu Ƒe Lɔlɔ̃nu Wɔwɔ Nanye Nu Vevitɔ Na Wò
8, 9. Alekee blemafofo Yakob dze agbagba wɔ nu le ɖekawɔwɔ me kple Mawu ƒe ŋugbedodoa?
8 Ne míele nu ƒom tso ʋiʋli vevie be Mawu nayra ame ŋu la, ɖewohĩ esia ana míaɖo ŋku blemafofo Yakob dzi. Menya ale si ŋugbe si Mawu do na Abraham la ava eme o, ke hã, exɔe se be Yehowa ana tɔgbuia ƒe dzidzimeviwo nasɔ gbɔ taŋtaŋ, eye eƒe dzidzimeviwo ava zu dukɔ gã aɖe. Eya ta le ƒe 1781 D.M.Ŋ. me la, Yakob zɔ mɔ yi Xaran be yeaɖadi srɔ̃ aɖe. Menye zɔhɛ si ƒe nu anyo eŋu dzro ko dimee wònɔ o; ke boŋ enɔ nyɔnu aɖe si nye Yehowa subɔla si léa fɔ ɖe gbɔgbɔmenuwo ŋu, si anye vidada nyui na viawo la dim.
9 Míenya be Yakob va do go eƒe ƒometɔ Raxel. Elɔ̃ Raxel ale gbegbe be elɔ̃ be yeawɔ dɔ na fofoa Laban ƒe adre bene Raxel nazu ye srɔ̃. Menye lɔlɔ̃ ƒe ŋutinya dodzidzɔname aɖe koe nya sia nye o. Ðikeke mele eme o be, Yakob nya nu tso ŋugbe si Mawu Ŋusẽkatãtɔ la do na tɔgbuia Abraham la ŋu, eye enya hã be egado ŋugbe ma ke na ye fofo Isak. (1 Mose 18:18; 22:17, 18; 26:3-5, 24, 25) Emegbe Isak gblɔ na via Yakob be: “Mawu ŋusẽkatãtɔ nayra wò, eye wòana nàdzi asɔ gbɔ ɖe dzi, bena nàtrɔ azu dukɔ geɖe. Eye wòatsɔ Abraham ƒe yayra ana mia kple wò dzidzimeviwo, bena nànyi anyigba, si Mawu tsɔ na Abraham, si dzi nènye amedzro le la dome.” (1 Mose 28:3, 4) Eya ta agbagba si Yakob dze be yeakpɔ nyɔnu nyuitɔ aɖe ahadzi viwo la ɖe ale si gbegbe wòka ɖe nya si Yehowa gblɔ dzi la fia.
10. Nu ka tae wòdze Yehowa ŋu be yeatsɔ nu si Yakob di la ayrae?
10 Yakob menɔ kesinɔnuwo dim be yeƒe nu nadze yeƒe ƒomea ŋu o. Ŋugbe si Yehowa do ku ɖe eƒe dzidzimeviwo ŋu la ŋue eƒe susu nɔ. Nu si nɔ vevie nɛ ye nye be Yehowa ƒe lɔlɔ̃nu nava eme. Togbɔ be Yakob do go kplamatsedonu geɖewo hã la, eɖoe kplikpaa be yeawɔ nu sia nu si yeate ŋui bene yeƒe asi nasu Mawu ƒe yayra dzi. Enɔ esia wɔwɔ dzi ʋuu keke yi ɖe eƒe amegãkuku me, eye Yehowa yrae hã.—Mixlẽ 1 Mose 32:25-30.
11. Agbagba kae wòle be míadze le ɖekawɔwɔ me kple Mawu ƒe lɔlɔ̃nu si wòɖe fia?
11 Abe Yakob ene la, míenya nu sia nu ku ɖe ale si tututu Yehowa ƒe tameɖoɖoa ava eme ŋu o. Ke hã, to Mawu ƒe Nya la sɔsrɔ̃ me la, gɔmesese gbadzaa aɖe su mía si ku ɖe nu si míakpɔ mɔ na le ‘Yehowa ƒe ŋkekea’ dzi la ŋu. (2 Pet. 3:10, 17) Le kpɔɖeŋu me, míenya ɣeyiɣi si tututu ŋkeke ma ava o, gake míenya be etu aƒe. Míeka ɖe nya si Mawu ƒe Nya la gblɔ dzi be, ne míeɖi ɖase tsitotsito le ɣeyiɣi kpui si susɔ me la, míaɖe mía ɖokuiwo kple ame siwo ɖoa to mí la.—1 Tim. 4:16.
12. Nu ka dzie míate ŋu aka ɖo?
12 Míenyae be nuwuwua ate ŋu ava le ɣeyiɣi ɖe sia ɖe me; Yehowa mele lalam be míaɖi ɖase na anyigbadzitɔ ɖe sia ɖe hafi nuwuwua nava o. (Mat. 10:23) Eye míexɔa mɔfiame nyuiwo hã ku ɖe ale si míawɔ gbeƒãɖeɖedɔa memie ŋu. Le xɔse me, míewɔa míaƒe ŋutete katã le dɔ sia me, eye míewɔa nu siwo katã ate ŋu akpe ɖe mía ŋu la ŋu dɔ le dɔa wɔwɔ me. Anyigbamama tsekuwo ko mee míaɖe gbeƒã le ɣesiaɣia? Le nyateƒe me la, mɔ aɖeke meli si dzi míato anya o. (Mixlẽ Nyagblɔla 11:5, 6.) Mía tɔ koe nye be míaɖe gbeƒã kple kakaɖedzi be Yehowa ayra ɖe míaƒe dɔa dzi. (1 Kor. 3:6, 7) Míate ŋu aka ɖe edzi be ale si míekua kutri vevie la le nyanya nɛ, eye ato gbɔgbɔ kɔkɔea dzi ana mɔfiame si tututu míehiã la mí.—Ps. 32:8.
Gbɔgbɔ Kɔkɔe La Didi
13, 14. Aleke ŋutete si le Mawu ƒe gbɔgbɔ kɔkɔea ŋu be wòana Mawu ƒe amewo nadze na Eƒe dɔwo wɔwɔ la dze ƒãa?
13 Ke ne míese le mía ɖokui me be dɔdeasi aɖe menya le wɔwɔ ge na mí o alo be míate ŋu aɖe gbeƒã o ya ɖe? Ele be míabia Yehowa be wòana eƒe gbɔgbɔ kɔkɔea mí, be wòakpe ɖe mía ŋu ŋutete siwo le mía si le eƒe subɔsubɔdɔa wɔwɔ me la nanyo ɖe edzi. (Mixlẽ Luka 11:13.) Mawu ƒe gbɔgbɔ la ate ŋu ana amewo nadze na dɔ aɖe wɔwɔ alo subɔsubɔgbanɔamedzi aɖe tsɔtsɔ, metsɔ le nɔnɔme siwo me woto alo nuteƒekpɔkpɔ siwo su wo si me o. Le kpɔɖeŋu me, esime Mawu ƒe amewo ʋu tso Egipte megbe teti la, Mawu ƒe gbɔgbɔ la na wo ame siwo nye alẽkplɔlawo kple kluviwo la ɖu woƒe futɔwo dzi keŋkeŋ, togbɔ be nuteƒekpɔkpɔ aɖeke mesu wo si le aʋawɔwɔ me o hã. (2 Mose 17:8-13) Esia megbe kpuie la, gbɔgbɔ ma ke kpe ɖe Bezaleel kple Oholiab ŋu wowɔ avɔgbadɔa ŋu nu dzeaniawo pɛpɛpɛ le ɖekawɔwɔ kple nuawo ƒe nɔnɔme si Mawu ɖe fia.—2 Mose 31:2-6; 35:30-35.
14 Gbɔgbɔ triakɔ ma kpe ɖe Mawu subɔla siwo li egbea ŋu wokpɔ habɔbɔa ƒe nuhiahiãwo gbɔ le ɣeyiɣi si me wòva hiã be nɔviawo ŋutɔwo nadze agbalẽwo tata gɔme. Nɔviŋutsu R. J. Martin, si nye agbalẽtaƒea ƒe dzikpɔla ɣemaɣi la ɖe nu siwo habɔbɔa te ŋu wɔ kaka va ɖo ƒe 1927 me la me ɖe lɛta aɖe me. Egblɔ be: “Aƒetɔ la ʋu agboa le ɣeyiɣi nyuitɔ dzi; eye agbalẽtamɔ̃ gã la va ka mía si, eva ka mí ame siwo menya naneke tso ale si wowɔe kple ale si wozãnɛ ŋu o la si. Gake Aƒetɔ la nya ale si wòana ame siwo tsɔ wo ɖokuiwo nɛ bliboe la ƒe susu naɖe ablae. . . . Le kwasiɖa ʋɛ aɖewo ko me la, míena agbalẽtamɔ̃ ma te dɔwɔwɔ, eye egale dɔ dzi sesĩe; míetsɔe le dɔ si ewɔlawo gɔ̃ hã menya kura be ate ŋu awɔ o la wɔm.” Yehowa gale yayram ɖe kutri siwo kum eƒe amewo le vevie la dzi va de asi na egbea.
15. Alekee nya siwo le Romatɔwo 8:11 ate ŋu ado ŋusẽ ame siwo le akɔ kpem kple dodokpɔwo?
15 Yehowa ƒe gbɔgbɔa wɔa dɔ le mɔ vovovowo nu. Gbɔgbɔ sia li na Mawu ƒe amewo katã, eye ekpena ɖe wo ŋu woɖua mɔxenu gãwo dzi. Ke ne ewɔ na mí be dodokpɔwo wu tsɔtsɔ na mí ɖe? Paulo ƒe nya siwo le Romatɔwo 7:21, 25 kple 8:11 la ate ŋu ado ŋusẽ mí. Ɛ̃, “ame si fɔ Yesu tso ame kukuwo dome la ƒe gbɔgbɔ” ate ŋu akpe ɖe mía ŋu, ado ŋusẽ mí míaɖu ŋutilã ƒe nudzodzrowo dzi. Kristotɔ siwo wotsɔ gbɔgbɔ si ami na lae woŋlɔ nya mawo na, ke hã, gɔmeɖose siwo le eme la yi na Mawu subɔlawo katã. Mí katã míegbɔa agbe to Kristo dzi xɔxɔ se me, to ʋiʋli vevie be míawu míaƒe ŋutinuwo ƒe dzodzro vɔ̃wo me, kple agbenɔnɔ le ɖekawɔwɔ me kple gbɔgbɔa ƒe mɔfiafia me.
16. Nu kawoe wòle be míawɔ be Mawu nana eƒe gbɔgbɔ kɔkɔea mí?
16 Ðe míanɔ anyi ade asi asitɛ me ko anɔ mɔ kpɔm be Mawu nana eƒe dɔwɔŋusẽa mía? Ao. Tsɔ kpe ɖe gbɔgbɔa biabia le gbedodoɖa me ŋu la, ele be míatsɔ Mawu ƒe Nya si tso gbɔgbɔ me la anɔ mía ɖokuiwo nyim kutrikukutɔe. (Lod. 2:1-6) Gakpe ɖe eŋu la, Mawu ƒe gbɔgbɔa fiaa mɔ Kristo hamea. Ne míedea kpekpeawo edziedzi la, eɖenɛ fiana be míedi be “[míase] nya si gblɔm gbɔgbɔ la le na hameawo.” (Nyaɖ. 3:6) Gawu la, ele be míabɔbɔ mía ɖokui awɔ ɖe nu siwo míesrɔ̃na la dzi. Lododowo 1:23 xlɔ̃ nu mí be: “Mitrɔ kɔ ɖe nye mokaname ŋuti. [Ekema,] mana nye gbɔgbɔ nado [na mí] bɔbɔbɔ.” Vavãe, Mawu naa eƒe gbɔgbɔ kɔkɔea “ame siwo ɖoa toe abe dziɖula ene.”—Dɔw. 5:32.
17. Nu kae míate ŋu atsɔ ale si Mawu yrana ɖe míaƒe agbagbadzedzewo dzi la asɔ kple?
17 Togbɔ be ehiã be míaku kutri vevie hafi axɔ Mawu ƒe yayra hã la, anyo be míaɖo ŋku edzi be nu nyui gbogbo siwo Yehowa wɔ na eƒe amewo la mate ŋu atso woƒe agbagbadzedzewo ɖeɖe ko gbɔ o. Míate ŋu atsɔ dɔ si eƒe yayra wɔna ɖe míaƒe agbagbadzedzewo dzi la asɔ kple ale si míaƒe ŋutilã kpɔa nunyiame tso nuɖuɖu nyuiwo me. Mawu wɔ míaƒe ŋutilãwo ale gbegbe be míetea ŋu sea vivi na nu siwo míeɖuna eye míekpɔa amenyinu veviwo tso wo me. Eya gbɔe nuɖuɖua hã tsona. Míenya ale si tututu wòdzɔnae be amenyinuwo va nɔa nuɖuɖu me o, eye mía dometɔ akpa gãtɔ mate ŋu aɖe ale si míaƒe ŋutilã wɔna kpɔa ŋusẽ tso nu si míeɖu me la me o. Nu si míenya koe nye be, ɖoɖo si Mawu wɔ la wɔa dɔ nyuie, eye míawo hã míewɔa akpa aɖe to nua ɖuɖu me. Ne míeɖua nu siwo me nunyiame le la, egaɖea vi na mí geɖe wu. Le mɔ ma ke nu la, Yehowa ɖo agbe mavɔ kpɔkpɔ ƒe nudidiwo ɖi, eye enaa kpekpeɖeŋu siwo míehiã be míate ŋu aɖo nudidi mawo gbɔ la mí. Eme kɔ ƒãa be, eyae wɔa dɔa ƒe akpa gãtɔ, eye edze na kafukafua. Ke hã, ele kokoko be míawɔ nu kplii aduadu, ele be míawɔ nu le ɖekawɔwɔ me kple Mawu ƒe lɔlɔ̃nu, be míaxɔ eƒe yayra.—Xag. 2:18, 19.
18. Nu kae nèɖo kplikpaa be yeawɔ, eye nu ka tae?
18 Eya ta tsɔ wò ŋutete katã wɔ dɔ ɖe sia ɖe si wode asi na wò la tso dzi blibo me. Ðo ŋu ɖe Yehowa ŋu be ana nàkpɔ dzidzedze. (Mar. 11:23, 24) Esi nèle esia wɔm la, ka ɖe edzi be “ame sia ame si le nu dim la, ekpɔnɛ.” (Mat. 7:8) Woatsɔ “agbefiakuku la” ayra amesiaminawo le dziƒo. (Yak. 1:12) Anye dzidzɔ na Kristo ƒe ‘alẽ bubuawo,’ siwo le ʋiʋlim vevie be yewoƒe asi nasu yayrawo dzi to Abraham ƒe dzidzimevia dzi la be woasee Kristo nagblɔ na yewo be: “Miva, mi ame siwo Fofonye yra, minyi fiaɖuƒe si wodzra ɖo ɖi na mi tso xexea ƒe gɔmeɖoanyiɣi la dome.” (Yoh. 10:16; Mat. 25:34) Ɛ̃, ‘ame siwo Mawu yra la anyi anyigba la dome, . . . eye woanɔ edzi tegbee.’—Ps. 37:22, 29.
Àte Ŋu Aɖe Wo Mea?
• Nu kae toɖoɖo anukwaretɔe bia?
• Nu kae hiã hafi míate ŋu axɔ Mawu ƒe yayra?
• Aleke míawɔ axɔ Mawu ƒe gbɔgbɔ kɔkɔe la, eye alekee wòate ŋu akpe ɖe mía ŋu?
[Nɔnɔmetata siwo le axa 9]
Yakob te kame kple mawudɔla aɖe be yeaxɔ Yehowa ƒe yayra.
Ðe wò hã èkua kutri vevie nenema?
[Nɔnɔmetata si le axa 10]
Mawu ƒe gbɔgbɔ kɔkɔea kpe ɖe Bezaleel kple Oholiab ŋu wowɔ dɔ si wode wo si la pɛpɛpɛ