Ƒe 2015 Teokrasi Subɔsubɔ Sukua Ana Míaƒe Nufiafia Nanyo Ðe Edzi

¹ Hakpala David ŋlɔ bena: “Nye numenyawo kple nye dzimesusuwo nedze ŋuwò, Yehowa, nye agakpe kple nye xɔnametɔ!” (Ps. 19:15) Míawo hã míedi be míaƒe nyawo nadze Yehowa ŋu, elabena míedea asixɔxɔ mɔnukpɔkpɔ si su mía si be míaƒo nu tso nyateƒea ŋu le hamea kple subɔsubɔdɔa siaa me la ŋu. Teokrasi Subɔsubɔ Sukua nye mɔ siwo dzi Yehowa tona naa hehe mí be míawɔ subɔsubɔdɔa la dometɔ ɖeka. Hehe sia yia edzi kwasiɖa sia kwasiɖa le hame siwo wu 111,000 siwo le xexea me godoo la me. Ekpe ɖe nɔvi siwo tso xexea ƒe teƒe vovovowo ŋu wova zu nya nyui gbeƒãɖela bibi siwo fiaa nu aɖaŋutɔe kple dzideƒo be wòaɖo amewo ƒe dzi gbɔ.​—Dɔw. 19:8; Kol. 4:6.

² Le ƒe 2015 suku ƒe ɖoɖowɔɖia me la, dɔdeasi aɖewo atso Nye Agbalẽ si Nye Biblia Ŋutinyawo me. Tsɔ kpe ɖe eŋu la, wotrɔ asi le ɣeyiɣi si woazã na Biblia xexlẽ me nya veviwo me dzodzro kple Dɔdeasi Gbãtɔa ŋu. Asitɔtrɔ siawo kple mɔfiame siwo ku ɖe ale si woawɔ sukudɔdeasiwo ŋu la le memama siwo gbɔna la me.

³ Biblia Xexlẽ Me Nya Veviwo: Nɔvi si wode dɔ sia asi na la azã miniti eve atsɔ adzro Ŋɔŋlɔawo me nya vevi ɖeka si me nufiame le la me tso kwasiɖaa ƒe Biblia xexlẽa me. Dzadzraɖo nyuie awɔe be woate ŋu agblɔ nya si me tsɔɖui le la na hamea le ɣeyiɣi ɖoɖia me. Eyome hamea me tɔwo azã sɛkɛnd 30 alo esi mede nenema o atsɔ agblɔ nya vevi siwo ŋu woke ɖo le kwasiɖa sia kwasiɖa ƒe Biblia xexlẽa me le miniti ade me, abe ale si ko míewɔnɛ xoxo ene. Ebia dzadzraɖo kple ame ɖokui dzi ɖuɖu be woagblɔ nya si me nufiame le le sɛkɛnd 30 ko me, gake esia nye hehe nyui aɖe na mí. Azɔ hã, enana mɔnukpɔkpɔ sua ame bubuwo si be woagblɔ nu siwo ŋu woke ɖo le numekuku siwo wowɔ la me.

⁴ Dɔdeasi Gbãtɔ: Woɖe ɣeyiɣi si woɖo ɖi na Biblia xexlẽ la dzi kpɔtɔ wònye miniti etɔ̃ alo esi made nenema o, eye nuxexlẽa ƒe didime anɔ kpuie wu. Ele be ame siwo wode nuxexlẽ asi na la nakɔ gbe dzi ato eme zi geɖe eye woalé fɔ ɖe nyawo yɔyɔ nyuie kple nuxexlẽ wòazɔ tẽe ŋu ale be woate ŋu axlẽ nua be gɔmesese nanɔ eŋu. Ele be Yehowa ƒe amewo katã nadze agbagba anye nuxlẽla nyuiwo, elabena nuxexlẽ wɔa akpa vevi aɖe le míaƒe tadedeagu me. Aleke gbegbe wòdoa dzidzɔ na mí be mía vi geɖe xlẽa nu nyuie ye nye esi! Dzilawo dze na kafukafu ɖe agbagba siwo wodzena lɔlɔ̃tɔe kpena ɖe wo viwo ŋu be woazu nuxlẽla nyuiwo la ta.

⁵ Dɔdeasi Evelia: Esia axɔ miniti atɔ̃ eye woadee asi na nɔvinyɔnu. Tanya si wotia nɛ la ŋu dɔe wòawɔ. Ele be woazã ɖaseɖiɖimɔnu aɖe si sɔ ɖe ale si nɔnɔmea le le miaƒe anyigbamamaa me la nu. Ne Nye Agbalẽ si Nye Biblia Ŋutinyawo mee dɔdeasia tso la, sukuvia nadzro nyatia me, wòatia ŋɔŋlɔ siwo ɖo kpe nyaa dzi eye wòahe susu ayi nu si míate ŋu asrɔ̃ tso Biblia me ŋutinyaa me la dzi. Woate ŋu atsɔ ŋɔŋlɔ bubu siwo de nu nyaa me la ade eme. Sukudzikpɔlaa atia kpeɖeŋutɔ ɖeka na sukuvia.

⁶ Dɔdeasi Etɔ̃lia: Esia axɔ miniti atɔ̃ eye woadee asi na nɔviŋutsu alo nɔvinyɔnu. Ne nɔvinyɔnue wotsɔe na la, awɔe abe Dɔdeasi Evelia ene. Ne nɔviŋutsue wotsɔe na eye Nye Agbalẽ si Nye Biblia Ŋutinyawo mee wòtso la, ke anye nuƒo si ŋu wòatrɔ asi le be wòasɔ na kpekpea valawo. Sukuvia awɔ dɔ tso tanya si wonae la ŋu, atia mawunyakpukpui siwo sɔ, eye wòagblɔ nu siwo míate ŋu asrɔ̃ tso Biblia me ŋutinyaa me.

⁷ Dɔdeasi Etɔ̃lia Ŋuti Asitɔtrɔ Yeye Na Nɔviŋutsuwo: Ne dɔdeasia metso Nye Agbalẽ si Nye Biblia Ŋutinyawo me o la, ele be woatrɔ asi le eŋu wòanye ƒometadedeagu alo eŋu dɔ wɔwɔ le gbeadzi ƒe wɔwɔfia. Zi geɖe la, sukudzikpɔlaa ye atia kpeɖeŋutɔ kple ɖaseɖimɔnu si woazã. Ele be kpeɖeŋutɔ la nanye sukuvia ƒe ƒomea me tɔ loo alo nɔviŋutsu aɖe si le hamea me. Sukuvia ate ŋu awɔ mawunyakpukpui bubu siwo he susu yi Biblia me gɔmeɖose siwo wɔ ɖeka kple tanyaa dzi la ŋu dɔ. Woate ŋu ade dɔ sia asi na hamemetsitsiwo ɣeaɖewoɣi. Hamemetsitsiwo ŋutɔwo ate ŋu atia kpeɖeŋutɔ kple ɖaseɖiɖimɔnu si woazã. Ðikeke mele eme o be ade dzi ƒo na nɔviwo be woakpɔ ale si hamemetsitsiwo le nufiafiaɖaŋuwo ŋu dɔ wɔm le nusɔsrɔ̃ kple woƒe ƒomea me tɔ alo kple nɔviŋutsu bubu aɖe me.

⁸ Aɖaŋuɖoɖo: Le sukudɔdeasi ɖe sia ɖe wɔwɔ vɔ megbe la, sukudzikpɔlaa azã miniti eve atsɔ akafu sukuvia ahaɖo aɖaŋu siwo wòtu ɖe Na Teokrasi Subɔsubɔ Suku ƒe Hehenana Naɖe Vi na Wò gbalẽa dzi la nɛ. Ne sukudzikpɔlaa yɔ ame si ava wɔ sukudɔdeasi aɖe la, mayɔ nuƒoƒo ƒe nudidi si ŋu sukuvia awɔ dɔ tsoe la o. Le dɔdeasi ɖe sia ɖe megbe la, sukudzikpɔlaa nakafu sukuvia ale si dze, wòagblɔ nuƒoƒo ƒe nudidi si ŋu wòwɔ dɔ tsoe, eye wòahe susu ayi nudidia ƒe akpa siwo sukuvia wɔ nyuie la dzi, alo wòaɖe nu si tae sukuvia agate ŋu atrɔ asi le nudidia ƒe akpa ma ŋu wòaganyo wu la me, gake wòawɔ esia dɔmenyotɔe.

⁹ Sukuvia ƒe aɖaŋuɖogbalẽa dze le eƒe Subɔsubɔ Suku gbalẽa ƒe axa 79 va ɖo 81. Ne sukuvia wɔ eƒe dɔdeasia vɔ la, sukudzikpɔlaa ade dzesi nu siwo hiã la ɖe sukuvia ƒe agbalẽa me eye wòabia eya ŋutɔ ɖeɖe be ewɔ dɔdeasi si kpe ɖe nuƒoƒo ƒe nudidi si wode esi ŋu la hã. Woate ŋu akafu sukuvia ahaɖo aɖaŋu bubu siwo akpe ɖe eŋu la nɛ le kpakpã vɔ megbe alo ɣebubuɣi. Ele be woabu kpekpeɖeŋu si woana sukuvi ɖe sia ɖe le sukua me la be enye mɔnukpɔkpɔ si akpe ɖe eŋu wòayi ŋgɔ le gbɔgbɔ me.​—1 Tim. 4:15.

¹⁰ Ne ame si wode sukudɔdeasi asi na gbɔ game dzi la, sukudzikpɔlaa alo eƒe kpeɖeŋutɔ nanɔ ŋudzɔ be wòawɔ dzesi nɛ. Le kpɔɖeŋu me, ŋuɖɔɖotɔe la, ate ŋu aƒo ga alo aƒo nane wòaɖi kɛkɛkɛ atsɔ ana nyanya sukuvia be game su. Sukuvia nagado toku dzesia o, ke boŋ wòase nyaa ɖe afi si wòɖo ahadzo le kplɔ̃a ta.​—Kpɔ Subɔsubɔ Suku gbalẽa, axa 282, mm. 4.

¹¹ Míele dzi dem ƒo na ame siwo katã ɖo nudidia gbɔ la be woaŋlɔ ŋkɔ ɖe Teokrasi Subɔsubɔ Sukua me. (Kpɔ Subɔsubɔ Suku gbalẽa, axa 282, mm. 6.) Hehe si Yehowa ƒe amewo xɔna le suku sia me la le kpekpem ɖe wo ŋu be woaƒo nu tso Fiaɖuƒe ŋuti nya nyuia ŋu eye woafia nu tso eŋu kple kakaɖedzi, eye woawɔ esia le lɔlɔ̃ kple bubu me. Ðikeke mele eme o be, ne Yehowa kpɔ ame siwo katã teokrasi hehenanaa le vi ɖem na wole ekafum la, edzɔa dzi nɛ!​—Ps. 148:12, 13; Yes. 50:4.