Ðekawɔwɔ Dea Dzesi Tadeagula Vavãwo
“Maƒo wo nu ƒu [ɖekae] ɖe lãkpɔ me abe alẽwo ene.”—MIXA 2:12.
1. Aleke nuwɔwɔwo ɖea Mawu ƒe nunya fianae?
HAKPALA aɖe gblɔ be: “Yehowa, wò dɔwɔwɔwo sɔ gbɔ loo! Èwɔ wo katã le nunya me; anyigba yɔ fũ kple wò nuwɔwɔwo.” (Ps. 104:24) Ale si nu gbagbe hamehame miliɔn geɖeawo—atiwo, nudzodzoewo, lãwo, kple nugbagbevi suesue wɔnuku siwo le anyigba me la—doa alɔ wo nɔewoe la ɖea Mawu ƒe nunya fiana. Nenema kee nu vovovo akpe geɖewo—tso ŋutilã ƒe ŋutinu gãwo dzi va se ɖe nugbagbevi suesuesue siwo le lãmenugbagbeviwo me dzi la—katã ƒe dɔwɔwɔ le ɖekawɔwɔ me ye lé wò ameti bliboa ɖe te eye nèle lãmesẽ me.
2. Abe ale si wòdze le nɔnɔmetata si le axa 13 lia me ene la, nu ka tae ƒe alafa gbãtɔ me Kristotɔwo ƒe ɖekawɔwɔa ate ŋu awɔ na amewo abe nukunu ene?
2 Yehowa wɔ ameƒomea le mɔ aɖe nu be wohiã na wo nɔewo ƒe kpekpeɖeŋu. Dzedzeme, amenyenye, kple ŋutete ƒomevi vovovowoe le amegbetɔwo si. Gakpe ɖe eŋu la, Mawu tsɔ mawumenɔnɔme siwo akpe ɖe amegbetɔwo ŋu be woawɔ nu kple wo nɔewo le ɖekawɔwɔ me ahakpe ɖe wo nɔewo ŋu la de atsu kple asi gbãtɔa me. (1 Mose 1:27; 2:18) Ke hã fifia la, ameƒomea katã te ɖe aga tso Mawu gbɔ, eye tso blema ke la, ameƒome bliboa mete ŋu wɔ nu le ɖekawɔwɔ me kpɔ o. (1 Yoh. 5:19) Eya ta ne amewo bu Kristotɔwo ƒe hame si nɔ anyi le ƒe alafa gbãtɔ me la ŋu be emetɔwo nye ame ƒomevi vovovo siwo dometɔ aɖewo nye Efeso kluviwo, Hela nyɔnu xɔŋkɔwo, Yuda ŋutsu agbalẽnyalawo, kple ame siwo nye trɔ̃subɔlawo tsã la, woƒe ɖekawɔwɔa ate ŋu awɔ na wo abe nukunu ene.—Dɔw. 13:1; 17:4; 1 Tes. 1:9; 1 Tim. 6:1.
3. Aleke Biblia ɖɔ ɖekawɔwɔ si le Kristotɔwo domee, eye nu kawo mee míadzro?
3 Tadedeagu vavãtɔ kpena ɖe amewo ŋu wowɔa nu le ɖekawɔwɔ me abe ale si míaƒe ŋutilã ƒe ŋutinuwo wɔa nu aduadu ene. (Mixlẽ 1 Korintotɔwo 12:12, 13.) Nu siwo me míadzro le nyati sia me la ƒe ɖewoe nye: Alekee tadedeagu vavãtɔ naa amewo wɔa ɖeka? Nu ka tae Yehowa ɖeka koe nye ame si ate ŋu ana ame miliɔn geɖe siwo tso dukɔwo katã me la nawɔ ɖeka? Nu siwo xea mɔ na ɖekawɔwɔ kawo dzie Yehowa kpena ɖe mía ŋu míeɖuna? Eye le ɖekawɔwɔ gome la, alekee Kristotɔ vavãwo to vovo tso Kristodukɔa gbɔe?
Aleke Tadedeagu Vavãtɔ Naa Amewo Wɔa Ðeka?
4. Alekee tadedeagu vavãtɔ naa amewo wɔa ɖeka?
4 Ame siwo katã nɔa agbe ɖe tadedeagu vavãtɔ nu la lɔ̃ ɖe edzi be esi wònye be Yehowae wɔ nuwo katã ta la, eyae nye xexea me katã ƒe Dziɖulagã si dze. (Nyaɖ. 4:11) Eya ta togbɔ be Kristotɔ vavãwo nye dukɔ vovovowo me tɔwo eye woƒe nɔnɔmewo le vovovo hã la, Mawu ƒe sewo kpakple Bible me gɔmeɖose ɖeka ma ke dzi ko wo katã wowɔna. Esɔ nyuie be tadeagula vavãwo katã yɔa Yehowa be “Fofo.” (Yes. 64:7; Mat. 6:9) Eya ta wo katã wonye gbɔgbɔmenɔviwo eye woate ŋu ase vivi le ɖekawɔwɔ nyui si ŋu hakpala la ƒo nu tsoe la me. Egblɔ be: “Kpɔ ɖa, aleke mehenyo, eye wòvivinae, ne nɔviwo le afi ɖeka!”—Ps. 133:1.
5. Nɔnɔme kae wɔe be tadeagula vavãwo wɔ ɖeka?
5 Togbɔ be Kristotɔ vavãwo mede blibo o hã la, wodea ta agu le ɖekawɔwɔ me elabena wosrɔ̃ ale si woalɔ̃ wo nɔewoe. Yehowa fiaa wo be woalɔ̃ ame le mɔ aɖe si ame bubu aɖeke mate ŋu awɔe le o nu. (Mixlẽ 1 Yohanes 4:7, 8.) Eƒe Nyaa gblɔ be: “Mido dɔmetɔtrɔ ƒe veveseɖeamenu, dɔmenyonyo, ɖokuibɔbɔ, tufafa, kple dzigbɔgbɔ blewu. Miyi edzi miado dzi anɔ anyi kple mia nɔewo, eye miatsɔ anɔ mia nɔewo kem faa ne nya aɖe le ame aɖe si ɖe nɔvia ŋu. Ale si Yehowa tsɔ ke mi faa la, miawo hã miwɔ nenema ke. Gake hekpe ɖe nu siawo katã ŋu la, mido lɔlɔ̃, elabena enye ɖekawɔwɔ ƒe nublanu deblibo.” (Kol. 3:12-14) Nublanu deblibo sia—si nye lɔlɔ̃—nye nɔnɔme vevi aɖe si dea dzesi Kristotɔ vavãwo. Alo ɖe wò ŋutɔ mèkpɔe be ɖekawɔwɔ sia nye nɔnɔme ɖedzesi aɖe le tadeagula vavãwo ŋu oa?—Yoh. 13:35.
6. Aleke Fiaɖuƒemɔkpɔkpɔa wɔnɛ be ɖekawɔwɔ nɔa mía dome?
6 Nu bubu si wɔe be tadeagula vavãwo wɔ ɖekae nye be wo katã woxɔe se be Mawu ƒe Fiaɖuƒea koe nye ameƒomea ƒe mɔkpɔkpɔ ɖeka kolia. Wonyae be eteƒe madidi o, Mawu ƒe Fiaɖuƒea ava xɔ ɖe amegbetɔwo ƒe dziɖuɖuwo teƒe eye wòahe ŋutifafa vavãtɔ si anɔ anyi ɖaa la avae na ameƒomea me tɔ toɖolawo. (Yes. 11:4-9; Dan. 2:44) Eya ta Kristotɔ vavãwo wɔna ɖe nya si Yesu gblɔ na eyomedzelawo la dzi. Egblɔ be: “Womenye xexea ƒe akpa aɖeke o, abe ale si ko nyemenye xexea ƒe akpa aɖeke o la ene.” (Yoh. 17:16) Kristotɔ vavãwo medea akpa aɖeke dzi le nyaʋiʋli siwo yia edzi le xexea me la me o; esia wɔnɛ be ɖekawɔwɔ kpɔtɔ nɔa wo dome ne ame siwo dome wole la le aʋa wɔm kple wo nɔewo gɔ̃ hã.
Woxɔa Mɔfiame Tso Teƒe Ðeka
7, 8. Alekee Biblia me mɔfiame siwo míexɔna la nana be ɖekawɔwɔ nɔa mía dome?
7 Nu si na ɖekawɔwɔ nɔ ƒe alafa gbãtɔ me Kristotɔwo domee nye be woxɔa tutuɖo tso teƒe ɖeka. Wokpɔe dze sii be Yesue nɔ nu fiam hamea henɔ mɔ fiamee to dziɖuha aɖe, si me tɔwo nye apostoloawo kple hamemetsitsi siwo nɔ Yerusalem, la dzi. Ŋutsu veviedonula siawo tua woƒe nyametsotsowo ɖe Mawu ƒe Nyaa dzi eye wodɔa dzikpɔla mɔzɔlawo wotsɔa woƒe mɔfiamewo yina na hame siwo le du vovovowo me. Biblia gblɔ le dzikpɔla siawo dometɔ aɖewo ŋu be: “Esi wonɔ duawo me tom la, wotsɔa nyametsotso siwo apostoloawo kple hamemetsitsi siwo le Yerusalem wɔ la ŋuti ɖoɖoawo naa wo, be woalé wo me ɖe asi.”—Dɔw. 15:6, 19-22; 16:4.
8 Nenema kee egbea hã, Dziɖuha aɖe si me tɔwo nye Kristotɔ siwo wotsɔ gbɔgbɔ si ami na la wɔe be ɖekawɔwɔ le hamea me le xexea me katã. Dziɖuha la taa agbalẽ siwo me gbɔgbɔmenya tuameɖowo nɔna la ɖe gbegbɔgblɔ geɖewo me. Mawu ƒe Nya dzie wotua gbɔgbɔmenuɖuɖu siawo ɖo. Eya ta menye amewo gbɔe woƒe nufiafiawo tsona o, ke boŋ Yehowa gbɔe wotsona.—Yes. 54:13.
9. Alekee dɔ si Mawu de mía si la kpena ɖe mía ŋu míewɔa ɖeka?
9 Kristotɔ dzikpɔlawo gadoa ɖekawɔwɔ ɖe ŋgɔ to ŋgɔxɔxɔ le gbeƒãɖeɖedɔa me dzi. Gbɔgbɔ si naa ɖekawɔwɔ kplikplikpli nɔa ame siwo wɔa dɔ aduadu le Mawu ƒe dɔa me dome la tri akɔ wu gbɔgbɔ si ƒoa amewo nu ƒu le xexea me le hadomewɔna dzrowo me la. Menye ɖe woɖo Kristo hamea be wòanɔ abe hadomehabɔbɔ aɖe ene o, ke boŋ ɖe woɖoe anyi be wòade bubu Yehowa ŋu eye wòana woawɔ dɔ aɖe ade goe—si nye gbeƒãɖeɖe nya nyuia, nusrɔ̃lawo wɔwɔ, kple hamea tutuɖo. (Rom. 1:11, 12; 1 Tes. 5:11; Heb. 10:24, 25) Esia tae apostolo Paulo te ŋu gblɔ tso Kristotɔwo ŋu be: “Miele tsitre sesĩe le gbɔgbɔ ɖeka me, hetsɔ luʋɔ ɖeka le nya nyui la ƒe xɔse la ta ʋlim aduadu.”—Flp. 1:27.
10. Mɔ siwo nu Mawu na eƒe amewo wɔ ɖeka le la dometɔ aɖewo ɖe?
10 Eya ta nu siwo na mí Yehowa ƒe amewo míewɔ ɖekae nye be míelɔ̃ ɖe Yehowa ƒe dziɖuɖu dzi, míelɔ̃ mía nɔviwo, míele mɔ kpɔm na Mawu ƒe Fiaɖuƒea, eye míedea bubu ame siwo Mawu ɖo be woaxɔ ŋgɔ na mí la ŋu. Yehowa kpena ɖe mía ŋu míeɖua nɔnɔme aɖewo siwo le míaƒe blibomademade ta la, woate ŋu agblẽ míaƒe ɖekawɔwɔa me la dzi.—Rom. 12:2.
Ale Si Míaɖu Dada Kple Ŋuʋaʋã Dzi
11. Nu ka tae dada maa amewo dome, eye alekee Yehowa kpena ɖe mía ŋu be míaɖu edzi?
11 Dada dea mama amewo dome. Dadala bua eɖokui be yenyo wu ame bubuwo eye zi geɖe la, adegbeƒoƒo dzɔa dzi nɛ. Gake zi geɖe la, nɔnɔme sia xea mɔ na ɖekawɔwɔ; ame siwo sea eƒe adegbeƒoƒoa la ate ŋu ava nɔ ŋu ʋãmee. Nusrɔ̃la Yakobo gblɔ na mí tẽe be: “Adegbeƒoƒo sia katã nye nu vɔ̃ɖi.” (Yak. 4:16) Menye lɔlɔ̃ɖeɖefia kura be woana ame aɖe nase le eɖokui me be yemele ɖeke me o. Eɖe dzesi ŋutɔ be Yehowa ɖo ɖokuibɔbɔ ƒe kpɔɖeŋu ɖi na mí le ale si wòwɔa nu kple mí ame siwo nye ame madeblibowo la me. David ŋlɔ bena: “[Mawu ƒe ɖokuibɔbɔe, NW] wɔm mezu gã.” (2 Sam. 22:36) Mawu ƒe Nya la kpena ɖe mía ŋu míewɔa susu ŋu dɔ nyuie eye etoa esia me kpena ɖe mía ŋu míeɖua dada dzi. Gbɔgbɔ ʋã Paulo wòbia be: “Ame kae na nèto vovo tso ame bubu gbɔ? Ɛ̃, nu kae le asiwò, si menye ɖe nèxɔe o? Ke ne ɖe nèxɔe la, ekema nu ka tae nèle adegbe ƒom abe menye ɖe nèxɔe o ene?”—1 Kor. 4:7.
12, 13. (a) Nu ka tae wòate ŋu adzɔ bɔbɔe be míaʋã ŋu ame bubuwo? (b) Ne míebua mía nɔviwo abe ale si Yehowa bua woe ene la, nu kae dona tso eme?
12 Ŋuʋaʋã hã xea mɔ na ɖekawɔwɔ zi geɖe. Esi míenyi blibomademade ƒe dome ta la, “ŋubiabiã ƒe susu” le mí katã me, eye ate ŋu adzɔ ɣeaɖewoɣi be Kristotɔ siwo subɔ ƒe geɖe la gɔ̃ hã naʋã ŋu nɔvi bubuwo ɖe nɔnɔme siwo me wole, woƒe nunɔamesiwo, subɔsubɔmɔnukpɔkpɔwo, alo woƒe ŋutetewo ta. (Yak. 4:5) Le kpɔɖeŋu me, ate ŋu adzɔ be nɔviŋutsu aɖe si si ƒome le la nava nɔ ŋu ʋãm ɣeyiɣiawo katã ƒe subɔla aɖe le subɔsubɔmɔnukpɔkpɔ siwo le esi ta, evɔ mabu eŋu kpɔ be ŋuʋaʋã vi aɖe ate ŋu anɔ ɣeyiɣiawo katã ƒe subɔlaa hã me ɖe ƒome ƒe ta aɖe si si viwo le la ŋu o. Nu kae míate ŋu awɔ be ŋuʋaʋã ma tɔgbi nagagblẽ míaƒe ɖekawɔwɔa me o?
13 Nu si akpe ɖe mía ŋu míaƒo asa na ŋuʋaʋãe nye be míaɖo ŋku edzi be Biblia tsɔ Kristo hamea me tɔ siwo nye amesiaminawo sɔ kple ŋutilã ƒe ŋutinuwo. (Mixlẽ 1 Korintotɔwo 12:14-18.) Le kpɔɖeŋu me, togbɔ be amewo ate ŋu akpɔ wò ŋkuwo bɔbɔe wu wò dzi hã la, ɖe wo kpakple eve la mele vevie na wò oa? Nenema kee Yehowa dea asixɔxɔ hamea me tɔwo katã ŋu, togbɔ be wo dometɔ aɖewo ate ŋu aɖe dzesi wu bubuawo ɣeaɖewoɣi gɔ̃ hã. Eya ta mina míanɔ mía nɔviwo bum abe ale si Yehowa bua woe ene. Le esi míanɔ ŋu ʋãm ame bubuwo teƒe la, míate ŋu anɔ nu wɔm ɖe wo ŋu vividoɖeameŋutɔe eye míatsɔ ɖe le eme na wo vevie. Ne míewɔe alea la, míenana vovototo si le Kristotɔ vavãwo kple Kristodukɔa ƒe sɔlemehawo me tɔwo dome la dzena ƒãa.
Ale Si Mama Le Kristodukɔa Me
14, 15. Nu kawoe wɔe be mama ɖo Kristotɔ siwo do tso xɔsegbegbe me la dome?
14 Ðekawɔwɔ si le Kristotɔ vavãwo dome la na vovototo gã aɖe le woa kple Kristodukɔa ƒe sɔlemeha siwo me nyaʋiʋli geɖewo yia edzi le la dome. Kaka ƒe alafa enelia naɖo la, Kristotɔ xɔsegbelawo va sɔ gbɔ ale gbegbe be Roma fiagã aɖe si nye trɔ̃subɔla la va xɔ ŋgɔ na wo, si wɔe be Kristodukɔa va keke ta. Emegbe la, nugɔmemasemase va te mododoɖa le wo dome, eye dukɔ vovovo siwo dze Kristotɔnyenye si Roma fiaɖuƒea do ɖe ŋgɔ yome la te mama tso Roma Fiaɖuƒea gbɔ, eye woɖo woawo ŋutɔwo ƒe Dukɔ ƒe subɔsubɔhawo anyi.
15 Fiaɖuƒe siwo le Kristodukɔa me la wɔ aʋa kple wo nɔewo ƒe alafa geɖe. Le ƒe alafa 17 lia kple 18 lia me la, dukɔ siwo nye Britain, France, kple United States la me tɔwo do ɖokuitsɔtsɔna woƒe Dukɔa ƒe gbɔgbɔ ɖe ŋgɔ, eye esia wɔe be dulɔlɔ̃ ŋutɔ va le abe subɔsubɔha ene le eɖokui si. Le ƒe alafa 19 lia kple 20 lia me la, dulɔlɔ̃ ƒe gbɔgbɔ va nɔ ŋusẽ kpɔm ɖe ameƒomea me tɔ akpa gãtɔ dzi. Eye mlɔeba la, Kristodukɔa ƒe sɔlemehawo va ma kakɛkakɛ hezu kɔmama geɖe, siwo dometɔ akpa gãtɔ ɖe mɔ ɖe dulɔlɔ̃ nuwɔnawo ŋu. Sɔlemedelawo yi ɖawɔ aʋa kple woƒe hamevi siwo nye dukɔ bubu me tɔwo la gɔ̃ hã. Eya ta egbea la, dukɔmevinyenye kple kɔmama vovovoawo ƒe dzixɔsewo de mama Kristodukɔa me.
16. Nyaʋiʋli kawo tɔgbie de mama Kristodukɔa me?
16 Le ƒe alafa 20 lia me la, Kristodukɔa ƒe kɔmama alafa geɖewo dze agbagba be yewoana ɖekawɔwɔ nanɔ yewo dome. Gake le agbagba siawo dzedze ƒe blananewo megbe la, sɔlemeha ʋɛ aɖewo koe te ŋu ƒo ƒu wɔ ɖeka. Ke hã, nyaʋiʋli siwo ku ɖe amedzɔtsolãme ƒe nufiafiaa, fuɖeɖe, vidzinu ɖeka tɔgbi tɔwo ƒe gbɔdɔdɔ, kple nyɔnuwo ɖoɖo nunɔlawoe ŋu la gakpɔtɔ ma sɔlemedelawo me kokoko. Le Kristodukɔa ƒe sɔlemeha aɖewo me la, nu si ŋgɔnɔlawo wɔna tsɔ dzea agbagba be yewoana kɔmama vovovowo nawɔ ɖekae nye be wogblɔna na woƒe hameviwo be dzixɔse siwo de mama amewo dome tsã la mele vevie tututu o. Ke hã, dzixɔse mawo ƒe vevienyenye dzi ɖeɖe kpɔtɔ alea na amewo ƒe xɔse va gbɔdzɔ, eye esia menana be Kristodukɔa si me ma la wɔa ɖeka le mɔ aɖeke nu o.
Dukɔ Aɖe Me Tɔ Nyenye Mema Tadeagula Vavãwo Dome O
17. Alekee wogblɔe ɖi be tadedeagu vavãtɔ aƒo amewo nu ƒu ɖekae “le ŋkeke mlɔeawo me”?
17 Togbɔ be ameƒomea me ma ŋɔdzitɔe egbea wu ɣeyiɣi ɖe sia ɖe hã la, ale si tadeagula vavãwo ya wɔ ɖeka la na woto vovo. Mawu ƒe nyagblɔɖila Mixa gblɔ ɖi be: “Maƒo wo nu ƒu [ɖekae] ɖe lãkpɔ me abe alẽwo ene, abe lãha le lãnyiƒe titina ene.” (Mixa 2:12) Mixa gblɔ ale si tadedeagu vavãtɔ akɔ ta agbɔ subɔsubɔ bubuwo katã ŋu la ɖi, woɖanye alakpamawuwo subɔsubɔ loo alo Dukɔa subɔsubɔ abe mawu ene o. Eŋlɔ bena: “Eye wòava me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, eye wòaƒo togbɛwo ta, eye anyigba dzi dukɔwo aƒo zi ɖe eŋu. Elabena ne dukɔwo katã dometɔ ɖe sia ɖe le zɔzɔm le eƒe mawu ƒe ŋkɔ me hã la, míawo ya míazɔ le Yehowa, mía Mawu la ƒe ŋkɔ me ɖaa tegbee.”—Mixa 4:1, 5.
18. Tɔtrɔ kawoe tadedeagu vavãtɔ kpe ɖe mía ŋu míewɔ?
18 Mixa gblɔ ale si tadedeagu vavãtɔ ana ame siwo nye futɔwo tsã nava wɔ ɖeka la hã ɖi. “[Ame siwo tso dukɔ geɖewo me] atso agblɔ bena: ‘Mina míayi Yehowa ƒe to la kple Yakob ƒe Mawu la ƒe aƒe la gbɔ, ne wòafia nu mí, eye míazɔ eƒe toƒewo!’ . . . Woatsɔ woƒe yiwo atu agblenuwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ azɔ o.” (Mixa 4:2, 3) Ame siwo ɖe asi le mawu siwo amegbetɔwo wɔ alo woƒe dukɔa subɔsubɔ ŋu heku ɖe Yehowa subɔsubɔ ŋu la wɔ ɖeka le xexea me godoo. Mawu fiaa lɔlɔ̃ ƒe mɔwo woamawo.
19. Nu ka ƒe kpeɖodzie ale si ame miliɔn geɖewo le ɖeka wɔm le tadedeagu vavãtɔ me la nye?
19 Ale si Kristotɔ vavãwo wɔ ɖeka le xexea me godoo egbea la tɔgbi meli o, eye enye kpeɖodzi sẽŋu aɖe be Yehowa gale mɔ fiam eƒe amewo to eƒe gbɔgbɔa dzi. Ame siwo tso dukɔwo katã me la le ɖeka wɔm ale gbegbe be esia tɔgbi medzɔ le amegbetɔwo ƒe ŋutinya me kpɔ o. Esia nye nu si Nyaɖeɖefia 7:9, 14 me nyawo fia la me vava le mɔ ɖedzesi aɖe nu, eye esia ɖee fia be eteƒe madidi o, mawudɔlawo aɖe asi le “ya” siwo atsrɔ̃ fifi nuɖoanyi vɔ̃ɖi sia la ŋu. (Mixlẽ Nyaɖeɖefia 7:1-4, 9, 10, 14.) Ðe menye mɔnukpɔkpɔe wònye be míenye xexea me katã ƒe nɔviwo ƒe habɔbɔ wɔɖeka la me tɔwo oa? Alekee mía dometɔ ɖe sia ɖe ate ŋu akpe asi ɖe ɖekawɔwɔ sia ŋu? Míadzro nya sia me le nyati si kplɔe ɖo me.
Aleke Nàɖo Wo Ŋui?
• Alekee tadedeagu vavãtɔ naa amewo wɔa ɖeka?
• Nu kae míate ŋu awɔ be ŋuʋaʋã nagagblẽ míaƒe ɖekawɔwɔa me o?
• Nu ka tae dukɔ aɖe me tɔ nyenye medea mama tadeagula vavãwo dome o?
[Nɔnɔmetata si le axa 13]
Ƒe alafa gbãtɔ me Kristotɔwo nye ame ƒomevi vovovo siwo tso dukɔ vovovowo me
[Nɔnɔmetata siwo le axa 15]
Ne èkpɔa gome le Fiaɖuƒe Akpatawo tutu dɔ me la, alekee wòkpea asi ɖe míaƒe ɖekawɔwɔa ŋu?