Ta Etɔ̃lia

Wodo Wo Kpɔ—Gake Wowɔ Nuteƒe Na Yehowa!

 1, 2. Nudzɔdzɔ ɖedzesi kawoe wogblɔ tsɔ dze Daniel ƒe nuŋlɔɖia gɔmee?

DANIEL ƒe nyagblɔɖigbalẽa dze egɔme kple ŋutinya si ku ɖe ɣeyiɣi si me tɔtrɔ gã aɖe nɔ edzi yim le dukɔwo dome ŋu. Ðeko woxɔ Asiriatɔwo ƒe fiadu Niniwe vɔ enye ma. Wobɔbɔ Egipte ɖe anyi wòzu dukɔ tsɛ si le Yuda-nyigba ƒe anyiehe gome. Eye Babilon si zu fiaɖuƒe gã la nɔ ŋusẽ kpɔm wu le xexemedziɖuɖu ƒe ʋiʋli la me.

² Le ƒe 625 D.M.Ŋ. me la, Egiptetɔ Farao Nexo dze agbagba zi mamlɛtɔ be yeaxe mɔ ɖe Babilon-fiaɖuƒea ƒe takeke va anyiehe gome nu. Le esia ta ekplɔ eƒe aʋakɔ yi Karkemis si le Frat Tɔsisia ƒe goawo dzi le eƒe dzigbe gome. Aʋa ma si wova yɔ be Karkemis-ʋa la nye ŋutinya me nudzɔdzɔ si tso nya sia nya me. Babilon-ʋakɔ si Fiavi Nebukadnezar nɔ ŋgɔ na ɖu Farao Nexo ƒe aʋakɔwo dzi gbidii. (Yeremya 46:2) Esi aʋadziɖuɖua de dzo lãme na Nebukadnezar la, eyi edzi va ɖu Siria kple Palestina dzi, eye wòto esia me he Egiptetɔwo ƒe ŋusẽkpɔkpɔ ɖe nuto sia dzi va nuwuwui. Esi fofoa Nabopolassar ku ko hafi wòɖe asi le eƒe aʋawɔwɔa ŋu vie.

 3. Nukae do tso eme esi Nebukadnezar ho ɖe Yerusalem ŋu zi gbãtɔ?

³ Le ƒe si kplɔe ɖo me la, Nebukadnezar—si woɖo zi dzi wòzu Babilon-fia azɔ la—gatrɔ eƒe susu ɖe eƒe aʋawɔwɔ le Siria kple Palestina ŋu ake. Ɣeyiɣi sia mee wòva Yerusalem zi gbãtɔ. Biblia ka nya ta be: “Eŋɔli Babel-fia Nebukadnezar ho va, eye Yoyakim zu etevi ƒe etɔ̃; tete wòdze aglã ɖe eŋu.”—Fiawo II, 24:1.

NEBUKADNEZAR VA ÐO YERUSALEM

 4. Aleke wòle be míase nyagbɔgblɔ si nye “le Yuda-fia Yoyakim ƒe fiaɖuɖu ƒe ƒe etɔ̃lia me” si le Daniel 1:1 la gɔmee?

⁴ Nyagbɔgblɔ si nye “ƒe etɔ̃” la le vevie na mí, elabena Daniel ƒe agbalẽa ƒe gɔmedzenya xlẽ be: “Le Yuda-fia Yoyakim ƒe fiaɖuɖu ƒe ƒe etɔ̃lia me la Babel-fia Nebukadnezar ho ɖe Yerusalem ŋu, eye wòɖe to ɖee.” (Daniel 1:1) Le Yoyakim, amesi ɖu fia tso ƒe 628 vaseɖe 618 D.M.Ŋ. me ƒe dziɖuɣi bliboa ƒe ƒe etɔ̃lia me la, Nebukadnezar mekpɔ zu “Babel-fia” haɖe o ke boŋ enye fiavi si woava ɖo fiae. Le ƒe 620 D.M.Ŋ. me la, Nebukadnezar ka adzɔ na Yoyakim be wòanɔ xexem. Gake anɔ ƒe etɔ̃ megbe la, Yoyakim dze aglã ɖe eŋu. Aleae wòdzɔe be le ƒe 618 D.M.Ŋ. me, alo le Yoyakim si nɔ Babilon te ƒe dziɖuɣi ƒe ƒe etɔ̃lia me la, Fia Nebukadnezar va Yerusalem zi evelia be yeava he to na Yoyakim si dze aglã la.

 5. Nukae do tso eme esi Nebukadnezar ho ɖe Yerusalem ŋu zi evelia?

⁵ Nusi do tso toɖeɖe sia mee nye be “[Yehowa] tsɔ Yuda-fia Yoyakim kple Mawu ƒe aƒe me nu aɖewo de asi nɛ.” (Daniel 1:2) Anɔ eme be ɖe woɖo nugbe ɖe Yoyakim ŋu wui alo eku le aglãdzevuwɔwɔ aɖe me le esi woɖe to ɖe wo megbe kpuie. (Yeremya 22:18, 19) Le ƒe 618 D.M.Ŋ. me la, viaŋutsu Yoyaxin si xɔ ƒe 18 va zu fia ɖe eteƒe. Gake ɣleti etɔ̃ kple ŋkeke ewo koe Yoyaxin tsɔ ɖu fiae, eye ena ta le ƒe 617 D.M.Ŋ. me.—Tsɔe sɔ kple Fiawo II, 24:10-15.

 6. Nukae Nebukadnezar wɔ kple Yerusalem-gbedoxɔa me nu kɔkɔewo?

⁶ Yerusalem-gbedoxɔa me nu kɔkɔewo zu aboyonu na Nebukadnezar wòlɔ “wo yi eƒe mawu ƒe nɔƒe le Sinear-nyigba dzi, eye wòtsɔ nuawo de eƒe mawu [Marduk, alo Merodax le Hebrigbe me] ƒe nudzraɖoƒe.” (Daniel 1:2; Yeremya 50:2) Wofɔ Babilontɔwo ƒe nuŋlɔɖi aɖe si me woɖee fia le be Nebukadnezar gblɔ le Marduk ƒe mawuxɔa ŋu be: “Metsɔ klosalo kple sika kple kpe xɔasiwo de eme . . . eye mewɔ afima nye fiaɖuƒea ƒe nudzraɖoƒee.” Míagaxlẽ nu tso nuzazã kɔkɔe siawo ŋu ne míeɖo Fia Belsazar ƒe ŋkekea me nudzɔdzɔwo dzi.—Daniel 5:1-4.

YERUSALEM SƆHƐ SIWO TSO BUBUMEWO DOME

 7, 8. Nukae míate ŋu akpɔ le Daniel 1:3, 4, kple 6 le ƒome siwo me Daniel kple eƒe zɔhɛ etɔ̃awo tso ŋu?

⁷ Menye Yehowa ƒe gbedoxɔa me nuwo koe wolɔ yi Babilon o. Nuŋlɔɖia gblɔ be: “Eye fia la de se na aƒedzikpɔlawo ƒe amegã Aspenaz be, wòaɖe ŋutsuviwo tso Israel-viwo dome, amesiwo tso fiaƒome kple bubumewo dome, ŋutsuvi, siwo nu mewɔ afi aɖeke na o, eye wodze ɖeka, aɖaŋu le mo na wo, wodze si nu, nunya le tagbɔ na wo, eye wozã la, be woasubɔ le fiasã me.”—Daniel 1:3, 4.

⁸ Amekawoe wotia? Wogblɔ na mí be: “Yuda-vi, siwo le wo dome la, wonye: Daniel, Xananya, Misael kple Azarya.” (Daniel 1:6) Esia na míenya nu tso ƒome si me Daniel kple eƒe zɔhɛwo tso si ŋu womeƒo nu tsoe boo o la ŋu vie. Le kpɔɖeŋu me, míede dzesii be wonye ‘Yuda-viwo,’ si nye to si me fiawo tsona. Woɖatso fiaƒome me loo alo womeɖatso fiaƒome me o, esɔ be míabui be wotso ƒome vevi siwo me tɔwo nye ame ŋkutawo me ya teti. Tsɔ kpe ɖe woƒe sɔsɔ nyuie le susu kple ŋutilã me ŋu la, aɖaŋu, nunya, sidzedze, kple gɔmesese nɔ wo si—nusiawo katã nɔ wo si esime woxɔ ƒe si na wòsɔ be woayɔ wo be ‘ŋutsuviwo,’ si ate ŋu afia be woge ɖe woƒe ƒewuiwo me koe nye ma. Ðewohĩ Daniel kple eƒe zɔhɛwo ɖe dzesi—wonye ame ŋkutawo—le Yerusalem-sɔhɛwo dome.

 9. Nukata míate ŋu aka ɖe edzi be mawuvɔ̃lawoe Daniel kple eƒe zɔhɛ etɔ̃awo dzilawo nye?

⁹ Nuŋlɔɖia megblɔ amesiwo sɔhɛ siawo dzilawo nye na mí o. Gake edze ƒã be wonye mawuvɔ̃la siwo tsɔ woƒe dzilanyenye ƒe agbanɔamedziwo moveviɖoɖotɔe. Ne míebu alesi amewo ƒe nɔnɔme gblẽe le agbenɔnɔ kple gbɔgbɔ me gome le Yerusalem ɣemaɣi, vevietɔ le ‘fiaƒometɔwo kple bubumewo’ dome ŋu la, edze ƒã be nɔnɔme nyui siwo wokpɔ le Daniel kple eƒe zɔhɛwo ŋu la menye dzodzro o. Ðikeke mele eme o be ate ɖe dzilaawo dzi ŋutɔ esi wokpɔe wokplɔ wo viwo yina anyigba si gbɔ didi ŋutɔ dzi. Ne ɖe wote ŋu nya nusi ava do tso eme la, aleke gbegbe wòadzɔ dzi na woe nye si! Aleke gbegbe wòle vevie enye si be dzilawo nanyi wo viwo “le [ Yehowa, NW ] ƒe hehe kple nuxɔxlɔ̃ la me”!—Efesotɔwo 6:4.

DIDI BE WOATRƆ SUSU NA WO

10. Nukae wofia Hebri-vi sɔhɛawo, eye susu kae wotsɔ wɔ esia?

¹⁰ Wodze egɔme enumake be woatrɔ susu na sɔhɛ aboyome siawo. Esi Nebukadnezar di be Hebri-vi ƒewuivi siawo nawɔ nu wòasɔ kple Babilontɔwo tɔ ta la, ede se na eƒe amegãwo be “woafia Kaldeatɔwo ƒe nuŋɔŋlɔ kple gbe wo.” (Daniel 1:4) Menye sukudede dzro koe esia nye o. The International Standard Bible Encyclopedia ɖe eme be “efia be woasrɔ̃ Sumergbe, Akkadgbe, Aramgbe . . . , kple gbe bubuwo, tsɔ kpe ɖe agbalẽ hamehame siwo woŋlɔ ɖe wo me ŋu.” “Agbalẽ hamehame” siawo ku ɖe blemaŋutinya, akɔntabubu, ɣletivimefakaka, kple nu bubuwo ŋu. Gake “mawusubɔsubɔgbalẽ siwo wowɔ ɖeka ŋlɔ, siwo me afakaka kple ɣletivimefakaka siaa dze le . . . , nye eƒe akpa veviwo.”

11. Afɔ kawoe woɖe be woana Babilon-fiaƒeme gbenɔnɔ namã Hebri-vi sɔhɛawo?

¹¹ Be Babilon-fiaƒeme gbenɔnɔ ƒe nuwɔna kple kɔnuwo namã Hebri-vi sɔhɛ siawo nyuie ta la, “fia la ɖo woƒe gbesiagbe nuɖuɖu na wo tso fia ƒe nuɖuɖu kple wein me, ne woatsɔ anyi woe ƒe etɔ̃; emegbe woasubɔ fia la.” (Daniel 1:5) Tsɔ kpe ɖe eŋu la “aƒedzikpɔlawo ƒe amegã tsɔ ŋkɔ na wo: Daniel tɔe nye Beltsazar, Xananya tɔe nye Sadrax, Misael tɔe nye Mesax, eye Azarya tɔe nye Abed-Nego.” (Daniel 1:7) Le Biblia ƒe ɣeyiɣiwo me la, ebɔ be woatsɔ ŋkɔ yeye na ame atsɔ ade dzesi eƒe agbemenudzɔdzɔ ɖedzesi aɖe. Le kpɔɖeŋu me, Yehowa trɔ Abram kple Sarai ƒe ŋkɔ wòzu Abraham kple Sara. (Mose I, 17:5, 15, 16) Be amegbetɔ natrɔ ame aɖe ƒe ŋkɔ fiaa ŋusẽ alo amedziɖuɖu si dze ƒã. Esime Yosef va zu nuɖuɖudzikpɔla le Egipte la, Farao na ŋkɔe be Zafnat Paneax.—Mose I, 41:44, 45; tsɔe sɔ kple Fiawo II, 23:34; 24:17.

12, 13. Nukatae míate ŋu agblɔ be ɖe wotrɔ ŋkɔ na Hebri-vi sɔhɛawo tsɔ te kpɔ be woagblẽ woƒe xɔse me?

¹² Le Daniel kple exɔlɔ̃ Hebri-vi etɔ̃awo gome la, ŋkɔ si wotrɔ na wo la ɖe dzesi. Ŋkɔ siwo wo dzilawo tsɔ na wo wɔ ɖeka kple Yehowa ƒe tadedeagu. “Daniel” gɔmee nye “Nye Ʋɔnudrɔ̃lae Nye Mawu.” “Xananya” gɔmee nye “Yehowa Ve Nunye.” “Misael” gɔme ate ŋu anye “Amekae Le Abe Mawu Ene?” “Azarya” gɔmee nye “Yehowa Kpe Ðe Ŋunye.” Ðikeke mele eme o be wo dzilawo kpɔ mɔ vevie be yewo viwo natsi le Yehowa Mawu ƒe mɔfiafia te ava zu esubɔla anukwaretɔ kple nuteƒewɔlawo.

¹³ Gake ŋkɔ yeye siwo katã wotsɔ na Hebri-vi eneawo do ƒome kple alakpamawuwo, si fia be wotsɔ trɔ̃ siawo bɔbɔ Mawu vavã la ɖe anyi. Aleke gbegbe wodze agbagba ayetɔe be woagblẽ sɔhɛ siawo ƒe xɔse mee nye si!

14. Ŋkɔ yeye siwo wotsɔ na Daniel kple eƒe zɔhɛ etɔ̃awo gɔme ɖe?

¹⁴ Wotrɔ Daniel ƒe ŋkɔ wòzu Beltsazar, si gɔmee nye “Kpɔ Fia ƒe Agbe Ta.” Edze ƒã be esia nye ŋkɔ si woƒona ɖo na Bel, alo Marduk, si nye Babilon-mawugã la, si wotso kpuie. Eɖanye Nebukadnezar ye na wotsɔ ŋkɔ sia na Daniel loo alo menye eyae o, enye dada nɛ be wòagblɔ be etsɔ ‘yeƒe mawu ƒe ŋkɔ.’ (Daniel 4:5) Wotrɔ ŋkɔ na Hananya heyɔe be Sadrax, si eŋutinunyala aɖewo xɔe se be enye ŋkɔ eve ƒokpli si gɔmee nye “Aku ƒe Sedede.” Enyo be míade dzesii be Aku nye Sumertɔwo ƒe mawu aɖe ƒe ŋkɔ. Wotrɔ ŋkɔ na Misael heyɔe be Mesax (ate ŋu anye, Mi·sha·aku), si edze ƒã be enye “Amekae Le abe Mawu Ene?” si wotro ayetɔe wòzu “Amekae Le abe Alesi Aku Le Ene?” Babilon-ŋkɔ si wotsɔ na Azarya enye Abed-Nego, eye egɔme ate ŋu anye “Nego ƒe Dɔla.” Eye “Nego” nye “Nebo” yɔyɔ le mɔ bubu nu, si nye trɔ̃ aɖe ƒe ŋkɔ si wotsɔ na Babilon-dziɖula geɖe hã.

WOÐOE KPLIKPAA BE YEWOAWƆ NUTEƑE NA YEHOWA

15, 16. Afɔku kawoe dze ŋgɔ Daniel kple eƒe zɔhɛwo azɔ, eye aleke wowɔ nu ɖe eŋui?

¹⁵ Babilontɔwo ƒe ŋkɔ tsɔtsɔ na wo, nusiwo wogbugbɔ fia wo, kple nuɖuɖu tɔxɛ si wona wo—menye ɖe wowɔ esiawo katã tsɔ te kpɔ be woana alesi Babilontɔwo nɔa agbee namã Daniel kple Hebri-vi sɔhɛ etɔ̃awo ko o ke be wòana hã be woaɖe susu ɖa le woa ŋutɔwo ƒe Mawu, Yehowa, kple mawusubɔsubɔ ƒe hehe si woxɔ kpakple afisi wotso hã ŋu. Nukae sɔhɛ siawo awɔ esi nyaƒoɖeamenu kple dodokpɔ siawo gbegbe dze ŋgɔ wo?

¹⁶ Nuŋlɔɖi si tso gbɔgbɔ me la gblɔ be: “Daniel ɖo ɖe ta me be, yemele fia ƒe nuɖuɖu kple wein tsɔ ge agblẽ kɔ ɖo na ye ɖokui o.” (Daniel 1:8a) Togbɔ be Daniel ƒe ŋkɔ ko woyɔ hã la, nusi va dzɔ na wòdze ƒã be eƒe zɔhɛ etɔ̃awo de eƒe nyametsotsoa dzi. Nyagbɔgblɔ siwo nye “ɖo ɖe ta me” fia be nusiwo Daniel dzilawo kple ame bubuwo fiae le wo denyigba dzi la ɖo eƒe dzi gbɔ. Ðikeke mele eme o be hehe ma tɔgbe fia mɔ Hebri-vi etɔ̃ bubuawo le woƒe nyametsotso wɔwɔ me. Esia ɖe alesi wòle vevie be míafia nu mía viwo, ne edze abe wometsi kura ase eme o ene hã fia nyuie.—Lododowo 22:6; Timoteo II, 3:14, 15.

17. Nukata Daniel kple eƒe zɔhɛwo gbe nuɖuɖu si fia naa wo gbesiagbe gake womegbe ɖoɖo bubuawo ya o?

¹⁷ Nukata Hebri-vi etɔ̃awo gbe nuɖuɖuawo kple wein ɖeɖeko eye womegbe ɖoɖo bubuawo ya o? Alesi Daniel bu eŋui ɖe nusitae fia wòdze ƒã be: “[Yemagblẽ] kɔ ɖo na ye ɖokui o.” Togbɔ be ɖewohĩ “Kaldeatɔwo ƒe nuŋɔŋlɔ kple gbe” sɔsrɔ̃ kple Babilon-ŋkɔ tsɔtsɔ na wo medze wo ŋu o hã la, maƒo ɖi ame kokoko o. Bu alesi wònɔ na Mose ƒe 1,000 kloe do ŋgɔ ŋu kpɔ. Togbɔ be “wofia Egiptetɔwo ƒe nunyawo katã Mose” hã la, eyi edzi wɔ nuteƒe na Yehowa. Alesi edzilawo ŋutɔ nyii la ɖo gɔmeɖoanyi like aɖe na eyama. Eyata “le xɔse me, esi Mose tsi la, egbe be, womegayɔ ye be Farao ƒe vinyɔnuvi la vi o; elabena elɔ̃ be, yeakpe fu akpe ɖe Mawu ƒe dukɔ la ŋuti wu esi yeakpɔ nuvɔ̃ ƒe vivisese le ɣeyiɣi vi aɖe ko me.”—Dɔwɔwɔwo 7:22; Hebritɔwo 11:24, 25.

18. Mɔ kawo nue fia ƒe nuɖuɖuawo aƒo ɖi Hebri-vi sɔhɛawo le?

¹⁸ Mɔ ka nue nusiwo Babilon-fia naa sɔhɛawo aƒo ɖi woe? Gbã la, nuɖuɖu siwo Mose ƒe Sea be woatsri ate ŋu anɔ wo me. Le kpɔɖeŋu me, Babilontɔwo ɖua lã makɔmakɔ siwo wotsri na Israel-viwo le Sea te. (Mose III, 11:1-31; 20:24-26; Mose V, 14:3-20) Evelia, Babilontɔwo metsoa ʋu lãwo hafi ɖunɛ o. Lãtsiʋume ɖuɖu anye dada le Yehowa ƒe se si ku ɖe ʋu ŋu dzi tẽ. (Mose I, 9:1, 3, 4; Mose III, 17:10-12; Mose V, 12:23-25) Etɔ̃lia, alakpamawuwo subɔlawo tsɔa woƒe nuɖuɖu saa vɔ na trɔ̃wo hafi ɖunɛ le ha me. Yehowa subɔlawo makpɔ gome le esiawo dometɔ aɖeke me o! (Tsɔe sɔ kple Korintotɔwo I, 10:20-22.) Mlɔeba la, nu damiwo ɖuɖu kple ahasesẽ nono gbesiagbe medea ame aɖeke ƒe lãmesẽ dzi ʋuu kaka wòayi ɖeviwo dzi de ge o.

19. Aleke Hebri-vi sɔhɛawo ate ŋu ado taflatsee hafi, gake nukae kpe ɖe wo ŋu wowɔ nyametsotso nyuitɔ?

¹⁹ Ame ate ŋu anya nusi wòle be wòawɔ, gake alesi wòalé dzi ɖe ƒo awɔe le nyaƒoɖeamenu alo dodokpɔ te hã nye nu bubu kura. Daniel kple exɔlɔ̃ etɔ̃awo ate ŋu abui be esi yewole didiƒe ʋĩ tso yewo dzilawo kple xɔlɔ̃wo gbɔ ta la, ame mawo mate ŋu anya nusi yewowɔ o. Woate ŋu ado taflatse hã be fia ƒe sedede wònye eye nu bubu aɖeke megali yewoawɔ o. Tsɔ kpe ɖe eŋu la, ɖikeke mele eme o be sɔhɛ bubuwo lɔ̃ ɖe ɖoɖoa dzi kple dzidzɔ eye womebu edziwɔwɔ nu sesẽe o ke boŋ be enye mɔnukpɔkpɔ. Gake tamebubu sia si mesɔ o ate ŋu akplɔ wo de nuvɔ̃wɔwɔ le bebeme ƒe afɔku si nye mɔ̃ na sɔhɛ geɖe la me. Hebri-vi sɔhɛawo nya be “Yehowa ƒe ŋku le vɔ̃ kple nyui ŋu le afiawo katã” eye be “Mawu le nuwɔwɔwo katã, siwo ɣla la, he ge ava ʋɔnui, eɖanye nyui alo vɔ̃ o.” (Lododowo 15:3; Nyagblɔla 12:14) Mina mí katã míasrɔ̃ nu tso alesi sɔhɛ nuteƒewɔla siawo wɔ nui me.

WOÐO DZINƆAMEƑO KPLE KUTRIKUKU TEƑE NA WO

20, 21. Afɔɖeɖe kae Daniel wɔ, eye nukae do tso eme?

²⁰ Esi Daniel ɖoe le eƒe dzime be yeatsi tre ɖe ŋusẽkpɔɖeamedzi gbegblẽwo ŋu ta la, eyi edzi wɔ nu wòsɔ ɖe eƒe nyametsotsoa nu. “[Enɔ kukuɖeɖe dzi, NW ] na aƒedzikpɔlawo ƒe amegã, ne yemagagblẽ kɔ ɖo na ye ɖokui o.” (Daniel 1:8b) “Enɔ kukuɖeɖe dzi”—nyagbɔgblɔ ɖedzesi aɖee nye ma. Zi geɖe la, ehiã kutrikuku ne míedi be míakpɔ dzidzedze le tenɔnɔ le tetekpɔwo me alo le gbɔdzɔgbɔdzɔ aɖewo dzi ɖuɖu me.—Galatiatɔwo 6:9.

²¹ Le Daniel gome la, eƒe kutrikukua ɖe vi. “Mawu na aƒedzikpɔlawo ƒe amegã nyo dɔme na Daniel, eye wòve enu.” (Daniel 1:9) Menye esi Daniel kple eƒe zɔhɛwo ƒe nu dzea ame ŋu eye wonye nunyalawo tae nuwo va dze edzi na wo mlɔeba o. Yehowa ƒe yayra boŋue na wòva eme nenema. Daniel anya ɖo ŋku Hebrigbe me lododo sia dzi godoo be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.” (Lododowo 3:5, 6) Aɖaŋuɖoɖo ma dzi wɔwɔ ɖe vi na wo vavã.

22. Nya si sɔ kae amegã la gblɔ tsɔ gbe nya lae?

²² Gbã la, aƒedzikpɔlawo ƒe amegã la gbe hegblɔ be: “Mele nye aƒetɔ fia, amesi ɖo nuɖuɖu kple nunono na mi la vɔ̃m; elabena ne ekpɔ be, miaƒe mo ɖi ku wu mia hatiwo tɔ la, ekema nye tae nye ekem mietsɔ na fia la.” (Daniel 1:10) Nyagbegbe kple vɔvɔ̃ siawo sɔ. Atse meblea ame aɖeke wòagbe toɖoɖo Fia Nebukadnezar o, eye amegã la de dzesii be yeade ‘ta’ afɔku me ne yemewɔ ɖe fia ƒe mɔfiamewo dzi o. Nukae Daniel awɔ?

23. Aleke Daniel ɖe nugɔmesese kple nunya fiae le afɔ si wòɖe me?

²³ Afisiae sidzedze kple nunya va hiã le. Ðewohĩ sɔhɛ Daniel ɖo ŋku lododo sia dzi be: “Nyaŋuɖoɖo fafɛ tsia dziku nu; ke gbe da ɖe ame gbɔ nana dɔmedzoe flana.” (Lododowo 15:1) Le esi teƒe be Daniel nate tɔ ɖe edzi be woawɔ ɖe yeƒe didi dzi na ye godoo si ate ŋu ana be ame bubuwo nawɔ fui la, eɖe asi le nyaa ŋu gbɔ. Le ɣeyiɣi si sɔ dzi la, eƒo nu kple “dzikpɔla” la, amesi anɔ eme be eɖea mɔ ɖe nu ŋu wu le esi mewɔa dɔ le fia te tẽ o ta.—Daniel 1:11.

EDOE ÐA BE WOADO YEWO AKPƆ ŊKEKE EWO

24. Dodokpɔ kae Daniel do ɖa be woawɔ na yewo?

²⁴ Daniel ƒo nu tso dodokpɔ aɖe ŋu na dzikpɔla la be: “Tee kpɔ kple wò dɔlawo ŋkeke ewo, ne woatsɔ [ama] na mí míaɖu kple tsi na mí míano. Emegbe naɖe ŋku ɖe míaƒe nɔnɔme kple ŋutsuvi, siwo ɖua fia ƒe nuɖuɖu la ƒe nɔnɔme, eye alesi nakpɔ la, nenema nu nawɔ na wò dɔlawo ɖo.”—Daniel 1:12, 13.

25. Anye nukawoe “ama” si wotsɔ na Daniel kple exɔlɔ̃ etɔ̃awo la nye?

²⁵ Woatsɔ ‘ama kple tsi’ anyi wo ŋkeke ewo—ɖe woƒe ‘mo aɖi ku’ wu ame bubuawo tɔa? Hebrigbe me nya si gɔme koŋue nye “nukuwo” mee woɖe “ama” gɔme tsoe. Biblia-gɔmeɖeɖe aɖewo yɔe be “nukuwo,” eye woɖe egɔme be enye “amagbe vovovo siwo nyo na ɖuɖu ƒe tsetse (si ƒe ɖewoe nye azi, ayi, alo gbagbayi).” Agbalẽnyala aɖewo bui be nya siwo ƒo xlãe fia be menye nuku siwo nyo na ɖuɖu koe woƒe nuɖuɖua nye o. Numekugbalẽ aɖe gblɔ be: “Nusi Daniel kple eƒe zɔhɛwo nɔ biabiam la nye ama si amewo katã ɖuna ke menye fia ƒe kplɔ̃dzinuɖuɖu dami si me lã le fũ la o.” Eyata ama si wobia ate ŋu anye nuɖuɖu siwo doa ŋusẽ ame siwo me ayi, aŋanyi, gbegãdzi, sabala ƒomeviwo, gbagbayi, adzamatre, kple abolo si wotsɔ nuku vovovowo wɔ la nɔ. Edze ƒã be ame aɖeke mabu nuɖuɖu mawo be woana ame naɖi ku o. Edze abe dzikpɔla la se egɔme na wo nenema. “[Eɖo] to wo le nya sia me hetee kpɔ kpli wo ŋkeke ewo.” (Daniel 1:14) Nukae do tso eme?

26. Nukae do tso ŋkeke ewo ƒe dodokpɔa me, eye nukata nuwo va yi nenema?

²⁶ “Le ŋkeke ewo megbe la woƒe nɔnɔme nyo, eye woklã wu ŋutsuvi, siwo katã ɖua fia ƒe nuɖuɖu.” (Daniel 1:15) Mele be míabui be esia fia be amagbenuɖuɖu nyo wu nuɖuɖu si me lã le si da ami wu la o. Nuɖuɖu ƒomevi aɖeke meli ana tɔtrɔ ɖedzesiwo nadze le ame ŋu le ŋkeke ewo pɛ ko me o, gake mele kpui akpa na Yehowa be wòana eƒe tameɖoɖo nava eme o. Eƒe Nya gblɔ be: “Yehowa ƒe yayra wɔa ame kesinɔtɔ agbagba madzemadzee.” (Lododowo 10:22) Hebri-vi sɔhɛ eneawo xɔ Yehowa dzi se heɖo ŋu ɖe eŋu, eye megblẽ wo ɖi o. Ƒe alafa geɖe megbe la, Yesu Kristo te ŋu nɔ agbe ŋkeke 40 numaɖumaɖui. Eyɔ nya si le Mose V, 8:3 tsɔ ƒo nu tso esia ŋu, si xlẽ be: “Amegbetɔ mele abolo ƒe agbe ko o, ke boŋ amegbetɔ le agbe le nya, siwo katã do tso Yehowa nu la ta.” Nusi dzɔ le Daniel kple exɔlɔ̃awo gome la nye esia ƒe kpɔɖeŋu nyui aɖe.

SIDZEDZE KPLE NUNYA SU WO SI NUÐUÐU DAMIWO KPLE WEIN MANƆMEE

27, 28. Mɔ kawo nue nuɖuɖu ƒe ɖoɖo si dzi Daniel kple exɔlɔ̃ etɔ̃awo wɔ ɖo la dzra wo ɖo ɖe nu gã siwo nɔ ŋgɔ ŋu le?

²⁷ Dodokpɔ ko wowɔ le ŋkeke ewoa me, gake nusi do tso eme na nya sia nya me kɔ ƒã. “[Eyata] dzikpɔla la ɖe woƒe nuɖuɖu kple wein, si woɖo na wo la ɖa, eye wòna ama wo.” (Daniel 1:16) Míate ŋu akpɔ alesi sɔhɛ bubu siwo hã nɔ hehe xɔm bu Daniel kple eƒe zɔhɛwoe le susu me bɔbɔe. Adze bometsitsi na wo ŋutɔ be woagbe fia ƒe nu damiwo ɖuɖu anɔ amanuwo ɖum gbesiagbe. Gake dodokpɔ gãwo kple tetekpɔwo nɔ ŋgɔ na Hebri-vi sɔhɛ siawo, eye abia be woanɔ ŋudzɔ ahanɔ mo xexi alesi woate ŋui. Ƒo ye katã ta la, woƒe Yehowa dzixɔxɔse kple ŋuɖoɖo ɖe eyama ŋue ana woate ŋu ato woƒe xɔse ƒe dodokpɔawo me.—Tsɔe sɔ kple Yosua 1:7.

²⁸ Alesi Yehowa nɔ kple sɔhɛ siawo dze le nya si wogblɔ kplɔe ɖo me be: “Mawu na nunya kple gɔmesese ŋutsuvi ene siawo le nuŋɔŋlɔ vovovowo kple nunya gome; ke Daniel ya nya ŋutegawo katã kple drɔ̃ewo gɔme.” (Daniel 1:17) Wohiã nusi de ŋgɔ wu ŋutilãmeŋusẽ kple lãmesẽ be woate ŋu anɔ te ɖe ɣeyiɣi sesẽ siwo adze ŋgɔ wo nu. “Nunya age ɖe wò dzi me, eye sidzedze avivi wò luʋɔ nu. Tamebubu akpɔ dziwò, eye gɔmesese adzɔ ŋuwò, ne wòaɖe wò tso mɔ vɔ̃ dzi.” (Lododowo 2:10-12) Nu ma tututue Yehowa tsɔ na sɔhɛ nuteƒewɔla eneawo be wòadzra wo ɖo ɖe nusi nɔ ŋgɔ ŋu.

29. Nukata Daniel te ŋu ‘se ŋutega kple drɔ̃e ƒomeviwo katã gɔme’?

²⁹ Wogblɔ be Daniel “nya ŋutegawo katã kple drɔ̃ewo gɔme.” Esia mefia be eva zu gbɔgbɔmenukpɔla o. Enyo be míade dzesii be togbɔ be wobua Daniel be enye Hebri-vi nyagblɔɖila gãwo dometɔ ɖeka hã la, gbɔgbɔ meʋãe wògblɔ nyawo abe “ale Aƒetɔ Yehowa gblɔ esi” alo “ale [aʋakɔwo ƒe] Yehowa gblɔ esi” ene kpɔ o. (Yesaya 28:16; Yeremya 6:9) Ke hã Mawu ƒe gbɔgbɔ kɔkɔe ƒe mɔfiafia koe te ŋu na Daniel se ŋutega kple drɔ̃e siwo ɖe Yehowa ƒe tameɖoɖo fia la gɔme heɖe wo me.

DODOKPƆ VEVITƆ ÐO EDZI MLƆEBA

30, 31. Vi kae alesi Daniel kple eƒe zɔhɛwo nɔ agbee la ɖe na wo?

³⁰ Ƒe etɔ̃ si woɖo be woatsɔ agbugbɔ nu afia wo ahadzra wo ɖo la wu enu. Azɔ eɖo dzi be woawɔ dodokpɔ vevitɔ na wo—fia la ŋutɔe abia gbe wo. “Esi ɣeyiɣi, si fia la de se be, woakplɔ wo vɛ, de la, aƒedzikpɔlawo ƒe amegã kplɔ wo va Nebukadnezar ŋku me.” (Daniel 1:18) Ɣeyiɣia de be sɔhɛ eneawo nana akɔnta le wo ɖokui ŋu. Ðe kuku ɖe Yehowa ƒe sewo ŋu tsɔ wu be woanɔ agbe ɖe Babilontɔwo tɔ nu aɖe vi na woa?

³¹ “Esi fia la ƒo nu kpli wo la, womekpɔ ame aɖeke le wo katã dome, si de Daniel, Xananya, Misael kple Azarya nu o; eye wosubɔ le fia la ŋku me.” (Daniel 1:19) Aleke gbegbe esia na viɖe si le agbe si wonɔ le ƒe etɔ̃ siwo va yi me ŋu dze nyuie enye si! Menye tsu kumee wonɔ tae wonɔ nusi ŋu woƒe xɔse kple dzitsinya ɖe mɔ ɖo ɖum o. Esi Daniel kple exɔlɔ̃wo wɔ nuteƒe le nusi adze nu suetɔ me ta la, wotsɔ nu gãwo yra woe. ‘Subɔsubɔ le fia la ƒe ŋkume’ nye mɔnukpɔkpɔ si dzro sɔhɛ siwo katã wona hehee la vevie. Biblia megblɔe ne Hebri-vi sɔhɛ eneawo koe wotia o. Aleke ke wòɖanɔ o, woƒe nuteƒewɔwɔ na wokpɔ “fetu gã” aɖe vavã.—Psalmo 19:12.

32. Nukata míate ŋu agblɔ be mɔnukpɔkpɔ su Daniel, Xananya, Misael, kple Azarya si wòde ŋgɔ wu fiaƒemenɔnɔ?

³² Ŋɔŋlɔawo gblɔ be: “Kpɔ amesi zã le eƒe dɔwɔwɔ me la ɖa, fiawoe wòasubɔ, eye menye ame tsɛwo wòasubɔ o.” (Lododowo 22:29) Eyata Nebukadnezar tia Daniel, Xananya, Misael, kple Azarya be woasubɔ le fia ŋkume, si fia be woanɔ dziɖuɖumegãwo dome. Míate ŋu akpɔe le esiawo katã me be Yehowa ƒe asi nɔ eme ale be to ɖekakpui siawo dzi—vevietɔ to Daniel dzi—la, woaɖe Mawu ƒe tameɖoɖo ƒe akpa veviwo afia. Togbɔ be enye bubu be woatia ame wòanɔ Nebukadnezar ƒe dziɖuɖumegãwo dome hã la, bubu si lolo wu sã wònye be Yehowa, Xexeame Katã ƒe Fia, nazã ame le mɔ sia nu.

33, 34. (a) Nukata Hebri-vi sɔhɛawo ƒe nu wɔ dɔ ɖe fia la dzi? (b) Nukae míate ŋu asrɔ̃ tso nusi me Hebri-vi eneawo to me?

³³ Eteƒe medidi o Nebukadnezar kpɔe be nunya kple gɔmesese si Yehowa na Hebri-vi sɔhɛ siawo de ŋgɔ wu aɖaŋuɖola kple nunyala siwo katã le ye ŋu la tɔ sasasã. “Nya sia nya, si fia la bia wo le nunya kple gɔmesese gome la, ekpɔ be, woƒo eƒe fiaɖuƒe blibo la ƒe dzotɔwo kple bokɔnɔwo katã ta zi gbɔ zi ewo.” (Daniel 1:20) Ðe menye aleae wòle be wòanɔ oa? “Dzotɔwo” kple “bokɔnɔwo” ɖo ŋu ɖe Babilontɔwo ƒe xexemenusɔsrɔ̃ kple aʋatsodzixɔsewo ŋu, gake dziƒonunya ŋue Daniel kple exɔlɔ̃wo ya ɖo ŋu ɖo. Womate ŋu asɔ kpli wo le go aɖeke me kura o—womate ŋu anɔ te ɖe wo nu o!

³⁴ Nuwo metrɔ boo le ƒeawo me o. Le ƒe alafa gbãtɔ M.Ŋ. me, esime Helatɔwo ƒe xexemenunyafiafia kple Romatɔwo ƒe se nɔ tsia dzi la, gbɔgbɔ ʋã apostolo Paulo wòŋlɔ bena: “Xexe sia me nunya enye bometsitsi le Mawu gbɔ, elabena woŋlɔ ɖi bena: ‘Eléa nunyalawo le woƒe aɖaŋu vɔ̃ me.’ Eye wogaŋlɔ be: ‘[Yehowa] dzea si nunyalawo ƒe susuwo bena, wonye dzodzro.’ Eyata ame aɖeke nagaƒo adegbe le amewo ŋuti o.” (Korintotɔwo I, 3:19-21) Egbea ele be míavã nusi Yehowa fia mí goŋgoŋ ale be xexeame ƒe ameflunuwo kple nu dzeaniwo nagaɖu mía dzi bɔbɔe o.—Yohanes I, 2:15-17.

WOWƆ NUTEƑE VASEÐE NUWUWU

35. Afikae woƒo nu tso Daniel ƒe zɔhɛ etɔ̃awo ŋu na mí se ɖo?

³⁵ Woɖe xɔse sesẽ si nɔ Xananya, Misael, kple Azarya si fia wòɖe dzesi le Daniel ta 3 lia me, le nya si ku ɖe sikalegba si Nebukadnezar li anyi ɖe Dura-bali me kple kpodzo bibi ƒe dodokpɔa ŋu me. Ðikeke mele eme o be Hebri-vi mawuvɔ̃la siawo yi edzi wɔ nuteƒe na Yehowa vaseɖe woƒe kugbe. Míenya esia elabena edze ƒã be woƒe nya gblɔm apostolo Paulo nɔ esime wòŋlɔ nu tso amesiwo “to xɔse me, [tsi] dzo ƒe ŋusẽ nu” ŋu. (Hebritɔwo 11:33, 34) Wonye kpɔɖeŋu ɖedzesiwo na Yehowa subɔlawo, ɖeviwo kple tsitsiawo siaa.

36. Agbemedɔ ɖedzesi kae nɔ Daniel si?

³⁶ Wogblɔ le ta gbãtɔ ƒe kpukpui mamlɛtɔ me le Daniel ŋu be: “Daniel tsi anyi vaseɖe fia Kores ƒe ƒe gbãtɔ me.” Ŋutinya ɖee fia be Kores mu Babilon-fiaɖuƒea le zã aɖe me le ƒe 539 D.M.Ŋ. me. Edze abe ŋkɔ nyui si Daniel xɔ kple eƒe ɖoƒe na wòyi edzi subɔ le Kores ƒe dziɖuɖumegãwo dome ene. Le nyateƒe me la, Daniel 10:1 gblɔ na mí be “Le Persia-fia Kores ƒe ƒe etɔ̃lia me” la, Yehowa ɖe nya vevi ɖedzesi aɖe fia Daniel. Ne ƒewuivie wònye esime wokplɔe va Babilon le ƒe 617 D.M.Ŋ. me la, ke axɔ ƒe si gogo 100 esime wòkpɔ ŋutega mamlɛtɔ ma. Ɣeyiɣi didi si me yayra le ka gbegbee nye si wòtsɔ subɔ Yehowa nuteƒewɔwɔtɔe!

37. Nukawoe míate ŋu asrɔ̃ tso Daniel ta gbãtɔ me dzodzro me?

³⁷ Menye sɔhɛ nuteƒewɔla ene siwo te ŋu nɔ te ɖe xɔse ƒe dodokpɔwo nu dzidzedzetɔe ƒe ŋutinya koe Daniel ƒe agbalẽa ƒe ta gbãtɔ gblɔ na mí o. Ke efia alesi Yehowa ate ŋu azã amesiame si dze eŋu atsɔ ana eƒe tameɖoɖo nava emee hã mí. Nudzɔdzɔa ɖo kpe edzi be ne Yehowa ɖe mɔ ɖe nusi adze afɔkui ŋu la, ate ŋu anye nu vevi aɖe tae. Eye ena míekpɔe be teƒeɖoɖo gã aɖe le eme ne míewɔ nuteƒe le nu suewo me.

NUKAWO GƆMEE NÈVA SE?

• Nukae míate ŋu agblɔ le ƒome si me Daniel kple eƒe zɔhɛ etɔ̃awo tso ŋu?

• Aleke wodo hehe nyui si wona Hebri-vi sɔhɛ eneawo la kpɔe le Babilon?

• Aleke Yehowa ɖo eteƒe na Hebri-vi eneawo ɖe woƒe tenɔnɔ dzinɔameƒotɔe ta?

• Nukawoe Yehowa subɔla siwo li le egbeŋkekea me ate ŋu asrɔ̃ tso Daniel kple eƒe zɔhɛ etɔ̃awo gbɔ?

[Nɔnɔmetata si xɔ axa 30]