Ta Adrelia

Baba na Weingble Mawɔnuteƒe La!

Yesaya 5:1-30

1, 2. Nuku kae ‘xɔlɔ̃a’ do, gake aleke eƒe mɔkpɔkpɔa do kpo emevavae?

“LODODO aɖeke mede esia nu tututu o le nya vivi siwo wozã kple aɖaŋu deŋgɔ si wotsɔ gblɔ nyawo eme kɔ nyuie la ta.” Nenemae Biblia me nyawo me ɖela aɖe gblɔ le Yesaya ta 5 lia ƒe kpukpui gbãtɔwo ŋu. Menye aɖaŋu koe dze le Yesaya ƒe nyaawo me o ke eɖe alesi Yehowa léa be na eƒe amewo lɔlɔ̃tɔe fia nyuie wòwɔ dɔ ɖe ame dzi hã. Le ɣeyiɣi ma ke me la, nya siawo xlɔ̃ nu mí le nusiwo medzea eŋu o ŋu.

² Yesaya ƒe lododoa dze egɔme be: “Mele ha dzi ge le xɔ̃nye ŋu, mele xɔ̃nye ƒe ha dzi ge le eƒe weingble ŋu. Weingble aɖe le xɔ̃nye si le totame wɔnu aɖe. Edzobo eme, eɖe kpewo le eme, eye wòdo weinka nyuitɔwo ɖe eme, etu xɔ tsrala ɖe etitina, ekpa weinfiãnu hã da ɖe eme hele mɔ kpɔm be, atse weintsetsewo; ke etse ʋukatsetsewo.”—Yesaya 5:1, 2; tsɔe sɔ kple Marko 12:1.

Beléle na Weingble La

3, 4. Beléle kae wotsɔ na weingble la lɔlɔ̃tɔe?

³ Yesaya ɖatsɔ lododo sia me nyawo dzi ha ɖe eƒe nyaselawo ƒe tome loo alo medzii o, ahe woƒe susu ɖe eme nyawo ŋu godoo. Anɔ eme be wo dometɔ akpa gãtɔ nya nu tso weingbledede ŋu nyuie, eye Yesaya gblɔ alesi wodenɛ ŋutɔŋutɔ eme kɔ nyuie. Abe alesi weingbledelawo wɔnɛ egbea ene la, menye ʋukakuwoe weingblea tɔ do o, ke boŋ “weinka nyuitɔwo,” alo adodoea, ye wòdo—esi wòlã alo alɔ si dze ɖe weinka bubu ŋu. Esɔ be wòde eƒe weingblea “le totame wɔnu aɖe,” afisi sɔ na weingbledede.

⁴ Ebia dɔ sesẽ wɔwɔ be woana weingble nawɔ nyuie. Yesaya gblɔ be agblea tɔ ‘dzobo anyigba ɖe kpewo le eme’—si nye dɔ sesẽ si tea ɖeɖi ame ŋu ŋutɔ! Anɔ eme be eɖe kpe siwo lolo wu tsɔ ‘tu xɔ tsralae.’ Le blema la, xɔ tsrala siawo mee dzɔla siwo dzɔa agblemenukuawo ŋu le fiafiwo kple lãwo ta la nɔna.a Azɔ hã, etsɔ kpe ɖo gli ɖe weingblea ƒe akpa siwo le toa ƒe abunu ŋu. (Yesaya 5:5) Wowɔa esia zi geɖe be tsi nagakplɔ ke wɔnu si le anyigba la dzi adzoe o.

 5. Nukae weingblea tɔ kpɔ mɔ na tso eƒe agblea me wòsɔ, gake nukae wòkpɔ?

⁵ Esi weingblea tɔ wɔ dɔ sesĩe alea tsɔ kpɔ eƒe weingblea dzi ta la, etɔ dzɔ be wòakpɔ mɔ be atse ku. Eƒe mɔkpɔkpɔ sia na wòkpa weinfiãnu. Gake ɖe nuŋeŋe si wòkpɔ mɔ na la va emea? Ao, ʋukatsetsewo boŋue wòkpɔ le weingblea me.

Weingblea Kple Agblea Tɔ

6, 7. (a) Amekae nye weingblea tɔ, eye nukae nye weingble la? (b) Ʋɔnu kae agblea tɔ be woadrɔ̃?

⁶ Amekae nye agblea tɔ, eye nukae nye weingble la? Weingblea tɔ ɖo biabia siawo ŋu esi eya ŋutɔ ƒo nu gblɔ be: “Eyata mi Yerusalemtɔwo kple mi Yuda-ŋutsuwo, midrɔ̃ nya le mía kple nye weingble la dome! Nukae woawɔ na nye weingble la, eye nyemewɔe nɛ o? Nukaŋuti mele mɔ kpɔm be, atse weintsetsewo, eye wòtse ʋukatsetsewo? Azɔ mana mianya nusi wɔ ge mala nye weingble la: Makaka kpɔ le eŋu, ne lãwo naɖui, magbã gli le eŋu, ne woazɔ edzi.”—Yesaya 5:3-5.

⁷ Ẽ, Yehowae nye weingblea tɔ, eye eyi ɖe ʋɔnu, le kpɔɖeŋumɔ nu, hele biabiam be woadrɔ̃ ʋɔnu le ye kple yeƒe weingble gbegblẽ la dome. Ekema nukae nye weingble la? Agblea tɔ gblɔ be: “Israel ƒe aƒe lae nye Yehowa Zebaot ƒe weingble, eye Yuda ŋutsuwo nye eƒe dzidzɔkpɔkpɔ ƒe nudodowo.”—Yesaya 5:7a.

 8. Nukae ɖe dzesi le alesi Yesaya yɔ Yehowa be “xɔ̃nye” ŋu?

⁸ Yesaya yɔ Yehowa si nye weingblea tɔ la be “xɔ̃nye.” (Yesaya 5:1) Esi ƒomedodo kplikplikpli nɔ Yesaya kple Mawu dome ta koe wòte ŋu yɔ Eyama xɔlɔ̃wɔwɔtɔe nenema ɖo. (Tsɔe sɔ kple Hiob 29:4; Psalmo 25:14.) Gake nyagblɔɖila la ƒe lɔlɔ̃ na Mawu mede lɔlɔ̃ si Mawu ɖe fia eƒe “weingble”—si nye dukɔ si “wòdo”—la nu o.—Tsɔe sɔ kple Mose II, 15:17; Psalmo 80:9, 10.

 9. Aleke Yehowa wɔ nu ɖe eƒe dukɔa ŋu abe weingble vevi ene?

⁹ Yehowa ‘do’ eƒe dukɔa ɖe Kanaan-nyigba dzi eye wòtsɔ eƒe se kple ɖoɖo siwo nɔ abe gli si kpɔ wo ta tso dukɔ bubuwo ƒe ŋusẽkpɔɖeamedzi gbegblẽ si me ene la na wo. (Mose II, 19:5, 6; Psalmo 147:19, 20; Efesotɔwo 2:14) Tsɔ kpe ɖe eŋu la, Yehowa ɖo ʋɔnudrɔ̃lawo, nunɔlawo, kple nyagblɔɖilawo na wo be woafia nu wo. (Fiawo II, 17:13; Maleaxi 2:7; Dɔwɔwɔwo 13:20) Esi asrafowo tso ɖe Israel ŋu la, Yehowa na ame aɖewo va xɔ na wo. (Hebritɔwo 11:32, 33) Eyata esɔ be Yehowa bia be: “Nukae woawɔ na nye weingble la, eye nyemewɔe nɛ o?”

Sidzedze Mawu ƒe Weingble la Egbea

10. Weingble ŋuti lo kae Yesu do?

¹⁰ Ðewohĩ Yesaya ƒe nyawoe nɔ susu me na Yesu esime wòdo lo le agbledela siwo nye amewulawo ŋu: “Aƒetɔ aɖe de weingble, eye wòtɔ kpɔ ɖe eŋu godoo, eye wòwɔ weinfiãnu ɖe eme, eye wòtu mɔ̃ ɖe eme, eye wòtsɔe de asi na weingbledelawo, eye wòyi nugbe.” Nublanuitɔe la, agbledelaawo mewɔ nuteƒe na agblea tɔ o, eye wowu via gɔ̃ hã. Yesu yi edzi ɖee fia be menye Israel-dukɔa ŋutɔŋutɔ ŋu koe lododo sia ku ɖo o esime wògblɔ be: “Woaxɔ mawufiaɖuƒe la le mia [ŋutilã me Israel] si, eye woatsɔe ana dukɔ, si atse ku la.”—Mateo 21:33-41, 43.

11. Gbɔgbɔmeweingble kae nɔ anyi le ƒe alafa gbãtɔ me, gake nukae dzɔ le apostoloawo ƒe ku megbe?

¹¹ “Dukɔ” yeye ma va nye “Mawu ƒe Israel”—Kristotɔ amesiaminawo ƒe gbɔgbɔmedukɔ si me tɔwo ƒe xexlẽme nye ame 144,000. (Galatiatɔwo 6:16; Petro I, 2:9, 10; Nyaɖeɖefia 7:3, 4) Yesu tsɔ nusrɔ̃la siawo sɔ kple “alɔ” siwo le “weinti vavã,” si nye eya ŋutɔ la ŋu. Wokpɔ mɔ be alɔ siawo atse ku abe alesi wònɔna godoo ene. (Yohanes 15:1-5) Ele be woaɖe Kristotɔwo ƒe nɔnɔme afia eye woakpɔ gome le gbeƒãɖeɖe “fiaɖuƒeŋutinya nyui sia” me. (Mateo 24:14; Galatiatɔwo 5:22, 23) Gake le apostolo wuieveawo ƒe ku megbe la, amesiwo gblɔ be yewonye “weinti vavã” la ƒe alɔwo ƒe akpa gãtɔ nye alakpatɔwo—ʋukatsetsewoe wotsena ɖe kutsetse nyuiwo teƒe.—Mateo 13:24-30, 38, 39.

12. Aleke Yesaya ƒe nyawo bu fɔ Kristodukɔae, eye nusɔsrɔ̃ kae le eme na Kristotɔ vavãwo?

¹² Eyata fɔbuamenya siwo Yesaya gblɔ na Yuda la ku ɖe Kristodukɔa ŋu egbea. Ŋkuléle ɖe eƒe ŋutinya ŋu—eƒe aʋawɔwɔ, atitsogaʋawo, kple Ŋutasẽʋɔnudɔdrɔ̃wo—ɖe alesi gbegbe eƒe kutsetse le vevemee fia! Gake ele be Kristotɔ amesiaminawo ƒe weingble vavã la kple woƒe zɔhɛ “ameha gã” la hã nalé to ɖe Yesaya ƒe nyaawo ŋu. (Nyaɖeɖefia 7:9) Ne woƒe nu adze weingblea tɔ ŋu la, ke ele be wo dometɔ ɖesiaɖe kple woƒe ƒuƒoƒo bliboa katã natse ku siwo dzea eŋu.

“Ʋukatsetsewo”

13. Nukae Yehowa awɔ eƒe weingble la le esi wòtse ku gbegblẽwo ta?

¹³ Esi Yehowa dze agbagba vevie wɔ dɔ le eƒe weingblea me be wòanyo ta la, esɔ be wòkpɔ mɔ be wòava zu “weingble nyo.” (Yesaya 27:2) Gake le esi teƒe be wòatse ku siwo woate ŋu azã la, etse “ʋukatsetsewo” boŋ, si fia “nu ʋeʋẽwo” alo “nuku vovowo (ƒaƒãwo)” le nyaa ŋutɔŋutɔ nu. (Yesaya 5:2; NW ƒe etenuŋɔŋlɔ; Yeremya 2:21) Eyata Yehowa gblɔ be yeakaka “kpɔ” si yetɔ ɖe dukɔa ŋu. Dukɔ la azu abe “afutime,” alo ‘nusi wotsrɔ̃ ɖa’ ene, eye woagblẽe ɖi ale be tsi magadza ɖe edzi o. (Xlẽ Yesaya 5:6.) Mose xlɔ̃ nu wo va yi be nusiawoe adzɔ ɖe wo dzi ne wogbe toɖoɖo Mawu ƒe Sea.—Mose V, 11:17; 28:63, 64; 29:22, 23.

14. Kutsetse kae Yehowa kpɔ mɔ na tso eƒe dukɔ la gbɔ, gake ku ka boŋue wòtse?

¹⁴ Mawu kpɔ mɔ be dukɔa atse ku nyuiwo. Mixa si nɔ agbe le Yesaya ƒe ɣeyiɣia me gblɔ be: “Nusi ko dim Yehowa le tso asiwò la, enye be, nawɔ nusi le eteƒe, nalɔ̃ dɔmenyowɔwɔ, eye nabɔbɔ ɖokuiwò ɖe anyi ahazɔ le wò Mawu ŋku me.” (Mixa 6:8; Zaxarya 7:9) Gake dukɔa gbe toɖoɖo Yehowa ƒe nuxlɔ̃amea. “[Mawu kpɔ] mɔ na afiatsotso, ke ʋukɔkɔɖie li; ekpɔ mɔ na nu dzɔdzɔe wɔwɔ, ke konyifafae li.” (Yesaya 5:7b) Mose gblɔe ɖi be dukɔ mawɔnuteƒe la ƒe weintsetse siwo tso “Sodom-weinkawo” dzi la anye aɖi. (Mose V, 32:32) Anɔ eme be gbɔdɔdɔ ƒe agbegbegblẽnɔnɔ kple ŋutsu kple ŋutsu ƒe dɔdɔ hã nye alesi wotra tso Mawu ƒe Sea dzi wɔwɔ gbɔ la ƒe akpa aɖe ɣemaɣi. (Mose III, 18:22) Woagate ŋu agblɔ nya ‘ʋukɔkɔɖi’ le mɔ bubu nu be enye “sedzidada.” Ðikeke mele eme o be anyrawɔwɔ le ame ŋu alea na amesiwo ŋu wowɔe ɖo ‘fa konyi’—konyifafa si ɖo Amesi tɔ weingblea nye ƒe tome.—Tsɔe sɔ kple Hiob 34:28.

15, 16. Aleke Kristotɔ vavãwo awɔ be womatse ku gbegblẽwo abe Israel-viwo ene o?

¹⁵ Yehowa Mawu ‘lɔ̃a dzɔdzɔenyenye kple ʋɔnu dzɔdzɔe dɔdrɔ̃.’ (Psalmo 33:5) Ede se na Yudatɔwo be: “Migawɔ apasa le ʋɔnudɔdrɔ̃ me o. Migade ame dahe dzi o, eye migakpɔ amegãwo ŋku me o; ke boŋ midrɔ̃ ʋɔnu mia nɔewo ɖe teƒe.” (Mose III, 19:15) Eyata ele be míatsri ameŋkumekpɔkpɔ le nuwɔwɔ kple mía nɔewo me, eye mígaɖe mɔ nanewo abe afisi amewo tso, ƒe si woxɔ, woƒe gakpɔkpɔ, alo ahedada nakpɔ ŋusẽ ɖe alesi míebua woe dzi o. (Yakobo 2:1-4) Ehiã vevie be amesiwo le dzikpɔkpɔdɔwo wɔm ‘nagawɔ naneke alé go ɖeka me awu bubu o,’ eye woadi ɣesiaɣi be woase akpa evea ƒe nya hafi adrɔ̃ ʋɔnu.—Timoteo I, 5:21; Lododowo 18:13.

¹⁶ Tsɔ kpe ɖe eŋu la, esi wònye xexe mawɔsedzi mee Kristotɔwo le ta la, ele bɔbɔe be susu gbegblẽ aɖe nava nɔ wo si ɖe mawumedzidzenuwo ŋu alo be woadze aglã ɖe wo ŋu. Gake ele be Kristotɔ vavãwo ‘nalɔ̃ aɖo to’ Mawu ƒe sewo. (Yakobo 3:17) Togbɔ be gbɔdɔdɔ ƒe agbegbegblẽnɔnɔ kple ŋutasẽnuwɔwɔ bɔ ɖe ‘xexe vɔ̃ɖi, si li fifia’ me hã la, ele be ‘woakpɔ nyuie be woazɔ pɛpɛpɛ, menye abe numanyamanyatɔwo ene o, ke boŋ abe nunyalawo ene.’ (Galatiatɔwo 1:4; Efesotɔwo 5:15) Ele be woatsri gbɔdɔdɔ ŋuti nukpɔsusu siwo mesɔ o, eye ne masɔmasɔwo do mo ɖa la, ele be woakpɔ wo gbɔ “dɔmedzoe kple dziku kple ɣlidodo kple busubɔbɔ” manɔmee. (Efesotɔwo 4:31) Kristotɔ vavãwo tua dzɔdzɔenyenye ɖo tsɔ dea bubu Mawu ŋu eye wòkpɔa ŋudzedze ɖe wo ŋu.

Nusi Ŋukeklẽ Gblẽna

17. Nɔnɔme gbegblẽ ka ŋue Yesaya tsi tre ɖo le eƒe babadoname gbãtɔa me?

¹⁷ Meganye Yehowa ƒe nyawoe Yesaya yɔ nɔ gbɔgblɔm le kpukpui 8 lia me o. Eya ŋutɔe do baba adeawo ƒe gbãtɔ tsɔ tsi tre ɖe ‘ʋukatsetse’ aɖewo siwo wotse le Yuda ŋui: “Baba na amesiwo le xɔ tsiãm ɖe xɔ nu, eye wole agble didim ɖe agble nu, vaseɖe esime teƒe aɖeke maganɔ anyi o, ne woawo ɖeɖe nanɔ anyigba dzi! Yehowa Zeboat gblɔ ɖe to me nam bena: Ne xɔ gbogboawo matrɔ zu gbegbe, eye xɔ gã nyuiawo mazu xɔdowo o fĩ! Elabena weingble, si nyi eveve teƒe ewo aŋlɔ gbe ɖeka la, anye bat ɖeka, eye nuku [gomer] ɖeka anye efa ɖeka.”—Yesaya 5:8-10.

18, 19. Aleke Yesaya ŋɔlimetɔwo ŋe aɖaba ƒu Yehowa ƒe se siwo ku ɖe nunɔamesiwo ŋu dzii, eye nukae ado tso eme na wo?

¹⁸ Yehowa tɔe anyigba ɖesiaɖe nye le blema Israel. Wona domenyinu si tso Mawu gbɔ ƒome ɖesiaɖe, si woate ŋu atsɔ ahaya loo alo atsɔe ade awɔba gake womadzrae “wòatsi ame si ɖaa o.” (Mose III, 25:23) Se sia xe mɔ ɖe ŋlɔmiwɔwɔ siwo ƒe ɖee nye tɔɖoɖo ɖe anyigba alo xɔwo dzi nu. Ekpɔ ƒomewo ta hã be womava da ahe kolikoli o. Gake ame aɖewo siwo nɔ Yuda tsɔ ŋukeklẽ nɔ Mawu ƒe se siwo ku ɖe nunɔamesiwo ŋu dzi dam. Mixa ŋlɔ bena: “Ne agble dzro wo la, woxɔnɛ; ne xɔ dzro wo la, wodaa adzoe, eye woɖua sesẽnu le aƒe kple aƒetɔ si, le ŋutsu kple eƒe domenyinu si.” (Mixa 2:2) Gake Lododowo 20:21 xlɔ̃ nu be: “Domenyinu, si ŋu wotsi hohoho ɖo la, yayra manɔ me o.”

¹⁹ Yehowa do ŋugbe be yeaxɔ ŋuklẽla siawo ƒe nu siwo woto mɔ gbegblẽ nu kpɔ la le wo si. Xɔ siwo woda adzoe la azu “xɔdowo.” Nusiwo anyigba siwo wotsɔ ŋukeklẽ xɔ wɔna ƒe sue aɖe ko woakpɔ. Womegblɔ alesi tututu fiƒode sia ava eme kple ɣeyiɣi si me wòava me o. Anɔ eme be eƒe akpa aɖe ya teti ku ɖe nɔnɔme siwo woƒe aboyomenɔnɔ le Babilon si nɔ ŋgɔ ahe vɛ ŋu.—Yesaya 27:10.

20. Aleke Kristotɔ siwo li egbea awɔ aƒo asa na ŋukeklẽ ƒe nɔnɔme si ame aɖewo ɖe fia le Israel?

²⁰ Ele be Kristotɔ siwo li egbea natsri ŋukeklẽ numaɖiƒonametɔe si Israel-vi aɖewo ɖe fia le blema. (Lododowo 27:20) Ne míedea asixɔxɔ si gbɔ eme ŋutilãmenuwo ŋu la, ele bɔbɔe be míava nɔ gakpɔmɔnu fitifitiwo dzi tom. Dɔwɔwɔ si ŋu nya ku ɖo alo gakpɔkpɔ kaba ƒe ɖoɖo siwo medzea edzi gbeɖe o ƒe mɔ̃ ate ŋu aɖe mí bɔbɔe. “Amesi tsi klokloklo ɖe hokpɔkpɔ ŋu la, womagbe tohehe nɛ o.” (Lododowo 28:20) Ekema aleke gbegbe wòle vevie enye si be míana nusi le mía si nadze mía ŋu!—Timoteo I, 6:8.

Modzakaɖeɖe Siwo Ŋu Nya Ku Ðo ƒe Mɔ̃

21. Nuvɔ̃ kawo ŋue Yesaya tsi tre ɖo le eƒe babadoname evelia me?

²¹ Yesaya ƒe babadoname evelia kplɔe ɖo be: “Baba na amesiwo fɔa fɔŋli hetia aha muame yome, eye wotsia anyi vaseɖe zãtiƒe, ne wein nade dzo lã me na wo! Kasaŋkuwo, saŋkuwo, asiʋuiwo kple dzewo kpakple wein kpena ɖe woƒe aglotutu la ŋu; ke womeɖea ŋku ɖe Yehowa ƒe dɔwɔwɔ o, eye womekpɔa eƒe asinudɔwɔwɔ o.”—Yesaya 5:11, 12.

22. Aleke wowɔ nu wògbɔ emee le Israel, eye nukae ado tso eme na dukɔa?

²² ‘Dzidzɔ Mawue’ Yehowa nye eye mexe mɔ ɖe modzakaɖeɖe si sɔ nu na esubɔlawo o. (Timoteo I, 1:11) Gake viviseseyomenɔla siawo wɔa nusianu wògbɔa eme! Biblia gblɔ be: “Amesiwo mua aha la, zãe womua aha.” (Tesalonikatɔwo I, 5:7) Gake aglotula siwo ŋu nyagblɔɖia ƒo nu tsoe ya dzea woƒe ahamumua gɔme fɔŋli eye wonɔa ahanono dzi vaseɖe fiẽ ke! Wowɔa nu abe ɖe Mawu meli o ene, abe ɖe mabia nya aɖeke wo ɖe woƒe nuwɔnawo ta o ene. Yesaya gblɔ dzɔgbevɔ̃e aɖe ɖi ɖe amesiawo ŋu. “Woaɖe aboyo nye dukɔ le manyamanya me, woƒe ame ŋkutawo azu dɔwuitɔwo, eye tsikɔ awu woƒe amehawo ate wo ŋu.” (Yesaya 5:13) Mawu ƒe ame siwo wòbla nu kpli—ame ŋkutawo kple ame tsɛwo siaa—ayi tsiẽƒe le esi womewɔ nu le nunya vavãtɔ me o ta.—Xlẽ Yesaya 5:14-17.

23, 24. Nuka mee wogblɔ na Kristotɔwo be woaɖɔ ŋu ɖo le be magbɔ eme o?

²³ “Aglotutuwo,” alo “kplɔ̃ɖoɖo siwo me aƒadodo nɔna,” nye kuxi nɔ Kristotɔ aɖewo hã ŋu le ƒe alafa gbãtɔ me. (Galatiatɔwo 5:21; Byington; Petro II, 2:13) Eyata mewɔ nuku o be Kristotɔ ɖeadzɔgbe aɖewo mete ŋu bu nu ŋu nyuie le hadome modzakaɖeɖewo gome o. Ahanono fũ na ame aɖewo ƒe gbe de dzi bobobo eye wonɔ aƒa dom. (Lododowo 20:1) Ahanono fũ na ame aɖewo nɔ agbe gbegblẽ gɔ̃ hã, eye wona modzakaɖekpekpe aɖewo yi edzi zã bliboa katã kloe wòdo kplamatse Kristotɔwo ƒe dɔwo wɔwɔ le ŋufɔke.

²⁴ Gake Kristotɔ siwo da sɔ ɖea mawumekutsetsewo fiana heɖɔa ŋu ɖo le modzakaɖeɖe si wotiana me eye womewɔa nu wògbɔa eme o. Wowɔna ɖe Paulo ƒe aɖaŋuɖoɖo si le Romatɔwo 13:13 dzi, si gblɔ be: “Minɛ míazɔ nyuie, abe alesi dze le ŋkeke me ene, menye le aglotutuwo kple ahamumuwo . . . me o.”

Fuléle Nuvɔ̃ Ahalɔ̃ Nyateƒe

25, 26. Israel-viwo ƒe tamesusu vɔ̃ɖi ka dzie Yesaya klo nu le le eƒe babadoname etɔ̃lia kple enelia me?

²⁵ Azɔ se baba etɔ̃lia kple enelia siwo Yesaya do na ameawo ɖa: “Baba na amesiwo tsɔa alakpaka dea vodada nɔa hehem, eye wotsɔa tasiaɖamka hea nuvɔ̃e! Amesiwo nɔa gbɔgblɔm bena: Newɔ kabakaba, neƒo du ɖe eƒe dɔ nu, ne míakpɔe; eye Israel ƒe kɔkɔetɔ la ƒe adaŋudede nete va, ne míadze sii. Baba na amesiwo yɔa vɔ̃ be nyui kple nyui be vɔ̃, amesiwo tsɔa viviti wɔa kekelii, eye wotsɔa kekeli wɔa vivitii, amesiwo tsɔa veve wɔa vivii, eye wotsɔa vivi wɔa vevee!”—Yesaya 5:18-20.

²⁶ Aleke gbegbe nya siawo ɖɔ amesiwo tsɔ nuvɔ̃wɔwɔ ɖo dɔe nyuie enye si! Woku ɖe nuvɔ̃ ŋu goŋgoŋ abe alesi woblaa lã siwo tea agba ɖe tasiaɖam ŋu ene. Nuvɔ̃wɔla siawo mevɔ̃na na ʋɔnudrɔ̃gbe aɖeke ƒe vava o. Wotsɔa fewuɖuɖu gblɔna be: ‘Mawu ƒe dɔwo neva kabakaba!’ Le esi teƒe be woabɔbɔ ɖe Mawu ƒe Se te la, wotroa nyawo heyɔa “vɔ̃ be nyui kple nyui be vɔ̃.”—Tsɔe sɔ kple Yeremya 6:15; Petro II, 3:3-7.

27. Aleke Kristotɔ siwo li egbea awɔ atsri Israel-viwo ƒe nɔnɔme ma tɔgbe?

²⁷ Ele be Kristotɔ siwo li egbea natsri nuwɔwɔ alea le nɔnɔme ɖesiaɖe me. Le kpɔɖeŋu me, womexɔa xexeame ƒe nukpɔsusu le matrewɔwɔ kple ŋutsu kple ŋutsu alo nyɔnu kple nyɔnu ƒe dɔdɔ ŋu o. (Efesotɔwo 4:18, 19) Nyateƒee, ate ŋu adzɔ be ‘vodada naɖi ɖe’ Kristotɔ si ate ŋu ana wòava wɔ nuvɔ̃ gã. (Galatiatɔwo 6:1) Hamemegãwo le klalo be yewoakpe ɖe amesiwo dze anyi eye wohiã na kpekpeɖeŋu la ŋu. (Yakobo 5:14, 15) Gbedodoɖa kple aɖaŋuɖoɖo si wotu ɖe Biblia dzi ate ŋu ana woahaya le gbɔgbɔ me. Ne menye nenema o la, amea ate ŋu ava zu “nuvɔ̃ ƒe kluvi.” (Yohanes 8:34) Le esi teƒe be Kristotɔwo naɖu fewu le Mawu ŋu eye woƒe ŋku nadzo le ʋɔnudrɔ̃gbe si gbɔna dzi la, wodzea agbagba boŋ be yewoanɔ anyi “ɖimaƒomaƒo kple mokaka manɔŋui” le Yehowa ŋkume.—Petro II, 3:14; Galatiatɔwo 6:7, 8.

28. Nuvɔ̃ kawo ŋue woƒo nu tsi tre ɖo le Yesaya ƒe babadonamenya mamlɛawo me, eye aleke Kristotɔ siwo li egbea awɔ aƒo asa na nuvɔ̃ siawo?

²⁸ Esɔ be Yesaya gagblɔ babadonamenya mamlɛ siawo be: “Baba na amesiwo bua wo ɖokui nunyalawoe, eye wonye nugɔmeselawo le woawo ŋutɔwo ŋku me. Baba na amesiwo nye kalẽawo le weinnono me kple ŋutsuwɔlawo le aha muame tɔtɔ me. Amesiwo xɔa zãnu hetsona na ame vɔ̃ɖiwo, eye wodaa adzo nya dzɔdzɔe le ame dzɔdzɔewo si.” (Yesaya 5:21-23) Ðewohĩ amesiwo nye ʋɔnudrɔ̃lawo le anyigba la dzie wogblɔ nya siawo na. Egbea hamemegãwo tsria nusi afia be “wobua wo ɖokui nunyalawoe” la wɔwɔ. Woxɔa aɖaŋuɖoɖo tso wo hati hamemegãwo gbɔ ɖokuibɔbɔtɔe eye wowɔna ɖe habɔbɔa ƒe mɔfiamewo dzi pɛpɛpɛ. (Lododowo 1:5; Korintotɔwo I, 14:33) Woɖɔa ŋu ɖo le aha muamewo zazã me, eye womenonɛ tsɔ wɔa hamea me dɔwoe o. (Hosea 4:11) Hamemegãwo tsria nusi adze ameŋkumekpɔkpɔe gɔ̃ hã. (Yakobo 2:9) Aleke gbegbe woto vovo na Kristodukɔa ƒe osɔfowoe enye si! Amesiawo dometɔ geɖe tsyɔa nu nuvɔ̃wɔla siwo nye ame ŋkuta kple kesinɔtɔ siwo le wo dome ƒe nuvɔ̃wo dzi, si to vovo sã na apostolo Paulo ƒe nuxlɔ̃ame siwo le Romatɔwo 1:18, 26, 27; Korintotɔwo I, 6:9, 10; kple Efesotɔwo 5:3-5.

29. Afɔku kae le Yehowa ƒe weingble si nye Israel-viwo lalam?

²⁹ Yesaya ƒo nu tso afɔku si ava amesiwo ‘gbe Yehowa ƒe sewo’ eye wometse dzɔdzɔenyenyekuwo o dzi mlɔeba tsɔ ƒo eƒe nyagblɔɖinya sia tae. (Yesaya 5:24, 25; Hosea 9:16; Maleaxi 3:19) Egblɔ be: “[Yehowa] akɔ aflaga dzi na dukɔ [gã, “NW”] aɖe le didiƒe, eye wòala aku ayɔe tso anyigba ƒe mlɔenu, eye kpɔ ɖa, anɔ du dzi ava kaba.”—Yesaya 5:26; Mose V, 28:49; Yeremya 5:15.

30. Amekae aƒo ‘dukɔ gã aɖe’ nu ƒu ɖe Yehowa ƒe amewo ŋu, eye nukae ado tso eme?

³⁰ Le blemaɣeyiɣiwo me la, wote ŋu zãa ati si wotu ɖe kɔkɔƒe wònyea “aflaga,” alo teƒe si amewo alo aʋakɔ ƒoa ƒu ɖo. (Tsɔe sɔ kple Yesaya 18:3; Yeremya 51:27.) Fifia Yehowa ŋutɔe aƒo “dukɔ gã” sia nu ƒu be woahe yeƒe ʋɔnudɔdrɔ̃ vɛ.b ‘Alia aku’ ayɔe, si fia be ahe eƒe susu yi eƒe dukɔ dzeaglãa dzi woazu amesiwo dzi wòle be woaɖu. Emegbe nyagblɔɖila la ƒo nu tso aʋadziɖula siawo ƒe amedzidzedze dziŋɔ si woawɔ le ablaɖeɖe me ŋu, amesiwo ‘alé nu,’ si nye Mawu ƒe dukɔ la, ‘atsɔ ayi’ aboyo mee. (Xlẽ Yesaya 5:27-30a.) Eye nublanuinya ka gbegbee nye si wòanye na anyigba si dzi Yehowa ƒe amewo le! “Ne woɖe ŋku ɖe anyigba dzi la, hiã ƒe blukɔ koe li, eye woƒe alilikpo na kekeli do viviti.”—Yesaya 5:30b.

31. Aleke Kristotɔ vavãwo awɔ aƒo asa na to si wohe na Yehowa ƒe weingble si nye Israel-viwo la?

³¹ Ẽ, womekpɔ kutsetse nyui aɖeke le weingble si Mawu de lɔlɔ̃tɔe la me o—ɖeko wòdze be woatsrɔ̃e ɖa. Nusɔsrɔ̃ vevi kae nye si le Yesaya ƒe nyawo me na amesiwo katã asubɔ Yehowa egbea! Neva eme be woagatse ku bubu aɖeke wu dzɔdzɔenyenyekuwo o, be wòanye kafukafu na Yehowa eye wòana woa ŋutɔwo hã nakpɔ ɖeɖe!

[Etenuŋɔŋlɔwo]

[Nɔnɔmetata si le axa 83]

Nuvɔ̃wɔla ku ɖe nuvɔ̃ ŋu goŋgoŋ abe alesi lã siwo hea tasiaɖam kuna ɖe eŋu ene

[Nɔnɔmetata si xɔ axa 85]