Ta Adelia

Yehowa—“Mawu Dzɔdzɔetɔ Kple Ðela”

Yesaya 45:1-25

1, 2. Kakaɖedzinya kawoe wogblɔ le Yesaya ta 45 lia me, eye biabia kawo mee míadzro?

KAKAÐEDZI le Yehowa ƒe ŋugbedodowo ŋu. Nyaɖeɖefia ƒe Mawu kple nuwɔwɔwo ƒe Mawue wònye. Eɖee fia enuenu be yenye Mawu dzɔdzɔetɔ kple Ðela na dukɔwo katã me tɔwo. Esia nye kakaɖedzinya dodzidzɔname siwo le Yesaya ta 45 lia me la dometɔ aɖewo.

² Tsɔ kpe ɖe eŋu la, Yehowa ƒe nyagblɔɖiŋutete ƒe kpɔɖeŋu ɖedzesi aɖe dze le Yesaya ta 45 lia me. Mawu ƒe gbɔgbɔ na Yesaya te ŋu kpɔ dukɔ siwo le didiƒewo helé ŋku ɖe nusiwo ava dzɔ le ƒe alafawo megbe ŋu, eye eʋãe wòƒo nu tso nudzɔdzɔ aɖe si Yehowa, amesi nye nyagblɔɖi ƒe Mawu vavã la, koe ate ŋu agblɔe ɖi wòasɔ pɛpɛpɛ la ŋu. Nudzɔdzɔ kae wònye? Dɔ kae wòwɔ ɖe Mawu ƒe amewo dzi le Yesaya ƒe ŋkekea me? Gɔmesese kae le eŋu na mí egbea? Mina míadzro nyagblɔɖila la ƒe nyaawo me akpɔ.

Yehowa ƒe Nya Ðe Babilon Ŋu

 3. Nya siwo me kɔ kawoe Yesaya 45:1-3a gblɔ tsɔ ɖɔ Kores ƒe aʋadziɖuɖui?

³ “Ale Yehowa gblɔ na Kores, eƒe amesiamina la, amesi ƒe nuɖusi melé, ne mafanya dukɔwo le eŋgɔ, eye matu ali dzi na fiawo, maʋu ʋɔwo le eŋku me, eye agbowo matsi dodo o la, enye si: Madze ŋgɔwò, eye mana kpoƒewo nasɔ, magbã akɔbligbowo, eye maŋe gametiwo, eye matsɔ kesinɔnu, si le blukɔ me, kple nu xɔasi, siwo woɣla la, ana wò.”—Yesaya 45:1-3a.

 4. (a) Nukata Yehowa yɔ Kores be yeƒe “amesiamina”? (b) Aleke Yehowa akpɔ egbɔ be Kores ɖu aʋa dzii?

⁴ Yehowa to Yesaya dzi ƒo nu na Kores abe ɖe wònɔ agbe ɣemaɣi ene, togbɔ be womekpɔ dzi Kores le Yesaya ƒe ŋkekea me o hã. (Romatɔwo 4:17) Esi Yehowa tia Kores do ŋgɔ be wòawɔ dɔ tɔxɛ aɖe ta la, woate ŋu ayɔ Kores be Mawu ƒe “amesiamina.” Esi Mawu le ekplɔm ta la, aɖu dukɔwo dzi, eye wòaxɔ ŋusẽ le fiawo si ale be womate ŋu anɔ te ɖe enu o. Ne Kores va dze Babilon dzi la, Yehowa akpɔ egbɔ be dua ƒe agbowo nanɔ ʋuʋu ɖi, eye woazu nu maɖinuwo abe agbo siwo wogbã ene. Adze ŋgɔ na Kores aɖe mɔxenuwo katã ɖa. Mlɔeba la, Kores ƒe asrafowo axɔ dua kple eƒe “nu xɔasi, siwo woɣla,” si nye eƒe kesinɔnu siwo wodzra ɖo ɖe xɔ dovivitiwo me. Nya siae Yesaya gblɔ ɖi. Ðe eƒe nyawo va emea?

5, 6. Ɣekaɣie nyagblɔɖi si ku ɖe Babilon ƒe mumu ŋu va eme, eye aleke wòdzɔe?

⁵ Le ƒe 539 D.M.Ŋ. me—ƒe siwo ade 200 tso esime Yesaya ŋlɔ nyagblɔɖi sia megbe—la, Kores va ɖo Babilon-gliawo gbɔ nyateƒe hedze dua dzi. (Yeremya 51:11, 12) Gake Babilontɔwo metsi dzi o. Wobu be ame aɖeke mate ŋu axɔ yewoƒe dua o. Woɖe ʋe gã globo siwo me Frat-tɔsisia me tsiwo yɔ la ƒo xlã eƒe gli kɔkɔawo kpe ɖo wònye dua ta kpɔnuwo ƒe akpa aɖe. Ƒe alafa ɖeka kple edzivɔe nye ma si futɔ aɖeke mete ŋu va dze Babilon dzi xɔe kpɔ o! Le nyateƒe me la, Babilon-fia Belsazar si nɔ dua me bu be yewole dedie ale gbegbe be wònɔ aglo tum kple eƒe amegãwo. (Daniel 5:1) Kores wu dɔ vevi aɖe nu le eƒe aʋahohoa me le zã ma me—si nye October 5/6 ƒe zã me.

⁶ Kores ƒe aʋawɔɖaŋunyalawo ɖe tsimɔ na Frat-tɔsisia ɖe eƒe go ŋu le Babilon ƒe dzigbe gome ale be eme tsiwo megayia dua me le anyigbe gome o. Eteƒe medidi o tɔsisia mie le Babilon-dua me kple egodo ale gbegbe be Kores ƒe asrafowo te ŋu zɔ to tɔʋua me ɖo ta dua titina. (Yesaya 44:27; Yeremya 50:38) Nukutɔe la, agbo siwo nɔ tɔsisia ŋu nɔ ʋuʋu ɖi abe alesi tututu Yesaya gblɔe ɖi ene. Kores ƒe aʋakɔwo nye zi ɖe Babilon dzi, woxɔ fiasã la, eye wowu Fia Belsazar. (Daniel 5:30) Woɖu aʋaa dzi keŋkeŋ le zã ɖeka me. Babilon mu, eye nyagblɔɖia va eme abe alesi tututu wogblɔe ene.

 7. Aleke nya si Yesaya gblɔ ɖi le Kores ŋu me vava ɖedzesi la doa ŋusẽ Kristotɔwoe?

⁷ Nyagblɔɖi sia si va eme pɛpɛpɛ la doa ŋusẽ Kristotɔ siwo li egbea ƒe xɔse. Ena woxɔe se vevie be kakaɖedzi blibo le Biblia me nyagblɔɖi siwo meva eme haɖe o hã ŋu. (Petro II, 1:20, 21) Yehowa subɔlawo nya be nudzɔdzɔ si Babilon ƒe mumu le ƒe 539 D.M.Ŋ. me nye vɔvɔli na—si nye “Babilon gã” la ƒe mumu—la dzɔ xoxo le keke ƒe 1919 me ke. Ke hã wole mɔ kpɔm na egbeŋkekea me subɔsubɔhabɔbɔ ma ƒe tsɔtsrɔ̃ kpakple dunyahenuɖoanyi si le Satana ƒe ŋusẽ te la ɖeɖeɖa si ŋugbe wodo, Satana dede aʋli me, kple dziƒo yeye kple anyigba yeyea ƒe vava. (Nyaɖeɖefia 18:2, 21; 19:19-21; 20:1-3, 12, 13; 21:1-4) Wonya be menye ŋugbedodo gbɔlowoe Yehowa ƒe nyagblɔɖiwo nye o, ke boŋ wonye etsɔmenudzɔdzɔ siwo ava eme godoo ŋu nya. Ne Kristotɔ vavãwo ɖo ŋku alesi nya si Yesaya gblɔ ɖi le Babilon ƒe mumu ŋu ƒe akpa ɖesiaɖe va emee dzi la, edoa ŋusẽ woƒe kakaɖedzi. Wonya be Yehowa wɔa eƒe nya dzi ɣesiaɣi.

Nusita Yehowa Ave Kores Nu

 8. Susu siwo ta Yehowa na Kores ɖu Babilon dzi dometɔ ɖeka ɖe?

⁸ Esi Yehowa gblɔ amesi aɖu Babilon dzi kple alesi esia ava emee vɔ la, eyi edzi ƒo nu tso nusita wòana Kores naɖu aʋa dzi ŋu. Esi Yehowa nɔ nu ƒom na Kores le nyagblɔɖi me la, egblɔ be “ne nadze sii be, nye Yehowa, Israel ƒe Mawu la, enye amesi tsɔ ŋkɔ yɔ wòe.” (Yesaya 45:3b) Esɔ be xexemefiaɖuƒe enelia le Biblia me ŋutinya me ƒe fia nakpɔe be amesi lolo wu ye—si nye Yehowa, Xexeme Katã ƒe Dziɖula—la gbɔe yeƒe aʋadziɖuɖu gãtɔ kekeake tso. Ele be Kores nalɔ̃ ɖe edzi be Yehowa, Israel ƒe Mawu, lae yɔ ye alo de dɔ asi na ye. Biblia ƒe nuŋlɔɖi ɖee fia be Kores lɔ̃ ɖe edzi nyateƒe be Yehowa gbɔe yeƒe aʋadziɖuɖu gã la tso.—Ezra 1:2, 3.

 9. Susu evelia ka tae Yehowa kplɔ Kores vɛ wòva ɖu Babilon dzi?

⁹ Yehowa gblɔ susu evelia si ta wòakplɔ Kores vɛ wòava ɖu Babilon dzi be: “Le nye dɔla Yakob kple nye ame tiatia Israel ta; metsɔ wò ŋkɔ yɔ wò, eye metsɔ bubuŋkɔ na wò, esi mèkpɔ dze sim haɖe o.” (Yesaya 45:4) Alesi Kores ɖu Babilon dzii la ɖe dzesi ŋutɔ. Enye xexemefiaɖuƒe aɖe ƒe mumu kple bubu ƒe ŋusẽkpɔkpɔ, eye ezu ŋutinya si li na megbeviwo. Ke hã awɔ mo yaa na dukɔ siwo ƒo xlã wo la me tɔ siwo tsɔ didi vevie nɔ nusiwo va dzɔ kpɔm la be woanya be aboyome “tsɛ” akpe ʋɛ aɖewo siwo nɔ Babilon—Yudatɔ siwo nye Yakob ƒe dzidzimeviwo—tae nusiawo katã dzɔ ɖo. Gake blema Israel dukɔa me tɔ susɔe siawo menye ame tsɛwo le Yehowa gbɔ kura o. Eƒe “dɔla” wonye. Wonye eƒe “ame tiatia” le anyigba dzi dukɔwo katã dome. Togbɔ be Kores menya Yehowa tsã o hã la, Yehowa zãe wònye Eƒe amesiamina be wòaxɔ du si gbe asiɖeɖe le aboyome siwo le eme ŋu. Menye Mawu ƒe tameɖoɖo wònye be yeƒe dukɔ tiatia la nanɔ fu kpem le dzronyigba dzi ɖaa o.

10. Susu vevitɔ ka tae Yehowa zã Kores wòhe Babilon Xexemefiaɖuƒea va nuwuwui?

¹⁰ Susu etɔ̃lia aɖe li si le vevie wu si ta Yehowa zã Kores wòmu Babilon. Yehowa gblɔ be: “Nyee nye Yehowa, ɖeke megali o; mawu aɖeke mekpe ɖe ŋunye o; mebla ali dzi na wò, esi mèkpɔ dze sim haɖe o, ne woadze sii tso ɣedzeƒe kple ɣetoɖoƒe be, ame aɖeke mekpe ɖe ŋunye o. Nyee nye Yehowa, ɖeke megali o.” (Yesaya 45:5, 6) Ẽ, Babilon Xexemefiaɖuƒea ƒe mumu ɖe Yehowa ƒe Mawunyenye fia eye wònye kpeɖodzi na amesiame be eya ɖeɖekoe dze be woade ta agu na. Ne wona ablɔɖe Mawu ƒe dukɔa la, ana dukɔ geɖe—tso ɣedzeƒe vaseɖe ɣetoɖoƒe—me tɔwo nava kpɔe be Yehowae nye Mawu vavã ɖeka kolia la.—Maleaxi 1:11.

11. Aleke Yehowa ɖee fia be ŋusẽ le ye si be yeana yeƒe tameɖoɖo le Babilon ŋu nava eme?

¹¹ Ðo ŋku edzi be woŋlɔ Yesaya ƒe nyagblɔɖi sia ade ƒe 200 hafi nyaa ŋutɔ va dzɔ. Ðewohĩ esi ame aɖewo see la, wobia be, ‘Ðe ŋusẽ le Yehowa si nyateƒe be wòana wòava emea?’ Ŋuɖoɖoa enye ẽ, abe alesi ŋutinya ɖo kpe edzii ene. Yehowa gblɔ nusita wòsɔ be míaxɔe ase be ate ŋu awɔ nya si wògblɔ dzi la be: “Nye amesi ɖo kekeli, eye mewɔ viviti, nye amesi wɔ [ŋutifafa, “NW”], eye mehe dzɔgbevɔ̃e vɛ. Nye Yehowa ye wɔ nusiawo katã!” (Yesaya 45:7) Nuwɔwɔ ɖesiaɖe—tso kekeli vaseɖe viviti dzi—kple ŋutinya me nudzɔdzɔ ɖesiaɖe—tso ŋutifafa vaseɖe dzɔgbevɔ̃e dzi—le Yehowa ƒe ŋusẽ te. Abe alesi wòwɔ kekeli na ŋkeke kple viviti na zã ene la, nenemae wòawɔ ŋutifafa na Israel kple dzɔgbevɔ̃e na Babilon. Ŋusẽ le Yehowa si wòtsɔ wɔ xexeamee, eye ŋusẽ le esi hã be wòana eƒe nyagblɔɖiwo nava eme. Nya sia ganaa kakaɖedzi Kristotɔ siwo li egbea siwo srɔ̃a eƒe nyagblɔɖinya la nyuie.

12. (a) Nukae Yehowa na kpɔɖeŋu dziƒowo kple anyigba he vɛ? (b) Ŋugbedodo fakɔname kae le Yesaya 45:8 me na Kristotɔwo egbea?

¹² Esɔ be Yehowa zã nusiwo dzɔna edziedzi le xexemewɔwɔ me tsɔ wɔ nusiwo le Yudatɔ siwo woɖe aboyoe lalam ƒe kpɔɖeŋui be: “Mi dziƒowo, miɖuɖu tso dzi me, eye alilikpowo nadza dzɔdzɔenyenye; anyigba neke nu, ne xɔname nado, eye dzɔdzɔenyenye hã namie. Nye Yehowa ye wɔe.” (Yesaya 45:8) Abe alesi dziƒo ŋutɔŋutɔwo naa tsi si léa agbe ɖe te dzanae ene la, nenema ke Yehowa ana ŋusẽkpɔɖeamedzi dzɔdzɔewo nadza tso kpɔɖeŋudziƒowo ɖe eƒe amewo dzii. Eye abe alesi anyigba ŋutɔŋutɔ kea nu wɔa nuɖuɖu gbogbowoe ene la, nenema ke Yehowa ana nuwo nadzɔ le kpɔɖeŋunyigba dzii wòawɔ ɖeka kple eƒe tameɖoɖo dzɔdzɔea—vevietɔ ɖeɖekpɔkpɔ na eƒe ame siwo le aboyo me le Babilon. Yehowa na ‘dziƒo’ kple “anyigba” wɔ nusiawo tɔgbe le ƒe 1919 me be wòatsɔ aɖe eƒe amewoe. Nusiawo kpɔkpɔ na dzi dzɔa Kristotɔ siwo li egbea. Nukatae? Elabena nudzɔdzɔ mawo doa ŋusẽ woƒe xɔse esi wole mɔ kpɔm na ɣeyiɣi si me kpɔɖeŋudziƒowo, si nye Mawu ƒe Fiaɖuƒea, ahe yayrawo vɛ na anyigba dzɔdzɔe aɖe. Ɣemaɣi la, dzɔdzɔenyenye kple xɔname si atso dziƒowo kple anyigba alolo sã wu alesi wònɔ esime womu Babilon. Aleke gbegbe wòana Yesaya ƒe nyawo nava eme zi mamlɛ le ŋutikɔkɔe me enye si!—Petro II, 3:13; Nyaɖeɖefia 21:1.

Yayra Siwo Tsoa Dzesidede Yehowa ƒe Dziɖulanyenye Me

13. Nukata mesɔ kura be amegbetɔwo nahe nya ɖe Yehowa ƒe tameɖoɖowo ŋu o?

¹³ Esi woƒo nu tso etsɔmeyayra dodzidzɔnamewo ŋu alea vɔ la, nyagblɔɖia me nyawo trɔ kpata eye Yesaya gblɔ babadonamenya eve ƒokpli aɖe: “Baba na amesi le dzre hem kple emèla, sonu gaglɛ wònye le anyisonu gaglɛwo dome! Ðe tsu agblɔ na emèla be: Nuka wɔm nèle? alo eƒe dɔwɔwɔ nagblɔ be: Mèto asi oa? Baba na amesi gblɔ na fofoa be: Nukata nèdzim? eye na nyɔnu be: Nukata nèlé ku ɖo?” (Yesaya 45:9, 10) Edze abe nya si Yehowa gblɔ ɖi la medze Israel-viwo ŋu o ene. Ðewohĩ womexɔe se be Yehowa aɖe mɔ be eƒe dukɔ nayi aboyo me o. Alo ɖewohĩ alesi woana trɔ̃subɔlawo ƒe dukɔ aɖe ƒe fia nava ɖe Israel-viwo ke menye fia si tso Dawid ƒeme o la mesɔ na wo o. Yesaya ɖe alesi susu mele woƒe nya sia me o fia esi wòtsɔ amesiwo le nya hem la sɔ kple anyisonu gaglɛ siwo wotsɔ ƒu gbe kple sonu gaglɛ siwo mekpɔ mɔ ahe nya le wo wɔla ƒe nunya ŋu o. Nusi tututu zemela wɔ la le gbɔgblɔm azɔ be zemela la meto asi o alo ŋusẽ mele esi wòatsɔ ame nui o. Bometsinya kae nye si! Nyahelaawo le abe ɖevi sue siwo do dzi le gbe tɔm wo dzilawo ƒe ŋusẽ ene.

14, 15. Nukae nya siwo nye “kɔkɔetɔ” kple “emèla” ɖe fia le Yehowa ŋu?

¹⁴ Yesaya gblɔ alesi Yehowa ɖo nya ŋu na nyahela siawoe be: “Ale Yehowa, Israel ƒe kɔkɔetɔ kple emèla, gblɔ esi: Mibia nusiwo gbɔna dzɔdzɔ ge la ta se, ke mina makpɔ vinyewo kple nye asinudɔwɔwɔwo ƒe nya gbɔ. Nyee wɔ anyigba, eye mewɔ ame ɖe edzi. Nye asie he dziƒo me, eye meɖo eŋu nuwo katã. Menyɔe le dzɔdzɔenyenye me, eye mata eƒe mɔwo katã. Eyae atso nye du la, eye wòaɖe asi le nye aboyomewo ŋu, menye le ga alo nunana ta o; Yehowa Zebaot ye gblɔe!”—Yesaya 45:11-13.

¹⁵ Yehowa te gbe ɖe eƒe kɔkɔenyenye dzi esi wòyɔ eɖokui be “kɔkɔetɔ.” Eye esi wòyɔ eɖokui be “emèla” la, ete gbe ɖe edzi be gome le Wɔla la si be wòaɖo alesi nuwo ayii. Yehowa te ŋu na Israel nya nusiwo ava dzɔ eye wòte ŋu kpɔ eƒe asinudɔwɔwɔ, si nye eƒe dukɔ, la ta. Wogaɖee fia le afisia hã be nuwɔwɔ kple nyaɖeɖefia ƒe gɔmeɖosea do ƒome kple wo nɔewo. Esi Yehowae nye xexe bliboa Wɔla ta la, gome le esi be wòafia alesi wòle be nuwo nayii. (Kronika I, 29:11, 12) Le nya si me dzrom míele me la, Dziɖulagã la ɖoe be yeaɖo Kores si nye trɔ̃subɔla la ɖa be wòava ɖe Israel. Togbɔ be etsɔme ke Kores ava hã la, kakaɖedzi le eƒe vava ŋu abe alesi dziƒo kple anyigba li ene. Ekema Israel-vi kae ado dzi ahe nya ɖe Fofoa, si nye ‘aʋakɔwo ƒe Yehowa’ ŋu?

16. Nukata wòle be Yehowa subɔlawo nabɔbɔ wo ɖokui ɖe eyama te?

¹⁶ Susu bubu si ta wòle be Mawu subɔlawo nabɔbɔ wo ɖokui na eyama la gadze le Yesaya ƒe kpukpui mawo ke me. Eƒe nyametsotsowo dea esubɔlawo dzi wu ɣesiaɣi. (Hiob 36:3) Ede sewo be wòakpe ɖe eƒe amewo ŋu nu nanyo na wo. (Yesaya 48:17) Yudatɔ siwo lɔ̃ ɖe Yehowa ƒe dziɖulanyenye dzi le Kores ƒe ŋkekea me la kpɔe be esia nye nyateƒe. Kores wɔ nu le Yehowa ƒe dzɔdzɔenyenye me heɖo wo ɖe wo de tso Babilon ale be woate ŋu agbugbɔ gbedoxɔa atu. (Ezra 6:3-5) Nenema ke wòle egbea be woyraa amesiwo wɔa Mawu ƒe sewo dzi le woƒe gbesiagbegbenɔnɔ me eye wobɔbɔa wo ɖokui ɖe eƒe dziɖulanyenye te.—Psalmo 1:1-3; 19:8; 119:105; Yohanes 8:31, 32.

Yayra si Dukɔ Bubuwo Akpɔ

17. Amekawo hãe Yehowa ƒe xɔnamedɔwo aɖe vi na tsɔ kpe ɖe Israel ŋu?

¹⁷ Menye Israel koe Babilon ƒe anyidzedzea aɖe vi na o. Yesaya gblɔ be: “Ale Yehowa gblɔ esi: Egipte ƒe adzɔnuwo [dɔwɔla siwo womexea fe na o, “NW”], Kus kple Sebatɔ [asitsala, “NW”] ƒlalaawo ƒe viɖe age ɖe asiwò me ahazu tɔwò; woanɔ ga me adze yowòme, eye woade ta agu na wò ahaƒo koko na wò be: Wò ɖeɖe ko gbɔe Mawu le, ɖeke megali o, mawu bubu aɖeke megali o.” (Yesaya 45:14) Le Mose ƒe ŋkekea me la, ‘amedzro gbogbo aɖe’ siwo menye Israel-viwo o dzo kple Israel-viwo esime Woʋu le Egipte. (Mose II, 12:37, 38) Nenema ke dukɔ bubu me tɔwo anɔ Yudatɔ aboyomenɔla siwo atso Babilon ayi wo de la domee. Womazi amesiawo siwo menye Yudatɔwo o la dzi be woayi o ke boŋ ‘woa ŋutɔwo adze wo yome.’ Esime Yehowa gblɔ be “woade ta agu na wò” eye ‘woaƒo koko na wò’ la, alesi amedzro siawo alɔ̃ faa abɔbɔ wo ɖokui na Israel ahatsɔ wo ɖokui ana woe lae wòwɔnɛ. Ne wode ga wo la, ke woa ŋutɔwoe awɔe nenema, si fia alesi wolɔ̃ faa be yewoasubɔ Mawu ƒe dukɔ si wòbla nu kpli, amesiwo woagblɔ na be: “Wò ɖeɖe ko gbɔe Mawu le.” Woanye trɔ̃subɔla zu Yudatɔwo ade ta agu na Yehowa, le eƒe nubabla kple Israel ƒe ɖoɖoa te.—Yesaya 56:6.

18. Amekawoe kpɔ viɖe tso ablɔɖe si Yehowa na “Mawu ƒe Israel” la me egbea, eye le mɔ kawo nu?

¹⁸ Tso ƒe 1919 me esime woɖe “Mawu ƒe Israel” tso gbɔgbɔmeboyo me la, Yesaya ƒe nyawo gava eme le mɔ si lolo wu Kores ƒe ŋkekea me tɔ nu. Ame miliɔn geɖe siwo le xexeame katã ɖee fia be yewodi be yewoasubɔ Yehowa. (Galatiatɔwo 6:16; Zaxarya 8:23) Abe “dɔwɔla” kple “asitsala” siwo ŋu Yesaya ƒo nu tsoe ene la, wozãa woƒe ŋusẽ kple nunɔamesiwo tsɔ doa alɔ tadedeagu vavãtɔe. (Mateo 25:34-40; Marko 12:30) Wotsɔa wo ɖokui ɖea adzɔgbe na Mawu hezɔa eƒe mɔwo dzi, eye wotsɔa dzidzɔ zua eƒe kluviwoe. (Luka 9:23) Wodea ta agu na Yehowa ɖeka ko, eye wokpɔa viɖe tso hadede kple Yehowa ƒe “dɔla nuteƒewɔla kple aɖaŋudzela” si le nubabla tɔxɛ ƒe ƒomedodo me kple Mawu la me. (Mateo 24:45-47; 26:28; Hebritɔwo 8:8-13) Togbɔ be “dɔwɔla” kple “asitsala” mawo mele nubabla ma me o hã la, eɖea vi na wo eye wowɔna ɖe se siwo le eme dzi hetsɔa dzideƒo gblɔna be: “Mawu bubu aɖeke megali o.” Dzidzɔ kae nye si wònye be míele dzidziɖedzi gã si amesiawo siwo lɔ̃ faa be yewoado alɔ tadedeagu vavãtɔ le kpɔkpɔm la teƒe kpɔm egbea!—Yesaya 60:22.

19. Nukae adzɔ ɖe amesiwo be legbawo kokokoe yewoasubɔ dzi?

¹⁹ Esi woɖee fia be dukɔwo me tɔwo hã ava de ta agu na Yehowa megbe la, nyagblɔɖila la do ɣli be: “Vavãe, wò Israel ƒe Mawu, xɔnametɔ la, Mawu ɣaɣla nènye!” (Yesaya 45:15) Togbɔ be Yehowa medi be yeaɖe yeƒe ŋusẽ afia fifia o hã la, magaɣla eɖokui le etsɔme o. Aɖee afia be Israel ƒe Mawu kple yeƒe amewo Ðelae yenye. Gake Yehowa manye amesiwo ɖoa ŋu ɖe legbawo ŋu la Ðela o. Yesaya gblɔ le amesiawo ŋu be: “Ŋukpe lé wo katã, eye woƒe mo tsi dã; legbamèlawo katã le yiyim le vlododo me.” (Yesaya 45:16) Alesi woaɖi gbɔ woe la manye ɣeyiɣi kpui aɖe ƒe vlodoame kple ŋukpe dzro ko o. Anye ku—si to vovo sã na nusi ƒe ŋugbe Yehowa gado na Israel.

20. Mɔ ka nue Israel akpɔ “xɔname mavɔ” le?

²⁰ “Yehowa atsɔ xɔname mavɔ aɖe Israel [si le Yehowa ŋu lae, “NW”]; ŋukpe kple vlododo malé mi tegbetegbe akpɔ o.” (Yesaya 45:17) Yehowa do xɔname mavɔ ŋugbe na Israel, gake nane dzie esia nɔ te ɖo. Ele be Israel nayi edzi ‘anɔ Yehowa ŋu.’ Esime Israel gblẽ ɖekawɔwɔ ma me to Yesu si nye Mesia la gbegbe me la, dukɔa bu woƒe “xɔname mavɔ” ƒe mɔnukpɔkpɔ ma. Gake Israel-vi aɖewo axɔ Yesu dzi se, eye amesiawo dzie Mawu ƒe Israel si ava xɔ ɖe ŋutilã me Israel teƒe la adze egɔme tsoe. (Mateo 21:43; Galatiatɔwo 3:28, 29; Petro I, 2:9) Womado vlo gbɔgbɔ me Israel akpɔ o. Woana wòava nɔ “nubabla mavɔ” aɖe me.—Hebritɔwo 13:20.

Míate Ŋu Aɖo Ŋu Ðe Yehowa Ŋu le Xexemewɔwɔ Kple Nyaɖeɖefia Me

21. Aleke Yehowa ɖee fia be woate ŋu aɖo ŋu ɖe ye ŋu bliboe le xexemewɔwɔ kple nyaɖeɖefia me?

²¹ Ðe Yudatɔwo ate ŋu aɖo ŋu ɖe xɔname mavɔ ƒe ŋugbe si Yehowa do na Israel la ŋua? Yesaya ɖo eŋu be: “Ale Yehowa, dziƒowɔla, eya amesi nye Mawu, eya amesi mè anyigba, eye wòwɔe; eya amesi ɖoe anyi, menye ɖe wòwɔe, be wòatsi ƒuƒlu o, ke boŋ ɖe wòmèe, be woanɔ edzi la, gblɔ esi: Nyee nye Mawu, ɖeke mekpe ɖe ŋunye o. Nyemeƒo nu le vivi me le anyigba ƒe teƒe, si do blukɔ o; nyemegblɔ na Yakob ƒe ƒome la be: ‘Midim yakatsyɔ’ o. Nye Yehowa megblɔ nusi le eme, eye meto nyateƒe.” (Yesaya 45:18, 19) Zi enelia kple mamlɛtɔ enye sia si Yesaya dze eƒe nyagblɔɖinya vevi aɖe gɔme kple nyagbɔgblɔ sia be: “Ale Yehowa gblɔ esi.” (Yesaya 45:1, 11, 14) Nya kae Yehowa gblɔ? Eyae nye be woate ŋu aɖo ŋu ɖe ye ŋu le xexemewɔwɔ kple nyaɖeɖefia siaa me. Mewɔ anyigba la be “wòatsi ƒuƒlu o.” Nenema ke mebia tso eƒe dukɔ, Israel, si be woadi ye ‘dzodzro o.’ Abe alesi Mawu ƒe tameɖoɖo na anyigba ava emee ene la, nenema ke Mawu ƒe tameɖoɖo na eƒe dukɔ tiatia la hã ava emee. Yehowa gblɔa eƒe nyawo amesiame sena, si to vovo na alakpamawuwo subɔlawo ƒe nya siwo gɔme menya sena o. Eƒe nyawo le eteƒe, eye woava eme. Amesiwo subɔnɛ la masubɔe dzodzro o.

22. (a) Nuka dzie Yudatɔ siwo nɔ aboyo me le Babilon ate ŋu aka ɖo? (b) Kakaɖedzi kae le Kristotɔ siwo li egbea si?

²² Nya mawo na kakaɖedzi Mawu ƒe dukɔ si woɖe aboyoe le Babilon la be Ŋugbedodonyigba la manye aƒedo ɖaa o. Woagava nɔ edzi. Eye ŋugbe siwo Yehowa do na wo ava eme. Ne míekekee ɖe enu la, Yesaya ƒe nyawo naa kakaɖedzi Mawu ƒe amewo egbea be womagblẽ anyigba la wòazu aƒedo o—dzo mafiae abe alesi ame aɖewo xɔe se ene, alo be nukliabɔmbwo natsrɔ̃e abe alesi ame bubuwo vɔ̃na be ava dzɔ ene o. Mawu ɖo tame be anyigba nanɔ anyi tegbee le paradiso ƒe nɔnɔme dzeani me eye be ame dzɔdzɔewo nanɔ edzi. (Psalmo 37:11, 29; 115:16; Mateo 6:9, 10; Nyaɖeɖefia 21:3, 4) Ẽ, kakaɖedzi le Yehowa ƒe nyawo ŋu, abe alesi wònɔ le Israel gome ene.

Yehowa Kpɔa Nublanui na Ame

23. Nukae anye emetsonu na amesiwo subɔa legbawo, eye aleke wònɔna na amesiwo subɔa Yehowa?

²³ Wote gbe ɖe Israel ƒe ɖeɖekpɔkpɔ dzi le nya siwo Yehowa gagblɔ me be: “Mi dukɔwo ƒe ame sisiwo, miƒo ta kpli, eye miva, mi katã mite va! Ame manyanuwo wonye, amesiwo lé woƒe aklama kpakpɛ tikpowo ɖe ta, eye wole gbe dom ɖa na mawu, siwo meɖea ame o. Migblɔe, eye mihee vɛ, woade adaŋu kple wo nɔewo. Ameka na wose nusiawo gbaɖegbe ke, eye wògblɔe tso blema ke? Nye Yehowa ye, eye mawu aɖeke mekpe ɖe ŋunye o! [Mawu dzɔdzɔe kple Xɔnametɔ menye, ɖeke meli kpe ɖe ŋunye o, “NW”].” (Yesaya 45:20, 21) Yehowa bia tso ‘ame sisiawo’ si be woatsɔ woƒe ɖeɖekpɔkpɔ asɔ kple nusi adzɔ ɖe amesiwo subɔa legbawo dzi akpɔ. (Mose V, 30:3; Yeremya 29:14; 50:28) Esi trɔ̃subɔlawo doa gbe ɖa na mawu siwo si ŋusẽ mele woaɖe wo o eye wosubɔa wo ta la, wonye “ame manyanuwo.” Woƒe subɔsubɔ nye dzodzro—viɖe aɖeke mele eŋu o. Gake amesiwo subɔa Yehowa ya kpɔnɛ be ŋusẽ le esi be wòana nya siwo wògblɔ ɖi “gbaɖegbe ke,” siwo me eƒe dukɔ siwo le aboyo me le Babilon ƒe ɖeɖekpɔkpɔ hã le, nava eme. Ŋusẽ kple nukpɔkpɔdoŋgɔ alea na Yehowa to vovo tso mawu bubuawo katã gbɔ. “Mawu dzɔdzɔe kple Ðela” wònye vavã.

‘Xɔname Nanye Mía Mawu Tɔ’

24, 25. (a) Nukae Yehowa kpe amewo be woawɔ, eye nukata kakaɖedzi li be eƒe ŋugbedodowo ava eme? (b) Nukae Yehowa di tso amewo si wòsɔ nyuie?

²⁴ Yehowa ƒe nublanuikpɔkpɔ ʋãe wòkpe amewo be: “Mi anyigba ƒe mlɔenuwo katã, mitrɔ ɖe ŋunye, eye mina woaxɔ na mi; elabena nyee nye Mawu, ɖeke megali o. Meta ɖokuinye, nya vavã do tso nye nu me, eye matrɔ o be: Klowo katã atɔ anyi nam, eye aɖewo katã aka atam nam ahagblɔ bena: Míaƒe dzɔdzɔenyenye kple ŋusẽ le Yehowa gbɔ; amesiwo katã do dziku ɖe eŋu la, ava egbɔ, eye ŋu akpe wo. Yehowa ye woatsɔ atso afia na Israel ƒe ƒomeawo katã, eye woaƒo adegbe.”—Yesaya 45:22-25.

²⁵ Yehowa do ŋugbe na Israel be yeaɖe amesiwo le Babilon siwo ɖoa ŋu ɖe ye ŋu. Mate ŋu adzɔ be eƒe nyagblɔɖia nado kpo emevava o elabena Yehowa di be yeaɖe yeƒe dukɔ la eye ŋusẽ le esi wòatsɔ aɖe woe hã. (Yesaya 55:11) Kakaɖedzi le Mawu ƒe nyawo ŋutɔ ŋu, gake kakaɖedzi nɔa wo ŋu wu ne Yehowa ka atam tsɔ ɖo kpe edzi. (Hebritɔwo 6:13) Etɔ dzɔ be wòdi tso amesiwo dia eƒe ŋudzedzekpɔkpɔ la si be woabɔbɔ wo ɖokui ɖe ye te (“klowo katã atɔ anyi”) eye woatsɔ wo ɖokui ake (“aɖewo katã aka atam”). Woakpɔ Israel-vi siwo ayi edzi asubɔ Yehowa la ta. Woate ŋu aƒo adegbe le nusi Yehowa wɔ na wo ŋu.—Korintotɔwo II, 10:17.

26. Aleke “ameha gã” si tso dukɔwo katã me le wɔwɔm ɖe Yehowa ƒe amekpekpe be woava ye gbɔ la dzii?

²⁶ Gake menye aboyome siwo nɔ Babilon koe Mawu kpe be woava ye gbɔ o. (Dɔwɔwɔwo 14:14, 15; 15:19; Timoteo I, 2:3, 4) Amekpekpe sia gali, eye “ameha gã, si . . . tso dukɔ sia dukɔ” me la wɔ ɖe edzi hegblɔ be: “Xɔname nanye mía Mawu . . . kple alẽvi [Yesu] tɔ.” (Nyaɖeɖefia 7:9, 10; 15:4) Ƒe sia ƒe ame akpe alafa geɖe vaa Mawu gbɔ va kpena ɖe ameha gã la ŋu, eye wolɔ̃ ɖe eƒe dziɖulanyenye dzi heɖea gbeƒãe le gaglãgbe be yewotsɔ yewo ɖokui nɛ. Tsɔ kpe ɖe eŋu la, wodoa alɔ gbɔgbɔ me Israel, si nye “Abraham ƒe ƒome” la. (Galatiatɔwo 3:29) Woɖea woƒe lɔlɔ̃ na Yehowa ƒe dziɖuɖu dzɔdzɔe la fiana to gbeƒãɖeɖee me be: “Míaƒe dzɔdzɔenyenye kple ŋusẽ le Yehowa gbɔ.”a Le lɛta si Paulo ŋlɔ na Romatɔwo me la, eyɔ nya tso Yesaya 45:23 le Septuagint la me tsɔ fia be amesiame si le agbe ava lɔ̃ ɖe Mawu ƒe dziɖulanyenye dzi mlɔeba ahakafu eƒe ŋkɔ ɖaa.—Romatɔwo 14:11; Filipitɔwo 2:9-11; Nyaɖeɖefia 21:22-27.

27. Nukata Kristotɔ siwo li egbea ate ŋu aka ɖe Yehowa ƒe ŋugbedodowo dzi bliboe?

²⁷ Nukata ameha gã la me tɔwo ate ŋu aka ɖe edzi be woakpɔ ɖeɖe ne wova Mawu gbɔ? Elabena kakaɖedzi le Yehowa ƒe ŋugbedodowo ŋu, abe alesi nyagblɔɖinya siwo le Yesaya ta 45 lia ɖee fia wòdze ƒã ene. Abe alesi ŋusẽ kple nunya le Yehowa si wòtsɔ wɔ dziƒo kple anyigba ene la, nenema ke ŋusẽ kple nunya le esi be wòana eƒe nyagblɔɖiwo nava emee. Eye abe alesi wòna nyagblɔɖi si ku ɖe Kores ŋu va eme ene la, nenema ke wòana Biblia me nyagblɔɖi ɖesiaɖe si meva eme haɖe o nava emee. Eyata Yehowa subɔlawo ate ŋu aka ɖe edzi be eteƒe madidi o Yehowa agaɖee fia be yenye “Mawu dzɔdzɔe kple Ðela.”

[Etenuŋɔŋlɔwo]

[Nɔnɔmetata siwo le axa 80, 81]

Yehowa, amesi wɔ kekeli kple viviti, ate ŋu awɔ ŋutifafa agahe dzɔgbevɔ̃e hã vɛ

[Nɔnɔmetata si le axa 83]

Yehowa ana yayra nadza tso ‘dziƒo’ eye “anyigba” nahe xɔname vɛ

[Nɔnɔmetata si le axa 84]

Ðe wòle be anyisonu gaglɛ siwo wotsɔ ƒu gbe nahe nya le wo wɔla ƒe nunya ŋua?

[Nɔnɔmetata si le axa 89]

Yehowa mewɔ anyigba be wòatsi ƒuƒlu o