Ta Wuiɖekɛlia

“Migaɖo Ŋu Ðe Amegãwo Ŋu O”

Yesaya 50:1-11

1, 2. (a) Aɖaŋuɖoɖo si tso gbɔgbɔ me ka dzie Yudatɔwo mewɔ ɖo o, eye nukae do tso eme? (b) Nukata Yehowa bia be: ‘Afika asigbegbalẽa le?’

“MIGAÐO ŋu ɖe amegãwo, amegbetɔvi, siwo mate ŋu axɔ na ame o la ŋu o. . . . Woayra amesi Yakob ƒe Mawu la nye xɔname na, amesi ƒe mɔkpɔkpɔ le Yehowa, eƒe Mawu la dzi; eya, amesi wɔ dzi kple anyi.” (Psalmo 146:3-6) Aleke wòanyoe nye si ne ɖe Yudatɔ siwo nɔ anyi le Yesaya ƒe ŋkekea me awɔ ɖe hakpala la ƒe aɖaŋuɖoɖoa dzi! Aleke wòanyoe nye si ne ɖe woagbe ŋuɖoɖo ɖe Egipte loo alo trɔ̃subɔlawo ƒe dukɔ bubu aɖe ŋu ahaɖo ŋu ɖe “Yakob ƒe Mawu” la ŋu! Esia ana Yehowa nawɔ nu atsɔ akpɔ Yuda tae, ne eƒe futɔwo tso ɖe eŋu. Gake Yuda gbe kpekpeɖeŋu didi le Yehowa gbɔ. Esia ana Yehowa naɖe mɔ woatsrɔ̃ Yerusalem eye woakplɔ Yudatɔwo ayi aboyo me le Babilon.

² Yuda mate ŋu aɖe vodada na ame aɖeke o elabena eya ŋutɔ gbɔe wòtso. Womate ŋu agblɔe wòasɔ be esi Yehowa gblẽ yewo ɖi alo gbe nubabla si wòwɔ kple dukɔa dzi wɔwɔ tae wotsrɔ̃ yewo o. Wɔla la medana le eƒe ŋugbedodowo dzi o. (Yeremya 31:32; Daniel 9:27; Nyaɖeɖefia 15:4) Yehowa bia nya Yudatɔwo tsɔ te gbe ɖe nya sia dzii be: “Afika mia dada ƒe asigbegbalẽ, si metsɔ gbee la le?” (Yesaya 50:1a) Le Mose ƒe Sea te la, ele be ŋutsu si gbe srɔ̃a nana gbegbegbalẽe. Esia ana mɔ nyɔnua be wòaɖe ŋutsu bubu faa. (Mose V, 24:1, 2) Le kpɔɖeŋumɔ nu la, Yehowa na gbegbegbalẽ sia tɔgbe Yuda nɔvi si nye Israel-fiaɖuƒea, gake mena ɖeke Yuda ya o.a Ekpɔtɔ nye ‘srɔ̃a.’ (Yeremya 3:8, 14) Edze ƒã be Yuda mekpɔ mɔ ade ha kple trɔ̃subɔdukɔwo o. Ƒomedodo akpɔtɔ anɔ wo kple Yehowa dome “vaseɖe esime amesi tɔ wònye [Mesia la] nava.”—Mose I, 49:10.

 3. Susu ka tae Yehowa tsɔ eƒe amewo “dzra”?

³ Yehowa gabia Yuda be: “Ameka nye nye fetɔ, si metsɔ mi dzra na?” (Yesaya 50:1b) Womakplɔ Yudatɔwo ayi aboyo me le Babilon be woatsɔ wo axe fe si Yehowa nyi o. Yehowa mele abe Israel-vi dahe si wòle be wòadzra viawo na fetɔ atsɔ axe fee ene o. (Mose II, 21:7) Ke boŋ Yehowa tɔ asi nusi tututu tae eƒe amewo azu kluviwo la dzi be: “Kpɔ ɖa, mia vodadawo ta wotsɔ mi dzra, eye le mia dzidadawo ta wogbe mia dada ɖo.” (Yesaya 50:1d) Yudatɔwoe gblẽ Yehowa ɖi; eya megblẽ wo ɖi o.

4, 5. Aleke Yehowa ɖe eƒe lɔlɔ̃ fia eƒe amewoe, gake aleke Yuda wɔ nui?

⁴ Nya si Yehowa gabia te gbe ɖe eƒe lɔlɔ̃ na eƒe amewo dzi wòdze ƒã be: “Nukaŋuti meva, eye ame aɖeke meli o, meyɔ ame, eye ame aɖeke metɔ o?” (Yesaya 50:2a) Yehowa to esubɔla nyagblɔɖilawo dzi va eƒe amewo ƒe aƒeme, le kpɔɖeŋunyagbɔgblɔ nu, be yeaɖe kuku na wo woatso dzi blibo me atrɔ ava ye gbɔ. Gake womede nu eme nɛ o. Yudatɔwo di boŋ be yewoadi kpekpeɖeŋu tso amegbetɔ si nye anyigbadzime gbɔ, eye wodia kpekpeɖeŋu tso Egipte ɣeaɖewoɣi gɔ̃ hã.—Yesaya 30:2; 31:1-3; Yeremya 37:5-7.

⁵ Ðe Egipte nye xɔnametɔ si ŋu woate ŋu aɖo ŋu ɖo wu Yehowa? Edze ƒã be Yudatɔ mawɔnuteƒe mawo ŋlɔ nusiwo dzɔ do ŋgɔ na woƒe dukɔa ɖoɖo anyi le ƒe alafa siwo do ŋgɔ me la be. Yehowa bia wo be: “Ðe nye alɔ le kpuie, be wòagbe xɔxɔ na amea? eye ɖe ŋusẽ mele ŋunye, be maɖe ame oa? Kpɔ ɖa, matsɔ nye nyanyrã ana atsiaƒu namie, eye mana tɔsisiwo nazu tagba, wo me lãwo aƒaƒã, elabena tsi megale wo ŋu o, eye tsikɔ awu wo woaku. Mata ahovɔ na dziƒo, eye matsyɔ akpanya nɛ.”—Yesaya 50:2b, 3.

6, 7. Aleke Yehowa ɖe eƒe ameɖeŋusẽ fia le Egiptetɔwo ƒe ŋɔdzidonamea me?

⁶ Le ƒe 1513 D.M.Ŋ. me la, Egipte ye nye Mawu ƒe amewo teɖeanyila—ke menye ɖela si wonɔ mɔ kpɔm na o. Israel-viwo nye kluviwo le trɔ̃subɔdukɔ ma me. Gake Yehowa ɖe wo, eye ɖeɖekpɔkpɔ dodzidzɔname kae nye si wònye! Gbã, ehe Fuwɔame Ewo va anyigba ma dzi. Le fuwɔame ewolia si gblẽ nu vevie megbe la, Egipte-fia Farao ƒoe ɖe Israel-viwo nu be woadzo le dukɔa me. (Mose II, 7:14–12:31) Gake le woƒe dzodzo megbe teti la, Farao ƒe dzi va trɔ. Eƒo eƒe asrafowo nu ƒu hedze mɔ be yeaɖazi Israel-viwo dzi woagbugbɔ ava Egipte. (Mose II, 14:5-9) Israel-viwo xaxa ɖe Egipte-srafo gbogbo siwo gbɔna tso megbe kple Ƒudzĩa si nɔ wo ŋgɔ la dome! Gake Yehowa nɔ kpli wo hewɔ aʋa na wo.

⁷ Yehowa tɔ te Egiptetɔwo ɖe wo nɔƒe esi wòna alilikpo dodo va nɔ wo kple Israel-viwo dome. Alilikpo dodoa ƒe akpa si le Egiptetɔwo gbɔ la do viviti; gake kekeli nɔ Israel-viwo ya ƒe akpa dzi. (Mose II, 14:20) Azɔ esi woɖo asi Egipte-ʋakɔwo dzi ɖe teƒe ɖeka la, Yehowa “na ɣedzeƒeya nyama ƒu la zã blibo la katã, ale bena ƒu la mie keŋ.” (Mose II, 14:21) Esi tsia ma ɖe akpa eve ta la, dukɔ bliboa—ŋutsuwo, nyɔnuwo, kple ɖeviwo—te ŋu tso Ƒudzĩa dedie. Esi Yehowa ƒe amewo gogo ƒuta si le akpa kemɛ la, eɖe alilikpo dodoa ɖa. Egiptetɔ siwo nɔ wo yome tim kple ŋkubiã la tsɔ dzodzodzoetsitsi ge ɖe ƒua me nɔ ƒugɔmenyigba la dzi zɔm. Esi Yehowa ƒe amewo do le ƒua me vɔ la, ena tsia gakpe, eye Farao kple eƒe aʋakɔwo no tsi ku. Aleae Yehowa wɔ aʋa na eƒe dukɔ enye si. Aleke gbegbe nya sia dea dzi ƒo na Kristotɔ siwo li egbea enye si!—Mose II, 14:23-28.

 8. Nuxlɔ̃amenya kawoe Yudatɔwo gbe si ta woava yi aboyo me ɖo mlɔeba?

⁸ Le Yesaya ƒe ɣeyiɣia me la, ƒe alafa adre va yi tso esime Mawu ɖu aʋa ma dzi. Fifia Yuda nye dukɔ le eɖokui si. Ewɔa ɖoɖo kple dutadukɔ bubuwo, siwo ƒe ɖewoe nye Asiria kple Egipte, ɣeaɖewoɣi. Gake womate ŋu aɖo ŋu ɖe trɔ̃subɔdukɔ siawo ƒe amegãwo ŋu o. Woa ŋutɔwo ƒe nyonyo anɔ vevie na wo ɣesiaɣi wu nubabla ɖesiaɖe si woawɔ kple Yuda. Nyagblɔɖilawo ƒo nu le Yehowa ƒe ŋkɔ me xlɔ̃ nu dukɔa be womegaɖo ŋu ɖe amegbetɔ siawo ŋu o, gake wogbe toɖoɖo nyagblɔɖilaawo ƒe nyawo. Mlɔeba woaɖe aboyo Yudatɔwo ayi Babilon be woazu kluviwo asubɔ wo ƒe 70. (Yeremya 25:11) Gake Yehowa maŋlɔ eƒe amewo be o, eye magbe nu le wo gbɔ keŋkeŋ o. Aɖo ŋku wo dzi le ɣeyiɣi ɖoɖia dzi eye wòaʋu mɔ ɖi na wo be woatrɔ ayi wo denyigba dzi be woaɖagbugbɔ tadedeagu dzadzɛ aɖo anyi. Nukatae? Be woadzra ɖo na Silo, amesi dukɔwo katã aɖo toe la, ƒe vava!

Silo ƒe Vava

 9. Amekae nye Silo, eye nufiala ka tɔgbee wònye?

⁹ Ƒe alafa geɖe va yi. “Azãgbe” la ɖo, eye amesi woyɔ be Silo, Aƒetɔ Yesu Kristo, va anyigba dzi. (Galatiatɔwo 4:4; Hebritɔwo 1:1, 2) Alesi Yehowa tia amesi nɔa eŋu kplikplikpli wu be wòanye yeƒe Nyanuɖela na Yudatɔwo la fia alesi gbegbe Yehowa lɔ̃ eƒe amewoe. Nyanuɖela ka tɔgbee Yesu va zu? Ede ŋgɔ wu ɖesiaɖe! Menye nyanuɖela dzro ko Yesu nye o, ke enye nufiala hã—Nufiala Bibi. Esia mewɔ nuku o, elabena Nufiala wɔnuku aɖee le esi—eyae nye Yehowa Mawu ŋutɔ. (Yohanes 5:30; 6:45; 7:15, 16, 46; 8:26) Nya si Yesu to Yesaya dzi gblɔ le nyagblɔɖi me la ɖo kpe esia dzi be: “Aƒetɔ Yehowa tsɔ nusrɔ̃viwo ƒe aɖe nam, ne manya alesi matsɔ nuƒoƒo akpe ɖe amesiwo ŋu ɖeɖi te la ŋui. Enyɔam ŋdi sia ŋdi, eʋua to nam, ne mase nu abe nusrɔ̃vi ene.”—Yesaya 50:4.b

10. Aleke Yesu ɖe lɔlɔ̃ si le Yehowa si na Eƒe amewo la fiae, eye aleke amewo xɔ Yesu ƒe nyawoe?

¹⁰ Hafi Yesu nava anyigba dzi la, ewɔ dɔ kple Fofoa le dziƒo. Woƒo nu tso lɔlɔ̃ ƒe ƒomedodo si le Fofo kple Via dome ŋu le hakpanya me le Lododowo 8:30 be: “Menye dɔnunɔla le [Yehowa gbɔ], . . . eye mewɔ dɔ abe fefe ene le eŋku me ɣeawokatãɣi.” Yesu kpɔ dzidzɔ geɖe le toɖoɖo Fofoa me. Lɔlɔ̃ si le Fofoa si na “amegbetɔviwo” la le eya hã si. (Lododowo 8:31) Esi Yesu va anyigba dzi la, eƒo nu tsɔ kpe ɖe “amesiwo ŋu ɖeɖi te la ŋui.” Exlẽ nya fakɔname aɖe tso Yesaya ƒe nyagblɔɖia me tsɔ dze eƒe subɔsubɔdɔa gɔmee be: “Aƒetɔ ƒe gbɔgbɔ le dzinye, le esi ta wosi ami nam ɖo, bena magblɔ Nyanyui afia ame dahewo, . . . bena mayɔ dɔ amesiwo ƒe dzi gbã.” (Luka 4:18; Yesaya 61:1) Nyanyui na ame dahewo! Akɔfafa na amesiwo ŋu ɖeɖi te! Aleke gbegbe wòle be nya sia nana dukɔa nakpɔ dzidzɔ enye si! Ame aɖewo kpɔ dzidzɔ ya—gake menye amesiamee o. Mlɔeba la, ame geɖe mexɔ kpeɖodzi siwo li be Yesu nye amesi Yehowa fia nui la dzi se o.

11. Amekawoe va nɔa kɔkuti te kple Yesu, eye nukae wokpɔna?

¹¹ Gake ame geɖe di be yewoagase nya bubuwo akpee. Wotsɔ dzidzɔ wɔ ɖe Yesu ƒe amekpekpe dodzidzɔnamea dzi be: “Mite va gbɔnye, mi amesiwo katã le agbagba dzem, eye agba le mia wum la, eye nye la, mana dzudzɔ mi. Mitsɔ nye kɔkuti la ɖo mia ɖokui dzi, eye miasrɔ̃ nu tso gbɔnye, elabena nye dɔme fa, eye mebɔbɔ ɖokuinye ɖe anyi le dzi me, eye miakpɔ dzudzɔ na miaƒe luʋɔwo.” (Mateo 11:28, 29) Amesiwo te ɖe Yesu ŋu la dometɔ aɖewoe nye amesiwo va zu eƒe apostolowo. Wonya be kɔkuti te nɔnɔ kple Yesu bia be yewoawɔ dɔ sesẽ. Dɔ sia ƒe akpa aɖee nye gbeƒãɖeɖe Fiaɖuƒe ŋuti nyanyuia wòaɖo anyigba ƒe seƒewo. (Mateo 24:14) Esi apostoloawo kple nusrɔ̃la bubuwo nɔ dɔ sia wɔm la, wokpɔe be ehea dzidzeme vɛ na yewoƒe luʋɔwo nyateƒe. Kristotɔ nuteƒewɔla siwo li egbea le dɔ sia ke wɔm, eye ewɔwɔ na wokpɔa dzidzɔ ma tɔgbe.

Mesẽ To O

12. Mɔ kawo nue Yesu ɖee fia le be yeɖoa to ye Fofo si le dziƒo?

¹² Yesu meŋlɔ nusita wòva anyigba dzi ɖo be gbeɖe o—eyae nye be wòava wɔ Mawu ƒe lɔlɔ̃nu. Wogblɔ susu si wòtsɔ kpɔa nuwoe ɖi be: “Aƒetɔ Yehowa ʋu to nam, nyemesẽ to o, eye nyemede megbe o.” (Yesaya 50:5) Yesu ɖoa to Mawu ɣesiaɣi. Ete ŋu gblɔe le nyateƒe me gɔ̃ hã be: “Vi la mate ŋu awɔ naneke le eya ŋutɔ ɖokui si o, ne menye Fofoae le ewɔm wòkpɔ o.” (Yohanes 5:19) Hafi Yesu nava zu amegbetɔ la, anye be ewɔ dɔ kpe ɖe Fofoa ŋu ƒe miliɔn, alo biliɔn, geɖe gɔ̃ hã. Esi wòva anyigba dzi la, eyi edzi wɔ ɖe Yehowa ƒe mɔfiamewo dzi. Aleke gbegbe wòle vevie wue nye si be mí Kristo yomedzela madeblibowo míaɖɔ ŋu ɖo awɔ nu abe alesi Yehowa fia ene!

13. Nukae dze ŋgɔ Yesu, gake aleke wòɖee fiae be dzi le ye ƒo?

¹³ Amesiwo gbe Yehowa ƒe Tenuvia dometɔ aɖewo ti eyome, eye wogblɔ esia hã ɖi: “Mesia nye mẽdome ɖi na ameƒolawo, eye meɖo nye tome anyi na amesiwo nyɔa ɖà; nyemetsyɔ nu ŋku me le vlododo kple taɖeɖe ŋuti o.” (Yesaya 50:6) Nyagblɔɖia ɖee fia be Mesia la ase veve eye amesiwo tsi tre ɖe eŋu ado vloe. Yesu nya esia. Eye enya alesi gbegbe woati eyomee. Ke hã esi eƒe anyigbadzinɔɣi gogo eƒe nuwuwu la, vɔvɔ̃ aɖeke medze le eŋu o. Etsɔ tameɖoɖo kplikpaa dze mɔ yi Yerusalem, afisi eƒe amegbetɔ ƒe agbe nu atso le. Esi Yesu kple eƒe nusrɔ̃lawo nɔ mɔ dzi yina la, egblɔ na wo be: “Kpɔ ɖa, míeyina Yerusalem, eye woade Amegbetɔvi la asi na nunɔlagãwo kple agbalẽfialawo, eye woatso kufia nɛ, eye woatsɔe ade asi na trɔ̃subɔlawo; eye woaɖu fewu le eŋuti, eye woaɖe ta ɖe eŋu, eye woaƒoe kple atam, eye woawui, eye ŋkeke etɔ̃agbe la atsi tre.” (Marko 10:33, 34) Amesiwo wòle be woanya nu geɖe tso eyama ŋue nɔ megbe na ŋlɔmiwɔwɔ vɔ̃ɖi siawo katã—woawoe nye nunɔlagãwo kple agbalẽfialawo.

14, 15. Aleke nya siwo Yesaya gblɔ be woaƒo Yesu ahado vloe la va emee?

¹⁴ Le Nisan 14, 33 M.Ŋ. ƒe zã me la, Yesu kple eyomedzela aɖewo nɔ Getsemane-bɔa me. Enɔ gbe dom ɖa. Enumake nuvlowɔha aɖe va do eye wolée. Gake mevɔ̃ o. Enya be Yehowa li kpli ye. Yesu na kakaɖedzi eƒe apostolo siwo vɔvɔ̃ ɖo la be ne yelɔ̃ la, anye ne yeate ŋu aɖe kuku na ye Fofo wòaɖo mawudɔlawo ƒe aʋakɔ wuieve kple edzivɔ ɖa woava xɔ na ye hafi, gake egblɔ kpee be: “Ke aleke awɔ ne woawu ŋɔŋlɔawo nu mahã?”—Mateo 26:36, 47, 53, 54.

¹⁵ Nya sia nya si wogblɔ ɖi le Mesia la ƒe dodokpɔwo kple ku ŋu va eme. Esi Sanhedrin la drɔ̃ ʋɔnu Yesu ɖewoɖewoe vɔ la, Pontio Pilato bia gbee eye wòna woƒoe kple atam. Roma-srafowo ‘ƒo tame nɛ kple ayeti, eye woɖe ta ɖe eŋuti.’ Esia na Yesaya ƒe nyaawo va eme. (Marko 14:65; 15:19; Mateo 26:67, 68) Togbɔ be Biblia megblɔ be wonyɔ Yesu ƒe ge ŋutɔŋutɔ—si nye vlodoamenu si gbɔ eme—o hã la, ɖikeke mele eme o be nusia dzɔ, abe alesi Yesaya gblɔe ɖi ene.c—Nexemya 13:25.

16. Nɔnɔme kae Yesu ɖe fia esi wòɖo xaxa gã aɖe me, eye nukata ŋu mekpee o?

¹⁶ Esime Yesu tsi tre ɖe Pilato ŋkume la, mebia be woakpɔ yeƒe agbe ta o ke boŋ elé eɖokui kpoo, le esi wònya be ele be yeaku ale be Ŋɔŋlɔawo nava eme ta. Esime Roma-mɔmefia gblɔ be ŋusẽ le ye si be yeana woawu Yesu loo alo aɖe asi le eŋu la, Yesu ɖo eŋu nɛ vɔvɔ̃manɔmee be: “Ŋusẽ aɖeke manɔ asiwò ɖe ŋunye o, ne menye ɖe wona wò tso dziƒo o.” (Yohanes 19:11) Pilato ƒe asrafowo sẽ ŋuta le Yesu ŋu, gake womete ŋu na ŋu kpee o. Nukata wòle be ŋu nakpee? Menye ɖe wòda vo wotsɔ tohehe si sɔ nɔ enam o. Ke ɖe wonɔ eyome tim ɖe dzɔdzɔenyenye ta boŋ. Yesaya ƒe nyawo va eme le go sia me hã be: “Aƒetɔ Yehowa kpe ɖe ŋunye, eyata ŋukpe malém o; eyata nye mo sẽ abe ahliha ene, eye menyae be, ŋu mele kpe ye ge o.”—Yesaya 50:7.

17. Mɔ kawo nue Yehowa nɔ kple Yesu le eƒe subɔsubɔdɔa wɔɣi katã?

¹⁷ Yesu ka ɖe Yehowa dzi bliboe eye esiae na dzi nɔ eƒo. Alesi wòwɔ nui ɖee fia be elɔ̃ ɖe Yesaya ƒe nya siawo dzi bliboe be: “Amesi le afia tso ge nam la, tsɔ gbɔnye; ameka be, yeahe nya kplim? Mina míava kpe ta! Amesi si nya le ɖe ŋunye la, nete ɖe ŋunye! Kpɔ ɖa, Aƒetɔ Yehowa axɔ nam; amekae abu fɔm ma? Kpɔ ɖa, wo katã anyunyɔ abe avɔ ene, eye agbagblaʋui aɖu wo.” (Yesaya 50:8, 9) Le Yesu ƒe nyɔnyrɔxɔɣi la, Yehowa ɖee fia be enye Mawu ƒe gbɔgbɔmevi dzɔdzɔe. Le nyateƒe me la, wose Mawu ƒe gbe gbemagbe, si gblɔ be: “Amesia enye vinye, si gbɔ nyemelɔ̃a nu lena o la, si dzea ŋunye!” (Mateo 3:17) Esi Yesu dze klo nɔ gbe dom ɖa le Getsemane-bɔa me le eƒe anyigbadzigbenɔɣi ƒe nuwuwu lɔƒo la, ‘mawudɔla aɖe tso dziƒo ɖe eɖokui fiae hedo ŋusẽe.’ (Luka 22:41-43) Eyata Yesu nya be ye Fofo kpɔ ŋudzedze ɖe alesi yenɔ agbee ŋu. Mawu ƒe Vi deblibo sia mewɔ nuvɔ̃ aɖeke o. (Petro I, 2:22) Eƒe futɔwo tso enu alakpatɔe be enye Sabat-se dzi dala, ahatsunola, kple amesi me gbɔgbɔ vɔ̃ le, gake woƒe aʋatsonyawo meklo bubu le Yesu ŋu o. Esi Mawu li kplii ta la, amekae ate ŋu atsi tre ɖe eŋu?—Luka 7:34; Yohanes 5:18; 7:20; Romatɔwo 8:31; Hebritɔwo 12:3.

18, 19. Nukawo mee Kristotɔ amesiaminawo to si ɖi Yesu tɔ?

¹⁸ Yesu xlɔ̃ nu eƒe nusrɔ̃lawo be: “Ne woti yonyeme la, woati miawo hã yome.” (Yohanes 15:20) Nusiwo va dzɔ emegbe kpuie ɖee fia be eƒe nya siawo le eme. Le ƒe 33 M.Ŋ. ƒe Pentekoste-ŋkekea dzi la, gbɔgbɔ kɔkɔe va Yesu ƒe nusrɔ̃la nuteƒewɔlawo dzi, eye woɖo Kristo-hamea anyi. Eteƒe medidi kura o subɔsubɔhaŋgɔnɔlawo te kpɔ be yewoatɔ te ŋutsu kple nyɔnu nuteƒewɔla siwo va le ha dem kple Yesu fifia hezu ‘Abraham ƒe dzidzimevia’ ƒe akpa aɖe kple gbɔgbɔmevi siwo Mawu xɔ la ƒe gbeƒãɖeɖedɔa. (Galatiatɔwo 3:26, 29; 4:5, 6) Tso ƒe alafa gbãtɔ me vaseɖe fifia la, eva hiã be Kristotɔ amesiaminawo nadze ŋgɔ aʋatsonyawo gbɔgblɔ ɖe ame ŋu kple yometiti sesẽ tso Yesu ƒe futɔwo gbɔ, togbɔ be wonɔa te sesĩe le dzɔdzɔenyenye me hã.

¹⁹ Ke hã woɖoa ŋku Yesu ƒe dzideƒonamenyawo dzi be: “Woayra mi, ne woadzu mi, eye woati mia yome, eye woaka aʋatso agblɔ nya vɔ̃ bubu ƒomeviwo katã ɖe mia ŋuti le tanye. Dzi nadzɔ mi, eye mitso aseye; elabena miaƒe fetu sɔ gbɔ le dziƒo.” (Mateo 5:11, 12) Eyata Kristotɔ amesiaminawo kpɔa dzidzɔ, le amedzidzedze sesẽtɔ kekeake gɔ̃ hã me. Nya ka ke tsitretsiɖeŋulawo ɖagblɔ o, wonya be Mawu bua yewo ame dzɔdzɔewoe. Wonye “mokaka manɔŋutɔwo kpakple fɔmabumabutɔwo” le eƒe ŋkume.—Kolosetɔwo 1:22.

20. (a) Amekawoe naa kpekpeɖeŋu Kristotɔ amesiaminawo, eye nuka mee woto? (b) Aleke nusrɔ̃viwo ƒe aɖe va sua Kristotɔ amesiaminawo kple ‘alẽ bubuawo’ sii?

²⁰ Le egbeɣeyiɣiwo me la, ‘alẽ bubuawo’ ƒe “ameha gã” aɖe naa kpekpeɖeŋu Kristotɔ amesiaminawo. Amesiawo hã nɔa te le dzɔdzɔenyenye me. Esia na woawo hã kpe fu abe wo nɔvi amesiaminawo ke ene, eye “wonyã woƒe awuwo, eye wowɔ wo ɣie le alẽvi la ƒe ʋu la me.” Yehowa bua wo ame dzɔdzɔewoe eye mɔkpɔkpɔ le wo si be yewoatsi agbe le “xaxa gã” la me. (Nyaɖeɖefia 7:9, 14, 15; Yohanes 10:16; Yakobo 2:23) Ne edze abe ɖe tsitretsiɖeŋulawo sesẽ fifia gɔ̃ hã la, Yesaya ƒe nyagblɔɖia gblɔ be le Mawu ƒe ɣeyiɣi ɖoɖi dzi la, tsitretsiɖeŋula mawo anɔ abe avɔ si gbagblaʋui ɖu si wòle be woatsɔ aƒu gbe ene. Hafi ɣemaɣi naɖo la, Kristotɔ amesiaminawo kple ‘alẽ bubuawo’ kpɔa ŋusẽ tso gbedodoɖa edziedzi, Mawu ƒe Nya la sɔsrɔ̃, kple tadedeagu ƒe kpekpewo dede me. Yehowa toa esia dzi fiaa nu wo eye wosrɔ̃a alesi woatsɔ nusrɔ̃viwo ƒe aɖe aƒo nui.

Ðo Ŋu Ðe Yehowa ƒe Ŋkɔ la Ŋu

21. (a) Amekawoe nye amesiwo zɔna le kekeli me, eye etsɔme kae li na wo? (b) Nukae dzɔna ɖe amesiwo zɔna le viviti me dzi?

²¹ Azɔ de dzesi vovototo ɖedzesi aɖe le afisia: “Mia dometɔ, si vɔ̃a Yehowa la, neɖo to eƒe dɔla ƒe gbe; amesi le viviti me zɔm, eye kekeli aɖeke meklẽna nɛ o la, neɖo dzi ɖe Yehowa ƒe ŋkɔ ŋu, eye wòaziɔ ɖe eƒe Mawu ŋu.” (Yesaya 50:10) Amesiwo ɖoa to Mawu ƒe Dɔla, Yesu Kristo, ƒe gbe la zɔna le kekeli me. (Yohanes 3:21) Menye ɖeko wozãa Mawu ƒe ŋkɔ, Yehowa, o ke woɖoa ŋu ɖe amesi tɔ ŋkɔ ma ŋu hã. Ne wozɔ le viviti me tsã hã la, womegavɔ̃a amegbetɔwo azɔ o. Mawu ŋue woziɔ ɖo. Gake amesiwo yia edzi zɔna le viviti me ya vɔ̃na na amegbetɔ. Alea wòdzɔe le Pontio Pilato gome. Togbɔ be enya be Yesu meɖi fɔ le aʋatsonya siwo wotsɔ ɖe eŋu me o hã la, vɔvɔ̃ wɔe be Roma-megã la mete ŋu ɖe asi le Yesu ŋu o. Roma-srafowo wu Mawu ƒe Vi la, gake Yehowa fɔe ɖe tsitre hetsɔ ŋutikɔkɔe kple bubu nɛ. Ke Pilato ya ɖe? Yudatɔ ŋutinyaŋlɔla Flavius Josephus gblɔ be le Yesu ƒe ku megbe ƒe ene ko la, ame bubu va zu Roma-mɔmefia ɖe Pilato teƒe eye wobia tso Pilato si be wòatrɔ ayi Roma aɖaɖo nya siwo wotsɔ ɖe eŋu be ewɔ nu gbegblẽ gãwo la ŋu. Nukae dzɔ ɖe Yudatɔ siwo na wowu Yesu la hã dzi? Ƒe blaene kloe megbe la, Roma-ʋakɔwo va tsrɔ̃ Yerusalem eye wona wowu dua me tɔ aɖewo eye wokplɔ bubuwo dzoe wova zu kluviwo. Etsɔme nyui aɖeke meli na amesiwo lɔ̃a viviti la o!—Yohanes 3:19.

22. Nukata wònye bometsitsi gã aɖe be woakpɔ amegbetɔ sinu be wòaxɔ na ame?

²² Amegbetɔ sinu kpɔkpɔ be woaxɔ na ame nye bometsitsi gã aɖe. Yesaya ƒe nyagblɔɖia gblɔ nusitae wòle nenema be: “Kpɔ ɖa, mi amesiwo katã tɔa dzo nu, eye mietsɔa dzoƒaɖe bla akpae la, mige ɖe miaƒe dzobibi la kple dzoti, si miekpe la me. Asinye me esia tso na mi, eye miamlɔ vevesese me.” (Yesaya 50:11) Kplɔla siwo nye amegbetɔwo nɔa anyi ɣeyiɣi kpui aɖe ko. Amesi ƒe nu wɔa dɔ ɖe ame dzi ate ŋu akpɔ ŋusẽ ɖe amewo ƒe susu dzi ɣeyiɣi kpui aɖe. Ke hã seɖoƒe li na nusi amegbetɔ si ɖia anukware ŋutɔ gɔ̃ hã ate ŋu awɔ. Le esi teƒe be wòana dzo gã aɖe nabi abe alesi edzidelawo anɔ mɔ kpɔmee ene la, enyea “dzoƒaɖe” sue aɖewo siwo klẽna hexɔna vie ko eye eteƒe medidina hafi wotsina o. Gake amesiwo ɖoa ŋu ɖe Silo si nye Mawu ƒe Mesia si ŋugbe wòdo ŋu ya ƒe mɔkpɔkpɔ mado kpo emevava o.

[Etenuŋɔŋlɔwo]

[Nɔnɔmetata si le axa 155]

Yudatɔwo kpɔ dziɖula amegbetɔwo sinu tsɔ wu be woaɖo ŋu ɖe Yehowa ŋu

[Nɔnɔmetata si le axa 156, 157]

Yehowa kpɔ eƒe amewo ta le Ƒudzĩa gbɔ esi wòna alilikpo dodo va nɔ wo kple Egiptetɔwo dome