Ta Wuietɔ̃lia

“Mitso Aseye Yoo”!

Yesaya 52:1-12

 1. Nukata nyagblɔɖinya siwo le Yesaya ta 52 lia me doa dzidzɔ na ame, eye emevava eve kawoe li?

ABLƆÐE! Ðe mɔkpɔkpɔ aɖe agate ŋu ado dzidzɔ na aboyomewo wu esiaa? Esi ablɔɖekpɔkpɔ kple gbugbɔɖoanyi nye Yesaya ƒe agbalẽa me nya vevi aɖe ta la, mewɔ nuku o be le Psalmowo megbe la, Biblia-gbalẽ sia mee dzidzɔnyagbɔgblɔwo sɔ gbɔ ɖo wu bubu ɖesiaɖe. Yesaya ta 52 koŋue gblɔ susu siwo ta Mawu ƒe amewo akpɔ dzidzɔ ɖo. Nyagblɔɖinya siwo le eme la va eme ɖe Yerusalem dzi le ƒe 537 D.M.Ŋ. me. Eye wo me vava gãtɔ ku ɖe “dziƒo Yerusalem,” Yehowa ƒe dziƒohabɔbɔ si me gbɔgbɔmenuwɔwɔwo le, si woyɔna ɣeaɖewoɣi be vidada kple srɔ̃nyɔnu, la ŋu.—Galatiatɔwo 4:26; Nyaɖeɖefia 12:1.

‘Zion, Ta Wò Ŋusẽ!’

 2. Ɣekaɣie Zion nyɔ, eye aleke nya sia dzɔe?

² Yehowa to Yesaya dzi yɔ Eƒe du lɔlɔ̃ Zion be: “Nyɔ, Zion, nyɔ nata wò ŋusẽ! Yerusalem, wò du kɔkɔe la, ta wò atsyɔ̃vɔwo! Elabena bolotɔwo kple ame makɔmakɔwo magava mewò azɔ o. Ʋuʋu ke le ŋuwò, Yerusalem, tso nabɔbɔ nɔ anyi! Zion-nyɔnuvi, si woɖe aboyoe, ɖe ga le wò kɔ!” (Yesaya 52:1, 2) Esi Yerusalemtɔwo do dziku na Yehowa ta la, Yerusalem zu aƒedo ƒe 70 sɔŋ. (Fiawo II, 24:4; Kronika II, 36:15-21; Yeremya 25:8-11; Daniel 9:2) Ɣeyiɣia de azɔ be wòanyɔ tso eƒe dɔmawɔmawɔ ƒe ɣeyiɣi didi la me ahata ablɔɖe ƒe atsyɔ̃vɔwo. Yehowa ʋã Kores ƒe dzi wòna ablɔɖe “Zion-nyɔnuvi, si woɖe aboyoe” ale be amesiwo nye Yerusalemtɔwo tsã kple woƒe dzidzimeviwo nate ŋu adzo le Babilon, woatrɔ ayi Yerusalem, eye woagbugbɔ tadedeagu vavãtɔ aɖo anyi. Womaɖe mɔ na aʋamatsomatsotɔ kple ame makɔmakɔwo woayi Yerusalem o.—Ezra 1:1-4.

 3. Nukata woate ŋu ayɔ Kristotɔ amesiaminawo ƒe hamea be “Zion-vinyɔnu,” eye gɔmesese ka nue wona ablɔɖe wo le?

³ Yesaya ƒe nya siawo va eme ɖe Kristo-hamea hã dzi. Míate ŋu ayɔ Kristotɔ amesiaminawo ƒe hame la be enye egbeŋkekea me “Zion-nyɔnuvi,” elabena “dziƒo Yerusalem” ye nye wo dada.a Esi woɖe amesiaminawo tso trɔ̃subɔlawo kple xɔsegbelawo ƒe nufiafiawo me ta la, ele be woayi edzi ana tenɔnɔ dzadzɛ nanɔ wo si le Yehowa ŋkume, menye to aʋatsotso le ŋutilã me gome o, ke to dzimeʋatsotso me boŋ. (Yeremya 31:33; Romatɔwo 2:25-29) Esia ƒe akpa aɖee nye be woanɔ dzadzɛ le gbɔgbɔ me, susu me, kple le agbenɔnɔ me le Yehowa ŋkume.—Korintotɔwo I, 7:19; Efesotɔwo 2:3.

 4. Togbɔ be “dziƒo Yerusalem” megbe toɖoɖo Yehowa kpɔ o hã la, nukawo mee eteƒenɔla siwo le anyigba dzi to si ɖi blema Yerusalemtɔwo tɔ?

⁴ Enye nyateƒe be “dziƒo Yerusalem” la megbe toɖoɖo Yehowa kpɔ o. Gake le xexemeʋa gbãtɔ wɔɣi la, eteƒenɔla siwo le anyigba dzi—Kristotɔ amesiaminawo—da le Yehowa ƒe se dzi le manyamanya me le esi womese Kristotɔwo ƒe akpaɖekedzimademade ŋutɔŋutɔ gɔme nyuie o ta. Esi Mawu megakpɔ ŋudzedze ɖe wo ŋu o ta la, wova nɔ gbɔgbɔmeboyo me le “Babilon gã” si nye alakpasubɔsubɔ ƒe xexemefiaɖuƒea me. (Nyaɖeɖefia 17:5) Woƒe kluvimenɔnɔ ɖo eƒe sesẽaƒe le June 1918 me esime wode Gbetakpɔxɔ Habɔbɔa ƒe akametia me tɔ enyi gaxɔ me ɖe alakpanutsotso siwo me nugbeɖoɖeameŋu hã nɔ ta. Gbeƒãɖeɖe nyanyuia si ŋu wowɔ ɖoɖo ɖo tɔ te keŋkeŋ kloe ɣemaɣi. Gake le ƒe 1919 me la, yɔyɔ ʋãme aɖe ɖi be woanyɔ le gbɔgbɔ me. Kristotɔ amesiaminawo va nɔ wo ɖokui ɖem ɖa keŋkeŋ tso Babilon Gã la ƒe agbenɔnɔ kple gbɔgbɔ me makɔmakɔnyenye me. Wotso le aboyomenɔnɔ ƒe ke me, eye “du kɔkɔe” si me womeɖea mɔ ɖe gbɔgbɔmemakɔmakɔnyenye ŋu le o ƒe atsyɔ̃ va nɔ “dziƒo Yerusalem” ŋu.

 5. Nukata Yehowa tɔ dzɔ koŋ be wòagaxɔ eƒe amewo nanekemaxemaxe na amesiwo ɖe aboyo woe o?

⁵ Le ƒe 537 D.M.Ŋ. kple le ƒe 1919 M.Ŋ. me siaa la, Yehowa tɔ dzɔ koŋ be wòana ablɔɖe eƒe amewo. Yesaya ɖe eme be: “Elabena ale Yehowa gblɔ esi: Wotsɔ mi dzra yaka, eye menye ga tsɔ ge woala axɔ mi o.” (Yesaya 52:3) Blema Babilon loo alo Babilon Gã la mexe naneke esime wotsɔ Mawu ƒe dukɔ si wòbla nu kpli wɔ kluviwoe o. Esi womexe ga aɖeke ɖe wo ta o ta la, Yehowa tɔe Eƒe amewo ganye le se nu. Ðe wòle be wòaxe fe na ame aɖe hafia? Kura o. Yehowa te ŋu gbugbɔ esubɔlawo xɔ le nudzɔdzɔ evea siaa me nanekemaxemaxe na amesiwo ɖe aboyo woe.—Yesaya 45:13.

 6. Nukawoe Yehowa ƒe futɔwo mete ŋu srɔ̃ le ŋutinya me o?

⁶ Yehowa ƒe futɔwo mesrɔ̃ naneke tso ŋutinya me o. Míexlẽe be: “Ale Aƒetɔ Yehowa gblɔ esi: Tsã la nye dukɔ yi Egipte, be wòanɔ afima, eye Asur tee ɖe anyi yakatsyɔ.” (Yesaya 52:4) Egipte-fia Farao wɔ Israel-vi siwo va zu amedzro le eƒe anyigba dzi la kluviwoe. Gake Yehowa de Farao kple eƒe aʋakɔ la ƒu le Ƒudzĩa me. (Mose II, 1:11-14; 14:27, 28) Esime Asiria-fia Sanxerib do ŋɔdzi na Yerusalem la, Yehowa ƒe dɔla wu fia la ƒe asrafo 185,000. (Yesaya 37:33-37) Nenema ke blema Babilon loo alo Babilon Gã la mate ŋu asi le Mawu ƒe amewo teteɖeanyi me tsonuwo nu o.

“Nye Dukɔ Adze Si Nye Ŋkɔ”

 7. Dɔ kae aboyo si woɖe Yehowa ƒe amewo wɔ ɖe eƒe ŋkɔ dzi?

⁷ Aboyo si woɖe Yehowa ƒe amewo ka eyama ƒe ŋkɔ, abe alesi nyagblɔɖia ɖee fia ene be: “Yehowa be: Azɔ dɔ ka le ŋunye le afi, esi wokplɔ nye dukɔ dzoe yakatsyɔ? Yehowa be, wo dziɖulawo le aseye tsom, eye wole alɔme ɖem le nye ŋkɔ ŋu gbeawotsyogbe ɖaa. Eyata nye dukɔ adze si nye ŋkɔ gbemagbe be, nyee nye amesi le gbɔgblɔm be: Nyee nye si!” (Yesaya 52:5, 6) Aleke nɔnɔmea ka Yehowae? Egbɔ nya kae wòtsɔ be wowɔ Israel kluviwoe le Babilon? Ele be Yehowa natso ɖe dɔ ŋu elabena Babilon ɖe aboyo eƒe amewo hetso aseye ɖe wo dzi ɖuɖu ŋu. Adegbeƒoƒo alea na Babilon le vlo dom Yehowa ƒe ŋkɔ. (Xezekiel 36:20, 21) Mete ŋu kpɔe dze sii be esi Yehowa megakpɔ ŋudzedze ɖe eƒe amewo ŋu o tae Yerusalem zu aƒedo ɖo o. Ke boŋ Babilon bu Yudatɔwo wɔwɔ kluviwoe be enye kpeɖodzi be ŋusẽ mele woƒe Mawu ŋu o. Babilontɔ Belsazar si ɖu fia kple ame bubu la gɔ̃ hã ɖu fewu le Yehowa ŋu esi wòzã Eƒe gbedoxɔmenuwo le azã aɖe si woɖu tsɔ de bubu Babilon-mawuwo ŋu me.—Daniel 5:1-4.

 8. Aleke wowɔ nu ɖe Yehowa ƒe ŋkɔ ŋu tso keke apostoloawo ƒe ku megbe ke?

⁸ Aleke nya siawo katã ku ɖe “dziƒo Yerusalem” ŋui? Tso esime xɔsegbegbe dze egɔme le amesiwo gblɔna be Kristotɔwo yewonye dome la, míate ŋu agblɔ be “wogblɔa busunya ɖe Mawu ƒe ŋkɔ ŋuti le [ame mawo ta le] trɔ̃subɔlawo dome.” (Romatɔwo 2:24; Dɔwɔwɔwo 20:29, 30) Le esia ta la, aʋatsodzixɔsewo na Yudatɔwo va dzudzɔ Mawu ƒe ŋkɔ zazã mlɔeba. Le apostoloawo ƒe ku megbe teti la, Kristotɔ xɔsegbelawo va srɔ̃ nɔnɔme ma hedzudzɔ Mawu ƒe ŋkɔ ŋutɔ zazã. Nusi do tso xɔsegbegbe la mee nye Kristodukɔ si va do, si nye Babilon Gã la ƒe akpa vevi aɖe. (Tesalonikatɔwo II, 2:3, 7; Nyaɖeɖefia 17:5) Kristodukɔa ƒe agbegbegblẽnɔnɔ vivivo kple ʋukɔkɔɖi gbogboawo ƒo ɖi Yehowa ƒe ŋkɔ vevie.—Petro II, 2:1, 2.

9, 10. Yehowa ƒe dzidzenuwo kple eƒe ŋkɔ ŋuti gɔmesese deto kae va su Mawu ƒe dukɔ si wòbla nu kpli le egbeɣeyiɣiawo me si?

⁹ Esi Kores Gãtɔ, Yesu Kristo, na ablɔɖe Mawu ƒe dukɔ si wòbla nu kpli tso Babilon Gã la ƒe aboyo me le ƒe 1919 me la, wova se Yehowa ƒe nudidiwo gɔme nyuie wu. Wokɔ wo ɖokui ŋu xoxo tso Kristodukɔa ƒe nufiafia geɖe siwo dzɔ tso trɔ̃subɔsubɔ si nɔ anyi do ŋgɔ na Kristotɔwo ƒe ɣeyiɣia me, siwo ƒe ɖewoe nye Mawuɖekaetɔ̃, luʋɔ makumaku, kple funyafunya mavɔ le dzomavɔ me la me. Azɔ wodze egɔme be yewoado le Babilontɔwo ƒe ŋusẽkpɔɖeamedzi ɖesiaɖe te. Wova kpɔ vevienyenye si le akpaɖekedzimademade me léle ɖe asi sesĩe le xexe sia me dunyahehawo ƒe nyawo me hã dze sii. Wodi gɔ̃ hã be yewoakɔ yewo ɖokui ŋu tso ʋukɔkɔɖi ƒe fɔɖiɖi ɖesiaɖe si anɔ wo dometɔ aɖewo dzi me.

¹⁰ Egbeŋkekea me Mawu subɔlawo va se vevienyenye si le Yehowa ƒe ŋkɔ ŋu hã gɔme ɖe edzi wu. Wotsɔ ŋkɔ Yehowa Ðasefowo le ƒe 1931 me, eye woto esia me ɖe gbeƒãe le gaglãgbe be Yehowa kple eƒe ŋkɔ ƒe akpa dzie yewole. Tsɔ kpe ɖe eŋu la, Yehowa Ðasefowo to New World Translation si wota tso ƒe 1950 me dzi gbugbɔ Mawu ƒe ŋkɔa ɖo teƒe siwo sɔ nɛ le Biblia me. Ẽ, wova kpɔ ŋudzedze ɖe Yehowa ƒe ŋkɔ ŋu eye wole gbeƒã ɖemee vaseɖe anyigba ƒe seƒe ke.

“Du Nyui Xɔla”

11. Nukata nyagbɔgblɔ “Wò Mawu zu fia!” sɔ ɖe nusiwo dzɔ le ƒe 537 D.M.Ŋ. me la nu?

¹¹ Fifia wogahe míaƒe susu yi Zion dzi le ɣeyiɣi si me wòganye aƒedo kokoko. Dɔla aɖe tsɔ du nyui gbɔnae: “Du nyui xɔla ƒe afɔwo nyo le towo dzi loo! Eya, amesi ɖea gbeƒã ŋutifafa, eye wòtoa gbe nyui, eɖea gbeƒã xɔname, eye wòle gbɔgblɔm na Zion be: Wò Mawu [zu] fia!” (Yesaya 52:7) Aleke woate ŋu agblɔe le ƒe 537 D.M.Ŋ. me be Zion ƒe Mawu la va zu Fia? Ðe Yehowa menye Fia ɣesiaɣi oa? Nyateƒee, eyae nye “Fia mavɔtɔ” la! (Nyaɖeɖefia 15:3, NW) Gake nyagbɔgblɔ “Wò Mawu zu fia!” la sɔ elabena Babilon ƒe mumu kple fia ƒe sedede si nye be woagbugbɔ gbedoxɔa atu ɖe Yerusalem eye woagbugbɔ tadedeagu dzadzɛ aɖo anyi le afima la nye Yehowa ƒe fianyenye ɖeɖefia le mɔ yeye aɖe nu.—Psalmo 97:1.

12. Amekae xɔ ŋgɔ le ‘du nyui tsɔtsɔ vɛ’ me, eye le mɔ ka nu?

¹² Le Yesaya ƒe ŋkekea me la, womeyɔ ame alo ƒuƒoƒo aɖeke be “du nyui xɔla” o. Gake egbea míenya amesi du nyui xɔla sia nye. Yesu Kristoe nye Yehowa ƒe ŋutifafadɔla gãtɔ kekeake. Esime wònɔ anyigba dzi la, eɖe gbeƒã nyanyui si nye be woaɖe amegbetɔ tso nu gbegblẽ siwo katã nuvɔ̃ si dome míenyi tso Adam gbɔ he vɛ, siwo ƒe ɖewoe nye dɔléle kple ku, la me. (Mateo 9:35) Yesu ɖo kpɔɖeŋu le veviedodo tsɔtsɔ ɖe gbeƒã nyanyui si ku ɖe nane si nyo wu ŋu me, eye ezã mɔnukpɔkpɔ ɖesiaɖe tsɔ fia nu amewo le Mawu Fiaɖuƒea ŋu. (Mateo 5:1, 2; Marko 6:34; Luka 19:1-10; Yohanes 4:5-26) Eƒe nusrɔ̃lawo hã srɔ̃ eƒe kpɔɖeŋua.

13. (a) Aleke apostolo Paulo keke gɔmesese si le nyagbɔgblɔ “Du nyui xɔla ƒe afɔwo nyo le towo dzi loo” ŋu ɖe enui? (b) Nukata woate ŋu agblɔ be dɔlaawo ƒe afɔwo “nyo”?

¹³ Le lɛta si apostolo Paulo ŋlɔ na Romatɔwo me la, eyɔ nya tso Yesaya 52:7 tsɔ te gbe ɖe gbeƒãɖeɖe nyanyuia ƒe vevienyenye dzii. Ebia nya geɖe siwo na wobua tame, siwo ƒe ɖewoe nye ‘Aleke amewo awɔ ase nya, ne gbeƒãɖela aɖeke meli o?’ Azɔ egblɔ be: “Abe alesi woŋlɔ ɖi ene bena: ‘Nyagblɔla, siwo gblɔa ŋutifafanya kple nyanyui la ƒe afɔwo nyo loo!’” (Romatɔwo 10:14, 15) Paulo to esia me keke amesiwo ŋu Yesaya 52:7 ku ɖo la ɖe enu hezã “siwo” si nye geɖetɔ, ke menye “amesi” si nye ɖekatɔ si dze le Yesaya ƒe agbalẽ si woŋlɔ gbã la me o. Kristotɔwo katã nye ŋutifafanyanyui ƒe dɔlawo le Yesu Kristo sɔsrɔ̃ me. Aleke woƒe afɔwo ‘nyoe’? Yesaya ƒo nu abe ɖe gbeƒãɖela la tso to siwo le Yuda-nutome siwo tsɔ ɖe Yerusalem gbɔ dzi gbɔna dua me ene. Manya wɔ be woakpɔ dɔla la ƒe afɔwo tso didiƒe o. Dɔla la ŋu boŋue wole nu ƒom tsoe le afisia, eye afɔawo tsi tre ɖi na dɔla la ŋutɔ. Abe alesi Yesu kple eƒe nusrɔ̃lawo nya kpɔ na ame fafawo le ƒe alafa gbãtɔ me ene la, nenemae egbeŋkekea me Ðasefowo dze anii na ɖokuibɔbɔla siwo ɖoa to nyanyui si nye agbexɔxɔgbedasi la.

14. Aleke Yehowa va zu Fia le egbeɣeyiɣiwo me, eye tso ɣekaɣie woɖe gbeƒã nya sia na ameƒomea?

¹⁴ Tso ɣekaɣie gbea ɖi be “Wò Mawu zu fia!” le egbeɣeyiɣiawo me? Tso ƒe 1919 mee. Le takpekpe aɖe si wowɔ le ƒe ma me le Cedar Point, Ohio, la, J. F. Rutherford si nye Gbetakpɔxɔ Habɔbɔa ƒe zimenɔla ɣemaɣi ƒo nuƒo aɖe si ʋã eƒe nyaselawo eye eƒe tanyae nye “Gbedasi na Hadɔwɔlawo.” Nuƒo ma si wotu ɖe Yesaya 52:7 kple Nyaɖeɖefia 15:2 dzi la de dzi ƒo na vavalawo katã be woawɔ gbeƒãɖeɖedɔa. Alea wòdzɔe be ‘afɔ dzeaniwo’ va nɔ dzedzem le “towo” dzi. Kristotɔ amesiaminawoe tsɔ veviedodo ɖe gbeƒã nyanyuia be Yehowa va zu Fia, eye emegbe woƒe zɔhɛ ‘alẽ bubuawo’ hã va kpe ɖe wo ŋu. (Yohanes 10:16) Aleke Yehowa va zu Fiae? Eɖe eƒe fianyenye fia le mɔ yeye aɖe nu le ƒe 1914 me esime wòtsɔ Via, Yesu Kristo, ɖo Fiae le Dziƒofiaɖuƒe si woɖo anyi yeyee la me. Eye Yehowa gaɖe eƒe fianyenye fia le mɔ bubu nu le ƒe 1919 me esime wòɖe “Mawu ƒe Israel” tso Babilon Gã la me.—Galatiatɔwo 6:16; Psalmo 47:9; Nyaɖeɖefia 11:15, 17; 19:6.

‘Wò Dzɔlawo ƒe Gbe De Dzi’

15. Amekawoe ‘dzɔla’ siwo ƒe gbe de dzi le ƒe 537 D.M.Ŋ. me la nye?

¹⁵ Ðe amewo wɔ nu ɖe nya si wogblɔ be “Wò Mawu zu fia!” la ŋua? Ẽ. Yesaya ŋlɔe bena: “Lé to ɖe wò dzɔlawo ŋu! Wo katã ƒe gbe de dzi, eye wotso aseye; elabena woƒe ŋkuwo kpɔ eteƒe, esime Yehowa trɔ gbɔ va Zion.” (Yesaya 52:8) Womeɖo dzɔla ŋutɔŋutɔwo le Yerusalem le ƒe 537 D.M.Ŋ. me be woado dzaa na aboyome gbãtɔ siwo trɔ gbɔ o. Du la zu aƒedo ƒe 70 sɔŋ. (Yeremya 25:11, 12) Eyata anye Israel-vi siwo see do ŋgɔ be wogbugbɔ Zion ɖo anyi eye wova gblɔ nyaa na Zion-vi susɔeawo lae ‘dzɔla’ siwo ƒe gbe de dzi la nye. Esi dzɔlaawo kpɔ eteƒe esime Yehowa tsɔ Babilon de Kores si le ƒe 539 D.M.Ŋ. me la, ɖikeke aɖeke menɔ woƒe susu me be Yehowa nɔ ablɔɖe nam eƒe amewo o. Dzɔlawo kple amesiwo wɔ ɖe woƒe yɔyɔa dzi wɔ ɖeka tso aseye yoo, eye wona ame bubuwo se nyanyuia.

16. Amekae dzɔlaawo kpɔ kple “woƒe ŋkuwo,” eye le gɔmesese ka nu?

¹⁶ Dzɔla ŋudzɔnɔlaawo na ƒomedodo kplikplikpli va nɔ woa ŋutɔwo kple Yehowa dome, eye wokpɔe ŋkume kple ŋkume, alo kple “woƒe ŋkuwo,” le kpɔɖeŋumɔ nu. (Mose IV, 14:14) Kadodo kplikplikpli si le wo kple Yehowa kpakple wo nɔewo dome ɖe woƒe ɖekawɔwɔ kple dzidzɔnya si woƒe gbedasia nye la fia.—Korintotɔwo I, 1:10.

17, 18. (a) Aleke egbeŋkekea me dzɔla ƒe ha la kɔ eƒe gbe dzii? (b) Gɔmesese ka nue dzɔla ƒe ha la wɔ ɖeka ɖe gbeƒã le?

¹⁷ Le emevava le egbeŋkekea me la, dzɔla ƒe ha, si nye “dɔla nuteƒewɔla kple aɖaŋudzela” la kɔ eƒe gbe dzi, menye na amesiwo le Mawu ƒe habɔbɔ si wokpɔna me xoxo ko o ke na amesiwo le egodo hã. (Mateo 24:45-47) Yɔyɔa ɖi le ƒe 1919 me be woaƒo amesiamina susɔeawo nu ƒu, eye le ƒe 1922 me la, yɔyɔa gaɖi sesĩe wu le Cedar Point, Ohio, takpekpea me wode dzi ƒo na amewo be “miɖe gbeƒã, miɖe gbeƒã, miɖe gbeƒã Fia la kple eƒe fiaɖuƒe la.” Tso ƒe 1935 me la, wotrɔ susu ɖe amesiwo ƒe nɔnɔme ɖi alẽwo tɔ ƒe ameha gã aɖe nuƒoƒoƒu ŋu. (Nyaɖeɖefia 7:9, 10) Wogaɖe gbeƒã Yehowa ƒe fianyenye ɖe edzi wu le ƒe siwo va yi nyitsɔ laa me. Aleke wowɔe? Le ƒe 2000 me la, amesiwo ade miliɔn ade nɔ gome kpɔm le nuƒoƒo tso Yehowa ƒe fianyenye ŋu me le dukɔ kple nuto siwo wu 230 me. Tsɔ kpe ɖe eŋu la, Gbetakpɔxɔ si nye dɔwɔnu si koŋ dzɔla ƒe ha la zãna la gblɔa dzidzɔgbedasia le gbegbɔgblɔ siwo wu 130 me.

¹⁸ Gomekpɔkpɔ le ɖekawɔwɔ ƒe dɔ sia me bia ɖokuibɔbɔ kple nɔvilɔlɔ̃. Hafi nyaa nawɔ dɔ ɖe amewo dzi la, ele be amesiwo katã le egblɔm naɖe gbeƒã gbedasi ma ke si ku ɖe Yehowa ƒe ŋkɔ, eƒe tafe ƒe ɖoɖoa, eƒe nunya, eƒe lɔlɔ̃, kple eƒe Fiaɖuƒea ŋu. Esi Kristotɔ siwo katã le xexeame le dɔ wɔm ɖekae la, edoa ŋusẽ kadodo si le woa ŋutɔ kple Yehowa dome be woatsɔ ɖekawɔwɔ agblɔ dzidzɔnya lae.

19. (a) Aleke “Yerusalem ƒe aƒedowo” akpɔ dzidzɔe? (b) Gɔmesese ka nue Yehowa “klo nu le eƒe alɔ kɔkɔe la ŋu” le?

¹⁹ Esi Mawu ƒe amewo le aseye tsom ta la, edze abe wo nɔƒe gɔ̃ hã le dzidzɔ kpɔm ene. Nyagblɔɖia yi edzi be: “Mi Yerusalem ƒe aƒedowo, mido aƒa, mitso aseye yoo; elabena Yehowa fa akɔ na eƒe dukɔ, eye wòɖe Yerusalem! Yehowa klo nu le eƒe alɔ kɔkɔe la ŋu le dukɔwo katã ŋku me, eye anyigba ƒe mlɔenuwo katã akpɔ mía Mawu ƒe xɔname.” (Yesaya 52:9, 10) Esi amesiwo trɔ gbɔna tso Babilon va ɖo la, dzidzɔ va Yerusalem ƒe aƒedowo si dze abe ele nu xam ene la me elabena woagate ŋu agbugbɔ Yehowa ƒe tadedeagu dzadzɛ la aɖo anyi azɔ. (Yesaya 35:1, 2) Edze ƒã be Yehowa ƒe asi nɔ nusia me. ‘Eklo nu le eƒe alɔ kɔkɔe la ŋu,’ abe ɖe wòhe eƒe awu ƒe abɔwo yi dzi be yeawɔ dɔ axɔ na yeƒe amewo ene.—Ezra 1:2, 3.

20. Nukae do tso eme esime Yehowa klo nu le eƒe alɔ kɔkɔe ŋu le egbeɣeyiɣiwo me, eye nukae agado tso eme?

²⁰ Le ‘ŋkeke mamlɛ’ siawo me la, Yehowa klo nu le eƒe alɔ kɔkɔe la ŋu be wòagbɔ agbe amesiamina susɔeawo, siwo nye “ɖaseɖila eve” siwo woyɔ le Nyaɖeɖefia ƒe agbalẽa me. (Timoteo II, 3:1; Nyaɖeɖefia 11:3, 7-13) Tso ƒe 1919 me la, wokplɔ amesiawo va gbɔgbɔmeparadiso aɖe, si nye gbɔgbɔmenɔƒe si wo kple woƒe zɔhɛ alẽ bubuawo le fifia la me. Mlɔeba la, Yehowa aklo nu le eƒe alɔ kɔkɔe la ŋu be wòahe xɔname vɛ na eƒe amewo le “Harmagedon.” (Nyaɖeɖefia 16:14, 16) Ɣemaɣi la, “anyigba ƒe mlɔenuwo katã akpɔ mía Mawu ƒe xɔname.”

Nudidi aɖe si Hiã Kpata

21. (a) Nukae wodi tso amesiwo nye “Yehowa ƒe nutsɔlawo” si? (b) Nukata mele be Yudatɔ siwo le dzodzom le Babilon la navɔ̃ kura o?

²¹ Nudidi aɖe li si gbɔ wòle be amesiwo adzo le Babilon atrɔ yi Yerusalem la naɖo. Yesaya ŋlɔ bena: “Midzo, midzo, miʋu tso afima! Migaka asi nu makamakɔ aɖeke ŋu o! Miʋu tso wo dome; mi Yehowa ƒe nutsɔlawo, mikɔ mia ɖokui ŋu! Elabena menye kpakplakpla dzi mianɔ aʋu o, eye miasi adzo o; elabena Yehowa adze ŋgɔ na mi, eye Israel ƒe Mawu la axe megbe na mi.” (Yesaya 52:11, 12) Ele be Israel-vi siwo dzo yina la nagblẽ nusianu si Babilon ƒe alakpasubɔsubɔ ƒo ɖii la ɖe Babilon. Esi woatsɔ Yehowa ƒe nu siwo tso gbedoxɔa me le Yerusalem ta la, ele be woanɔ kɔkɔe, menye le gota gome le kɔnu nu ko o, ke le woƒe dzime koŋ. (Fiawo II, 24:11-13; Ezra 1:7) Tsɔ kpe ɖe eŋu la, Yehowa dze wo ŋgɔ, eyata mele be woavɔ̃ o, eye mele be woatsi dzodzodzoe anɔ du dzi, abe ɖe ʋukɔɖila aɖewoe le wo yome tim ene hã o. Israel ƒe Mawu la xe megbe na wo.—Ezra 8:21-23.

22. Aleke Paulo te gbe ɖe alesi wòhiã be Kristotɔ amesiaminawo nanɔ dzadzɛ dzii?

²² Yesaya ƒe nya siwo ku ɖe alesi woanɔ kɔkɔe ŋu la va eme ɖe “dziƒo Yerusalem” ƒe dzidzimeviwo dzi le mɔ si lolo wu nu. Esime Paulo xlɔ̃ nu Korinto Kristotɔwo be womeganɔ kɔkuti tutɔ te kple dzimaxɔsetɔwo o la, eyɔ nya siwo le Yesaya 52:11 gblɔ be: “Eyaŋuti mido go le wo dome, eye miɖe mia ɖokui ɖa, Aƒetɔ la gblɔe, eye migaka asi nu makɔmakɔ ŋuti o.” (Korintotɔwo II, 6:14-17) Abe alesi wònɔ le Israel-vi siwo trɔ tso Babilon yina wo de gome ene la, ele be Kristotɔwo naɖe wo ɖokui ɖa le Babilon ƒe alakpasubɔsubɔ ŋu.

23. Mɔ kawo nue Yehowa subɔla siwo li egbea dzea agbagba léa wo ɖokui dzadzɛ le?

²³ Nya sia sɔ vevietɔ na Yesu Kristo yomedzela amesiamina siwo si tso Babilon Gã la me le ƒe 1919 me. Wokɔ wo ɖokui ŋu vivivi tso alakpasubɔsubɔ ƒe nɔnɔme ɖesiaɖe me. (Yesaya 8:19, 20; Romatɔwo 15:4) Wova kpɔ vevienyenye si le agbedzadzɛnɔnɔ ŋu geɖe wu hã. Togbɔ be Yehowa Ðasefowo léa agbenyuinɔnɔ ƒe dzidzenu kɔkɔwo me ɖe asi ɣesiaɣi hã la, nyatiwo nɔ Eŋlisigbe me Gbetakpɔxɔ me le ƒe 1952 me siwo te gbe ɖe alesi wòhiã be woahe to na agbegbegblẽnɔlawo ale be wòana hamea nanɔ dzadzɛ la dzi. Tohehe sia kpena ɖe nuvɔ̃wɔla la hã ŋu be wòakpɔ alesi dzimetɔtrɔ vavãtɔ hiãe adze sii.—Korintotɔwo I, 5: 6, 7, 9-13; Korintotɔwo II, 7: 8-10; Yohanes II, 10, 11.

24. (a) Nukawoe nye ‘Yehowa ƒe nuwo’ le egbeɣeyiɣiwo me? (b) Nukata Kristotɔ siwo li egbea ka ɖe edzi be Yehowa ayi edzi adze yewo ŋgɔ eye wòaxe megbe hã na yewo?

²⁴ Kristotɔ amesiaminawo kple alẽ bubuawo ƒe ameha gã la ɖoe kplikpaa be yewomaka asi gbɔgbɔmenu makɔmakɔ aɖeke ŋu o. Alesi wokɔ wo ŋu wole dzadzɛ la na wodze atsɔ ‘Yehowa ƒe nuwo’—siwo nye mɔnuɖoɖo xɔasi siwo Mawu wɔna ɖe subɔsubɔ kɔkɔe ŋu le aƒeme yi aƒeme kple Biblia-nusɔsrɔ̃ ƒe subɔsubɔdɔa kpakple Kristotɔwo ƒe dɔwɔna bubuwo me. Esi Mawu ƒe ame siwo li egbea léa tenɔnɔ dzadzɛ me ɖe asi ta la, woate ŋu aka ɖe edzi be Yehowa ayi edzi adze wo ŋgɔ eye wòaxe megbe hã na wo. Esi wonye Mawu ƒe ame dzadzɛwo ta la, wotɔ dzɔ ŋutɔ be ‘woatso aseye yoo’!

[Etenuŋɔŋlɔwo]

[Nɔnɔmetata si le axa 183]

Woana ablɔɖe Zion tso aboyo me

[Nɔnɔmetata si le axa 186]

‘Afɔ dzeaniwo’ gadze le ‘toawo’ dzi tso ƒe 1919 me

[Nɔnɔmetata si le axa 189]

Yehowa Ðasefowo ƒoa nu le ɖekawɔwɔ me

[Nɔnɔmetata si le axa 192]

Ele be amesiwo nye “Yehowa ƒe nutsɔlawo” nanɔ dzadzɛ le agbenɔnɔ kple gbɔgbɔ me