Nyagblɔɖigbalẽ

Amewo dina be yewoanya etsɔme. Wodina be woagblɔ nya siwo ŋu kakaɖedzi le ɖi na yewo tso nu geɖe ŋu, tso yame ƒe nɔnɔme dzi va ɖo ganyawo dzi. Gake ne wotsɔ nyagblɔɖi mawo wɔ dɔe la, zi geɖe nusi wogblɔ na wo mevaa eme o. Nyagblɔɖi geɖe le Biblia me. Kakaɖedzi kae le nyagblɔɖi mawo ƒe nyateƒenyenye ŋu? Ðe wogblɔ nudzɔdzɔawo ɖi hafi wova dzɔa? Alo ɖe nuawo dzɔ va yi vɔ hafi woŋlɔ wo ɖi be nyagblɔɖie wonye?

WOBE Roma-dziɖuɖumegã Cato (ƒe 234-149 D.M.Ŋ.) gblɔ be: “Ewɔa nuku nam be etsɔmegblɔɖila mekpɔa nɔvia etsɔmegblɔɖila koa nu o.”¹ Nyateƒee, vaseɖe egbegbe, ame geɖe mekana ɖe afakalawo, ɣletivimefakalawo, kple etsɔmegblɔɖila bubuwo ƒe nya dzi o. Zi geɖe la, wogblɔa nya gbadzaa ko le woƒe nyagblɔɖiwo me eye gɔmeɖeɖe vovovo ate ŋu anɔ woƒe nyawo ŋu.

Ke Biblia ƒe nyagblɔɖilawo hã ɖe? Asɔ be woake ɖi le woawo hã ŋua? Alo ɖe nane li si ana míate ŋu aka ɖe wo dzia?

Womenye Ayemewo ƒe Nyagblɔkpɔwo Ko O

Amesiwo de ŋgɔ le nusɔsrɔ̃ me ate ŋu adze agbagba alé ŋku ɖe nusiwo wokpɔ be wole dzɔdzɔm ŋu be yewoagblɔ etsɔme ɖi wòadze edzi pɛpɛpɛ, gake menye ɣesiaɣie woƒe nyawo vaa eme pɛpɛpɛ o. Agbalẽ si nye Future Shock gblɔ be: “Menye etsɔmenu siwo ate ŋu adzɔ koe amewo ƒe habɔbɔ ɖesiaɖe dzea ŋgɔe o, ke wodzea ŋgɔ etsɔmenu gbogbo aɖewo siwo ɖewohĩ adzɔ, kple etsɔme si anye nyuitɔ la ŋuti nyaʋiʋliwo hã.” Egblɔ kpee be: “Ame aɖeke mate ŋu ‘anya’ alesi tututu etsɔme anɔ ya o. Ðeko míate ŋu aɖo nuwo ɖe ɖoɖo nu eye esiwo míebu be wonye nyateƒe la, míatsɔ wo nenema eye míate kpɔ agblɔ esiwo ŋu míekpɔ dzesi le be woate ŋu adzɔ.”²

Gake le nusiwo adzɔ le etsɔme gbɔgblɔ ɖi me la, Biblia-ŋlɔlawo metsɔ ‘nusiwo wosusu be wonye nyateƒe’ ko be “woate ŋu adzɔ” o. Eye míate ŋu agbe woƒe nyagblɔɖiwo ŋu bubu be wonye nya siwo do viviti eye gɔmeɖeɖe vovovo ate ŋu anɔ wo si o. To vo na ema la, wogblɔ woƒe nyagblɔɖiawo dometɔ geɖe wo me kɔ nyuie eye wotɔ asi nuwo dzi tẽ le wo me, eye nusi womenɔa mɔ kpɔm na o boŋ ye wogblɔna zi geɖe. Le kpɔɖeŋu me, bu nusi Biblia gblɔ le blemadu si nye Babilon ŋu kpɔ.

Woatsɔ ‘Tsɔtsrɔ̃ ƒe Xa Akplɔe’

Blema Babilon va zu “fiaɖuƒewo ƒe nu vevi.” (Yesaya 13:19) Wotsoe ɖe teƒe si de wo dzi le aʋawɔwɔ me ɖe asimɔ si tso Persia Ƒukɔmea va yi Mediterranea Ƒua ta la dzi eye wònye asidu si me anyigbadzisitsala kple ƒudzisitsalawo tsɔa woƒe adzɔnuwo vɛ tso Ɣedzeƒe kple Ɣetoɖoƒe dukɔwo me.

Va ɖo ƒe alafa adrelia D.M.Ŋ. me la, Babilon-dua zu Babilon Fiaɖuƒea ƒe fiadu si dze abe ɖe womate ŋu aɖu edzi akpɔ gbeɖe o ene. Wotso dua ɖe Frat Tɔsisia ƒe go eveawo dzi, eye tɔsisia me tsiwo zu tɔʋu gã globo aɖe si nye akpoxɔnu na dua, eye woɖe tsimɔ geɖewo hã ɖe eŋu. Gakpe ɖe eŋu la, woɖo gli titri eve ɖe wo nɔewo ŋu ƒo xlã dua eye wotu gbetakpɔxɔ gbogbo aɖewo siwo dzi woanɔ adzɔ eŋu la ɖe eŋu. Eyata mewɔ nuku be dua me tɔwo sena le wo ɖokui me be yewole dedie o.

Ke hã le ƒe alafa enyilia D.M.Ŋ. me, hafi Babilon naɖo eƒe ŋutikɔkɔe ƒe kɔkɔaƒe la, nyagblɔɖila Yesaya gblɔ ɖi be ‘woatsɔ tsɔtsrɔ̃ ƒe xa akplɔ’ Babilon. (Yesaya 13:19; 14:22, 23) Yesaya ɖɔ alesi tututu Babilon amui hã. Edzidzelawo ana eƒe tɔsisiwo—nusi nye eƒe tsikpoxɔnu la—‘namie’ si ana woate ŋu adze dua dzi bɔbɔe. Yesaya yɔ amesi aho aʋa ɖe wo ŋu ƒe ŋkɔ gɔ̃ hã—“Kores,” Persia-fiagã, ‘amesi ŋkume ʋɔwo anɔ ʋuʋu ɖi le eye agbowo matsi dodo o.’—Yesaya 44:27–45:2.

Ebia dzideƒo hafi woagblɔ nya siawo tɔgbe ɖi. Gake ɖe wova emea? Míakpɔ ŋuɖoɖoa le ŋutinya me.

‘Aʋamawɔmawɔe’

Esi Yesaya ŋlɔ eƒe nyagblɔɖia ƒe ƒe alafa eve megbe, le October 5, 539 D.M.Ŋ. ƒe zã me la, Medo-Persia ʋakɔ siwo nɔ Kores Gãtɔ ƒe kpɔkplɔ te ƒu asaɖa anyi ɖe afisi tsɔ ɖe Babilon gbɔ. Gake meʋã dzi na Babilontɔwo o. Helatɔ ŋutinyaŋlɔla Herodotus (ƒe alafa atɔ̃lia D.M.Ŋ.) gblɔ be nusiwo le nudzraɖoƒe na wo asu na woƒe zazã ƒe geɖe.³ Frat Tɔsisia kple Babilon ƒe glikpɔ sesẽa hã li akpɔ wo ta. Ke hã Nabonidus ƒe Ŋutinyakpememe la gblɔ be le zã ma ke me “Kores ƒe aʋakɔa ge ɖe Babilon aʋamawɔmawɔe.”⁴ Aleke wɔ wòte ŋu dzɔ nenema?

Herodotus ɖe eme be amewo “nɔ ɣe ɖum eye wonɔ aseye tsom le azãɖuƒe aɖe” le dua me.⁵ Gake le dua godo la, Kores trɔ Frat Tɔsisia me tsiwo yi teƒe bubui. Esi tsia mie va ɖo teƒe aɖe la, eƒe aʋakɔa zɔ tɔʋua me, eye tsia se ata na wo. Woto gli kɔkɔawo ŋu eye woge ɖe eme le afisi Herodotus yɔ be “agbo siwo ʋu ɖe tɔsisia nu,” wogblẽ agbo mawo ɖi madomadoe ɖekematsɔlemetɔe.⁶ (Tsɔe sɔ kple Daniel 5:1-4; Yeremya 50:24; 51:31, 32.) Ŋutinyaŋlɔla bubuwo, si me Xenophon (ƒe 431 lɔƒo–352 D.M.Ŋ. lɔƒo) hã le, kpakple kpememe siwo dzi blemanuŋɔŋlɔwo le siwo ŋu blemanukulawo ke ɖo, hã ɖo kpe Kores ƒe Babilon xɔxɔ kpata ƒe nyateƒenyenye dzi.⁷

Ale Yesaya ƒe nyagblɔɖi si ku ɖe Babilon ŋu va emee. Alo ɖe meva eme oa? Ðe wòate ŋu anye be womegblɔe ɖi o ke boŋ ɖe nua dzɔ vɔ megbe hafi wova ŋlɔea? Le nyateƒe me la, míate ŋu abia nya sia ke tso Biblia me nyagblɔɖi bubuwo hã ŋu.

Ðe Wòdzɔ Va Yi Hafi Wotrɔe Wòzu Nyagblɔɖia?

Ne nusiwo dzɔ va yie Biblia ƒe nyagblɔɖilawo—si me Yesaya hã le—gbugbɔ ŋlɔ be wòadze abe nyagblɔɖi ene la, ke ameflula dzeayewo koe ame mawo nye. Gake nukatae woadi be yewoaflu ame nenema? Nyagblɔɖila vavãwo na wonya enumake be womate ŋu ana zãnu yewo o. (Samuel I, 12:3; Daniel 5:17) Eye míedzro kpeɖodzi sẽŋu siwo fia be Biblia-ŋlɔlawo (siwo dometɔ geɖe nye nyagblɔɖilawo) nye ŋutsu siwo dzi woate ŋu aka ɖo, amesiwo lɔ̃ faa be yewoagblɔ yewo ŋutɔ yewoƒe vodada siwo nye ŋukpe gɔ̃ hã. Edze ƒã be mate ŋu adzɔ be ŋutsu siawo tɔgbe nadi be yewoatsɔ ayedzedze awɔ ameflunu siwo me ŋuɖɔɖɔɖo geɖe ahiã le, aŋlɔ nusiwo dzɔ va yi ƒe ŋutinya vɔ pɛ atrɔe abe nyagblɔɖie wònye ene o.

Nu bubu gali si ŋu wòle be míabu. Nyagblɔɖilawo ŋutɔ ƒe dukɔ, si me nunɔlawo kple fiawo hã le, ŋuti fɔbubu sẽŋuwo le Biblia me nyagblɔɖi geɖe me. Le kpɔɖeŋu me, Yesaya gblɔ fɔbuamenya sesẽwo ɖe alesi Israel-viwo—woƒe kplɔlawo kple dukɔa siaa—ƒe agbenɔnɔ gblẽkui le eƒe ŋkekea me ŋu. (Yesaya 1:2-10) Nyagblɔɖila bubuwo hã klo nu le nunɔlawo ƒe nuvɔ̃wo dzi dzideƒotɔe. (Zefanya 3:4; Maleaxi 2:1-9) Esesẽ ŋutɔ be nàkpɔ nusita woakpa nyagblɔɖi siwo me fɔbubu sesẽtɔwo kekeake si ava susu me na ame le ɖe woawo ŋutɔ woƒe dukɔa ŋu kple nusita nunɔlawo akpe asi ɖe wo ŋu le ameflunu sia wɔwɔ me le susu me.

Tsɔ kpe ɖe eŋu la, aleke nyagblɔɖilawo—ne ameflulawoe wonye—awɔ ado le nyakpakpa ma me? Wode agbalẽnyanya ƒe dzi ƒo le Israel. Wofiaa nuxexlẽ kple nuŋɔŋlɔ ɖeviwo tso woƒe ɖevime ke. (Mose V, 6:6-9) Wode Ŋɔŋlɔawo xexlẽ le ame ɖokui si ƒe dzi ƒo. (Psalmo 1:2) Woxlẽa Ŋɔŋlɔawo le dutoƒo le ƒuƒoƒewo le Sabat dzi kwasiɖa sia kwasiɖa. (Dɔwɔwɔwo 15:21) Medze nusi ate ŋu adzɔe be woaflu dukɔ blibo si me tɔwo nya agbalẽ eye wonya Ŋɔŋlɔawo hã nyuie la nenema o.

Le esiawo megbe la, nu bubuwo gaku ɖe nya si Yesaya gblɔ ɖi le Babilon ŋu la ŋuti. Nya aɖe le eme si mate ŋu adzɔ be ɖe wòva eme vɔ megbe hafi woŋlɔe o.

“Womatso Aƒe ɖe Afima Akpɔ O”

Nukae adzɔ ɖe Babilon dzi le eƒe anyidzedze vɔ megbe? Yesaya gblɔe ɖi be: “Womatso aƒe ɖe afima akpɔ o tegbee, eye wòatsi anyi aƒedoe tso dzidzime yi dzidzime, Arabiatɔwo matu agbadɔ ɖe afima o, eye lãkplɔviwo mana lãwo natsyɔ akɔ ɖe afima o.” (Yesaya 13:20) Awɔ mo yaa ŋutɔ be woagblɔe ɖi be womaganɔ du si wotso ɖe teƒe deamedzi ma me akpɔ gbeɖegbeɖe o. Ðe wòate ŋu anye be esi Yesaya kpɔ Babilon ƒe gbagbã vɔ megbe hafi wòŋlɔ nya siawoa?

Esi Kores xɔ Babilon vɔ megbe la, amewo ganɔ Babilon ƒe alafa geɖe—togbɔ be dua megakpɔ ŋusẽ abe tsãtɔ ene o hã. Ðo ŋku edzi be Yesaya ƒe agbalẽ bliboa katã nɔ Ƒukukua ƒe Agbalẽxatsaxatsa siwo wogblɔ be ƒe alafa evelia D.M.Ŋ. mee woŋlɔ wo la me. Le ɣeyiɣi si me wogbugbɔ agbalẽxatsaxatsa ma nɔ ŋɔŋlɔm la, Partiatɔwo nɔ Babilon dzi ɖum. Le ƒe alafa gbãtɔ M.Ŋ. me la, Yudatɔwo nɔ Babilon, eye Biblia-ŋlɔla Petro de afima. (Petro I, 5:13) Va ɖo ɣemaɣi la, Ƒukukua ƒe Agbalẽxatsaxatsa si me Yesaya ƒe agbalẽa nɔ la nɔ anyi wòde ƒe alafa eve kloe. Eyata va ɖo ƒe alafa gbãtɔ M.Ŋ. me la, Babilon mezu dudo keŋkeŋ o, gake wowu Yesaya ƒe agbalẽa ŋɔŋlɔ nu vɔ xoxoxo do ŋgɔ na ɣemaɣi.a

Abe alesi wogblɔe ɖi ene la, Babilon va zu “anyiglãgo” mlɔeba. (Yeremya 51:37) Hebrigbenyala Jerome (ƒe alafa enelia M.Ŋ.) gblɔ be le ye ŋɔli la, Babilon nye adegbedeƒe si “lã ƒomevi ɖesiaɖe” ɖia tsa le.⁹ Babilon gakpɔtɔ nye dudo egbegbe.

Yesaya menɔ agbe kpɔ Babilon ƒe dudozuzu o. Gake du ma si nye du sesẽ kpɔ, si kple Baghdad si le Iraq egbea ƒe anyiehe la dome anye kilometa 80 la le ɖase ɖim numaƒomaƒoe le eƒe nyawo me vava ŋu be: “Womatso aƒe ɖe afima akpɔ o.” Ne wotrɔ asi le Babilon ƒe akpa aɖewo ŋu be wòanye nukpɔkpɔ na modzakatsaɖilawo la, adzro ame geɖe be woayi aɖakpɔe, gake be Babilon ƒe ‘dzidzimeviwo’ naganɔ anyi la, eya nu yi ɖikaa.—Yesaya 13:20; 14:22, 23.

Nyagblɔɖila Yesaya megblɔ eƒe nyawo ɖi gbadzaa ko be wòate ŋu asɔ ɖe etsɔme nudzɔdzɔ ɖesiaɖe nu o. Menye ŋutinyae wògbugbɔ ŋlɔ hã be wòadze abe nyagblɔɖi ene o. Bu nya sia ŋu kpɔ: Nukatae ameflula aɖe atsɔ eɖokui ade nya me ‘agblɔ’ nusi dzi mekpɔ ŋusẽ aɖeke kura ɖo o ‘ɖi’—be womagatso aƒe ɖe Babilon sesẽ la akpɔ gbeɖe o?

Biblia me kpɔɖeŋuwo dometɔ ɖeka koe Babilon ƒe anyidzedze ƒe ŋutinya sia nye.b Esi ame geɖe kpɔ alesi Biblia ƒe nyagblɔɖiwo vaa emee la, woxɔ edzi se be teƒe si kɔkɔ wu amegbetɔ gbɔ ye wòtso. Ðewohĩ ne mede ɖeke o hã àlɔ̃ ɖe edzi be edze be míabu nyagblɔɖigbalẽ sia ŋu. Kakaɖedzi le nu ɖeka sia ŋu: Vovototo gã aɖe le egbe etsɔmegblɔɖilawo ƒe nyagbɔgblɔ siwo doa viviti alo esiwo doa nu gã siwo gbɔ eme ŋugbe la kple Biblia me nyagblɔɖi siwo me kɔ, susu le wo me, eye wokuna ɖe nu ŋu tẽ la dome.

[Etenuŋɔŋlɔwo]

[Nya si ɖe dzesi si le axa 28]

Nyagblɔɖila siwo ƒe nyawo nyea nyateƒea tututue Biblia-ŋlɔlawo nye loo alo ameflula dzeayewoe wonye?

[Nɔnɔmetata si le axa 29]

Blema Babilon ƒe dudo