Agbalẽ Si Nyo Na Wòea?

Salomo gblɔ anye ƒe 3,000 enye esia be: “Agbalẽ geɖe wɔwɔ mekpɔa seƒeɖo o.” (Nyagblɔla 12:12) Nya ma gasɔ egbea abe alesi wònɔ ɣesiaɣi ene. Tsɔ kpe ɖe blemagbalẽ xoxo siwo wonya nyuie ŋu la, wogataa agbalẽ yeye akpe geɖe ƒe sia ƒe. Esi agbalẽ siwo me nàtia ɖe le axlẽ bɔ alea gbegbe la, nukata wògahiã be nàxlẽ Biblia?

AME geɖe xlẽa agbalẽ be yewoatsɔ aɖe modzakae loo alo be yewoasrɔ̃ nu le eme, alo woxlẽnɛ ɖe susu evea siaa ta. Ate ŋu anɔ alea le Biblia xexlẽ hã gome. Ate ŋu ade ame ƒe agbenɔnɔ dzi, eye exexlẽ agate ŋu aɖe modzaka na ame hã. Gake viɖe bubuwo gale Biblia xexlẽ ŋu wu emawo ko. Enye sidzedzexɔtsoƒe si tɔgbe meli o.—Nyagblɔla 12:9, 10.

Biblia ɖo nyabiabia siwo ŋu amewo dea ŋugble le tso gbaɖegbe ke ŋu—nyabiabia siwo ku ɖe míaƒe ɣeyiɣi siwo va yi, ɣeyiɣi si me míele fifia, kple míaƒe etsɔme ŋu. Ame geɖe biana be: Afikae míedzɔ tso? Taɖodzinu kae le agbe ŋu? Aleke míawɔ akpɔ dzidzɔ le agbe me? Ðe nusiwo me agbe le anɔ anyigba dzi ɖaa? Aleke etsɔme anɔ na mí?

Kpeɖodzi siwo katã ƒe nya míegblɔ ɖe afisia la ɖo kpe edzi kɔte be Biblia me nyawo nye nyateƒe eye wosɔ pɛpɛpɛ. Míedzro alesi eƒe aɖaŋuɖoɖo siwo sɔ ate ŋu akpe ɖe mía ŋui be míanya alesi míawɔ taɖodzinu nanɔ míaƒe agbe ŋu eye dzidzɔ nanɔ eme la me. Esi nya siwo ŋu wòɖo le agbe si míele fifia ŋu sɔ ta la, edze be míabu esiwo ŋu wòɖo le ɣeyiɣi siwo va yi ŋu kple eƒe nyagblɔɖi siwo ku ɖe etsɔme ŋu hã ŋuti nyuie.

Alesi Nàwɔ Wòaɖe Vi Geɖe Wu na Wò

Ame geɖe dze Biblia xexlẽ gɔme gake ɖeko wova tɔ esi wokpɔ be eƒe akpa aɖewo gɔmesese sesẽ. Ne edzɔ ɖe dziwò alea la, ke nanewo li nàwɔ si akpe ɖe ŋuwò.

Tia gɔmeɖeɖe si ŋu kakaɖedzi le, abe New World Translation of the Holy Scriptures la ene.a Ame aɖewo dzea exexlẽ gɔme tso nusi Nyanyuiawo gblɔ le Yesu ƒe agbenɔnɔ ŋu dzi, eƒe nufiafia siwo me nunya le, abe esiwo le Todzimawunya la me ene, si ɖee fia be enya nu tso amegbetɔ ƒe nɔnɔme ŋu tsitotsito eye egblɔ alesi míawɔ nu nadze edzi na mí le agbe me hã.—Kpɔ Mateo ta 5 vaseɖe 7.

Tsɔ kpe ɖe Biblia bliboa katã xexlẽ ŋu la, àsrɔ̃ nu geɖe ne èzã nusɔsrɔ̃mɔnu si nye Biblia la sɔsrɔ̃ ɖe emenyatiwo nu. Esɔsrɔ̃ alea bia be nàsrɔ̃ nusi Biblia gblɔ le nyati aɖe koŋ ŋu tsitotsito. Nusi nàsrɔ̃ le nusi tututu Biblia gblɔ le nyatiwo abe luʋɔ, dziƒo, anyigba, agbe, kple ku ene ŋu, kpakple le Mawu Fiaɖuƒea—nusi wònye kple nusi wògbɔna wɔwɔ ge—ŋu awɔ nuku na wò.b Yehowa Ðasefowo wɔa ɖoɖo ɖe Biblia sɔsrɔ̃ ɖe eƒe nyatiwo nu ŋu, eye wowɔa nusɔsrɔ̃ sia naneke maxɔmaxɔe. Àte ŋu abia eŋuti numeɖeɖewo ne èzã adrɛs si sɔ le axa 2 lia tsɔ ŋlɔ lɛta na agbalẽ sia talawo.

Esi ame geɖe lé ŋku ɖe kpeɖodziawo ŋu la, woƒo nya ta be Mawu, amesi ŋkɔ Ŋɔŋlɔawo yɔ be “Yehowa,” gbɔe Biblia tso. (Psalmo 83:19) Ðewohĩ matrɔ na wò be Mawu gbɔe Biblia tso o. Ke nukatae wò ŋutɔ màdzro eme akpɔ o? Míeka ɖe edzi be ne èsrɔ̃e, de ŋugble le eŋu, eye ɖewohĩ wò ŋutɔ nèkpɔ alesi eƒe nunya si ƒe asixɔxɔ nu meyina o la ɖe vi na wòe la, àva kpɔe be nyateƒee, agbalẽ si nyo na amesiamee Biblia nye, eye vevietɔ—enye agbalẽ si nyo na wò.

[Etenuŋɔŋlɔwo]