Ðe Nèbiana Gbe Sia Gbe Be, “Afi Ka Yehowa Le” Hã?

1, 2. (a) Aleke Yudatɔ siwo nɔ anyi le Yeremiya ŋɔli kple Mawu dome nɔ? (b) Anye nu kae wòle be Yudatɔ mawo nawɔ tso woƒe nɔnɔmea ŋu hafi?

YEREMIYAE nye ema le avi fam. Nu kae dzɔ? Agbe si ƒomevi nɔm Yuda dukɔa le kple nu siwo Mawu gblɔ nɛ be adzɔ ɖe wo dzi le etsɔme ye te ɖe edzi. Egblɔ be nenye yeƒe ta tsie wònye, eye yeƒe ŋkuwo aɖatsivudoe wonye la, anye ne yeafa avi zã kple keli. Esɔ be Yeremiya nafa konyi le dukɔa ƒe nuwɔnawo ta. (Yer. 8:23; 9:1, 2; xlẽ Yeremiya 8:20, 21.) Esi Yudatɔwo gbe toɖoɖo Yehowa hegbe eƒe sewo dzi wɔwɔ ta la, afɔku ava wo dzi.—Yer. 6:19; 9:13.

² Ke hã, nu si ko dim Yudatɔ mawo le be yewoase tso yewoƒe nunɔlawo gbɔe nye be woagblɔ na yewo be nu sia nu le edzi yim nyuie. Wometsɔ ɖeke le nya siwo Mawu gblɔ tso woƒe agbenɔnɔ ŋu me o. (Yer. 5:31; 6:14) Wosɔ kple dɔnɔ si le atikewɔla si agblɔ nya viviwo ɖe to me nɛ ahatsyɔ nu dɔ si lém wòle ƒe ŋkubiãnyanyenye dzi la dim. Ne èdze dɔ vevie la, ɖe madzɔ dzi na wò be woakpɔ dɔ si tututu lém nèle la adze sii bene woawɔ atike si sɔ la na wò kaba oa? Nu ma ƒomevie wòle be Yeremiya ŋɔlimetɔwo nawɔ ahadi ame si agblɔ ale si tututu woa kple Mawu dome gblẽe na wo hafi. Ðe wòle be woabia be: “Afi ka Yehowa le?”—Yer. 2:6, 8.

 3. (a) Anye ne nu kae Yudatɔwo awɔ si afia be wobia be, “Afi ka Yehowa le?” (b) Mɔ siwo dzi woato adi Yehowa dometɔ ɖeka ɖe?

³ Be Yudatɔ mawo nabia be “Afi ka Yehowa le?” hã la fia be woadi Mawu ƒe mɔfiame hafi awɔ nyametsotso ɖe sia ɖe, suewo kple gãwo siaa. Yudatɔawo mewɔe nenema ɣemaɣi o. Gake ne wova tsrɔ̃ Yerusalem eye woyi aboyo me le Babilon hetrɔ gbɔ la, ‘woadi Yehowa’ eye ‘woabia eta se.’ Esia awɔe be woake ɖe eŋu ahanya eƒe mɔwo. (Xlẽ Yeremiya 29:13, 14.) Aleke woadi Yehowae? Mɔ siwo dzi woato dometɔ ɖekae nye be woado gbe ɖa na Mawu tso dzi me ahadi eƒe mɔfiame. Nenemae Fia David wɔe. Egblɔ na Mawu be: “Yehowa, ɖe wò mɔwo fiam, eye nàfia wò toƒewom!” (Ps. 25:4) Se nya si Gbedodoɖasela la ŋutɔ to Yeremiya dzi gblɔ le Fia Zedekiya ƒe fiaɖuɖu ƒe ƒe ewolia me ɖa. Egblɔ be: “Yɔm, ekema matɔ na wò, eye maɖe nu gã kako, siwo mènya o la, afia wò.” (Yer. 33:3) Ne ɖe fia la kple dukɔ dzeaglã ma yɔ Mawu la, anye ne etɔ na wo hegblɔ nya ‘siwo womenya o’ la na wo, si nye be woatsrɔ̃ Yerusalem eye woagbugbɔe atso le ƒe 70 megbe.

4, 5. Mɔ bubu kawo dzie Yudatɔwo ate ŋu ato adi Yehowa?

⁴ Mɔ bubu si dzi Yudatɔ mawo ate ŋu ato adi Yehowae nye be woadzro nu siwo dzɔ va yi me ne woakpɔ ale si Yehowa wɔ nu ɖe eƒe amewo ŋui. Esia ana woaɖo ŋku ame siwo do ŋgɔ na wo ƒe nuwɔna siwo dze Mawu ŋu kple esiwo do dziku nɛ la dzi. Mose ƒe nuŋlɔɖiwo, Israel kple Yuda fiawo ƒe ŋutinya siwo Mawu ƒe gbɔgbɔ ʋã amewo woŋlɔ ɖi, kpakple ŋutinyagbalẽ bubu siwo ku ɖe fia mawo ŋu la nɔ wo si. Ne ɖe Yudatɔ siwo nɔ anyi le Yeremiya ŋɔli de ŋugble tso ŋutinya mawo ŋu heɖo to Mawu ƒe nyagblɔɖila vavãwo la, anye ne wose nu si tae wòle be woabia be “Afi ka Yehowa le?” hã gɔme.

⁵ Mɔ etɔ̃lia si dzi Yudatɔwo ate ŋu ato adi Yehowae nye be woasrɔ̃ nu tso nu siwo me woawo ŋutɔwo alo ame bubuwo to la me. Gake esia mefia be woanɔ nu sia nu tem kpɔ hafi anya be enyo alo menyo o, ke boŋ be woade ŋugble tso agbe si ƒomevi wonɔ va yi ŋu ahaɖo ŋku nu si Yehowa gblɔ tso eŋu dzi bene wòaɖe vi na wo. Ne ɖe wolé ŋku ɖe woƒe zɔzɔme ŋu la, anye ne wose ale si Mawu sena le eɖokui me tso woƒe nuwɔnawo ŋu gɔme.—Lod. 17:10.

 6. Aleke Hiob ƒe kpɔɖeŋua de dzi ƒo na wòe?

⁶ Azɔ mina míade ŋugble tso ale si míadi Yehowa egbeae ŋu. Hafi nàwɔ nyametsotso la, ɖe nèbiana ɣesiaɣi be, “Afi ka Yehowa le” hã? Ðewohĩ ame aɖewo agblɔ be yewomeɖoa ŋku edzi ɣesiaɣi biaa nya ma o. Ne ele alea le gowòme la, mele be dzi naɖe le ƒowò o. Nenema koe wòdzɔ ɖe blemafofo wɔnuteƒe Hiob hã dzi. Esi nɔnɔmeawo va sesẽ nɛ la, eva nɔ eɖokui ŋu bum fũu akpa. Eva hiã be Elihu naɖo afɔ afɔta nɛ be blibomademade gbɔe wòtso be míeɖoa ŋku edzi biana be, ‘Afi ka Mawu, mía Wɔla Gã la le?’ hã o. (Hiob 35:10) Elihu de dzi ƒo na Hiob be “[wòalé] ŋku ɖe Mawu ƒe nukunuwo ŋu!” (Hiob 37:14) Ehiã be Hiob nalé ŋku ɖe Yehowa ƒe asinudɔwɔwɔ siwo ƒo xlãe kple ale si Mawu wɔa nu ɖe amegbetɔwo ŋui ŋu. Nu siwo me Hiob ŋutɔ to kpe ɖe eŋu wòva se Yehowa ƒe mɔwo gɔme. Esi Hiob do dzi to fukpekpe siwo va edzi me hekpɔ ale si Yehowa kpɔ nyawo gbɔe vɔ la, egblɔ be: “Megblɔ nya, siwo gɔme nyemese o, kple nu siwo kɔ wum, eye nyemedze si wo o la. Wogblɔ nya le ŋuwò mese; ke azɔ la nye ŋkuwo kpɔ wò.”—Hiob 42:3, 5.

 7. Abe ale si wòdze le nɔnɔmetata si le axa 116 me ene la, nu ka mee míadzro le ta sia dzi yiyi me?

⁷ Ke Yeremiya ya ɖe? Nyagblɔɖila sia yi edzi di Yehowa eye wòke ɖe eŋu. Eƒe nɔnɔme to vovo na eŋɔlimetɔwo tɔ. Le ƒe geɖe siwo wòtsɔ subɔe me la, eyi edzi bia be: “Afi ka Yehowa le?” Le ta sia dzi yiyi me la, míadzro ale si Yeremiya ƒe kpɔɖeŋua akpe ɖe mía ŋu míato gbedodoɖa, ɖokuisinusɔsrɔ̃, kple ŋugbledede tso míawo ŋutɔ alo ame bubuwo ƒe nuteƒekpɔkpɔwo ŋu dzi adi Yehowa ahake ɖe eŋu la me.—1 Kron. 28:9.

 8. Nɔnɔme vovovo kawo ŋue Yeremiya do gbe ɖa na Mawu le?

⁸ Le ƒe siwo katã me Yeremiya subɔ abe Mawu teƒenɔla ene le Yuda la, eto gbedodoɖa vevie dzi di Yehowa. Esi wòhiã be wòaɖe gbeƒã gbedeasi si ŋu amewo mekpɔ dzidzɔ ɖo o, esi wòse le eɖokui me be yemagate ŋu ayi dɔa dzi o, kple esime mese nu si tae nanewo dzɔ gɔme o la, edo gbe ɖa bia Mawu ƒe kpekpeɖeŋu. Mawu ɖo toe, eye wòna mɔfiame si dzi wòazɔ ɖoe. Mina míadzro esia ƒe kpɔɖeŋu ʋɛ aɖewo me kpɔ.

 9. (a) Nya kawoe Yeremiya gblɔ na Yehowa le Yeremiya 15:15, 16, eye aleke Yehowa ɖo eŋui? (b) Nu ka tae wòle vevie be ne èle gbe dom ɖa la, nàɖe wò seselelãmewo agblɔ?

⁹ Gbe ɖeka esi Yeremiya nɔ gbeƒã ɖem Yehowa ƒe ʋɔnudrɔ̃gbedeasia la, ese le eɖokui me be ame sia ame kloe nɔ ɖiŋu dom na ye. Eya ta eyɔ Mawu be wòaɖo ŋku ye dzi. De ŋugble le nya siwo wògblɔ tso kpekpeɖeŋu si Mawu nae ŋu, le eƒe gbedodoɖa si le Yeremiya 15:15, 16 me ŋu kpɔ. (Xlẽe.) Yeremiya ɖe nu siwo do nuxaxa nɛ la gblɔ le gbedodoɖa ma me. Gake esi Mawu ƒe nyawo ɖo egbɔ eye wòmi wo le kpɔɖeŋunyagbɔgblɔ nu la, dzi dzɔe ale gbegbe! Yehowa kpe ɖe eŋu wòkpɔe be mɔnukpɔkpɔe wònye be woayɔ Mawu ƒe ŋkɔ ɖe ye ŋu eye be yeaɖe gbeƒã eƒe nya. Edze ƒãa be Yeremiya bia Yehowa ta se le nya sia me, eye Yehowa tɔ nɛ. Nu kae nèsrɔ̃ tso eme?

10. Esi nyagblɔɖila Yeremiya gblɔ be yemagate ŋu aƒo nu le Yehowa ƒe ŋkɔ me azɔ o la, aleke Mawu ɖo eŋu nɛ?

¹⁰ Ɣebubuɣi esi nunɔla Pasxur, Imer vi, ƒo Yeremiya la, Yeremiya gblɔ le gbedodoɖa me be yemagaƒo nu le Yehowa ƒe ŋkɔ me azɔ o. Aleke Mawu ɖo Yeremiya ƒe gbedodoɖaa ŋu nɛ? (Xlẽ Yeremiya 20:8, 9.) Biblia megblɔ be Mawu ɖo nya sia ŋu na Yeremiya tso dziƒo tẽe o. Gake Mawu ƒe nya va zu abe dzobibi nue wotu nu ɖo ɖe eƒe ƒuwo me ene, ɖeko wòaɖe gbeƒãe hafi avo. Ɛ̃, esi Yeremiya gblɔ eƒe dzimenyawo na Mawu eye wòna nu siwo wònya tso Eƒe lɔlɔ̃nu ŋu de dzi gbɔ nɛ la, esia ʋãe wòyi dɔ si Mawu de esi la dzi.

11, 12. Aleke woɖo Yeremiya ƒe nya si wòbia tso ale si wòdze abe ɖe nu dzea edzi na ame vɔ̃ɖiwo ene la ŋu nɛ?

¹¹ Esi Yeremiya kpɔe be ame vɔ̃ɖiwo ƒe mɔwo dzea edzi na wo la, eɖe fu nɛ vevie. (Xlẽ Yeremiya 12:1, 3.) Menye ɖe nyagblɔɖilaa tɔ gbe Yehowa ƒe dzɔdzɔenyenye o, ke boŋ nya siwo le fu ɖem nɛ ƒe ŋuɖoɖo ko dim wòle. Eƒe dzimenyawo gbɔgblɔ faa nenema ɖee fia be ƒomedodo sẽŋu aɖe nɔ woa kple Mawu dome abe vi kple tɔ si dome tsi metona o ene. Esi Yeremiya mese nu si tae Yudatɔ geɖewo nye ame vɔ̃ɖiwo vɔ tso, hafi nu nɔ edzi dzem na wo gɔme o ta koe wòbia nya mawo. Ðe Yeremiya xɔ ŋuɖoɖo si na eƒe dzi dze emea? Yehowa ka ɖe edzi nɛ be yele ame vɔ̃ɖiwo ho ge ɖa. (Yer. 12:14) Esi Yeremiya va se ale si Mawu gbɔna nya si ŋu wòdo gbe ɖa le gbɔ kpɔ gee gɔme la, eka ɖe Mawu ƒe dzɔdzɔenyenye dzi bliboe. Anɔ eme be esia na Yeremiya te ɖe Fofoa si le dziƒo la ŋu edziedzi le gbedodoɖa me hegblɔ eƒe dzimenya bubuwo nɛ.

¹² Esi Babilontɔwo va ɖe to ɖe Yerusalem le Zedekiya ƒe fiaɖuɖu ƒe nuwuwu lɔƒo la, Yeremiya gblɔ tso Yehowa ŋu be enye “ame si ƒe ŋkuwo le te ɖe amegbetɔviwo ƒe mɔwo katã ŋu, ne [wòawɔ] na ame sia ame le eƒe mɔwo kple eƒe nuwɔnawo ƒe kutsetse nu.” (Yer. 32:19) Yeremiya kpɔe dze sii be Yehowa lɔ̃ dzɔdzɔenyenye, be eléa ŋku ɖe nu si wɔm ame sia ame le ŋu, eye wòɖoa to gbe siwo esubɔlawo dona ɖa nɛ tso dzi me. Azɔ hã, Yehowa ana woakpɔ kpeɖodzi bubu geɖe be yexea fe na “ame sia ame le eƒe mɔwo kple eƒe nuwɔnawo ƒe kutsetse nu.”

13. Nu kae na nèka ɖe edzi be Mawu ƒe lɔlɔ̃nu ava eme?

¹³ Ðewohĩ ale si Mawu na eƒe lɔlɔ̃nu le eme vam egbea kple ale si wòana wòava eme le etsɔme le dzɔdzɔenyenye kple nunya me ƒe nya aɖeke meɖea fu na míawo ya o. Ke hã, aɖe vi na mí ne míedea ŋugble tso nu si me Yeremiya to ŋu hegblɔa ale si míesena le míaƒe dzi me na Yehowa le gbedodoɖa me. Míaƒe dzimenyawo gbɔgblɔ na Yehowa alea awɔe be míaka ɖe eyama dzi bliboe ahanɔ mɔ kpɔm be eƒe lɔlɔ̃nu ava eme godoo. Ne míese nu si tae nanewo le edzi yim ɖo alo ale si Mawu ƒe lɔlɔ̃nu le eme vam fifiae gɔme keŋkeŋ o hã la, míate ŋu atsɔ kakaɖedzi ado gbe ɖa nɛ ahagblẽ nyawo ɖe esi me. Yehowa ana eƒe lɔlɔ̃nu nava eme le ɣeyiɣi nyuitɔ dzi. Ema ƒe ŋugbee wòdo na mí, eye mele be míake ɖii o. Ele be míayi edzi abia be, “Afi ka Yehowa le?” si fia be míanɔ gbe dom ɖa ɣesiaɣi be wòana míase eƒe lɔlɔ̃nu gɔme ahakpɔ kpeɖodzi siwo ɖee fia be eƒe lɔlɔ̃nu le eme vam.—Hiob 36:5-7, 26.

14. Aleke míewɔ nya be Yeremiya wɔ numekuku tso Mawu ƒe amewo ƒe ŋutinyawo ŋu?

¹⁴ Yeremiya nya nyuie be ‘Yehowa ŋuti sidzedze’ xɔxɔ hã nye mɔ bubu si dzi yeato abia be, “Afi ka Yehowa le?” (Yer. 9:24) Edze ƒãa be esi Yeremiya nɔ agbalẽ siwo míeyɔna egbea be Fiawo Ƒe Agbalẽ Gbãtɔ kple Evelia me nyawo nu ƒom ƒu la, esrɔ̃ nu tso Mawu ƒe amewo ƒe ŋutinya ŋu, elabena eƒo nu tso “Salomo ƒe ŋutinyagbalẽ,” “Israel fiawo ƒe ŋutinyagbalẽ,” kple “Yuda fiawo ƒe ŋutinyagbalẽ” ŋu le Biblia-gbalẽ eve siawo me. (1 Fia. 11:41; 14:19; 15:7) Eya ta ese ale si Yehowa wɔ nu ɖe amewo ŋu le nɔnɔme vovovowo me la gɔme. Yeremiya te ŋu kpɔ nuwɔna siwo dzea Yehowa ŋu kple ale si wòbua amewo ƒe nyametsotsowoe dze sii. Anya wɔ numekuku le agbalẽ siwo Mawu ƒe gbɔgbɔ ʋã amewo woŋlɔ ɖi hã me. Agbalẽ siawo ƒe ɖewoe nye esiwo Mose, Yosua, Samuel, David, kple Salomo ŋlɔ. Ðikeke mele eme o be enya nu tso nyagblɔɖila siwo do ŋgɔ nɛ kple esiwo nɔ anyi le eƒe ŋkekea me hã ŋu. Vi kae ɖokuisinusɔsrɔ̃ wɔwɔ alea ɖe na Yeremiya?

15. Aleke numekukuwɔwɔ tso Eliya ƒe nyagblɔɖinya ŋu anya ɖe vi na Yeremiyae?

¹⁵ Yeremiya ŋlɔ nu tso Samaria Fia Axab kple srɔ̃a vɔ̃ɖi Izebel ŋu. Nya siwo wòŋlɔ tso Izebel ŋu dometɔ aɖee nye be Eliya gblɔe ɖi be avuwo aɖu eƒe lã le Yezreel-nyigba dzi. (1 Fia. 21:23) Ðo ŋku edzi be le ƒe 18 aɖewo megbe la, wotu asi Izebel ƒu anyi to fesre nu, Yehu ƒe sɔwo fanyae, eye avuwo va ɖui abe ale si Yeremiya ŋlɔe ɖi ene. (2 Fia. 9:31-37) Numekuku si Yeremiya wɔ tso Eliya ƒe nyagblɔɖia kple ale si wòva eme pɛpɛpɛe ŋu anya do ŋusẽ eƒe xɔse ɖe Mawu ƒe ŋugbedodowo ŋu. Nyateƒee, nu siwo Yehowa wɔ va yi ŋu nyawo sɔsrɔ̃ do ŋusẽ Yeremiya wòte ŋu yi eƒe subɔsubɔdɔa dzi.

16, 17. Nu kae nèsusu be eyae de dzi ƒo na Yeremiya wòyi edzi xlɔ̃ nu fia vɔ̃ɖiwo le eƒe ŋkekea me?

¹⁶ Na míakpɔ kpɔɖeŋu bubu ɖa. Togbɔ be woti Yeremiya yome hã la, nu kae nèsusu be anya kpe ɖe eŋu wòyi edzi xlɔ̃ nu fia vɔ̃ɖiwo abe Yoyakim kple Zedekiya ene? Míenya be nu vevitɔ si kpe ɖe Yeremiya ŋue nye be Yehowa tsɔe wɔ “du sesẽ, gasɔti kple akɔbligli” ɖe Yuda fiawo ŋu. (Yer. 1:18, 19) Gake mele be míaŋlɔ nyateƒenya sia be o: Yeremiya ŋutɔ hã wɔ numekuku deto tso Yuda kple Israel fia siwo do ŋgɔ ƒe dziɖuɖuwo ŋu. Egblɔ le eƒe nuŋlɔɖiawo me be Manase ɖi “vɔsamlekpuiwo na dziƒonuwo katã ɖe Yehowa ƒe aƒe la ƒe xɔxɔnuwo kple eve,” etɔ dzo eya ŋutɔ via tsɔ sa vɔe, eye wòkɔ ʋu maɖifɔ geɖe ŋutɔ ɖi. (2 Fia. 21:1-7, 16; xlẽ Yeremiya 15:4.) Ke hã, Yeremiya anya see be esi Manase va bɔbɔ eɖokui hedo gbe ɖa na Yehowa atraɖii la, ‘Yehowa se eƒe kokoƒoƒo,’ eye wògbugbɔe ɖo fiaɖuƒea nu.—Xlẽ 2 Kronika 33:12, 13.

¹⁷ Yeremiya megblɔ nya aɖeke tso nublanui si Yehowa kpɔ na Manase ŋu o. Gake ɖewohĩ Manase ku mede ƒe 15 hafi woɖo Yeremiya nyagblɔɖilae o. Eya ta Yeremiya anya se nu si dzɔ esime Manase trɔ tso eƒe mɔ vɔ̃wo dzi. Numekuku wɔwɔ tso Manase ƒe nu vɔ̃ɖi wɔwɔ kple dzimetɔtrɔ ŋu anya kpe ɖe Yeremiya ŋu wòkpɔe be aɖe vi be yeaƒoe ɖe fiawo, abe Zedekiya ene, nu woadi Yehowa ƒe nublanuikpɔkpɔ kple amenuveve. Togbɔ be Manase xɔ ŋkɔ le trɔ̃subɔsubɔ kple ʋukɔkɔɖi me ŋutɔ hã la, etrɔ dzi me eye wokpɔ nublanui nɛ. Nenye wòe nye Yeremiya ɖe, ɖe Manase ŋu nya siawo made dzi ƒo na wò nàyi edzi awɔ subɔsubɔdɔa le fia vɔ̃ɖi bubuwo ƒe dziɖuɣi oa?

18. Nu kae Yeremiya anya srɔ̃ tso nu si dzɔ ɖe Uriya dzi me, eye nu ka tae nèɖo eŋu nenema?

¹⁸ Ðikeke mele eme o be Yeremiya srɔ̃ nu tso eŋɔlimetɔwo ƒe nuwɔnawo kple wo me tsonu vovovoawo me. Wo dometɔ ɖekae nye nyagblɔɖila Uriya, ame si gblɔ nya ɖi ɖe Yerusalem kple Yuda ŋu le Yoyakim ƒe fiaɖuɣi. Ke hã, esi Uriya vɔ̃ Fia Yoyakim ta la, esi yi Egipte. Emegbe fia la dɔ ame woyi ɖalé Uriya tso Egipte gbɔe, eye wòna wowui. (Yer. 26:20-23) Ðe nèsusu be Yeremiya srɔ̃ nane tso nu si dzɔ ɖe Uriya dzi mea? Nyateƒe si wònye be Yeremiya mevɔ̃ hedzudzɔ nuxɔxlɔ̃ Yudatɔawo tso tsɔtsrɔ̃ si gbɔna ŋu o, eye wòwɔ esia le gbedoxɔa me gɔ̃ hã la nye kpeɖodzi be anya srɔ̃ nu tso eme. Yeremiya yi edzi lé dzi ɖe ƒo, eye Yehowa megblẽe ɖi o. Ðikeke mele eme o be Mawue ʋã Axikam, Safan vi la, wòxɔ Yeremiya ɖe agbe le eƒe dzinɔameƒoa ta.—Yer. 26:24.

19. Nɔnɔme kae Yeremiya anya de dzesii le Yehowa ŋu le esi wòdɔ nyagblɔɖilawo ɖe eƒe dukɔa enuenu ta?

¹⁹ Yeremiya srɔ̃ nu tso ale si Yehowa zãe wòxlɔ̃ nu Eƒe amewo hã me. Le Fia Yoyakim ƒe dziɖuɖu ƒe ƒe enelia me la, Yehowa gblɔ na Yeremiya be wòaŋlɔ yeƒe nya siwo katã wògblɔ ɖi tso Yosiya ŋɔli va se ɖe ɣemaɣi la ɖe agbalẽ me. Nu ka tae Mawu bia nu sia tso esi? Susuae nye be wòade dzi ƒo na amewo katã be woatrɔ tso woƒe mɔ vɔ̃wo dzi, ne woatsɔ woƒe nu vɔ̃wo ake wo. (Xlẽ Yeremiya 36:1-3.) Yeremiya fɔna ŋdi kanya ɖagblɔa Mawu ƒe nuxlɔ̃amenya na dukɔa, eye wòɖea kuku na wo gɔ̃ hã be woaɖe asi le woƒe ŋunyɔnuwo ŋu. (Yer. 44:4) Ðe medze ƒãa be dɔ sia si Yeremiya ŋutɔ wɔ la na wòva kpɔe dze sii be esi Mawu ƒe dɔme trɔna ɖe Eƒe amewo ŋu tae wòdɔa nyagblɔɖilawo ɖe wo gbɔ ɖo oa? Eye ɖe esia makpe ɖe Yeremiya ŋutɔ hã ŋu wòatu dɔmetɔtrɔ ɖo oa? (2 Kron. 36:15) Ɛ̃, àte ŋu ase nu si tae esi Yeremiya tsi agbe le Yerusalem tsrɔ̃ɣi la, wòte ŋu gblɔ nya siwo gbɔna la gɔme azɔ: “Yehowa ƒe amenuveve nu metso o, eye eƒe nublanuikpɔkpɔ mese ɖo o; ke boŋ ele yeye ŋdi sia ŋdi.”—Kony. 3:22, 23.

20. Aleke míate ŋu asrɔ̃ Yeremiya ƒe kpɔɖeŋu le Yehowa didi me?

²⁰ Hafi nàwɔ nyametsotso siwo dzea ŋgɔ wò gbe sia gbe la, ɖe nèbiana be, “Afi ka Yehowa le” hã, si fia be nàde ŋugble tso nu si nye Mawu ƒe lɔlɔ̃nu ŋu gbã? (Yer. 2:6-8) Yeremiya mewɔ nu abe eŋɔlimetɔwo ene o, ke boŋ edia Ŋusẽkatãtɔ la ƒe kpekpeɖeŋu ɣesiaɣi be yeanya mɔ si dzi wòle be yeato. Nunya le eme be hafi míawɔ nyametsotso ɖe sia ɖe la, míadi Yehowa ƒe lɔlɔ̃nu gbã, abe ale si Yeremiya wɔe ene.

21. Aleke gbedodoɖa ate ŋu akpe ɖe ŋuwò le subɔsubɔdɔa wɔwɔ me?

²¹ Menye nya gã aɖe alo tɔtrɔ vevi aɖe ŋuti nyametsotso wɔɣi koe wòhiã be míadi Yehowa o. Le kpɔɖeŋu me, ne èwɔ ɖoɖo be yeayi gbeadzi le ŋkeke aɖe dzi la, ɖe wòle be nàdi Yehowa? Ðewohĩ esi nèfɔ la, yame ƒe nɔnɔme mede ame dzi o. Ate ŋu anɔ eme hã be anyigbamama si me miawɔ tso aƒe me yi aƒe me dɔa le gbe ma gbe la nye esi me miewɔ dɔ le ʋuu glo. Alo èɖo ŋku edzi be ame aɖewo le anyigbamama ma me siwo tsɔa nanewo doa taflatsɛ na nyaa sese, eye bubuwo hã daa gbe ɖe ame gbɔ. Ðe nàte ŋu ado gbe ɖa ŋdi ma abia be, “Afi ka Yehowa le” hã? Esia akpe ɖe ŋuwò nàkpɔ asixɔxɔ si le gbedeasia ŋu adze sii, eye wòaɖo ŋku edzi na wò be Mawu ƒe lɔlɔ̃nue wònye be nàɖe gbeƒã gbedeasi ma. Esia ana nàse le ɖokuiwò me be Yehowa ƒe nyaa zu dzidzɔ kple aseyetsotso na ye, abe ale si wònɔ le Yeremiya gome ene. (Yer. 15:16, 20) Ne èyi gbeadzi gbe ma gbe eye nèdo go ame aɖe wòda gbe ɖe gbɔwò alo do ŋɔdzi na wò gɔ̃ hã la, àgate ŋu ado gbe ɖa agblɔ ale si nèse le ɖokuiwò me na Mawu. Àwɔea? Ðo ŋkui be Mawu ate ŋu ana eƒe gbɔgbɔ kɔkɔea wò bene nàwɔ nu si sɔ le nɔnɔme ma me, eye didi vevie si le mewò ɖe gbeƒãɖeɖedɔa wɔwɔ ŋu ana nàɖu vɔvɔ̃ dzi.—Luka 12:11, 12.

22. Aleke wòadzɔe be Mawu maɖo to ame aɖewo ƒe gbedodoɖa o?

²² Anyo hã be nànya be wò ŋutɔ wò nuwɔnawo àte ŋu axe mɔ na wò gbedodoɖawo ɣeaɖewoɣi. (Xlẽ Konyifahawo 3:44.) Yehowa meɖo to Yudatɔ siwo dze aglã ‘heɖe to ɖa le eƒe nya ŋu,’ eye woyi edzi wɔ nu tovowo la ƒe gbedodoɖawo o. (Lod. 28:9) Yeremiya anya kpɔ nufiame si le eme dze sii, eye ele be míawo hã míakpɔe adze sii be: Ne ame aɖe ƒe nuwɔna mesɔ kple eƒe gbedodoɖawo o la, ate ɖe Mawu dzi, eye esia ate ŋu awɔe be Mawu maɖo to eƒe gbedodoɖawo o. Eya ta ele vevie be míakpɔ nyuie be míagawɔ naneke wòate ɖe Mawu dzi o.

23, 24. (a) Nu vevi kae wòle be míawɔ be míanya Yehowa ƒe lɔlɔ̃nu? (b) Aleke nàwɔ ɖokuisinusɔsrɔ̃e be wòaɖe vi geɖe na wò?

²³ Hekpe ɖe gbedodoɖa abia Yehowa ƒe mɔfiame ŋu la, ele be míanɔ ɖokuisinusɔsrɔ̃ hã wɔm, elabena enye mɔ vevi bubu si dzi míato anya nu si nye Yehowa ƒe lɔlɔ̃nu. Le go sia me la, mía tɔ nyo wu Yeremiya tɔ. Biblia bliboa le míawo ya si egbea. Abe ale si ko Yeremiya wɔ numekuku tsitotsito esi Mawu ƒe gbɔgbɔ ʋãe be wòaŋlɔ nu tso nu siwo dzɔ va yi ŋu ene la, wò hã àte ŋu awɔ numekuku le Mawu ƒe Nyaa me ahadi eƒe mɔfiame. Esia afia be nèle biabiam be, “Afi ka Yehowa le?” Nusɔsrɔ̃ tso Mawu ƒe lɔlɔ̃nu ŋu ana nàɖo ŋu ɖe eŋu, eye àva nɔ “abe ati, si wodo ɖe tɔ to, eye wòɖe ke ɖe tɔʋu ŋu la ene.”—Xlẽ Yeremiya 17:5-8.

²⁴ Ne èle Ŋɔŋlɔ Kɔkɔeawo xlẽm hele ŋugble dem tso eŋu la, dze agbagba nàkpɔ nu si Yehowa adi be nàwɔ le nɔnɔme vovovowo me adze sii. Àte ŋu ade dzesi gɔmeɖose siwo dzi nàdi be yeaɖo ŋkui emegbe ahanɔ agbe ɖe wo nu. Ne èle blema nudzɔdzɔwo, Mawu ƒe sewo kple gɔmeɖosewo, kpakple nuxlɔ̃amenya bubu siwo le Mawu ƒe Nyaa me xlẽm la, kpɔe ɖa be aleke woakpe ɖe ŋuwò le gbe sia gbe nyametsotsowo wɔwɔ me hã. Yehowa ate ŋu ato eƒe Nyaa dzi ana nàkpɔ ale si nàwɔ anɔ te ɖe kuxi sesẽwo kura gɔ̃ hã nu la adze sii wòanye wò biabia be “Afi ka Yehowa le?” ƒe ŋuɖoɖo. Esia awɔe be nàva ke ɖe “nu gã kako, siwo mènya o la” ŋu le Biblia me, alo àva se wo gɔme nyuie wu.—Yer. 33:3.

25, 26. Aleke míawo ŋutɔ alo ame bubuwo ƒe nuteƒekpɔkpɔwo ate ŋu aɖe vi na míi?

²⁵ Azɔ hã, ŋugbledede tso nu siwo teƒe nèkpɔ le agbe me ŋu aɖe vi na wò. Le kpɔɖeŋu me, ɖewohĩ ènya ame ʋɛ aɖewo siwo va dzudzɔ ŋuɖoɖo ɖe Yehowa ŋu, abe ale si wònɔ le Uriya gome ene. (2 Tim. 4:10) Nusɔsrɔ̃ tso nu si dzɔ ɖe wo dzi me ana nàƒo asa na nɔnɔme ma. Nɔ ŋku ɖom ale si Yehowa vea nuwòe la dzi edziedzi abe ale si ko Yeremiya hã kpɔ ŋudzedze ɖe Mawu ƒe nublanuikpɔkpɔ kple dɔmetɔtrɔ ŋui ene. Ne èle nɔnɔme sesẽwo me tom gɔ̃ hã la, mègasusui gbeɖe be Dziƒoʋĩtɔ la metsɔ ɖeke le eme na ye o. Etsɔa ɖe le eme na wò abe ale si ko wòtsɔ ɖe le eme na Yeremiya ene.

²⁶ Ne èdea ŋugble tso ale si Yehowa wɔa nu ɖe amewo ŋui hã ŋu la, àkpɔe be etoa mɔ vovovowo dzi fiaa mɔ mí gbe sia gbe. Le kpɔɖeŋu me, mía nɔvinyɔnu aɖe si le Japan, si ŋkɔe nye Aki, va se le eɖokui me be viɖe boo aɖeke mele ye ŋu le Mawu ŋkume o. Gbe ɖeka esi woa kple nutome sue dzikpɔla aɖe srɔ̃ wole gbeadzi la, egblɔ nɛ be: “Ðeko wòwɔ nam abe Yehowa le klalo be yeatum aƒu gbe tso eƒe nu me ene, gake meku ɖe eƒe nuyi ŋu sesĩe hele kuku ɖem nɛ be wòagana ɣeyiɣi vi aɖem.” Nutome sue dzikpɔla srɔ̃a kpɔ eƒe mo dũu hegblɔ nɛ be: “Nye ya nyemekpɔe be Kristotɔ yɔyrɔe nènye kura o!” Aki de ŋugble tso nutome sue dzikpɔla srɔ̃a ƒe dzideƒonya sia ŋu ɣeyiɣi didi aɖe. Eva kpɔe be naneke meli si fia be Yehowa bua ye be yenye Kristotɔ yɔyrɔe o nyateƒe. Emegbe Aki do gbe ɖa na Yehowa be: “Ðom ɖe afi sia afi si nèlɔ̃. Mawɔ dɔ sia dɔ si nàde asi nam.” Eteƒe medidi o, eɖi tsa yi dukɔ bubu aɖe me. Eva ke ɖe Japan gbedolawo ƒe ƒuƒoƒo sue aɖe ŋu le afi ma, si hiã ame aɖe si nya gbe ma dodo be wòana kpekpeɖeŋu wo. Azɔ hã, afi mae wodzi Aki le, eya ta enɔ bɔbɔe nɛ be wòaʋu ayi. Gake afi ka tututue wòava nɔ? Nɔvinyɔnu aɖe ƒe vinyɔnu ʋu yi aƒe bubu me teti koe nye ema, ale wòtsɔ via ƒe xɔa na Aki be wòanɔ eme. Ðeko nuwo va sɔ ɖe enu nɛ ta. Aki ƒo nya ta be: “Yehowa ŋutɔ koe le mɔ tam nam.”

27. Nu ka tae wòle be míabia be, “Afi ka Yehowa le?” hafi awɔ nyametsotso ɖe sia ɖe?

²⁷ Mía nɔviŋutsu kple nɔvinyɔnu geɖe ate ŋu agblɔ nuteƒekpɔkpɔ aɖewo siwo ɖo kpe edzi be Mawu fia mɔ wo, ɖewohĩ to Biblia xexlẽ alo ɖokuisinusɔsrɔ̃ dzi. Ðewohĩ eva eme na wò ŋutɔ hã nenema kpɔ. Ele be nuteƒekpɔkpɔ mawo nana mia kple Yehowa dome ƒomedodoa me nasẽ ɖe edzi eye wòaʋã wò be nànɔ tetem ɖe eŋu edziedzi le gbedodoɖa me. Kakaɖedzi nenɔ asiwò be ne èbiana gbe sia gbe be, “Afi ka Yehowa le?” hã la, afia eƒe mɔwo wò.—Yes. 30:21.