Nyabiabia Siwo Tso Exlẽlawo Gbɔ

Eʋegbe Biblia yɔ Kristotɔ amesiaminawo le Petro I, 2:9 be “dzidzime tiatia.” Ðe wòle be esia nakpɔ ŋusẽ ɖe alesi míase alesi Yesu zã nya “dzidzime” le Mateo 24:34 gɔme la dzia?

Nya “dzidzime” dze le nyagbɔgblɔ evea siaa me le gɔmeɖeɖe aɖewo me. Le Eʋegbe Biblia me la, apostolo Petro ŋlɔe be: “Miawoe nye dzidzime tiatia la, fia nunɔlanyenye, dukɔ kɔkɔe, dukɔ, si nye Mawu ŋutɔ tɔ, bene miaɖe gbeƒã amesi yɔ mi tso viviti me va ye ŋutɔ ƒe nukukekeli gbɔ la, ƒe nutsuwɔwɔwo afia.” Eye Yesu gblɔe ɖi be: “Vavã mele egblɔm na mi bena: “Dzidzime sia nu mele yiyi ge, vaseɖe esime nusiawo katã nava ve me o.”—Petro I, 2:9; Mateo 24:34.

Helagbe me nya geʹnos ye apostolo Petro zã le nyagbɔgblɔ gbãtɔa me, gake Yesu ya zã ge·ne·aʹ le etɔ me. Helagbe me nya eve siawo ade wo nɔewo ɖi ge, eye agunu ɖekae le wo si; gake nya vovovo evee wonye eye woƒe gɔmesese hã to vovo. New World Translation of the Holy Scriptures—With References gblɔ le Petro I, 2:9 ƒe etenuŋɔŋlɔ me be: “‘Ameƒomevi.’ Helagbe, geʹnos; to vovo na ge·ne·aʹ, ‘dzidzime,’ si le Mt 24:34.” Woŋlɔ etenuŋɔŋlɔ bubu si sɔ kple esia ɖe Mateo 24:34 ŋu.

Abe alesi etenuŋɔŋlɔ mawo fia ene la, esɔ be woɖe geʹnos gɔme le Eŋlisigbe me be “race” (Eʋegbe, ameƒomevi) abe alesi wòdze le Eŋlisigbe me gɔmeɖeɖe geɖe mee ene. Le Petro I, 2:9 la, Kristotɔ amesiamina siwo si dziƒomɔkpɔkpɔ le ŋue Petro zã nyagblɔɖi si le Yesaya 61:6 ɖo. Dukɔ kple to geɖewo mee amesiawo tso, gake esi wova zu gbɔgbɔ me Israel me tɔwo ko la, womegatsɔa dukɔmevinyenye wɔa dɔe o. (Romatɔwo 10:12; Galatiatɔwo 3:28, 29; 6:16; Nyaɖeɖefia 5:9, 10) Petro ƒo nu tso wo ŋu le gbɔgbɔ me gɔmesese nu be wozu ƒuƒoƒo tɔxɛ—“dzidzime tiatia la, fia nunɔlanyenye, dukɔ kɔkɔe, dukɔ, si nye Mawu ŋutɔ tɔ.”

Gake nya ge·ne·aʹ ye dze le Yesu ƒe nya siwo le Mateo 24:34 me le Helagbe me ŋɔŋlɔa me. Ame geɖe de dzesii be menye “ameƒomevi” aɖekee Yesu wɔnɛ o, ke amesiwo le agbe le ɣeyiɣi aɖe mee wòwɔnɛ.

Ƒe alafa ɖeka kloe nye si va yi la, Charles T. Russell, Gbetakpɔxɔ Habɔbɔa ƒe zimenɔla gbãtɔ, na esia me kɔ esi wòŋlɔ be: “Togbɔ be woate ŋu agblɔ be agunu alo dzɔtsoƒe ɖekae le nya ‘dzidzime’ kple ‘ameƒomevi’ si hã la, womesɔ o; eye nya eveawo toa vovo kura le alesi wozã wo le Ŋɔŋlɔawo mee nu. . . . Wogblɔ le nyagblɔɖi sia ŋuti nuŋlɔɖi etɔ̃awo katã me be mía Aƒetɔ la zã Helagbe me nya (genea) si to vovo kura si mefia ameƒomevi o, gake gɔmesese ɖekae le wo kple Eŋlisigbe me nya si wozã na dzidzime ŋu. Helagbe me nya la (genea) zazã le teƒe bubuwo ɖo kpe edzi be menye ameƒomevi ƒe gɔmesese nue wozãe ɖo o, ke amesiwo le agbe le ɣeyiɣi ɖeka me ŋue wozãe ɖo.”—The Day of Vengeance, axa 602-3.

Nyitsɔ laa ko la, A Handbook on the Gospel of Matthew (ƒe 1988) si ŋu wotrɔ asi le na Biblia-gɔmeɖelawo la gblɔ be: “[New International Version] ɖe dzidzime sia gɔme le nya la ŋutɔŋutɔ nu, gake woŋlɔ etenuŋɔŋlɔ kpe ɖe eŋu be, ‘Alo ameƒomevi.’ Eye Nubabla Yeyea ŋuti nunyala aɖe xɔe se be ‘menye dzidzime gbãtɔ si va ɖe Yesu yome koe Mateo wɔnɛ o ke Yudatɔwo ƒe dzidzime siwo katã gbee la hãe.’ Gake gbeŋutiɖaseɖiɖi aɖeke meli si ɖo kpe nyataƒoƒo eve siawo ƒe ɖeke dzi o, eye ele be woaɖe asi le wo ŋu be wonye agbagbadzedze be woade axa na eƒe gɔmesese si dze kɔte la. Le nɔnɔme si me wozãe le gbã me la, amesiwo nɔ anyi le Yesu ƒe ɣeyiɣia me ɖeɖeko ŋue wòku ɖo.”

Abe alesi míedzro eme le axa 10 vaseɖe 15 ene la, Yudatɔwo ƒe dzidzime si nɔ anyi le Yesu ƒe ɣeyiɣia me, eŋɔlimetɔ siwo gbee lae wòbu fɔe. (Luka 9:41; 11:32; 17:25) Ŋkɔnyaɖɔnya siwo nye “dzidzime vɔ̃ɖi wɔahasi,” “dzidzime maxɔse kple dzidzime, si tro kpaɖikpaɖi,” “dzidzime wɔahasi kple dzidzime wɔnuvɔ̃” ye wòzã zi geɖe tsɔ ƒo nu tso dzidzime ma ŋui. ( Mateo 12:39; 17:17; Marko 8:38) Zi mamletɔ si Yesu zã nya “dzidzime” la, enɔ Amitoa dzi kple apostolo ene. (Marko 13:3) Ame mawo siwo wometsɔ gbɔgbɔ si ami na haɖe o eye womele Kristo-hamea me o la menye “dzidzime” alo ameƒomevi aɖe me tɔwo kura o. Gake wonya nyuie be Yesu zã nya “dzidzime” na eŋɔlimetɔwo. Eyata woanya nusi nɔ susu me nɛ esime wòzã nya “dzidzime sia” zi mamletɔ.a Apostolo Petro si nɔ eteƒe la xlɔ̃ nu Yudatɔwo emegbe be: “Mina woaɖe mi tso dzidzime gɔglɔ̃ sia me!”—Dɔwɔwɔwo 2:40.

Míeta eŋuti kpeɖodziwo zi geɖe be nu geɖe siwo Yesu gblɔ ɖi le mawunya sia me (abe aʋawɔwɔwo, anyigbaʋuʋuwo, kple dɔwuame ene) va eme tso ɣesiɣi wògblɔ nyagblɔɖia kple Yerusalem ƒe tsɔtsrɔ̃ le ƒe 70 M.Ŋ. dome. Geɖe va eme, gake menye wo katãe o. Le kpɔɖeŋu me, kpeɖodzi aɖeke meli si fia be esi Romatɔwo dze Yerusalem dzi (ƒe 66-70 M.Ŋ.) megbe la, “Amegbetɔvi la ƒe dzesi” la do si na “anyigba dzi ƒomeawo katã” fa konyi o. (Mateo 24:30) Esia ta emevava gbãtɔ koe wòle be nyagblɔɖia ƒe akpa ma si va eme le ƒe 33 M.Ŋ. kple ƒe 70 M.Ŋ. la nanye, ke menye emevava keŋkeŋ alo esi lolo wu si Yesu wɔnɛ lae o.

G. A. Williamson ŋlɔ ɖe Josephus ƒe agbalẽ The Jewish War si gɔme wòɖe ƒe ŋgɔdonya me be: “Mateo gblɔ na mí be nya evee nusrɔ̃lawo bia [Yesu]—Gbedoxɔa ƒe tsɔtsrɔ̃ kple Eya ŋutɔ ƒe vava mamletɔ—eye ŋuɖoɖo evee Wòna wo, eƒe akpa gbãtɔ gblɔ nudzɔdzɔ siwo Josephus ƒe nyawo aɖe fia tsitotsito la ɖi nyuie.”

Ẽ, edze ƒã be le emevava gbãtɔ me la, “dzidzime sia” fia nu ma ke si wòfia le ɣeyiɣi bubuwo me—Yudatɔ dzimaxɔsetɔ siwo nɔ anyi le ɣeyiɣi ma me ƒe dzidzime. “Dzidzime” ma nu mayi ne nusiwo Yesu gblɔ ɖi meva wo dzi o. Abe alesi Williamson gblɔe ene la, nyagblɔɖi sia va eme le ƒe siwo do ŋgɔ na Yerusalem ƒe tsɔtsrɔ̃ me abe alesi eteƒekpɔla ŋutinyaŋlɔla Josephus ŋlɔ nu tso eŋui ene.

Le susu sia nu la, “dzidzime sia” afia amesiwo le agbe le ɣeyiɣi ɖeka me le emevava evelia alo esi lolo wu hã me. Abe alesi nyati si dze egɔme tso axa 16 gblɔe ene la, mele be míaƒo nya ta be ƒe xexlẽme ɖoɖi aɖee Yesu wɔnɛ be “dzidzime” o.

Ke woate ŋu agblɔ nya vevi eve le ɣeyiɣi ɖesiaɖe si fia “dzidzime” ŋu. (1) Womate ŋu abu amewo ƒe dzidzime be enye ɣeyiɣi ƒe ƒe xexlẽme ɖoɖi aɖe, abe alesi wobua ɣeyiɣi ɖoɖi siwo fia ƒe xexlẽme aɖe (ƒe ewo alo ƒe alafa) ene o. (2) Ne wotsɔe sɔ kple ɣeyiɣi bubuwo la, ɣeyiɣi kpui aɖe koe dzidzime ɖeka me tɔwo nɔa anyi, womenɔa anyi ɣeyiɣi didi o.

Le susu sia ta esi apostoloawo see Yesu ƒo nu tso “dzidzime sia” ŋu la, nukae woasusu? Togbɔ be nudzɔdzɔa nyanya kpe ɖe míawo ya ŋu míenya be Yerusalem ƒe tsɔtsrɔ̃ le “xaxa gã” la me va le ƒe 37 megbe hã la, apostoloawo menyae nenema esi Yesu gblɔe o. Ke boŋ eƒe nuƒoƒo tso “dzidzime” ŋu anya na woase egɔme be amesiwo le agbe le ɣeyiɣi kpui aɖe mee wòwɔnɛ, ke menye ɣeyiɣi didi aɖe o. Nenema ke wòle le míawo hã gome. Eyata aleke gbegbe nya siwo Yesu gblɔ ɖe eyome sɔ enye si be: “Le ŋkeke ma kple gaƒoƒo ma ŋuti la, ame aɖeke menyae o; mawudɔla, siwo le dziƒowo, kple Vi la hã menyae o, negbe Fofonye ɖeka ko. . . . Eyaŋuti miawo hã misu te; elabena Amegbetɔvi la ava le gaƒoƒo, si ŋuti miebu o la me.”—Mateo 24:36, 44.

[Etenuŋɔŋlɔ]