Woxɔ Wo Ðe Agbe Tso Xaxa Gã La Me
“Amesiawo nye amesiwo do go tso xaxa gã la me, eye wonyã woƒe awuwo, eye wowɔ wo ɣie le alẽvi la ƒe ʋu la me.”—NYAÐEÐEFIA 7:14.
1. Amekawoe ado dzaa na amesiwo woafɔ ɖe tsitre le anyigba dzi tsitretsitsia me?
NE WOFƆ ame miliɔn geɖe ɖe tsitre le ‘ame dzɔdzɔewo kple ame madzɔmadzɔwo ƒe tsitretsitsia’ me la, womafɔ wo va anyigba ƒuƒlu dzi o. (Dɔwɔwɔwo 24:15) Woafɔ wo ɖe teƒe dzeaniwo siwo ŋu wotrɔ asi le eye woakpɔe be wodzra nɔƒe, nudodo, kple nuɖuɖu geɖe ɖo na yewo. Amekawoe adzra nusiawo katã ɖo na wo? Edze ƒã be ame aɖewo anɔ xexe yeyea me hafi anyigba dzi tsitretsitsi la nadze egɔme. Amekawoe? Biblia ɖee fia be woanye agbetsilawo le xaxa gã si gbɔna la me. Ðikeke mele eme o be esia nye Biblia ƒe nufiafia siwo katã doa dzidzɔ na ame wu la dometɔ ɖeka—be woaxɔ anukwareɖila aɖewo ɖe agbe tso xaxa gã la me eye womaku akpɔ o. Woɖo kpe mɔkpɔkpɔ sia ƒe nyateƒenyenye dzi nyuie le Ŋɔŋlɔ Kɔkɔeawo me.
Abe Alesi Noa ƒe Ŋkekeawo Nɔ Ene
2, 3. (a) Aleke wotsɔ Noa ƒe ŋkekeawo sɔ kple míaƒe ɣeyiɣiae? (b) Nukae Noa kple eƒe ƒomea ƒe agbetsitsi le Tsiɖɔɖɔa me fia?
2 Le Mateo 24:37-39 la, Yesu Kristo tsɔ ŋkeke mamle siwo me míele fifia la sɔ kple Noa ƒe ŋkekeawo. Egblɔ be: “Sigbe alesi Noa ƒe ŋkekewo nɔ la, nenema ke lanye Amegbetɔvi la ƒe vava. Elabena alesi wowɔ le ŋkeke, si dze ŋgɔ na tɔɖɔɖɔ me, wole nu ɖum, eye wole nu nom, wole srɔ̃ ɖem, eye wole wo tsɔm na, bena woaɖe, vaseɖe ŋkeke, si dzi Noa yi ɖe aɖakaʋua me, eye womedze sii o, vaseɖe esime tɔɖɔɖɔ va, eye wòkplɔ wo katã yii la, nenema ke lanye Amegbetɔvi la ƒe vava.”
3 Tsiɖɔɖɔ si xɔ xexeame katã la kplɔ amesiwo katã meɖo to Mawu ƒe nuxlɔ̃amegbedasi o la dzoe. Gake mekplɔ Noa kple eƒe ƒomea ya dzoe o. Yesu gblɔ be ‘woyi ɖe aɖakaʋua me.’ Le woƒe mawusosroɖa ta la, Yehowa na sitsoƒe wo. Petro II, 2:5, 9 ƒo nu tso Noa kple eƒe ƒomea ƒe agbetsitsi ŋu be: “Noa, dzɔdzɔenyenye ƒe gbeƒãɖela la, hekpe ɖe ame adre bubuawo ŋu ko [Mawu dzra] ɖo, esime wòhe tɔɖɔɖɔ va ame mavɔ̃mawuwo ƒe xexeme dzi. Ale Aƒetɔ la nya alesi wòaɖe mawumemewo atso tetekpɔwo me.” Yesu tsɔ Noa ƒe ŋkekea sɔ kple ŋkeke mamleawo tsɔ ɖee fia be menye amewo katãe aɖo to Mawu ƒe nuxlɔ̃amegbedasi la o. Gake eto ema me fia hã be Noa kple eƒe ƒomea ɖo to Yehowa Mawu, woyi ɖe aɖakaʋua me, eye wotsi agbe le Tsiɖɔɖɔ gã la me. Noa kple eƒe ƒomea ƒe agbetsitsi fia asi Mawu subɔla anukwareɖilawo ƒe agbetsitsi le xexe sia ƒe nuwuwu.
Ƒe Alafa Gbãtɔ me Kpɔɖeŋu Aɖe
4. Nukawoe dzɔ do ŋgɔ na Yerusalem tsɔtsrɔ̃ le ƒe 70 M.Ŋ. me si nye Yesu ƒe nyawo me vava?
4 Yesu ƒo nu tso nusiwo adzɔ le xexe sia ƒe nuwuwu hã ŋu. Míexlẽ le Mateo 24:21, 22 be: “Le ɣemaɣi me xaxa gã lava, esi meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o. Eye ne womeɖe ŋkeke mawo dzi o la, ekema ŋutilã aɖeke makpɔ ɖeɖe o; ke le ame tiatiawo ta woaɖe ŋkeke mawo dzi.” Nya siawo va eme zi gbãtɔ le ƒe alafa gbãtɔ Mía Ŋɔli me. Le ƒe 66 M.Ŋ. me la, Roma-srafo siwo nɔ Cestius Gallus ƒe kpɔkplɔ te va ɖe to ɖe Yerusalem-dua. Roma-srafoawo te ŋu ku gbedoxɔa ƒe gliwo gɔme gɔ̃ hã, eye Yudatɔ geɖe nɔ klalo be yewoana ta. Gake Cestius Gallus gakplɔ eƒe asrafowo dzoe le vo me eye menye le susu gobi aɖeke ta hã o. Esi Kristotɔwo kpɔ be Romatɔwo trɔ dzo la, wowɔ ɖe Yesu ƒe nya siwo wògblɔ do ŋgɔ ƒe geɖe la dzi: “Ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ. Ekema amesiwo le Yudea la, nasi ayi towo dzi, eye amesiwo le etitina la, nadzo ayi, eye amesiwo le agbletawo la, nagayi ɖe eme o.” (Luka 21:20, 21) Ame tiatia siwo nye Yudatɔ zu Kristotɔwo si le Yerusalem-du si ɖo tsɔtsrɔ̃ me la me eye to esia me wokpɔ wo ta tso tsɔtsrɔ̃ dziŋɔ si va edzi emegbe kpuie la me. Le ƒe 70 M.Ŋ. me la Roma-srafoawo gatrɔ va le Aʋafia Titus ƒe kpɔkplɔ te. Woƒo xlã Yerusalem, woɖe to ɖe dua hetsrɔ̃e.
5. Gɔmesese ka nue woɖe xaxa si va Yerusalem dzi kpɔtɔ le le ƒe 70 M.Ŋ. me?
5 Yudatɔ ŋutinyaŋlɔla Josephus gblɔ be Yudatɔ 1,100,000 ye ku, eye ame 97,000 tsi agbe eye wokplɔ wo yi aboyo mee. Enye nyateƒe be menye Yudatɔ mawo siwo menye Kristotɔwo o siwo tsi agbe lae nye ‘ame tiatia’ siwo le Yesu ƒe nyagblɔɖia me la o. Yesu gblɔ na Yuda-dukɔ dzeaglã la be: “Kpɔ ɖa, woagblẽ miaƒe aƒe ɖi na mi aƒedoe. Elabena mele egblɔm na mi bena: Tso esia dzi yina la miegale kpɔ ye ge o, vaseɖe esime miagblɔ bena: Woayra amesi gbɔna le [Yehowa] ƒe ŋkɔ la dzi.” (Mateo 23:38, 39) Nuŋlɔɖi aɖeke meli si ɖee fia be Yudatɔ siwo xaxa ɖe Yerusalem la va xɔ Yesu le ɣeyiɣi mamlea me be enye Mesia la, wova zu Kristotɔwo, eye Yehowa kpɔ ŋudzedze ɖe wo ŋu o. Gake woɖe xaxa si va Yerusalem dzi le ƒe 70 M.Ŋ. me la dzi kpɔtɔ. Roma-srafowo ƒe toɖeɖe ɖe dua mamletɔ teƒe medidi o. Esia na Yudatɔ aɖewo tsi agbe eye wokplɔ wo yi Roma Fiaɖuƒe ƒe akpa vovovowo wova zu kluviwo.
Agbetsilawo ƒe Ameha Gã Aɖe
6, 7. (a) Mawusubɔsubɔ ƒe dugã kae woava tsrɔ̃, si nye xaxa si ɖeke mesɔ kple o ka ƒe akpa aɖe? (b) Nukae Yohanes gblɔ ɖi le xaxa gã si gbɔna xexe sia dzi ŋu?
6 Togbɔ be Yerusalem tsɔtsrɔ̃ le ƒe 70 M.Ŋ. me he “xaxa gã” ŋutɔ va mawusubɔsubɔ ƒe dugã ma dzi hã la, Yesu ƒe nyawo me vava le mɔ si lolo wu nu le ŋgɔ gbɔna. Xaxa wuame aɖe ava mawusubɔsubɔ ƒe dugã si lolo wu si nye Babilon Gã, alakpasubɔsubɔ ƒe xexemefiaɖuƒe la, dzi eye xaxa si ɖeke mesɔ kpli o si ava Satana ƒe nuɖoanyiawo ƒe akpa susɔea dzi akplɔe ɖo. (Mateo 24:29, 30; Nyaɖeɖefia 18:21) Le Yerusalem ƒe tsɔtsrɔ̃ ƒe 26 aɖewo megbe la, apostolo Yohanes ŋlɔ nu tso xaxa sia si ava xexeame katã la ŋu le Nyaɖeɖefia 7:9-14. Eɖee fia be ameha gã aɖe atsi agbe le eme.
7 Afɔɖeɖe nyui aɖe si agbetsila siawo siwo nye “ameha gã” la wɔ lae wotsɔ de dzesi woe. Nyaɖeɖefia 7:14 gblɔ be amegã xoxo 24 siwo le dziƒo la dometɔ ɖeka gblɔ na Yohanes be: “Amesiawo nye amesiwo do go tso xaxa gã la me, eye wonyã woƒe awuwo, eye wowɔ wo ɣie le alẽvi la ƒe ʋu la me.” Ẽ, ameha gã la kafu Yehowa be eya gbɔe yewoƒe ɖeɖe tso. Woxɔ Yesu ƒe ʋu si wòkɔ ɖi la dzi se eye tsitrenɔnɔ nyui le wo si le wo Wɔla la kple eƒe Fia Yesu Kristo si wòtia la ŋku me.
8. Ƒomedodo nyui kae le “ameha gã” la kple Yesu nɔvi amesiamina susɔewo dome?
8 Egbea la, ameha gã la me tɔ siwo de miliɔn atɔ̃ kloe la le Dziƒofia, Yesu Kristo, ƒe kpɔkplɔ nyui la te. Wobɔbɔ wo ɖokui na Kristo eye wowɔ ɖeka kple nɔvia amesiamina siwo gale anyigba dzi. Yesu gblɔ le alesi ameha gã la wɔa nui ɖe amesiamina siawo ŋu ŋuti be: “Vavã mele egblɔm na mi bena: Nusianu, si miewɔ na nenem nɔvinye sue siawo dometɔ ɖeka la, nyee miewɔe na.” (Mateo 25:40) Kpekpeɖeŋu si ameha gã la me tɔwo na Kristo nɔvi amesiaminawo ɖokuitɔmadimaditɔe tae wobu wo be wowɔ nu nyui na Yesu ŋutɔ ɖo. Esia na ƒomedodo nyui le wo kple Yesu Kristo kple Yehowa Mawu dome. Mɔnukpɔkpɔ su wo si be wowɔ ɖeka kple amesiamina susɔeawo heva zu Mawu ƒe Ðasefo siwo ŋu eƒe ŋkɔ le.—Yesaya 43:10, 11; Yoel 3:4, 5.
Ŋudzɔnɔnɔ
9, 10. (a) Nukae wòle be míawɔ be míalé tsitrenɔnɔ nyui me ɖe asi le Amegbetɔvi la ŋkume? (b) Aleke wòle be míawɔ nui be ‘míanɔ ŋudzɔ’?
9 Ele be ameha gã la nayi edzi alé tsitrenɔnɔ nyui me ɖe asi le Amegbetɔvi la ŋkume ɣesiaɣi, si bia be woanɔ mo xexi ahanɔ ŋudzɔ vaseɖe xexe xoxo sia ƒe nuwuwu. Yesu gblɔ esia eme kɔ ƒã be: “Mikpɔ mia ɖokui dzi nyuie, bena nutsuɖuɖu kple ahamumu kple dzimaɖitsitsi ɖe nuɖuɖu ŋu nagate miaƒe dzi ɖe to o, eye ŋkeke ma nagalili mi abe mɔ̃ ene o; elabena adze amesiwo katã nɔ anyigba blibo la ƒe ŋku me la dzi. Eyaŋuti minɔ ŋudzɔ le ɣeawo katã ɣi me kple gbedodoɖa, bena miate ŋu asi le nusiawo katã, siwo le eme va ge la nu, eye be miatsi tre ɖe Amegbetɔvi la ŋku me.”—Luka 21:34-36.
10 Hafi míate ŋu atsi tre ɖe Amegbetɔvi la ŋkume la, ele be wòakpɔ ŋudzedze ɖe mía ŋu eye manɔ alea o ne míena xexe sia me ƒe susuwo kpɔ ŋusẽ ɖe mía dzi. Xexeame ƒe susuwo blea ame eye woate ŋu ana ame nanyrɔ̃ eɖokui ɖe ŋutilãmevivisese me vĩ alo agbe me dzimaɖitsitsiwo nate eƒe dzi ɖe to ale gbegbe be magatsɔ Fiaɖuƒea aɖo nɔƒe gbãtɔ o. (Mateo 6:33) Esia ana ame nagbɔdzɔ le gbɔgbɔ me eye wòana magatsɔ eƒe agbanɔamedzi le Mawu kple ame bubuwo gbɔ nyuie o. Ate ŋu agbɔdzɔ alo wòade ɖoƒe si le esi le hamea me la afɔku me le nuvɔ̃ gã si wòawɔ eye ɖewohĩ wòagbe dzimetɔtrɔ gɔ̃ hã ta. Ele be ameha gã la me tɔ ɖesiaɖe nakpɔ eɖokui dzi nyuie. Ele be wòayi edzi aɖe eɖokui ɖa tso ame mavɔ̃mawuwo ƒe xexe sia kple eƒe nuwɔnawo me.—Yohanes 17:16.
11. Ŋɔŋlɔawo me gɔmeɖose kawo ŋudɔwɔwɔe akpe ɖe mía ŋu be míatsi agbe le Harmagedon me?
11 Le esia ta Yehowa na nusi míehiã hena esia wɔwɔ la mí to eƒe Nya, eƒe gbɔgbɔ kɔkɔe, kple eƒe habɔbɔ si wokpɔna la dzi. Ele be míawɔ nusiawo ŋudɔ bliboe. Tsɔ kpe ɖe eŋu la, ele be míado gbe ɖa eye míaɖo to Mawu ne míedi be wòakpɔ ŋudzedze ɖe mía ŋu. Nu vevi aɖee nye be ele be míalé fu vɔ̃ vevie ŋutɔ. Hakpala la gblɔ be: “Nyemebɔbɔ nɔ ame tovowo gbɔ o, eye nyemede afɔ gbedegblemimewo ƒe ha me o. Melé fu ame vlowo ƒe takpekpe, eye mía kple ame vɔ̃ɖiwo míebɔbɔ nɔa du o. Megaɖe nye luʋɔ ɖa kpe ɖe nuvɔ̃wɔlawo ŋu o, kple nye agbe ɖa kpe ɖe hlɔ̃mewo ŋu o.” (Psalmo 26:4, 5, 9) Le Kristo-hamea me la, ele be ɖeviwo kple ame tsitsiwo siaa naɖe woƒe hadede kple amesiwo meɖe adzɔgbe na Yehowa o la dzi akpɔtɔ. Hafi Mawu nakpɔ ŋudzedze ɖe mía ŋu la, ele be míadze agbagba be míanye mokaka manɔŋutɔwo eye míadzra mía ɖokui ɖo ɖimaƒomaƒoe tso xexeame. (Psalmo 26:1-5; Yakobo 1:27; 4:4) Ne míewɔ esia la, míate ŋu aka ɖe edzi be Yehowa mana míatsrɔ̃ kpe ɖe ame mavɔ̃mawuwo ŋu le Harmagedon o.
Ame Aɖewo “Maku Akpɔ O”
12, 13. (a) Hafi Yesu nafɔ Lazaro ɖe tsitre la, nya kawoe wògblɔ si gɔme Marta mese bliboe o? (b) Nukae Yesu ƒe nyawo mefia o le ame aɖewo siwo “maku akpɔ o” ŋu?
12 Ŋugbledede le agbetsitsi le nuɖoanyi sia ƒe nuwuwu kple alesi wòava eme be míaku akpɔ o ŋu la doa dzidzɔ na ame. Mɔkpɔkpɔ siae Yesu tsɔ ɖo mía ŋkume. Do ŋgɔ teti hafi Yesu nafɔ exɔlɔ̃ Lazaro si ku la ɖe tsitre la, egblɔ na Lazaro nɔvinyɔnu Marta be: “Nyee nye tsitretsitsi la kple agbe la; amesi xɔa dzinye sena la, ne eku hã la, anɔ agbe; eye amesiame, si le agbe, eye wòxɔa dzinye sena la, maku akpɔ o. Èle esia xɔm le sesema?” Marta xɔ tsitretsitsia dzi se, gake mese nya siwo katã Yesu gblɔ la gɔme o.—Yohanes 11:25, 26.
13 Yesu mefia be yeƒe apostolo nuteƒewɔlawo ayi edzi anɔ agbe le ŋutilã me eye womaku akpɔ o. Ke boŋ eɖee fia emegbe be yeƒe nusrɔ̃lawo aku. (Yohanes 21:16-23) Le nyateƒe me la, gbɔgbɔ kɔkɔe si wotsɔ si ami na wo le ƒe 33 M.Ŋ. ƒe Pentekoste-ŋkekea dzi la fia be ele be woaku be woaxɔ woƒe dziƒodomenyinyi abe fiawo kple nunɔlawo ene. (Nyaɖeɖefia 20:4, 6) Eyata esi ɣeyiɣiawo va nɔ yiyim la, ƒe alafa gbãtɔ me Kristotɔwo katã ku. Gake susu aɖe tae Yesu gblɔ nya mawo ɖo. Eƒe nya siwo wògblɔ le agbenɔnɔ si me womaku le akpɔ o ŋu la ava eme hã.
14, 15. (a) Aleke nya siwo Yesu gblɔ le ame aɖewo siwo “maku akpɔ o” ŋu la ava emee? (b) Nɔnɔme ka mee xexeme sia le, gake mɔkpɔkpɔ kae le ame dzɔdzɔewo si?
14 Nusiwo tae dometɔ ɖekae nye be Kristotɔ amesiamina nuteƒewɔlawo matsi ku me tegbee o. (Nyaɖeɖefia 20:6) Tsɔ kpe ɖe eŋu la, Yesu ƒe nyawo fia asi ɣeyiɣi tɔxɛ aɖe si me Mawu ade nu amegbetɔ ƒe nyawo me eye wòaɖe vɔ̃ɖinyenye ɖa le anyigba dzi abe alesi wòwɔ le Noa ƒe ŋkekea me ene. Mahiã be anukwareɖila siwo anɔ Mawu ƒe lɔlɔ̃nu wɔm ɣemaɣi la naku le Mawu ƒe ʋɔnudɔdrɔ̃ me o. Ke boŋ mɔnukpɔkpɔ asu wo si be woatsi agbe le xexe aɖe tsɔtsrɔ̃ me abe Noa kple eƒe ƒomea ene. Kakaɖedzi le mɔkpɔkpɔ sia ŋu, elabena Biblia ƒe nufiafiawo dzie wotui ɖo eye wowɔ eƒe kpɔɖeŋuwo. (Tsɔe sɔ kple Hebritɔwo 6:19; Petro II, 2:4-9.) Biblia ƒe nyagblɔɖi me vava ɖee fia be eteƒe madidi o, fifi xexe si nye amegbetɔƒome madzɔmadzɔ la awu enu le tsɔtsrɔ̃ aɖe me. Nɔnɔme siwo li fifia la magate ŋu aɖɔ ɖo o, elabena xexeame vɔ̃ɖi wògbɔ eme. Nya si Mawu gblɔ le xexeme si nɔ anyi le Noa ƒe ŋkekea me ŋu la le dzɔdzɔm le xexe si me míele la hã me. Vɔ̃ɖivɔ̃ɖi yɔ ameƒomea ƒe akpa gãtɔ ƒe dzi me, eye woƒe tamesusuwo nye vɔ̃ ko ɖaa.—Mose I, 6:5.
15 Yehowa ɖe mɔ na amegbetɔ be wòaɖu anyigba dzi ƒe alafa geɖe eye Mawu mede nu eme o, gake woƒe ɣeyiɣia de vɔ. Eteƒe madidi o Yehowa atsrɔ̃ ame vɔ̃ɖiwo katã ɖa le anyigba dzi abe alesi Biblia gblɔe ene. (Psalmo 145:20; Lododowo 2:21, 22) Gake matsrɔ̃ ame dzɔdzɔewo akpe ɖe ame vɔ̃ɖiwo ŋu o. Mawu mewɔ nenema kpɔ o! (Tsɔe sɔ kple Mose I, 18:22, 23, 26.) Nukata wòatsrɔ̃ amesiwo le agbagba dzem be yewoasubɔe le anukwareɖiɖi kple mawusosroɖa me? Nusi sɔ si Yehowa awɔe nye be ave esubɔla nuteƒewɔla siwo anɔ agbe le xaxa gã la ƒe gɔmedzedze la nu eye matsrɔ̃ wo o, abe alesi metsrɔ̃ Noa kple eƒe ƒomea o esime eƒe ŋkekea me xexe vɔ̃ɖi la wu enu afɔkutɔe ene. (Mose I, 7:23) Mawu akpɔ wo ta eye woatsi agbe le xexe sia ƒe nuwuwu.
16. Nukunu kawoe adzɔ le xexe yeyea me, eye nukae wòafia na agbetsilawo?
16 Nukae agadzɔ? Le xexe yeyea me la, ameƒomea akpɔ yayra siwo yɔa dɔ ame ne wole Yesu ƒe tafevɔsa la ŋudɔ wɔm bliboe. Biblia yɔ kpɔɖeŋu “agbetsitɔsisi aɖe, si le dzo sim abe kristalo ene, hele dodom tso Mawu kple Alẽvi la ƒe fiazikpui me le eƒe ablɔ la titina. . . . Eye le tɔsisi la ƒe goawo kple eve dzi la agbeti li, si tsea ku wuieve, eye wòtsena le ɣleti sia ɣleti, eye atiawo ƒe aŋgbawo nye dɔyɔgbe na dukɔwo.” (Nyaɖeɖefia 22:1, 2) Nukutɔe la, Adam ƒe kua ŋutɔ dzi ɖuɖu hã le ‘dɔyɔyɔ’ ma me! “Ami ku saɖagatsi tegbee, eye Aƒetɔ Yehowa atutu aɖatsi ɖa le ŋkuwo katã me.” (Yesaya 25:8) Eyata mahiã be amesiwo atsi agbe le xaxa gã la me ayi ɖe xexe yeyea me nagaku o!
Mɔkpɔkpɔ Vavãe Wònye
17. Kakaɖedzi kae li be ame aɖewo atsi agbe le Harmagedon me eye ‘womaku akpɔ o’?
17 Ðe míate ŋu aka ɖe agbetsitsi ƒe mɔkpɔkpɔ wɔnuku sia dzi bliboea? Ẽ! Yesu gblɔ na Marta be ɣeyiɣi aɖe ava esime amewo anɔ agbe eye womagaku akpɔ o. (Yohanes 11:26) Tsɔ kpe ɖe eŋu la, le Nyaɖeɖefia si Yesu ɖe fia Yohanes ƒe ta 7 lia me la, woɖee fia be ameha gã aɖe ado tso xaxa gã la me ahatsi agbe le eme. Ðe míate ŋu axɔ Yesu Kristo kple ŋutinyamenuŋlɔɖi si ku ɖe Noa ƒe ŋkekea me Tsiɖɔɖɔa ŋu la dzi asea? Ðikeke mele eme o! Tsɔ kpe ɖe eŋu la, alesi Mawu kpɔ esubɔlawo ta le ʋɔnudrɔ̃ɣiwo kple le dukɔwo ƒe anyidzedze me ƒe ŋutinya bubuwo le Biblia me. Ðe mele be míakpɔ mɔ be awɔ nenema ke le nuwuɣi sia me oa? Ðe nane li si wɔwɔ kpe wu Wɔla laa?—Mateo 19:26.
18. Aleke míate ŋu aka ɖe edzi be míanɔ agbe le Yehowa ƒe dzɔdzɔenyenye ƒe xexe yeyea me?
18 Ne míesubɔ Yehowa fifia le anukwareɖiɖi me la, míaka ɖe edzi be míanɔ agbe mavɔ le eƒe xexe yeyea me. Le ame miliɔn gbogbo aɖewo gome la, woato tsitretsitsi me ava xexe yeye ma me. Gake le míaƒe ŋkekea me la, mɔnukpɔkpɔ tɔxɛ asu Yehowa ƒe ame miliɔn geɖe—ẽ, ameha gã si ame aɖeke mate ŋu axlẽ alo aɖe wo dzi akpɔtɔ o—si be woatsi agbe tso xaxa gã la me. Eye mahiã be woagaku gbeɖe o.
Taflatse Ðe Wo Me
◻ Aleke wowɔ agbetsitsi le Harmagedon me ƒe kpɔɖeŋu le Noa ƒe ŋkekea mee?
◻ Nukae wòle be míawɔ be míanɔ tsitre ne Yesu he Yehowa ƒe ʋɔnudɔdrɔ̃ vɛ?
◻ Nukata míate ŋu agblɔ be mahiã be Harmagedon me agbetsilawo ‘naku gbeɖe o’?
[Nɔnɔmetata si le axa 15]
Kristotɔwo si le Yerusalem ƒe xaxa la nu