Wonɔ Mɔ Kpɔm Na Mesia La

“Ame sia ame kloe nɔ mɔ kpɔm be Mesia la ava kpuie le ŋkeke mawo me, ale be wotsi dzi vevie be yewoanya nenye be Yohanes enye amea loo, alo menye eyae o?”—LUKA 3:15, AGBENYA LA.

 1. Gbeƒã kae alẽkplɔlawo se mawudɔla aɖe ɖe?

Zà DO. Alẽkplɔlawo le gbedzi le woƒe alẽwo ŋu dzɔm. Yehowa ƒe dɔla aɖe va tɔ ɖe wo gbɔ eye Mawu ƒe ŋutikɔkɔe klẽ ƒo xlã wo eye wovɔ̃ ŋutɔ! Kaka woase la, mawudɔlaa ɖe gbeƒã dzidzɔnya sia be: “Migavɔ̃ o, elabena kpɔ ɖa! Meva dzidzɔ gã si ame sia ame akpɔ la ŋuti nya nyui gblɔ ge na mi, elabena wodzi Xɔla, si nye Kristo Aƒetɔ la, na mi egbea,” ame si ava nye Mesia la. Alẽkplɔlawo ate ŋu akpɔ vidzĩ si wotsɔ mlɔ lãnuɖunu me la, le du aɖe si te ɖe afi ma ŋu me. Kasia, “dziƒoʋakɔ gã aɖe” va nɔ Yehowa kafum, nɔ gbɔgblɔm be: “Ŋutikɔkɔe na Mawu le dziƒo boo, eye ŋutifafa nanɔ ame siwo ŋu wòkpɔa ŋudzedze ɖo la dome le anyigba dzi.”—Luka 2:8-14.

 2. Nya “Mesia” gɔme ɖe, eye aleke woawɔ anya ame si nye Mesia la?

² Le nyateƒe me la, Yudatɔ alẽkplɔlawo nya be nya “Mesia,” alo “Kristo,” fia Mawu ƒe “Amesiamina.” (2 Mose 29:5-7) Gake aleke woawɔ ate ŋu anya nu geɖe tso ɖevi si ŋu mawudɔlaa ƒo nu tsoe la ŋu ahakpe ɖe ame bubuwo ŋu woaka ɖe edzi be eyae anye Mesia si Yehowa ŋutɔ tia? Eyae nye be woadzro nyagblɔɖi siwo le Hebri Ŋɔŋlɔawo me la me eye woatsɔ wo asɔ kple dɔ siwo ɖevi sia ava wɔ kple agbe si ƒomevi wòava nɔ.

Nu Ka Tae Amewo Nɔ Mɔkpɔkpɔ Me?

3, 4. Aleke míese Daniel 9:24, 25 gɔme?

³ Esime Yohanes Amenyrɔɖetsimela va do ƒe aɖewo megbe la, eƒe nyagbɔgblɔwo kple dɔ siwo wònɔ wɔwɔm la na ame aɖewo bia wo ɖokuiwo be, ɖe wòanye be eyae nye Mesia la. (Mixlẽ Luka 3:15.) Anɔ eme be ame aɖewo se “kwasiɖa blaadre” si ŋu woƒo nu tso le Mesia la ŋuti nyagblɔɖi aɖe me la gɔme nyuie. Ne nenemae la, ke woate ŋu anya ɣeyiɣi si me Mesia la ado. Nyagblɔɖia ƒe akpa aɖe yi ale: “Tso ɣeyiɣi, si wode se be, woagatso Yerusalem va se ɖe amegã, si wosi ami na dzi la, le kwasiɖa adre; eye woatsɔ kwasiɖa blaade vɔ eve atso ablɔwo kple kpɔdomeewo le xaxaɣi.” (Dan. 9:24, 25) Agbalẽnyala geɖewo lɔ̃ ɖe edzi be esia nye ƒewo ƒe kwasiɖawo. Le kpɔɖeŋu me, Biblia gɔmeɖeɖe aɖe ɖe nya ma gɔme be: “Ƒewo ƒe kwasiɖa blaadre woɖo.”—Revised Standard Version.

⁴ Egbea, Yehowa subɔlawo nya be kwasiɖa 69, alo ƒe 483 si wogblɔ ɖi le Daniel 9:25 la dze egɔme tso ƒe 455 D.M.Ŋ. me, esime Persia Fia Artaxsasta ɖe mɔ na Nexemiya be wòagbugbɔ Yerusalem atso eye woaɖɔ eƒe gliawo ɖo. (Nex. 2:1-8) Kwasiɖa mawo wu enu le ƒe 483 megbe, le ƒe 29 M.Ŋ. me, esime wonyrɔ Yesu Nazaretetɔ la eye wotsɔ gbɔgbɔ kɔkɔe si ami nɛ; ale wòva zu Mesia la.—Mat. 3:13-17.a

 5. Nyagblɔɖi kawo mee míadzro fifia?

⁵ Mina míadzro nyagblɔɖi bubu geɖe siwo ku ɖe Mesia la ŋu, siwo va eme le Yesu dzidzi, eƒe ɖevime, kple eƒe subɔsubɔdɔa me dometɔ ʋɛ aɖewo me. Ðikeke mele eme o be esia ana ale si míexɔ Mawu ƒe nyagblɔɖinyawo dzi se la me nagasẽ ɖe edzi. Akpe ɖe mía ŋu hã be míakpɔe adze si kɔtɛ be Yesue nye Mesia si amewo nɔ mɔ kpɔm na ɣeyiɣi didi aɖe la vavã.

Wogblɔ Eƒe Ðevime Nudzɔdzɔwo Ði

 6. Ðe ale si 1 Mose 49:10 va emee la me.

⁶ Woadzi Mesia la le Israel to si nye Yuda me. Esime blemafofo Yakob nɔ kuba dzi eye wònɔ viawo yram la, egblɔ ɖi be: “Atamkayi magbe Yuda si nɔnɔ o, eye womaɖe fiatikplɔ ɖa le ekɔme o, va se ɖe esime Silo nava; ame si dukɔwo ana tae.” (1 Mose 49:10, NW) Yudatɔ agbalẽnyala geɖe siwo nɔ anyi le blema gblɔ be nya siawo ku ɖe Mesia la ŋu. Tso Yuda Fia David ƒe dziɖuɖu dzi la, atamkayi (si fia gbeɖeŋusẽ) kple fiatikplɔ (si tsi tre ɖi na dziɖuŋusẽ) nye Yuda to la tɔ. “Silo” fia “Ame Si Tɔ Wònye.” Fia siwo atso Yuda toa me la anɔ dzi ɖum va se ɖe esime “Silo,” si aɖu fia tegbee la nava, elabena Mawu gblɔ na Zedekiya si nye Yuda fia mamlɛtɔ la be, woava tsɔ fiaɖuɖua ana ame si tɔ wònye le se nu la. (Eze. 21:31, 32) Le Zedekiya megbe la, Yesu ye nye David ƒe dzidzimevi ɖeka kolia si wodo fianyenye ŋugbe na. Do ŋgɔ na Yesu dzidzi la, mawudɔla Gabriel gblɔ na Maria be: “Yehowa Mawu atsɔ fofoa David ƒe fiazikpui la anae, eye wòaɖu fia ɖe Yakob ƒe aƒe la dzi tegbee, eye nuwuwu manɔe na eƒe fiaɖuƒe la o.” (Luka 1:32, 33) Ele be ame si tɔ wònye la nanye Yesu Kristo, ame si nye Yuda kple David ƒe dzidzimevi.—Mat. 1:1-3, 6; Luka 3:23, 31-34.

 7. Afi kae wodzi Mesia la le, eye nu ka tae esia ɖe dzesi?

⁷ Woadzi Mesia la le Betlexem. Nyagblɔɖila Mixa ŋlɔ bena: “Ke wò Betlexem Efrata, esi nènye suetɔ le Yuda ƒe ƒomeawo dome hã la, mewò Israel ƒe dziɖula le dzɔdzɔ ge atso nam, ame si dzɔɣi tso tititi le gbaɖegbe ʋĩ ke.” (Mixa 5:1) Ele be woadzi Mesia la ɖe Yuda du si nye Betlexem, si ɖikeke mele eme o be woyɔna tsã be Efrata la, me. Togbɔ be Yesu dada, Maria, kple Yosef, si nye fofoa si xɔe nyi la, nɔ Nazaret hã la, se aɖe si Romatɔwo de be amewo katã naŋlɔ woƒe ŋkɔ la na woyi Betlexem, afi si wodzi Yesu le, le ƒe 2 D.M.Ŋ. me. (Mat. 2:1, 5, 6) Aleke nyagblɔɖia va eme nukutɔe nye esi!

8, 9. Nya kae wogblɔ ɖi le Mesia la dzidzi kple nu siwo adzɔ ɖe eyome ŋu?

⁸ Ðetugbui leaƒe aɖee adzi Mesia la. (Mixlẽ Yesaya 7:14.) Hebrigbe me nya si nye bethu·lahʹ fia “ɖetugbui leaƒe,” gake nya bubu si nye (ʽal·mahʹ) ye dze le Yesaya 7:14. Wogblɔ ɖi le afi ma be, “ɖetugbui [ha·ʽal·mahʹ]” adzi ŋutsuvi. Wozã nya ʽal·mahʹ na ɖetugbui Rebeka do ŋgɔ na eƒe srɔ̃ɖeɖe. (1 Mose 24:16, 43) Gbɔgbɔ ʋã Mateo wòzã Helagbe me nya si wozãna na “ɖetugbui leaƒe” (par·theʹnos) esime wònɔ eɖem fia be Yesaya 7:14 va eme le Yesu dzidzi me. Nya Nyui Gbalẽ ŋlɔla Mateo kple Luka siaa gblɔ be Maria nye ɖetugbui leaƒe si fɔ fu to Mawu ƒe gbɔgbɔ kɔkɔe ƒe dɔwɔwɔ dzi.—Mat. 1:18-25; Luka 1:26-35.

⁹ Woawu ɖeviwo le Mesia la dzidzi megbe. Nu ma tɔgbi dzɔ ƒe alafa geɖewo do ŋgɔ esime Egipte fia Farao de se be woatsɔ Hebri ŋutsuviwo aƒu gbe ɖe Nil Tɔsisia me. (2 Mose 1:22) Gake esi ɖe dzesi wue nye nya si le Yeremiya 31:15, 16, afi si woɖɔ Raxel le be enɔ fafam na via siwo wokplɔ yi “futɔwo ƒe anyigba dzi” la. Wose eƒe avifafa le keke Rama ke, le Benyamin nutoa me, le Yerusalem ƒe dziehe. Mateo ɖee fia be Yeremiya ƒe nyawo va eme esime Fia Herodes ɖe gbe be woawu ŋutsuvi suewo le Betlexem kple nuto siwo ƒo xlãe me. (Mixlẽ Mateo 2:16-18.) Kpɔ konyifafa si gbegbe anɔ nuto mawo me la ɖa le susu me!

10. Ðe ale si Hosea 11:1 va eme ɖe Yesu dzi la me.

¹⁰ Abe Israel viwo ene la, woayɔ Mesia la tso Egipte. (Hos. 11:1) Do ŋgɔ na se si Herodes de be woawu ŋutsuviwo la, mawudɔla aɖe gblɔ na Yosef kple Maria be woakplɔ Yesu ayi Egipte. Wonɔ afi ma “va se ɖe esime Herodes ku, bene nya si Yehowa gblɔ to eƒe nyagblɔɖila [Hosea] dzi la nava eme be: ‘Egipte ye meyɔ vinye la tsoe.’” (Mat. 2:13-15) Le nyateƒe me la, manya wɔ be Yesu ŋutɔ nakpɔ ŋusẽ ɖe nu siwo dzɔ le eƒe dzidzi me kple eƒe ɖevime la dzi o.

Mesia La Dze Dɔ Gɔme!

11. Aleke wodzra mɔ dzi ɖo na Yehowa ƒe Amesiamina la?

¹¹ Woadzra mɔ dzi ɖo hafi Mawu ƒe Amesiamina la nado. Maleaxi gblɔ ɖi be, “nyagblɔɖila Eliya” awɔ eƒe dɔ si nye be wòadzra dukɔa ƒe dzi ɖo hena Mesia la ƒe vava. (Mixlẽ Maleaxi 3:23, 24.) Yesu ŋutɔ gblɔ be Yohanes Amenyrɔɖetsimela ye nye “Eliya” sia. (Mat. 11:12-14) Eye Marko ɖee fia be Yohanes ƒe subɔsubɔdɔa na Yesaya ƒe nyagblɔɖiwo va eme. (Yes. 40:3; Mar. 1:1-4) Menye Yesu ye wɔ ɖoɖo be Yohanes nawɔ Eliya ƒe dɔ la, be wòanye ame si dzra mɔ dzi ɖo na ye o. Eliya sia si ŋu nya wogblɔ ɖi la ƒe dɔwɔwɔwo nɔ ɖekawɔwɔ me kple Mawu ƒe lɔlɔ̃nu, be woato ema dzi anya ame si nye Mesia la.

12. Dɔ kae Mawu de asi na Mesia la si na wokpɔe dze sii?

¹² Dɔ si Mawu de asi na Mesia la na wokpɔe dze sii. Le ƒuƒoƒe si nɔ Nazaret, du si me wonyi Yesu le me la, exlẽ nu tso Yesaya ƒe agbalẽ xatsaxatsaa me eye wògblɔ be nya siawo ku ɖe ye ŋu; nya si wòxlẽe nye: “Yehowa ƒe gbɔgbɔ le dzinye, elabena esi ami nam be magblɔ nya nyui na ame dahewo, edɔm ɖa be maɖe gbeƒã ablɔɖe na aboyomewo kple nukpɔkpɔ ake na ŋkuagbãtɔwo, be mana ablɔɖe ame siwo wote ɖe anyi ne woadzo, be maɖe gbeƒã Yehowa ƒe amenuveƒe la.” Esi wònye be Yesue nye Mesia la vavã ta la, egblɔ wòsɔ be: “Ŋɔŋlɔ sia si miese fifi laa la va eme egbea.”—Luka 4:16-21.

13. Alekee wogblɔ dutoƒosubɔsubɔdɔ si Yesu wɔ le Galilea la ŋu nya ɖi?

¹³ Wogblɔ ɖi be Mesia la awɔ dutoƒosubɔsubɔdɔ le Galilea. Yesaya ŋlɔ tso “Zebulon-nyigba kple Naftali-nyigba . . . [Galilea] si nye dukɔwo ƒe anyigba” la ŋu be: “Dukɔ, si le viviti me zɔm la, kpɔ kekeli gã aɖe, ame siwo le blukɔ tsiɖitsiɖi ƒe anyigba dzi la, kekeli klẽ ɖe wo dzi.” (Yes. 8:23; 9:1) Yesu dze eƒe dutoƒosubɔsubɔdɔa gɔme le Galilea eye eya ŋutɔ nɔ Kapernaum, afi si kekeli si wòhe vae la klẽ na Zebulon kple Naftali tɔ geɖewo le. (Mat. 4:12-16) Galilea ye Yesu gblɔ eƒe Todzimawunya wɔdɔɖeamedzia le, afi mae wòtia eƒe apostoloawo le, afi mae wòwɔ eƒe nukunu gbãtɔa le, eye anɔ eme be afi mae wòɖe eɖokui fia eƒe nusrɔ̃la 500 le le eƒe tsitretsitsi megbe. (Mat. 5:1–7:27; 28:16-20; Mar. 3:13, 14; Yoh. 2:8-11; 1 Kor. 15:6) Eto gbeƒãɖeɖe le “Zebulon-nyigba kple Naftali-nyigba” siaa dzi na Yesaya ƒe nyagblɔɖia va eme. Ke hã, Yesu yi Israel nyigbaa ƒe akpa bubuwo hã ɖaɖe gbeƒã Fiaɖuƒegbedeasia.

Wogblɔ Dɔ Bubu Siwo Mesia La Awɔ Ði

14. Aleke Yesu na Psalmo 78:2 va eme?

¹⁴ Mesia la do lowo alo wɔ kpɔɖeŋuwo tsɔ fia nui. Hakpala Asaf dzi ha be: “Make nye nu kple lododowo.” (Ps. 78:2) Aleke míewɔ nya be nya sia nye nyagblɔɖi si ku ɖe Yesu ŋu? Mateo ye na míenya. Esi Mateo ƒo nu tso kpɔɖeŋu siwo me Yesu tsɔ Fiaɖuƒea sɔ kple ale si ati ku sue aɖe miena hetsina kpakple amɔwɔʋãnu ŋu vɔ la, egblɔ be: “Meƒoa nu na wo ne menye to kpɔɖeŋu me o; bene nya si wogblɔ ɖi to nyagblɔɖila la dzi nava eme, esime wògblɔ be: ‘Make nye nu awɔ kpɔɖeŋuwo, magblɔ nu siwo le ɣaɣla tso xexea ƒe gɔmeɖoanyiɣi ke la.’” (Mat. 13:31-35) Yesu zã lododowo kple kpɔɖeŋuwo le nufiafia me.

15. Ƒo nu tso ale si Yesaya 53:4 va eme ŋu?

¹⁵ Mesia la atsɔ míaƒe lãmegbegblẽwo aɖo eɖokui dzi. Yesaya gblɔ ɖi be: “Ke eyae tsɔ míaƒe dɔlélewo, eye wòde ta míaƒe vevesesewo te.” (Yes. 53:4) Mateo gblɔ be, esi Yesu da gbe le Petro lɔ̃xo ŋu vɔ la, egada gbe le ame bubuwo hã ŋu bene “nya si wogblɔ ɖi to Yesaya nyagblɔɖila la dzi la nava eme be: ‘Eya ŋutɔ tsɔ míaƒe lãmegbegblẽwo, eye wòde ta míaƒe dɔlélewo te.’” (Mat. 8:14-17) Eye nudzɔdzɔ gbogbo siwo me Yesu da gbe le amewo ŋu le la ƒe ɖeka pɛ koe esia nye.

16. Aleke apostolo Yohanes ɖee fia be Yesaya 53:1 va eme ɖe Yesu dzi?

¹⁶ Togbɔ be Mesia la awɔ dɔ nyui geɖewo hã la, ame geɖewo maxɔ edzi ase o. (Mixlẽ Yesaya 53:1.) Esi apostolo Yohanes nɔ eɖem fia be nyagblɔɖi sia va eme la, eŋlɔ bena: “Togbɔ be ewɔ dzesi geɖewo wokpɔ hã la, womenɔ edzi xɔm nɔ sesem o, si na Yesaya nyagblɔɖila la ƒe nya si wògblɔ la va eme, be: ‘Yehowa, ame kae xɔ nya si míese la dzi se? Eye le Yehowa ƒe abɔ la gome la, ame kae woɖee fiae?’” (Yoh. 12:37, 38) Gakpe ɖe eŋu la, ame ʋɛ aɖewo koe xɔ Yesu, si nye Mesia la, ŋuti nya nyuia dzi se le apostolo Paulo ƒe subɔsubɔdɔa wɔɣi.—Rom. 10:16, 17.

17. Alekee Yohanes ɖee fia be Psalmo 69:5 va eme?

¹⁷ Woalé fu Mesia la dzodzro. (Ps. 69:5) Apostolo Yohanes yɔ Yesu ƒe nya siwo nye: “Ne ɖe nyemewɔ dɔ siwo ame aɖeke mewɔ kpɔ o la le wo dome o la, anye ne nu vɔ̃ aɖeke manɔ wo ŋu o; ke azɔ la, [wokpɔe], eye wolé fu mía kple Fofonye siaa. Gake be nya si woŋlɔ ɖe woƒe Se la me la nava eme tae, be: ‘Wolé fum dzodzro.’” (Yoh. 15:24, 25) Zi geɖe la, “Se la” fiaa Ŋɔŋlɔ bliboa katã. (Yoh. 10:34; 12:34) Nya Nyui la me nuŋlɔɖiwo ɖo kpe edzi be wolé fu Yesu, vevietɔ Yuda subɔsubɔhakplɔlawo. Gawu la, Kristo gblɔ be: “Susu aɖeke meli si ta xexea alé fu mi ɖo o, gake eléa fu nye ya, elabena meɖia ɖase tso eŋu be eƒe dɔwɔwɔwo vɔ̃ɖi.”—Yoh. 7:7.

18. Nu bubu kawo mee míagadzro siwo ado ŋusẽ kakaɖedzi si le mía si be Yesu ye nye Mesia la?

¹⁸ Yesu yomedzela siwo nɔ anyi le ƒe alafa gbãtɔ me la ka ɖe edzi be Yesu ye nye Mesia la, elabena nyagblɔɖi siwo le Hebri Ŋɔŋlɔawo me ku ɖe Mesia la ŋu va eme ɖe eyama dzi. (Mat. 16:16) Abe ale si míekpɔe ene la, nyagblɔɖi siawo dometɔ aɖewo va eme le Yesu Nazaret tɔ la ƒe ɖevime kple eƒe subɔsubɔdɔa me. Míadzro Mesia la ŋuti nyagblɔɖi bubuwo me le nyati si kplɔe ɖo me. Ne míede ŋugble le nyagblɔɖi siawo ŋu vevie la, ado ŋusẽ kakaɖedzi si le mía si be, Yesu Kristo ye nye Mesia si mía Fofo si le dziƒo, Yehowa, tia la godoo.

[Etenuŋɔŋlɔ]

Aleke Nàɖo Wo Ŋui?

• Nyagblɔɖi kawoe va eme le Yesu dziɣi?

• Aleke wodzra mɔ dzi ɖo na Mesia la?

• Yesaya ta 53 me nyagblɔɖi kawoe va eme ɖe Yesu dzi?