Kristotɔwo Kple Ameƒomea Ƒe Xexeame
“Mizɔ le nunya me le amesiwo le egodo la ŋku me.”—KOLOSETƆWO 4:5.
1. Nya kae Yesu gblɔ le eyomedzelawo kple xexeame ŋu?
LE Yesu ƒe gbedodoɖa aɖe na Fofoa si le dziƒo me la, egblɔ le eyomedzelawo ŋu be: “Xexeame lé fu wo elabena womenye xexeame ƒe akpa aɖeke o, abe alesi nye hã nyemenye xexeame ƒe akpa aɖeke o ene.” Egblɔ kplɔe ɖo be: “Nyemele biabiam be, naɖe wo tso xexeame o, ke boŋ bena, nadzra wo ɖo tso vɔ̃ɖitɔ la si me.” (Yohanes 17:14, 15, NW) Menye xexeame ŋutɔŋutɔe Kristotɔwo aɖe wo ɖokui ɖa tsoe o—le kpɔɖeŋu me, be woaɖe wo ɖokui ɖe aga aɖanɔ saɖagaƒewo me o. Ðe Kristo “[dɔ] wo ɖo ɖe xexeame” be woanye yeƒe ɖasefowo “vaseɖe anyigba ƒe seƒe ke” boŋ. (Yohanes 17:18; Dɔwɔwɔwo 1:8) Ke hã ebia Mawu be wòakpɔ wo ta elabena Satana, “xexe sia me fia” la, ana amewo nalé fu wo le Kristo ƒe ŋkɔa ta.—Yohanes 12:31; Mateo 24:9.
2. (a) Aleke Biblia zã nya ‘xexeamee’? (b) Nɔnɔme si da sɔ kae Yehowa ɖena fiana ɖe xexeame ŋu?
2 Le Biblia me la, wolɔ̃a nya “xexeame” (Helagbe, koʹsmos) zazã na ame madzɔmadzɔwo ƒe habɔbɔ, si ‘le vɔ̃ɖitɔ la ƒe ŋusẽ te.’ (Yohanes I, 5:19) Esi Kristotɔwo nɔa agbe ɖe Yehowa ƒe dzidzenuwo nu eye wowɔna ɖe se si wode na wo be woaɖe gbeƒã Mawu Fiaɖuƒea ŋuti nyanyuia na xexeame hã dzi ta la, ɣeaɖewoɣi wo kple xexeame menyina o. (Timoteo II, 3:12; Yohanes I, 3:1, 13) Gake wogazãa koʹsmos le Ŋɔŋlɔawo me tsɔ fiaa amegbetɔƒomea gbadzaa ko. Esi Yesu nɔ nu ƒom le xexeame ŋu le gɔmesese sia nu la, egblɔ be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ. Elabena Mawu medɔ [Via] ɖe xexeame, be wòadrɔ̃ ʋɔnu xexeame o; ke boŋ be woaɖe xexeame to eyama dzi.” (Yohanes 3:16, 17; Korintotɔwo II, 5:19; Yohanes I, 4:14) Eyata togbɔ be Yehowa lé fu nusiwo nye Satana ƒe nuɖoanyia ƒe nɔnɔme hã la, eɖe eƒe lɔlɔ̃ na ameƒomea fia esi wòdɔ Via ɖo ɖe anyigba dzi be wòaɖe amesiame si “[atrɔ] va dzimetɔtrɔ gbɔ.” (Petro II, 3:9; Lododowo 6:16-19) Ele be Yehowa ƒe nukpɔsusu si da sɔ le xexeame ŋu nafia mɔ esubɔlawo.
Kpɔɖeŋu si Yesu Ðo
3, 4. (a) Nukae nye Yesu ƒe nɔnɔme ɖe fiaɖuɖu ŋu? (b) Aleke Yesu bu ameƒomea ƒe xexeamee?
3 Ɣeyiɣi kpui aɖe do ŋgɔ na Yesu ƒe ku la, egblɔ na Pontio Pilato be: “Nye fiaɖuƒe menye xexe sia me ƒe akpa aɖeke o.” (Yohanes 18:36, NW) Yesu wɔ nu wòsɔ ɖe nya siawo nu do ŋgɔ esi wògbe ŋusẽ si Satana di be yeanae ɖe xexeame fiaɖuƒewo dzi, eye melɔ̃ hã be Yudatɔwo naɖo ye fiae o. (Luka 4:5-8; Yohanes 6:14, 15) Gake Yesu lɔ̃ ameƒomea ƒe xexeame ale gbegbe. Apostolo Mateo gblɔ esia ƒe kpɔɖeŋu aɖe be: “Esi wòkpɔ amehawo la, eƒe dɔme trɔ ɖe wo ŋuti; elabena woƒe lãme gbɔdzɔ, eye woka hlẽ abe alẽ, siwo kplɔla meli na o la ene.” Esi wòlɔ̃ ameawo ta la, eɖe gbeƒã na wo le woƒe duwo kple kɔƒewo me. Efia nu eye wòda woƒe lãmegbegblẽwo na wo. (Mateo 9:36) Etsɔ ɖe le amesiwo va nu srɔ̃ ge le egbɔ ƒe ŋutilãmenuhiahiãwo hã me vevie. Míexlẽ be: “Yesu yɔ eƒe nusrɔ̃lawo ƒo ƒu ɖe egbɔ gblɔ bena: Nye dɔme trɔ ɖe ameha la ŋuti; elabena egbe enye ŋkeke etɔ̃agbe wole ŋutinye, eye naneke mele wo si woaɖu o; ke nyemelɔ̃ bena, mado mɔ wo dɔme ɣeɣi o, ɖewohĩ aƒetrɔ latsɔ wo le mɔ dzi.” (Mateo 15:32) Aleke gbegbe wòtsɔ ɖe le eme na wo lɔlɔ̃tɔe nye si!
4 Yudatɔwo bua susu vɔ̃ ɖe Samariatɔwo ŋu ale gbegbe, gake Yesu ƒo nu ɣeyiɣi didi aɖe kple Samaria-nyɔnu aɖe eye wòtsɔ ŋkeke eve ɖi ɖase tsitotsito le Samariatɔwo ƒe du me. (Yohanes 4:5-42) Togbɔ be “Israel-ƒe me alẽ bubuwo gbɔ” ye Mawu dɔ Yesu ɖo hã la, ɣeaɖewoɣi eɖea ɖetsɔleme fiaa ame bubu siwo menye Yudatɔwo o siwo ɖe xɔsenɔamesi fia. (Mateo 8:5-13; 15:21-28) Vavãe, Yesu ɖee fia be anya wɔ be ‘womanye xexeame ƒe akpa aɖeke o’ gake le ɣeyiɣi ma ke me woaɖe lɔlɔ̃ na ameƒomea ƒe xexeame, na amewo, afia. Ðe míawo hã míaƒe dɔme trɔna ɖe amewo ŋu nenema le mía nɔƒewo, míaƒe dɔwɔƒewo, alo míaƒe asiƒleƒewoa? Ðe míeɖenɛ fiana be míetsɔ ɖe le woƒe nyonyo me—menye le woƒe gbɔgbɔmenuhiahiãwo ko me o ke le woƒe nuhiahiã bubuwo hã me ne míate ŋu akpe ɖe wo ŋua? Yesu ɖee fia nenema, eye esi wòwɔe alea la, eʋu mɔ nɛ wòfia nu amewo le Fiaɖuƒea ŋuti. Nyateƒee, míate ŋu awɔ nukunuwo ŋutɔŋutɔ abe Yesu ene ya o. Gake le kpɔɖeŋumɔ nu la, dɔmenyowɔwɔ ɖea amewo ƒe susu vɔ̃ bubu ɖe mía ŋu ɖa nukutɔe.
Paulo ƒe Nɔnɔme ɖe Amesiwo “Le Egodo” la Ŋu
5, 6. Aleke apostolo Paulo wɔ nu ɖe Yudatɔ siwo “le egodo” ŋui?
5 Le Paulo ƒe lɛtawo dometɔ geɖe me la, eyɔ amesiwo “le egodo” ŋkɔ le wo me tsɔ fia amesiwo menye Kristotɔwo o, woɖanye Yudatɔwo alo Dukɔwo me tɔwo o. (Korintotɔwo I, 5:12; Tesalonikatɔwo I, 4:12; Timoteo I, 3:7) Aleke wòwɔ nu ɖe ame mawo ŋui? ‘Ezu nusianu na amesiame ƒomevi, bene yeate ŋu aɖe wo dometɔ aɖewo kokoko.’ (Korintotɔwo I, 9:20-22) Ne eva du aɖe me la, ɖoɖo si nu wòɖea gbeƒã le ye nye be eyina ɖe Yudatɔ siwo va le afima gbɔ gbã. Aleke wòƒoa nu na woe? Etsɔa aɖaŋudzedze gblɔa Biblia me kpeɖodzi siwo me kɔ na wo be Mesia la va, eku vɔsaku, eye wofɔe ɖe tsitre, gake egblɔnɛ bubutɔe.—Dɔwɔwɔwo 13:5, 14-16, 43; 17:1-3, 10.
6 Le esia wɔwɔ me la, Paulo zã Yudatɔwo ƒe sidzedze si su wo si le Sea kple nyagblɔɖilawo ŋu wònye gɔmeɖokpe si dzi wònɔ te ɖo fia nu wo le Mesia la kple Mawu ƒe Fiaɖuƒea ŋu. Eye ete ŋu ɖe nu me ame aɖewo xɔe se. (Dɔwɔwɔwo 14:1; 17:4) Togbɔ be Yudatɔwo ƒe kplɔlawo tsi tre ɖe Paulo ŋu hã la, eɖe lɔlɔ̃ ƒe ɖetsɔleme fia wo detɔ Yudatɔwo esi wòŋlɔ be: “Nɔviwo, nye dzimedidi kple nye kukuɖeɖe, si meɖena na Mawu ɖe Israel ta la, enye si bena, woakpɔ xɔxɔ. Elabena mele ɖase ɖim na wo bena, wole ŋu ʋãm ɖe Mawu ŋu, gake menye kple sidzedze [vavãtɔ] o.”—Romatɔwo 10:1, 2.
Kpekpe Ðe Xɔsetɔ Siwo Menye Yudatɔwo O Ŋu
7. Aleke trɔ̃subɔla-zu-Yudatɔ dometɔ geɖe xɔ nyanyui si Paulo ɖe gbeƒãe?
7 Trɔ̃subɔla-zu-Yudatɔwo nye amesiwo menye Yudatɔwo o gake wona wotso aʋa na wo eye woge ɖe Yuda-subɔsubɔ me. Edze abe ɖe trɔ̃subɔla-zu-Yudatɔwo nɔ Roma, Syriatɔwo ƒe Antioxia, Ethiopia, kple Antioxia si le Pisidia ene—le nyateƒe me la, wonɔ Yudatɔwo ƒe Gbedzinɔƒewo katã. (Dɔwɔwɔwo 2:8-10; 6:5; 8:27; 13:14, 43; tsɔe sɔ kple Mateo 23:15.) Edze abe trɔ̃subɔla-zu-Yudatɔwo medana abe Yudatɔwo ƒe amegã geɖewo o ene, eye womate ŋu ado wo ɖokui ɖe dzi be Abraham ƒe dzidzimeviwoe yewonye o. (Mateo 3:9; Yohanes 8:33) Ke boŋ woɖe asi le woƒe trɔ̃wo ŋu eye wotrɔ va Yehowa gbɔ ɖokuibɔbɔtɔe, eye eyama kple eƒe sewo ŋuti sidzedze aɖe va su wo si. Eye Yudatɔwo ƒe mɔkpɔkpɔ na Mesia la ƒe vava nɔ woawo hã si. Esi woɖee fia le woƒe nyateƒea didi me xoxo be yewolɔ̃ faa be yewoawɔ tɔtrɔ la, wo dometɔ geɖe lɔ̃ be yewoagawɔ tɔtrɔ bubuwo ahawɔ ɖe apostolo Paulo ƒe gbeƒãɖeɖea dzi. (Dɔwɔwɔwo 13:42, 43) Ne trɔ̃subɔla-zu-Yudatɔ aɖe si subɔa trɔ̃ tsã trɔ dzime va zu Kristotɔ la, enyea mɔnukpɔkpɔ tɔxɛ nɛ be wòaɖe gbeƒã na Dukɔwo me tɔ bubu siwo gale mawu mawo subɔsubɔ dzi.
8, 9. (a) Le trɔ̃subɔla-zu-Yudatɔwo megbe la, Dukɔwo me tɔwo ƒe hatsotso kae Yudatɔwo ƒe subɔsubɔ dzɔ dzi na? (b) Aleke Mawu vɔ̃la aʋamatsomatsotɔ geɖe xɔ nyanyuiae?
8 Le trɔ̃subɔla-zu-Yudatɔ aʋatsotsotɔwo megbe la, Yudatɔwo ƒe subɔsubɔa nyo ame bubu siwo menye Yudatɔwo o hã ŋu. Amesiawo dometɔ gbãtɔ si zu Kristotɔe nye Kornelio, si togbɔ be menye trɔ̃subɔla-zu-Yudatɔe wònye o hã la, enye “mawumeme, eye wòvɔ̃a Mawu.” (Dɔwɔwɔwo 10:2) Nufialagã F. F. Bruce ŋlɔ ɖe eƒe numeɖegbalẽ le Dɔwɔwɔwo ƒe agbalẽa ŋu me be: “Wolɔ̃a Dukɔwo me tɔ mawo yɔyɔ be ‘Mawu vɔ̃lawo’; togbɔ be menye ŋkɔe wònye wotsɔ na wo koŋ o hã la, esɔ be woyɔa wo nenema. Togbɔ be Dukɔwo me tɔ siwo nɔ anyi ɣemaɣi dometɔ geɖe meɖo be yewoatrɔ dzime ava Yuda-subɔsubɔ me bliboe o (aʋatsotso ƒe nudidi la nye mɔxenu vevi aɖe na ŋutsuwo) hã la, Yudatɔwo ƒe mawuɖekasubɔsubɔ ƒe ƒuƒoƒe tadedeagu si wɔwɔ le bɔbɔe kple Yudatɔwo ƒe agbe ɖɔʋu nɔnɔ ƒe dzidzenuwo nyo wo ŋu. Wo dometɔ aɖewo dea ƒuƒoƒewo eye wonya gbedodoɖawo kple Ŋɔŋlɔawo me nufiafiawo, siwo wosena woxlẽna le Helagbe me gɔmeɖeɖe me.”
9 Apostolo Paulo do go Mawu vɔ̃la geɖewo le eƒe gbeƒãɖeɖe le ƒuƒoƒewo le Asia Sue kple Hela me. Eyɔ amesiwo ƒo ƒu ɖe Pisidia Antioxia ƒe ƒuƒoƒe be “Israel-ŋutsuwo kple mi amesiwo vɔ̃a Mawu.” (Dɔwɔwɔwo 13:16, 26) Luka ŋlɔ be esi Paulo ɖe gbeƒã Sabat etɔ̃ le ƒuƒoƒe si le Tesalonika la, “wo dome [Yudatɔ aɖewo] xɔe se [va zu Kristotɔwo] eye woku ɖe Paulo kple Sila ŋu kple Helatɔ, siwo vɔ̃a Mawu la dome ame geɖe, kple nyɔnu ŋkutatɔwo, menye ame ʋee aɖe o.” (Dɔwɔwɔwo 17:4) Anɔ eme be Helatɔ siawo dometɔ aɖewo nye aʋamatsomatsotɔ siwo nye Mawu vɔ̃lawo. Kpeɖodzi li be Dukɔwo me tɔ siawo dometɔ geɖe wɔa ɖeka kple Yudatɔwo le wo nɔƒewo.
Gbeƒãɖeɖe le “Dzimaxɔsetɔwo” Dome
10. Aleke Paulo ɖe gbeƒã na Dukɔwo me tɔ siwo menya naneke tso Ŋɔŋlɔawo me o lae, eye viɖe kae do tso eme?
10 Le Kristotɔwo ƒe Hela Ŋɔŋlɔawo me la, nya “dzimaxɔsetɔwo” ate ŋu afia ame hahoo siwo mele Kristo-hamea me o. Zi geɖe la, efiaa trɔ̃subɔlawo. (Romatɔwo 15:31; Korintotɔwo I, 14:22, 23; Korintotɔwo II, 4:4; 6:14) Helatɔwo ƒe xexemenunyae wofia dzimaxɔsetɔ geɖe siwo nɔ Atene eye womenya naneke kura le Ŋɔŋlɔawo me o. Ðe nusia na dzi ɖe le Paulo ƒo be meɖi ɖase na wo oa? Ao. Gake etrɔ asi le alesi wòƒo nu na woe ŋu. Egblɔ Biblia me nyawo na wo nunyatɔe gake meyɔ nya tẽ tso Hebri Ŋɔŋlɔawo, si Atenetɔwo menya o la me o. Etsɔ aɖaŋudzedze gblɔ Biblia me nyateƒe aɖewo siwo ɖi nya aɖewo siwo blema Stoatɔwo ƒe hakpalawo gblɔ. Eye egblɔ nufiafia si nye be Mawu vavã ɖeka koe li na ameƒomea katã la na wo, be enye Mawu si adrɔ̃ ʋɔnu le dzɔdzɔenyenye me to ŋutsu aɖe si ku gake wofɔe ɖe tsitre dzi. Aleae Paulo ɖe gbeƒã tso Kristo ŋu aɖaŋutɔe na Atenetɔwo. Vi kae wòɖe? Togbɔ be ame akpa gãtɔ ɖu fewu le eŋu alo ɖikeke nɔ wo me hã la, “ŋutsu aɖewo ku ɖe eŋu, eye woxɔe se, amesiwo dome hã Dionisio, Areopago tɔ la, kple nyɔnu aɖe, si ŋkɔe nye Damaris kpakple ame bubu, siwo kpe ɖe wo ŋu la le.”—Dɔwɔwɔwo 17:18, 21-34.
11. Du ka ƒomevie nye Korinto, eye nukae do tso Paulo ƒe gbeƒãɖeɖedɔa wɔwɔ le afima me?
11 Yudatɔ gbogbo aɖe nɔ Korinto, eyata Paulo ɖe gbeƒã le woƒe ƒuƒoƒe tsɔ dze eƒe subɔsubɔdɔa gɔmee le afima. Gake esi Yudatɔwo va tsi tre ɖe Paulo ŋu la, eyi ɖe Dukɔwo me tɔ siwo le afima gbɔ. (Dɔwɔwɔwo 18:1-6) Eye ameawo to vovo ale gbegbe! Korinto nye asidu si me mefana o, si me dukɔ vovovo me tɔwo le eye woƒe agbegbegblẽnɔnɔ de du le Helatɔwo kple Romatɔwo ƒe xexeame. Le nyateƒe me, ne wobe “woawɔ ame Korintotɔe” la, efia be woanɔ agbe gbegblẽ. Gake esi Yudatɔwo gbe gbeƒã si Paulo nɔ ɖeɖem vɔ megbe hafi Kristo ɖe eɖokui fiae gblɔ be: “Megavɔ̃ o, hafi boŋ ƒo nu, . . . elabena ame geɖe le asinye le du sia me.” (Dɔwɔwɔwo 18:9, 10) Eye nenemae wòdzɔe be, Paulo ɖo hame ɖe Korinto, togbɔ be emetɔ aɖewo nɔ “Korintotɔwo” ƒe agbe hã.—Korintotɔwo I, 6:9-11.
Agbagbadzedze be Míaɖe ‘Ameƒomevi Ðesiaɖe’ Egbea
12, 13. (a) Aleke egbea míaƒe anyigbamamã la ɖi esi nɔ anyi le Paulo ŋɔlii? (b) Nɔnɔme kae míeɖena fiana le anyigbamamã siwo me Kristodukɔa xɔ anyinɔ ɖo ɣeyiɣi didi alo afisiwo subɔsubɔhawo ƒe nya ti amewo le?
12 Abe alesi wònɔ le ƒe alafa gbãtɔ me ene la, egbea hã ‘Mawu ƒe amenuveve tsɔ xɔxɔ vɛ na ameƒomevi ɖesiaɖe.’ (Tito 2:11) Anyigbamamã si me míeɖea gbeƒã le keke ɖe enu ɖo anyigbagãwo katã kple ƒukpo akpa gãtɔ dzi. Eye, abe alesi wònɔ le Paulo ƒe ŋkekea me ene la, míedoa go ‘ameƒomevi ɖesiaɖe’ vavã. Le kpɔɖeŋu me, mía dometɔ aɖewo ɖea gbeƒã le dukɔ siwo me woɖo Kristodukɔa ƒe sɔlemehawo ɖo ƒe alafa geɖe. Abe ƒe alafa gbãtɔ me Yudatɔwo ene la, subɔsubɔkɔnyinyiwo ate ŋu akpɔ ŋusẽ ɖe wo me tɔwo dzi vevie. Togbɔ be ele nenema hã la, edzɔa dzi na mí be míadi dzinyuitɔ siwo le wo dome eye míatu míaƒe nufiafia ɖe Biblia me sidzedze si le wo si xoxo la dzi. Míeƒoa nu na wo abe amesiwo menya naneke kura o ene alo ɖia gbɔ wo o, ne woƒe subɔsubɔhaŋgɔnɔlawo tsia tre ɖe mía ŋu alo tia mía yome hã. Ke boŋ míenyae be wo dometɔ aɖewo ‘doa vevie Mawu subɔsubɔ’ togbɔ be sidzedze vavãtɔ mesu wo si o hã. Abe Yesu kple Paulo ene la, míetsɔa ɖe le amewo me anukwaretɔe, eye enye míaƒe didi vevie be woakpɔ xɔxɔ.—Romatɔwo 10:2.
13 Le gbeƒãɖeɖedɔa me la, mía dometɔ geɖe míedoa go amesiwo subɔsubɔhawo ƒe nya ti. Gake mawuvɔvɔ̃ aganɔ wo me kokoko eye woaxɔ Mawu dzi ase ahanɔ agbagba dzem vaseɖe afi aɖe be yewoanɔ agbe nyui. Le dzidzime totro sia si le to yim vĩ le mawumavɔ̃mavɔ̃ me la, ɖe mele be dzi nadzɔ mí be míedoa go amesiwo me Mawu dzixɔse aɖe le oa? Eye ɖe menye míaƒe didi vevie be míafia tadedeagu si me alakpanuwɔwɔ kple alakpadada mele o ƒe mɔ wo oa?—Filipitɔwo 2:15.
14, 15. Aleke wɔ anyigbamamã gã aɖe va li si me míaɖe gbeƒã nyanyuia le?
14 Le Yesu ƒe ɖɔ ŋuti lododoa me la, egblɔe ɖi be anyigbamamã gã aɖe anɔ anyi si me míawɔ gbeƒãɖeɖedɔa le. (Mateo 13:47-49) Esi June 15, 1992, Gbetakpɔxɔ nɔ lododo sia me ɖem la, egblɔ le axa 20 be: “Esi ƒe alafawo va nɔ yiyim la, Kristodukɔa me tɔwo wɔ akpa vevi aɖe le Mawu ƒe Nya gɔme ɖeɖe, eŋɔŋlɔ ake kple emamã me. Emegbe la, sɔlemehawo ɖo Biblia ƒe habɔbɔ siwo ɖe Biblia gɔme ɖe anyigba siwo le didiƒe ƒe gbegbɔgblɔwo me la anyi alo kpe asi ɖe wo ŋu. Woɖo mawunyadɔgbedela siwo nye atikewɔlawo kple nufialawo hã ɖa, eye wowɔ amewo mɔli ƒe Kristotɔwoe. Esia na woɖe lã vlo geɖe siwo ŋu Mawu mekpɔ ŋudzedze ɖo o. Gake ena ame miliɔn geɖe siwo menye Kristotɔwo o la va nya Biblia kple Kristotɔnyenye ƒomevi aɖe ya teti, togbɔ be gbegblẽtɔe wònye gake.”
15 Dziehe Amerika, Afrika, kple ƒukpo aɖewo dzi koŋ ye Kristodukɔa te ŋu trɔ dzime na amewo le wu. Woke ɖe ame fafa geɖe ŋu le teƒe mawo, eye míate ŋu ayi edzi anɔ nu nyui geɖe wɔm ne míewɔa nu le kakaɖedzi kple lɔlɔ̃ mɔ nu ɖe ɖokuibɔbɔla mawo ŋu, abe alesi Paulo wɔ nu ɖe trɔ̃subɔla-zu-Yudatɔwo ŋui ene. Amesiwo hã hiã míaƒe kpekpeɖeŋue nye ame miliɔn geɖe siwo míate ŋu ayɔ be Yehowa Ðasefowo “lɔ̃lawo.” Edzɔa dzi na wo be yewoakpɔ mí ɣesiaɣi si míayi wo gbɔ. Míesrɔ̃ Biblia kple wo dometɔ aɖewo eye wode míaƒe kpekpewo kpɔ, vevietɔ Kristo ƒe ku ƒe ƒe sia ƒe Ŋkuɖodzia. Ðe amesiawo menye ame gbogbo aɖewo siwo míaɖe gbeƒã Fiaɖuƒe nyanyuia na oa?
16, 17. (a) Amekawo ƒomevie míetsɔa nyanyuia yina na? (b) Aleke míesrɔ̃a Paulo le gbeƒãɖeɖe na ameƒomevi vovovowo mee?
16 Hekpe ɖe eŋu la, amesiwo le afisiwo menye Kristodukɔa ƒe anyigba dzi o—eɖanye míedo go wo le wo denyigbawo dzi loo alo woʋu va Ɣetoɖoƒedukɔwo me o—hã ɖe? Eye ame miliɔn gbogbo siwo gbe mawusubɔsubɔ eye wozu mawudzimaxɔselawo alo amesiwo gblɔna be yewomeka ɖe edzi ne Mawu li alo meli o hã ɖe? Ke amesiwo tsɔa dzo si de sɔsɔ ge kple mawusubɔsubɔ tɔ kplɔ egbe xexemenunya alo susuŋutinunya siwo bɔ fifia ɖo, esiwo ŋu nya wotana ɖe nuwɔwɔleameɖokuisi ƒe mɔfiamegbalẽ siwo le agbalẽdzraƒewo ya ɖe? Ðe wòle be míatsri amesiawo dometɔ aɖewo, eye míabui be woawo ya mate ŋu akpɔ ɖeɖe oa? Ne míesrɔ̃ apostolo Paulo la, míabui nenema o.
17 Esime Paulo nɔ gbeƒã ɖem le Atene la, mena nyahehe le xexemenunya ŋuti kple eƒe nyaselawo zu mɔ̃ ɖee o. Gake etrɔ asi le eƒe numeɖeɖea ŋu wòsɔ ɖe nɔnɔme si me amesiwo wònɔ nu ƒom na la nɔ ŋu, eye wògblɔ Biblia ƒe nyateƒeawo wo me kɔ susu nɔ wo me. Nenema ke amesiwo míeɖea gbeƒã na la ƒe subɔsubɔhawo alo xexemenunyawo nyanya tsitotsito mehiã o. Gake míetrɔa asi le alesi míagblɔ nya la na woe ŋu bene míaƒe ɖaseɖiɖia natse ku, eye esia wɔwɔ naa míezua ‘nusianu na ameƒomevi ɖesiaɖe.’ (Korintotɔwo I, 9:22) Esi Paulo nɔ lɛta ŋlɔm na Kristotɔ siwo nɔ Kolose la, egblɔ be: “Mizɔ le nunya me le amesiwo le egodo la ŋku me, eye miwɔ ɣeyiɣi la ŋuti dɔ blibo. Mina amenuveve kple dze nanɔ miaƒe nya me ɖaasi, bena mianya alesi wòdze be, miaɖo nya ŋuti na amesiame.”—Kolosetɔwo 4:5, 6, míawoe te gbe ɖe edzi.
18. Agba kae le mía dzi, eye nukae mele be míaŋlɔ be akpɔ gbeɖe o?
18 Abe Yesu kple apostolo Paulo ene la, mina míaɖe lɔlɔ̃ afia ame ɖesiaɖe ƒomevi. Vevietɔ mina míadze agbagba vevie agblɔ Fiaɖuƒea ŋuti nyanyuia na ame bubuwo. Gake mègaŋlɔ be gbeɖe o be Yesu gblɔ le eƒe nusrɔ̃lawo ŋu be: “Womenye xexeame ƒe akpa aɖeke o.” (Yohanes 17:16, NW) Míadzro nusi esia fia na mí me le nyati si kplɔe ɖo me.
[Biabiawo]
◻ Ƒo nu tso alesi Yesu ƒe nɔnɔme da sɔe ɖe xexeame ŋu la ŋuti.
◻ Aleke apostolo Paulo ɖe gbeƒã na Yudatɔwo kple trɔ̃subɔla-zu-Yudatɔwoe?
◻ Aleke Paulo ƒo nu na Mawu vɔ̃lawo kple dzimaxɔsetɔwoe?
◻ Aleke míawɔ azu ‘nusianu na ame ɖesiaɖe ƒomevi’ le míaƒe gbeƒãɖeɖedɔa me?
[Nɔnɔmetata siwo le axa 10]
Ne Kristotɔwo nyoa dɔme na amewo la, zi geɖe la, woate ŋu aɖe susu vɔ̃ bubu ɖe wo ŋu ɖa