Biblia Gbalẽ 44 Lia—Dɔwɔwɔwo

Eŋlɔla: Luka

Afi Si Wòŋlɔe Le: Roma

Ƒe Si Me Wòwu Eŋɔŋlɔ Nu: Ƒe 61 M.Ŋ. lɔƒo

Ɣeyiɣi Si Ƒe Nudzɔdzɔwo Ŋu Wòku Ðo: Ƒe 33–61 M.Ŋ. lɔƒo

LE Ŋɔŋlɔawo me gbalẽ 42 lia me la, Luka wɔ nuŋlɔɖi aɖe si ƒo nu tso Yesu kple eƒe nusrɔ̃lawo ƒe agbenɔnɔ, dɔwɔnawo, kple subɔsubɔ ŋu va se ɖe Yesu ƒe dziƒoyiyi dzi. Ŋɔŋlɔawo me gbalẽ 44 lia, si nye Apostoloawo ƒe Dɔwɔwɔwo, me nuŋlɔɖiwo yi Kristotɔ gbãtɔwo ƒe dɔwɔnawo ŋuti nyaa dzi heƒo nu tso hamea ɖoɖo to gbɔgbɔ kɔkɔea ƒe dɔwɔwɔ dzi ŋuti. Eƒo nu tso ale si ɖaseɖiɖidɔa keke ɖe enui, le Yudatɔwo dome gbã, kple dukɔwo katã me tɔwo dome emegbe, hã ŋuti. Ta 12 gbãtɔwo ƒe akpa gãtɔ ƒo nu tso Petro ƒe dɔwɔwɔwo ŋu, eye ta 16 mamlɛawo ƒo nu tso Paulo ƒe dɔwɔwɔwo ŋu. Luka wɔ dɔ kplikplikpli kple Paulo, enɔ eŋu le eƒe mɔzɔzɔwo dometɔ geɖe me.

² Teofilo ye wòŋlɔ agbalẽa na. Esi wòyɔe be “bubutɔ” ta la, anye be dziɖuɖumegãe wònye, alo bubudede eŋu ta koe. (Luka 1:3) Nuŋlɔɖia nye Kristo hamea ɖoɖo kple eƒe ŋgɔyiyi ŋuti nya si de pɛpɛpɛ. Nya gbãtɔ siwo ŋu wòƒo nu tsoe lae nye ale si Yesu ɖe eɖokui fia eƒe nusrɔ̃lawo le eƒe tsitretsitsi megbe, eye emegbe wòƒo nu tso nu vevi aɖewo, siwo dzɔ le ƒe 33 va se ɖe 61 M.Ŋ. me lɔƒo ŋu, wònye ƒe 28 kloe ƒe ŋutinya.

³ Woda asi ɖe edzi tso keke blema ke be, ame si ŋlɔ Luka ƒe Nya Nyui Gbalẽa la kee ŋlɔ Dɔwɔwɔwo ƒe agbalẽa hã. Teofilo ye wòŋlɔ agbalẽ evea siaa na. Nya siwo Luka tsɔ wu eƒe Nya Nyui Gbalẽa nu la kee wòtsɔ dze Dɔwɔwɔwo ƒe agbalẽa gɔme, si wɔe be nuŋlɔɖi eveawo wɔ ɖeka, eye wònye kpeɖodzi hã be ame ɖekae ŋlɔ wo kple evea. Edze abe Luka wu Dɔwɔwɔwo ƒe agbalẽa ŋɔŋlɔ nu le ƒe 61 M.Ŋ. me lɔƒo ene, eye ɖewohĩ ƒe eve siwo wònɔ apostolo Paulo gbɔ le Roma la ƒe nuwuwu lɔƒoe nye esia. Esi wònye ƒe ma me nudzɔdzɔwo ŋu nya le agbalẽa me ta la, mate ŋu awu agbalẽa ŋɔŋlɔ nu do ŋgɔ na ɣemaɣi o, eye esi wònye megblɔ nya aɖeke tso Paulo ƒe nya si wòde asi na Kaisaro be wòagbugbɔ adrɔ̃ na ye la ŋuti afiatsotso aɖeke ŋu o ta la, efia be ewu eŋɔŋlɔ nu le ƒe ma, si nye ƒe 61 M.Ŋ., me.

⁴ Biblia ŋuti nunyalawo da asi ɖe Dɔwɔwɔwo ƒe agbalẽa dzi tso keke blemaɣeyiɣiwo me ke be edze anɔ agbalẽ siwo dzi woda asi ɖo la dome. Agbalẽa ƒe akpa aɖewo dze le blema Hela Ŋɔŋlɔawo ƒe asinuŋɔŋlɔgbalẽ xoxotɔ siwo kpɔtɔ li fifia la dometɔ aɖewo dome, vevietɔ le Michigan No. 1571 (P³⁸) si woŋlɔ le ƒe alafa etɔ̃lia alo enelia M.Ŋ. me, kple Chester Beatty No. 1 (P⁴⁵) si woŋlɔ le ƒe alafa etɔ̃lia me la me. Kpeɖodzi siawo ɖee fia be wonɔ Dɔwɔwɔwo ƒe agbalẽa kple Ŋɔŋlɔawo me gbalẽ bubu siwo tso gbɔgbɔ me la zãm xoxoxo, eya ta ele agbalẽ siwo dzi woda asi ɖo tso blema ke la dome. Ale si Luka ŋlɔ Dɔwɔwɔwo ƒe agbalẽae la ɖee fia be, ewɔ numekuku tsitotsito abe ale si míede dzesii le eƒe Nya Nyui Gbalẽa me ene. Aƒetɔ William M. Ramsay gblɔ be Dɔwɔwɔwo ƒe agbalẽa ŋlɔla nye “ŋutinyaŋlɔla adodoeawo dometɔ ɖeka,” eye wòɖe nu si nya sia fia me be: “Nɔnɔme gbãtɔ kple esi le vevie, si wodea dzesi le ŋutinyaŋlɔla nyui ŋue nye nyateƒetoto. Ele be kakaɖedzi nanɔ nya si wògblɔ ŋu.”a

⁵ Kpeɖodzi siwo fia be Luka ƒe nuŋlɔɖiawo de pɛpɛpɛ dometɔ ɖekae nye nya siwo Britaintɔwo ƒe ƒudzisrafomegã Edwin Smith, si kpɔ ƒudziʋawɔwɔ ŋu nyawo gbɔ le Mediterranea Ƒua dzi le Xexemeʋa I wɔɣi gblɔ, si dze le nyadzɔdzɔgbalẽ si woyɔna be The Rudder, March 1947, tɔ me be: “Menye kuɖɔ ɖeka koe nɔa blema tɔdziʋuwo ŋu abe ale si wòle egbea ene o, ke boŋ kuɖɔka evee nɔa wo ŋu, eye ɖeka nɔa ʋua ƒe axa eveawo dometɔ ɖe sia ɖe ŋu le megbe lɔƒo; esia tae Luka Kɔkɔe yɔ “kuɖɔkawo” le eƒe agbalẽa me ɖo. [Dɔw. 27:40] . . . Míewɔ numekuku tsitotsito tso nya ɖe sia ɖe si Luka Kɔkɔe gblɔ tso tɔdziʋu sia ƒe mɔzɔzɔ ŋu, tso esime ʋua ho le teƒe si woyɔna be Ʋudzeƒe Nyui la va se ɖe esime wòva dze ɖe Melite ŋu, eye míekpɔe be numekuku bubuwo ɖo kpe edzi be eƒe nyawo de pɛpɛpɛ; eye be ɣeyiɣi didi si wògblɔ be tɔdziʋua nɔ ƒua dzi la sɔ pɛpɛpɛ kple mɔa ƒe didime; eye be afi si wògblɔ be ʋua ɖo la nye nyateƒe. Esiawo katã ɖo kpe edzi be, Luka hã nɔ mɔa zɔlawo dome, eye be woate ŋu aka ɖe eƒe nyawo dzi bliboe be wonye nyateƒe.”b

⁶ Nu siwo ŋu tomenukulawo ke ɖo hã ɖo kpe Luka ƒe nuŋlɔɖia ƒe nyateƒenyenye dzi. Le kpɔɖeŋu me, tomenukulawo ke ɖe Artemis ƒe gbedoxɔ kple blema fefewɔƒe, afi si Efesotɔwo na dua me tɔ zi le Paulo ta, la ŋu le Efeso. (Dɔw. 19:27-41) Wokpɔ nuŋlɔɖi aɖewo, siwo ɖo kpe edzi be, esɔ be Luka zã dzesideŋkɔ “dua me dziɖulawo” na Tesalonika dua me dziɖuɖudɔwɔlawo. (17:6, 8) Wofɔ nuŋlɔɖi eve le Melite siwo ɖo kpe edzi be, Publio ye nye “amegã” le Melite ɣemaɣi abe ale si Luka gblɔe ene pɛpɛpɛ.—28:7.c

⁷ Gawu la, nuŋlɔɖi siwo Luka wɔ tso Petro, Stefano, Kornelio, Tertulo, Paulo, kple ame bubuwo ƒe nuƒowo ŋu la to vovo le atsyã kple ɖoɖo si nu wole la nu. Nuƒo siwo Paulo ƒo le nyasela vovovowo ŋkume, kura gɔ̃ hã to vovo le nɔnɔmeawo ta. Esia fia be, nya siwo Luka ŋutɔ se, alo esiwo nuawo teƒe kpɔlawo gblɔ nɛ, ŋuti ye wòka nya ta le. Menye nyakpakpaŋlɔla ye Luka nye o.

⁸ Míenya nu tso Luka ŋutɔ ŋu fũu o. Menye apostoloe Luka ŋutɔ nye o, gake ezɔ kple wo dometɔ aɖewo. (Luka 1:1-4) Apostolo Paulo yɔ Luka ŋkɔ zi etɔ̃. (Kol. 4:10, 14; 2 Tim. 4:11; Filem. 24) Ame sia, si Paulo yɔ be “atikewɔla lɔlɔ̃tɔ la,” nɔ Paulo ŋu kplikplikpli hena ƒe aɖewo. Luka zã nya siwo nye “wo” le afi aɖewo, kple “mí” le afi bubuwo, si fia be enɔ Paulo gbɔ le Troa le Paulo ƒe duta nya nyui gbɔgblɔ mɔzɔzɔ evelia me, be anya tsi Filipi va se ɖe esime Paulo trɔ gbɔ le ƒe aɖewo megbe, eye be egava nɔ Paulo ŋu hezɔ mɔ kplii yi Roma esime woyina nya drɔ̃ ge na Paulo.—Dɔw. 16:8, 10; 17:1; 20:4-6; 28:16.

NU SI TAE VIÐE LE EŊU

³² Dɔwɔwɔwo ƒe agbalẽa na kpeɖodzi bubuwo kpe ɖe Nya Nyui Gbalẽawo ŋu, be Hebri Ŋɔŋlɔawo nye agbalẽ siwo ŋu kakaɖedzi le, siwo tso Mawu ƒe gbɔgbɔ me. Esi wòsusɔ vie Pentekoste ŋkekea naɖo la, apostolo Petro ƒo nu tso nyagblɔɖi eve siwo va eme ŋu be “gbɔgbɔ kɔkɔe la gblɔ ɖi to David nu tso Yuda . . . ŋuti.” (Dɔw. 1:16, 20; Ps. 69:26; 109:8) Petro gblɔ na ame siwo va Pentekoste ŋkekenyuia ɖuƒe, siwo ƒe mo wɔ yaa le nu siwo wokpɔ ta, la hã be: “Nya si wogblɔ to nyagblɔɖila Yoel dzi ye nye [esia].”—Dɔw. 2:16-21; Yoel 3:1-5; tsɔ Dɔwɔwɔwo 2:25-28, 34, 35 hã sɔ kple Psalmo 16:8-11 kple 110:1.

³³ Be Petro nana ameha bubu aɖe si ƒo ƒu ɖe gbedoxɔa godo la naxɔ ase la, egayɔ Mose ƒe nyawo tso Hebri Ŋɔŋlɔawo me, eye emegbe wògblɔ be: “Eye nyagblɔɖilawo katã, ɛ̃, tso Samuel dzi kple ame siwo katã kplɔe ɖo, ame ale si nu ƒo nu la, wogblɔ nya fia kɔtɛ le ŋkeke siawo hã ŋuti.” Emegbe esi Petro tsi tsitre ɖe Sanhedrin la ŋkume la, eyɔ Psalmo 118:22 tsɔ ɖo kpe edzi be, Kristo, si nye kpe si wogbe la, va zu “dzogoedzikpe.” (Dɔw. 3:22-24; 4:11) Filipo ɖe ale si Yesaya 53:7, 8 me nyawo va emee la me na Etiopiatɔwo ƒe amegã la, eye esi wòse egɔme la, ebia ɖokuibɔbɔtɔe be woanyrɔ ye. (Dɔw. 8:28-35) Nenema kee esime Petro nɔ nu ƒom na Kornelio tso Yesu ŋu la, eɖo kpe edzi be: “Eyama ŋutie nyagblɔɖilawo katã ɖi ɖase le.” (10:43) Esi aʋatsotso ŋuti nyaʋiʋlia fɔ ɖe te la, Yakobo tsɔ nya siawo ɖo kpe eƒe nyametsotsoa dzi be: “Nyagblɔɖilawo ƒe nyawo wɔ ɖeka kple esia, abe ale si tututu woŋlɔe ɖi ene.” (15:15-18) Ŋɔŋlɔ siawo kee apostolo Paulo tsɔ ɖo kpe eƒe nyawo dzi. (26:22; 28:23, 25-27) Ale si nusrɔ̃lawo kple ame siwo woƒo nu na la lɔ̃ ɖe edzi be Hebri Ŋɔŋlɔawo nye Mawu ƒe Nya la ƒe akpa aɖe la, nye kpeɖodzi be Hebri Ŋɔŋlɔawo tso Mawu ƒe gbɔgbɔ me vavã.

³⁴ Viɖe le Dɔwɔwɔwo ƒe agbalẽa ŋu ŋutɔ, elabena ena míekpɔ ale si wowɔ ɖo Kristotɔwo ƒe hamea, kple ale si wòwɔ ŋgɔyiyi to gbɔgbɔ kɔkɔea ƒe ŋusẽ mee. Le nuŋlɔɖi wɔdɔɖeamedzi sia katã me la, míede dzesi ale si Mawu ƒe yayra na dzidziɖedzi geɖe vae, Kristotɔ gbãtɔwo ƒe dzideƒo kple dzidzɔ, woƒe tamanamana le yometiti me, kple woƒe lɔlɔ̃ faa be yewoasubɔ, si ƒe kpɔɖeŋu ɖekae nye Paulo ƒe lɔlɔ̃ be yeasubɔ le duta, kple eƒe Makedonia yiyi. (4:13, 31; 15:3; 5:28, 29; 8:4; 13:2-4; 16:9, 10) Nenema kee egbegbe Kristo hamea hã le, elabena lɔlɔ̃, ɖekawɔwɔ, kple taɖodzinu ɖeka, te emenɔlawo ƒo ƒu, esi “wole nu ƒom tso Mawu ƒe nu dzɔtsuwo ŋu” to gbɔgbɔ kɔkɔea ƒe mɔfiafia dzi.—2:11, 17, 45; 4:34, 35; 11:27-30; 12:25.

³⁵ Dɔwɔwɔwo ƒe agbalẽa ɖe ale si tututu wòle be Kristotɔwo nawɔ gbeƒãɖeɖe Mawu Fiaɖuƒea ƒe dɔ lae. Paulo ŋutɔ ɖo esia ƒe kpɔɖeŋu ɖi, esime wògblɔ be: “Nyemegbe nu siwo ŋu viɖe le la dometɔ aɖeke gbɔgblɔ na mi o, eye nyemegbe nufiafia mi le dutoƒo kple aƒe me yi aƒe me hã o.” Azɔ egblɔ yi edzi be: “Meɖi ɖase . . . tsitotsito.” ‘Ðaseɖiɖi tsitotsito’ ƒe nya sia dze zi geɖe le agbalẽ bliboa me, eye edze koŋ le eme nya mamlɛawo me, afi si míekpɔ Paulo ƒe ɖokuitsɔtsɔna eƒe gbeƒãɖeɖe kple nufiafia dɔa bliboe esime wònɔ gaxɔ me kura gɔ̃ hã, ŋuti kpeɖodzi le, be: “Eye wòɖe nya la me na wo to ɖaseɖiɖi tsitotsito le Mawu fiaɖuƒe la ŋu, kple kpeɖodziwo nana tso Mose ƒe se la kple Nyagblɔɖilawo me dzi, tso ŋdi va se ɖe fiẽ, be yeana woatrɔ ɖe Yesu ŋu.” Mina míawo hã míaƒe dzi naku ɖe nu ɖeka ŋu alea le Fiaɖuƒe subɔsubɔdɔa wɔwɔ me!—20:20, 21; 28:23; 2:40; 5:42; 26:22.

³⁶ Aɖaŋuɖoɖo nyui geɖe le Paulo ƒe nuƒo si wòƒo na dzikpɔla siwo tso Efeso la me na dzikpɔla siwo li egbea. Esi wònye gbɔgbɔ kɔkɔe ye ɖo wo ta la, ele vevie be ‘woakpɔ wo ɖokui kple alẽha blibo la dzi nyuie,’ ahalé be nɛ, eye woakpɔ eta tso amegãxi nyanyrãwo, siwo dia eƒe gbegblẽ la, si me. Menye agbanɔamedzi vi aɖee esia nye o! Ele be dzikpɔlawo nanɔ ŋudzɔ, eye woatsɔ Mawu ƒe amenuveve ƒe nya la atu wo ɖokui ɖoe. Ne wole agbagba dzem le kpekpem ɖe ame siwo gbɔdzɔ ŋu la, ele be “Aƒetɔ Yesu ƒe nya siawo nanɔ susu me na [wo], esime eya ŋutɔ gblɔ be: ‘Dzidzɔ geɖe le nunana me wu nuxɔxɔ.’”—20:17-35.

³⁷ Paulo ƒe nuƒo bubuawo hã na Biblia me gɔmeɖosewo dze ƒãa. Esia ƒe kpɔɖeŋu ɖedzesi ɖekae nye nya si wòhe kple xexemenunyala siwo nye Stoatɔwo kple Epikurotɔwo le Areopago la. Gbã la, eyɔ nya siwo le vɔsamlekpui si ŋu woŋlɔ ɖo be: “Mawu Si Womenya O La Tɔe” la, eye wònɔ te ɖe nya sia dzi ɖe eme be Mawu, dziƒo kple anyigba ƒe Aƒetɔ la, ame si wɔ amewo ƒe dukɔ sia dukɔ tso ame ɖeka me la, “mele adzɔge tso mía dometɔ aɖeke gbɔ hafi o.” Emegbe eyɔ woƒe hakpanyaŋlɔlawo ƒe nyawo gblɔ be, “Elabena eƒe viwoe míawo hã míenye,” tsɔ fia ale si wòɖi kokoe be woasusu be sika, klosalo, alo kpe mee yewodzɔ tso. Ale Paulo ɖee fia ŋuɖɔɖotɔe be Mawu gbagbe la ɖeka koe nye Dziɖula Gãtɔ. Eƒe nuƒoa ƒe nuwuwu lɔƒo hafi wòƒo nu tso tsitretsitsi ƒe nyaa ŋu, eye le esia wɔwɔ me kura gɔ̃ hã la, meyɔ Kristo ŋkɔ tẽe o. Ena wose egɔme be, Mawu vavã ɖeka kolia lae nye dziɖula si ƒo ɖe sia ɖe ta, eye wo dometɔ aɖewo va zu xɔsetɔwo le ema ta.—17:22-34.

³⁸ Dɔwɔwɔwo ƒe agbalẽa de “Ŋɔŋlɔ blibo” la sɔsrɔ̃ veviedodotɔe edziedzi ƒe dzi ƒo. Esi Paulo ɖe gbeƒã le Beroia zi gbãtɔ la, wokafu Yudatɔ siwo nɔ afi ma la be ‘woɖɔ ʋu,’ elabena “wotso dzi me lɔ̃ faa xɔ nya la, eye wonɔa Ŋɔŋlɔawo me dzrom tsitotsito gbe sia gbe be nya siawo le nenema hã.” (17:11) Nenema kee egbea hã la, Ŋɔŋlɔawo me dzodzro tsitotsito le hadede kple Yehowa ƒe hame si dzi eƒe gbɔgbɔa le la me, ahe yayra siwo nye kakaɖedzi kple xɔse sẽŋu avae na mí. Nusɔsrɔ̃ alea dzi koe ame ate ŋu ato ase Mawu ƒe gɔmeɖosewo gɔme nyuie ahakpɔ ŋudzedze ɖe wo ŋu. Gɔmeɖose nyui siawo dometɔ ɖeka dze le Dɔwɔwɔwo 15:29. Dziɖuhaa, si me apostoloawo kple ame tsitsi bubuwo nɔ le Yerusalem la, na wonyae be, togbɔ be aʋatsotso menye nudidi siwo wobia tso gbɔgbɔ me Israel si o hã la, sededewo li tẽe be woatsri trɔ̃subɔsubɔ, ʋu, kple ahasiwɔwɔ ya.

³⁹ Nusrɔ̃la gbãtɔ mawo srɔ̃ Ŋɔŋlɔawo nyuie ale gbegbe be, wote ŋu yɔa wo me nyawo bɔbɔe, eye woɖea wo me. Sidzedze vavãtɔ kple Mawu ƒe gbɔgbɔ do ŋusẽ wo be wote ŋu nɔ te ɖe yometiti sesẽtɔwo kura gɔ̃ hã nu. Petro kple Yohanes ɖo kpɔɖeŋu ɖi na Kristotɔ vavãwo katã esime wogblɔ na dziɖula tsitretsiɖeŋulawo kalẽtɔe be: “Ne edzɔ le Mawu ŋkume be, míaɖo to miawo wu Mawu la, mia ŋutɔwo mibu eŋu kpɔ. Gake míawo ya la, míate ŋu adzudzɔ nuƒoƒo tso nu siwo míekpɔ hese la ŋu o.” Eye esi wogakplɔ wo va Sanhedrin la ŋkume, afi si ‘wode se na wo eme kɔ nyuie le’ be woagayi edzi anɔ nu fiam le Yesu ƒe ŋkɔ me o la, woɖo eŋu na wo kã be: “Ele be míaɖo to Mawu abe dziɖula ene wu amewo.” Nuwɔwɔ vɔvɔ̃manɔmee alea na woɖi ɖase na dziɖulawo, eye ena Sefiala xɔŋkɔ Gamaliel gblɔ nya vevi aɖe si na woɖe mɔ ɖe subɔsubɔ ƒe ablɔɖe ŋu, si na woɖe asi le apostoloawo ŋu—4:19, 20; 5:28, 29, 34, 35, 38, 39.

⁴⁰ Yehowa ƒe tameɖoɖo wɔnuku si ku ɖe eƒe Fiaɖuƒea ŋu, si dze le Biblia bliboa katã me la, gaɖe dzesi koŋ le Dɔwɔwɔwo ƒe agbalẽa me. Woɖee fia le agbalẽa ƒe gɔmedzedze be wokpɔ Yesu le ŋkeke 40 siwo do ŋgɔ na eƒe dziƒoyiyi me “wònɔ nya siwo ku ɖe Mawu fiaɖuƒe la ŋu gblɔm.” Nya aɖe si nusrɔ̃lawo bia ku ɖe Fiaɖuƒea gbugbɔgaɖoanyi ŋu ye na Yesu gblɔ na wo be ele be woanye yeƒe ɖasefowo va se ɖe anyigba seƒe ke gbã. (1:3, 6, 8) Nusrɔ̃lawo dze egɔme tso Yerusalem ɖe gbeƒã Fiaɖuƒea dzinɔameƒotɔe. Yometiti na woƒu kpe Stefano wòku, eye nusrɔ̃lawo ka hlẽ yi nuto bubuwo me. (7:59, 60) Nuŋlɔɖiwo li hã be Filipo nɔ “Mawu fiaɖuƒe la . . . ŋuti nya nyuia gblɔm” le Samaria, eye wòkpɔ dzidzedze geɖe le afi ma, eye be Paulo kple eƒe zɔhɛwo hã ɖe gbeƒã “fiaɖuƒe la” le Asia, Korinto, Efeso, kple Roma. Kristotɔ gbãtɔ siawo katã ɖo ŋuɖoɖo ɖe Yehowa kple eƒe gbɔgbɔ si doa ŋusẽ ame ŋu bliboe la ƒe kpɔɖeŋu nyui aɖe ɖi na mí. (8:5, 12; 14:5-7, 21, 22; 18:1, 4; 19:1, 8; 20:25; 28:30, 31) Ne míelé ŋku ɖe dzonɔameme kple dzideƒo si woɖe fia, kpakple ale si Yehowa yra woƒe agbagbadzedzeawo geɖee, ŋu la, eʋãa míawo hã be míawɔ nuteƒe le “ɖaseɖiɖi tsitotsito le Mawu fiaɖuƒe la ŋu” me.—28:23.

[Etenuŋɔŋlɔwo]