Agbenɔnɔ Le Ku Megbe—Nya Kae Biblia Gblɔ?

“Anyi nènye, eye anyi ke nagatrɔ azu!”—MOSE I, 3:19.

1, 2. (a) Nukpɔsusu vovovo kawoe le amewo si le Agbenɔnɔ le Ku Megbe ŋu? (b) Nuka mee wòle be míadzro be míanya nusi Biblia fia le luʋɔ ŋu?

HINDUTƆ xexemenunyala Nikhilananda gblɔ be: “Fukpekpe mavɔ ƒe nufiafia la mesɔ ɖe dzixɔse si nye be Mawu lɔ̃ eƒe nuwɔwɔwo la nu o. . . . Be woaxɔe ase be wohea to na luʋɔ ɖe vodada siwo wòwɔ ƒe ʋee aɖewo ta, esi womena mɔnukpɔkpɔe be wòawɔ ɖɔɖɔɖo o la tsi tre ɖe nuŋububu nyui ɖesiaɖe ŋu.”

² Funyafunya mavɔ ƒe nufiafia la ɖea fu na ame geɖe egbea abe Nikhilananda ke ene. Nenema ke nufiafia aɖewo abe Nirvana ɖoɖo kple ɖekawɔwɔ kple dzɔdzɔme hã gɔmesese sesẽ na ame bubuwoe. Amesiwo gblɔna be Biblia dzie yewotu yewoƒe dzixɔsewo ɖo gɔ̃ hã ƒe nukpɔsusuwo to vovo le nusi luʋɔ nye kple nusi dzɔna ɖe edzi ne míeku ŋu. Gake nuka tututue Biblia fia le luʋɔ ŋu? Be míanya la, ehiã be míadzro Hebri kple Hela gbe me nya siwo gɔme woɖe be “luʋɔ” le Biblia me la me.

Nusi Biblia Gblɔ be Luʋɔ Nye

 3. (a) Nya ka gɔmee woɖe be “luʋɔ” le Hebri Ŋɔŋlɔawo me, eye nukae wòfia ŋutɔŋutɔ? (b) Aleke Mose I, 2:7 ɖo kpe edzi be nya “luʋɔ” ate ŋu afia ameti blibo?

³ Hebrigbe me nya si gɔme woɖe be “luʋɔ” enye neʹphesh, eye edze zi 754 le Hebri Ŋɔŋlɔawo me. Neʹphesh gɔme ɖe? The Dictionary of Bible and Religion gblɔ be “zi geɖe la, efiaa ame blibo si le agbe, si nye ameti bliboa.” Esia dze le nusi Biblia gblɔ le luʋɔ ŋu le Mose I, 2:7 me be: “Yehowa Mawu tsɔ anyi mè ame, eye wògbɔ agbegbɔgbɔ ɖe eƒe ŋɔti me; ale ame la zu luʋɔ gbagbe.” De dzesii be ame gbãtɔ la “zu” luʋɔ. Ema fia be luʋɔ menɔ Adam si o; luʋɔe wònye—abe alesi amesi va zu ɖɔkta nye ɖɔkta ene. Eyata nya “luʋɔ” fia ame bliboa le afisia.

 4. Nya ka gɔmee woɖe be “luʋɔ” le Kristotɔwo ƒe Hela Ŋɔŋlɔawo me, eye nukae nya sia fia ŋutɔŋutɔ?

⁴ Nya si gɔme woɖe be “luʋɔ” (psy·kheʹ) la dze wòwu zi alafa ɖeka le Kristotɔwo ƒe Hela Ŋɔŋlɔawo me. Zi geɖe la, nya sia fiaa ame blibo abe neʹphesh ke ene. Le kpɔɖeŋu me, bu nya siwo gbɔna ŋu kpɔ: “Nye luʋɔ ʋuʋu kpẽkpẽkpẽ.” (Yohanes 12:27) “Vɔvɔ̃ ɖo luʋɔ ɖesiaɖe.” (Dɔwɔwɔwo 2:43, NW) “[Luʋɔ ɖesiaɖe, NW] nabɔbɔ eɖokui na dziɖuɖu, siwo ŋusẽ li na.” (Romatɔwo 13:1) “Mifa akɔ na luʋɔ siwo lé blanui.” (Tesalonikatɔwo I, 5:14, NW) “Woɖe ame ʋee, siwo le luʋɔ enyi [tso] tsi me.” (Petro I, 3:20) Edze ƒã be psy·kheʹ fia ame bliboa, abe neʹphesh ke ene. Agbalẽnyala Nigel Turner gblɔ be nya sia “fia nusi míenya be enye amegbetɔ, amea ŋutɔ, si nye ŋutilã si me wogbɔ Mawu ƒe rûaḥ [gbɔgbɔ] dee. . . . Ame bliboa dzie wohe susu yii.”

 5. Luʋɔwoe lãwo nyea? Ðe eme.

⁵ Enyo be míade dzesii be menye amegbetɔwo koe wozãa nya “luʋɔ” na le Biblia me o ke wozãnɛ na lãwo hã. Le kpɔɖeŋu me, esime wonɔ nu ƒom tso nuwɔwɔ siwo le atsiaƒu me ŋu la, Mose I, 1:20 gblɔ be Mawu de se be: “[Luʋɔ, NW] gbagbewo neƒu tsi le tsia me.” Eye le nuwɔwɔ ƒe ŋkeke si kplɔe ɖo me la, Mawu gblɔ be: “[Luʋɔ, NW] gbagbewo nedo tso anyigba me hamehame, aƒemelãwo kple nutatawo kple gbemelãwo hamehame!”—Mose I, 1:24; tsɔe sɔ kple Mose IV, 31:28.

 6. Nya kae míate ŋu agblɔ le alesi Biblia zã nya “luʋɔ” ŋu?

⁶ Eyata nya “luʋɔ” si wozã le Biblia me fia ame alo lã alo agbe si le amegbetɔ alo lã si. (Kpɔ aɖaka si le etame.) Alesi Biblia ƒo nu tso luʋɔ ŋui la me kɔ heto mɔ ɖeka, eye amegbetɔ ƒe xexemenunyafiafia kple aʋatsodzixɔse totrowo metɔtɔe o. Esi wòle nenema ta la, nya vevi si wòle be míabia enye be, Nukae Biblia gblɔ be edzɔna ɖe luʋɔ dzi le ku me?

Ame Kukuwo Menya Naneke O

7, 8. (a) Nukae Ŋɔŋlɔawo ɖe fia le nɔnɔme si me ame kukuwo le ŋu? (b) Gblɔ Biblia me kpɔɖeŋu siwo fia be luʋɔ ate ŋu aku.

⁷ Wona nɔnɔme si me ame kukuwo le dze ƒã le Nyagblɔla 9:5, 10, afisi míexlẽ le be: “Kukuawo menya naneke o . . . Nuwɔwɔ alo tamebubu, sidzedze alo nunya mele tsieƒe . . . o.” Eyata kue nye agbemanɔmanɔ. Hakpala la ŋlɔ be ne ame ku la, “egbugbɔna yia eƒe anyi gbɔ; gbemagbe eƒe tameɖoɖowo nu yina.” (Psalmo 146:4) Eyata ame kukuwo menya naneke o eye womagate ŋu awɔ naneke o.

⁸ Esime Mawu nɔ afia tsom na Adam la, egblɔ be: “Anyi nènye, eye anyi ke nagatrɔ azu!” (Mose I, 3:19) Hafi Mawu natsɔ anyi amè Adam eye wòana agbee la, menɔ afi aɖeke o. Esime Adam ku la, etrɔ yi nɔnɔme ma me. Kue wotsɔ he to nɛ—menye xexe bubu aɖe me yiyi o. Ekema nukae dzɔ ɖe eƒe luʋɔ dzi? Esi nya “luʋɔ” fiaa ame le Biblia me la, ne míegblɔ be Adam ku la, míele gbɔgblɔm be luʋɔ si woyɔ be Adam la ku. Esia masɔ to me na amesi xɔ luʋɔ makumaku dzi se o. Gake Biblia gblɔ be: “Luʋɔ, si wɔ nuvɔ̃ la, eyae aku.” (Xezekiel 18:4) Mose III, 21:1 (NW) ƒo nu tso “luʋɔ si ku” (“ame kuku”) ŋu. Eye wogblɔ na Nasiretɔwo be womegate ɖe “luʋɔ kuku aɖeke” (“nu kuku,” Lamsa) ŋu o.—Mose IV, 6:6, NW.

 9. Nukae Biblia wɔnɛ esime wògblɔ be Raxel ƒe “luʋɔ nɔ dodom le eme”?

⁹ Ke nya si wogblɔ le Mose I, 35:18 le Raxel ƒe ku si wɔ nublanui le viaŋutsuvi evelia dziɣi ŋu ya ɖe? Míexlẽ le Mose I, 35:18 be: “Esi [eƒe luʋɔ nɔ dodom le eme, NW] eye wòkpɔ bena, yele kuku ge la, ena ŋkɔe bena Benoni; ke fofoa yɔe be Benyamin.” Ðe nya sia fia be nane nɔ Raxel me si do go le eme esi wòkua? Kura o. Ðo ŋku edzi be nya “luʋɔ” agate ŋu afia agbe si le ame me. Eyata le go sia me la, nusi Raxel ƒe “luʋɔ” fia koe nye eƒe “agbe.” Esia tae woɖe nyagbɔgblɔ “eƒe luʋɔ nɔ dodom le eme” gɔme le Biblia bubuwo me be “eƒe agbe nu nɔ tsotsom” (Knox), “egbɔ zi mamlɛtɔ” (JB), kple “eƒe agbe do le eme” (Bible in Basic English). Naneke meli si fia be Raxel ƒe akpa ɣaɣla aɖe kpɔtɔ nɔ agbe le eƒe ku megbe o.

10. Mɔ ka nue ahosia ƒe viŋutsu si wofɔ ɖe tsitre la ƒe luʋɔ “gagbugbɔ va eme”?

¹⁰ Nenema ke wòle le ahosi aɖe ƒe viŋutsu si wofɔ ɖe tsitre gome, si woŋlɔ ɖe Fiawo I, ta 17. Míexlẽ le kpukpui 22 lia be esi Eliya do gbe ɖa ɖe ŋutsuvia ta la, “Yehowa se Eliya ƒe gbe, eye ɖevi la ƒe luʋɔ gagbugbɔ va eme, eye wògbɔ agbe.” Le afisia hã la, nya “luʋɔ” fia “agbe.” Eyata New American Standard Bible xlẽ be: “Ðevia ƒe agbe trɔ va eme eye wògbɔ agbe.” Ẽ, agbee trɔ va ŋutsuvia me, ke menye vɔvɔli aɖee o. Esia wɔ ɖeka kple nya si Eliya gblɔ na ŋutsuvia dada be: “Kpɔ ɖa, viwò la [ame bliboa] tsi agbe.”—Fiawo I, 17:23.

Ke Gbɔgbɔa Ya Ðe?

11. Nukata nya “gbɔgbɔ” mate ŋu afia ame ƒe akpa aɖe si le eɖokui si si nɔa agbe le ku megbe o?

¹¹ Biblia gblɔ be ne ame ku la, “eƒe gbɔgbɔ [dona le eme, NW], egbugbɔna yia eƒe anyi gbɔ.” (Psalmo 146:4) Ðe esia fia be gbɔgbɔ ŋutɔŋutɔ si le eɖokui si dona le ame me eye wòyia edzi nɔa agbe le ame ƒe ku megbea? Mate ŋu adzɔ nenema o, elabena hakpala la gagblɔ be: “Gbemagbe eƒe tameɖoɖowo nu yina” (“eƒe tamesusuwo katã wua enu,” The New English Bible). Ekema nukae nye gbɔgbɔ la, eye aleke ‘wòdona’ le ame mee ne eku?

12. Nukae Hebri kple Hela gbe me nya siwo gɔme woɖe be “gbɔgbɔ” le Biblia me fia?

¹² Nya siwo gɔme woɖe be “gbɔgbɔ” le Biblia me (Hebrigbe, ruʹach; Helagbe, pneuʹma) gɔmeɖeɖe ŋutɔŋutɔe nye “ŋɔtimegbɔgbɔ.” Eyata le esi teƒe be R. A. Knox ƒe gɔmeɖeɖea nagblɔ be “eƒe gbɔgbɔ dona le eme” la, ezã nyagbɔgblɔ “ŋɔtimegbɔgbɔ do le ametia me.” (Psalmo 145:4) Gake nya “gbɔgbɔ” fia nu geɖe wu ya gbɔgbɔ to ŋɔti me ko. Le kpɔɖeŋu me, esi Mose I, 7:22 nɔ nu ƒom tso amegbetɔ kple lãwo ƒe agbe tsɔtsrɔ̃ le xexeame katã ƒe Tsiɖɔɖɔa me ŋu la, egblɔ be: “Nusianu, si agbegbɔgbɔ [alo, gbɔgbɔ; Hebrigbe, ruʹach] le eme, si gbɔna toa ŋɔti me, eye wònɔa agbe le anyigba ƒuƒui dzi la ku.” Eyata “gbɔgbɔ” ate ŋu afia agbeŋusẽ si le nu gbagbewo katã, amegbetɔ kple lãwo siaa, me si ŋɔtimegbɔgbɔ léna ɖe te.

13. Ne ame ku la, aleke gbɔgbɔa trɔna yia Mawu gbɔe?

¹³ Ekema nukae wòfia esime Nyagblɔla 12:7 gblɔ be ne ame ku la, ‘gbɔgbɔa gbugbɔ yia Mawu vavã si tsɔe na la gbɔ’? Ðe esia fia be gbɔgbɔa toa yame ŋutɔŋutɔ yia Mawu gbɔa? Ao, mefia nenema kura o. Esi agbeŋusẽe gbɔgbɔ nye ta la, ‘egbugbɔ yia Mawu vavã la gbɔ’ le gɔmesesea nu be agbe si ame ma agava nɔ le etsɔme ƒe mɔkpɔkpɔ ɖesiaɖe le Mawu ɖeɖeko si me. Mawu koe ate ŋu agade gbɔgbɔa, alo agbeŋusẽa eme, si ana ame nagbɔ agbe. (Psalmo 104:30) Gake ɖe Mawu ɖo tame be yeawɔ nenemaa?

“Atsi Tre”

14. Nukae Yesu gblɔ hewɔ tsɔ fa akɔ na Lazaro nɔvinyɔnuwo esime wo nɔviŋutsua ku?

¹⁴ Maria kple Marta nɔ wo nɔviŋutsu Lazaro si ku kpata la fam le duvi si nye Betania si didi tso Yerusalem gbɔ anɔ kilometa 3 la me. Yesu fa konyi kpli wo elabena elɔ̃ Lazaro kple nɔvianyɔnuawo vevie. Aleke Yesu afa akɔ na nɔvianyɔnuawoe? Menye to ŋutinya totro aɖe gbɔgblɔ na wo me o ke to nyateƒea gbɔgblɔ na wo me boŋ. Yesu gblɔe eme kɔ be: “Nɔviwò la atsi tre.” Azɔ Yesu yi yɔdoa gbɔ eye wòfɔ Lazaro ɖe tsitre—egbɔ agbe ŋutsu si ku ŋkeke ene la!—Yohanes 11:18-23, 38-44.

15. Aleke Marta wɔ nu ɖe nya si Yesu gblɔ kple nusi wòwɔ ŋui?

¹⁵ Ðe nya si Yesu gblɔ be Lazaro “atsi tre” la wɔ mo yaa na Martaa? Edze ƒã be mewɔ mo yaa nɛ o, elabena eɖo eŋu be: “Menyae bena, atsi tre le tsitretsitsi la me le nuwuwuŋkeke la dzi.” Exɔ tsitretsitsi aɖe ƒe ŋugbedodo dzi se xoxo. Yesu gblɔ nɛ azɔ be: “Nyee nye tsitretsitsi la kple agbe la; amesi xɔa dzinye sena la, ne eku hã la, anɔ agbe.” (Yohanes 11:23-25) Agbe si wogbɔ Lazaro nukutɔe la gado ŋusẽ eƒe xɔse eye wòna ame bubuwo hã xɔe se. (Yohanes 11:45) Gake nuka tututue nya “tsitretsitsi” fia?

16. Nukae nya “tsitretsitsi” fia?

¹⁶ Helagbe me nya a·naʹsta·sis, si gɔme ŋutɔŋutɔe nye “tsotso ake” la mee woɖe nya “tsitretsitsi” gɔme tsoe. Hebritɔ siwo nye Helagbegɔmeɖelawo zã nya si gɔmee nye “ame kuku fɔfɔ ɖe tsitre” tsɔ ɖe nya a·naʹsta·sis gɔmee (Hebrigbe me nya, techi·yathʹ ham·me·thimʹ).a Eyata tsitretsitsi fia be woafɔ ame tso ku si nye agbemanɔmanɔ me—be woade agbe amea me wòava nɔ agbe abe alesi wònɔe va yi ene.

17. (a) Nukata amewo fɔfɔ ɖe tsitre manye kuxi aɖeke na Yehowa Mawu kple Yesu Kristo o? (b) Ŋugbe kae Yesu do le amesiwo le ŋkuɖodziyɔdowo me ŋu?

¹⁷ Esi seɖoƒe meli na Yehowa Mawu ƒe nunya o eye eƒe ŋkuɖoɖonudzi de blibo ta la, ate ŋu afɔ ame ɖe tsitre bɔbɔe. Ŋkuɖoɖo alesi amesiwo ku nɔ agbee dzi—woƒe amenyenye, woƒe agbemenyawo, kple nusiwo katã do ƒome kple amesi ƒomevi wonye ŋuti—menye kuxi aɖeke nɛ o. (Hiob 12:13; tsɔe sɔ kple Yesaya 40:26.) Tsɔ kpe ɖe eŋu la, Yesu Kristo lɔ̃ faa be yeafɔ ame kukuwo ɖe tsitre eye ate ŋui hã, abe alesi Lazaro ƒe nya la ɖee fiae ene. (Tsɔe sɔ kple Luka 7:11-17; 8:40-56) Le nyateƒe me la, Yesu Kristo gblɔ be: “Gaƒoƒo la gbɔna, le esi me amesiwo katã le ŋkuɖodziyɔdowo me la, woase [Yesu ƒe] gbe, eye woado go.” (Yohanes 5:28, 29, NW) Ẽ, Yesu Kristo do ŋugbe be woafɔ amesiwo katã le Yehowa ƒe susu me ɖe tsitre. Edze ƒã be Biblia gblɔ be luʋɔ kuna, eye tsitretsitsie woatsɔ aɖɔ nusi ku gblẽna ɖo. Gake ame biliɔn geɖe nɔ agbe heku. Wo dometɔ kawoe le Mawu ƒe susu me siwo woafɔ ɖe tsitre?

18. Amekawoe woafɔ ɖe tsitre?

¹⁸ Woafɔ Yehowa subɔla siwo wɔ nu dzɔdzɔe la ɖe tsitre. Gake ame miliɔn bubu geɖe ku siwo meɖee fia nenye be woanɔ agbe ɖe Mawu ƒe dzidzenu dzɔdzɔewo nu o. Womenya Yehowa ƒe nudidiwo o loo alo womete ŋu kpɔ ɣeyiɣi geɖe tsɔ wɔ tɔtrɔ siwo hiã o. Ame bubu siawo hã le Mawu ƒe susu me eye le ema ta woafɔ wo ɖe tsitre, elabena Biblia do ŋugbe be: “Tsitretsitsi li na ame dzɔdzɔewo kple ame madzɔmadzɔwo siaa.”—Dɔwɔwɔwo 24:15.

19. (a) Ŋutega kae apostolo Yohanes kpɔ le tsitretsitsia ŋu? (b) Nukae wotsɔ “ƒu gbe ɖe dzota la me,” eye nukae nyagbɔgblɔ ma fia?

¹⁹ Apostolo Yohanes kpɔ ŋutega dodzidzɔname aɖe le amesiwo wofɔ ɖe tsitre siwo nɔ Mawu ƒe fiazikpui la ŋgɔ ŋu. Esi wònɔ nu ƒom tso wo ŋu la, eŋlɔ bena: “Atsiaƒu ɖe ame kuku, siwo le eme la, hena, eye ku kple tsiẽƒe woɖe ame kuku, siwo le wo si la, hena, eye wodrɔ̃ ʋɔnu amesiame ɖe eƒe dɔwɔwɔwo nu. Eye wotsɔ ku kple tsiẽƒe ƒu gbe ɖe dzota la me. Dzota sia enye ku evelia.” (Nyaɖeɖefia 20:12-14) Bu nusi wòfia ŋu kpɔ! Woaɖe ame kuku siwo katã le Mawu ƒe susu me tso Hades, alo Sheol, si nye ameƒomea ƒe yɔdo la me. (Psalmo 16:10; Dɔwɔwɔwo 2:31) Azɔ woatsɔ “ku kple tsiẽƒe” aƒu gbe ɖe nusi woyɔna be “dzota,” si nye tsɔtsrɔ̃ mavɔ ƒe kpɔɖeŋu la me. Ameƒomea ƒe yɔdo maganɔ anyi azɔ o.

Mɔkpɔkpɔ Tɔxɛ Aɖe!

20. Nɔnɔme ka tɔgbe mee woafɔ ame miliɔn geɖe siwo ku fifia la ɖo?

²⁰ Ne wofɔ ame miliɔn geɖewo le tsitretsitsia me la, womagbɔ agbe wo woava nɔ anyigba ƒuƒlu dzi o. (Yesaya 45:18) Woafɔ wo ɖe teƒe siwo dze ani wu eye woakpɔe be wodzra nɔƒe, nudodo, kple nuɖuɖu geɖe ɖo na yewo. (Psalmo 67:7; 72:16; Yesaya 65:21, 22) Amekawoe awɔ dzadzraɖo siawo katã? Edze ƒã be ele be amewo nanɔ xexe yeyea me hafi anyigba dzi tsitretsitsia nadze egɔme. Gake amekawoe?

21, 22. Mɔkpɔkpɔ wɔnuku kae le ŋgɔ na amesiwo le agbe le “ŋkeke mamlɛawo” me?

²¹ Biblia me nyagblɔɖi me vava ɖee fia be míele nuɖoanyi sia ƒe “ŋkeke mamlɛawo” me.b (Timoteo II, 3:1) Fifia eteƒe madidi kura o Yehowa Mawu ade nu amegbetɔ ƒe nyawo me eye wòaɖe vɔ̃ɖinyenye ɖa le anyigba dzi. (Psalmo 37:10, 11; Lododowo 2:21, 22) Nukae adzɔ ɖe amesiwo le Mawu subɔm nuteƒewɔwɔtɔe dzi ɣemaɣi?

²² Yehowa matsrɔ̃ ame dzɔdzɔewo akpe ɖe ame vɔ̃ɖiwo ŋu o. (Psalmo 145:20) Mewɔ nusia tɔgbe kpɔ o, eye mawɔ nenema ne ele vɔ̃ɖinyenye katã ɖem ɖa le anyigba dzi o. (Tsɔe sɔ kple Mose I, 18:22, 23, 26.) Le nyateƒe me la, Biblia ƒe agbalẽ mamlɛtɔ ƒo nu tso “ameha gã, si ame aɖeke mete ŋu xlẽ o [ŋu, amesiwo] tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me,” eye wodo go tso “xaxa gã” la me. (Nyaɖeɖefia 7:9-14) Ẽ, ameha gã aɖe atsi agbe le xaxa gã si me fifi xexe vɔ̃ɖia awu enu le la me, eye woage ɖe Mawu ƒe xexe yeyea me. Le afima la, ameƒome toɖolawo ate ŋu akpɔ viɖe bliboe tso mɔnuɖoɖo nyui si Mawu wɔ be wòatsɔ ana ablɔɖe ameƒomea tso nuvɔ̃ kple ku me la me. (Nyaɖeɖefia 22:1, 2) Eyata mehiã be “ameha gã” la me tɔwo naku akpɔ o. Mɔkpɔkpɔ kae le etɔxɛ ale!

Agbenɔnɔ Ku Manɔmee

23, 24. Nukae wòle be nàwɔ ne èdi be yeanɔ agbe ku manɔmee le Paradiso me le anyigba dzi?

²³ Ðe míate ŋu aka ɖe mɔkpɔkpɔ wɔnuku sia dzia? Ẽ, míate ŋu aka ɖe edzi! Yesu Kristo ŋutɔ ɖee fia be ɣeyiɣi aɖe ava esime amewo anɔ agbe eye womaku akpɔ o. Hafi Yesu nafɔ exɔlɔ̃ Lazaro ɖe tsitre teti la, egblɔ na Marta be: “Amesiame, si le agbe, eye wòxɔa dzinye sena la, maku akpɔ o.”—Yohanes 11:26.

²⁴ Èdi be yeanɔ agbe tegbee le Paradiso me le anyigba dzia? Èdi be yeagakpɔ yeƒe ame veviwo akea? Apostolo Yohanes gblɔ be: “Xexeame va yina kple eƒe nudzodzrowo; ke amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” (Yohanes I, 2:17) Fifiae wòle be nàsrɔ̃ nusi nye Mawu ƒe lɔlɔ̃nu eye nàɖoe kplikpaa be yeanɔ agbe ɖe enu. Ekema mia kple ame miliɔn geɖe bubu siwo le Mawu ƒe lɔlɔ̃nu wɔm xoxo miate ŋu anɔ agbe tegbee le Paradiso me le anyigba dzi.

[Etenuŋɔŋlɔwo]

Èɖo Ŋku Wo Dzia?

◻ Nukae gbegbɔgblɔ gbãtɔa me nya siwo gɔme woɖe be “luʋɔ” la fia ŋutɔŋutɔ?

◻ Nukae dzɔna ɖe luʋɔ dzi le ku me?

◻ Nukae Biblia gblɔ be woatsɔ aɖɔ nusi ku gblẽna ɖo?

◻ Mɔkpɔkpɔ tɔxɛ kae li na nuteƒewɔla siwo li egbea?

[Aɖaka si le axa 15]

“Luʋɔ” Nye Nuwɔwɔ ƒe Agbe

Ɣeaɖewoɣi la, nya “luʋɔ” fiaa agbe si le ame alo lã me. Esia metrɔ alesi Biblia yɔ ame alo lã be enye luʋɔ la o. Le kpɔɖeŋu me: Míegblɔna be ame aɖe le agbe, si fia be enye ame gbagbe. Míate ŋu agblɔ hã be agbe le esi. Le mɔ ma ke nu la, ame gbagbe nye luʋɔ. Ke hã esi wòle agbe la, woate ŋu agblɔ le “luʋɔ” ŋu be enye nu le amea si.

Le kpɔɖeŋu me, Mawu gblɔ na Mose be: “Amesiwo katã le didim be, yewoatsrɔ̃ wò [luʋɔ, NW] la, woku.” Edze ƒã be Mose ƒe futɔwo nɔ didim be woaɖe eƒe agbe ɖa. (Mose II, 4:19; tsɔe sɔ kple Yosua 9:24; Lododowo 12:10.) Yesu zã nya la le mɔ ma tɔgbe nu esime wògblɔ be: ‘Amegbetɔvi la va bena wòatsɔ eƒe luʋɔ ana tafee ɖe ame geɖe ƒe xɔxɔ ta.’ (Mateo 20:28; tsɔe sɔ kple 10:28.) Nya “luʋɔ” fia “nuwɔwɔ ƒe agbe” le wo dometɔ ɖesiaɖe me.

[Nɔnɔmetata siwo le axa 15]

Wo katã wonye luʋɔwo

[Afi Si Míexɔ Mɔɖeɖe Tso]

Aɖitsi: U.S. Fish and Wildlife Service, Washington, D.C./Dean Biggins

[Nɔnɔmetata si le axa 17]

Yesu ɖee fia be tsitretsitsia ye aɖɔ nusi ku gblẽna ɖo

[Nɔnɔmetata si le axa 18]

“Amesiame, si le agbe, eye wòxɔa dzinye sena la, maku akpɔ o.”—Yohanes 11:26