Esɔsrɔ̃ Be Yehowa Vɔvɔ̃ Navivi Mía Nu
“Viwo, miva, milé to ɖe ŋunye, ne mafia Yehowa-vɔvɔ̃ mi!”—PSALMO 34:12.
1. Aleke Mawu ƒe Fiaɖuƒea aɖe vɔvɔ̃ ɖae, gake ɖe ema fia be vɔvɔ̃wo katãe woaɖe ɖa?
EDZROA amewo le afisiafi be yewoavo tso vɔvɔ̃ si me—vɔvɔ̃ na ŋutasẽnuwɔwɔ, vɔvɔ̃ na dɔmakpɔmakpɔ, vɔvɔ̃ na dɔléle sesẽwo. Ŋkeke gã ka gbegbee nye si wòanye ne ablɔɖe ma zu nu ŋutɔŋutɔ le Mawu ƒe Fiaɖuƒea te! (Yesaya 33:24; 65:21-23; Mixa 4:4) Gake menye vɔvɔ̃wo katãe woaɖe ɖa ɣemaɣi o, eye mele be míadi be míaɖe vɔvɔ̃wo katã ɖa le míaƒe agbe me fifia o. Vɔvɔ̃ nyui li, eye vɔvɔ̃ manyomanyo hã li.
2. (a) Vɔvɔ̃ ka ƒomevie menyo o, eye kae nye nyuitɔ? (b) Nukae nye mawuvɔvɔ̃, eye aleke mawunyakpukpui siwo woyɔ la ɖe ema fiae?
2 Vɔvɔ̃ ate ŋu anye aɖi asi ame ƒe susu si awɔe be magate ŋu abu tame nyuie o. Ate ŋu aɖe dzi le ame ƒo eye mɔkpɔkpɔ abu ɖe ame. Vɔvɔ̃ sia tɔgbe ate ŋu adze amesi futɔ aɖe do ŋɔdzi na la dzi. (Yeremya 51:30) Ate ŋu adze amesi tsia dzi akpa be yeƒe nu nadze ame aɖewo siwo wobuna ame ŋkutawoe ŋu la dzi. (Lododowo 29:25) Gake vɔvɔ̃ aɖe hã li, si nyo, eyae nye esi xea mɔ na mí be míagawɔ nu tamemabumabutɔe ahawɔ nuvevi mía ɖokui o. Mawuvɔvɔ̃ bia nu geɖe wu ema gɔ̃ hã. Enye Yehowa-vɔvɔ̃, bubu deto dede eŋu, kple vɔvɔ̃ be míagawɔ nusi madze eŋu o la o. (Psalmo 89:8) Ŋudzedzekpɔkpɔ ɖe Mawu ƒe amenuveve kple dɔmenyo ŋue dea vɔvɔ̃ sia mía me be míagawɔ nusi madze eŋu o. (Psalmo 5:8; Hosea 3:5) Egabia be míanya be Yehowae nye Ʋɔnudrɔ̃la Gãtɔ kple Ŋusẽkatãtɔ, amesi si ŋusẽ le be wòahe to na amesiwo gbe toɖoɖoe alo atsrɔ̃ wo gɔ̃ hã.—Romatɔwo 14:10-12.
3. Aleke Yehowa-vɔvɔ̃ to vovo na esiwo wogblɔ be wole trɔ̃subɔlawo ƒe mawu aɖewo ŋui?
3 Mawuvɔvɔ̃ nyo, menye dzikatsoƒoe ƒe vɔvɔ̃ wònye o. Eʋãa ame be wòanɔ te sesĩe awɔ nu nyui eye mana ta awɔ nu gbegblẽ o. Mele abe vɔvɔ̃ si nɔ blema Helatɔwo ƒe mawu si woyɔ be Phobos si ŋu woƒo nu tsoe be enye mawu vɔ̃ɖi si doa ŋɔdzi na ame ŋu la ene o. Eye mele abe vɔvɔ̃ si le Hindutɔwo ƒe mawunɔ Kali ŋu, si wotana ɣeaɖewoɣi be ʋukɔkɔɖi vivia enu eye wòtsɔa ame kukuwo, dawo, kple ametakoliwo ɖoa atsyɔ̃e la ene o. Mawuvɔvɔ̃ dzroa ame; menyãa ame ɖe enu o. Wo kple lɔlɔ̃ kpakple ŋudzedzekpɔkpɔe zɔna. Eyata mawuvɔvɔ̃ tea mí ɖe Yehowa ŋu.—Mose V, 10:12, 13; Psalmo 2:11.
Nusita Wòle Ame Aɖewo Me eye Mele Ame Aɖewo Me O
4. Abe alesi apostolo Paulo ɖee fia ene la, nɔnɔme gbegblẽ ka mee ameƒomea ɖo, eye nuka gbɔe esia tso?
4 Mawuvɔvɔ̃ ƒe nɔnɔme meʋãa ameƒomea ƒe akpa gãtɔ o. Apostolo Paulo ɖɔ alesi gbegbe amegbetɔwo te ɖe aga tso blibodede gbãtɔ gbɔe la le Romatɔwo 3:9-18. Esi Paulo gblɔ be amesiame le nuvɔ̃ te megbe la, eyɔ nya tso Psalmowo me esime wògblɔ be: “Ame dzɔdzɔe aɖeke meli o, ɖeka hɔ̃ meli o.” (Kpɔ Psalmo 14:1.) Emegbe eyɔ nanewo abe ameƒomea ƒe Mawu madimadi, woƒe amemawɔmawɔ, woƒe amebeble, fiƒode, kple ʋukɔkɔɖi ene tsɔ ɖe nu me yi ŋgɔe. Aleke gbegbe esia ɖɔ alesi xexeame le egbea pɛ enye si! Ame akpa gãtɔ metsɔ ɖeke le Mawu kple eƒe tameɖoɖowo me o. Zi geɖe la, wolalana vaseɖe esime wokpɔ be dɔmenyowɔwɔ aɖe vi na yewo hafi wowɔa nu abe dɔme nyom wole ene. Alakpadada kple yakanyagbɔgblɔ bɔ. Menye nyadzɔdzɔwo me ko woƒoa nu tsoa ʋukɔkɔɖi ŋu le o ke wowɔnɛ le modzakaɖeɖe hã me. Nukae he nɔnɔme sia vɛ? Enye nyateƒe be mí katã míenye nuvɔ̃wɔla Adam ƒe dzidzimeviwo, gake ne amewo va le agbe nɔm ɖe nusiwo apostolo Paulo yɔ le afisia nu la, ekema nu bubu si wu esia ge ɖe nya la me. Kpukpui 18 gblɔ nusi wònye be: “Mawuvɔvɔ̃ aɖeke metso ga ɖe ŋku me na wo o.”—Kpɔ Psalmo 36:2.
5. Nukata mawuvɔvɔ̃ le ame aɖewo me, evɔ mele ame aɖewo ya me o?
5 Gake nukata mawuvɔvɔ̃ le ame aɖewo me evɔ mele ame bubuwo ya me o? Kpuie ko la, nusitae nye be ame aɖewo tunɛ ɖo gake bubuwo metunɛ ɖo o. Womedzi mía dometɔ aɖeke kplii o gake mí katã míate ŋu atui ɖo. Mawuvɔvɔ̃ nye nusi wòle be míasrɔ̃. Eye ehiã be míatui ɖo hafi wòanye ameʋãŋusẽ sẽŋu le míaƒe agbenɔnɔ me.
Amekpekpe Lédziname Aɖe
6. Amekae tsɔ amekpekpe si woŋlɔ ɖe Psalmo 34:12 ɖo mía ŋkume, eye aleke mawunyakpukpui sia ɖee fia be ele be woasrɔ̃ mawuvɔvɔ̃?
6 Wokpe mí vividoɖeameŋutɔe le Psalmo 34 be míasrɔ̃ Yehowa-vɔvɔ̃. Dawid ƒe psalmo ye wònye. Eye amekae Dawid tsi tre ɖi na? Menye ame bubu aɖekee tsɔ wu Aƒetɔ Yesu Kristo o. Woŋlɔ nyagblɔɖi aɖe si apostolo Yohanes gblɔ be eku ɖe Yesu koŋ ŋu la le psalmo sia ƒe kpukpui 21 lia me. (Yohanes 19:36) Yesue le amewo kpem le míaƒe ŋkekea me abe esi le kpukpui 12 lia me ene be: “Viwo, miva, milé to ɖe ŋunye, ne mafia Yehowa-vɔvɔ̃ mi!” Esia fia kɔte be woate ŋu asrɔ̃ mawuvɔvɔ̃, eye Yesu Kristo dze ŋutɔ be wòafia nu mí. Nukatae?
7. Nukata Yesu nye ame vevitɔ si gbɔ wòle be míasrɔ̃ mawuvɔvɔ̃ le?
7 Yesu Kristo nya mawuvɔvɔ̃ ƒe vevienyenye. Hebritɔwo 5:7 gblɔ le eŋu be: “[Kristo] tsɔ gbedodoɖawo kple kukuɖeɖewo le eƒe ŋutilã me nɔnɔ ƒe ŋkekewo me hekpe ɖe ɣlidodo sesĩ kple aɖatsiwo ŋu va Amesi te ŋu xɔe tso ku me la gbɔ, eye wòɖo toe le esi wòvɔ̃a Mawu la ŋuti.” Mawuvɔvɔ̃ ma nye nɔnɔme si Yesu Kristo ɖe fia hafi wòdze ŋgɔ ku le fuwɔametia ŋu gɔ̃ hã. Ðo ŋku edzi be wogblɔ le Mawu ƒe Vi la ŋu le Lododowo ta 8 be enye nunya si woɖe fia le ame ƒe nɔnɔme me. Eye wogblɔ na mí le Lododowo 9:10 be: “Yehowa-vɔvɔ̃ enye nunya ƒe gɔmetoto.” Eyata mawuvɔvɔ̃ sia nye Mawu ƒe Vi la ƒe amenyenye ƒe akpa vevi aɖe gbaɖegbe ʋĩ ke hafi wòva anyigba dzi.
8. Nukae míesrɔ̃ le Yehowa-vɔvɔ̃ ŋu le Yesaya 11:2, 3?
8 Hekpe ɖe eŋu la, Yesaya 11:2, 3 gblɔ le Yesu si nye Mesia Fia la ŋu be: “Yehowa ƒe gbɔgbɔ, si nye nunya kple gɔmesese ƒe gbɔgbɔ, adaŋudede kple ŋusẽ ƒe gbɔgbɔ, sidzedze kple Yehowa vɔvɔ̃ ƒe gbɔgbɔ la anɔ edzi. Yehowa vɔvɔ̃ ƒe nu anyo eŋu.” Aleke gbegbe nya sia dze toe nye si! Yehowa-vɔvɔ̃ menye nusi medzɔa dzi na ame o. Enyo eye wòtua ame ɖo. Enye nɔnɔme si axɔ aƒe ɖe dziɖuƒe blibo si dzi Kristo aɖu Fia ɖo la me. Ele dzi ɖum fifia eye wòle nu fiam amesiwo katã nu ƒom wole ƒu be woanye eteviwo la le Yehowa-vɔvɔ̃ me. Aleke wòle ewɔmee?
9. Aleke Yesu Kristo le Yehowa-vɔvɔ̃ fiam míi, eye nukae wòdi be míasrɔ̃ le eŋu?
9 Yesu si nye hamea ƒe Ta si wotia kple Mesia Fia la toa hame kpekpewo, takpekpe suewo kple gãwo dzi le kpekpem ɖe mía ŋu be míase nusi tututu mawuvɔvɔ̃ nye, kple nusita wòɖea vi ŋutɔ la gɔme nyuie. Eyata edzea agbagba kpena ɖe mía ŋu be míaƒe ŋudzedzekpɔkpɔ ɖe Yehowa-vɔvɔ̃ ŋu nade to ɖe edzi ale be míasrɔ̃ alesi míase vivi le evɔvɔ̃ me abe alesi eya ŋutɔ see ene.
Àdze Agbagba le Eŋua?
10. Ne míeyi Kristotɔwo ƒe kpekpewo la, nukae wòle be míawɔ hafi ase Yehowa-vɔvɔ̃ gɔme?
10 Nyateƒee, míaƒe Biblia xexlẽ alo kpekpewo dede le Fiaɖuƒe Akpata me ɖeɖe dzaa mate ŋu ana kakaɖedzi be míavɔ̃ Mawu o. Se nusi wòle be míawɔ hafi ase Yehowa-vɔvɔ̃ gɔme ŋutɔŋutɔ ɖa. Lododowo 2:1-5 gblɔ be: “Vinye, ne èxɔ nye nuƒoƒo wɔ tɔwòe, eye nèdzra nye sewo ɖo ɖe ɖokuiwò gbɔ, be nèƒu wò to anyi ɖe nunya ŋu, eye nèbi wò dzi ɖe gɔmesese ŋuti, ẽ, ne èyɔ nunya, eye nèkɔ wò gbe dzi ɖe gɔmesese ŋu la, ne èdii abe klosalo ene, eye nèdi eyome mɔ abe kesinɔnu, si le to me ene la, ekema àse Yehowa-vɔvɔ̃ gɔme, eye wò asi atu sidzedze Mawu.” Eyata ne míeyi kpekpewo la, ele be míalé to ɖe nya si gblɔm wole ŋu, míadze agbagba vevie be míaƒe susu nanɔ nya veviwo ŋu eye míaɖo ŋku wo dzi, ele be alesi míesena le mía ɖokui me ɖe Yehowa ŋu nakpɔ ŋusẽ ɖe míaƒe nɔnɔme dzi le aɖaŋu siwo woaɖo la xɔxɔ me—ẽ, míaʋu míaƒe dziwo. Ekema míase Yehowa-vɔvɔ̃ gɔme.
11. Nukae wòle be míawɔ vevie edziedzi bene míatu mawuvɔvɔ̃ ɖo?
11 Psalmo 86:11 he míaƒe susu yi nu vevi bubu dzi, eyae nye gbedodoɖa. Hakpala la do gbe ɖa be: “Yehowa, fia wò mɔm, ne mazɔ le wò nyateƒe la me; tsɔ nye dzi ɖo nu ɖeka kolia ŋu, ne mavɔ̃ wò ŋkɔ!” Gbedodoɖa ma dze Yehowa ŋu elabena ena woŋlɔe ɖe Biblia me. Be míawo hã míasrɔ̃ mawuvɔvɔ̃ la, ele be míado gbe ɖa na Yehowa be wòakpe ɖe mía ŋu, eye aɖe vi na mí ne míedoa gbe ɖa vevie edziedzi—Luka 18:1-8.
Wò Dzi hã Le Eme
12. Nukata wòle be míalé ŋku ɖe dzi la ŋu vevie, eye nukawoe esia bia?
12 Nu bubu aɖe hã li wòle be míade dzesi le Psalmo 86:11. Hakpala la menɔ biabiam be yeanya mawuvɔvɔ̃ ɖe susu me ko evɔ o. Eyɔ eƒe dzi hã. Mawuvɔvɔ̃ tutuɖo bia be dzi si nye míaƒe ememe nɔnɔme si dzena le míaƒe agbemenuwɔnawo katã me, si me míaƒe tamesusuwo, nuwɔnawo, nudidiwo, nusiwo ʋãa mí míewɔa nu, kple míaƒe taɖodzinuwo le la hã nanɔ eme.
13. (a) Nukae aɖee afia be ame ƒe dzi dze eve? (b) Taɖodzinu kae wòle be míanɔ minyaminyam ne míele mawuvɔvɔ̃ tum ɖo?
13 Biblia xlɔ̃ nu mí be ame ƒe dzi ate ŋu adze eve. Ate ŋu able ame. (Psalmo 12:3; Yeremya 17:9) Ate ŋu aʋã mí míawɔ dɔ nyuiwo—hame ƒe kpekpewo kple gbeadzi dede—gake agate ŋu ana míalɔ̃ xexeame ƒe agbenɔnɔ aɖewo hã. Esia ate ŋu axe mɔ na mí be míatsɔ luʋɔ blibo ado Fiaɖuƒenuwo ɖe ŋgɔ le nyateƒe me o. Emegbe dzi alakpatɔ sia atee kpɔ be yeable mí míasusu be, alesi ame bubu geɖe le dɔa wɔmee la, nenema ko míawo hã míele ewɔmee. Alo ɖewohĩ amegbetɔvɔvɔ̃ ate ŋu akpɔ ŋusẽ ɖe dzia dzi le suku alo le dɔwɔƒe. Esia awɔe be le teƒe siawo la, míadi be míaɖe mía ɖokui afia be Yehowa Ðasefowoe míenye o eye ɖewohĩ míawɔ nusiwo medze Kristotɔwo o gɔ̃ hã. Gake míaƒe dzitsinya va ɖea fu na mí emegbe. Míedi be míanye ame mawo tɔgbe o. Eyata míewɔa ɖeka kple hakpala la le gbedodoɖa na Yehowa me be: “Tsɔ nye dzi ɖo nu ɖeka kolia ŋu, ne mavɔ̃ wò ŋkɔ!” Míedina be míaƒe ememe ƒe nɔnɔme si míeɖena fiana le míaƒe agbemenuwɔnawo katã me la naɖo kpe edzi be ‘míevɔ̃a Mawu, eye míeléa eƒe seawo me ɖe asi.’—Nyagblɔla 12:13.
14, 15. (a) Nuka ƒe ŋugbee Yehowa do be yeana yeƒe amewo esi wònɔ Israel-viwo gbugbɔɖoanyi tso Babilon ƒe aboyo me ŋu nya gblɔm ɖi? (b) Nukae Yehowa wɔ tsɔ de mawuvɔvɔ̃ eƒe amewo ƒe dzi me? (d) Nukata Israel-viwo gbe Yehowa ƒe mɔwo dzi zɔzɔ?
14 Yehowa do ŋugbe be yeatsɔ mawuvɔvɔ̃ ƒe dzi sia na yeƒe amewo. Egblɔ ɖi le Israel gbugbɔgaɖoanyi ŋu abe alesi míexlẽ le Yeremya 32:37-39 ene be: “Magakplɔ wo ava teƒe sia, eye woanɔ anyi bɔkɔɔ, woanye dukɔ nam, eye manye Mawu na wo. Mana dzi ɖeka kple mɔ ɖeka wo, ne woavɔ̃m ɣeawo katã ɣi hena woawo ŋutɔ kple wo megbeviwo ƒe nyui.” Wogaɖo kpe Mawu ƒe ŋugbedodo sia dzi le kpukpui 40 lia me be: “Made ŋunye vɔvɔ̃ woƒe dzi me, be womagate ɖa le ŋunye o.” Yehowa kplɔ wo gbɔe va Yerusalem vavã le ƒe 537 D.M.Ŋ. me abe alesi wòdo ŋugbee ene. Ke ŋugbedodo ma ƒe akpa mamlewo—be “mana dzi ɖeka kple mɔ ɖeka wo, ne woavɔ̃m ɣeawo katã ɣi” ya ɖe? Nukata blema Israel-dukɔa trɔ megbe de Yehowa esi wòkplɔ wo tso Babilon megbe, si wɔe be wotsrɔ̃ woƒe gbedoxɔa le ƒe 70 M.Ŋ. me eye womegagbugbɔ tui kpɔ o?
15 Menye esi Yehowa do kpo nu tae o. Yehowa te kpɔ be yeatsɔ mawuvɔvɔ̃ ade eƒe amewo ƒe dzi me. Nublanuikpɔkpɔ kple amenuveve si wòɖe fia wo esi wòɖe wo tso Babilon eye wògagbugbɔ wo ɖo anyi le wo denyigba dzi nye susu geɖe siwo ta wòle be woade bubu deto eŋu. Mawu tsɔ ŋkuɖodzinyawo, aɖaŋuɖoɖo, kple amehehe to nyagblɔɖila siwo nye Xagai, Zaxarya, kple Maleaxi dzi; eto Ezra si wòɖo ɖe wo gbɔ be wòanye woƒe nufiala; Anyigbadzikpɔla Nexemya; kple Mawu ŋutɔ Via dzi gaɖo kpe esia dzi. Dukɔa ɖo to ɣeaɖewoɣi. Woɖo to esi Xagai kple Zaxarya woƒoe ɖe wo nu wogbugbɔ Yehowa ƒe gbedoxɔa tu, kple esime wonyã wo srɔ̃ dutanyɔnuwo le Ezra ŋɔli. (Ezra 5:1, 2; 10:1-4) Gake zi geɖe la, womeɖo to o. Womeƒua to anyi ɣesiaɣi o; womeyi edzi xɔ aɖaŋuɖoɖo o; womeʋu woƒe dziwo o. Israel-viwo mesrɔ̃ mawuvɔvɔ̃ o, eye esia ta menye ameʋãŋusẽ sẽŋu nɔ woƒe agbenɔnɔ me o.—Maleaxi 1:6; Mateo 15:7, 8.
16. Amekawoe Yehowa de mawuvɔvɔ̃ dzi me na?
16 Gake Yehowa ƒe ŋugbedodo be yeatsɔ mawuvɔvɔ̃ ade yeƒe amewo ƒe dzi me metsi akpo dzi o. Ebla nu yeye kple gbɔgbɔ me Israel, Kristotɔ siwo ŋkume wòtsɔ dziƒomɔkpɔkpɔ ɖo. (Yeremya 31:33; Galatiatɔwo 6:16) Mawu ɖe wo tso Babilon Gã la, alakpasubɔsubɔhawo ƒe xexemefiaɖuƒe, ƒe kluvinyenye me le ƒe 1919 me. Eƒã evɔvɔ̃ ɖe woƒe dzi me wòƒo ke ɖe to sesĩe. Esia he viɖe nyui geɖe vɛ na woawo kple “ameha gã” si si mɔkpɔkpɔ le be woanye Fiaɖuƒea teviwo le anyigba dzi. (Yeremya 32:39; Nyaɖeɖefia 7:9) Yehowa-vɔvɔ̃ va ge ɖe woawo hã ƒe dzi me.
Alesi Wode Mawuvɔvɔ̃ Míaƒe Dzi Mee
17. Aleke Yehowa de mawuvɔvɔ̃ dzi me na míi?
17 Aleke Yehowa de mawuvɔvɔ̃ sia míaƒe dzi mee? Ewɔe to eƒe gbɔgbɔ ƒe dɔwɔwɔ dzi. Eye nukae le mía si si tso gbɔgbɔ kɔkɔe la ƒe dɔwɔwɔ me? Eyae nye Biblia, Mawu ƒe Nya si tso gbɔgbɔ me. (Timoteo II, 3:16, 17) Yehowa to nusiwo wòwɔ va yi, alesi wòle nu wɔm kple esubɔlawoe fifia be eƒe Nyagblɔɖinya nava eme, kple nusiwo ava dzɔ ŋu nyagblɔɖiwo dzi na susu nyui siwo ta wòle be mí katã míatu mawuvɔvɔ̃ ɖo la mí.—Yosua 24:2-15; Hebritɔwo 10:30, 31.
18, 19. Aleke takpekpe gãwo, sueawo, kple hame kpekpewo kpena ɖe mía ŋu be mawuvɔvɔ̃ nasu mía si?
18 Enyo be míade dzesii be Yehowa gblɔ na Mose abe alesi woŋlɔe ɖe Mose V, 4:10 ene be: “Ƒo dukɔ la nu ƒu nam, bena woase nye nyawo, ne woanya, alesi woavɔ̃m, ŋkeke alesi wole agbe le anyigba dzi, eye woafia wo wo viwo.” Nenema ke Yehowa wɔ ɖoɖo geɖe egbea be wòakpe ɖe eƒe amewo ŋu woasrɔ̃ evɔvɔ̃. Míegblɔa Yehowa ƒe amenuveve kple nunyuiwɔwɔ ƒe kpeɖodziwo le míaƒe takpekpe gãwo kple suewo kpakple hame kpekpewo me. Esiae míenɔ wɔwɔm esi míenɔ Ame Vevitɔ Kekeake Si Nɔ Anyi Kpɔ ƒe agbalẽa srɔ̃m. Aleke nusɔsrɔ̃ ma kpɔ ŋusẽ ɖe mia kple wò nɔnɔme ɖe Yehowa ŋu dzii? Esi nèkpɔ míaƒe Dziƒofofo ƒe amenyenye nyuiawo ƒe akpa vovovo siwo dze le Via me la, ɖe esia mena wò didi be yemawɔ nusi madze Mawu ŋu gbeɖe o la nu sẽ ɖe edzi oa?—Kolosetɔwo 1:15.
19 Míesrɔ̃a nu le alesi Yehowa ɖe eƒe dukɔa le blema hã ŋu le míaƒe kpekpewo me. (Samuel II, 7:23) Esi míetsɔ agbalẽ si nye Nyaɖeɖefia—Etaƒoƒo Keŋkeŋ la Ðo Vɔ! le Biblia-gbalẽ si nye Nyaɖeɖefia srɔ̃mee la, míesrɔ̃a nu le nyagblɔɖi siwo va eme xoxo le ƒe alafa 20 lia sia me kple nudzɔdzɔ dziŋɔ siwo ava dzɔ la ŋu. Psalmo 66:5 gblɔ le Mawu ƒe dɔwɔwɔ siawo katã ŋu be: “Miva, ne miakpɔ Mawu ƒe dɔwɔwɔ; eya, amesi wɔ nu dziŋɔwo ɖe amegbetɔviwo ŋu!” Ẽ, ne míetsɔ nukpɔsusu nyuitɔ bu Mawu ƒe dɔwɔwɔ siawo ŋui la, eƒãa Yehowa-vɔvɔ̃ ɖe dzi me na mí, ena míedea bubu deto eŋu. Ekema míate ŋu akpɔ alesi Yehowa Mawu wɔa eƒe ŋugbedodo sia dzii: “Made ŋunye vɔvɔ̃ woƒe dzi me, be womagate ɖa le ŋunye o.”—Yeremya 32:40.
20. Be mawuvɔvɔ̃ naƒo ke ɖe to sesĩe ɖe míaƒe dzi me la, nukae hiã be míawɔ?
20 Gake edze ƒã be vɔvɔ̃ mage ɖe míaƒe dzi me ne mía ŋutɔwo míedze agbagba vevie o. Emetsonuawo mevana le wo ɖokui si o. Yehowa wɔa eƒe akpa dzi. Ele be míawɔ míaƒe akpa dzi le mawuvɔvɔ̃ tutuɖo me. (Mose V, 5:26) Dzɔdzɔme Israel do kpo ema wɔwɔ. Gake esi gbɔgbɔ me Israel kple woƒe zɔhɛwo ɖoa ŋu ɖe Yehowa ŋu ta la, wole viɖe siwo mawuvɔ̃lawo kpɔna la ƒe geɖe kpɔm xoxo. Míadzro viɖe siawo dometɔ aɖewo me le nyati si kplɔe ɖo me.
Aleke Nàɖo Wo Ŋui?
◻ Nukae nye mawuvɔvɔ̃?
◻ Aleke wole nu fiam mí be Yehowa-vɔvɔ̃ navivi mía nui?
◻ Agbagba kae wòle be míadze bene mawuvɔvɔ̃ nanɔ mía me?
◻ Nukata mawuvɔvɔ̃ ƒe amesisusu ku ɖe míaƒe kpɔɖeŋudzi ƒe akpa sia akpa ŋu?
[Nɔnɔmetata siwo le axa 12, 13]
Nusɔsrɔ̃ vevie hiã bene míase Yehowa vɔvɔ̃ gɔme