Aleke Amegbetɔ Ate Ŋu Anɔ Mawu Ƒe Nɔnɔme Nui?

“MAWU wɔ ame ɖe ye ŋutɔ ƒe nɔnɔme, Mawu ƒe nɔnɔme nue wòwɔe ɖo; ŋutsu kple nyɔnu wòwɔ.” Nenemae nuŋlɔɖi si tso gbɔgbɔ me la gblɔ, gake egɔme ɖe? Aleke wowɔ ŋutsu kple nyɔnu gbãtɔ ɖe Mawu ƒe nɔnɔme mee?—Mose I, 1:27.

Ðe wonɔ abe Mawu ene le ŋutilã mea? Ao, mate ŋu anye nenema o. Amegbetɔe ame nye, enye ŋutilãmeme si wowɔ be wòanɔ anyigba dzi. Mawu nye gbɔgbɔ si le dziƒo ƒe ŋutikɔkɔe manyagblɔ aɖe si ŋu ame aɖeke mate ŋu ate ɖo gɔ̃ hã o la me. (Mose II, 33:18-20; Korintotɔwo I, 15:50) Ke aleke wowɔ ame ɖe Mawu ƒe nɔnɔme nui? Eyae nye be wona ŋutete amegbetɔ be wòaɖe Mawu ƒe nɔnɔme tɔxɛ siwo nye lɔlɔ̃, dzɔdzɔenyenye, nunya, kple ŋusẽ—kpakple nɔnɔme bubuwo afia.

Yehowa ƒe Nɔnɔmewo

Yehowa Mawu ƒe nɔnɔmewo dze le eƒe nuwɔwɔwo katã me, gake eɖe wo fia le mɔ wɔdɔɖeamedzi aɖe nu le eƒe nuwɔwɔ kple ame eve gbãtɔ, Adam kple Xawa me. (Romatɔwo 1:20) Eƒe lɔlɔ̃ dze elabena ewɔ anyigba la wòsɔ pɛpɛpɛ be ame nanɔ edzi. Yehowa wɔ srɔ̃nyɔnu deblibo na ame la be wòanye eƒe zɔhɛ kple viawo dada. Etsɔ wo ame eve la da ɖe abɔ dzeani aɖe me eye wòtsɔ nusiwo katã hiã be woayi edzi anɔ agbe ahakpɔ dzidzɔ la na wo fũ. Esi gawɔ nuku wue nye be Mawu na mɔnukpɔkpɔ wo be woanɔ agbe tegbee.—Mose I, 2:7-9, 15-24.

Mawu ƒe nunya dze le alesi wòdo ame eve gbãtɔwo kpɔe me. Ne woakpɔtɔ anye Yehowa ƒe xexeame katã ƒe ƒomea me tɔwo, eye woanɔ agbe tegbee be woanye ameƒomea dzilawo la, ele be woaɖo nuteƒewɔwɔ kple tadedeagu vavãtɔ ƒe kpɔɖeŋu ɖi. Eyata Yehowa na mɔnukpɔkpɔ wo be woaɖe woƒe dzi ƒe nɔnɔme afia le dodokpɔ si sɔ pɛpɛpɛ me—wogblɔ na wo be woagaɖu sidzedze nyui kple vɔ̃ ƒe ati la o. Nunya ka gbegbee nye si Yehowa ɖe fia be wòɖe mɔ na amegbetɔwo be woaɖe woƒe toɖoɖo kple lɔlɔ̃ si le wo me nɛ la afia hafi wòatsɔ mɔnukpɔkpɔ wɔnuku siwo nɔ susu me nɛ la ana wo!

Mawu ƒe dzɔdzɔenyenye dze le alesi wòlé dzidzenu kɔkɔ siwo le esi na eƒe nuwɔwɔwo me ɖe asi sesĩe eye menaa ta le dzidzenu mawo me o la me. Edze le alesi wòna mɔnukpɔkpɔ ɖesiaɖe Adam kple Xawa be woawɔ nusi nyo la me. Eye esi womete ŋu wɔ edzi o la, eƒe dzɔdzɔenyenye dze le alesi wòdrɔ̃ ʋɔnu wo eye wòhe to na wo abe alesi wògblɔ be yeawɔ ne wodze aglã ene.

Yehowa ƒe ŋusẽ dze le alesi wòna ʋɔnu si wòdrɔ̃ wo va emee me. Satana si nye aglãdzela gãtɔ gblɔ be Yehowa nye aʋatsokala eye Satana tsɔ nu gãwo ɖo Xawa ŋkume be yeatsɔ wo nɛ ne wògbe toɖoɖo Mawu. (Mose I, 3:1-7) Gake Satana mete ŋu wɔ ɖe ŋugbe si wòdo la dzi o. Mete ŋu xe mɔ na Yehowa be wòaganyã Adam kple Xawa le Eden-bɔa me o, eye mete ŋu wɔe hã be nya siwo Mawu gblɔ na Adam la meva eme o: “Anyi nènye, eye anyi ke nagatrɔ azu!” (Mose I, 3:19) Gake Yehowa mena woku enumake si wòtso kufia na wo o eye egaɖe eƒe lɔlɔ̃ fia le esia hã me. Ena ɣeyiɣi Adam kple Xawa be woadzi vi ale be yeƒe gɔmedzetameɖoɖo na ameƒomea nava eme mlɔeba.—Mose I, 1:28.

Azɔ Yehowa Mawu ƒe dzɔdzɔenyenye, lɔlɔ̃, ŋusẽ, kple nunya katã dze le ŋugbe si wòdo be yeana dzidzimevi aɖe si atsrɔ̃ Satana ƒe dɔwɔwɔwo eye wòaɖe nu wɔnublanui siwo aglã gbãtɔ si wodze ɖe Mawu ƒe dziɖulanyenye ŋu he vɛ la ɖa la me. (Mose I, 3:15) Wɔla wɔnuku kae nye si le mía si!

Agbagbadzedze be Míasrɔ̃ Mawu

Togbɔ be amegbetɔwo megade blibo o hã la, woate ŋu aɖe Mawu ƒe nɔnɔmewo afia. Eyata Paulo de dzi ƒo na eƒe ŋkekea me Kristotɔwo be: “Azɔ la mizu mawusrɔ̃lawo abe lɔlɔ̃viwo ene.” (Efesotɔwo 5:1) Gake le ŋutinya katã me la, ame akpa gãtɔ ɖe bubumademade vɔ̃ɖi fia ɖe Mawu ƒe nɔnɔmewo ŋu. Amewo gblẽku le Noa ŋɔli ale gbegbe be Yehowa ɖoe be yeatsrɔ̃ amegbetɔwo katã negbe Noa kple eƒe ƒomea koe akpɔtɔ. Noa nye “ame dzɔdzɔe kple ame maɖifɔ le le eŋɔlimetɔwo dome,” eye eɖe eƒe lɔlɔ̃ na Mawu fia esi wòwɔ Mawu ƒe sededewo dzi. “Noa wɔe; alesi Mawu de se nɛ la, nenema pɛ wòwɔ.” (Mose I, 6:9, 22) Noa lɔ̃ ehaviwo eye wòwɔ nu dzɔdzɔe esi wònye “dzɔdzɔenyenye ƒe gbeƒãɖela.” (Petro II, 2:5) Eɖe nunya fia eye wòwɔ ŋusẽ si le esi la ŋudɔ nyuie to wɔwɔ ɖe Mawu ƒe mɔfiame dzi be wòakpa aɖakaʋu gã aɖe, wòaƒo nuɖuɖu nu ƒu ɖe eme, wòakplɔ lãwo ade eme, eye wòage ɖe aɖakaʋua me ne Yehowa ɖe gbe nɛ. Egaɖe eƒe dzɔdzɔenyenyelɔlɔ̃ fia esi meɖe mɔ be eƒe aƒelika vɔ̃ɖiawo gblẽe o.

Biblia ƒo nu tso ame bubu geɖe siwo ɖe Mawu ƒe nɔnɔmewo fia nenema ke la ŋu. Woƒe gãtɔe nye Yesu Kristo, amesi de blibo le Mawu ƒe nɔnɔme me eyata wòte ŋu gblɔ be: “Amesi ke kpɔm la, ekpɔ Fofo la.” (Yohanes 14:9) Lɔlɔ̃e ɖe dzesi wu le nɔnɔme siwo Yesu ɖe fia la dome. Lɔlɔ̃ na Fofoa kple amegbetɔwo ʋãe be wòdzo le enɔƒe le dziƒo heva nɔ anyigba dzi abe amegbetɔ ene. Eʋãe be wòto eƒe nudzɔdzɔewɔwɔ kple gbeƒãɖeɖe ɖeɖekpɔkpɔ nyanyui na amegbetɔwo me kɔ Fofoa ŋuti. (Mateo 4:23; Yohanes 13:31) Emegbe lɔlɔ̃ ʋã Yesu wòtsɔ eƒe agbe deblibo na be ameƒomea nakpɔ ɖeɖe eye gawu la, be wòakɔ Mawu ƒe ŋkɔ ŋuti. (Yohanes 13:1) Le agbagbadzedze be míasrɔ̃ Mawu me la, ɖe kpɔɖeŋu nyui bubu aɖe gali míasrɔ̃ wu Yesu Kristoa?—Petro I, 2:21.

Aleke Míate Ŋu Anɔ Abe Mawu Ene Egbea?

Aleke míate ŋu aɖe Mawu ƒe nɔnɔmewo afia ahawɔ nu le Mawu ƒe nɔnɔme me egbeae? Gbã la, de ŋugble le nɔnɔme si nye lɔlɔ̃ ŋu kpɔ. Yesu gblɔ be: “Lɔ̃ [Yehowa] wò Mawu, kple wò dzi blibo kple wò luʋɔ blibo kpakple wò tamesusu blibo.” Aleke míalɔ̃ Mawui? Apostolo Yohanes ɖo eŋu be: “Lɔlɔ̃ na Mawu enye si bena, míalé eƒe seawo me ɖe asi, eye eƒe seawo mesesẽ o.”—Mateo 22:37; Yohanes I, 5:3.

Nyateƒee, ele be míanya Yehowa ƒe sewo hafi awɔ wo dzi. Ema bia be míaxlẽ Mawu ƒe Nya si nye Biblia la kple Biblia-srɔ̃gbalẽwo, míasrɔ̃ wo ahade ŋugble le wo ŋu. Ele be míate ŋu agblɔ abe hakpala la ene be: “Aleke gbegbe nyemehelɔ̃a wò se lae o! Nye ŋugbledede wònye ɖaa.” (Psalmo 119:97) Ne míeva le Mawu ƒe Nya la gɔme sem ɖe edzi nyuie wu la, míeva bua tame abe alesi Mawu bunɛ ene. Míeva lɔ̃a dzɔdzɔenyenye eye míaléa fu madzɔmadzɔnyenye. (Psalmo 45:8) Ema mee Adam da vo le. Enya Yehowa ƒe sea gake melɔ̃e tututu be wòalé eme ɖe asi o. Ne míele Mawu ƒe Nya la xlẽm la, ele be míanɔ mía ɖokui biam be, ‘Aleke nusia kamee? Nukae mawɔ be nye nuwɔna nasɔ ɖe Mawu ƒe nɔnɔmewo nu ɖe edzi wu?’

Yesu gagblɔ be: “Lɔ̃ hawòvi abe wo ŋutɔ ɖokuiwò ene.” (Mateo 22:39) Amesiame si tagbɔ li na la lɔ̃a eɖokui eye wòdia nu nyuitɔ kekeake na eɖokui. Ema megblẽ o. Gake ɖe míelɔ̃a mía havi nenema kea? Ðe míewɔa Biblia ƒe sedede sia dzi be: ‘Megate nu nyui hiãtɔ, nenye be ŋutete le ŋuwò na ewɔwɔ oa’?—Lododowo 3:27; Galatiatɔwo 6:10.

Ke nɔnɔme si nye lɔlɔ̃ ya ɖe? Didi be míaɖe nɔnɔme sia fia wɔnɛ be míesrɔ̃a Biblia la elabena eyae nye Mawu ƒe nunya dzraɖoƒe. Psalmo 119:98-100 xlẽ be: “Wò se la wɔm nunyalae wu nye futɔwo, elabena tɔnyee wonye tegbee. Medze nunya wu nye nufialawo katã, elabena wò ɖaseɖiɖiwo nye nye ŋugbledede. Mese nu gɔme wu ame tsitsiwo, elabena melé wò seawo me ɖe asi.” Woƒo nu tso nunya ŋu le Lododowo 3:18 be enye “agbeti.” Ne nunya su mía si eye míewɔa eŋudɔ la, Mawu akpɔ ŋudzedze ɖe mía ŋu eye wòana agbe mavɔ fetu la mí.—Nyagblɔla 7:12.

Ke dzɔdzɔenyenye ya ɖe? Le xexe vɔ̃ɖi sia me la, dzɔdzɔenyenye nye nɔnɔme vevi aɖe wòle be amesiwo awɔ nu wòadze Mawu ŋu la nasrɔ̃. Yesu lɔ̃ dzɔdzɔenyenye eye wòlé fu madzɔmadzɔnyenye. (Hebritɔwo 1:9) Nenema ke Kristotɔwo wɔna egbea. Dzɔdzɔenyenye ʋãa wo be woaɖe nɔnɔme nyuiwo afia. Wotsria xexe sia me ƒe madzɔmadzɔnyenye eye wonaa Mawu ƒe lɔlɔ̃nu wɔwɔ nyea nu vevitɔ na wo le woƒe agbe me.—Yohanes I, 2:15-17.

Le ŋusẽ gome ya la, sue aɖe teti le mí katã si. Ŋutilã kple susu me ƒe ŋusẽ le mía si tso dzɔdzɔme eye ne míele tsitsim abe Kristotɔwo ene la, ŋusẽ ɖoa mía ŋu le gbɔgbɔ me. Yehowa tsɔa eƒe gbɔgbɔ kɔkɔe la dzia míaƒe ŋusẽ ɖe edzi ale gbegbe be togbɔ be míenye gbɔdzɔgbɔdzɔtɔwo hã la, míate ŋu awɔ Yehowa ƒe lɔlɔ̃nu. Paulo gblɔ be: “Metea ŋu wɔa nuwo katã le . . . , amesi doa ŋusẽm la me.” (Filipitɔwo 4:13) Ŋusẽ ma ke ate ŋu aɖo mía ŋu ne míedo gbe ɖa bia Yehowa ƒe gbɔgbɔ la.

Gbeƒãɖeɖe Nyanyui La

Mawu ƒe nɔnɔme vevi eneawo ɖeɖefia adze nyuie ne míewɔ ɖe sedede sia dzi be: “Miheyi ɖawɔ dukɔwo katã [me nɔlawo] ne woanye nusrɔ̃lawo, [mianyrɔ̃] wo ɖe Fofo la kple Vi la kpakple gbɔgbɔ kɔkɔe la ƒe ŋkɔa me, miafia wo bena, woawɔ nusiwo katã meɖo na mi la; eye kpɔ ɖa, nye la meli kpli mi ŋkekeawo katã vaseɖe xexeame ƒe nuwuwu.” (Mateo 28:19, 20) Hehenadɔ sia naa agbe amesiwo xɔnɛ. Lɔlɔ̃ ɖeɖefia nyui kae nye si wònye le amesiwo nyea amedzrowo na mí zi geɖe le gɔmedzedzea me la gome!

Hekpe ɖe eŋu la, nunya le nufiafiadɔ sia wɔwɔ me. Etsea ku si nɔa anyi ɖaa. Dɔ bubu ka ŋue woate ŋu agblɔ nya sia le: “Ne èwɔ esia la, àxɔ ɖokuiwò kple amesiwo ɖoa to wò la, ɖe agbe”? (Timoteo I, 4:16) Nu metsia ame aɖeke ŋu le nusrɔ̃lawɔwɔdɔa me o. Toɖolawo kple nufialawo siaa akpɔ agbe mavɔ.

Le dzɔdzɔenyenye gome la, Kristotɔwo fiaa dzidzenu dzɔdzɔewo woƒe Biblia-nusrɔ̃viwo. Míekpena ɖe wo ŋu be woasubɔ Yehowa, “Mawu, [dzɔdzɔetɔ] la.” (Maleaxi 2:17) Wobua amesiwo tsɔa woƒe agbe ɖea adzɔgbe na Yehowa egbea eye wowɔa nuteƒe vaseɖe nuwuwu la dzɔdzɔetɔwoe, wonye amesiwo wotso afia na be woatsi agbe le Harmagedon me.—Romatɔwo 3:24; Yakobo 2:24-26.

Ŋusẽ ɖeɖefia ka gbegbee nye esi gbeƒãɖeɖe nyanyui la kple efiafia le xexeame katã nye! (Mateo 24:14) Ehiã na dzidodo be woayi edzi aɖe gbeƒã ɣesiaɣi le anyigbamamã siwo me ame akpa gãtɔ melɔ̃na sea nyaa le o. Gake Yehowa toa eƒe gbɔgbɔa dzi doa ŋusẽ si dze la mí be míado dzi vaseɖe nuwuwu.—Yesaya 40:30, 31; Mateo 24:13; Luka 11:13.

Nyateƒee, esi míenye Adam ƒe dzidzimevi madeblibowo ta la, míate ŋu aɖe nɔnɔme nyui siawo afia wòade blibo o. Gake ɖo ŋku edzi be Mawu ƒe nɔnɔme mee wòwɔ ame ɖo eye ne míedzea agbagba ɣesiaɣi be míanɔ abe Mawu ene la, ekama míele wɔwɔm ɖe susu si ta míeli ɖo la ƒe akpa aɖe dzi. (Nyagblɔla 12:13) Ne míeʋlina be míawɔ nusianu si míate ŋui eye míebiaa tsɔtsɔke ne míeda vo la, ke míate ŋu akpɔ mɔ be míatsi agbe age ɖe Mawu ƒe xexe yeye dzɔdzɔe la me, afisi míava de blibo le mlɔeba. Ekema míanɔ paradisonyigba si dzi ame deblibowo sɔŋ le la dzi, wo katã woanɔ Yehowa Mawu ƒe nɔnɔmewo ɖem fia bliboe. Dzidzɔ kae nye si wòanye! Mlɔeba le nyagbɔgblɔa ƒe gɔmesese ŋutɔŋutɔ nu la, amegbetɔwo ava nɔ Mawu ƒe nɔnɔme me.

[Nɔnɔmetata si le axa 25]

Yesu fia alesi míaɖe Yehowa Mawu ƒe nɔnɔmewo afiae la mí

[Nɔnɔmetata si le axa 26]

Mlɔeba la, amegbetɔwo ava nɔ Mawu ƒe nɔnɔme me le nya la ƒe gɔmesese si de blibo nu