Wěma nukɔntɔn e è wlán sɛ́dó Kɔlɛ́ntinu lɛ́ é

7 Din ɔ, un ná ná xósin nú nǔ e mi wlán sɛ́dó lɛ́ é: É ná kpɔ́n te hú ɖɔ súnnu ɖé ní ma y’agba nyɔ̌nu wú* ó; 2 amɔ̌, ɖó agalilɛ* gba kpé wútu ɔ, mi nú súnnu ɖokpó ɖokpó ní ɖó asi éɖésúnɔ tɔn, bónú nyɔ̌nu ɖokpó ɖokpó ní ɖó asú éɖésúnɔ tɔn. 3 Mi nú asú ní wa asúzɔ́ nú asi tɔn; mɔ̌ ɖokpó ɔ, asi ní wa asizɔ́ nú asú tɔn. 4 Asi ɖó acɛ dó agbaza éɖésúnɔ tɔn jí ǎ, loɔ, asú tɔn wɛ ɖó acɛ d’é jí; mɔ̌ ɖokpó ɔ, asú ɖó acɛ dó agbaza éɖésúnɔ tɔn jí ǎ, loɔ, asi tɔn wɛ ɖó acɛ d’é jí. 5 Mi ma gbɛ́ xɔ nú miɖée lɛ́ ó, afi nú mi ɖó gbe kpɔ́ bo ná wa mɔ̌ nú hwenu ɖé ɔ nɛ́, bónú mi ní dó sixú zán hwenu dó xo ɖɛ, bɔ énɛ́ gúdo ɔ, mi ná lɛ́ jɛ kpɔ́; énɛ́ ɔ, mɛɖéejímaɖuɖe mitɔn ná wá zɔ́n bɔ Satáan ná nɔ ɖo mi tɛ́n kpɔ́n wɛ ǎ. 6 É ɖo mɔ̌ có, nǔ e mi sixú wa é wɛ nyí énɛ́ bɔ un ɖɔ nú mi, é nyí sɛ́n bɔ un dó nú mi ǎ. 7 Amɔ̌, un jló ɖɔ súnnu lɛ́ bǐ ní cí nyiɖɔhun. É ɖo mɔ̌ có, nǔníná mɛtɔn mɛtɔn wɛ Mawu ná mɛ. É ná ɖě mɛ ɖě bo ná ɖěvo mɛ ɖěvo.

8 Din ɔ, un ɖo ɖiɖɔ nú mɛ e ma wlí alɔ ǎ lɛ́ é kpó asúkúsi lɛ́ kpó wɛ ɖɔ nú yě nɔ lěe un ɖe é ɔ, é nyɔ́ nú yě hú. 9 Amɔ̌, ényí yě ma sixú ɖu ɖo yěɖée jí ǎ hǔn, mi nú yě ní wlí alɔ, ɖó nú è wlí alɔ ɔ, é nyɔ́ hú ɖɔ jlǒ xóɖóxámɛ tɔn ní ɖo jiji wɛ ɖo lan mɛtɔn mɛ myɔ ɖɔhun.

10 Un ɖo wě élɔ́ lɛ́ ɖe xá mɛ e wlí alɔ lɛ́ é wɛ, é ka nyí nyɛ wɛ ǎ, loɔ, Aklúnɔ wɛ, é wɛ nyí ɖɔ asi ɖé ɖó ná klán jó asú tɔn dó ǎ. 11 Ényí é ka klán jó è dó jɛ́n wɛ hǔn, é ní ma vɔ́ alɔ wlí ó, alǒ é ní dó hwɛ gbɔ xá asú tɔn; asú ɖé ɖó ná jó asi tɔn dó ǎ.

12 Amɔ̌, un ɖo xó élɔ́ ɖɔ nú mɛ ɖě lɛ́ wɛ (nyɛ wɛ ɖo ɖiɖɔ wɛ, é nyí Aklúnɔ ǎ): Ényí nɔví súnnu ɖé sín asi nyí nǔmaɖitɔ́, bɔ nyɔ̌nu ɔ ka yí gbe bo ná nɔ kpɔ́ xá ɛ hǔn, é ní ma jó è dó ó; 13 ényí nyɔ̌nu ɖé sín asú nyí nǔmaɖitɔ́, bɔ súnnu ɔ ka yí gbe bo ná nɔ kpɔ́ xá ɛ hǔn, é ní ma jó asú tɔn dó ó. 14 Ðó asú nǔmaɖitɔ́ ɔ, è sixú kpɔ́n ɛ dó mɔ mɛ mímɛ́ ɖó asi tɔn wútu, bɔ asi nǔmaɖitɔ́ ɔ, è sixú kpɔ́n ɛ dó mɔ mɛ mímɛ́ ɖó nɔví súnnu ɔ wútu; é ma nyí mɔ̌ ǎ ɔ, vǐ mitɔn lɛ́ ná nyí mɛ blíblí, amɔ̌ din ɔ, yě nyí mɛ mímɛ́. 15 Ényí nǔmaɖitɔ́ ɔ ka wá gbeta ɔ kɔn ɖɔ émí ná yi* hǔn, é ní bo yi; ɖo ninɔmɛ mɔ̌hun lɛ́ mɛ ɔ, é byɔ́ ɖɔ nɔví súnnu ɖé alǒ nɔví nyɔ̌nu ɖé ní nɔ kpɔ́ xá nǔmaɖitɔ́ ɔ ǎ. Fífá mɛ wɛ Mawu ylɔ́ mi dó. 16 Ðó hwi asi, a tuun nú a ná hwlɛ́n asú towe alǒ gbɔ a? Alǒ hwi asú, a tuun nú a ná hwlɛ́n asi towe alǒ gbɔ a?

17 É ɖo mɔ̌ có, mi nú mɛ ɖokpó ɖokpó ní nɔ zán gbɛ sɔgbe xá ninɔmɛ e mɛ é ɖe hwenu e Jexóva* Mawu ylɔ́ ɛ é. Wě e un ɖe xá agun lɛ́ bǐ é nɛ́. 18 Mɛɖé ko gbo ada cóbɔ è ylɔ́ ɛ wɛ a? É ní nɔ lěe é ko ɖe é. Mɛɖé gbo ada ǎ bɔ è ylɔ́ ɛ wɛ a? É ní ma ɖɔ émí ná gbo ada ó. 19 Adagbigbo nyí nǔtí ǎ, adamagbo lɔ nyí nǔtí ǎ; sɛ́n Mawu tɔn lɛ́ nyinyi wɛ ɖo tají. 20 Ninɔmɛ ɖěbǔ e mɛ mɛɖé ɖe bɔ è ylɔ́ ɛ é ɔ, mɛ ɔ ní nɔ ninɔmɛ énɛ́ mɛ. 21 Kannumɔ wɛ a nyí hwenu e è ylɔ́ we é a? Énɛ́ ní ma ɖó linkpɔ́n nú we ó; amɔ̌, ényí ali hun nú we bónú a ná jɛ hwiɖée sí hǔn, ma nú é yi tɛ we ó. 22 Ðó mɛ ɖěbǔ e nyí kannumɔ bɔ Aklúnɔ ylɔ́ ɛ é jɛ éɖée sí bo nyí Aklúnɔ tɔn; mɔ̌ ɖokpó ɔ, mɛ ɖěbǔ e ɖo éɖée sí bɔ è ylɔ́ ɛ é nyí kannumɔ Klísu tɔn. 23 Axɔ́ ɖé wɛ è sú dó xɔ mi; mi ma sɔ́ nyí kannumɔ nú gbɛtɔ́ ɖě ó. 24 Nɔví lɛ́ mi, ninɔmɛ ɖěbǔ e mɛ mɛɖé ɖe bɔ è ylɔ́ ɛ é ɔ, mɛ ɔ ní nɔ ninɔmɛ énɛ́ mɛ ɖo Mawu nukɔn.

25 Din ɔ, un ɖó sɛ́n e gosín Aklúnɔ gɔ́n é ɖě nú mɛ e ɖo alɔjí lɛ́ é* ǎ, amɔ̌, ɖó Aklúnɔ kú nǔbláwǔ nú mì bɔ un ɖo gbejí wútu ɔ, un ná ɖɔ linlin ce. 26 Ðo hwenu vɛ́ wǔ élɔ́ lɛ́ mɛ ɔ, un lin ɖɔ, ényí súnnu ɖé nɔ lěe é ɖe é ɔ, é nyɔ́ hú. 27 A ko d’asi wɛ a? Ma ba ná klán jó è dó ó. A ɖó asi ǎ wɛ a? Ma ba ná d’asi ó. 28 Amɔ̌, ényí a ná bo tlɛ wlí alɔ ɔ, a hu hwɛ ɖě ǎ. Ényí tlɛnnɔ* wlí alɔ ɔ, é hu hwɛ ɖě ǎ. É ɖo mɔ̌ có, mɛ e wlí alɔ lɛ́ é ná mɔ wǔvɛ́ gěgé.* Amɔ̌, un ɖo tíntɛ́nkpɔ́n wɛ bo ná xɔ mi ɖ’é mɛ.

29 Gɔ́ ná ɔ, nɔví lɛ́ mi, un ɖo ɖiɖɔ nú mi wɛ ɖɔ hwenu e kpo é kún sɔ́ sukpɔ́ ó. Bɛ́sín din ɔ, mɛ e ɖó asi lɛ́ é ní cí yě ɖó asi ɖě ǎ ɖɔhun, 30 mɛ e ɖo avǐ ya wɛ lɛ́ é ní cí mɛ e ma ɖo avǐ ya wɛ ǎ lɛ́ é ɖɔhun, mɛ e ɖo awǎ jɛ wɛ lɛ́ é ní cí mɛ e ma ɖo awǎ jɛ wɛ ǎ lɛ́ é ɖɔhun, mɛ e ɖo nǔ xɔ wɛ lɛ́ é ní cí mɛ e ma ɖó nǔ ǎ lɛ́ é ɖɔhun, 31 bónú mɛ e ɖo gbɛ ɔ zán wɛ lɛ́ é ní wa nǔ yě ɖo zǐnzán wɛ bǐ mlɛ́mlɛ́ ǎ ɖɔhun; ɖó ninɔmɛ gbɛ élɔ́ tɔn* ɖo hǔzúhúzú wɛ. 32 Nǔgbó ɔ, un ba ɖɔ ado ní ma nɔ hu mi ó. Súnnu e ma d’asi ǎ é ɔ, Aklúnɔ sín nǔ lɛ́ wɛ nɔ ɖu ayi mɛ n’i, énɛ́ wɛ nyí lěe é ná bló gbɔn bɔ nǔ tɔn ná nyɔ́ Aklúnɔ nukúnmɛ é. 33 Amɔ̌, súnnu e d’asi é ɔ, nǔ e nyí gbɛ ɔ tɔn lɛ́ é wɛ nɔ ɖu ayi mɛ n’i, énɛ́ wɛ nyí lěe é ná bló gbɔn bɔ nǔ tɔn ná nyɔ́ asi tɔn nukúnmɛ é, 34 énɛ́ ɔ, linlin tɔn nɔ má. Gɔ́ ná ɔ, nyɔ̌nu e ma d’asú ǎ é kpó nyɔ̌nu e ɖo alɔjí é kpó ɔ, nǔ e nyí Aklúnɔ tɔn lɛ́ é wɛ nɔ ɖu ayi mɛ nú yě, bónú yě ná dó sixú nɔ mǐmɛ́ jí ɖo agbaza yětɔn kpó linlin yětɔn kpó mɛ. Amɔ̌, nyɔ̌nu e d’asú é ɔ, nǔ e nyí gbɛ ɔ tɔn lɛ́ é wɛ nɔ ɖu ayi mɛ n’i, é wɛ nyí lěe é ná bló gbɔn bɔ nǔ tɔn ná nyɔ́ asú tɔn nukúnmɛ é. 35 Ðagbe mitɔn wú wɛ un ɖo mɔ̌ ɖɔ wɛ, é nyí bo ná dó ɖó dogbó nú mi* wú wɛ ǎ, loɔ, bo ná dó bló bónú mi ná nɔ wa nǔ e sɔgbe é, bo ná lɛ́ zé miɖée jó nú Aklúnɔ hwebǐnu bɔ nǔ ɖěbǔ ná fɛ́ ayi mitɔn ǎ.

36 Amɔ̌, ényí mɛ ɖěbǔ ko zɛ wǐnnyáwínnyáxwe wú, bo ka lin ɖɔ émí ɖo nǔ e ma sɔgbe ǎ é wa wɛ, ɖó tlɛnmɛ* e é ɖe é wú ɔ, nǔ e é ɖó ná wa é ɖíe: Mi nú é ní wlí alɔ, ényí mɔ̌ wiwa wɛ jló è ɔ nɛ́; ényí é wa mɔ̌ hǔn, é hu hwɛ ǎ. 37 Loɔ, ényí mɛ ɖěbǔ kú d’é jí ɖo ayi éɖésúnɔ tɔn mɛ ɖɔ é kún byɔ́ ɖɔ émí ní wlí alɔ ó, bo ka ɖó acɛ dó jlǒ éɖésúnɔ tɔn lɛ́ jí lobo wá gbeta ɔ kɔn ɖo ayi éɖésúnɔ tɔn mɛ ɖɔ émí kún ná wlí alɔ ó* hǔn, nǔ ɖagbe wɛ é nyí bɔ é ná wa. 38 Énɛ́ wú ɔ, mɛ ɖěbǔ e wlí alɔ é ɔ, nǔ ɖagbe wɛ é wa, mɛ ɖěbǔ e ma ka wlí alɔ ǎ é wa nǔ ɖagbe hú gǎn.

39 Asi ɖé ɖó ná nɔ bǔ xá asú tɔn nú gbɛhwenu asú tɔn tɔn bǐ. Amɔ̌, ényí asú tɔn kú ɔ, é vo bo ná wlí alɔ xá mɛ ɖěbǔ e jló è é, mɛ ɔ ní vɛ́ ko nyí ahwanvú Aklúnɔ tɔn.* 40 Loɔ, ɖo linlin ce mɛ ɔ, ényí é nɔ lěe é ɖe é ɔ, é ná ɖó awǎjijɛ hú gǎn; un kú d’é jí ɖɔ gbigbɔ Mawu tɔn ɖo kpɔ́ xá nyi lɔ.