Nǔ e Mɛsɛ́dó lɛ́ wa lɛ́ é

2 Ðo Pantekótuxwe ɔ sín azǎn gbe ɔ, yě bǐ kplé ɖó kpɔ́ ɖo fí ɖokpó ɔ. 2 Ajijimɛ ɔ, zǐngídi ɖé gosín jǐxwé jɔhɔn ɖaxó wɛ ɖo nyinyi wɛ ɖɔhun, bo kpé xwé e gbe yě ɖo ayǐjínjɔ́n ɖe é bǐ. 3 Bɔ yě mɔ nǔ zoɖɛ́ ɖɔhun ɖé lɛ́ má, bo ɖó dó ta nú yě mɛ ɖokpó ɖokpó, 4 lobɔ gbigbɔ mímɛ́ wá yě bǐ jí, bɔ yě jɛ xó ɖɔ dó gbe tɛnmɛ tɛnmɛ mɛ jí, lěe gbigbɔ ɔ yí gbe nú yě ɖɔ yě ní ɖɔ gbɔn é.

5 Jwifu e nɔ tɛ́ dó Mawu wú bo gosín akɔta e ɖo hwe glɔ́ lɛ́ é bǐ mɛ lɛ́ é ɖo Jeluzalɛ́mu hwenɛ́nu. 6 Énɛ́ wú ɔ, ée yě se zǐngídi ɔ é ɔ, ahwan ɖé kplé, bɔ ɖó mɛ ɖokpó ɖokpó se xó e ɖɔ wɛ ahwanvú lɛ́ ɖe é dó gbe éɖésúnɔ tɔn mɛ wútu ɔ, é bú vo dó yě. 7 Nǔgbó ɔ, é jí wǔ nú yě tawun bɔ yě ɖɔ: “Mi kpɔ́n! Mɛ énɛ́ lɛ́ e ɖo xó ɖɔ wɛ é ɔ, Galiléenu wɛ nú yě bǐ ǎ cé? 8 Nɛ̌ é ka nyí gbɔn bɔ mǐ mɛ ɖokpó ɖokpó ɖo xó se dó anɔ̌nugbe mǐtɔn mɛ wɛ? 9 Páatinu, Mɛ̌dinu, Elámunu, mɛ e nɔ nɔ Mɛzopotamíi, Judée, Kapadɔ́si, Pɔ́ɔn, tokpɔn Azíi tɔn, 10 Flijíi, Panfilíi kpó Ejípu kpó lɛ́ é, mɛ e nɔ nɔ Libíi sín xá, éé ɖo Silenɛ́ɛ kpá lɛ́ é mɛ lɛ́ é, gɔ́ nú jǒnɔ e gosín Hlɔ̌ma lɛ́ é, Jwifu kpó mɛ e húzú Jwifu é kpó bǐ, 11 Klɛ́tinu lɛ́ kpó Alabíinu lɛ́ kpó, mǐ bǐ se bɔ yě ɖo nǔjíwǔ Mawu tɔn lɛ́ sín xó ɖɔ wɛ dó gbe mǐtɔn mǐtɔn mɛ.” 12 Ɛɛn, nǔ ɔ kpácá ahwan ɔ bǐ bo lɛ́ bú vo dó yě, bɔ yě nɔ ɖɔ nú yěɖée lɛ́ ɖɔ: “Étɛ́ ka ɖo jijɛ wɛ tawun?” 13 É ɖo mɔ̌ có, mɛ ɖěvo lɛ́ cá nú ahwanvú lɛ́ bo ɖɔ: “Vɛ̌ɛn víví* wɛ yě nu gɔ́ xo.”

14 Amɔ̌, Piyɛ́ɛ sí te, é kpó mɛsɛ́dó 11 ɖě lɛ́ kpó, bo sɔ́ gbe dó jǐ lobo ɖɔ nú yě ɖɔ: “Judéenu lɛ́ kpó mi mɛ e nɔ nɔ Jeluzalɛ́mu lɛ́ é bǐ kpó, mi ɖótó mì kpó sɔxwixwe kpó, bo mɔ nǔ jɛ wú ɖɔ 15 mɛ élɔ́ lɛ́ kún nu ahan mú lěe mi lin gbɔn é ó, ɖó gan tɛ́nnɛ zǎnzǎn tɔn mɔ̌ wɛ ɖo xixo wɛ.* 16 É nyɔ́ wa ɔ, nǔ e gbeyíɖɔ Jowɛ́li ɖɔ é wɛ ɖo jijɛnu wɛ. É ɖɔ: 17 ‘Mawu ɖɔ: “Ðo azǎn gǔdo gúdo tɔn lɛ́ mɛ ɔ, un ná gba gbigbɔ ce sín akpáxwé hǎbǔ kɔn nyi gbɛtɔ́ alɔkpa bǐ jí; bɔ vǐ súnnu mitɔn lɛ́ kpó vǐ nyɔ̌nu mitɔn lɛ́ kpó ná nɔ wa gbeyíɖɔzɔ́,* dɔ̌nkpɛvú mitɔn lɛ́ ná nɔ mɔ nǔ, un ná nɔ xo dlɔ̌ degénɔ mitɔn lɛ́. 18 Un tlɛ ná gba gbigbɔ ce sín akpáxwé ɖé dó mɛsɛntɔ́ ce súnnu kpó nyɔ̌nu kpó jí ɖo azǎn énɛ́ lɛ́ gbe, bɔ yě ná nɔ wa gbeyíɖɔzɔ́.* 19 Un ná ɖe nǔdabaɖa* lɛ́ xlɛ́ ɖo jǐnukúnsin aga, bo ná bló nǔjíwǔ lɛ́ ɖo ayǐkúngban jí; yě wɛ nyí: hun kpó myɔ kpó gɔ́ nú azizɔ. 20 Hwesivɔ́ ná dó ablu bɔ sun ná húzú hun, cóbɔ azǎn ɖaxó susunɔ Jexóva* tɔn ná wá. 21 Bɔ mɛ ɖěbǔ e ylɔ́ nyǐkɔ Jexóva* tɔn é ɔ, è ná hwlɛ́n ɛ gán.”’

22 “Izlayɛ́li ví è mi, mi ɖótó xó élɔ́ lɛ́: Mawu bló nǔjíwǔ lɛ́ kpó nǔdabaɖa lɛ́ kpó, bo lɛ́ ɖe wuntun lɛ́ xlɛ́ gbɔn Jezu Nazalɛ́tinu ɔ jí ɖo tɛ́ntin mitɔn dó ɖe xlɛ́ mi nyi wɛn ɖɔ émí wɛ sɛ́ ɛ dó lěe miɖésúnɔ tuun gbɔn é. 23 Nya énɛ́ ɔ, mi wlí i bo jó è nú sɛ́ngbatɔ́ lɛ́, bɔ yě xwe è nyi atín wú bo hu i. Nǔ nyí mɔ̌ sɔgbe xá tuto e Mawu bló é kpó nǔ e é ko tuun jɛ nukɔn é kpó. 24 Amɔ̌, Mawu fɔ́n ɛ sín kú dó ɖe è sín wǔvɛ́* kú tɔn lɛ́ mɛ, ɖó kú sixú hɛn ɛ ɖó te ǎ. 25 Ðó Davídi ɖɔ dó wǔ tɔn ɖɔ: ‘Un nɔ sɔ́ ayi ɖó* Jexóva* jí hwebǐnu, ɖó é ɖo ɖisí ce xwé, bónú nǔɖé ní ma gba ayi dó nú mì gbeɖé ó. 26 Énɛ́ wɛ zɔ́n bɔ awǎjijɛ gɔ́ ayi ce mɛ, bɔ un ɖɔ xó kpó xomɛhunhun ɖaxó kpó. Un* ná ɖo nukúnɖíɖó mɛ; 27 ɖó a ná jó mì* dó nyi Yɔdo* mɛ ǎ, a ka ná lɔn bónú gbejínɔtɔ́ towe sín cyɔ ná nyɔ ǎ. 28 A bló bɔ un tuun gbɛli ɔ; a ná dó awǎjijɛ ɖaxó nú mì ɖo nukɔn towe.’*

29 “Nɔví lɛ́ mi, mi nú má ɖɔ xójɔxó nú mi dó tɔ́gbó mǐtɔn Davídi wú; é kú bɔ è ɖi i, lobɔ yɔdo tɔn ɖo fí káká jɛ égbé. 30 Ðó é nyí gbeyíɖɔ bo tuun ɖɔ Mawu d’akpá nú émí, bo xwlé nǔ d’é jí ɖɔ émí ná sɔ́ kúnkan émítɔn ɖokpó jínjɔ́n axɔ́súzinkpo émítɔn jí wútu ɔ, 31 é mɔ fínfɔ́n sín kú Klísu tɔn sɛ́dó, bo ɖɔ d’é wú ɖɔ è kún ná wɔn ɛ nyi Yɔdo* mɛ ó, agbaza tɔn kún ka ná lɛ́ nyɔ* ó. 32 Mawu fɔ́n Jezu énɛ́ sín kú, bɔ mǐ bǐ mɔ. 33 Énɛ́ wú ɔ, ɖó è sɔ́ ɛ su, bɔ é ɖo ɖisíxwé nú Mawu bo lɛ́ mɔ gbigbɔ mímɛ́ e sín akpá Tɔ́ ɔ dó é yí wútu ɔ, é gba gbigbɔ mímɛ́ ɔ kɔn nyi mǐ jí lěe mi mɔ bo lɛ́ se gbɔn é. 34 Nǔgbó ɔ, Davídi yi jǐxwé ǎ, loɔ, éɖésúnɔ ɖɔ: ‘Jexóva* ɖɔ nú Aklúnɔ ce ɖɔ: “Jǐnjɔ́n ɖisí ce xwé 35 káká jɛ hwenu e un ná sɔ́ kɛntɔ́ towe lɛ́ dó bló afɔɖótɛn towe é.”’ 36 Énɛ́ wú ɔ, mɛ e ɖo Izlayɛ́li lɛ́ é bǐ ní mɔ nǔ jɛ wú nyi wɛn ɖɔ, Jezu énɛ́ e mi xwe nyi atín wú é ɔ, Mawu ko sɔ́ ɛ Aklúnɔ, bo lɛ́ sɔ́ ɛ Klísu.”

37 Xó énɛ́ e yě se é xo ayi yětɔn zlɛ́, bɔ yě ɖɔ nú Piyɛ́ɛ kpó mɛsɛ́dó ɖě lɛ́ kpó ɖɔ: “Nɔví lɛ́, étɛ́ mǐ ka ɖó ná wa?” 38 Piyɛ́ɛ ɖɔ nú yě ɖɔ: “Hwɛ mitɔn lɛ́ ní vɛ́ nú mi,* bónú è ní bló batɛ́mu nú mi mɛ ɖokpó ɖokpó ɖo nyǐkɔ Jezu Klísu tɔn mɛ, nú è ná sɔ́ hwɛ mitɔn lɛ́ kɛ mi, énɛ́ ɔ, è ná ná mi gbigbɔ mímɛ́ ɔ vɔ̌nu. 39 Ðó mi kpó vǐ mitɔn lɛ́ kpó wɛ è dó akpá tɔn ná, gɔ́ nú mɛ ɖěɖěe ɖo zɔ lɛ́ é bǐ kpó mɛ ɖěɖěe Mawu mǐtɔn Jexóva* sixú cyán lɛ́ é bǐ kpó.” 40 É lɛ́ ɖɔ xó gěgé ɖěvo lɛ́ dó ɖe kúnnu nú yě mlɛ́mlɛ́, bo lɛ́ dó wǔsyɛ́n lanmɛ nú yě ɖɔ: “Mi nú è ní hwlɛ́n mi bónú mi ní ma dɔn kpó jijimɛ gblégblé élɔ́ kpó ó.” 41 Énɛ́ ɔ, mɛ e yí xó tɔn kpó xomɛhunhun kpó lɛ́ é bló batɛ́mu, bɔ gbɛtɔ́* 3 000 húzú ahwanvú gbe nɛ́ gbe. 42 Yě kpo ɖo nǔ kplɔ́n wɛ ɖo mɛsɛ́dó lɛ́ gɔ́n, nɔ kplé ɖó kpɔ́,* nɔ ɖu nǔ, bo nɔ lɛ́ xo ɖɛ.

43 Mɛsɛ́dó lɛ́ jɛ nǔdabaɖa kpó nǔjíwǔ kpó gěgé bló jí, bɔ xɛsi jɛ mɛ* lɛ́ bǐ jí. 44 Mɛ e húzú nǔɖitɔ́ lɛ́ é bǐ kplé ɖó kpɔ́, bo nɔ má nǔ e yě ɖó lɛ́ é bǐ xá yěɖée lɛ́; 45 yě nɔ sa ayǐkúngban yětɔn lɛ́ kpó nǔ e yě ɖó lɛ́ é bǐ kpó, bo nɔ má akwɛ́ tɔn nú mɛ bǐ sɔgbe xá hudó mɛ ɖokpó ɖokpó tɔn. 46 Ayǐhɔ́ngbe ayǐhɔ́ngbe ɔ, yě nɔ kplé ɖo tɛ́npli ɔ mɛ ɖo linlin ɖokpó ɔ mɛ, bo nɔ ɖu nǔ ɖo xwé vovo lɛ́ gbe, bo nɔ má nǔɖuɖu yětɔn kpó awǎjijɛ ɖaxó kpó, lobo nɔ lɛ́ wa mɔ̌ kpó ayi bǐ kpó. 47 Yě nɔ ɖo susu kpa nú Mawu wɛ, bɔ nǔ yětɔn nɔ ɖo gbɛtɔ́ lɛ́ bǐ nukúnmɛ nyɔ́ wɛ. Ðo hwe ɖokpó ɔ nu ɔ, Jexóva* nɔ ɖo mɛ ɖěɖěe wlí hwlɛngán li ɔ lɛ́ é sɔ́ gɔ́ nú yě wɛ ayǐhɔ́ngbe ayǐhɔ́ngbe.