Etɛwu Sinsɛn Klisanwun Tɔn lɛ ka Sukpɔ́ Sɔmɔ̌?
Xósin e Biblu na é
Mɛ gegě zán nǔkplɔnmɛ Jezu Klisu tɔn lɛ dó hun agun tɛnmɛ tɛnmɛ lɛ. É ɖò mɔ̌ có, Biblu ɖexlɛ́ ɖɔ sinsɛn Klisanwun tɔn nǔgbo ɖokpo géé wɛ ɖè. Hwɛjijɔ e wu mǐ wá gbeta enɛ kɔn é atɔn kpowun ɖíe.
Jezu ɖɔ ɖɔ emi kplɔ́n “nǔgbo ɔ” mɛ, bɔ Klisanwun bǐbɛ̌mɛ tɔn lɛ ɖɔ dó sinsɛn yetɔn wu ɖɔ é nyí “nǔgbo ɔ.” (Jaan 8:32; 2 Piyɛ́ɛ 2:2; 2 Jaan 4; 3 Jaan 3) Xógbe enɛ xlɛ́ ɖɔ mɛ ɖěɖee nɔ jɛhun dó sinsɛn-núkplɔnmɛ e sɔ́ ta nǔkplɔnmɛ Jezu tɔn lɛ é jí lɛ é kún ɖò sinsɛn nǔgbo Klisanwun tɔn mɛ ó.
Biblu kplɔ́n mɛ ɖɔ Klisanwun lɛ ‘bǐ ɖó na ɖó gbè kpɔ́.’ (1 Kɔlɛntinu lɛ 1:10) Amɔ̌, sinsɛn Klisanwun tɔn gegě ɖó gbè kpɔ́ ɖò nǔkplɔnmɛ dodó lɛ kpo nǔ e Klisanwun nyínyí byɔ é kpo kɔn ǎ. Sinsɛn mɔ̌hun lɛ bǐ sixu nyí nǔgbo ǎ.—1 Piyɛ́ɛ 2:21.
Jezu ɖɔ ɖ’ayǐ ɖɔ mɛ gegě na ɖɔ ɖɔ emi nyí Klisanwun bo kún ka na nɔ setónú nú gbeɖiɖe emitɔn lɛ ó, bo ɖɔ ɖɔ emi na gbɛ́ mɛ mɔ̌hun lɛ. (Matie 7:21-23; Luki 6:46) Sinsɛngán ɖěɖee nɔ hɛn Mawu sinsɛn nǔgbo ɔ blí, ɖó cejɛnnabi wutu lɛ é na flú mɛɖé lɛ. (Matie 7:15) É ɖò mɔ̌ có, mɛ ɖevo lɛ na ba na xwedó sinsɛngán enɛ lɛ, ɖó ye nɔ ɖɔ nǔ e ye nɔ ba na sè lɛ é nú ye, b’ɛ sɔ́ nɔ nyí nǔgbo e ɖò Biblu ɔ mɛ lɛ é ǎ.—2 Timɔtée 4:3, 4.
Ðò nǔjlɛdonǔwu Jezu tɔn e kúnkplá blěe ɔ kpo gbehan nyanya lɛ kpo é mɛ ɔ, é ɖɔ ɖ’ayǐ ɖɔ mɛ gegě na fɔ́n gǔ dó sinsɛn Klisanwun tɔn nǔgbo ɔ jí. (Matie 13:24-30, 36-43) Nú hwenu gegě ɔ, é na vɛwǔ bɔ è na tuùn Klisanwun nǔgbo lɛ ɖó vo nú Klisanwun adingban lɛ. Lee Jezu ko ɖɔ ɖ’ayǐ gbɔn é ɔ, gǔfɔndómawujitɔ́ lɛ wá kpé tókɔ awɔnkɔ ɖò kú mɛsɛ́dó lɛ tɔn gudo. (Mɛsɛ́dó 20:29, 30) Nǔgbo wɛ ɖɔ nǔkplɔnmɛ gǔfɔndómawujitɔ́ lɛ tɔn lɛ sixu gbɔn vovo, amɔ̌, sinsɛn Klisanwun tɔn enyíì tɛnmɛ tɛnmɛ e tíìn lɛ é bǐ wɛ “lɛkɔ sín nǔgbo ɔ gudo.”—2 Timɔtée 2:18.
Jezu lɛ́ ɖɔ ɖ’ayǐ ɖɔ vogbingbɔn e tíìn ɖò sinsɛn Klisanwun tɔn nǔgbo ɔ kpo adingban ɔ kpo tɛntin é na wá jɛ wě bǐ vaan. Nǔ nyí mɔ̌ ɖò hwe mǐtɔn nu, é wɛ nyí hwenu e gbɛ̀ elɔ sín vivɔnu ko sɛkpɔ́ é.”—Matie 13:30, 39.