Wlɛnwín Wɛnɖagbe ɔ Jijla Tɔn Lɛ

JEZU jla wɛnɖagbe ɔ kpo kanɖodónǔwu kpo, bo dó zé kpɔ́ndéwú ɖé ɖ’ayǐ nú ahwanvu tɔn lɛ. Éɖesunɔ nɔ yì mɛ lɛ gɔ́n, bo nɔ ɖɔ xó nú ye, lobo nɔ lɛ́ kplɔ́n nǔ ye ɖò xwé yetɔn lɛ gbè kpo fí e ɖò agbawungba lɛ é kpo. (Mat. 9:35; 13:36; Luk. 8:1) Jezu ɖɔ xó xá mɛ ɖokpo ɖokpo, kplɔ́n nǔ ahwanvu tɔn lɛ ɖò nǔglɔ, lobo lɛ́vɔ ɖɔ xó nú mɛ afatɔ́n mɔkpan zɛ̌ɛn. (Mak. 4:10-13; 6:35-44; Jaan 3:2-21) É gbɔn ali e hun n’i lɛ é bǐ sín yɛkan mɛ bo ɖɔ xó ɖěɖee na dó wusyɛn lanmɛ nú mɛ, bo lɛ́ na nukúnɖiɖó mɛ é nú mɛ lɛ. (Luk. 4:16-19) É tlɛ nyí hwenu e é ɖó hudo gbɔjɛyiyi kpo vivo kpo tɔn é ɔ, é lɔn bonu kúnnuɖiɖe sín ali e hun n’i lɛ é yì tɛ ɛ ǎ. (Mak. 6:30-34; Jaan 4:4-34) Enyi mǐ xà sinsɛnzɔ́ Jezu tɔn sín tan e ɖò Biblu mɛ é ɔ, akpakpa nɔ sɔ́ mǐ bonu mǐ na wà nǔ éɖɔhun à cé? É ɖò wɛn ɖɔ akpakpa nɔ sɔ́ mǐ, lee é sɔ́ mɛsɛ́dó lɛ gbɔn é.—Mat. 4:19, 20; Luk. 5:27, 28; Jaan 1:43-45.

² Mi nú mǐ ni ba dò nú ali ɖěɖee hun nú Klisanwun lɛ ɖò égbé, bɔ ye na ɖ’alɔ ɖò azɔ̌ e Jezu Klisu hun nǔ sín nu xwè 2 000 mɔ̌ ɖíe é mɛ lɛ é.

³ Wɛnɖagbe Axɔ́suɖuto ɔ tɔn jijla kpo tuto kpo sín xwé ɖé gbè jɛ xwé ɖé gbè xɔ akwɛ tawun nú mǐ mɛ Kúnnuɖetɔ́ Jehovah tɔn lɛ. Mǐ ko zán wlɛnwín enɛ kaka bɔ é wá huzu nǔ e è nɔ dó tuùn mǐ na é. Wlɛnwín enɛ zinzan dó mɔ gbɛtɔ́ livi mɔkpan ɖò táan klewun ɖé mɛ nyí nǔnywɛ sín nǔ ɖé, ɖó lè ɖěɖee é ko hɛn wá lɛ é wutu. (Mat. 11:19; 24:14) Sinsɛnzɔ́ xwé ɖé gbè jɛ xwé ɖé gbè tɔn ɔ nyí ali ɖagbe ɖé bɔ mǐ nɔ gbɔn dó xlɛ́ wǎn e mǐ yí nú Jehovah kpo nɔzo mǐtɔn lɛ kpo é.—Mat. 22:34-40.

⁴ Mawuxóɖiɖɔ sín xwé ɖé gbè jɛ xwé ɖé gbè nyí nǔ yɔyɔ̌ ɖé bɔ Kúnnuɖetɔ́ Jehovah tɔn lɛ dó wá égbé ǎ. Mɛsɛ́dó Pɔlu ɖɔ xó dó nǔ e é kplɔ́n mɛ lɛ ɖò xwé yetɔn lɛ gbè é wu. É tinmɛ sinsɛnzɔ́ tɔn nú nukúnkpénuwutɔ́ Efɛzi tɔn lɛ, bo ɖɔ: “Sín gbè e gbè un wá Azíi ɔ, . . . nǔ e na nyí lè nú mi ɔ, un hwlá ɖebǔ dó mi ǎ: un ɖɔ bǐ nú mi, bo kplɔ́n bǐ mi ɖò . . . xwé mitɔn lɛ gbè.” Ðò ali enɛ kpo ɖevo lɛ kpo nu ɔ, Pɔlu ɖekúnnu mlɛ́mlɛ́ nú “Jwifu lɛ . . . [kpo] mɛ e ma nyí Jwifu ǎ lɛ [kpo] ɖɔ ye ɖó na lɛkɔ sín hwɛ yetɔn lɛ gudo, bo huzu jɛ Mawu li jí, bo ɖi nǔ nú Aklunɔ mǐtɔn Jezu.” (Mɛ. 20:18, 20, 21) Ðò hwenɛnu ɔ, acɛkpatɔ́ Hlɔma tɔn lɛ nɔ flɔ́ zo dó glɔ̌ nú vodunsinsɛn, bɔ mɛ gegě “nyí sinsɛnnɔ tawun.” É ɖò taji tawun ɖɔ mɛ lɛ ni yawǔ ba “Mawu e bló gbɛ̀ ɔ kpodo nǔ e ɖ’emɛ lɛ bǐ kpan ɔ,” é wɛ nyí Mɛ e “ɖò byɔbyɔ gbɛtɔ́ lɛ bǐ wɛ, ɖò fí ɖebǔ e ye ko ɖè ɔ, ɖɔ ye ni lɛkɔ sín hwɛ yetɔn lɛ gudo” é.—Mɛ. 17:22-31.

⁵ Égbé ɔ, wɛnɖagbe ɔ jijla gbɛtɔ́ lɛ lɛ́ mya nukún tawun. Gbɛ̀ elɔ sín vivɔ ɖò sisɛkpɔ́ wɛ mɔhunkɔtɔn. Enɛ nɔ sísɛ́ mǐ bɔ mǐ nɔ dó gǎn hú lee mǐ ko ɖ’ewu gbɔn é. Wlɛnwín ɖě sɔ́ nyɔ́ hugǎn wlɛnwín mɛ ɖěɖee xovɛ́ nǔgbo ɔ tɔn sin lɛ é biba sín xwé ɖé gbè jɛ xwé ɖé gbè tɔn, ee è ko zán nú hwenu gegě é ǎ. Wlɛnwín enɛ nɔ hɛn lè wá tawun, lee é nyí gbɔn ɖò Jezu kpo mɛsɛ́dó lɛ kpo sín hwenu é.—Mak. 13:10.

⁶ A ka kpéwú bo nɔ ɖ’alɔ ɖò sinsɛnzɔ́ xwé ɖé gbè jɛ xwé ɖé gbè tɔn ɔ mɛ mlɛ́mlɛ́ à? Enyi mɔ̌ wɛ ɔ, ɖeji ɖɔ xomɛ Jehovah tɔn nɔ hun dó wǔ we. (Ezek. 9:11; Mɛ. 20:35) Sinsɛnzɔ́ xwé ɖé gbè jɛ xwé ɖé gbè tɔn ɔ sixu nɔ vɛwǔ nú we. A sixu hwedó nǔɖe lɛ wu ɖò agbaza lixo, alǒ a sixu nɔ ɖɔ Mawuxó ɖò xá ɖěɖee mɛ mɛ gegě ma nɔ ba na ɖótó wɛn ɔ ɖè ǎ lɛ é mɛ. É tlɛ sixu nyí ɖɔ acɛkpikpa lɛ wɛ ɖó dogbó nú azɔ̌ ɔ. Vlafo a nɔ kú winnya, bɔ xóɖiɖɔ xá jonɔ lɛ nɔ vɛwǔ nú we tawun. Enɛ wu ɔ, adohu adohu kpɛɖé nɔ ɖò jǐ towe, hweɖebǔnu e a tɔ́n nú sinsɛnzɔ́ xwé ɖé gbè jɛ xwé ɖé gbè tɔn ɔ é. Awakanmɛ ni ma kú we ó. (Tín. 4:10-12) Nɔví ɖěɖee ɖò fí ɖevo lɛ é lɔmɔ̌ nɔ kpannukɔn ninɔmɛ enɛ lɛ.

⁷ Jezu d’akpá nú ahwanvu tɔn lɛ ɖɔ: “Mi ka tuùn ɖɔ un ɖò kpɔ́ xá mi tɛgbɛ bɛ́sín dìn kaka yì jɛ gbè e gbè gbɛ̀ ɔ na vɔ dó é.” (Mat. 28:20) Akpá enɛ nɔ dó wusyɛn lanmɛ nú mǐ ɖò nǔ kpinkplɔn mɛ lɛ bonu ye ni huzu ahwanvu sín azɔ̌ ɔ mɛ. Lee nǔ cí nú mɛsɛ́dó Pɔlu é nɔ cí mɔ̌ nú mǐ lɔ, é ɖɔ: “Mɛ e nɔ na hlɔnhlɔn mì ɔ wɛ nɔ zɔ́n, bɔ un nɔ sixu kpé nǔ enɛ lɛ bǐ wu.” (Fili. 4:13) Ðu vivǐ tuto ɖěɖee agun ɔ bló bo nɔ ɖɔ Mawuxó sín xwé ɖé gbè jɛ xwé ɖé gbè lɛ é tɔn bǐ mlɛ́mlɛ́. Enyi a nɔ wà azɔ̌ xá mɛ ɖevo lɛ ɔ, a na mɔ wusyɛn dó lanmɛ nú mɛ kpo alɔdó kpo. Xoɖɛ bo byɔ Mawu ɖɔ é ni d’alɔ we bonu a na ɖu ɖò wuvɛ̌ ɖebǔ e sixu kpannukɔn we é jí, lobo dó gǎn tawun bo nɔ jla wɛnɖagbe ɔ kpo kanɖodónǔwu kpo.—1 Jaan 5:14.

⁸ Enyi a nɔ jla wɛnɖagbe ɔ mɛ ɖevo lɛ ɔ, ali gegě na hun nú we bɔ a na ‘tín nǔ mɛ nú ye dó nǔ e ɖó nukún wɛ a ɖè ɔ wu.’ (1 Pi. 3:15) A na ɖó nukúnnúmɔjɛnǔmɛ d’eji dó vogbingbɔn e ɖò mɛ ɖěɖee nɔ ɖó nukún Axɔ́suɖuto ɔ kpo mɛ ɖěɖee ma ɖó nukúnɖiɖó ɖebǔ ǎ é kpo tɛntin é wu. (Eza. 65:13, 14) A na tuùn ɖɔ emi setónú nú gbeɖiɖe Jezu tɔn e ɖɔ ɖɔ “weziza mitɔn ni bo hɔ́n” é, bɔ enɛ na jɛmɛ nú we, lobɔ a tlɛ sixu d’alɔ mɛ ɖevo lɛ bɔ ye na wá tuùn Jehovah kpo nǔgbo e nɔ na gbɛ̀ mavɔmavɔ mɛ é kpo.—Mat. 5:16; Jaan 17:3; 1 Tim. 4:16.

⁹ È nɔ bló tuto bo nɔ ɖɔ Mawuxó sín xwé ɖé gbè jɛ xwé ɖé gbè ɖò aklunɔzán gblamɛ fifó lɛ kpo aklunɔzán gblamɛ tɛntin lɛ kpo. Ðò xá ɖěɖee mɛ è ma nɔ mɔ mɛ lɛ ɖò xwégbe kéze ǎ lɛ é ɔ, agun ɖé lɛ nɔ bló tuto bo nɔ ɖɔ Mawuxó gbadanu lɛ. Mɛ lɛ sixu nɔ ba na sè wɛn ɔ ɖò hwelɛkɔ bǐ alǒ gbadanu cawun lɛ hugǎn zǎnzǎn lɛ.

¹⁰ Jezu zɔ́n ahwanvu tɔn lɛ ɖɔ ye ni “ba” mɛ e jɛxa lɛ é mɔ. (Mat. 10:11, nwt) Sinsɛnzɔ́ xwé ɖé gbè jɛ xwé ɖé gbè tɔn ɔ hwenu kɛɖɛ wɛ éyɛ ba mɛ e jɛxa lɛ é mɔ ɖè ǎ. Nǔgbo ɔ, é ɖekúnnu e nyí aca tɔn é kpo ee ma nyí aca tɔn ǎ é kpo hwenu e ali tɔn hun n’i lɛ é bǐ. (Luk. 8:1; Jaan 4:7-15) Mɛsɛ́dó lɛ lɔmɔ̌ ɖekúnnu nú mɛ lɛ ɖò ninɔmɛ vovo lɛ mɛ.—Mɛ. 17:17, nwt; 28:16, 23, 30, 31.

¹¹ Égbé ɖesu ɔ, nǔ e gbé mǐ nɔ nya é wɛ nyí mǐ na jla wɛn Axɔ́suɖuto ɔ tɔn mɛ lɛ bǐ, lee é nyɔ́ bló gbɔn é. Enɛ byɔ ɖɔ mǐ ni wà nǔ Jezu kpo mɛsɛ́dó tɔn lɛ kpo ɖɔhun ɖò nǔ kpinkplɔn mɛ lɛ bonu ye ni huzu ahwanvu sín azɔ̌ ɔ mɛ, lobo lɛ́ ɖò acéjí dó lee mɛ ɖěɖee ɖò xá mǐtɔn mɛ lɛ é sín hwenu kpo ninɔmɛ kpo nɔ ɖyɔ gbɔn é wu. (1 Kɔ. 7:31) Ði kpɔ́ndéwú ɔ, kúnnuɖiɖe ɖò ajɔ̌watɛn lɛ ko kpa wɛnjlatɔ́ gegě. Kúnnuɖiɖe ɖò ali lɛ tó, gbɔjɛtɛn lɛ, fí e è nɔ gán kɛkɛ alǒ mɔ̌to ɖó lɛ é, alǒ ɖò fí ɖebǔ e è sixu mɔ gbɛtɔ́ ɖè lɛ é lɔ ko hɛn lè wá ɖò tò gegě mɛ. Agun ɖé lɛ nɔ tɛ́ tavo lɛ alǒ kɛkɛví lɛ ɖò xá e ɖò acɛ yetɔn mɛ lɛ é mɛ. Gɔ́ na ɔ, alaxɔ sixu bló tuto nú kúnnuɖiɖe agbawungba tɔn bǔnɔ lɛ ɖò toxo ɖaxó lɛ mɛ, bɔ nɔví lɛ na gosin agun vovo lɛ mɛ bo ɖ’alɔ ɖ’emɛ. Enɛ lɛ bǐ nɔ zɔ́n bɔ mɛ ɖěɖee wɛnjlatɔ́ lɛ ma mɔ ɖò xwégbe ǎ lɛ é sixu sè wɛnɖagbe ɔ ɖò fí ɖevo.

¹² Enyi mǐ xò gò mɛ e ba na sè wɛn Biblu tɔn é ɖé ɖò nɔtɛn e ɖò agbawungba lɛ é ɔ, mǐ sixu xwlé è wema e jɛxa é ɖé. Bo na dó dó afɔ nú jlǒ e mɛ ɔ ɖó é ɔ, a sixu na ɛ adlɛsi towe bo bló tuto bo na ba ɛ kpɔ́n, xlɛ́ ɛ tɛn Ɛntɛnɛti tɔn jw.org, alǒ na ɛ adlɛsi kpléxɔ e sɛkpɔ́ ɛ é tɔn. Kúnnuɖiɖe nú gbɛtɔ́ lɛ ɖò nɔtɛn e ɖò agbawungba lɛ é sixu nyí ali ɖagbe e nu a na gbló ada nú sinsɛnzɔ́ towe ɖè é ɖé.

¹³ É ɖò mɔ̌ có, wɛnɖagbe ɔ jijla wɛ nyí azɔ̌ ɖokpo e è zɔ́n Klisanwun lɛ égbé é ǎ. Enyi alɔ didó mɛ ɖevo lɛ bonu ye na zunfan nǔgbo e nɔ na gbɛ̀ mɛ é na kpa we ɔ, a ɖó na lɛkɔ yì ba jlǒɖotɔ́ lɛ kpɔ́n azɔn gegě bonu ye na dó sixu yì nukɔn bo huzu Klisanwun e zin lɛ é.

¹⁴ Jezu ɖɔ nú ahwanvu tɔn lɛ ɖɔ: “Mi na nyí kúnnuɖetɔ́ ce . . . kaka yì jɛ fí e gbɛ̀ ɔ kponu ɖó é.” (Mɛ. 1:8) Amɔ̌, é lɛ́ ɖɔ nú ye ɖɔ: “Hǔn, mi yì bo kplɔ́n nǔ akɔta lɛ bǐ, bonu ye ni huzu ahwanvu ce. . . . Mi kplɔ́n nǔ ye, bonu ye ni setónú nú nǔ e un kplɔ́n mi lɛ bǐ.” (Mat. 28:19, 20) Mɛbakpɔ́n lɛ biblo sixu hɛn awǎjijɛ wá nú mɛ ɖò sinsɛnzɔ́ Jehovah tɔn mɛ. Xomɛ na hun mɛ ɖěɖee ɖó jlǒ nú wɛnɖagbe ɔ azɔn nukɔntɔn e a mɔ ye lɛ é ɖɔ ye ni lɛ́vɔ mɔ we hweɖevonu. Nǔ ɖevo e ɖò Biblu mɛ lɛ é mímá xá ye sixu hɛn nǔɖiɖi e ye ɖó nú Mawu é lidǒ, bo na lɛ́ d’alɔ ye bɔ ye na tuùn ɖɔ emi ɖó hudo nǔ gbigbɔ tɔn lɛ tɔn. (Mat. 5:3, nwt) Enyi a sɔnǔ ɖ’ayǐ ganji, lobo bló tuto bo lɛkɔ yì ba ye kpɔ́n ɖò hwenu e nyɔ́ nú ye é ɔ, a sixu kpéwú bo jɛ Biblu kplɔ́n xá ye jí. Enɛ gbé wɛ a na nya hwebǐnu hwenu e a ɖò mɛbakpɔ́n lɛ bló wɛ é. É nyí kún nǔgbo ɔ tɔn kɛɖɛ wɛ mǐ nɔ dó ǎ, loɔ, mǐ nɔ lɛ́ hú sin na.—1 Kɔ. 3:6.

¹⁵ Mɛbakpɔ́n lɛ biblo sixu nɔ vɛwǔ nú mɛɖé lɛ. Boya wɛnɖagbe ɔ xwíxwlémɛ klewun sixu ko bí alɔ nú we tawun, lobɔ a nɔ ɖu vivǐ sinsɛnzɔ́ ɔ sín akpáxwé enɛ tɔn. Amɔ̌, a sixu mɔ ɖɔ kɔlilɛ yì mɛ lɛ gɔ́n, bonu mi na ɖɔ xó ɖó kpɔ́ dó Biblu jí na vɛwǔ nú emi tawun. Nǔsisɔ ɖ’ayǐ ganji na zɔ́n bɔ a na kpankɔ́n d’eji. Nɔ zán alixlɛ́mɛ ɖěɖee xó è nɔ ɖɔ ɖò kplé aklunɔzán gblamɛ tɛntin tɔn hwenu lɛ é. A sixu lɛ́ byɔ wɛnjlatɔ́ e ko mɔ nǔ kpɔ́n hú we é ɖé bonu é ni kplá we yì.

¹⁶ Wɛnɖagbejlatɔ́ Filipu kanbyɔ nya e wá huzu Jwifu, bo ɖò Xó Mawu tɔn xà wɛ é ɖɔ: “A ka mɔ nǔ jɛ nǔ e xà wɛ a ɖè ɔ mɛ dìn à?” Nya ɔ yí gbè n’i ɖɔ: “Enyi mɛɖé ma tinmɛ nú mì ǎ ɔ, nɛ̌ un ka sixu mɔ nǔ jɛ mɛ gbɔn?” Enɛ gudo ɔ, tan Biblu tɔn e ɖò Mɛsɛ́dó wemata 8gɔ́ ɔ mɛ é ɖɔ nú mǐ ɖɔ Filipu yí xó, bo bɛ́sín akpáxwé Mawuxówema ɔ tɔn e xà wɛ nya enɛ ɖè é jí, bo “ɖɔ Wɛnɖagbe Jezu tɔn ɔ sín xó n’i.” (Mɛ. 8:26-36) Mǐ tuùn táan nabi e Filipu zán xá nya ɔ é ǎ, amɔ̌, Filipu tín wɛnɖagbe ɔ mɛ n’i sɔmɔ̌ bɔ nya ɔ huzu nǔɖitɔ́, bo byɔ ɖɔ emi na bló baptɛm. É huzu ahwanvu Jezu Klisu tɔn ɖé.

¹⁷ Mɛ gegě mɔ nǔ jɛ Biblu mɛ égbé ǎ, enɛ wu ɔ, é sixu byɔ ɖɔ mǐ ni lɛkɔ yì gɔ̌n yetɔn azɔn nabi ɖé, lobo kplɔ́n nǔ xá ye tɛnwin lɛnwin nú aklunɔzán gblamɛ gegě, sun gegě, alǒ xwè ɖokpo abǐ hú mɔ̌ cobɔ nǔɖiɖi yetɔn na lidǒ bɔ ye na jɛxa baptɛm. Amɔ̌, suúlu kpo wanyiyi kpo sísɔ́ dó d’alɔ ayijlɔjlɔnɔ lɛ bonu ye na huzu ahwanvu nɔ hɛn lè wá, lee Jezu ɖɔ gbɔn é: “Nǔnamɛ nɔ dó xomɛhunhun nú mɛ hú nǔyiɖomɛsí.”—Mɛ. 20:35.

¹⁸ É ɖò gaan ɖɔ a na jló na zán wema Biblu kplɔnkplɔn tɔn lɛ ɖokpo dó kplɔ́n Biblu xá mɛ lɛ. Enyi a nɔ zán alixlɛ́mɛ ɖěɖee xó è nɔ ɖɔ ɖò kplé aklunɔzán gblamɛ tɛntin tɔn hwenu lɛ é, bo nɔ lɛ́ w’azɔ̌ xá nǔkplɔnmɛtɔ́ e ko mɔ nǔ kpɔ́n ɖò agun ɔ mɛ lɛ é ɔ, a na kpéwú bo na nɔ kplɔ́n nǔ mɛ ganji, lobo d’alɔ mɛ ɖevo lɛ bɔ ye na huzu ahwanvu Jezu Klisu tɔn.

¹⁹ Enyi a ɖó hudo alɔdó tɔn bá bɛ́ Biblu kplɔnkplɔn xá mɛ, lobo kpé nukún d’ewu hǔn, vo fɛɛ bo ɖɔ xó xá nukúnkpénuwutɔ́ lɛ ɖokpo alǒ Kúnnuɖetɔ́ hatɔ́ e Biblu kplɔnkplɔn xá mɛ lɛ bí alɔ na é ɖé. Wlɛnwín ɖěɖee nɔ tɔ́n ɖò Kplé Gbɛzán kpo Sinsɛnzɔ́ kpo Tɔn Sín Azɔ̌wema mɛ lɛ é, kpo ɖěɖee sín wazexlɛ́ è nɔ bló ɖò kplé lɛ hwenu é kpo lɔmɔ̌ na d’alɔ we. Ganjɛ Jehovah wu, lobo xoɖɛ bo ɖɔ jlǒ towe n’i. (1 Jaan 3:22) Enɛ wu ɔ, enyi é nyɔ́ bló hǔn, tɛ́n kpɔ́n bá jɛ Biblu kplɔ́n xá mɛɖé jí gɔ́ nú nǔ ɖebǔ e a sixu ko nɔ kplɔ́n xá xwédo towe é. Enyi a nɔ kplɔ́n Biblu xá mɛ lɛ ɔ, awǎjijɛ e a nɔ mɔ ɖò sinsɛnzɔ́ ɔ mɛ é na jɛji.

²⁰ Enyi mǐ d’alɔ mɛ lɛ, bonu ye wá tuùn Jehovah Mawu, bo huzu ahwanvu Jezu Klisu tɔn ɔ, ye nɔ gɔ́ nú mɛ e ɖò agun ɔ mɛ lɛ é. Enyi Biblu kplɔntɔ́ lɛ tuùn tutoblonunu Jehovah tɔn, bo nɔ wà nǔ ɖó kpɔ́ xá ɛ ɔ, ye na yì nukɔn ɖò gbigbɔ lixo, bo na zin. Lee ye na wà mɔ̌ gbɔn é kplɔnkplɔn ye ɖò taji. È sɔnǔ nú video ɖé lɛ kpo alɔnuwema Mɛ̌ Mɛ̌ E ka Ðò Jlǒ Jehovah Tɔn Wà Wɛ Égbé? kpo dó enɛ tamɛ. Nǔɖe lɛ ɖò wemata 4gɔ́ wema elɔ tɔn mɛ bo sixu lɛ́ d’alɔ.

²¹ Mi jɛ xó ɖɔ ɖó kpɔ́ dó Biblu jí jí tlolo hǔn, d’alɔ nǔkplɔntɔ́ ɔ bonu é ni mɔ ɖɔ Jehovah ɖò tutoblonunu ɖé zán dó kpé nukún dó wɛnɖagbejijlazɔ́ ɔ wu wɛ ɖò ayikúngban jí égbé. Xlɛ́ lee azɔ̌wanú Biblu kplɔnkplɔn tɔn mǐtɔn lɛ xɔ akwɛ sɔ́ é, bo tinmɛ ɖɔ mɛɖéezejotɔ́ e zé yeɖée jó nú Mawu lɛ é wɛ nɔ ɖè nǔ enɛ lɛ tɔ́n, bo nɔ má gbɔn gbɛ̀ ɔ bǐ mɛ. Byɔ Biblu kplɔntɔ́ towe ɖɔ é ni xwedó we yì kplé lɛ ɖò Kpléxɔ Axɔ́suɖuto ɔ tɔn mɛ. Tinmɛ lee è nɔ bló kplé lɛ gbɔn é n’i, bo sɔ́ ɛ xlɛ́ nɔví lɛ. Lɛ̌ d’alɔ ɛ bonu é ni tuùn Kúnnuɖetɔ́ ɖevo lɛ ɖò kpléɖókpɔ́ lɛdo tɔn lɛ kpo kpléɖókpɔ́ ɖaxó lɛ kpo jí. Ðò ninɔmɛ enɛ lɛ kpo ɖevo lɛ kpo mɛ hǔn, nǔ jlǒɖotɔ́ ɔ ɖesu ni mɔ lee togun Jehovah tɔn nɔ ɖè wanyiyi, ee nyí wuntun e è nɔ dó tuùn Klisanwun nǔgbo lɛ na é xlɛ́ gbɔn é. (Jaan 13:35) Enyi tutoblonunu Jehovah tɔn ɖò jlǒɖotɔ́ ɔ nukúnmɛ sù d’eji wɛ ɔ, é kpo Jehovah kpo na ɖò vivɛ̌ d’eji wɛ.

²² Klisanwun nukɔntɔn lɛ jla Xó Mawu tɔn kpo kanɖodonǔwu kpo. Ye nɔ wlan Mawuxówema ɔ, bo nɔ zán yeɖesunɔ, lobo nɔ lɛ́ kplɔ́n ɖò agun ɔ mɛ. Ye dó wusyɛn lanmɛ nú mɛ ɖevo lɛ bonu ye na kplɔ́n nǔgbo ɔ ɖò Xó Mawu tɔn mɛ. Nǔ e ye sɔ́ alɔ dó wlan lɛ é sukpɔ́ vo ɖé ǎ, bo ka xɔ akwɛ tawun. (Kolo. 4:16; 2 Tim. 2:15; 3:14-17; 4:13; 1 Pi. 1:1) Égbé ɔ, Kúnnuɖetɔ́ Jehovah tɔn lɛ nɔ zán wlɛnwín wemazínzín tɔn yaɖeyaɖe lɛ dó ɖè Biblu kpo azɔ̌wanú Biblu kplɔnkplɔn tɔn kpo livi kanweko mɔkpan tɔ́n. Tlati lɛ, alɔnuwema lɛ, wema lɛ, kpo xójlawema lɛ kpo ɖ’emɛ, bo ɖò gbè kanweko mɔkpan mɛ.

²³ Hwenu e a na ɖò wɛnɖagbe ɔ má xá mɛ ɖevo lɛ wɛ é ɔ, tɛ́n kpɔ́n bo nɔ zán azɔ̌wanú Biblu kplɔnkplɔn tɔn ɖěɖee tutoblonunu Jehovah tɔn sɔnǔ na lɛ é. Lè ɖěɖee wema Kúnnuɖetɔ́ Jehovah tɔn lɛ tɔn lɛ xixa kpo kplɔnkplɔn kpo hɛn wá nú hwiɖesu mɛtún ɔ é tuùntuùn na sísɛ́ we bɔ a na má ye xá mɛ ɖevo lɛ.—Ebl. 13:15, 16.

²⁴ Égbé ɔ, Ɛntɛnɛti wɛ nyí nǔ nukɔntɔn e jí mɛ gegě nɔ ba nǔ ɖè é. Enɛ wu ɔ, gɔ́ nú wema jinjɔn Biblu jí lɛ ɔ, tɛn Ɛntɛnɛti tɔn mǐtɔn jw.org nyí azɔ̌wanú wɛnɖagbe ɔ jijla tɔn ɖagbe ɖé. Gbɔn gbɛ̀ ɔ bǐ mɛ ɔ, mɛ lɛ sixu zán ɔdinatɛ́ɛ dó xà Biblu kpo wema jinjɔn Biblu jí lɛ kpo e ɖò gbè kanweko mɔkpan mɛ lɛ é, alǒ, ɖótó nǔ mɔhun e è yí dó kan jí lɛ é. Mɛ ɖěɖee nɔ xò nǔ kpɔ́n dó xóɖiɖɔ xá mǐ wu lɛ é, alǒ mɛ e nɔ nɔ xá ɖěɖee mɛ è ma sixu nɔ xò gò Kúnnuɖetɔ́ Jehovah tɔn lɛ ɖè mɔ̌ ǎ lɛ é nɔ kpéwú, bo nɔ ba dò nú nǔ dó nǔ e mǐ ɖi nǔ na lɛ é wu, gbɔn jw.org zinzan ɖò xwé yeɖesunɔ tɔn gbè gblamɛ.

²⁵ Enɛ wu ɔ, mǐ nɔ jla jw.org hweɖebǔnu e ali tɔn hun nú mǐ é. Enyi xwétɔ́ ɖé kan nǔɖe byɔ dó nǔ e mǐ ɖi nǔ na lɛ é wu ɔ, mǐ sixu zán alokan, tablɛti, alǒ ɔdinatɛ́ɛ mǐtɔn dó xlɛ́ ɛ xósin ɔ tlɔlɔ ɖò tɛn tɔn mɛ. Enyi mǐ xò gò mɛɖé, bɔ é nɔ dó gbè ɖevo, é na bo tlɛ nyí tókúnɔgbe ɖé ɔ, mǐ sixu sɛ́ ɛ dó tɛn Ɛntɛnɛti tɔn mǐtɔn jí, bonu é na mɔ Biblu kpo wema jinjɔn Biblu jí lɛ kpo dó gbè tɔn mɛ. Wɛnjlatɔ́ gegě ko zán video e ɖò tɛn Ɛntɛnɛti tɔn ɔ jí lɛ é ɖokpo dó bɛ́ xóɖɔɖókpɔ́ ɖé dó Biblu jí.

²⁶ Jezu ɖɔ nú tóɖóétɔ́ lɛ ɖɔ: “Mi wɛ nyí weziza nú gbɛ̀ ɔ . . . Weziza mitɔn ni bo hɔ́n ɖò gbɛtɔ́ lɛ nukɔn, bonu ye ni mɔ nǔɖagbewiwa mǐtɔn lɛ, bo na dó kpa susu nú Tɔ́ mitɔn e ɖò [jixwé] é.” (Mat. 5:14-16) Ahwanvu enɛ lɛ ɖè ali Mawu tɔn lɛ xlɛ́ gbɔn kpɔ́ndéwú Jezu tɔn xwixwedó gblamɛ; é ɖɔ dó éɖesu wu ɖɔ: “Nyɛ wɛ nyí weziza gbɛ̀ ɔ tɔn.” Jezu sɔ́ kpɔ́ndéwú ɔ ɖ’ayǐ nú Klisanwun lɛ bo bló bɔ “weziza e nɔ na gbɛ̀ jɔ gbɛ̀ mɛ é” hɔ́n nú mɛ e na ɖótó wɛn ɔ lɛ é bǐ.—Jaan 8:12.

²⁷ Mɛsɛ́dó Pɔlu lɔmɔ̌ sɔ́ kpɔ́ndéwú ɖé ɖ’ayǐ nú mǐ, bɔ mǐ na xwedó. (1 Kɔ. 4:16; 11:1) Hwenu e é ɖò Atɛni é ɔ, é ɖekúnnu nú mɛ e nɔ wá axi ɔ mɛ lɛ é ayihɔngbe ayihɔngbe. (Mɛ. 17:17, nwt) Klisanwun e ɖò Filipu lɛ é xwedó kpɔ́ndéwú tɔn. Enɛ wɛ zɔ́n bɔ Pɔlu wlan sɛ́dó ye ɖɔ ye nɔ zán gbɛ̀ ɖò “gbɛtɔ́ nyanya, ayigɛ́dɛ́gɛ́dɛ́nɔ gbɛmɛ fí tɔn lɛ tɛntin,” bo “nɔ kɔ́n ɖò tɛntin yetɔn sunví ɖɔhun.” (Fili. 2:15) Égbé ɔ, mǐ lɔmɔ̌ sixu bló bɔ nǔgbo Axɔ́suɖuto ɔ tɔn na nɔ kɔ́n, gbɔn xó mǐtɔn lɛ kpo nǔwiwa mǐtɔn lɛ kpo gblamɛ ɖò hweɖebǔnu e ali ɖé hun nú mǐ, bɔ mǐ na jla wɛnɖagbe ɔ mɛ ɖevo lɛ é. Nǔgbo ɔ, kpɔ́ndéwú ɖagbe e mǐ nyí ɖò nǔgboɖiɖɔ kpo nǔjlɔjlɔwiwa kpo linu é sixu zɔ́n bɔ mɛ lɛ mɔ ɖɔ mǐ gbɔn vo nú gbɛ̀ ɔ. Amɔ̌, enyi mǐ jla wɛnɖagbe ɔ ye ɔ, ye na tuùn nǔ e wu mǐ gbɔn vo é.

²⁸ Kúnnuɖetɔ́ Jehovah tɔn gegě nɔ jla wɛnɖagbe ɔ mɛ ɖěɖee ye nɔ mɔ ɖò azɔ̌mɛ, wemaxɔmɛ, mɔ̌to mɛ, alǒ fí ɖebǔ lɛ é, hwenu e ye nɔ ɖò azɔ̌ e ye nɔ wà ayihɔngbe ayihɔngbe lɛ é wà wɛ é. Enyi mǐ xwè tomɛ ɔ, ali sixu hun nú mǐ, bɔ mǐ na ɖɔ xó xá mɛ e kpo mǐ kpo xwè tomɛ lɛ é. Mǐ mɛ ɖokpo ɖokpo sín ayi ɖó na ɖò te, bɔ mǐ na nɔ gbɔn xóɖɔɖókpɔ́ kpaa lɛ sín yɛkan mɛ bo ɖekúnnu. Mi nú mǐ ni sɔnǔ ɖ’ayǐ, bo na ɖɔ xó xá mɛ ɖevo lɛ ɖò ninɔmɛ e jɛxa lɛ é bǐ mɛ.

²⁹ Enyi mǐ hɛn dó ayi mɛ ɖɔ mɔ̌ biblo nɔ kpa susu nú Gbɛɖotɔ́ mǐtɔn bo nɔ wlí yɛ̌yi nú nyikɔ tɔn ɔ, enɛ na sísɛ́ mǐ, bɔ mǐ na wà mɔ̌. Gɔ́ na ɔ, mǐ sixu kpéwú, bo d’alɔ ayijlɔjlɔnɔ lɛ bɔ ye lɔmɔ̌ na wá tuùn Jehovah, bo na sixu sɛn ɛ, lobo ɖó nukúnɖiɖó gbɛ̀ tɔn e nǔɖiɖi ɖiɖó nú Jezu Klisu nɔ na mɛ é. Gǎn enɛ lɛ e mǐ nɔ dó é nɔ nyɔ́ Jehovah nukúnmɛ, bɔ é nɔ mɔ dó mɔ sinsɛnzɔ́ mímɛ́ ɖé.—Ebl. 12:28; Nǔɖe. 7:9, 10.

³⁰ Jlǒ Jehovah tɔn wɛ nyí ɖɔ è ni jla wɛn Axɔ́suɖuto ɔ tɔn gbɔn gbɛ̀ ɔ bǐ mɛ, ɖò toxo lɛ kpo gletoxo lɛ kpo mɛ. Enɛ wu ɔ, alaxɔ nɔ sɔ́ fí ɖé lɛ dó alɔ mɛ nú agun lɛ kpo mɛ ɖěɖee nɔ wà sinsɛnzɔ́ ɖò xá e jɛ zɔ lɛ é mɛ lɛ é kpo. (1 Kɔ. 14:40) Enɛ sɔgbe xá tuto e wu Mawu kpé nukún dó ɖò xwè kanweko nukɔntɔn ɔ mɛ é. (2 Kɔ. 10:13; Ga. 2:9) Kpo nukɔnyiyi ɖaxó e azɔ̌ Axɔ́suɖuto ɔ tɔn ɖò ɖiɖó wɛ ɖò azǎn gudogudo tɔn elɔ lɛ mɛ é kpo ɔ, mǐ nɔ wà nǔ gegě, enyi è bló tuto ganji, bo w’azɔ̌ ɖò fí e è ɖè nú agun ɔ é ɔ nɛ.

³¹ Nukúnkpénuwutɔ́ sinsɛnzɔ́ tɔn ɔ wɛ nɔ kpé nukún dó tuto enɛ wu. Devízɔ́watɔ́ sinsɛnzɔ́wiwa tɔn ɖé sixu nɔ ɖè fí lɛ nú mɛ. Fí e è nɔ ɖekúnnu gbɔn lɛ é ɔ, alɔkpa we jí wɛ ye ɖè: fí e è ɖè nú mɛ bǐ é kpo fí e è ɖè nú mɛ ɖokpo é kpo. Enyi fí e è nɔ ɖekúnnu gbɔn lɛ é ma sukpɔ́ ǎ ɔ, nukúnkpénuwutɔ́ gbɛ̌ta lɛ tɔn lɛ na ɖó fí ɖé lɛ, bɔ wɛnjlatɔ́ e ɖò gbɛ̌ta ɔ mɛ lɛ é sixu ɖekúnnu ɖò fí enɛ lɛ. Ðò alɔ ɖevo mɛ ɔ, enyi fí e è na ɖɔ Mawuxó gbɔn lɛ é sukpɔ́ ɔ, wɛnjlatɔ́ lɛ sixu byɔ fí ɖé bo na nɔ w’azɔ̌ ɖè.

³² Wɛnjlatɔ́ ɖé sixu ɖó fí mɛɖesunɔ tɔn ɖé bo na nɔ ɖekúnnu ɖè hwenu e kplé kúnnuɖegbé tɔn ma ɖè ǎ, alǒ hwenu e é ma sixu kplé xá gbɛ̌ta ɔ ǎ é. Ði kpɔ́ndéwú ɔ, wɛnjlatɔ́ ɖé lɛ nɔ ɖó fí e sɛkpɔ́ azɔ̌watɛn yetɔn é ɖé, bɔ ye nɔ ɖekúnnu ɖò finɛ ɖò gbɔjɛyiyi hwenu alǒ azɔ̌ gudo. Xwédo ɖé lɛ nɔ byɔ fí ɖé ɖò xá e mɛ ye nɔ nɔ é, bo nɔ ɖekúnnu ɖò finɛ gbadanu ɖé lɛ. Enyi wɛnjlatɔ́ ɖé ɖó fí mɛɖesunɔ tɔn e jɛxa é ɖé bo nɔ ɖekúnnu ɖè ɔ, é sixu d’alɔ ɛ b’ɛ na zán hwenu sukpɔ́ ɖò sinsɛnzɔ́ ɔ mɛ. É ɖò wɛn ɖɔ è sixu lɛ́ nɔ kpɔ́ bo w’azɔ̌ ɖò fí ɖěɖee è ko ɖè nú mɛɖé lɛ é. Enyi a jló ɖɔ è ni na fí ɖé we bonu a na nɔ ɖekúnnu ɖè ɔ, a sixu byɔ mɛ e nɔ kpé nukún dó fí e è na ɖekúnnu gbɔn lɛ é wu é.

³³ Enyi nukúnkpénuwutɔ́ gbɛ̌ta tɔn alǒ wɛnjlatɔ́ ɖé wɛ è sɔ́ fí e è na ɖekúnnu gbɔn é ɖé d’alɔ mɛ na ɔ, é na dó gǎn bo ɖɔ xó xá mɛ lɛ ɖò xwé ɖokpo ɖokpo gbè. Tuto e è na bló bo w’azɔ̌ gbɔn fí lɛ é ɖó na sɔgbe xá sɛ́n ɖěɖee ɖɔ nǔ dó alɔcyɔncyɔn nǔ mɛɖesunɔ tɔn lɛ jí nu lɛ é. Nukúnkpénuwutɔ́ gbɛ̌ta tɔn alǒ wɛnjlatɔ́ ɖebǔ e è sɔ́ fí ɖé dó alɔ mɛ na é ɖó na tɛ́n kpɔ́n bo w’azɔ̌ gbɔn fí ɔ bǐ ɖò sun ɛnɛ vlamɛ. Enyi é fó ɔ, é ɖó na ɖɔ nú mɛ e nɔ kpé nukún dó fí lɛ wu é. Lee ninɔmɛ lɛ na byɔ gbɔn é ɔ, nukúnkpénuwutɔ́ gbɛ̌ta tɔn ɔ alǒ wɛnjlatɔ́ ɔ sixu lɛ́ vɔ́ azɔ̌ wà gbɔn fí ɔ, alǒ é na lɛkɔ nú káti fí ɔ tɔn dó alɔ mɛ nú mɛ e nɔ kpé nukún d’ewu é.

³⁴ Enyi mɛ e nɔ dó hǎ xá agun ɔ lɛ é bǐ nɔ wà nǔ ɖó kpɔ́ ɔ, è sixu ɖekúnnu gbɔn fí e ɖò agun ɔ sín acɛ mɛ lɛ é bǐ mlɛ́mlɛ́. É sixu lɛ́ zɔ́n bɔ wɛnjlatɔ́ we alǒ hú mɔ̌ na nɔ w’azɔ̌ gbɔn fí ɖokpo ɔ hwe ɖokpo ɔ nu ǎ; ɖó mɔ̌ biblo sixu sin xomɛ nú xwétɔ́ lɛ. Mɔ̌ mɛ ɔ, mǐ na ɖexlɛ́ ɖɔ mǐ ɖó sísí nú nɔví mǐtɔn lɛ kpo mɛ e ɖò fí e mǐ nɔ ɖekúnnu gbɔn lɛ é lɛ é kpo.

³⁵ Mɛ lɛ bǐ ɖó na kplɔ́n nǔ dó Jehovah, Vǐ tɔn kpo Axɔ́suɖuto ɔ kpo wu. (Nǔɖe. 14:6, 7) Mǐ jló na d’alɔ mɛ e nɔ dó gbè ɖebǔ lɛ é bǐ bonu ye na ylɔ́ nyikɔ Jehovah tɔn, lobo ɖó jijɔ Klisanwun tɔn lɛ bá mɔ hwlɛngán. (Hlɔ. 10:12, 13; Kolo. 3:10, 11) Wuvɛ̌ ɖětɛ lɛ mɔ̌ è ka nɔ mɔ hwenu e è ɖò wɛnɖagbe ɔ jla wɛ ɖò xá ɖěɖee mɛ mɛ lɛ nɔ dó gbè sukpɔ́ ɖè é? Nɛ̌ è ka sixu ɖeɖɛ wuvɛ̌ enɛ lɛ gbɔn, bonu ali na hun nú mɛ gegě bɔ ye na sè wɛn Axɔ́suɖuto ɔ tɔn dó gbè e mɛ ye mɔ nukúnnú jɛ hugǎn é mɛ?—Hlɔ. 10:14.

³⁶ Gbè e agun ɖokpo ɖokpo nɔ dó é wɛ è nɔ kpɔ́n dó ɖè fí e é na w’azɔ̌ gbɔn lɛ é n’i. Enɛ wu ɔ, ɖò xá ɖěɖee mɛ mɛ lɛ nɔ dó gbè sukpɔ́ ɖè lɛ é ɔ, wɛnjlatɔ́ e ɖò agun vovo mɛ lɛ é nɔ ɖɔ Mawuxó ɖò xá ɖokpo ɔ lɛ mɛ. Ðò ninɔmɛ mɔhun lɛ mɛ ɔ, é na nyɔ́ hugǎn ɖɔ agun ɖokpo ɖokpo sín wɛnjlatɔ́ lɛ ni nɔ ɖɔ Mawuxó nú mɛ e nɔ dó gbè yetɔn lɛ é. Mɔ̌ wɛ nǔ na lɛ́vɔ nyí gbɔn ɖò mɛylɔwema lɛ mímá hwenu. É ɖò mɔ̌ có, ɖò kúnnuɖiɖe agbawungba tɔn kpo ee ma nyí aca tɔn ǎ lɛ é kpo hwenu ɔ, wɛnjlatɔ́ lɛ sixu ɖɔ xó xá mɛɖebǔ lobo xwlé wema lɛ mɛ dó gbè ɖebǔ mɛ.

³⁷ Ðò ninɔmɛ ɖé lɛ mɛ ɔ, agun e nɔ dó gbè ɖevo lɛ é nɔ sixu w’azɔ̌ ɖò fí e ɖò acɛ yetɔn mɛ bo lín lɛ é hwɛhwɛ ǎ. Ninɔmɛ mɔhun lɛ mɛ ɔ, nukúnkpénuwutɔ́ sinsɛnzɔ́ tɔn agun lɛ tɔn lɛ ɖó na ɖɔ xó ɖó kpɔ́, bo wá gbeta ɖé kɔn dó lee agun yetɔn lɛ na w’azɔ̌ gbɔn fí e ɖò acɛ yetɔn mɛ lɛ é gbɔn é jí. Enɛ na hun ali nú mɛ lɛ bǐ bɔ ye na sè wɛn Axɔ́suɖuto ɔ tɔn, b’ɛ na lɛ́ zɔ́n bɔ è na vɔ́ fí e ma sɔ́ ɖò dandan ǎ lɛ é gbɔn ǎ.—Nǔx. 15:22.

³⁸ Enyi mǐ mɔ mɛɖé bɔ é ma sè gbè mǐtɔn ǎ ɔ, etɛ mǐ ka ɖó na wà? Mǐ ɖó na ɖɔ kpowun ɖɔ wɛnjlatɔ́ e nɔ dó gbè tɔn lɛ é na wá ɖɔ xó xá ɛ ǎ. Wɛnjlatɔ́ ɖé lɛ kplɔ́n nǔxwlémɛ klewun ɖé dó gbè e ye nɔ yawǔ xò gò ɖò ayǐ yetɔn jí é ɖé mɛ. Mǐ sixu xlɛ́ mɛ ɔ lee é na xà wema lɛ alǒ yí ye dó gbè tɔn mɛ ɖò tɛn Ɛntɛnɛti tɔn mǐtɔn e sɔgbe xá sɛ́n é, jw.org, jí gbɔn é, alǒ ɖɔ n’i ɖɔ mǐ na hɛn wema lɛ wá n’i dó gbè tɔn mɛ.

³⁹ Enyi mɛ ɔ ɖó jlǒ tawun ɔ, mǐ ɖó na tɛ́n kpɔ́n bo mɔ mɛ e jɛxa é ɖé, b’ɛ na d’alɔ ɛ ɖò gbè e mɛ é mɔ nukúnnú jɛ é mɛ. Mǐ sixu lɛ́ ɖɔ fí e sɛkpɔ́ ɛ bɔ è nɔ bló kplé lɛ dó gbè tɔn mɛ ɖè é n’i. Enyi é ba ɖɔ mɛ e nɔ dó gbè emitɔn é ɖé ni mɔ emi ɔ, mǐ sixu xlɛ́ ɛ lee é na wlan adlɛsi tɔn dó jw.org jí gbɔn é. Enɛ ɔ, alaxɔ na tɛ́n kpɔ́n bo mɔ wɛnjlatɔ́, gbɛ̌ta, alǒ agun e sɛkpɔ́ ɛ bo sixu d’alɔ ɛ hugǎn é ɖé.

⁴⁰ Kaka jɛ hwenu e jlǒɖotɔ́ ɔ na ɖɔ nú mǐ ɖɔ mɛ e nɔ dó gbè emitɔn é ɖé ko mɔ emi é ɔ, mǐ ɖó na kpó ɖò biba ɛ kpɔ́n wɛ. Ðò ninɔmɛ ɖé lɛ mɛ ɔ, alaxɔ na ɖɔ nú mɛxo agun tɔn lɛ ɖɔ è kún sixu mɔ mɛ e nɔ dó jlǒɖotɔ́ ɔ sín gbè é ɖé ó. Enyi nǔ wá nyí mɔ̌ ɔ, mǐ ɖó na wà nǔ e wu mǐ kpé é bǐ bo kpó ɖò afɔ dó nú jlǒ e mɛ ɔ ɖó é wɛ. Nú é nyɔ́ bló ɔ, mǐ sixu kplɔ́n Biblu xá ɛ, vlafo bo na zán wema e ɖò gbè tɔn mɛ é ɖé. Enyi mǐ zán ɖiɖe lɛ kpo fɔtóo lɛ kpo ganji, bonu mɛ ɔ nɔ xà wemafɔ lɛ dó gbè tɔn mɛ ɔ, é na mɔ nukúnnú jɛ Biblu ɔ mɛ kpɛɖé. Hɛ̌nnumɔ tɔn e sè gbè tɔn kpo xá ɔ mɛ sín gbè kpo ganji é ɖé sixu nɔ sè gbè n’i.

⁴¹ Bo na dó dɔn jlǒɖotɔ́ ɔ wá tutoblonunu Mawu tɔn mɛ ɔ, mǐ ɖó na ylɔ́ ɛ ɖɔ é ni nɔ wá kplé mǐtɔn lɛ, enyi é ma tlɛ sixu nɔ mɔ nukúnnú jɛ kplé lɛ mɛ mlɛ́mlɛ́ ǎ ɔ nɛ. Hwenu e è ɖò wemafɔ lɛ xà wɛ é ɔ, mǐ sixu d’alɔ ɛ bɔ é na hun ɖò Biblu e ɖò gbè tɔn mɛ é ɖé mɛ, enyi é ɖè ɔ nɛ. Gbɛ̌didó xá mɛ ɖevo lɛ ɖò agun ɔ mɛ sixu dó wusyɛn lanmɛ n’i, bo na lɛ́ d’alɔ ɛ bɔ é na yì nukɔn ɖò gbigbɔ lixo.

⁴² Gbɛ̌ta e ma ko nyí kánɖó ǎ lɛ é: Wɛnjlatɔ́ ɖěɖee nɔ ɖɔ Mawuxó dó gbè e agun ɔ ma nɔ dó ǎ é ɖé mɛ, bɔ mɛxo agun tɔn, alǒ devízɔ́watɔ́ sinsɛnzɔ́wiwa tɔn e jɛxa é ɖé ma ɖè, bo na nɔ kpé nukún dó kplé aklunɔzán gblamɛ tɔn ɖé wu dó gbè enɛ mɛ ǎ é wɛ è nɔ ylɔ́ ɖɔ gbɛ̌ta e ma ko nyí kánɖó ǎ é. Nǔ elɔ lɛ e bɔ d’ewu é ɖó na sɔgbe hwɛ̌ cobɔ alaxɔ na yí gbè ɖɔ agun ɖé ni ɖó gbɛ̌ta e ma ko nyí kánɖó ǎ é ɖé ayǐ:

1. (1) Mɛ sukpɔ́ ɖò xá ɔ mɛ bo nɔ dó gbè ɖé, b’ɛ gbɔn vo nú gbè e agun ɔ nɔ dó é.

2. (2) É hwe bǐ ɔ, wɛnjlatɔ́ kpɛɖé na sè gbè ɔ alǒ na ɖò gbesisɔmɛ bá kplɔ́n.

3. (3) Kplékplé mɛxo lɛ tɔn ɖò gbesisɔmɛ bo na nɔ bló tuto Mawuxóɖiɖɔ dó gbè enɛ mɛ tɔn.

Enyi kplékplé mɛxo lɛ tɔn jló na ɖó gbɛ̌ta e ma ko nyí kánɖó ǎ é ɖé ayǐ ɔ, ye ɖó na tó kan nǔ byɔ nukúnkpénuwutɔ́ lɛdo tɔn hwɛ̌. É sixu tuùn agun ɖevo ɖěɖee ko ɖò Mawuxó ɖɔ nú mɛ e nɔ dó gbè enɛ lɛ é wɛ é, bo sixu na mɔjɛmɛ ɖěɖee na d’alɔ bɔ è na tuùn agun e jɛxa, bá ɖó gbɛ̌ta ɔ ayǐ é. Ee è tuùn agun ɔ gudo é ɔ, mɛxo agun enɛ ɔ tɔn lɛ na sɛ́ wema dó alaxɔ mɛ, bo na byɔ ɖɔ è ni na gbè emi bonu emi na ɖó gbɛ̌ta e ma ko nyí kánɖó ǎ é ɖé ayǐ.

⁴³ Kánɖó lɛ: Nǔ elɔ lɛ e bɔ d’ewu é ɖó na sɔgbe hwɛ̌ cobɔ alaxɔ na yí gbè ɖɔ agun ɖé ni ɖó kánɖó ɖé ayǐ:

1. (1) Jlǒɖotɔ́ e nɔ dó gbè ɔ lɛ é sukpɔ́, bɔ nukúnɖiɖó ɖè ɖɔ nukɔnyiyi na tíìn ɖò gbè ɔ mɛ.

2. (2) É hwe bǐ ɔ, wɛnjlatɔ́ kpɛɖé nɔ dó gbè ɔ alǒ ɖò gbè ɔ kplɔ́n wɛ.

3. (3) Mɛxo agun tɔn alǒ devízɔ́watɔ́ sinsɛnzɔ́wiwa tɔn e jɛxa é ɖé ɖò gbesisɔmɛ, bo na nɔ kánɖó ɔ nu, lobo kpé nukún dó, é hwe bǐ ɔ, kplé aklunɔzán gblamɛ tɔn ɖokpo, alǒ akpáxwé tɔn ɖokpo, ɖi xóɖiɖɔ nú mɛ bǐ alǒ Atɔxwɛ Kplɔnkplɔn wu dó gbè ɔ mɛ.

Enyi nǔ enɛ lɛ sɔgbe ɖó bǎ e jɛxa é ɖé mɛ ɔ, kplékplé mɛxo lɛ tɔn na sɛ́ wema e gbajɛ̌mɛ nú nǔ lɛ é ɖé dó alaxɔ mɛ, bo na byɔ ɖɔ è ni na gbè emi bonu emi na ɖó kánɖó ɖé ayǐ. Mɛxo agun tɔn alǒ devízɔ́watɔ́ sinsɛnzɔ́wiwa tɔn e ɖò kánɖó ɔ nu é na nyí “nukúnkpénuwutɔ́ kánɖó tɔn” alǒ “devízɔ́watɔ́ kánɖó tɔn,” bo na nɔ kpé nukún dó kánɖó ɔ wu.

⁴⁴ Nú è ɖó kánɖó ɔ ayǐ gudo ɔ, kplékplé mɛxo agun e ɖó kánɖó ɔ ayǐ é tɔn lɛ tɔn na kpɔ́n ɖɔ è na gɔ́ kplé agun tɔn sín akpáxwé ɖevo lɛ nú kplé e kánɖó ɔ ko nɔ bló lɛ é alǒ gbɔ wɛ à jí, kpo azɔn nabi e è na nɔ bló kplé lɛ ɖò sun ɖokpo ɖokpo mɛ é kpo. È sixu lɛ́ bló kplé kúnnuɖegbé tɔn lɛ sín tuto nú kánɖó ɔ. Mɛ ɖěɖee ɖò kánɖó ɔ mɛ lɛ é bǐ na nɔ w’azɔ̌ ɖò kplékplé mɛxo lɛ tɔn e nɔ kpé nukún dó kánɖó ɔ wu é glɔ́. Mɛxo agun tɔn lɛ na nɔ na alixlɛ́mɛ e ɖò jlɛ̌ jí lɛ é, lobo na nɔ ɖè afɔ nukɔntɔn ɔ dó kpé nukún dó hudo kánɖó ɔ tɔn lɛ wu. Enyi nukúnkpénuwutɔ́ lɛdo tɔn ɖé w’azɔ̌ xá kánɖó ɔ ɖò aklunɔzán gbla e mɛ é ba agun e nɔ kpé nukún dó kánɖó ɔ wu é kpɔ́n é mɛ ɔ, é na ɖó gbè klewun ɖé sɛ́dó alaxɔ mɛ dó nukɔnyiyi e ɖó wɛ kánɖó ɔ ɖè é wu, lobo tinmɛ hudo tawun tawun e ɖè lɛ é. Nú é jɛ hwetɔnnu ɔ, kánɖó ɔ sixu wá huzu agun ɖé. Enyi mɛ lɛ bǐ xwedó alixlɛ́mɛ yɛhwexɔ́suɖuto ɔ tɔn lɛ ɔ, xomɛ na hun Jehovah.—1 Kɔ. 1:10; 3:5, 6.

⁴⁵ Klisanwun e ko zé yeɖée jó nú Mawu lɛ é ɖó na nɔ ɖ’alɔ ɖò wɛnɖagbe ɔ jijla mɛ ɖevo lɛ mɛ. È sixu wà mɔ̌ ɖò ali gegě nu, amɔ̌, kúnnuɖegbé yiyi xá mɛ ɖevo lɛ nɔ nyɔ́ mǐ mɛ gegě nukúnmɛ. (Luk. 10:1, nwt) Enɛ wu ɔ, agun lɛ nɔ bló kplé kúnnuɖegbé tɔn lɛ ɖò aklunɔzán gblamɛ fifó lɛ kpo aklunɔzán gblamɛ tɛntin lɛ kpo. Xwezán lɛ nɔ hun kúnnuɖiɖe ɖó kpɔ́ sín ali ɖagbe lɛ, ɖó nɔví lɛ nɔ yì azɔ̌mɛ ǎ wutu. Wěɖegbɛ́ Sinsɛnzɔ́ tɔn ɔ na bló tuto kplé kúnnuɖegbé tɔn lɛ tɔn, ɖó hwenu e jɛxa lɛ é kpo fí e jɛxa lɛ é kpo, ɖò zǎnzǎn lɛ kpo gbadanu lɛ kpo.

⁴⁶ Kúnnuɖiɖe ɖó kpɔ́ nɔ zɔ́n bɔ wɛnjlatɔ́ lɛ nɔ w’azɔ̌ ɖó kpɔ́, bɔ mǐ nɔ lɛ́ “na akɔ́nkpinkpan mǐɖée.” (Hlɔ. 1:12) Wɛnjlatɔ́ yɔyɔ̌ lɛ sixu wà azɔ̌ xá wɛnjlatɔ́ e alɔ sè kpɛ́n na, bɔ ye ko mɔ nǔ kpɔ́n lɛ é, bá kplɔ́n azɔ̌ ɖò gɔ̌n yetɔn. Ðò fí ɖé lɛ ɔ, é sixu nyɔ́ ɖɔ wɛnjlatɔ́ we alǒ hú mɔ̌ ni w’azɔ̌ ɖó kpɔ́, ɖó ayijayǐxó wutu. Enyi a tlɛ bló tuto bo na w’azɔ̌ hwiɖokpo ɖò fí ɖé ɔ, kplé kúnnuɖegbé tɔn biblo xá gbɛ̌ta ɔ sixu na kanmɛsyɛn mɛ lɛ bǐ. Tuùntuùn kpowun ɖɔ mɛ ɖevo lɛ lɔ ɖò sinsɛnzɔ́ ɔ mɛ, bo ɖò azɔ̌ wà wɛ ɖò xá ɖokpo ɔ mɛ sixu na jiɖe we. Dandan wɛ gbexosin-alijitɔ́ lɛ kpo mɛ ɖevo lɛ kpo na nɔ wá kplé kúnnuɖegbé tɔn sín tuto e agun ɔ bló lɛ é bǐ tɛnmɛ ǎ, ɖò taji ɔ, enyi è nɔ bló kplé mɔhun ɖò azǎn lɛ bǐ jí ɔ nɛ. É ɖò mɔ̌ có, é na nyɔ́ ɖɔ, é hwe bǐ ɔ, ye ni nɔ nɔ gudo nú kplé kúnnuɖegbé tɔn ɖé lɛ ɖò aklunɔzán gbla ɖokpo ɖokpo mɛ.

⁴⁷ Mi nú mǐ bǐ ni xwedó kpɔ́ndéwú e Jezu kpo mɛsɛ́dó tɔn lɛ kpo sɔ́ ɖ’ayǐ é! Mǐ sixu ɖeji ɖɔ Jehovah na kɔn nyɔna dó gǎn ɖěɖee mǐ nɔ dó, bo nɔ ɖ’alɔ ɖò wɛnɖagbe Axɔ́suɖuto ɔ tɔn jijla e nyí azɔ̌ gbɛhwlɛngán tɔn é mɛ é jí.—Luk. 9:57-62.