“Mi Ðò Dǒ Li Wɛ Ðò Nùɖiɖi Mímɛ́ Titewungbe E Mi Ðó ɔ Mɛ”

1, 2. Xɔgbigbázɔ́ tɛ wà wɛ a ka ɖè? Etɛwu lee wà azɔ̌ ɔ gbɔn wɛ a ɖè é ka ɖò taji tawun?

A ÐÒ azɔ̌ wà wɛ syɛnsyɛn ɖò xɔgbigbázɔ́ ɖé kɔn. Azɔ̌ ɔ bɛ́ é ɔ, é sɔ́ hwe ǎ, lobɔ è ka na bló nú xwè gègě. Azɔ̌ ɔ kàn sunnu byɔ, amɔ̌, é ka ɖó awǎjijɛ. Nǔ ɖebǔ na bo tlɛ ɖò jijɛ wɛ ɔ, a kudeji ɖɔ emi na fó azɔ̌ ɔ jɛn wɛ, lé emi kún na ɖi fɔnlin ó, ɖó enyi azɔ̌ towe nyɔ́ kpo é gbɔ kpo ɔ, é kúnkplá gbɛ̀ towe, kaka jɛ sɔgudo towe jí. Etɛwu ka nyí mɔ̌? Ðó hwi wɛ nyí xɔ e gbá wɛ è ɖè é!

² Judi ɖɔ ɖɔ é nyí nǔ taji tawun ɖɔ mǐ ni ɖò dǒ li wɛ. É wlan ɖɔ: “Mi ɖò dǒ li wɛ ɖò nùɖiɖi mímɛ́ titewungbe e mi ɖó ɔ mɛ.” (Judi 20, 21) Enyi Klisanwun lɛ ɖò mɔ̌ bló wɛ ɔ, ye na “hɛn [ye]ɖée ɖò wanyiyi Mawu tɔn mɛ.” Ðò égbé ɔ, nɛ̌ mǐ ka sixu ɖò dǒ li wɛ, bo na dó sixu ɖó nùɖiɖi syɛnsyɛn ɖé gbɔn? Mi nú mǐ ni ba dò nú lee mǐ sixu wà mɔ̌ gbɔn é ɖò ali atɔn nu.

3-5. (a) Linlin e ma sɔgbe ǎ é tɛ Satáan ka jló ɖɔ a ni nɔ ɖó dó nǔ e Jehovah byɔ mǐ lɛ é wu? (b) Etɛ mǐ ka ɖó na nɔ lin dó nǔ e Mawu byɔ mǐ lɛ é wu? Lè tɛ lɛ mǐ ka na mɔ ɖ’emɛ? Jlɛ̌ dó nùɖé wu.

³ Jɛ nukɔn hwɛ̌ ɔ, mǐ ɖó na hɛn nùɖiɖi mǐtɔn lidǒ ɖò sɛ́n Mawu tɔn lɛ mɛ. Hwenu e a ɖò wema elɔ kplɔ́n wɛ é ɔ, a ko ba dò nú nǔ e Jehovah byɔ ɖò mǐ sí b’ɛ kúnkplá walɔ mǐtɔn lɛ é gègě. Etɛ a ka lin dó ye wu? Satáan na ba na blɛ́ we bonu a na nɔ lin ɖɔ sɛ́n Jehovah tɔn lɛ kpo nugbodòdó tɔn lɛ kpo sú nǔ ɖagbe ɖé sín ali dó we, bo tlɛ nɔ lɛ́ gbidi kɔ nú we. É ko ɖò wlɛnwín enɛ zán wɛ sín hwenu e é zán b’ɛ w’azɔ̌ ɖò jikpá Edɛni tɔn mɛ é. (Bǐbɛ̌mɛ 3:1-6) Wlɛnwín tɔn enɛ ka na ɖu ɖò jǐ towe wɛ à? É na sín linlin e a nɔ ɖó é wu.

⁴ Mǐ ni ɖɔ ɖɔ a ɖò sà ɖi wɛ ɖò jikpá ɖé mɛ, bo wá ɖ’ayi wu ɖɔ kpákan ɖaxó ɖé gbò ali nú we bɔ a sixu yì akpá ɖě ɔ xwé ǎ. Akpá enɛ xwé ka nyɔ́ ɖɛkpɛ bo dɔn mɛ tawun. Tlolo ɔ, a sixu lin ɖɔ é kún ɖò dandan bonu kpákan enɛ na sú ali dó mɛɖesúsínínɔ emitɔn ó. Amɔ̌, ee a ɖò nǔ e ɖò kpákan ɔ gudo lɛ é kpɔ́n sɛ́dó wɛ é ɔ, a wá mɔ kinnikinni ɖé b’ɛ ko wlí kanlin ɖevo bo ɖò vùnvún wɛ ɖ’emɛ! A wá mɔ nǔ jɛ nǔ e zɔ́n bɔ kpákan ɔ ɖò finɛ é wu dìn lo, é wɛ nyí ɖɔ é na cyɔn alɔ jǐ towe. Kanlin nǔwliɖutɔ́ ɖé ka ɖò wu tɔ̀ nú we wɛ dìn à? Xó Mawu Tɔn gb’akpá nú mǐ ɖɔ: “Ayixa mitɔn ni ɖò te; mi cɔ́ miɖée, ɖó kɛntɔ́ mitɔn awovi ɔ ɖò lɛlɛ̌ dó mi wɛ kinnikinni e ɖò adǎn jí é ɖɔhun, bo ɖò mɛ e é na vún ɖu ɔ ba wɛ.”​—1 Piyɛ́ɛ 5:8.

⁵ Kanlin nǔwliɖutɔ́ ɖé wɛ nú Satáan. Ðó Jehovah jló ɖɔ Satáan ni wlí mǐ ǎ wutu ɔ, É na sɛ́n ɖěɖee na cyɔn alɔ mǐ jí bɔ mǐ ma na jɛ “mɔ” vovo mɛnyanya ɔ tɔn lɛ mɛ ǎ é. (Efɛzinu lɛ 6:11) Enɛ wu ɔ, hweɖebǔnu e mǐ lin tamɛ dó sɛ́n Mawu tɔn lɛ jí é ɔ, mǐ ɖó na nɔ mɔ ɖɔ wǎn e É yí nú mǐ é wɛ é ɖexlɛ́ gbɔn mɔ̌. Enyi mǐ mɔ nǔ jɛ wu ɖó mɔ̌ ɔ, sɛ́n Mawu tɔn lɛ na nɔ cyɔn alɔ mǐ jí bo lɛ́ na mǐ awǎjijɛ. Ahwanvu Jaki wlan ɖɔ: “Mɛ e nɔ gbéjé sɛ́n maɖóblɔ̌ e nɔ ɖè mǐ sín mɛkannu ɔ kpɔ́n céɖécéɖé, bo nɔ ɖókan d’ewu [ɔ], . . . Mawu na xoɖɛ dó mɛ enɛ ɔ jí, ɖò nǔ e é nɔ wà ɔ mɛ.”​—Jaki 1:25.

 6. Wlɛnwín ɖagbe hugǎn tɛ mǐ ka sixu zán bɔ nùɖiɖi e mǐ ɖó nú sɛ́n Mawu tɔn lɛ é na lidǒ? Nǎ kpɔ́ndéwú ɖé.

⁶ Sɛ́n Mawu tɔn lɛ nyinyi ɖò gbɛzán mɛtɔn mɛ wɛ nyí wlɛnwín ɖagbe hugǎn e è sixu zán bɔ nùɖiɖi e è ɖó nú Sɛ́ndótɔ́ ɔ kpo nùnywɛ e ɖò sɛ́n tɔn lɛ mɛ é kpo é na lidǒ. Ði kpɔ́ndéwú ɔ, gbeɖiɖe Jezu tɔn e ɖɔ ɖɔ è ni kplɔ́n “nǔ e [é] kplɔ́n m[ǐ] lɛ bǐ” mɛ ɖevo lɛ é ɖò “Klisu sín sɛ́n ɔ” mɛ. (Matie 28:19, 20; Galatinu lɛ 6:2) Klisanwun lɛ nɔ lɛ́ ylɔ gbeɖiɖe e ɖɔ ɖɔ è ni nɔ kplé bo nɔ sɛ̀n Mawu bo nɔ na kanmɛsyɛn mɛɖée é ɖɔ nùjɔnǔ. (Eblée lɛ 10:24, 25) Ðɛxixo sɛ́dó Jehovah hwebǐnu, bo ka nɔ wà mɔ̌ kpo ayijlɔjlɔ kpo lɛ́ ɖò sɛ́n Mawu tɔn lɛ mɛ. (Matie 6:5-8; 1 Tɛsalonikinu lɛ 5:17) Enyi mǐ ɖò gbɛzán wɛ sɔgbe kpo sɛ́n mɔhun lɛ kpo ɔ, mǐ nɔ mɔ céɖécéɖé ɖɔ alixlɛ́mɛ wanyiyi tɔn lɛ wɛ ye nyí. Tónúsíse nú ye nɔ zɔ́n bɔ mǐ nɔ ɖó awǎjijɛ kpo vivo e mǐ ma sixu mɔ gbeɖé ɖò fí ɖevo ɖò gbɛ̀ hannyahannya elɔ mɛ ǎ é kpo. Enyi a lin tamɛ kpɔ́n dó lè ɖěɖee a ko ɖu ɖó tónúsíse nú sɛ́n Mawu tɔn lɛ wu é jí ɔ, nùɖiɖi e a ɖó nú ye é nɔ lɛ́ lidǒ à cé?

7, 8. Nɛ̌ Xó Mawu Tɔn ka na jiɖe mɛ ɖěɖee ɖò xɛsi ɖi wɛ ɖɔ xwè ɖò xwè jí jɛ wɛ ɔ nǔjlɔjlɔwiwa na gló emi lɛ é gbɔn?

⁷ Mɛɖé lɛ nɔ ɖi xɛsi hweɖelɛnu ɖɔ nú xwè ɖò xwè jí jɛ wɛ ɔ, tónúsíse nú sɛ́n Jehovah tɔn lɛ na vɛwǔ. Ye nɔ ɖi xɛsi ɖɔ emi sixu wá hwe d’ewu. Enyi linlin mɔhun wá nú we gbeɖé hǔn, hɛn xó elɔ lɛ ayi mɛ: “Nyɛ Mawu Mavɔmavɔ ɔ, nyɛ wɛ nyí Mawu towe; nyi wɛ na ɖɔ nǔ e na nyɔ́ nú we ɔ nú we. Nyi wɛ ɖò ali xlɛ́ we wɛ ɖò ali e a mlɛ́ ɔ jí. Enyi a ko wlí tó nǔ e un zɔ́n we lɛ wu wɛ ɔ, nyɔna [alǒ ‘fífá,’ NW] sín tɔ̀ ɖé na ko sà wá gɔ̌n towe; hwlɛngán ɔ [alǒ ‘nǔjlɔjlɔwiwa,’ NW] na ko xò wá gɔ̌n towe xù ɖɔhun.” (Ezayíi 48:17, 18) A ka ko yì agbɔ̌n jí bo lin tamɛ kpɔ́n dó lee xó enɛ lɛ na jiɖe mɛ sɔ é jí gbeɖé à?

⁸ Ðò wemafɔ enɛ lɛ mɛ ɔ, Jehovah flín mǐ ɖɔ enyi mǐ setónú nú emi ɔ, é nɔ hɛn lè wá nú mǐ. Enyi mǐ wà mɔ̌ ɔ, é dó nyɔna wè sín akpá nú mǐ. Nukɔntɔn ɔ, fífá mǐtɔn na cí tɔ̀ e gɔ́, bo ɖò sisa wɛ tɛgbɛ é ɖé ɖɔhun. Wegɔ ɔ, nǔjlɔjlɔwiwa mǐtɔn na cí aslɔkɛ́ xù tɔn lɛ ɖɔhun. Enyi a nɔte ɖò xùtó bo ɖò lee aslɔkɛ́ lɛ nɔ ɖò mlimli wɛ ɖebɔdoɖewu gbɔn é kpɔ́n wɛ ɔ, a nɔ mɔ ɖɔ tɛgbɛ sín nǔ wɛ ye nyí, ɖɔ ye na kpó ɖò mlimli wɛ, bo na nɔ ɖò gbigbá dó xù ɔ tó wɛ tɛgbɛ. Jehovah ɖɔ jí nǔjlɔjlɔwiwa hwi tɔn hɛn ɔ é na cí mɔ̌. Enyi a ɖò tintɛnkpɔn wɛ bo na nɔ gbeji n’i jɛn wɛ ɔ, é na lɔn bonu a na hwe d’ewu gbeɖé ǎ. (Xà Ðɛhan 55:23.) Akpá wusyɛn dó lanmɛ nú mɛ tɔn enɛ lɛ zɔ́n bɔ nùɖiɖi e a ɖó nú Jehovah kpo sɛ́n tɔn lɛ kpo é lidǒ à cé?

9, 10. (a) Aniwu nukɔnyiyi ka nyí nùɖé bo jiwǔ bɔ Klisanwun lɛ ɖó na nya? (b) Nɛ̌ kancica ɖagbe ɖé ɖiɖó kpo Jehovah kpo ka nɔ hɛn awǎjijɛ wá gbɔn?

⁹ Ali wegɔ e nu mǐ sixu ɖò dǒ li wɛ bo na dó sixu ɖó nùɖiɖi syɛnsyɛn ɖè é wɛ nyí ɖɔ, mǐ ɖó na setónú nú xó elɔ e Mawu sɔ́ d’ayi mɛ nú mɛsɛ́dó Pɔlu b’ɛ wlan é: “Mi bo nú mǐ na yì nukɔn.” (Eblée lɛ 6:1) Nukɔnyiyi nyí nùɖé bo jiwǔ bɔ Klisanwun ɖé ɖó na nya. Nukɔnyiyi cí mɛ maɖóblɔ̌ nyínyí ɖɔhun ǎ, mǐ sixu nyí mɛ maɖóblɔ̌ dìn ǎ, amɔ̌, mǐ hɛn ɔ mǐ na yì nukɔn. Hú mɔ̌ ɔ, hwenu e Klisanwun lɛ ɖò nukɔn yì wɛ é ɔ, ye nɔ mɔ awǎjijɛ gègě. Etɛwu ka nyí mɔ̌?

¹⁰ Klisanwun e yì nukɔn é ɖé nɔ nyí mɛɖé bo nɔ ɖó kancica ɖagbe kpo Jehovah kpo. Linlin e Jehovah nɔ ɖó dó nǔ lɛ wu é wɛ Klisanwun mɔhun lɔ nɔ ɖó. (Jaan 4:23) Pɔlu wlan ɖɔ: “Mɛ e nɔ zán gbɛ̀ lee hwɛhuhu sín ninɔmɛ e mǐ ɖó ɔ jló gbɔn lɛ ɔ, ninɔmɛ hwɛhuhu tɔn sín nǔ lɛ jí wɛ ayixa yetɔn nɔ nɔ; loɔ, mɛ e nɔ zán gbɛ̀ lee [gbigbɔ ɔ] jló gbɔn lɛ ɔ, [gbigbɔ ɔ] sín nǔ lɛ jí wɛ ayixa yetɔn nɔ nɔ.” (Hlɔmanu lɛ 8:5) Linlin hwɛhuhu sín ninɔmɛ tɔn nɔ hɛn awǎjijɛ nabi ɖé wá ǎ, ɖó é nɔ nyí ce jɛn na bí nɔ, é nɔ mɔ nǔ sɛ́dó zɔ ǎ, bɔ agbaza sín nǔ lɛ wɛ nɔ lɛ́ mya nukún n’i. Linlin gbigbɔ mɛ tɔn ka nɔ hɛn awǎjijɛ ɖaxó wá, ɖó é nɔ junjɔn Jehovah “Mawu awǎjijɛnɔ ɔ” jí.” (1 Timɔtée 1:11, NW) Xomɛ Jehovah tɔn hinhɛn hun sín akpàkpà nɔ sɔ́ mɛ e ɖó kancica ɖagbe kpo é kpo é, lobɔ enyi é na bo tlɛ ɖò mɛtɛnkpɔn mɛ ɔ, é nɔ ɖó awǎjijɛ. Ðó aniwu? Mɛtɛnkpɔn lɛ nɔ hun ali nú mǐ bɔ mǐ nɔ ɖexlɛ́ ɖɔ Satáan nyí adingbannɔ ɖé, bɔ mǐ nɔ lɛ́ sɔnǔ nú gbejininɔ e nɔ hun xomɛ nú Tɔ́ mǐtɔn jixwé tɔn ɔ é wɛ.​—Nùnywɛxó 27:11; xà Jaki 1:2, 3.

11, 12. (a) Etɛ Pɔlu ka ɖɔ dó “nǔwukpikpé nukúnnúmɔjɛnǔmɛ tɔn” Klisanwun ɖé tɔn lɛ wu? Etɛ ɖɔ wɛ xókwin e è lilɛ dó “kpinkplɔn” é ka ɖè? (b) Azɔ̌ tɛ è ka ɖó na kplɔ́n agbaza ɔ bonu è na dó sù bo lɛ́ bí kàn?

¹¹ Bonu mǐ na dó sixu ɖó kancica ɖagbe xá Jehovah bo na lɛ́ yì nukɔn ɔ, é byɔ azɔ̌ kpinkplɔn ɖò mǐ sí. Lin tamɛ kpɔ́n dó wemafɔ elɔ jí: “Nùɖuɖu syɛnsyɛn ɔ, mɛxo lɛ tɔn wɛ; mɛxo enɛ lɛ ko tuùn nǔ ɖagbe ɖò nǔ nyanya mɛ, gbɔn nǔwiwa yetɔn lɛ [alǒ ‘gbɔn nǔwukpikpé nukúnnúmɔjɛnǔmɛ tɔn yetɔn lɛ kpinkplɔn,’ NW] gblamɛ, bɔ é ko má ye.” (Eblée lɛ 5:14) Hwenu e Pɔlu ɖɔ xó dó nǔwukpikpé nukúnnúmɔjɛnǔmɛ tɔn mǐtɔn lɛ “kpinkplɔn” wu é ɔ, é zán xókwin Glɛkigbe tɔn ɖé, b’ɛ cí ɖɔ è ko nɔ zán hwɛhwɛ ɖò fí ɖěɖee è nɔ d’ayihun ɖè ɖò xwè kanweko nukɔntɔn ɔ mɛ ɖò Grèce é ɖɔhun, ɖó è hɛn ɔ è na lɛ́ lilɛ xókwin enɛ dó ‘kplɔ́n lee lɔnyiji-lɔnfɔnkan yihundatɔ́ e nɔ lilɛ éɖée gbɔn jɔhɔn mɛ é ɖé nɔ bló gbɔn é ɖɔhun.’ Dìn ɔ, mǐ ni lin tamɛ kpɔ́n dó nǔ e azɔ̌ kpinkplɔn mɔhun byɔ lɛ é jí.

¹² Hwenu e è jì mǐ tlolo é ɔ, è ko kplɔ́n agbaza mǐtɔn ǎ. Ði kpɔ́ndéwú ɔ, vǐyɛyɛ ɖé sixu ɖè afɔ alǒ nyì alɔ ganji ǎ. Enɛ wu ɔ, é sixu nyì awa tɔn lɛ dó jɔ gblolo mɛ bo tlɛ sixu xò nukúnmɛ nú éɖée ɖò manywɛ mɛ, b’ɛ na vɛ́ n’i. Kpɛɖé kpɛɖé ɔ, vǐyɛyɛ ɔ nɔ ɖò agbaza tɔn kplɔ́n wɛ. É nɔ jɛ sísá jí, bo nɔ wá jɛ zɔnlin ɖi jí, kaka bo nɔ wá jɛ wezun kán jí.a Enyi mɔ̌ wɛ ɔ, etɛ ka nyí lɔnyiji-lɔnfɔnkan yihundatɔ́ e nɔ lilɛ éɖée gbɔn jɔhɔn mɛ é ɖé tɔn? Nú a mɔ lɔnyiji-lɔnfɔnkan yihundatɔ́ mɔhun ɖò lìnlɔ́n wɛ bo ɖò lilɛ lilɛ wɛ gbɔn jɔ mɛ, bonu é nyɔ́ kpɔ́n bo lɛ́ jɛ gan ganji ɔ, a na mɔ ɖɔ é ko kplɔ́n agbaza tɔn ɖó mɔ̌ wutu wɛ. Kanbibí lɔnyiji-lɔnfɔnkan yihundatɔ́ enɛ tɔn wá mɔ̌ kpowun ǎ, hwenu gègě wɛ é byɔ ɖò así tɔn hwɛ̌. Biblu ɖɔ dó agbaza mɛ gǎndido mɔhun wu ɖɔ “nǔ kpɛɖé jɛn wɛ é nyɔ́ na.” Nǔwukpikpé nukúnnúmɔjɛnǔmɛ tɔn mǐtɔn lɛ ɖò gbigbɔ lixo kpinkplɔn xɔ akwɛ hú mɔ̌ flàflá!​—1 Timɔtée 4:8.

13. Nɛ̌ mǐ ka sixu kplɔ́n nǔwukpikpé nukúnnúmɔjɛnǔmɛ tɔn mǐtɔn lɛ gbɔn?

¹³ Ðò wema elɔ mɛ ɔ, mǐ ɖɔ xó dó nǔ ɖěɖee na zɔ́n bɔ a na kplɔ́n nǔwukpikpé nukúnnúmɔjɛnǔmɛ tɔn towe lɛ bo na dó sixu ɖó kancica ɖagbe xá Jehovah bo nɔ gbeji n’i lɛ é gègě jí. Cobonu a na site dó nùɖé jí ɖò gbɛzinzan towe mɛ hǔn, nɔ lin tamɛ dó nugbodòdó kpo sɛ́n Mawu tɔn lɛ kpo jí ganji bo nɔ lɛ́ xoɖɛ sɛ́dó é. Ðò ninɔmɛ ɖokpo ɖokpo mɛ hǔn, nɔ kanbyɔ hwiɖée ɖɔ: ‘Sɛ́n alǒ nugbodòdó Biblu tɔn tɛ lɛ ka ɖɔ xó dó ninɔmɛ elɔ wu? Nɛ̌ un ka sixu zán ye gbɔn? Gbɛzinzan tɛ ka na nyɔ́ Tɔ́ ce jixwé tɔn ɔ nukúnmɛ?’ (Xà Nùnywɛxó 3:5, 6; Jaki 1:5.) Enyi a site dó nǔ ɖebǔ jí gbɔn mɔ̌ ɔ, a na kplɔ́n nǔwukpikpé nukúnnúmɔjɛnǔmɛ tɔn towe lɛ d’eji. Azɔ̌ kpinkplɔn mɔhunkɔtɔn na d’alɔ we bɔ a na ɖó kancica ɖagbe xá Jehovah hwebǐnu.

14. Nùɖuɖu alɔkpa tɛ lɛ sín hudo mǐ ka ɖó bo na dó sù ɖò gbigbɔ lixo? É ɖò mɔ̌ có, etɛ mǐ ka ɖó na hɛn dó ayi mɛ?

¹⁴ Nú mǐ na bo zin ɔ, mǐ ɖó na kpó ɖò susu wɛ ɖò gbigbɔ lixo. Nùɖuɖu wɛ ka nɔ zɔ́n bɔ è nɔ sù. Enɛ wu wɛ Pɔlu ɖɔ: “Nùɖuɖu syɛnsyɛn ɔ, mɛxo lɛ tɔn wɛ.” Nǔ taji e na zɔ́n bɔ a na lidǒ ɖò nùɖiɖi mɛ é ɖokpo wɛ nyí ɖɔ a ni nɔ ɖu nùɖuɖu gbigbɔ tɔn syɛnsyɛn lɛ. Nú a ɖò nǔ e a kplɔ́n lɛ é zán wɛ ɔ, a na nyɔ̌nùí; nùnywɛ ɔ ka “xɔ akwɛ hú nǔ e nɔ jló mɛ lɛ bǐ sín kplékplé” wɛ Biblu ɖɔ. Enɛ wu ɔ, nugbǒ xɔ akwɛ e Tɔ́ mǐtɔn na mǐ lɛ é sín xovɛ ɖó na nɔ sìn mǐ dó nùjɔnǔ mɛ. (Nùnywɛxó 8:11; 1 Piyɛ́ɛ 2:2) É ɖò wɛn ɖɔ, nukúnnúmɔjɛnǔmɛ kpo nùnywɛ e gosin Mawu gɔ́n é kpo ɖiɖó ɖó na zɔ́n bɔ mǐ na yigo mɛ ɖevo lɛ wu alǒ mɔ ɖɔ mǐ kpɔ́n te hú ye ǎ. Mǐ ɖó na nɔ gbéjé mǐɖée kpɔ́n hwɛhwɛ bonu goyiyi alǒ nǔmasɔgbe ɖebǔ ni ma byɔ ayi mǐtɔn mɛ bo sá xwé nyì finɛ ó. Pɔlu wlan ɖɔ: “Mi tɛ́n miɖée kpɔ́n, bo kije ayi miɖée tɔn mɛ kpɔ́n ɖɔ emi nɔ zán gbɛ̀ ɖò nùɖiɖi mɛ à jí.”​—2 Kɔlɛntinu lɛ 13:5.

15. Aniwu wanyiyi ka ɖò dandan cobɔ è na sù ɖò gbigbɔ lixo?

¹⁵ Enyi è na bo tlɛ gbá xɔ ɖé fó ɔ, è nɔ kpò ɖò azɔ̌ wà ɖ’ewu wɛ bonu é na ɖò ganji. É ɖò dandan ɖɔ è ɖó na nɔ kpé nukún dó xɔ ɔ wu bo na nɔ jla nùɖé lɛ ɖó ɖ’ewu; é sixu lɛ́ wá byɔ ɖɔ è ni bló xɔnu ɖevo lɛ gɔ́ na. Etɛ sín hudo mǐ ka ɖó bo na dó sixu zin bo kpó ɖò vìvɛ́ kpo Jehovah kpo wɛ? Nǔ taji e sín hudo mǐ ɖó é wɛ nyí wanyiyi. Mǐ ɖó na tɛnkpɔn bɔ wǎn e mǐ yí nú Jehovah kpo nùɖitɔ́ hàtɔ́ mǐtɔn lɛ kpo é na ɖò syɛnsyɛn d’eji wɛ. Enyi mǐ ma ɖó wanyiyi ǎ ɔ, nùtuùntuùn kpo nùɖiɖi mǐtɔn kpo na nyí nǔ yayǎ alǒ na cí gan e xò wɛ è ɖè b’ɛ ma ɖò xó ɖě ɖɔ wɛ ǎ é ɖɔhun. (1 Kɔlɛ́ntinu13:1-3) Enyi mǐ ɖó wanyiyi ɔ, mǐ na huzu Klisanwun e zin é bo na ɖò susu wɛ ɖò gbigbɔ lixo.

16. Linlin agɔ tɛ lɛ Satáan ka nɔ dó flú mɛ lɛ na? Etɛ sín nǔ Jehovah ka ko sɔ́ b’ɛ na cyɔn alɔ mǐ jí?

¹⁶ Ali atɔngɔ e nu mǐ sixu ɖò dǒ li wɛ ɖè é wɛ nyí ɖɔ, mǐ ɖó na sɔ́ ayi ɖó akpá Jehovah tɔn lɛ jí. Bo na dó kpé enɛ wu ɔ, mǐ ɖó na nɔ cɔ́ lee mǐ nɔ lin nǔ kpɔ́n gbɔn é. Satáan e nyí gǎn gbɛ̀ elɔ tɔn é ko kpéwú tawun bo nɔ flú gbɛtɔ́ lɛ bɔ linlin e ma sɔgbe ǎ é, nǔxokpɔ́n, jimaɖedomɛwu kpo nukúnɖiɖo ma ɖó kpo nɔ ɖu ɖò ye jí. (Efɛzinu lɛ 2:2) Linlin mɔhun lɛ cí kɔsukɔsu e nɔ nyí dotín ɖé bo nɔ hɔ ɛ zindɛ́ lɛ é ɖɔhun nú Klisanwun ɖé. Xomɛ mǐtɔn hun ɖɔ Jehovah ko sɔnǔ nú nǔ taji ɖé b’ɛ sixu cyɔn alɔ mǐ jí, é wɛ nyí nukúnɖiɖo.

17. Nɛ̌ nukúnɖiɖo ka nyí nǔ taji sɔ bɔ Xó Mawu Tɔn ka xlɛ́?

¹⁷ Biblu slɛ́ ahwanfunnu gbigbɔ tɔn vovo e sín hudo mǐ ɖó bo na dó fun ahwan xá Satáan kpo gbɛ̀ elɔ kpo lɛ é. Ahwanfunnu lɛ titewungbe ɖokpo wɛ nyí gangbákún e nyí “hwlɛngán e ɖó nukún wɛ mǐ ɖè ɔ.” (1 Tɛsalonikinu lɛ 5:8) Ðò Biblu sín táan mɛ ɔ, ahwanfuntɔ́ ɖé nɔ tuùn ɖɔ gangbákún mɛvo ɔ, emi na cí ahwan. Hwɛhwɛ ɔ, anyǔ alǒ avɔ wɛ è nɔ bú dó gangbákún ɔ, b’ɛ nɔ zɔ́n bɔ ahwanfunnu e è da dó ta nú ahwanfuntɔ́ ɔ é nɔ kpé nǔ kaka ɖé wu bo nɔ wà n’i ǎ. Lee gangbákún ɖé nɔ bló gbɔn nú ta é ɖɔhun ɔ, nukúnɖiɖo sixu cyɔn alɔ ayi kpo linlin towe kpo jí bɔ nùɖé na wà ye ǎ.

18, 19. Kpɔ́ndéwú tɛ Jezu ka zé ɖ’ayǐ ɖò nukúnɖiɖo lixo? Nɛ̌ mǐ ka sixu xwedó kpɔ́ndéwú tɔn gbɔn?

¹⁸ Jezu hɛn nukúnɖiɖo tɔn wu ganji bo zé kpɔ́ndéwú ɖagbe hugǎn ɔ ɖ’ayǐ. Flín nǔ e nu é dɛ ɖè ɖò zǎn gudo tɔn e jɛ nukɔn nú kú tɔn é mɛ é. Xɔ́ntɔn tɔn adi sà ɛ ɖu bo yí akwɛ. Xɔ́ntɔn tɔn ɖevo tlɛ ɖɔ ɖɔ emi kún tuùn i kpɔ́n gbeɖé ó. Mɛ e kpò lɛ é hɔn jó é dó. Tò tɔn mɛ nu lɛ gbɛ́ wǎn n’i, bo ɖɔ nú ahwanfuntɔ́ Hlɔma tɔn lɛ ɖɔ ye ni doya n’i bo hu i. É ɖò gaàn ɖɔ, tagba e Jezu mɔ lɛ é vɛwǔ hugǎn e mǐ na mɔ ɖò égbé lɛ é donu mɔkpan. Etɛ ka d’alɔ ɛ? Eblée lɛ 12:2 na xósin ɔ, é ɖɔ: “É yí gbè bɔ è hu i ɖó [atín] jí; é kpɔ́n winnya e è nɔ mɔ ɖò kú mɔhunkɔtɔn mɛ ɔ ǎ, ɖó é ɖò awǎjijɛ e è sɔ́ ɖó te n’i ɔ flín wɛ, bɔ égbé dìn ɔ, é ɖò ayijinjɔn ɖò axɔsuzinkpo Mawu tɔn kpá ɖò ɖisixwé.” Nukún Jezu tɔn ɖò “awǎjijɛ e è sɔ́ ɖó te n’i ɔ” jí hwebǐnu.

¹⁹ Awǎjijɛ tɛ è ka sɔ́ ɖó nukɔn nú Jezu? É nyɔ́, é tuùn ɖɔ nú emi ma jó gbè ǎ ɔ, emi lɔ na bló bɔ nyikɔ Jehovah tɔn na nyí nǔ mímɛ́. É na na kúnnuɖenú ɖaxó hugǎn e xlɛ́ ɖɔ Satáan nyí adingbannɔ é. Nukúnɖiɖo ɖě sɔ́ sixu hɛn awǎjijɛ wá nú Jezu hú enɛ ǎ. É lɛ́ tuùn ɖɔ enyi emi nɔ gbeji ɔ, Jehovah na sú axɔ tɔn emi b’ɛ na túnflá, é wɛ nyí ɖɔ é na wá yì gɔ́ n’i ɖò jixwé. Ðò hwenu e vɛwǔ tawun lɛ é mɛ ɔ, Jezu sɔ́ ayi ɖó awǎjijɛ enɛ lɛ e ɖò nukɔn n’i é jí. Nǔ e mǐ ɖesu ɖó na wà é nɛ. Awǎjijɛ ɖò nukɔn nú mǐ lɔ. Jehovah sɔ́ mǐ mɛ ɖokpo ɖokpo sù bo jɔwu mǐ bɔ mǐ lɔ na bló bɔ nyikɔ tɔn na nyí nǔ mímɛ́. Enyi mǐ sɔ́ Jehovah dó ɖó Nǔbǐwukpétɔ́ mǐtɔn bo hɛn mǐɖée ɖò wanyiyi tɔn mɛ hwebǐnu ɖò mɛtɛnkpɔn kpo tagba ɖebǔ e mǐ na mɔ lɛ é kpo mɛ ɔ, mǐ ɖò ɖiɖexlɛ́ wɛ ɖɔ Satáan nyí adingbannɔ nɛ.

20. Etɛ ka sixu d’alɔ we bɔ a na ɖó linlin e sɔgbe é kpo nukúnɖiɖo kpo?

²⁰ Jehovah jló kpowun bo na d’ajɔ mɛ e nɔ gbeji lɛ é ǎ, loɔ, mɔ̌ biblo sín akpàkpà nɔ sɔ́ ɛ. (Ezayíi 30:18; xà Malacíi 3:10.) Xomɛ tɔn nɔ hun dó nǔ e sɔgbe bo ɖò hǔn mɛ nú mɛsɛntɔ́ tɔn lɛ é nina ye wu. (Ðɛhan 37:4) Enɛ wu ɔ, sɔ́ ayi towe ɖó nukúnɖiɖo e ɖò nukɔn nú we é jí ganji. Ma lɔn gbeɖé bonu gbɛ̀ Satáan tɔn sín linlin e ma sɔgbe ǎ lɛ é, linlin gblègblé kpo linlin e è sló kɔ na lɛ é kpo ni ɖu ɖò jǐ we ó. Enyi a mɔ ɖɔ linlin gbɛ̀ elɔ tɔn jɛ ali mɔ jí ɖò ayi towe mɛ hǔn, xoɖɛ vívɛ́ sɛ́dó Jehovah nú é ni na we “fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ.” Fífá enɛ e Mawu nɔ na mɛ é na cyɔn alɔ ayi towe kpo linlin towe kpo jí.​—Filipinu lɛ 4:6, 7.

21, 22. (a) Nukúnɖiɖo susunɔ tɛ ka xɔ akwɛ nú “mɛ wɔbuwɔbu ɔ”? (b) Nukúnɖiɖo Klisanwun lɛ tɔn ɖětɛ ka nyí nùjɔnǔ hugǎn nú we? Etɛ jí a ka kú dó?

²¹ Awǎjijɛ ɖaxó ɖé wɛ ɖò te kpɔ́n we. Enyi “mɛ wɔbuwɔbu” e na ‘xò ya ɖaxó ɔ zlɛ’ lɛ é mɛ wɛ a ɖè hǔn, lin tamɛ kpɔ́n dó gbɛ̀ e sín vivǐ a na ɖu zaanɖé dìn é jí. (Nǔɖexlɛ́mɛ 7:9, 14) Ðó Satáan kpo awovi tɔn lɛ kpo ma sɔ́ na ɖè ǎ wutu ɔ, é na cí ɖɔ è ɖè agban kpinkpɛn e è ma sixu jlɛ́ dìn ǎ é ɖé sín kɔ jí nú we ɖɔhun. Nú è na ɖɔ nugbǒ ɔ, mɛ̌ ka ɖò mǐ mɛ bo ma ka ɖú nyɔkwín ɖò ali ɖé nu ɖò gbɛ̀ nyanya Satáan tɔn elɔ mɛ kpɔ́n ǎ? Ðó nǔ e nu mǐ nɔ ɖú nyɔkwín ɖè lɛ é ma sɔ́ na tíìn ǎ wutu ɔ, kpɔ́n lee mǐ na mɔ awǎjijɛ sɔ hwenu e Jezu kpo mɛ 144 000 lɛ kpo na ɖò ali xlɛ́ mǐ wɛ bɔ mǐ na ɖò azɔ̌ wà wɛ bonu ayikúngban ɔ na huzu palaɖisi é! Xomɛ mǐtɔn na hun ɖesu hwenu e mǐ na mɔ bɔ azɔn kpo wɔ̌nɖowǔ kpo ma sɔ́ na ɖè ǎ é, bɔ mǐ na dó doo nú mɛvívɛ́ mǐtɔn e fɔ́n sín kú lɛ é, lobo na nɔ gbɛ̀ lee Mawu jló gbɔn ɖò bǐbɛ̌mɛ é. Hwenu e mǐ na ɖò mɛ maɖóblɔ̌ huzu wɛ é ɔ, ajɔ e tlɛ hugǎn mɔ̌ bɔ è d’akpá tɔn ɖò Hlɔmanu lɛ 8:21 mɛ é lɔ na ɖò sisɛkpɔ wɛ wunnawúnná, é wɛ nyí “mɛɖée sí jijɛ susunɔ e Mawu ví lɛ ɖó ɔ.”

²² Jehovah jló ɖɔ a ni nɔ hwiɖée kàn nu hú lee a tlɛ sixu lín ɖó é. Tónúsíse wɛ ka na nyí tɔn. É sɔgbe ɖɔ a ni wà nǔ e wu a kpé lɛ é bǐ dìn bo nɔ setónú nú Jehovah hwebǐnu à cé? É nyí mɔ̌ hǔn, ɖò dǒ li wɛ ɖò nùɖiɖi mímɛ́ titewungbe hugǎn ɔ mɛ bo na dó hɛn hwiɖée ɖò wanyiyi Mawu tɔn mɛ kaka sɔyi.