1 Mose
35 No sɛɛ lɛ, Nyɔŋmɔ kɛɛ Yakob akɛ: “Tee shi, ni okwɔ kɛya Betel+ ni oyahi jɛmɛ, ní oma afɔleshaa latɛ yɛ jɛmɛ ohã anɔkwa Nyɔŋmɔ lɛ, mɔ ni jie ehe kpo etsɔɔ bo be ni ojoɔ foi yɛ onyɛmi nuu Esau hiɛ lɛ.”+
2 Ni Yakob kɛɛ eshĩabii lɛ kɛ mɛi fɛɛ ni fata ehe lɛ akɛ: “Nyɛjiea maŋsɛɛ nyɔŋmɔi ní yɔɔ nyɛteŋ lɛ nyɛshɛrɛa nyɛshwiea,+ ni nyɛtsua nyɛhe ní nyɛtsakea nyɛtadei lɛ, 3 ni nyɛhãa wɔtea shi ni wɔkwɔa kɛyaa Betel. Ni mama afɔleshaa latɛ yɛ jɛmɛ mahã anɔkwa Nyɔŋmɔ lɛ, mɔ ni bo mi toi yɛ mimanehulu gbi lɛ nɔ, ní etee nɔ ekɛ mi ehi shi yɛ he fɛɛ he ni miyaa lɛ.”*+ 4 No hewɔ lɛ, amɛkɛ maŋsɛɛ nyɔŋmɔi fɛɛ ni amɛhiɛ lɛ kɛ toiiaŋnii ní yɔɔ amɛtoiiaŋ lɛ hã Yakob, ni Yakob fu* yɛ tso wulu ni bɛŋkɛ Shekem lɛ shishi.
5 Be ni amɛtsaa amɛgbɛfãa lɛ nɔ lɛ, Nyɔŋmɔ he ŋmiŋmi mɔmɔ maji ni bɔle amɛ lɛ, no hewɔ lɛ, amɛtiuuu Yakob bihii lɛ. 6 Sɛɛ mli lɛ, Yakob bashɛ Luz,+ ni ji Betel, yɛ Kanaan shikpɔŋ lɛ nɔ, lɛ kɛ mɛi fɛɛ ni fata ehe lɛ. 7 Ema afɔleshaa latɛ yɛ jɛmɛ ni ewo jɛmɛ El-betel,* ejaakɛ jɛmɛ anɔkwa Nyɔŋmɔ lɛ jie ehe kpo etsɔɔ lɛ yɛ, be ni ejo foi yɛ enyɛmi nuu lɛ hiɛ lɛ.+ 8 Sɛɛ mli lɛ, Debora,+ ni ji mɔ ni kwɛɔ Rebeka lɛ, gbo ni afu lɛ yɛ Betel masɛi, yɛ ooki tso ko shishi. No hewɔ lɛ, ewo lɛ Alon-bakut.*
9 Nyɔŋmɔ jie ehe kpo etsɔɔ Yakob shi kome ekoŋŋ be ni ejɛ Padan-aram ebaa lɛ, ni ejɔɔ lɛ. 10 Nyɔŋmɔ kɛɛ lɛ akɛ: “Atsɛɔ bo Yakob.+ Atsɛŋ bo Yakob dɔŋŋ, shi moŋ, abaatsɛ bo Israel.” Ni ebɔi lɛ Israel tsɛmɔ.+ 11 Nyɔŋmɔ kɛfata he hã lɛ akɛ: “Miji Nyɔŋmɔ Ofe lɛ.+ Fɔ ní oyi afa. Jeŋmaji, hɛɛ, jeŋmaji babaoo baajɛ omli aba,+ ni maŋtsɛmɛi hu baajɛ omli aba.*+ 12 Ni shikpɔŋ ni mikɛhã Abraham kɛ Isak lɛ, bo mikɛbaahã, ni oseshi ni baaba yɛ osɛɛ lɛ mikɛ shikpɔŋ lɛ baahã.”+ 13 Ni Nyɔŋmɔ je eŋɔɔ yɛ he ni ekɛ lɛ wie yɛ lɛ etee.
14 No hewɔ lɛ, Yakob ŋɔ kaimɔ tɛ ko ema shi yɛ he ni ekɛ lɛ wie yɛ lɛ, tɛ akulashiŋ ko, ni efɔse dãa afɔle eshwie nɔ, ni efɔse mu eshwie nɔ.+ 15 Ni Yakob tee nɔ etsɛ he ni Nyɔŋmɔ kɛ lɛ wie yɛ lɛ akɛ Betel.+
16 Ni amɛfã kɛshi Betel. Ni be ni amɛkɛ Efrat teŋ jekɛ lolo lɛ, Rahel bɔi kɔ̃ɔmɔ, ni ekɔ̃ɔmɔ lɛ mli wa waa. 17 Shi be ni etɔɔ lɛ waa kɛ gbekɛ lɛ fɔmɔ lɛ, yoo ní fɔɔ lɛ lɛ kɛɛ lɛ akɛ: “Kaashe gbeyei, ejaakɛ obaafɔ binuu ekoŋŋ.”+ 18 Be ni ewala heɔ aŋmɛɛ lɛ* lɛ (ejaakɛ no mli lɛ eegbo), ewo lɛ Ben-oni,* shi epapa tsɛ lɛ Benyamin.*+ 19 No hewɔ lɛ, Rahel gbo ni afu lɛ yɛ gbɛ ní yaa Efrat, ni ji Betlehem+ lɛ he. 20 Yakob kɛ kadimɔ tɛ ko ma shi yɛ egbonyobu lɛ nɔ; no ji Rahel gbonyobu lɛ kadimɔ tɛ kɛbashi ŋmɛnɛ.
21 No sɛɛ lɛ, Israel fã kɛshi jɛmɛ, ni eyafee emama tsũ lɛ yɛ Eder mɔɔ lɛ sɛɛgbɛ kwraa. 22 Be ni Israel yɔɔ nakai shikpɔŋ lɛ nɔ lɛ, be ko lɛ Ruben tee ekɛ Bilha, ni ji epapa hemɔ* lɛ yawɔ, ni Israel nu he.+
Agbɛnɛ, Yakob yɛ bihii 12. 23 Bihii ní Lea fɔ ji, Yakob kromɔbi Ruben,+ esɛɛ lɛ Simeon kɛ Levi kɛ Yuda kɛ Isakar kɛ Zebulon. 24 Bihii ní Rahel fɔ ji, Yosef kɛ Benyamin. 25 Ni bihii ní Bilha, Rahel tsulɔ yoo lɛ fɔ ji, Dan kɛ Naftali. 26 Ni bihii ni Zilpa, Lea tsulɔ yoo lɛ fɔ ji, Gad kɛ Asher. Mɛnɛɛmɛi ji Yakob bihii ní afɔ ahã lɛ yɛ Padan-aram lɛ.
27 Naagbee lɛ, Yakob ba he ni etsɛ Isak yɔɔ lɛ, yɛ Mamre,+ yɛ Kiriat-arba, ni ji Hebron, he ni Abraham kɛ Isak hu hi akɛ gbɔi lɛ.+ 28 Isak ye afii 180.+ 29 Kɛkɛ ni Isak mu enaagbee mumɔ ni egbo, ni afu lɛ tamɔ afu etsɛmɛi lɛ,* be ni ehi shi afii babaoo ní etsui enyɔ emli lɛ;* ni ebihii Esau kɛ Yakob ji mɛi ni fu lɛ.+