Wolo Ni Akɛmaje Romabii Lɛ
9 Miiwie anɔkwale yɛ Kristo mli; mimaleee, ejaakɛ mihenilee yeɔ mi odase yɛ mumɔ krɔŋkrɔŋ lɛ mli, 2 akɛ miyeɔ awerɛho babaoo ni minuɔ dɔlɛ ni sɛɛ efooo he yɛ mitsui mli. 3 Ejaakɛ miná ni kulɛ atse mi kɛje Kristo lɛ he akɛ mɔ ni alomɔ lɛ yɛ minyɛmimɛi ni ji miheloonaa wekumɛi lɛ anajiaŋ, 4 mɛi ni ji Israelbii lɛ. Amɛnɔ ji biiatsɔmɔ+ lɛ kɛ anunyam lɛ kɛ kpaŋmɔi+ lɛ kɛ Mlahãmɔ*+ lɛ kɛ sɔɔmɔ krɔŋŋ+ lɛ kɛ shiwoi lɛ.+ 5 Amɛnɔ ji tsɛmɛi lɛ,+ mɛi amli hu ni Kristo lɛ jɛ kɛba yɛ heloo gbɛfaŋ lɛ.+ Ajie Nyɔŋmɔ, mɔ ni ta nii fɛɛ nɔ lɛ yi kɛya naanɔ. Amen.
6 Shi no etsɔɔɔ akɛ Nyɔŋmɔ wiemɔ lɛ efee efolo. Ejaakɛ jeee mɛi fɛɛ ni jɛ Israel mli lɛ ji Israelbii diɛŋtsɛ.+ 7 Ni jeee akɛni Abraham seshi* ji amɛ hewɔ lɛ, bii ji amɛ fɛɛ;+ ejaakɛ, “Mɔ ni abaatsɛ lɛ oseshi* lɛ, Isak mli ebaajɛ kɛba.”+ 8 No ji akɛ, jeee heloonaa bii lɛ ji Nyɔŋmɔ bii diɛŋtsɛ,+ shi shiwoo naa bii+ lɛ moŋ abuɔ akɛ seshi* lɛ. 9 Ejaakɛ shiwoo wiemɔ lɛ nɛ: “Maba yɛ nɛkɛ be nɛɛ mli pɛpɛɛpɛ, ni Sara baaná binuu.”+ 10 Jeee nakai be lɛ mli pɛ, shi moŋ be ni wɔtsɛ Isak kome nɛɛ nɔŋŋ kɛ Rebeka ná hãaji musu lɛ hu;+ 11 ejaakɛ be ni anáko afɔ amɛ ni amɛtsuko nɔ kpakpa ko loo nɔ fɔŋ ko lɛ, bɔ ni afee ni Nyɔŋmɔ yiŋtoo yɛ halamɔ lɛ he lɛ akadamɔ nitsumɔi anɔ, shi moŋ eya nɔ edamɔ mɔ ni tsɛɔ mɔ lɛ nɔ lɛ, 12 akɛɛ yoo lɛ akɛ: “Onukpa lɛ baatsɔ nyɔŋ ehã gbekɛ lɛ.”+ 13 Tamɔ bɔ ni aŋma lɛ, akɛ: “Misumɔ Yakob, shi minyɛ Esau.”+
14 No hewɔ lɛ, te wɔbaakɛɛ tɛŋŋ? Ani Nyɔŋmɔ yeɔ sane ni ejaaa? Dabida!+ 15 Ejaakɛ ekɛɛ Mose akɛ: “Mana mɔ fɛɛ mɔ ni misumɔɔ ni mana lɛ mɔbɔ lɛ mɔbɔ, ni majie musuŋtsɔlɛ kpo matsɔɔ mɔ fɛɛ mɔ ni misumɔɔ ni majie musuŋtsɔlɛ kpo matsɔɔ lɛ lɛ.”+ 16 No hewɔ lɛ, agbɛnɛ, edamɔɔɔ nɔ ni mɔ ko shweɔ loo mɔdɛŋ ni mɔ ko bɔɔ lɛ nɔ,* shi moŋ edamɔ Nyɔŋmɔ, mɔ ni naa mɔbɔ lɛ nɔ.+ 17 Ejaakɛ ŋmalɛ lɛ kɛɛ Farao akɛ: “Nɔ tuuntu hewɔ ni mihã otee nɔ ohi shi lɛ nɛ: koni matsɔ onɔ majie mihewalɛ lɛ kpo matsɔɔ, koni ajaje migbɛ́i lɛ atsɔɔ yɛ shikpɔŋ lɛ nɔ fɛɛ.”+ 18 No hewɔ lɛ, agbɛnɛ, mɔ fɛɛ mɔ ni esumɔɔ akɛ ena lɛ mɔbɔ lɛ, lɛ enaa lɛ mɔbɔ, shi mɔ fɛɛ mɔ ni esumɔɔ akɛ eŋmɛ lɛ gbɛ ni ekpiliŋ etsui lɛ, lɛ eŋmɛɔ lɛ gbɛ ni ekpiliŋɔ etsui.+
19 No hewɔ lɛ, obaabi mi akɛ: “Mɛni hewɔ etaoɔ mɔ he tɔmɔ lolo lɛ mɔ? Ejaakɛ namɔ baanyɛ ate shi awo esuɔmɔnaa nii lɛ?” 20 Shi bo gbɔmɔ, namɔ ji bo ni okɛ Nyɔŋmɔ kaneɔ?+ Ani nɔ ni ashɔ̃ lɛ baabi mɔ ni shɔ̃ lɛ lɛ akɛ: “Mɛni hewɔ oshɔ̃ mi nɛkɛ?”+ 21 Mɛni? Ani gbɛshɔ̃lɔ lɛ bɛ hegbɛ yɛ sũ lɛ nɔ+ akɛ ekɛ sũ ni akpɔtɔ kome lɛ nɔŋŋ eko baashɔ̃ gbɛ́ ko ni hiɛ yɔɔ nyam, ni ekɛ eko hu ashɔ̃ gbɛ́ ko ni hiɛ bɛ nyam? 22 No hewɔ lɛ, kɛ́ Nyɔŋmɔ miisumɔ akɛ ejie emlifu kpo ni ehã ale ehewalɛ lɛ, ni eesumɔ hu akɛ eto etsui shi waa ehã gbɛ́i ni emlifu baaba amɛnɔ ni amɛsa hiɛkpatamɔ lɛ hu? 23 Ni kɛji efee enɛ bɔ ni afee ni ehã ale enunyam lɛ falɛ yɛ gbɛ́i ni ebaana amɛ mɔbɔ+ ni etsɔ hiɛ esaa amɛ eto kɛhã anunyam lɛ anɔ, 24 ni ji, wɔ mɛi ni etsɛ lɛ, jeee kɛjɛ Yudafoi lɛ ateŋ kɛkɛ, shi moŋ kɛjɛ jeŋmaji lɛ hu ateŋ lɛ,+ no hu? 25 Tamɔ bɔ pɛ ni ekɛɛ hu yɛ Hosea wolo lɛ mli lɛ, akɛ: “Matsɛ mɛi ni jeee mimaŋ+ lɛ akɛ ‘mimaŋ,’ kɛ yoo ni asumɔɔɔ lɛ lɛ akɛ, ‘misuɔlɔ’;+ 26 ni he ni akɛɛ amɛ yɛ akɛ, ‘Jeee mimaŋ ji nyɛ lɛ,’ jɛmɛ nɔŋŋ abaatsɛ amɛ yɛ akɛ ‘Nyɔŋmɔ hiɛkãalɔ lɛ bii.’”+
27 Agbɛnɛ hu, Yesaia bo yɛ Israel hewɔ akɛ: “Eyɛ mli akɛ Israelbii lɛ ayi fa tamɔ ŋshɔnaa shia moŋ, shi mɛi ni eshwɛ lɛ pɛ yiwala abaahere.+ 28 Ejaakɛ Yehowa* baahã mɛi abu amɛhe akɔntaa yɛ shikpɔŋ lɛ nɔ, ebaagbe naa ni ebaafo lɛ kuku.”*+ 29 Agbɛnɛ hu, tamɔ bɔ ni Yesaia gba lɛ, akɛ: “Kɛjeee Yehowa,* taiatsɛ lɛ, ni hã eshwɛ seshi* ko kɛhã wɔ kulɛ, benɛ wɔtsɔ tamɔ Sodom, ni wɔfee tamɔ Gomora.”+
30 No hewɔ lɛ, te wɔbaakɛɛ tɛŋŋ? Eyɛ mli akɛ jeŋmajiaŋbii lɛ ediii jalɛ sɛɛ moŋ, shi amɛnine shɛ jalɛ,+ ni ji jalɛ ni jɛ hemɔkɛyeli mli lɛ nɔ;+ 31 shi Israel lɛ, eyɛ mli akɛ ediɔ jalɛ mla sɛɛ moŋ, shi eshɛɛɛ nakai mla lɛ he. 32 Mɛni hewɔ? Ejaakɛ amɛtsɔɔɔ hemɔkɛyeli nɔ amɛdiii sɛɛ, shi moŋ amɛdi sɛɛ tamɔ nɔ ni abaanyɛ atsɔ nitsumɔi anɔ ni nine ashɛ nɔ. Amɛtɛrɛ “tɛmɔ tɛ” lɛ;+ 33 tamɔ bɔ ni aŋma lɛ, akɛ: “Naa! mikɛ tɛmɔ tɛ+ kɛ nanetɔ̃tɔmɔ tɛsaa ko miiŋmɛ shi yɛ Zion, shi mɔ fɛɛ mɔ ni heɔ enɔ eyeɔ lɛ, enine enyɛŋ shi.”*+