Lalai

37 Omli akawo la* yɛ efɔŋfeelɔi ahewɔ

Ni ohiɛ akakɔ̃ mɛi ni feɔ nii ni ejaaa lɛ anɔ.+

 2 Amɛbaagbi oya tamɔ jwɛi+

Ni amɛbaabɛ tamɔ jwɛi fɔ ni ekwɛ̃.

 3 Okɛ ohiɛ afɔ̃ Yehowa nɔ, ní ofee ekpakpa;+

Hii shikpɔŋ lɛ nɔ, ní oye anɔkwa.+

 4 Omii ashɛ ohe waa yɛ Yehowa hewɔ,*

Ni ebaahã bo nibii ni otsui taoɔ lɛ.

 5 Okɛ gbɛ ni onyiɛ nɔ lɛ afɔ̃ Yehowa hiɛ;*+

Okɛ ohiɛ afɔ̃ enɔ, ni ebaatsu nibii ahe nii ehã bo.+

 6 Ebaahã ojalɛ nifeemɔi lɛ akpɛ tamɔ jetsɛremɔ,

Kɛ ojalɛsaneyeli lɛ hu tamɔ hulu ni miitso shwane fintiŋŋ.

 7 Feemɔ diŋŋ yɛ Yehowa hiɛ+

Ni oto otsui shi omɛ lɛ.*

Kaahã gbɔmɔ wo omli la

Gbɔmɔ ni tsuɔ eŋaatsɔi ahe nii lɛ.+

 8 Ŋmɛɛmɔ mlifu he, ni kaahã omli wo la hu;+

Kaahã omli wo la ni oyafee efɔŋ.*

 9 Ejaakɛ abaajie efɔŋfeelɔi lɛ kɛje jɛmɛ,+

Shi mɛi ni hiɛ kã Yehowa nɔ lɛ, shikpɔŋ lɛ baatsɔ amɛnɔ.+

10 Eshwɛ be fioo kɛkɛ, ni onaŋ mɛi fɔji lɛ dɔŋŋ;+

Obaayakwɛ he ni amɛyɔɔ lɛ,

Shi onaŋ amɛ yɛ jɛmɛ.+

11 Shi mɛi ni he jɔ* lɛ, shikpɔŋ lɛ baatsɔ amɛnɔ,+

Ni amɛmii baashɛ amɛhe waa yɛ toiŋjɔlɛ babaoo mli.+

12 Mɔ fɔŋ tsɔɔ jalɔ he ŋaa;+

Ekpeɔ enyanyɔjiashi ewoɔ lɛ.

13 Shi Yehowa baaŋmɔ lɛ,

Ejaakɛ ele* akɛ egbi baaba.+

14 Mɛi fɔji gbalaa amɛklantei ni amɛdɔrɔɔ amɛgãii amli*

Koni amɛtsi nɔnalɔi kɛ ohiafoi amɛtswia shi,

Koni amɛgbe mɛi ni gbɛ ja lɛ.

15 Shi amɛklante lɛ baagbulɔ amɛ diɛŋtsɛ amɛtsui;+

Amɛgãii lɛ baakumɔ.

16 Nii fioo ni jalɔ yɔɔ lɛ,

Ehi fe nii babaoo ni mɛi fɔji babaoo yɔɔ lɛ.+

17 Ejaakɛ abaakumɔ mɛi fɔji aniji,

Shi jalɔi lɛ, Yehowa baaye ebua amɛ.

18 Yehowa le shihilɛ ni mɛi ni sane ko bɛ amɛhe lɛ tsɔɔ mli lɛ,*

Ni amɛgboshinii lɛ baahi shi kɛya naanɔ.+

19 Amɛhiɛ gboiŋ yɛ amanehulu beiaŋ;

Hɔmɔ beiaŋ po lɛ, amɛbaaná niyenii babaoo.

20 Shi mɛi fɔji lɛ ahiɛ baakpãtã;+

Yehowa henyɛlɔi lɛ baalaaje tamɔ jwɛi frɔ̃frɔ̃;

Amɛbaalaaje tamɔ lasu.

21 Mɔ fɔŋ faa nii, ni ewooo nyɔmɔ,

Shi jalɔ feɔ ejurɔ,* ni ehãa mɔ nɔ.+

22 Mɛi ni ejɔɔ* amɛ lɛ, shikpɔŋ lɛ baatsɔ amɛnɔ,

Shi mɛi ni elomɔ* amɛ lɛ, abaajie amɛ kɛje nɔ.+

23 Kɛ́ Yehowa ná gbɛ ni gbɔmɔ nyiɛ nɔ lɛ he miishɛɛ lɛ,+

Ekudɔɔ enajifaamɔi.*+

24 Ebaanyɛ egbee shi moŋ, shi awóŋ lɛ atswaŋ shi,+

Ejaakɛ Yehowa hiɛ enine mli.*+

25 Tsutsu ko lɛ, gbekɛ ji mi, shi amrɔ nɛɛ migbɔ,

Shi minako jalɔ ni akwa lɛ pɛŋ,+

Loo jalɔ ni ebii miitao niyenii.*+

26 Ejɛɔ esuɔmɔ mli ekɛ nii faa daa,+

Ni jɔɔmɔ kã shi hã ebii lɛ.

27 Tsi ohe kɛje efɔŋ he ni ofee ekpakpa,+

Ni obaahi shi kɛya naanɔ.

28 Ejaakɛ Yehowa sumɔɔ jalɛ sane,

Ni ekwaŋ enɔkwafoi lɛ.+

Abaabu amɛhe daa;+

Shi abaajie mɛi fɔji aseshibii lɛ kɛje jɛmɛ.+

29 Jalɔi lɛ, shikpɔŋ lɛ baatsɔ amɛnɔ,+

Ni amɛbaahi nɔ kɛya naanɔ.+

30 Jalɔ naabu wieɔ hiɛshikamɔ wiemɔi,*

Ni elilɛi wieɔ nɔ ni ja.*+

31 E-Nyɔŋmɔ lɛ mla lɛ yɛ etsui mli;+

Enajifaamɔi lɛ shaneŋ.+

32 Mɔ fɔŋ hiŋmɛii kã jalɔ he,

Eetao lɛ egbe.

33 Shi Yehowa eŋmɛŋ ehe ewoŋ nakai mɔ lɛ dɛŋ+

Ni kɛ́ akojo lɛ lɛ, ehãŋ abu lɛ fɔ.+

34 Okɛ ohiɛ afɔ̃ Yehowa nɔ, ni onyiɛ egbɛ lɛ nɔ,

Ni ebaawó onɔ koni shikpɔŋ lɛ atsɔ onɔ.

35 Mina mɔ fɔŋ yitsoŋwalɔ ko

Ni lɛɔ shi tamɔ tso ni ebu kusuu yɛ lɛ diɛŋtsɛ esũ mli.+

36 Shi elaaje trukaa ni anaaa lɛ dɔŋŋ;+

Mitee nɔ mitao lɛ, shi minaaa lɛ.+

37 Kwɛmɔ mɔ ni sane ko bɛ ehe lɛ,*

Ni okɛ ohiŋmɛi ama mɔ ni ja+ lɛ nɔ,

Ejaakɛ nakai mɔ lɛ baaná toiŋjɔlɛ wɔsɛɛ.+

38 Shi abaakpãtã mɛi ni tɔ̃ɔ lɛ fɛɛ ahiɛ;

Abaafo mɛi fɔji awɔsɛɛ be lɛ nɔ.+

39 Jalɔi lɛ, amɛyiwalaheremɔ lɛ jɛ Yehowa ŋɔɔ;+

Lɛ ji amɛteemɔhe yɛ haomɔ beiaŋ.+

Ebaajie amɛ kɛje mɛi fɔji adɛŋ ni ebaahere amɛ,

Ejaakɛ amɛbaa lɛ abo.+