Biblia Mli Ŋaawoo Saa Weku Mli Naagbai
1, 2. (a) Mɛni haa wekui komɛi fiteɔ aloo amɛmli gbalaa lɛ? (b) Mɛni hewɔ esa akɛ wɔ fɛɛ wɔsusu mɛi ni yɔɔ wekui ni mli egbala lɛ amli lɛ anaagbai ahe lɛ? (1 Korintobii 12:26)
ARNOBIUS, nuu ko ni kɛɛ eji Kristofonyo yɛ afii ohai ejwɛ lɛ mli lɛ ŋma akɛ: “Ŋamɛi [halaa] akɛ aaashwie amɛ, gbekɛbii sumɔɔ ni gboshinii abɔ amɛ . . . fe ni amɛaafee mɛi ni yeee Kristo anɔkwale.”‘ Hɛɛ, jamɔ mli shitee kɛ woo ni mli wa ni jɛɔ mɛi ni heee yeee lɛ aŋɔɔ baa lɛ gbalaa wekui amli. Yesu jaje akɛ mɔ ni “dɔɔ” weku lɛ mlibii ahe fe lɛ lɛ baafee mɔ ni esaaa lɛ. No hewɔ lɛ, “klante” baaba ni enɛ baagbala shiai amli akɛni heyelilɔ lɛ sumɔɔɔ eweku lɛ, “hɛɛ, lɛ diɛŋtsɛ esusuma po” babaoo hewɔ. (Mateo 10:34-37; Luka 14:26) Weku mligbalamɔi etee nɔ kɛbashi wɔgbi nɛɛ.
2 Eyɛ mli akɛ Kristofonyo lɛ baafee bɔ fɛɛ bɔ ni eeenyɛ ni eha weku lɛ ahi shi yɛ ekomefeemɔ mli moŋ, shi hefatalɔi lɛ ekomɛi ‘sumɔɔ ni amɛgbala amɛhe shi kɛya’ akɛni amɛsumɔɔɔ ni amɛkɛ Kristofonyo lɛ hiɔ shi lɛ hewɔ, ni nɔ ni jɛɔ mli baa ji mligbalamɔ loo gbalamlitsemɔ (1 Korintobii 7:12-16) Wekui ni fiteɔ hu baa ejaakɛ yɛ “nibii agbɛjianɔtoo nɛɛ naagbee” nɛɛ mli lɛ, suɔmɔ kɛha Nyɔŋmɔ kɛ emlai ni ‘he baajɔ’ hu baaba, kɛ nɔ ni kɔɔ gbalashihilɛ hu he. (Mateo 19:6, 9; 24: 3, 12) Yɛ U.S. Amerika lɛ, gbalamlitsemɔ tee hiɛ aahu kɛyashɛ nɔ ni fe oha fɛɛ mli 236 kɛjɛ 1960 kɛyashi 1980 pɛ! Ní akɛni mɛi ni tseɔ gbala mli nɛɛ ateŋ enumɔ fɛɛ mli etɛ hiɛ bii yɛ U.S. Amerika hewɔ lɛ, shiai ni fiteɔ yɛ nɛkɛ gbɛ nɔ lɛ kɛ naagbai babaoo baa. Yɛ be babaoo mli lɛ kɛ gbɔmɛi kase Nyɔŋmɔ Wiemɔ lɛ mli anɔkwalei lɛ, ehaa amɛweku shihilɛ hiɔ, shi mɛi komɛi tse gbãla mli dani amɛbatsɔmɔ Yehowa Odasefoi. Yɛ bei komɛi amli lɛ Kristofonyo ni kɛ Biblia mli ŋaawoo tsuuu nii yɛ anɔkwayeli mli yɛ shia lɛ hu tseɔ gbala mli. (Yohane 13:17) Mɛni ji nɔ ni fɔlɔi ni ji Kristofoi lɛ baanyɛ afee yɛ shihilɛi ni tamɔ nɛkɛ shishi koni amɛtsɔse amɛbii ni amɛsumɔ Yehowa?
Na Ni Aaana Aha He Hiaa
3. Mɛɛ piŋmɔ gbalamlitsemɔ kɛbaa lɛ?
3 Israel hiii komɛi etsɔ kutumpɔo nɔ amɛmiishwie amɛŋamɛi yɛ Maleaki gbii lɛ amli. Nɛkɛ yei ni akpoo amɛ nɛɛ “ayaafo kɛ ŋtsɔidɔɔmɔ” “yaafonui haa Yehowa afɔleshaalatɛ lɛ nɔ” yɛ be mli ni amɛkpaa Nyɔŋmɔ yelikɛbuamɔ he fai lɛ. (Maleaki 2:13-16) Gbalashihilɛ ni afiteɔ lɛ ŋmɛnɛ lɛ hu ehiii ni eyɛ dɔlɛ. Kɛji akɛ Ŋmalɛ naa nɔdaamɔ nɔ ni ma shi shiŋŋ po yɛ. Eyɛ mli akɛ wu lɛ kɛ ŋa lɛ naa nɔ̃ moŋ, shi yɛ be babaoo mli lɛ, gbekɛbii lɛ moŋ naa nɔ̃ babaoo.
4. (a) Yɛ mɛɛ gbɛ nɔ gbekɛbii naa nɔ̃ kɛ́ amɛfɔlɔi tse gbala mli? (b) Te fɔlɔ ko aaafee tɛŋŋ aye ebua ebii
4 Kɛji akɛ gbalamlitsemɔ lɛ kɛ niseniianiifeemɔ mli hejɔɔmɔ baa po lɛ, yɛ bei komɛi amli lɛ jeŋ ni gbekɛ lɛ yɔɔ mli lɛ fɛɛ feɔ tamɔ nɔ ni ekumɔ. No hewɔ lɛ, ehe miihia ni fɔlɔ ni heɔ yeɔ lɛ atsɔɔ suɔmɔ ni yɔɔ sɔrɔto kɛ shishinumɔ yɛ nakai shihilɛ lɛ he nitsumɔ mli. Gbekɛ ko ni etsɛ lɛ ji Kristofonyo ni damɔ Ŋmalɛ lɛ nɔ etse gbala mli yɛ be mli ni gbekɛ nuu lɛ eye afii enumɔ pɛ lɛ kɛɛ akɛ: “Daa nɛɛ midamɔ teŋ. Mitamɔ mɔ ko ni aja mimli. Miha bɔ ni minuɔ he diɛŋtsɛ lɛ hi mikome mimli. Enɛ kɛ nɔnyɛɛ ‘diɛŋtsɛ ba minɔ.” Ni aaaye ebua gbekɛ ko ni edamɔ henumɔi ni mli wa waa nɛɛ anaa lɛ biɔ ni fɔlɔ lɛ efee mɔ ni ‘naa haa mɔ,’ ni ‘edɔɔ mɔ he.’(1 Petro 3:9) Gbekɛ lɛ baafee dioo yɛ fɔ ni eye hewɔ, ebaanu he akɛ lɛ ji mɔ ni akɛ gbalamlitsemɔ lɛ he tɔmɔ lɛ baafɔ enɔ. Ehe miihia ni fɔlɔ lɛ kɛ tsuishitoo atsɔɔ mli atsɔɔ gbekɛ lɛ akɛ esumɔɔ lɛ, ni ákɛ gbalamlitsemɔ lɛ he tɔmɔ lɛ jɛɛɛ gbekɛ lɛ.
5. Mɛni hewɔ esa akɛ Kristofonyo ko ni ji fɔlɔ abɔ mɔdɛŋ ni efo béi ni aaaba lɛ yɛ etsutsu hefatalɔ lɛ tɛŋ lɛ sɛɛ?
5 Béi ni baa fɔlɔi lɛ ateŋ lɛ mli baanyɛ awa aahu, ni titri lɛ kɛji akɛ ekɔɔ Nyɔŋmɔjamɔ he. Ni kɛlɛ ni akɛ ‘efɔŋ aaato efɔŋ najiaŋ’ aloo “jɛmɔ yɛ jɛmɔ najiaŋ” lɛ esa akɛ fɔlɔi ni heɔ yeɔ Iɛ asusu gbekɛ lɛ hilɛkɛhamɔ he. (1 Petro 3:9) Yɛ wolo, Growing Up Divorced ni Linda Francke ŋma lɛ mli lɛ etsɔɔ akɛ: “Fɔlɔi ni nyɛ̃ɛɔ amɛhe waa lɛ haa nɛkɛ gbekɛbii nɛɛ anaagbai lɛ amli woɔ wu, ni yɛ bei komɛi amli lɛ efiteɔ amɛ po. Ní akɛni gbekɛ lɛ sumɔɔɔ ni ekɛ efɔlɔ ko teŋ agbala hewɔ lɛ, gbekɛ lɛ gbalaa ehe shi kɛjɛɔ wekukpaa ni mli wa ni aaaka ekɛ efɔlɔi enyɔ lɛ fɛɛ teŋ lɛ he.” Hɛɛ, jeee akɛ “awuŋayeli fɔŋ kɛ bei” ejaaa kɛkɛ, shi moŋ ebaanyɛ etse gbekɛ lɛ kɛjɛ nyɛhe. (Yakobo 3:14, 16) Jɛmɔi ni jwɛŋmɔ bɛ mli ni aaajɛ fɔlɔ ni heee yeee lɛ baanyɛ aye gbekɛ lɛ awui waa diɛŋtsɛ. (Abɛi 12:18) Kɛji akɛ tsutsu hefatalɔ ni heee lɛ miisumɔ ni etaa béi lɛ nɔ lɛ, “kɛ aaaho lɛ, [heyelilɔ lɛ] nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”—Romabii 12:18-21.
Buu Obi Lɛ Tsui He
6. Kɛ ana ale mɔ ni baakwɛ gbekɛ lɛ sɛɛ lɛ, mɛni baanyɛ agba fɔlɔi komɛi anaa?
6 Kɛ saneyeli he lɛ tsɔɔ fɔlɔ ni baakwɛ gbekɛ lɛ nɔ lɛ, naagbai komɛi ni akɛaakpe baanyɛ ate shi. Amaniɛbɔɔ ko ni jɛ Buu Mɔɔ Asafo lɛ nitsumɔ he nine ni yɔɔ Australia lɛ jaje akɛ: “Naagbai wuji lɛ ateŋ ekome ji akɛ, fɔlɔ ni akɛ—gbekɛ lɛ kwɛmɔ ewo edɛŋ lɛ ŋmɛɛɔ saji ahe . . . Fɔlɔ ni yɔɔ anɔkwale lɛ mli lɛ po baanyɛ aha ehiɛ aje yiŋtoo hewɔ ni esumɔɔ ni ekwɛ gbekɛ lɛ nɔ lɛ nɔ. Esa akɛ yiŋtoo titri lɛ afee akɛ eesumɔ ni etsɔse ebii lɛ akɛ Yehowa anɔkwale jalɔi.” Nakai feemɔ biɔ hekamɔ yɛ be fɛɛ mli.—Efesobii 6:4.
7. (a) Mɛni hewɔ esa akɛ atsɔse gbekɛ lɛ koni ekɛ bulɛ aha fɔlɔ ni heee yeee lɛ?(b) Te ooofee tɛŋŋ okɛ gbekɛ lɛ asusu saji ahe kɛ mɔ ni heee yeee lɛ kɛ ehe wo sui komɛi ni jeee Kristofoi esubaŋ mli?
7 Shi yɛ be babaoo mli lɛ mla ŋmɛɔ gbɛ koni fɔlɔ ni gbekɛ lɛ bɛ ekwɛmɔ shishi lɛ ayasara lɛ. Ani abaanyɛ akɛ bulɛ aha enɛ yɛ be mli ni abuɔ gbekɛ lɛ tsui he lɛ? Hɛɛ, ni esa akɛ gbekɛ lɛ hu ajie bulɛ ni sa kpo atsɔɔ efɔlɔ ni heee yeee lɛ. Kɛji akɛ yɛ saramɔ be mli lɛ mɔ ni heee yeee lɛ kɛ ehe wo subaŋi komɛi ni jeee Kristofoi esubaŋ mli lɛ, ni enɛ aaafee mlifu ni awie ashi nakai fɔlɔ lɛ moŋ lɛ, heyelilɔ lɛ baanyɛ atsɔɔ mli atsɔɔ gbekɛ lɛ akɛ Nyɔŋmɔ kɛ jeŋba he tɛi emamɔ shi yɛ Biblia lɛ mli, ni ákɛ “wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ” ni ji naagbee Kojolɔ lɛ. (Romabii 14:12) Ni kɛlɛ ha efee faŋŋ akɛ esaaa akɛ akaseɔ subaŋ ni tamɔ nɛkɛ. Tsɔ nilee nɔ otsɔɔ mli oha lɛ akɛ mɛi komɛi ehiii shi yɛ nɛkɛ tɛi ni afolɔ ashwie shi nɛɛ anaa, shi yɛ be ni sa mli lɛ amɛteŋ mɛi pii tsakeɔ akɛni amɛnaa Kristofoi anɔkwɛmɔ nɔ yɛ gbekɛ lɛ kɛ etsutsu hefatalɔ lɛ mli lɛ hewɔ. Enɛ baaha gbekɛ lɛ ana bulɛ ko aha nakai fɔlɔ lɛ. Esaaa akɛ hefatalɔi ni amɛtse gbala mli lɛ amligbalamɔ yɛ jamɔ mli lɛ tsiɔ fɔlɔ lɛ gbɛ koni ekana gbekɛ lɛ nɔ hewalɛ yɛ gbɛ kpakpa nɔ. Fɔlɔ ni ji Kristofonyo lɛ baaha ‘mɛi fɛɛ ale emlijɔlɛ lɛ.’ (Filipibii 4:5) Shi kɛji akɛ mɔ ni heee lɛ bɔ mɔdɛŋ akɛ eeefite tsɔsemɔ ni Nyɔŋmɔ gbeyeishemɔ yɔɔ mli lɛ hu?
8. Yɛ mɛɛ gbɛ nɔ fɔlɔi enyɔ ko saa amɛbii amɛto dani amɛtsutsu hefatalɔi ni teɔ shi woɔ amɛ lɛ abasara amɛbii lɛ?
8 Hesaamɔ kɛha saramɔi lɛ ji oti lɛ! Kristofonyo ko ni ji nyɛ ni etsutsu wu lɛ batsɔ hemɔkɛyeli kwalɔ bɔ amaniɛ akɛ: “Dani etsɛ lɛ saramɔ be lɛ aaashɛ lɛ, mikɛ gbekɛ lɛ kaseɔ bɔ ni Yehowa susuɔ amɛjeŋba lɛ he. Wɔfeɔ shihilɛi sɔrɔtoi ahe nɔkwɛmɔ nɔ wɔkwɛɔ. Mikɛɔ akɛ: ‘Kɛji akɛ otsɛ kɛɛ nɛkɛ loo nɛkɛ lɛ, te obaaha hetoo oha tɛŋŋ?’” Kristofonyo yoo kroko ni egbalashihilɛ fite akɛni yoo nɛɛ batsɔ Odasefonyo hewɔ lɛ kɛfata he akɛ: “Dani [mibii enyɔ lɛ] amɛaashi ni amɛyasara amɛtsɛ yɛ otsi lɛ naagbee lɛ, misɔleɔ mibiɔ Yehowa ni ekɛ amɛ ahi shi ni eye ebua amɛ ni amɛyɛ amɛtsɛ lɛ odase, titri lɛ kɛtsɔ amɛjeŋba kpakpa nɔ.”
9. Te fɔlɔi Kristofoi aaafee tɛŋŋ akase nɔkwɛmɔ nɔ ni Mose nyɛ lɛ fee lɛ?
9 Fɔlɔ ni heee yeee ni yɔɔ hegbɛ akɛ eyasaraa ebi lɛ baabɔ mɔdɛŋ ni elaka gbekɛ lɛ kɛtsɔ nikeenii, hiɛtserɛjiemɔ nibii ni jara wawai kɛ miishɛjemɔ nibii krokomɛi ni ekɛaaha lɛ lɛ nɔ. Yokebed, ni ji Mose nyɛ, (kɛ Amram kɛ́ eyɛ wala mli lolo no mli lɛ) le nɔ ni Mose kɛbaakpe kɛ́ akɛ lɛ ha akɛ Farao biyoo. No hewɔ lɛ yoo nɛɛ bɔ mɔdɛŋ ejaje ebinuu lɛ jwɛŋmɔ yɛ nibii ni jara wawai ahe yɛ be mli ni ekɛ lɛ yɔɔ lolo lɛ. (2 Mose 2:1-10) Yɛ “Mizraim jwetrii” ni kaa mɔ nɛɛ fɛɛ sɛɛ lɛ, Mose diɛŋtsɛ hala nɔ ni esumɔɔ akɛ eeenyiɛ shishitoo taomɔ nii ni Nyɔŋmɔ gbeyeishemɔ yɔɔ mli lɛ sɛɛ. “Ebuɔ” emumɔŋ hegbɛi lɛ akɛ ninamɔ diɛŋtsɛ! (Hebribii 11:23-26) Esa akɛ fɔlɔi ni ji Kristofoi hu asaa amɛbii lɛ ni amɛnyɛ amɛdamɔ kaai ni tamɔ nɛkɛ naa kɛtsɔ Ŋmalɛ mli saji ni gbalaa amɛjwɛŋmɔ kɛyaa mumɔŋ jwetrii ni amɛaakase lɛ anɔ.” Etsɛɛɛ ni gbekɛbii naa fɔlɔ ni baasumɔ ni ehe amɛsuɔmɔ lɛ yiŋtoo ni bɛ shishitoo ko lɛ.—Abɛi 15:16, 17.
10. Kɛ shihilɛ lɛ mli wa waa lɛ, mɛni ji nibii komɛi ni esa akɛ fɔlɔ lɛ asusu he?
10 Saramɔi ni tamɔ nɛkɛ kɛ oshara diɛŋtsɛ baaba gbekɛ lɛ wala nɔ yɛ shihilɛi fioo komɛi amli. Ehe baahia ni fɔlɔ ko akpɛ eyiŋ yɛ nɔ ni esa akɛ efee yɛ nakai shihilɛi lɛ ashishi, ni ekɛ bɔ ni hiɛdɔɔ yɔɔ hegbeyeiwoo nɛɛ mli lɛ awo sɔlemɔ mli, mla he nitsumɔ ni yɔɔ, kɛ nɔ ni baanyɛ aba kɛji akɛ ekpoo akɛ eeekpɛlɛ nɛkɛ saramɔi nɛɛ anɔ.a Kaakpɛ oyiŋ ni okɛ mlifu fee nɔ ko, koni akabi sane yɛ bɔ ni osa akɛ fɔlɔ lɛ he.—Galatabii 6:5; Romabii 13:1; Bɔfoi lɛ Asaji 5:29; 1 Petro 2:19, 20.
Okɛ Ŋaawoo Ni Hi Atsu Nii
11. Kɛ gbekɛ lɛ kwɛmɔ je Kristofonyo fɔlɔ ko dɛŋ lɛ, mɛni ji nɔ ni esa akɛ eyoo?
11 Shi kɛji akɛ Kristofonyo fɔlɔ ji mɔ ni yɔɔ hegbɛ akɛ eyasaraa ebi lɛ? Kɛji akɛ gbekɛ lɛ bɛ Kristofoi ashia lɛ dɔŋŋ lɛ, nakai fɔlɔ lɛ bɛ gbekɛ lɛ nɔ hewalɛ yɛ mumɔŋ pii ko dɔŋŋ. (1 Korintobii 7:14) Akɛ nɔkwɛmɔ nɔ lɛ,eka shi faŋŋ akɛ blematsɛ enɔkwafo Abraham ma nɔ mi akɛ ebinuu Ishmael kɛ hefatalɔ Nyɔŋmɔjalɔ abote gbalashihilɛ mli tamɔ Isak fee lɛ. Shi beni ashwie Ishmael ni no mli lɛ eji gbekɛ lolo kɛ enyɛ Hagar kɛjɛ shia lɛ mli lɛ, Abraham nyɛɛɛ atsi Hagar naa yɛ Mizraimnyo ni eka shi faŋŋ akɛ ejeee Yehowa jalɔ ni eto gbɛjianɔ akɛ ekɛ Ishmael abote gbalashihilɛ mli lɛ naa.—1 Mose 21:14, 21; 24:1-4.
12. (a) Mɛɛ mɔdɛŋ ni sɛɛnamɔ yɔɔ he Kristofonyo fɔlɔ ni jeee lɛ ekwɛɔ gbekɛ lɛ baanyɛ abɔ? (b) Feemɔ bɔ ni Kristofonyo fɔlɔ ko baanyɛ ekɛ ‘nilee afee nɔ̃ ni hi’ lɛ he nɔkwɛmɔ nɔ.
12 Yɛ hegbɛi ni aaanyɛ akɛɛ akɛ efaaa nɛɛ fɛɛ sɛɛ lɛ, Kristofonyo fɔlɔ ni jee mɔ ni ebi lɛ yɔɔ eŋɔɔ lɛ baanyɛ afee babaoo ni ekɛtɛo Yehowa he suɔmɔ ni mli kwɔ yɛ gbekɛ lɛ mli. Bɔni afee ni enyɛ efee nakai lɛ, esa akɛ fɔlɔ lɛ kɛ “ŋaawoo ni hi kɛ jwɛŋmɔ” atsu nii. (Abɛi 3:21) Hɛɛ, nɔ ni fe mɔdɛŋbɔɔ ni mli wa he miihia. “Kɛji mɔ dade naa gbo ni ejɔɔɔ naa lɛ, belɛ ja ekɛ hewalɛ pii to he [shi nɔ ko bibioo pɛ baajɛ mli aba]; shi nilee akɛfeɔ nɔ̃ ni ehiɔ.” (Jajelɔ 10:10) Be baaba ni mɔ ni heee yeee lɛ baajie saji anaa koni etsi gbɛ koni akana gbekɛ lɛ. Ní aaatee béi shi amrɔ nɔŋŋ yɛ enɛ he lɛ, sɛɛnamɔ kpakpa baajɛ mli aba kɛji akɛ fɔlɔ lɛ kɛ Abɛi 25:15 tsu nii: “Tsuishitoo ni sɛɛ tsɛɔ akɛtsɔɔ kojolɔ yiŋ, ni lilɛi ni naa jɔ lɛ, ekuɔ wu.” Eyɛ mli akɛ tsuishitoo kɛ mlijɔlɛ ni aaajie lɛ kpo yɛ be mli ni okɛ naatsii ni ejaaa miikpe Iɛ wa moŋ, shi be babaoo mli lɛ, ebaanyɛ ejɔɔ mɔ ni kɛɛ ewa yɛ shitee kɛ woo mli lɛ po he. (Okɛto 2 Timoteo 2:23-25 he.) Obaanyɛ okwa ŋwanejeei kɛtsɔ jɛmɛ ni oooya yɛ ebe naa pɛpɛɛpɛ kɛ ŋaawoo (ni eteee shi ewoo Ŋmalɛ lɛ) ni fɔlɔ ni kwɛɔ gbekɛ lɛ kɛhaa lɛ ni ooodi sɛɛ lɛ nɔ. Kɛji akɛ oyoo akɛ mɔ ni heee yeee lɛ miigbe ohe guɔ kɛmiitsɔɔ gbekɛ lɛ, kɛ ona oyoo enɛ lɛ, kaimɔ 1 Petro 2:15: “Ekpakpafeemɔ nyɛkɛaatsimɔ gbɔmɛi ni bɛ yitsoŋ lɛ akwashiafeemɔ lɛ naa.” Kɛ ofee nɔkwɛmɔ nɔ kpakpa lɛ, gbekɛ lɛ baana mɔ ni ja.—Abɛi 20:7.
13. Te aaafee tɛŋŋ ni fɔlɔ ni heɔ yeɔ lɛ aha esaramɔ lɛ afee nɔ ni sɛɛnamɔ diɛŋtsɛ yɔɔ he?
13 Bɔɔ mɔdɛŋ ni okɛ Nyɔŋmɔ Wiemɔ lɛ awo gbekɛ lɛ tsui mli kɛtsɔ kɛ́ aaahi lɛ, mumɔŋ saji ni bo diɛŋtsɛ lɛ okɛ lɛ aaakase nɔ koni okɛ lɛ aya asafoŋ kpeei yɛ saramɔ bei ni tamɔ nɛkɛ mli. Kɛji akɛ mla naa naatsii lɛ mli wa po lɛ, fɔlɔ lɛ baanyɛ atsɔ nibii anɔ egbala ejwɛŋmɔ kɛya Nyɔŋmɔ nibɔɔ nitsumɔi anɔ, kɛ agbɛnɛ yɛ gbɛi krokomɛi anɔ koni ekɛye ebua gbekɛ lɛ koni esumɔ Nyɔŋmɔ. (Romabii 1:19, 20; Mateo 6:28-30) Yesu yoo akɛ etoibolɔi lɛ nyɛɛɛ amɔmɔ nibii pii. Etsɔɔ amɛ nii “bɔ ni amɛaanyɛ amɛnu shishi.” (Marko 4:33, 34) Kɛ fata mumɔŋ saji ni aaasusu he lɛ ahe lɛ, okɛ lɛ atsu nitsumɔi krokomɛi ni tswaa mɔ maa shi, tamɔ nanemɛi kpakpai ni okɛ lɛ aaayasara amɛ ni amɛteŋ mɛi komɛi hu ji gbekɛ lɛ tipɛŋfoi (Abɛi 13:20) Okɛ lɛ fɛɛ ana hiɛtsejiemɔ mli ŋɔɔmɔ. Ha saramɔ lɛ afee nɔ ni sɛɛnamɔ diɛŋtsɛ yɔɔ he. Tsɔsemɔ ni jwɛŋmɔ yɔɔ mli lɛ tsɔɔ suɔmɔ. (Abɛi 13:24) Shi eshɛɔ be ni naagba lɛ baafa babaoo. Nɔnyɛɛ baanyɛ ajɛ hei sɔrɔtoi pii aba Te aaafee tɛŋŋ aŋmɛ tsui shi yɛ enɛɛmɛi fɛɛ mli?
Okɛ Ohe Afɔ Yehowa nɔ
14. Mɛɛ nɔmimaa wɔyɔɔ Lala 37:23, 24?
14 David ŋma yɛ gbɔmɔ ni Yehowa “nyaa” eshihilɛ gbɛ “he” lɛ he akɛ: “Kɛ egbee shi tete lɛ, ekaŋ shi kwraa, ejaakɛ Yehowa hiɛ enine mli.” (Lala 37:23, 24) Hɛɛ, Kristofonyo ni miipele yɛ nɔnyɛɛ ni jɛɔ weku ni mli egbala lɛ mli baa shishi lɛ baanyɛ ‘agbee shi yɛ nijiaŋwujee kɛ haomɔi anaa, yɛ mla naa loo shika gbɛfaŋ haomɔi ahewɔ, shi “ekaŋ shi kwraa” yɛ mumɔŋ. Taakɛ New Berkeley Version lɛ tsɔɔ nakai kuku lɛ shishi lɛ: “Kɛ egbee shi lɛ, ekaŋ shi ni eteee shi dɔŋŋ.” Mɛni hewɔ? Ejaakɛ Yehowa kɛ enine wóɔ enɔ kɛtsɔɔ emumɔ krɔŋkrɔŋ lɛ kɛ ejálɔi ni yɔɔ suɔmɔ lɛ anɔ.—Yakobo 1:27.
15, 16. Aye abua wekui komɛi ni mli egbala lɛ yɛ mɛɛ gbɛ nɔ?
15 Kristofonyo yoo ko ni akɛ ebii bibii enyɔ lɛ akwɛmɔ wo etsutsu wu lɛ dɛŋ lɛ kɛɛ akɛ: “Beni ahe nɔ fɛɛ nɔ yɛ midɛŋ lɛ, mikase bɔ ni mafee ni mikɛ mihe aaafɔ Yehowa nɔ diɛŋtsɛ. Mikase bɔ ni mafee makpɛlɛ nɔ ni eŋmɛɔ gbɛ lɛ nɔ, ni mibɔɔɔ mɔdɛŋ akɛ mi diɛŋtsɛ lɛ mafee nii yɛ mihewalɛ mli. Miikase nii lolo. Eji nikasemɔ ni wa.” Shi, ekɛ saramɔ hegbɛi lɛ miitsu nii waa, ni jeee akɛ ena miishɛjemɔ kɛjɛ ewu hee lɛ, Kristofonyo anɔkwafo ko ni ji onukpa ko ŋɔɔ pɛ kɛkɛ, shi moŋ kɛjɛ mɛi krokomɛi ni yɔɔ asafo lɛ mli lɛ hu ŋɔɔ.
16 Kristofonyo kroko ni etsutsu wu hemɔkɛyeli kwalɔ lɛ tsi gbekɛbii lɛ anaa nyɔji babaoo ni ebooo saneyeli he lɛ toi lɛ hu kɛɛ akɛ: “Mihao aahu akɛ eha misusu akɛ makumɔ po. Ni nɔ kome ni haaa maye sɛkɛ loo makumɔ kwraa yɛ nakai be Iɛ mli ji sɔɔmɔ nitsumɔ lɛ mli ni mikɛ mihe wo lɛ.” Ebiyoo ni no mli lɛ eye afii kpawo lɛ damɔ shi shiŋŋ eha Yehowa, ni eŋmɛ etsui shi yɛ yii babaoo ni etsɛ lɛ yiɔ lɛ akɛni ekpoo akɛ eeekane ewoji ni eŋmala ni kɛ ŋmalɛi lɛ kpaaa gbee lɛ hewɔ. Beni eku esɛɛ eba enyɛ lɛ ŋɔɔ lɛ, gbekɛyoo nɛɛ tswa efai shi akɛ ekɛ ehe baakpɛtɛ Yehowa he gbagbalii agbɛnɛ. Mɛnɛɛmɛi kɛ tsuji anɔkwafoi krokomɛi ena Lala 54:2-7 mlibaa: “Nyɔŋmɔ, bo mifaikpamɔ lɛ toi, ni ofee toi oha midaaŋ wiemɔi lɛ; . . . Naa, Nyɔŋmɔ ji mibualɔ; Nuŋtsɔ [Yehowa] lɛ ji mɔ ni hiɛ misusuma mli! . . . ejaakɛ ejie mi kɛjɛ haomɔi fɛɛ mli.” Hɛɛ, wɔbaanyɛ ni wɔkɛ wɔbe efɔ Yehowa sɛɛfimɔ nɔ!—1 Korintobii 10:13.
17. Te aaafee tɛŋŋ ni fɔlɔi ni yɔɔ wekui ni mli egbala lɛ amli lɛ aaaye abuɔ amɛbii, ni mɛɛ nyɔmɔwoo baanyɛ ajɛ mli aba?
17 No hewɔ lɛ kɛ oji fɔlɔ yɛ weku ni mli egbala mli lɛ, na henumɔ oha obi lɛ henumɔi. Okɛ Nyɔŋmɔ Wiemɔ lɛ awaje etsui. Kɛ oyɛ hegbɛ akɛ oyasaraa obi lɛ, belɛ okɛ “ŋaawoo ni hi” atsu nii kɛmɔ shi. Na hekɛnɔfɔɔ yɛ Nyɔŋmɔ Wiemɔ lɛ ni oootɛo yɛ tsui ni ja lɛ mli lɛ mli. (1 Tesalonikabii 2:13) Ni ooona akɛ gbekɛ ko efee mɔ ni sumɔɔ Yehowa lɛ sa mɔdɛŋ fɛɛ ni ooobɔ yɛ he.
[Shishigbɛ niŋmai]
a Ajie kɛje November 1, 1986 Watchtower lɛ mli.
Against the Heathen, Book II, 5.
Kwɛmɔ “Obalaŋtai a-Hegbɛ Ní Fe Fɛɛ” yɛ wɔ April 1, 1986 Buu-Mɔɔ lɛ mli, kɛ agbɛnɛ ‘Te Osusuɔ Heloo Gbɛfaŋ Nibii Ahe Ohaa Tɛŋŋ?” ni yɔɔ Your Youth—Getting the Best out of It, wolo lɛ ni Watchtower Bible and Tract Society of New York ŋma lɛ mli.
The Uniform Marriage and Divorce Act ni ji gbalamlitsemɔ he mla ni yɔɔ U.S. Amerika lɛ kɛɔ akɛ: “Fɔlɔ ni aŋmɛɛɛ lɛ gbɛ koni ekwɛ ebii anɔ lɛ yɛ hegbɛ akɛ eyasaraa amɛ, ja saneyeli he lɛ ena ni enu akɛ esaramɔ lɛ kɛ gbekɛ lɛ gbɔmɔtsoŋ hewalɛnamɔ loo ehenumɔŋ nɔyaa woɔ oshara mli yɛ gbɛ ko nɔ.”
Ani Okaiɔ?
◻ Te aaafee tɛŋŋ ni Kristofonyo fɔlɔ ni Iɛ ekwɛɔ ebi yɛ mla naa lɛ aaabu gbekɛ lɛ tsui he?
◻ Te aaafee tɛŋŋ ni “ŋaalee ni hi” aaaye abuɔ fɔlɔ ni heɔ yeɔ ni saramɔ hegbɛi pɛ eyɔɔ lɛ?
◻ Mɛɛ nɔmimaa akɛha yɛ Lala 37:23, 24, ni mɛɛ gbɛ nɔ Yehowa tsɔɔ ni ehaa nɛkɛ shiwoo nɛɛ baa mli yɛ?
[Mfoniri ni yɔɔ baafa 30]
okɛ saramɔ hegbɛi ni oyɔɔ lɛ atsu nii ni okɛtɛo anɔkwalei lɛ yɛ obi lɛ tsui mli, ni obaanyɛ okɛ shwɛmɔi krokomɛi ni sa afata he
[Baafa 32]May Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)