David nɔ.
103 Hã majie Yehowa yi;
Nɔ fɛɛ nɔ ni yɔɔ mimli lɛ ajie egbɛ́i krɔŋkrɔŋ lɛ yi.
2 Hã majie Yehowa yi;
Ekaba kɔkɔɔkɔ akɛ mihiɛ baakpa nibii fɛɛ ni efee lɛ anɔ.+
3 Lɛ ekɛ otɔmɔi lɛ fɛɛ keɔ bo,+
Ni etsaa ohelai lɛ fɛɛ;+
4 Lɛ ehereɔ oyiwala kɛjeɔ bu lɛ mli+
Ni ekɛ suɔmɔ ni tsakeee kɛ mɔbɔnalɛ fiɔ bo akekere.+
5 Lɛ ehãa otɔɔ kɛ nibii kpakpai+ owala gbii abɔ fɛɛ,
Koni oblahiiaŋ gbii lɛ atsɔ ehee tamɔ okropɔŋ.+
6 Yehowa feɔ jalɛ nii,+ ni eyeɔ jalɛ sane
Ehãa mɛi fɛɛ ni awaa amɛ yi lɛ.+
7 Ehã Mose le egbɛi lɛ,+
Ehã Israelbii lɛ le enifeemɔi lɛ.+
8 Yehowa lɛ, mɔbɔnalɔ kɛ musuŋtsɔlɔ ji lɛ,+
Emli fuuu mra ni esuɔmɔ ni tsakeee lɛ fa babaoo.+
9 Etaooo wɔhe tɔmɔi daa,+
Ni ebɛɛɛ mɔ ewooo emli kɛyaaa naanɔ.+
10 Jeee wɔhe eshai lɛ anaa ekɛ wɔ yeɔ yɛ,+
Ni jeee wɔtɔmɔi lɛ ahe nyɔmɔ pɛpɛɛpɛ ewoɔ wɔ.+
11 Ejaakɛ bɔ ni ŋwɛi kɛ shikpɔŋ teŋ jekɛ lɛ,
Nakai esuɔmɔ ni tsakeee lɛ da yɛ mɛi ni sheɔ lɛ gbeyei lɛ anɔ.+
12 Bɔ ni hulushiteehe kɛ hulushinyɔɔhe teŋ jekɛ lɛ,
Nakai ehãa wɔ kɛ wɔtɔmɔi lɛ ateŋ jekɛɔ.+
13 Bɔ ni tsɛ naa ebii mɔbɔ lɛ,
Nakai Yehowa naa mɛi ni sheɔ lɛ gbeyei lɛ mɔbɔ.+
14 Ejaakɛ ele bɔ ni afee wɔ ahã jogbaŋŋ,+
Ekaiɔ akɛ sũ ji wɔ.+
15 Shi gbɔmɔ adesa lɛ, egbii lɛ tamɔ jwɛi;+
Egbaa floŋŋ tamɔ ŋa nɔ fɔfɔi.+
16 Shi kɛ́ kɔɔyɔɔ tswa pɛ, ebɛ dɔŋŋ,
Oookɛɛ no mli lɛ, ebɛ jɛmɛ.
17 Shi Yehowa suɔmɔ ni tsakeee lɛ hiɔ shi kɛyaa naanɔi anaanɔ
Kɛhã mɛi ni sheɔ lɛ gbeyei lɛ,+
Ni ejalɛ nifeemɔi lɛ hu yɛ kɛhã amɛbii lɛ abii,+
18 Kɛ mɛi ni yeɔ ekpaŋmɔ lɛ nɔ lɛ,+
Kɛ mɛi ni yeɔ efamɔi lɛ anɔ jogbaŋŋ lɛ.
19 Yehowa eto emaŋtsɛ sɛi lɛ ema shi shiŋŋ yɛ ŋwɛi;+
Ni emaŋtsɛyeli lɛ yeɔ nɔ fɛɛ nɔ nɔ.+
20 Nyɛjiea Yehowa yi, nyɛ ebɔfoi fɛɛ+ ni he wala,
Ni nyɛyeɔ ewiemɔ lɛ nɔ,+ ni nyɛboɔ egbee toi lɛ.
21 Nyɛjiea Yehowa yi, nyɛ esraafoi lɛ fɛɛ,+
Esɔɔlɔi ni feɔ esuɔmɔnaa nii lɛ.+
22 Nyɛjiea Yehowa yi, nyɛ enitsumɔi fɛɛ
Ni yɔɔ he fɛɛ he ni eyeɔ nɔ yɛ lɛ.
Migbɔmɔtso muu lɛ fɛɛ ajie Yehowa yi.