Yehowa, Nyɔŋmɔ ni ‘Ŋɔfaa Mra’

“Bo, [Yehowa, “NW”], ohi ni oŋɔfaa mra.”—LALA 86:5.

 1. Mɛɛ jatsu ni tsii Maŋtsɛ David tere, ni mɛɛ gbɛ nɔ etsɔ ená miishɛjemɔ kɛha etsui ni ehao lɛ?

MAŊTSƐ DAVID ni hi shi yɛ blema Israel lɛ le bɔ ni henilee ni buɔ mɔ fɔ lɛ baanyɛ afee jatsu ni tsii yɛ mɔ nɔ. Eŋma akɛ: “Minishaianii lɛ esu mi; amɛtamɔ jatsu tsiŋmoo ni tsii fe mi. Migbɔjɔ ni mikumɔ kwraa; mitsuiŋ hũumɔ hewɔ lɛ mijwa yaafo.” (Lala 38:5, 9) Shi kɛlɛ, David ná miishɛjemɔ kɛha etsui ni ehao lɛ. Ele akɛ eyɛ mli akɛ Yehowa nyɛɔ eshafeemɔ moŋ, shi enyɛɛɛ eshafeelɔ lɛ—kɛji nakai mɔ lɛ shwa ehe yɛ anɔkwale mli ni ekpoo eshafeemɔ gbɛ ni ekɔ lɛ. (Lala 32:5; 103:3) Akɛni eyɛ bɔ ni Yehowa sumɔɔ ni ekpã mɔbɔnalɛ mli eha mɛi ni shwaa amɛhe lɛ mli hemɔkɛyeli kɛmɔ shi hewɔ lɛ, David kɛɛ akɛ: “Bo, [Yehowa, NW], ohi ni oŋɔfaa mra.”—Lala 86:5.

2, 3. (a) Kɛ wɔfee esha lɛ, mɛɛ jatsu eeeha wɔtere, ni mɛni hewɔ ehe yɔɔ sɛɛnamɔ lɛ? (b) Mɛɛ oshara yɔɔ fɔyeli henumɔ ni ‘aaaye wɔnɔ kwraa’ lɛ mli? (d) Mɛɛ nɔmimaa Biblia lɛ haa wɔ yɛ bɔ ni Yehowa sumɔɔ ni ekɛ wɔhe ake wɔ lɛ he?

² Kɛ wɔfee esha lɛ, ekolɛ wɔ hu wɔtereɔ jatsu ni tsii, ni ji henilee ni nuɔ piŋmɔ he, ni jɛɔ mli baa lɛ. Afɔɔ nɛkɛ heshwamɔ henumɔ nɛɛ námɔ, ni ehe yɛ sɛɛnamɔ po. Ebaanyɛ etsirɛ wɔ ni wɔfee nibii pɔtɛɛ ni wɔkɛjaje wɔ tɔmɔi lɛ. Shi kɛlɛ, Kristofoi komɛi eha fɔyeli henumɔ eye amɛnɔ kwraa. Ekolɛ amɛtsui ni buɔ ehe fɔ lɛ baama nɔ mi akɛ Nyɔŋmɔ kɛ amɛhe ekeŋ amɛ kɛmɔŋ shi, ekɔɔɔ he eko bɔ ni amɛshwa amɛhe amɛha. “Kɛ osusu he akɛ ekolɛ Yehowa sumɔɔɔ bo dɔŋŋ lɛ, eji henumɔ ni haoɔ mɔ waa diɛŋtsɛ,” taakɛ nyɛmiyoo ko wie, beni esusu tɔmɔ ko ni etɔ̃ lɛ he lɛ. Beni eshwa ehe ni ekpɛlɛ asafoŋ onukpai lɛ aŋaawoo ni yeɔ buaa mɔ lɛ nɔ po sɛɛ lɛ, etee nɔ enu he akɛ ejeee mɔ ni sa Nyɔŋmɔ dɛŋ eshaifaa. Etsɔɔ mli akɛ: “Mihaaa gbi kome po aho ni mibiii Yehowa dɛŋ eshaifaa.” Kɛ fɔyeli ‘miisu wɔtsui’ lɛ, no lɛ Satan baabɔ mɔdɛŋ ni eha wɔnijiaŋ aje wui, ní wɔnu he akɛ wɔjeee mɛi ni esa akɛ wɔsɔmɔ Yehowa.—2 Korintobii 2:5-7, 11.

³ Shi jeee nakai kwraa ji bɔ ni Yehowa kwɛɔ saji ehãa! E-Wiemɔ lɛ maa nɔ mi kɛhaa wɔ akɛ, kɛ wɔjie anɔkwa heshwamɔ kpo kɛjɛ wɔtsui mli lɛ, Yehowa miisumɔ, hɛɛ, efee klalo po akɛ ekɛ wɔhe baake wɔ. (Abɛi 28:13) No hewɔ lɛ kɛ ónu he pɛŋ akɛ etamɔ nɔ ni onine nyɛŋ ashɛ Nyɔŋmɔ dɛŋ eshaifaa nɔ lɛ, no lɛ ekolɛ nɔ ni he hiaa ji nɔ hewɔ, kɛ bɔ ni ekɛ eshai faa lɛ he shishinumɔ kpakpa ni oooná.

Mɛni Hewɔ Yehowa ‘Ŋɔfaa Mra’ Lɛ?

 4. Mɛni Yehowa kaiɔ yɛ wɔsu kɛ baŋ he, ni enɛ saa bɔ ni ekɛ wɔ yeɔ haa lɛ he yɛ mɛɛ gbɛ nɔ?

⁴ Wɔkaneɔ akɛ: “Bɔ ni boka kɛ anai teŋ jɛkɛ lɛ, nakai ehaa wɔkɛ wɔ nɔtɔmɔi lɛ ateŋ jɛkɛɔ. Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe.” Mɛni hewɔ Yehowa sumɔɔ ni ejie mɔbɔnalɛ kpo lɛ? Kuku ni nyiɛ sɛɛ lɛ haa hetoo akɛ: “Ejaakɛ ele wɔsu kɛ wɔbaŋ, ekaiɔ akɛ sũ kɛkɛ ji wɔ.” (Lala 103:12-14) Lɛɛlɛŋ, Yehowa hiɛ kpaaa nɔ akɛ wɔji bɔɔnii ni akɛ sũ fee wɔ, ni wɔhe waaa, loo wɔyɛ gbɔjɔmɔi, yɛ emuu ni wɔyeee lɛ hewɔ. Wiemɔ ni awie akɛ ele “wɔsu kɛ wɔbaŋ” lɛ kaiɔ wɔ akɛ Biblia lɛ kɛ Yehowa toɔ gbɛshɔ̃lɔ he, ni ekɛ wɔ toɔ shɔ̃ɔ nii ni efeɔ lɛ he.a (Yeremia 18:2-6) Gbɛshɔ̃lɔ hiɛɔ nibii ni ekɛ sũ eshɔ̃ lɛ mli jogbaŋŋ, shi kɛlɛ yɛ ŋaa mli, ni ekaiɔ bɔ ni amɛsu ji lɛ be fɛɛ be. Nakai nɔŋŋ Yehowa hu, ni ji Gbɛshɔ̃lɔ Kpeteŋkpele lɛ, baa bɔ ni ekɛ wɔ yeɔ ehaa lɛ shi yɛ wɔgbɔjɔmɔ ni ji eshafeemɔ su lɛ naa.—Okɛto 2 Korintobii 4:7 he.

 5. Te Romabii awolo lɛ tsɔɔ hewalɛ ni mli wa ni esha yɔɔ yɛ wɔheloo ni egbee shi lɛ nɔ lɛ mli ehaa tɛŋŋ?

⁵ Yehowa nuɔ bɔ ni esha he wa ha lɛ shishi. Ŋmalɛi lɛ wieɔ esha he akɛ hewalɛ ni mli wa, ni hiɛ gbɔmɔ mli kpɛŋŋ kɛmiiye lɛ awui. Shi te bɔ ni esha ni hiɛ wɔmli lɛ mli wa ha tɛŋŋ? Bɔfo Paulo ni akɛ mumɔ tsirɛ lɛ lɛ kɛ wiemɔi ni mli kã shi faŋŋ tsɔɔ enɛ mli yɛ Romabii awolo lɛ mli akɛ: Wɔyɛ “esha shishi,” tamɔ bɔ ni asraafoi hiɔ amɛ tatsɛ shishi lɛ (Romabii 3:9); ‘eye’ adesai ‘anɔ’ tamɔ maŋtsɛ (Romabii 5:21); ‘ehiɔ shi,’ loo ‘eyɛ,’ wɔmli (Romabii 7:17, 20); ‘emla’ lɛ miitsu nii daa yɛ wɔmli, ni tsɔɔ akɛ eebɔ mɔdɛŋ ni ekudɔ gbɛ ni wɔnyiɛ nɔ lɛ. (Romabii 7:23, 25) Kwɛ ta ni mli wa ni esa akɛ wɔwu ni wɔkɛte shi wɔshi hewalɛ ni mli wa ni esha ená yɛ wɔheloo ni egbee shi lɛ nɔ lɛ!—Romabii 7:21, 24.

 6. Te Yehowa buɔ mɛi ni kɛ tsui ni ekumɔ taoɔ emɔbɔnalɛ lɛ ehaa tɛŋŋ?

⁶ No hewɔ lɛ, wɔ-Nyɔŋmɔ ni yɔɔ mɔbɔnalɛ lɛ le akɛ wɔnyɛŋ wɔfee toiboo ni yeɔ emuu, ni bɔ ni wɔtsuii baasumɔ ni wɔfee nakai wɔha lɛ kɔɔɔ he eko. (1 Maŋtsɛmɛi 8:46) Ejɛɔ suɔmɔ mli emaa nɔ mi ehaa wɔ akɛ kɛ wɔkɛ tsui ni ekumɔ tao emɔbɔnalɛ ni tamɔ tsɛ nɔ̃ lɛ sɛɛ gbɛ lɛ, ebaakpã eshaifaa mli eha wɔ. Lalatsɛ David kɛɛ: “Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpooŋ!” (Lala 51:19) Yehowa kpooŋ, loo eshwieŋ tsui ni ekumɔ ni fɔyeli henumɔ haa eyeɔ awerɛho lɛ kɔkɔɔkɔ. Kwɛ bɔ ni enɛ tsɔɔ bɔ ni Yehowa efee klalo akɛ ekɛ esha aaake lɛ mli fɛfɛo ehãa!

 7. Mɛni hewɔ wɔnyɛŋ wɔbu Nyɔŋmɔ mɔbɔnalɛ lɛ yakatswaa lɛ?

⁷ Shi, ani enɛ tsɔɔ akɛ esa akɛ wɔbu Nyɔŋmɔ mɔbɔnalɛ lɛ yakatswaa, ni wɔkɛ wɔ eshafeemɔ su lɛ afee naajiemɔ ni wɔkɛfee esha? Dabi kwraa! Yehowa jeee mɔ ni henumɔ folo kɛkɛ kudɔɔ lɛ. Emɔbɔnalɛ lɛ yɛ husui. Ekɛ mɛi ni kɛ tsuiwalɛ feɔ efɔŋ, ni amɛjeɔ gbɛ amɛfeɔ esha ni amɛshwaaa amɛhe lɛ ahe ekeŋ amɛ kɔkɔɔkɔ. (Hebribii 10:26-31) Yɛ gbɛ kroko nɔ lɛ, kɛ ena tsui ni “werɛ eho ehe ni tswiaa shi kɛ dɔlɛ” lɛ, ‘eŋɔfaa mra.’ (Abɛi 17:3) Nyɛhaa wɔsusua wiemɔi ni mli kã shi faŋŋ ni akɛtsu nii yɛ Biblia lɛ mli, ni akɛtsɔɔ bɔ ni ŋwɛi eshaifaa yeɔ emuu kɛmɔɔ shi lɛ ekomɛi ahe wɔkwɛa.

Te Yehowa kɛ Eshai Keɔ Kwraa Ehãa Tɛŋŋ?

 8. Mɛni Yehowa feɔ kɛ́ ekɛ wɔhe eshai lɛ ke wɔ, ni mɛɛ hewalɛ esa akɛ enɛ aná yɛ wɔnɔ?

⁸ Maŋtsɛ David ni shwa ehe lɛ kɛɛ akɛ: “Mijaje mihe esha mitsɔɔo, ni minɔsha lɛ mikɛteee. Mikɛɛ akɛ: Majaje minɔtɔmɔ matsɔɔ Yehowa! Ni bo lɛ okɛ mihe esha nɔsha lɛ fa mi.” (Lala 32:5; wɔma efã ko nɔ mi.) Wiemɔ ‘okɛfa mi’ lɛ ji Hebri wiemɔ ni shishitsɔɔmɔ diɛŋtsɛ ji “awo nɔ,” “ahiɛ mli, atere” lɛ shishinumɔ. Bɔ ni akɛtsu nii yɛ biɛ lɛ tsɔɔ ‘fɔyeli, nɔ sha, nɔtɔmɔ ni aaajie kɛya kwraa.’ No hewɔ lɛ Yehowa wó David eshai lɛ anɔ ni etere kɛtee kwraa, kɛ wɔɔwie he nakai. (Okɛto 3 Mose 16:20-22 he.) Ŋwanejee ko bɛ he akɛ enɛ ha fɔyeli henumɔi ni David tere lɛ ba shi kwraa. (Okɛto Lala 32:3 he.) Wɔ hu wɔbaanyɛ wɔná Nyɔŋmɔ ni kɛ mɛi ni taoɔ edɛŋ eshaifaa kɛtsɔ Yesu Kristo kpɔmɔ afɔleshaa lɛ mli hemɔkɛyeli ni amɛyɔɔ lɛ nɔ lɛ ahe eshai keɔ amɛ lɛ mli hekɛnɔfɔɔ kɛmɔ shi. (Mateo 20:28; okɛto Yesaia 53:12 he.) Ehe ehiaaa ni mɛi ni Yehowa wóɔ amɛhe eshai ni etereɔ kɛyaa lɛ aya nɔ atere jatsu ni ji fɔyeli henumɔi kɛha amɛ tsutsu eshai lɛ dɔŋŋ.

 9. Mɛni ji Yesu wiemɔi: “Okɛ wɔ nyɔji lɛ ake wɔ” lɛ shishinumɔ?

⁹ Yesu kɛ tsakpaa ni yɔɔ nifalɔi kɛ nyɔmɔtsɛmɛi ateŋ lɛ tsu nii ni ekɛfee bɔ ni Yehowa kɛ eshai faa lɛ he mfoniri. Akɛ nɔkwɛmɔnɔ lɛ, Yesu wo wɔ hewalɛ ni wɔsɔle akɛ: “Okɛ wɔnyɔji lɛ ake wɔ.” (Mateo 6:12) Yesu kɛ “eshai” to “nyɔji” ahe yɛ nɛkɛ gbɛ nɔ. (Luka 11:4) Kɛ wɔfee esha lɛ, wɔtsɔmɔɔ “nyɔmɔtsɛmɛi” kɛhaa Yehowa. Hela wiemɔ ni atsɔɔ shishi akɛ ‘okɛke’ lɛ shishinumɔ baanyɛ afee “ahã nyɔmɔ ahi shi, aŋmɛɛ he, kɛtsɔ bimɔ ni abiŋ nɔ.” Yɛ shishinumɔ ko naa lɛ, kɛ Yehowa kɛ eshai fa lɛ, efoɔ nyɔmɔ ni kulɛ akɛbaafata wɔ akɔntaabuu he lɛ mli. Enɛ hewɔ lɛ eshafeelɔi ni tsakeɔ amɛtsui lɛ baanyɛ aná miishɛjemɔ. Yehowa biŋ ni ewo nyɔmɔ ni efo mli lɛ dɔŋŋ kɔkɔɔkɔ!—Lala 32:1, 2; okɛto Mateo 18:23-35 he.

10, 11. (a) Mɛni he mfoniri wiemɔ kuku “agbe” ni anaa yɛ Bɔfoi lɛ Asaji 3:19 lɛ feɔ? (b) Te afee bɔ ni Yehowa kɛ eshai keɔ kwraa lɛ he mfoniri aha tɛŋŋ?

¹⁰ Biblia lɛ kɛ mfonirifeemɔŋ wiemɔ kroko ni mli kã shi faŋŋ tsu nii yɛ Bɔfoi lɛ Asaji 3:19, ni ekɛtsɔɔ bɔ ni Nyɔŋmɔ dɛŋ eshaifaa ji hã, akɛ: “No hewɔ lɛ nyɛtsakea nyɛtsuiiaŋ, ni nyɛkua nyɛsɛɛ, koni agbe nyɛhe eshai lɛ.” Wiemɔ kuku “agbe” lɛ ji Hela feemɔ-wiemɔ ko ni kɛ akɛmiitsu nii yɛ mfonirifeemɔ mli lɛ, eshishitsɔɔmɔ baanyɛ afee “atsumɔ, afite, afo mli loo akpata hiɛ.” Taakɛ woloŋlelɔi komɛi tsɔɔ lɛ, jwɛŋmɔ ni atsɔɔ lɛ miitsɔɔ ninenaa niŋmaa tsuumɔ. Te feɔ tɛŋŋ ni enɛ baa lɛ nakai hu? Nibii ni afutuɔ ni akɛfeɔ inki ni akɛfɔɔ nitsumɔ yɛ blema beaŋ lɛ ji lashinyanyera, ohɛ́, kɛ nu. Kɛ okɛ inki nɛɛ ŋma nii nɔŋŋ pɛ lɛ, obaanyɛ okɛ kotsa ni efɔ atsumɔ niŋmaa lɛ kwraa.

¹¹ Bɔ ni Yehowa kɛ eshai faa kwraa kɛmɔɔ shi lɛ mlitsɔɔmɔ ni mli kã shi faŋŋ diɛŋtsɛ nɛ. Kɛ ekɛ wɔhe eshai lɛ fa wɔ lɛ, etamɔ nɔ ni ekɛ kotsa etsumɔ kɛjɛ jɛmɛ kwraa. Ehe ehiaaa ni wɔshe gbeyei akɛ ekɛ wɔ baaye yɛ nakai eshai lɛ ahe wɔsɛɛ ko, ejaakɛ Biblia lɛ jieɔ nɔ kroko hu ni sa kadimɔ waa kpo yɛ Yehowa mɔbɔnalɛ lɛ he: Kɛ ekɛ eshai fa lɛ, ehiɛ kpaa nɔ!

“Amɛhe Eshai lɛ Mikaiŋ Dɔŋŋ”

12. Kɛ Biblia lɛ wie akɛ Yehowa hiɛ kpaa wɔhe eshai lɛ anɔ lɛ, ani no tsɔɔ akɛ enyɛɛɛ ekai eshai lɛ, ni mɛni hewɔ ohaa hetoo nakai?

¹² Yehowa tsɔ gbalɔ Yeremia nɔ ewo shi yɛ mɛi ni yɔɔ kpaŋmɔ hee lɛ mli lɛ ahe akɛ: “Maŋɔ amɛ nishaianii lɛ mafa, ni amɛhe eshai lɛ mikaiŋ dɔŋŋ!” (Yeremia 31:34) Ani enɛ tsɔɔ akɛ, kɛ́ Yehowa kɛ eshai fa lɛ, enyɛɛɛ ekai dɔŋŋ? Enyɛŋ eba lɛ nakai kɔkɔɔkɔ. Biblia lɛ gbaa wɔ aŋkroaŋkroi babaoo ni Yehowa kɛ amɛhe eshai fa amɛ, ní David fata he lɛ ahe saji. (2 Samuel 11:1-17; 12:1-13) Eka shi faŋŋ akɛ Yehowa kã he ele tɔmɔi ni amɛtɔ̃ lɛ lolo, ni nakai nɔŋŋ esa akɛ wɔ hu wɔle. Akɛ amɛhe eshai lɛ, kɛ amɛ tsuitsakemɔ kɛ bɔ ni Nyɔŋmɔ kɛ amɛhe eshai lɛ fa amɛ lɛ ahe saji ni aŋmala ashwie shi eto kɛha wɔ sɛɛnamɔ. (Romabii 15:4) Belɛ, kɛ Biblia lɛ kɛɛ akɛ Yehowa ‘kaiii’ mɛi ni ekɛ amɛhe efa amɛ lɛ ahe eshai lɛ, mɛni etsɔɔ lɛ mɔ?

13. (a) Mɛni fata Hebri feemɔ-wiemɔ ni atsɔɔ shishi akɛ ‘makai’ lɛ shishinumɔ he? (b) Kɛ Yehowa kɛɛ akɛ, “Amɛhe eshai lɛ mikaiŋ dɔŋŋ” lɛ, mɛni nɔ mi emaa kɛhaa wɔ?

¹³ Hebri feemɔ-wiemɔ ni atsɔɔ shishi akɛ ‘makai’ lɛ tsɔɔ babaoo fe nɔ ko ni eho ni akaiɔ kɛkɛ. Taakɛ Theological Wordbook of the Old Testament lɛ tsɔɔ lɛ, nɔ ni fata he hu ji “nɔ ni etsɔɔ kɛfata he, ni ji nɔ ni sa akɛ afee yɛ he lɛ feemɔ.” No hewɔ lɛ yɛ shishinumɔ nɛɛ naa lɛ, esha ni ‘aaakai’ lɛ kɔɔ nii ni aaafee ashi eshafeelɔi lɛ hu he. Beni gbalɔ Hoshea wie yɛ Israelbii ni ekɔ gbɛ fɔŋ lɛ ahe akɛ, “[Lɛ Yehowa] eeekai amɛ nishaianii lɛ,” gbalɔ lɛ miitsɔɔ akɛ Yehowa baafee amɛ nɔ ko yɛ tsuitsakemɔ ni amɛbɛ lɛ hewɔ. Enɛ hewɔ lɛ, nakai ŋmalɛ lɛ fã ni eshwɛ lɛ kɛfataa he akɛ: “Eeewo amɛhe eshai lɛ ahe nyɔmɔ!” (Hoshea 9:9) Yɛ gbɛ kroko nɔ lɛ, kɛ Yehowa kɛɛ akɛ, “Amɛhe eshai lɛ mikaiŋ dɔŋŋ” lɛ, eema nɔ mi eeha wɔ akɛ kɛ ekɛ eshafeelɔ ni eshwa ehe lɛ he ke lɛ lɛ, efeŋ nɔ ko yɛ he eshiŋ lɛ yɛ nakai eshai lɛ ahewɔ yɛ wɔsɛɛ be ko mli. (Ezekiel 18:21, 22) Enɛ hewɔ lɛ ehiɛ kpaa nɔ kɛ shishinumɔ akɛ ekaiii wɔhe eshai lɛ yɛ be kɛ bei amli bɔni afee ni ekɛfolɔ wɔnaa loo ni egbala wɔtoi yɛ he shii abɔ. Yehowa kɛ enɛ feɔ nɔkwɛmɔnɔ fɛfɛo ehaa wɔ koni wɔkase, yɛ bɔ ni wɔkɛ mɛi krokomɛi yeɔ haa lɛ mli. Kɛ naataamɔi te shi lɛ, nɔ ni hi fe fɛɛ ji ni okakai blema tɔmɔi ni okpɛlɛ nɔ be ko ni eho akɛ okɛke lɛ dɔŋŋ.

Shi Nibii ni Jɛɔ Mli Kɛbaa lɛ Hu?

14. Mɛni hewɔ eshaifaa etsɔɔɔ akɛ eshafeelɔ ni eshwa ehe lɛ yeɔ ehe kɛjɛɔ nibii fɛɛ ni jɛɔ egbɛ fɔŋ lɛ mli baa lɛ ahe lɛ?

¹⁴ Ani bɔ ni Yehowa ŋɔɔ eshai efaa mra lɛ tsɔɔ akɛ eshafeelɔ ni eshwa ehe lɛ baaye ehe kɛjɛ nibii fɛɛ ni jɛɔ egbɛ fɔŋ lɛ mli kɛbaa lɛ ahe? Dabi kwraa. Wɔnyɛŋ wɔfee esha ní wɔnaaa ehe toigbalamɔ. Paulo ŋma akɛ: “Nɔ pɛ ni gbɔmɔ duɔ lɛ, no nɔŋŋ ebaakpa hu.” (Galatabii 6:7) Ekolɛ wɔkɛ nibii ni jɛɔ wɔ nifeemɔ loo naagbai komɛi amli baa lɛ baakpe, shi yɛ be mli ni ekpã eshaifaa mli eha wɔ sɛɛ lɛ, Yehowa haaa amanehulu aba wɔnɔ. Kɛ naagbai te shi lɛ, esaaa akɛ Kristofonyo nuɔ he akɛ ‘Ekolɛ Yehowa miigbala mitoi yɛ tsutsu eshai komɛi ahewɔ.’ (Okɛto Yakobo 1:13 he.) Yɛ gbɛ kroko nɔ lɛ, Yehowa efooo wɔhe afabaŋ kɛjɛɛɛ nibii ni jɛɔ wɔ nifeemɔi ni ejaaa lɛ amli kɛbaa lɛ fɛɛ he. Gbalamlitsemɔ, hɔŋɔɔ ni ataooo, bɔlɛnamɔ mli helai, hekɛnɔfɔɔ loo bulɛ ni mɛi krokomɛi naaa kɛhaaa wɔ—enɛɛmɛi fɛɛ baanyɛ afee nibii ni yɔɔ dɔlɛ ni jɛɔ eshafeemɔ mli baa, ni Yehowa ebuŋ wɔhe kɛjɛŋ nibii nɛɛ ahe. Kaimɔ akɛ eyɛ mli akɛ Yehowa kɛ eshai ni David fee yɛ Batsheba kɛ Uria gbɛfaŋ lɛ ke lɛ moŋ, shi ebuuu David he kɛjɛɛɛ amanehului ni nyiɛ sɛɛ kɛba lɛ ahe.—2 Samuel 12:9-14.

15, 16. Te mla ni aŋma yɛ 3 Mose 6:1-7 lɛ he ba sɛɛnamɔ kɛha mɔ ni afee lɛ efɔŋ lɛ kɛ mɔ ni etɔ̃ lɛ fɛɛ eha tɛŋŋ?

¹⁵ Nibii krokomɛi hu baanyɛ ajɛ eshai ni wɔfeɔ lɛ amli kɛba. Akɛ nɔkwɛmɔnɔ lɛ, susumɔ sane ni yɔɔ 3 Mose yitso 6 lɛ he okwɛ. Shihilɛ ni Mose Mla lɛ wieɔ he yɛ biɛ lɛ miitsɔɔ esha ni hiɛdɔɔ yɔɔ mli, ni ji mɔ ko ni eshɔ̃ enaanyo Israelnyo ko nibii kɛtsɔ ojotswaa, amimyeli, loo shishiumɔ nɔ. No sɛɛ lɛ eshafeelɔ lɛ ekpɛlɛɛɛ nɔ akɛ eyeɔ fɔ, aahu po akɛ enáa ekãa ni ekɛkãa amale kita. Shihilɛ nɛɛ bafeɔ mɔ kome wiemɔ ni miite shi kɛmiiwo mɔ kroko. Shi, sɛɛ mli lɛ, mɔ ni etɔ̃ lɛ henilee haoɔ lɛ ni ejajeɔ esha ni efee lɛ etsɔɔ. Kɛji eeená Nyɔŋmɔ dɛŋ eshaifaa lɛ, esa akɛ efee nibii etɛ komɛi hu efata he: ekɛ nɔ ni ekɔ lɛ asaa ayahã ekoŋŋ, ni ewo mɔ ni eshɔ̃ enii lɛ nyɔmɔ ni ji oha mlijaa 20, ni ekɛ too gwantɛŋ nuu abahã akɛ sɔ̃ afɔle. No sɛɛ lɛ, mla lɛ kɛɔ akɛ: “Ni osɔfo lɛ akpata aha lɛ yɛ Yehowa hiɛ, ni aaaŋɔ nɔ fɛɛ nɔ ni efee ni ekɛye sɔ̃ lɛ afa lɛ.”—3 Mose 6:1-7; okɛto Mateo 5:23, 24 he.

¹⁶ Nɛkɛ mla nɛɛ ji Nyɔŋmɔ gbɛjianɔtoo ni mɔbɔnalɛ yɔɔ mli. Ehe baa sɛɛnamɔ kɛhaa mɔ ni afee lɛ efɔŋ ni akuɔ sɛɛ akɛ enii haa lɛ lɛ, ni ŋwanejee ko bɛ he akɛ enuɔ heyeli he waa kɛji naagbee lɛ mɔ ni etɔ̃ lɛ kpɛlɛɔ esha ni efee lɛ nɔ lɛ. Yɛ nakai beaŋ nɔŋŋ lɛ, mla lɛ he baa sɛɛnamɔ kɛhaa mɔ ni yɛ naagbee lɛ ehenilee tsirɛɔ lɛ ní ekpɛlɛɔ efɔyeli lɛ nɔ ni ejajeɔ etɔmɔ lɛ. Yɛ anɔkwale mli lɛ, eji ekpɛlɛɛɛ akɛ eeefee nakai kulɛ, enaŋ eshaifaa kɛjɛŋ Nyɔŋmɔ dɛŋ.

17. Kɛ eshai ni wɔfee lɛ eye mɛi krokomɛi awui lɛ, mɛni Yehowa kpaa gbɛ ni wɔfee?

¹⁷ Eyɛ mli akɛ wɔbɛ Mose Mla lɛ shishi moŋ, shi ehaa wɔnáa Yehowa jwɛŋmɔ, kɛ esusumɔ yɛ eshaifaa he lɛ he sɛɛyoomɔ ni jara wa diɛŋtsɛ. (Kolosebii 2:13, 14) Kɛji eshai ni wɔfee lɛ eye mɛi krokomɛi awui loo efee amɛ efɔŋ lɛ, Yehowa naa he miishɛɛ kɛji akɛ wɔfee nɔ ni wɔɔnyɛ koni ‘wɔkɛjaje tɔmɔ lɛ.’ (2 Korintobii 7:11, NW) Enɛ biɔ ni wɔjaje esha ni wɔfee lɛ, ni wɔkpɛlɛ wɔ fɔyeli lɛ nɔ, ni wɔkpa mɔ ni wɔfee lɛ efɔŋ lɛ fai po. No lɛ wɔbaanyɛ wɔdamɔ Yesu afɔleshaa lɛ nɔ wɔkpa Yehowa fai, koni wɔná heyeli ni ji henilee ni mli tse kɛ nɔmimaa akɛ Nyɔŋmɔ kɛ wɔhe eke wɔ.—Hebribii 10:21, 22.

18. Mɛɛ tsɔsemɔ ekolɛ eeefata Yehowa dɛŋ eshaifaa he?

¹⁸ Taakɛ fɔlɔ fɛɛ fɔlɔ ni yɔɔ suɔmɔ ji lɛ, ekolɛ wɔɔná Yehowa dɛŋ eshaifaa wɔfata tsɔsemɔ falɛ ko he. (Abɛi 3:11, 12) Ekolɛ ebaabi ni Kristofonyo ni eshwa ehe lɛ aŋmɛɛ hegbɛ ni ekɛsɔmɔɔ akɛ onukpa, asafoŋ sɔɔlɔ, loo gbɛgbalɔ lɛ he. Ekolɛ eeefee dɔlɛ kɛha lɛ akɛ hegbɛi ni jara wa waa kɛha lɛ nɛɛ aaaje edɛŋ yɛ be ko mli. Shi kɛlɛ, tsɔsemɔ ni tamɔ nɛkɛ etsɔɔɔ akɛ elaaje Yehowa hiɛ duromɔ, aloo akɛ Yehowa etsĩ eshaifaa ni eeena lɛ naa. Kɛfata he lɛ, esa akɛ wɔkai akɛ tsɔsemɔ ni Yehowa kɛhaa wɔ lɛ ji suɔmɔ ni eyɔɔ kɛha wɔ lɛ he odaseyeli. Enɔkpɛlɛmɔ kɛ ehe nitsumɔ hi kɛha wɔ waa, ni ebaanyɛ ekɛ wɔ aya naanɔ wala mli.—Hebribii 12:5-11.

19, 20. (a) Kɛji otɔ̃ tɔmɔi komɛi lɛ, mɛni hewɔ esaaa ni onuɔ he akɛ onyɛŋ oná Yehowa mɔbɔnalɛ lɛ? (b) Mɛni abaasusu he yɛ nikasemɔ ni nyiɛ sɛɛ lɛ mli?

¹⁹ Kwɛ bɔ ni ehaa wɔ hejɔɔmɔ akɛ wɔɔle akɛ wɔmiisɔmɔ Nyɔŋmɔ ni ‘ŋɔfaa mra’ lɛ! Yehowa naa nibii babaoo fe wɔ he eshai kɛ tɔmɔi lɛ kɛkɛ. (Lala 130:3, 4) Ele nɔ ni yɔɔ wɔtsuii amli. Kɛ onuɔ he akɛ otsui werɛ eho ehe kɛ dɔlɛ yɛ tsutsu tɔmɔi komɛi ahewɔ lɛ, kaamu sane naa akɛ onyɛŋ oná Yehowa mɔbɔnalɛ. Yɛ tɔmɔi ni otɔ̃ lɛ fɛɛ sɛɛ lɛ, kɛ oshwa ohe lɛɛlɛŋ, ni ofee nibii ni okɛjaje tɔmɔ lɛ, ni okɛ ekãa sɔle obi Yehowa dɛŋ eshaifaa kɛtsɔ Yesu lá ni efɔse eshwie shi lɛ nɔ lɛ, no lɛ obaanyɛ oná hekɛnɔfɔɔ kɛmɔ shi akɛ wiemɔi ni yɔɔ 1 Yohane 1:9 lɛ kɔɔ ohe, akɛ: “Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.”

²⁰ Biblia lɛ woɔ wɔ hewalɛ ni wɔkase Yehowa eshaifaa lɛ yɛ bɔ ni wɔkɛ wɔhe yeɔ haa lɛ mli. Shi kɛlɛ, nɛgbɛ abaanyɛ akpa gbɛ akɛ wɔkɛ sane aaake ni wɔhiɛ akpa nɔ kɛyashi kɛji mɛi krokomɛi fee wɔ esha? Abaasusu enɛ he yɛ nikasemɔ ni nyiɛ sɛɛ lɛ mli.

[Shishigbɛ niŋmai]

Te Obaaha Hetoo Tɛŋŋ?

◻ Mɛni hewɔ Yehowa ‘ŋɔfaa mra’ lɛ?

◻ Te Biblia lɛ tsɔɔ bɔ ni Yehowa kɛ eshai faa kɛmɔɔ shi lɛ mli ehaa tɛŋŋ?

◻ Kɛ Yehowa kɛ eshai fa lɛ, ehiɛ kpaa nɔ yɛ mɛɛ shishinumɔ naa?

◻ Mɛni Yehowa kpaa gbɛ ni wɔfee kɛji eshai ni wɔfee lɛ eye mɛi krokomɛi awui lɛ?

[Mfoniri ni yɔɔ baafa 12]

Kɛ eshai ni wɔfee lɛ eye mɛi krokomɛi awui lɛ, Yehowa kpaa gbɛ akɛ wɔɔfee nii kɛto najiaŋ