Bɔfoi Lɛ Anitsumɔi
10 Agbɛnɛ, nuu ko yɛ Kaisarea ni atsɛɔ lɛ Kornelio, eji asraafoiatsɛ* yɛ asraafoi akuu ko ni atsɛɔ lɛ Italia kuu* lɛ mli. 2 Nyɔŋmɔ jálɔ ji lɛ ni ekɛ eshĩabii lɛ fɛɛ sheɔ Nyɔŋmɔ gbeyei, ni efeɔ ohiafoi ejurɔ babaoo ni eyaa nɔ esɔleɔ kɛ hiɛdɔɔ kɛkpaa Nyɔŋmɔ fai. 3 Aaafee ŋmɛlɛtswaa ni ji nɛɛhu lɛ nɔ*+ lɛ, ena yɛ ninaa mli faŋŋ akɛ Nyɔŋmɔ bɔfo ko ba eŋɔɔ bakɛɛ lɛ akɛ: “Kornelio!” 4 Gbeyei mɔ Kornelio ni ekwɛ lɛ gãa, ni ebi akɛ: “Nuŋtsɔ, mɛni sane?” Ekɛɛ lɛ akɛ: “Osɔlemɔi kɛ ejurɔ ni ofeɔ ohiafoi lɛ ekwɔ kɛtee ŋwɛi akɛ kaimɔnɔ yɛ Nyɔŋmɔ hiɛ.+ 5 No hewɔ lɛ, agbɛnɛ tsu hii kɛya Yopa ni amɛyatsɛ Simon ni atsɛɔ lɛ Petro hu lɛ kɛba. 6 Nuu nɛɛ eyato nuu ko ni lɛ hu atsɛɔ lɛ Simon ni kɛ kooloo hewolo feɔ lɛda* lɛ ŋɔɔ akɛ gbɔ,* eshĩa yɛ ŋshɔ lɛ naa.” 7 Be ni ŋwɛibɔfo ni kɛ lɛ wie lɛ shi etee nɔŋŋ lɛ, etsɛ etsuji lɛ ateŋ mɛi enyɔ kɛ asraafonyo Nyɔŋmɔ jálɔ ko ni ji esɔɔlɔi lɛ ateŋ mɔ kome, 8 ni egba amɛ nɔ fɛɛ nɔ, ni etsu amɛ Yopa.
9 Enɔ jetsɛremɔ be ni amɛnyiɛ gbɛ lɛ nɔ ni amɛmiibɛŋkɛ maŋ lɛ, Petro kwɔ kɛtee tsũ lɛ yiteŋ aaafee ŋmɛlɛtswaa ni ji ekpaa lɛ nɔ* koni eyasɔle. 10 Shi hɔmɔ ye lɛ waa ni eetao nii eye. Be ni amɛfeɔ niyenii lɛ, ena ninaa ko,+ 11 ni ena akɛ ŋwɛi egbele ni ena nɔ ko miikpeleke shi tamɔ klala agbo ni ahiɛ ekoji ejwɛ lɛ amli aashiu kɛmiiba shikpɔŋ; 12 ni shikpɔŋ nɔ kooloi ni hiɛ naji ejwɛjwɛɛjwɛ kɛ kooloi ni wamɔɔ kɛ ŋwɛi loofɔji srɔtoi fɛɛ eko yɛ mli. 13 Kɛkɛ ni gbee ko kɛɛ lɛ akɛ: “Petro, tee shi, gbee ni oye!” 14 Shi Petro kɛɛ akɛ: “Dabida, Nuŋtsɔ, ejaakɛ miyeko nɔ ko ni abule ni he tseee dã.”+ 15 Ni gbee lɛ saa kɛɛ lɛ nɔ ni ji shii enyɔ nɔ akɛ: “Kpa nibii ni Nyɔŋmɔ efee amɛ krɔŋkrɔŋ lɛ tsɛmɔ akɛ nibii ni abule.” 16 Gbee lɛ kɛ lɛ wie nɔ ni ji shii etɛ nɔ, ni amrɔ lɛ awó nakai nii lɛ kɛtee ŋwɛi.
17 Be ni Petro hiɛ miifee lɛ yaa lolo yɛ nɔ ni nii ni ena lɛ tsɔɔ lɛ he lɛ, amrɔ lɛ, hii ni Kornelio tsu amɛ lɛ bi he ni Simon shĩa lɛ yɔɔ, ni amɛbadamɔ agbó lɛ naa.+ 18 Amɛtsɛ ni amɛbi kɛji Simon ni atsɛɔ lɛ Petro hu lɛ ebato gbɔ yɛ jɛmɛ. 19 Be ni Petro kã he ejwɛŋɔ ninaa lɛ nɔ lɛ, mumɔ+ lɛ kɛɛ lɛ akɛ: “Naa! Hii etɛ miitao bo. 20 No hewɔ lɛ, tee shi, kpelekemɔ shi ni okɛ amɛ aya, ni oyiŋ akafee bo kɔshikɔshi kwraa, ejaakɛ mi mitsu amɛ.” 21 Kɛkɛ ni Petro kpeleke shi kɛtee hii lɛ aŋɔɔ ni ekɛɛ: “Naa mi, miji mɔ ni nyɛtaoɔ lɛ. Mɛni hewɔ nyɛba biɛ?” 22 Amɛkɛɛ: “Kornelio,+ asraafoiatsɛ ko ni ji jalɔ kɛ Nyɔŋmɔ gbeyeishelɔ ni Yudafoi amaŋ muu lɛ fɛɛ wieɔ ehe ekpakpa lɛ, ŋwɛibɔfo krɔŋkrɔŋ ko kɛ Nyɔŋmɔ gbɛtsɔɔmɔi hã lɛ akɛ etsu ni abatsɛ bo kɛba eshĩa ni ebo nɔ ni oyɔɔ kɛɛmɔ lɛ toi.” 23 No hewɔ lɛ, ekpee amɛ kɛba mli, ni eto amɛ akɛ egbɔi.
Enɔ jetsɛremɔ lɛ, ete shi ni ekɛ amɛ tee, ni nyɛmimɛi hii ni yɔɔ Yopa lɛ ateŋ mɛi komɛi fata ehe kɛtee. 24 Enɔ jetsɛremɔ lɛ, eyashɛ Kaisarea. Anɔkwa, Kornelio miikpa amɛ gbɛ, no mli lɛ, etsɛ ewekumɛi kɛ enanemɛi ni bɛŋkɛ lɛ kpaakpa lɛ kɛkpe. 25 Be ni Petro bote mli lɛ, Kornelio kɛ lɛ bakpe, ni eho egbee shi yɛ enaji anaa ni ekɛ woo hã lɛ.* 26 Shi Petro wó enɔ ni ekɛɛ: “Tee shi, mi hu gbɔmɔ kɛkɛ ji mi.”+ 27 Be ni ekɛ lɛ hiɛ sanegbaa lɛ, ebote mli ni eyana mɛi babaoo ni ebabua amɛhe naa. 28 Ekɛɛ amɛ akɛ: “Nyɛ diɛŋtsɛ nyɛle jogbaŋŋ akɛ mla eŋmɛɛɛ gbɛ ni Yudanyo kɛ maŋ kroko nɔ nyo bɔɔ loo etsiɔ ebɛŋkɛɔ lɛ,+ shi Nyɔŋmɔ etsɔɔ mi akɛ mikatsɛ mɔ ko mɔ ni abule loo mɔ ni he tseee.+ 29 No hewɔ ni be ni atsu ni abatsɛ mi lɛ, mijieee naa ni miba nɛɛ. No hewɔ lɛ, miibi nyɛ nɔ hewɔ ni nyɛtsu ni abatsɛ mi lɛ.”
30 Kɛkɛ ni Kornelio kɛɛ: “Kɛ́ miibu kɛmiijɛ ŋmɛlɛtswaa nɛɛ nɔ lɛ, gbii ejwɛ nɛ ni miisɔle yɛ mishĩa lɛ yɛ ŋmɛlɛtswaa ni ji nɛɛhu lɛ nɔ;* ni amrɔ lɛ, nuu ko ni wo atade ni kpɛlɛɔ kaŋkaŋ badamɔ mihiɛ 31 ni ekɛɛ: ‘Kornelio, abo osɔlemɔ lɛ toi, ni ejurɔ ni ofeɔ ohiafoi lɛ hu akai yɛ Nyɔŋmɔ hiɛ. 32 No hewɔ lɛ, tsu kɛya Yopa ni ayatsɛ Simon ni atsɛɔ lɛ Petro hu lɛ kɛba. Nuu nɛɛ eyato gbɔ yɛ Simon, nuu ko ni kɛ kooloo hewolo feɔ lɛda* ni shĩa yɔɔ ŋshɔ lɛ naa lɛ shĩa lɛ.’+ 33 Kɛkɛ ni amrɔ nɔŋŋ lɛ mitsu ni abatsɛ bo, ni ofee jogbaŋŋ akɛ oba biɛ. No hewɔ lɛ, agbɛnɛ wɔ fɛɛ wɔbua wɔhe naa yɛ biɛ yɛ Nyɔŋmɔ hiɛ koni wɔbo nibii fɛɛ ni Yehowa* efã bo akɛ owie lɛ toi.”
34 Kɛkɛ ni Petro bɔi wiemɔ, ni ekɛɛ: “Agbɛnɛ minu shishi lɛɛlɛŋ akɛ Nyɔŋmɔ kwɛɛɛ mɛi ahiɛiaŋ,+ 35 shi moŋ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.+ 36 Etsu akɛ wiemɔ yahã Israelbii lɛ koni ajaje toiŋjɔlɛ ni baa kɛtsɔɔ Yesu Kristo nɔ lɛ he sane kpakpa+ lɛ atsɔɔ amɛ—mɔ nɛ ji mɛi fɛɛ a-Nuŋtsɔ lɛ.+ 37 Nyɛle sane ni awie he yɛ Yudea fɛɛ ni je shishi kɛjɛ Galilea+ yɛ baptisimɔ ni Yohane shiɛ lɛ sɛɛ lɛ: 38 ekɔɔ Yesu, mɔ ni jɛ Nazaret lɛ he, bɔ ni Nyɔŋmɔ kɛ mumɔ krɔŋkrɔŋ kɛ hewalɛ fɔ lɛ mu,+ ni eyakpa shikpɔŋ lɛ nɔ efee ekpakpa ni etsa mɛi fɛɛ ni Abonsam haoɔ amɛ lɛ,+ ejaakɛ Nyɔŋmɔ kɛ lɛ yɛ.+ 39 Ni wɔji nibii fɛɛ ni efee yɛ Yudafoi lɛ akrowai lɛ amli kɛ Yerusalem fɛɛ lɛ he odasefoi; shi amɛsɛŋ lɛ yɛ tso jaŋŋ nɔ kɛgbe lɛ. 40 Nyɔŋmɔ tee mɔ nɛ shi yɛ gbi ni ji etɛ lɛ nɔ,+ ni eŋmɛ lɛ gbɛ ni ejie ehe kpo etsɔɔ faŋŋ,* 41 jeee maŋbii lɛ fɛɛ ejie ehe kpo etsɔɔ lɛ, shi moŋ, ejie ehe kpo etsɔɔ odasefoi ni Nyɔŋmɔ tsɔ hiɛ ehala amɛ eto lɛ, ni ji wɔ, mɛi ni wɔkɛ lɛ ye nii ni wɔkɛ lɛ nu nii, be ni ete shi kɛjɛ gbohii ateŋ lɛ sɛɛ lɛ.+ 42 Agbɛnɛ hu, efã wɔ akɛ wɔshiɛ wɔtsɔɔ maŋbii lɛ ni wɔye odase fitsofitso+ akɛ mɔ nɛ ji mɔ ni Nyɔŋmɔ efã akɛ etsɔ hiɛkãalɔi kɛ gbohii akojolɔ lɛ.+ 43 Lɛ gbalɔi lɛ fɛɛ ye ehe odase+ akɛ, mɔ fɛɛ mɔ ni náa hemɔkɛyeli yɛ emli lɛ, abaatsɔ egbɛ́i lɛ nɔ akɛ ehe eshai ake lɛ.”+
44 Be ni Petro wieɔ saji nɛɛ ahe lolo lɛ, mumɔ krɔŋkrɔŋ lɛ ba mɛi fɛɛ ni boɔ wiemɔ lɛ toi lɛ anɔ.+ 45 Ni mɛi ni ehe eye* ni jɛ mɛi ni afolɔ amɛ ketia lɛ ateŋ ni kɛ Petro ba lɛ anaa kpɛ amɛhe, ejaakɛ afɔse mumɔ krɔŋkrɔŋ dromɔ nikeenii lɛ ashwie jeŋmajiaŋbii lɛ hu anɔ. 46 Ejaakɛ amɛnu akɛ amɛmiiwie maŋsɛɛ wiemɔi* ni amɛmiijaje Nyɔŋmɔ agbojee lɛ.+ Kɛkɛ ni Petro here nɔ ekɛɛ: 47 “Mɛi nɛɛ ená mumɔ krɔŋkrɔŋ tamɔ wɔ nɔŋŋ, no hewɔ lɛ, namɔ baanyɛ akɛɛ akɛ akɛ nu akabaptisi amɛ?”+ 48 Kɛkɛ ni efã akɛ abaptisi amɛ yɛ Yesu Kristo gbɛ́i mli.+ No sɛɛ lɛ, amɛkpa lɛ fai akɛ ekɛ amɛ ahi shi gbii komɛi.