Klɛŋklɛŋ Wolo Ni Akɛmaje Korintobii Lɛ

6 Kɛ́ nyɛteŋ mɔ ko kɛ nyɛmi kroko ná sane lɛ,+ te tɛŋŋ ni eshiɔ etsitsi ni ekɛyaa saneyelihe yɛ mɛi ni ejaaa ahiɛ, shi ekɛyaaa mɛi krɔŋkrɔŋi lɛ moŋ ahiɛ lɛ? 2 Aloo nyɛleee akɛ mɛi krɔŋkrɔŋi lɛ ji mɛi ni baakojo je lɛ?+ Ni kɛ́ nyɛ nyɛbaakojo je lɛ, ani nyɛjeee mɛi ni sa akɛ nyɛkojoɔ saji bibii? 3 Ani nyɛleee akɛ wɔbaakojo ŋwɛibɔfoi?+ No hewɔ lɛ, ani wɔnyɛŋ wɔkojo wala shihilɛ nɛɛ mli saji? 4 No hewɔ lɛ, kɛ́ nyɛyɛ wala shihilɛ nɛɛ mli saji komɛi ni esa akɛ aye lɛ,+ mɛni hewɔ nyɛhalaa mɛi ni asafo lɛ ebuuu amɛ lɛ akɛ kojolɔi? 5 Miiwie enɛ ni mikɛwo nyɛ hiɛgbele. Ani hiɛshikalɔ kome folo po bɛ nyɛteŋ ni baanyɛ enyɛmimɛi ateŋ ekojo? 6 Shi nyɛmi kɛ nyɛmi yaa saneyelihe, kɛyaa mɛi ni heee yeee lɛ po ahiɛ!

7 Anɔkwa, kɛ́ nyɛkɛ nyɛhe yeɔ saji yɛ saneyelihe lɛ, no lɛ, aye nyɛnɔ kunim momo. Mɛni hewɔ nyɛhãaa aye nyɛ sane fɔŋ moŋ?+ Mɛni hewɔ nyɛhãaa ashishiu nyɛ moŋ? 8 Shi moŋ nyɛfeɔ mɛi efɔŋ ni nyɛshishiuɔ amɛ, nyɛnyɛmimɛi lɛ po!

9 Aloo nyɛleee akɛ mɛi ni ejaaa lɛ anine shɛŋ Nyɔŋmɔ Maŋtsɛyeli lɛ nɔ?*+ Nyɛkahãa alakaa nyɛ. Ajwamaŋbɔlɔi,*+ loo amagajalɔi,+ loo gbalafitelɔi,+ loo hii ni hãa hii krokomɛi kɛ amɛ náa bɔlɛ,+ loo hii ni kɛ hii krokomɛi náa bɔlɛ,+ 10 loo julɔi, loo amimyelɔi,+ loo dãatɔlɔi,+ loo mɛi ajɛlɔi, loo ojotswalɔi* anine shɛŋ Nyɔŋmɔ Maŋtsɛyeli lɛ nɔ.+ 11 Ni nɛkɛ nyɛteŋ mɛi komɛi yɔɔ tsutsu. Shi aju nyɛhe ni nyɛhe etse;+ afee nyɛ krɔŋkrɔŋ;*+ abu nyɛ jalɔi+ yɛ Nuŋtsɔ Yesu Kristo gbɛ́i lɛ kɛ wɔ-Nyɔŋmɔ lɛ mumɔ lɛ mli.

12 Mla ŋmɛɔ mi gbɛ akɛ mifee nibii fɛɛ* moŋ, shi jeee nibii fɛɛ ahe yɔɔ sɛɛnamɔ.+ Mla ŋmɛɔ mi gbɛ akɛ mifee nibii fɛɛ moŋ, shi mihãŋ nɔ ko nɔ ko akudɔ mi.* 13 Niyenii yɛ kɛhã musu, ni musu hu yɛ kɛhã niyenii, shi Nyɔŋmɔ baahã enyɔ lɛ fɛɛ afee efolo.+ Gbɔmɔtso lɛ bɛ kɛhã ajwamaŋbɔɔ,* shi moŋ eyɛ kɛhã Nuŋtsɔ lɛ,+ ni Nuŋtsɔ lɛ hu yɛ kɛhã gbɔmɔtso lɛ. 14 Shi Nyɔŋmɔ tee Nuŋtsɔ lɛ shi,+ ni ebaatsɔ ehewalɛ+ lɛ nɔ etee wɔ hu shi kɛjɛ gbele mli.+

15 Ani nyɛleee akɛ nyɛgbɔmɔtsei lɛ ji Kristo henii?+ No hewɔ lɛ, ani esa akɛ maŋɔ Kristo henii lɛ kɛya ni mikɛyakpɛtɛ ashawo ko he? Dabida! 16 Ani nyɛleee akɛ mɔ ni kɛ ehe yakpɛtɛɔ ashawo ko he lɛ, ekɛ lɛ feɔ gbɔmɔtso kome? Ejaakɛ, Nyɔŋmɔ kɛɛ, “amɛyi enyɔ lɛ fɛɛ amɛbaatsɔ heloo kome.”+ 17 Shi mɔ fɛɛ mɔ ni kɛ ehe kpɛtɛɔ Nuŋtsɔ lɛ, ekɛ lɛ feɔ ekome yɛ mumɔ mli.+ 18 Nyɛjoa ajwamaŋbɔɔ* naa foi!+ Esha fɛɛ esha ni gbɔmɔ baafee lɛ, esaaa egbɔmɔtso lɛ he tɛ̃ɛ, shi mɔ fɛɛ mɔ ni yaa nɔ ebɔɔ ajwamaŋ lɛ, eefee esha eeshi lɛ diɛŋtsɛ egbɔmɔtso lɛ.+ 19 Ani nyɛleee akɛ nyɛgbɔmɔtso lɛ ji mumɔ krɔŋkrɔŋ ni yɔɔ nyɛmli, ni nyɛná kɛjɛ Nyɔŋmɔ ŋɔɔ+ lɛ sɔlemɔ shĩa?+ Agbɛnɛ hu, nyɛjeee nyɛ diɛŋtsɛ nyɛnɔ,+ 20 ejaakɛ ahé nyɛ kɛ jara ni wa.+ Bɔ fɛɛ bɔ ni fee lɛ, nyɛwoa Nyɔŋmɔ hiɛ nyam+ yɛ nyɛgbɔmɔtso lɛ mli.+