Bɔfoi Lɛ Anitsumɔi
9 Shi Saul, ni no mli lɛ ekã he eewo Nuŋtsɔ lɛ kaselɔi lɛ ahe gbeyei ni eetao egbe amɛ+ lɛ tee osɔfonukpa lɛ ŋɔɔ 2 ni eyabi lɛ koni ehã lɛ woji ni ekɛya kpeehei ni yɔɔ Damasko lɛ, koni eyafimɔ mɔ fɛɛ mɔ ni ebaana akɛ efata mɛi ni nyiɛ Gbɛ Lɛ*+ nɔ lɛ ahe, hii jio, yei jio, kɛba Yerusalem.
3 Agbɛnɛ, be ni enyiɛ gbɛ lɛ nɔ ni eebɛŋkɛ Damasko lɛ, trukaa lɛ la ko kpɛ kɛjɛ ŋwɛi kɛbɔle lɛ,+ 4 ni egbee shi, ni enu gbee ko miikɛɛ lɛ akɛ: “Saul, Saul, mɛni hewɔ owaa mi yi lɛ?” 5 Saul bi akɛ: “Bo namɔ, Nuŋtsɔ?” Ni ekɛɛ: “Miji Yesu,+ mɔ ni owaa lɛ yi lɛ.+ 6 Shi tee shi ni oya maŋ lɛ mli, ni abaakɛɛ bo nɔ ni esa akɛ ofee.” 7 Agbɛnɛ, hii ni kɛ lɛ nyiɛ lɛ anaa ekpɛ amɛhe aahu akɛ amɛnyɛɛɛ amɛwie, anɔkwa, amɛmiinu gbee ko gbɛɛmɔ, shi amɛnaaa mɔ ko mɔ ko.+ 8 Ni Saul te shi kɛjɛ shikpɔŋ, ni eyɛ mli akɛ ehiŋmɛii jwere nɔ moŋ, shi enaaa nii. No hewɔ lɛ, amɛmɔ enine mli ni amɛkɛ lɛ tee Damasko. 9 Ni enaaa nii,+ ni eyeee nii ni enuuu nɔ ko hu gbii etɛ.
10 No mli lɛ, kaselɔ ko yɛ Damasko ni atsɛɔ lɛ Anania,+ ni Nuŋtsɔ lɛ kɛɛ lɛ yɛ ninaa mli akɛ: “Anania!” Ni ekɛɛ: “Naa mi, Nuŋtsɔ.” 11 Nuŋtsɔ lɛ kɛɛ lɛ akɛ: “Tee shi, yaa gbɛjegbɛ ni atsɛɔ lɛ Trɔmɔɔ lɛ nɔ, ni oyabi nuu ko ni atsɛɔ lɛ Saul ni jɛ Tarso+ lɛ shi, yɛ Yuda shĩa lɛ. Ejaakɛ naa! eesɔle, 12 ni ena yɛ ninaa mli akɛ nuu ko ni atsɛɔ lɛ Anania ba eŋɔɔ ni ekɛ eniji baŋmɛlɛ enɔ koni ena nii ekoŋŋ.”+ 13 Shi Anania hã hetoo akɛ: “Nuŋtsɔ, minu nuu nɛɛ he sane yɛ mɛi babaoo anaa, akɛ efee omɛi krɔŋkrɔŋi ni yɔɔ Yerusalem lɛ efɔŋ babaoo. 14 Ni biɛ hu lɛ, ená hegbɛ kɛjɛ osɔfoi hiɛnaanɔbii lɛ adɛŋ akɛ ebamɔmɔ* mɛi fɛɛ ni boɔ tsɛɔ ogbɛ́i lɛ.”+ 15 Shi Nuŋtsɔ lɛ kɛɛ lɛ akɛ: “Yaa! ejaakɛ mɔ nɛ ji dɛŋdade ko ni ahala ahã mi+ koni ehiɛ migbɛ́i lɛ kɛya jeŋmaji+ lɛ kɛ maŋtsɛmɛi+ kɛ Israelbii lɛ ahiɛ. 16 Ejaakɛ mibatsɔɔ lɛ faŋŋ, amanehului abɔ ni esa akɛ ena yɛ migbɛ́i lɛ hewɔ.”+
17 No hewɔ lɛ, Anania tee ni eyabote shĩa lɛ mli, ni ekɛ eniji ŋmɛlɛ enɔ ni ekɛɛ: “Minyɛmi nuu Saul, Nuŋtsɔ Yesu, mɔ ni jie ehe kpo etsɔɔ bo yɛ gbɛ ni onyiɛ nɔ kɛbaa lɛ nɔ lɛ etsu mi kɛba koni ona nii ekoŋŋ ni oyi obɔ kɛ mumɔ krɔŋkrɔŋ.”+ 18 Ni amrɔ lɛ nibii komɛi ni tamɔ loo he totoi jɛ ehiŋmɛii amli shwie shi, ni ena nii ekoŋŋ. Ni ete shi ni abaptisi lɛ, 19 ni eye nii ni ená hewalɛ.
Ekɛ kaselɔi ni yɔɔ Damasko lɛ hi shi gbii komɛi,+ 20 ni amrɔ lɛ ebɔi Yesu he sane shiɛmɔ yɛ kpeehei lɛ akɛ, mɔ nɛ ji Nyɔŋmɔ Bi lɛ. 21 Shi mɛi fɛɛ ni nuɔ lɛ anaa kpɛɔ amɛhe ni amɛkɛɔ akɛ: “Ani jeee nuu nɛɛ ji mɔ ni wa mɛi ni yɔɔ Yerusalem ni boɔ tsɛɔ gbɛ́i nɛɛ ayi waa lɛ?+ Biɛ nɛɛ hu ni eba lɛ, ani jeee ba eba koni ebamɔmɔ amɛ ni ekɛ amɛ ayahã* osɔfoi hiɛnaanɔbii lɛ?”+ 22 Shi Saul tee nɔ ená hewalɛ babaoo ni ehã Yudafoi ni yɔɔ Damasko lɛ anaa kpɛ amɛhe ejaakɛ ekɛ odaseyelii ni mɔɔ shi tsɔɔ faŋŋ akɛ mɔ nɛ ji Kristo lɛ.+
23 Agbɛnɛ, gbii babaoo sɛɛ lɛ, Yudafoi lɛ kpaŋ eyinɔ akɛ amɛbaagbe lɛ.+ 24 Shi Saul ná ele ŋaa ni amɛtsɔ yɛ ehe lɛ. Amɛbuɔ agbói lɛ anaa hu daa jetsɛremɔ kɛ jenamɔ bɔ ni afee ni amɛgbe lɛ. 25 No hewɔ lɛ, be ni je na lɛ, ekaselɔi lɛ kɛ lɛ wo kɛntɛŋ mli ni amɛkɛ lɛ tsɔ fɔlɔ ko ni yɔɔ gbogbo lɛ mli lɛ mli kɛyayi shi.+
26 Be ni eyashɛ Yerusalem lɛ,+ ebɔ mɔdɛŋ koni eyafata kaselɔi lɛ ahe, shi amɛ fɛɛ amɛmiishe lɛ gbeyei ejaakɛ amɛheee amɛyeee akɛ kaselɔ ji lɛ. 27 No hewɔ lɛ, Barnaba+ baye ebua lɛ, ni enyiɛ ehiɛ kɛtee bɔfoi lɛ aŋɔɔ, ni ebɔ amɛ nɔ fɛɛ nɔ, bɔ ni Saul na Nuŋtsɔ lɛ yɛ gbɛ lɛ nɔ,+ ni ekɛ lɛ wie, kɛ bɔ ni Saul kɛ ekãa wie Yesu gbɛ́i lɛ he yɛ Damasko lɛ.+ 28 No hewɔ lɛ, etee nɔ ekɛ amɛ hi shi, ni ekɛ amɛ yaa ebaa yɛ Yerusalem, ni ekɛ ekãa wieɔ yɛ Nuŋtsɔ lɛ gbɛ́i mli. 29 Ekɛ Yudafoi ni wieɔ Greek lɛ wieɔ ni ekɛ amɛ taa naa, shi amɛka shii abɔ akɛ amɛbaagbe lɛ.+ 30 Be ni nyɛmimɛi lɛ ná le enɛ lɛ, amɛkɛ lɛ kpeleke shi kɛtee Kaisarea ni amɛwo lɛ gbɛ kɛtee Tarso.+
31 Anɔkwa, asafoi lɛ ná toiŋjɔlɛ yɛ Yudea kɛ Galilea kɛ Samaria+ fɛɛ agbɛnɛ, ni asafoi lɛ ahe wa yɛ hemɔkɛyeli lɛ mli; ni akɛni amɛtee nɔ amɛnyiɛ yɛ Yehowa* gbeyeishemɔ kɛ mumɔ krɔŋkrɔŋ lɛ miishɛjemɔ mli hewɔ lɛ,+ amɛtee nɔ amɛshwere.
32 Agbɛnɛ, be ni Petro kpaa kpokpaa lɛ nɔ fɛɛ lɛ, ekpeleke shi kɛtee mɛi krɔŋkrɔŋi ni yɔɔ Lida lɛ hu aŋɔɔ.+ 33 Jɛmɛ ena nuu ko ni atsɛɔ lɛ Ainea lɛ yɛ, ni ekaje kɛkã esaa nɔ afii kpaanyɔ sɔŋŋ, ejaakɛ ekumɔ. 34 Petro kɛɛ lɛ akɛ: “Ainea, Yesu Kristo miitsa bo.+ Tee shi ni osaa osaa lɛ nɔ.”+ Ni amrɔ lɛ ete shi. 35 Be ni mɛi fɛɛ ni yɔɔ Lida kɛ Sharon Ŋa lɛ nɔ lɛ na lɛ lɛ, amɛba Nuŋtsɔ lɛ ŋɔɔ.
36 Agbɛnɛ, kaselɔ ko yɛ Yopa ni atsɛɔ lɛ Tabita, ni eshishi yɛ Greek mli ji “Dorka.”* Eyi obɔ kɛ nitsumɔi kpakpai kɛ ejuji ni efeɔ ohiafoi lɛ. 37 Shi nakai gbii lɛ amli lɛ, hela bamɔ lɛ ni egbo. No hewɔ lɛ, amɛju ehe, ni amɛkɛ lɛ yaŋmɛ ŋwɛi asa ko nɔ. 38 Akɛni Lida bɛŋkɛ Yopa hewɔ lɛ, be ni kaselɔi lɛ nu akɛ Petro yɛ nakai maŋ lɛ mli lɛ, amɛtsu hii enyɔ kɛtee eŋɔɔ ni amɛyakpa lɛ fai akɛ: “Ofainɛ ba wɔŋɔɔ amrɔ nɔŋŋ.” 39 Ni Petro te shi ni ekɛ amɛ tee. Ni be ni eshɛ jɛmɛ lɛ, amɛkɛ lɛ kwɔ kɛtee ŋwɛi asa lɛ nɔ; ni okulafoi lɛ fɛɛ badamɔ ehiɛ ni amɛmiifó, ni amɛkɛ atadei kɛ atadei kakadaji* ni Dorka fee be ni ekɛ amɛ yɔɔ lɛ tsɔɔ lɛ. 40 Kɛkɛ ni Petro hã mɔ fɛɛ mɔ je kpo,+ ni ekula shi esɔle. Kɛkɛ ni etsɔ ehe ekwɛ gbonyo lɛ, ni ekɛɛ: “Tabita, tee shi!” Ni Tabita gbele ehiŋmɛii, ni be ni ehiŋmɛi gba Petro nɔ lɛ, eho eta shi.+ 41 Ni Petro mɔ enine mli ni ewó enɔ, ni etsɛ mɛi krɔŋkrɔŋi lɛ kɛ okulafoi lɛ, ni ekɛ lɛ damɔ amɛhiɛ ni ehiɛ kã.+ 42 Aná ale enɛ yɛ Yopa fɛɛ, ni mɛi babaoo he Nuŋtsɔ lɛ nɔ amɛye.+ 43 Ni etee nɔ ehi Yopa gbii saŋŋ yɛ nuu ko ni atsɛɔ lɛ Simon ni kɛ kooloo hewolo feɔ lɛda* lɛ ŋɔɔ.+