Yitso 7
Nɔ Ni Abaakpa Gbɛ Kɛjɛ Kojolɔi Adɛŋ Afii Akpe
1. Mɛni ji nɔ ni akɛha mɛi ni tara maŋtsɛsɛii anɔ ni Yohane na amɛ lɛ?
1 YƐ BE mli ni etsɔɔ hiɛ egbaa afii akpe be ni etsɛŋ ekɛ naakpɛɛ nibii ni ewa akɛ aaahe aye lɛ aaaba lɛ, bɔfo Yohane ni mumɔ yɔɔ enɔ lɛ ŋma akɛ: “Ni mina maŋtsɛsɛii ni amɛho amɛtara nɔ, ni aŋɔ kojomɔ aha amɛ.”—Kpoj. 20:4.
2. Mɛni hewɔ yɛ be babaoo mli lɛ “kojomɔ” he susumɔ ni atsɔɔ ta yɛ biɛ nɛɛ jieɔ gbɛkpamɔ kpakpa ni asusuɔ he lɛ kɛyaa lɛ?
2 “Maŋtsɛsɛii,” ni mɛi ni akɛ kojomɔ hewalɛ ha amɛ lɛ tara nɔ! Ani enɛ ji gbɛkpamɔ ni hiɛnɔkamɔ yɔɔ mli ni shɛjeɔ mɔ mii, aloo etsɔɔ nɔ ko ni gbɛkpamɔ kpakpa ko baŋ mli lɛ he okadi, fe ni kulɛ eeefee afii akpei lɛ amli. Afii Akpe ni baa lɛ he gbɛkpamɔ kpakpa? Te bɔfo Yohane diɛŋtsɛ susu nɛkɛ gbɛkpamɔ nɛɛ, he eha tɛɛŋ? Te esa akɛ wɔhu ŋmɛnɛ wɔsusu enɛ he wɔha tɛɛŋ? Ani kojomɔ gbɛjianɔtoo ni yɔɔ ŋmɛnɛ lɛ kɛ nɔ ni yɔɔ Kristendom teŋ po lɛ hako wɔ hiɛnɔkamɔ afee yaka? Wɔ be nɛɛ ji be ni fe be fɛɛ ni eho, ni wiemɔ ni yɔɔ Lala 82:5 lɛ eba mli anɔkwale akɛ gbalɛ yɛ gbɔmɛi ni yɔɔ kojomɔ hewalɛ ni tamɔ “nyɔŋmɔi” shi amɛyeee gbɛhe mli ni amɛyɔɔ lɛ anɔkwale lɛ gbɛfaŋ: “Amɛleee nii ni amɛbɛ jwɛŋmɔ hu; duŋ mli amɛnyiɛɔ kɛyaa kɛbaa, shikpɔŋ lɛ shishitooi lɛ fɛɛ miihoso.” Aloo, taakɛ Roma Katolek Biblia lɛ tsɔɔ nɛkɛ Biblia kuku nɛɛ shishi lɛ: “Amɛleee nɔ ko nɔ ko, ni amɛbɛ jwɛŋmɔ hu, amɛtsuɔ nii tamɔ shwilafoi, ni amɛjeɔ adesa weku lɛ nijiaŋ wui.”
3, 4. (a) Shi kɛlɛ, yɛ nɔ ni Yohane tsɔ hiɛ ena nɔŋŋ lɛ sɛɛ lɛ hewɔ lɛ, te esa akɛ wɔnu nakai maŋtsɛsɛii ni wɔɔna lɛ he wɔha tɛɛŋ? (b) Mɛni hewɔ eja gbɛ akɛ wɔɔkpa hejɔlɛ gbɛ wɔha adesai ni akojooo amɛ yɛ gbɛ kpakpa nɔ lɛ yɛ kɛjɛ nakai “maŋtsɛsɛi” lɛ anɔ?
3 Nɔ ni adesai taoɔ ŋmɛnɛ ji hejɔlɛ! Ni nɔ ni yɔɔ miishɛɛ ji akɛ, nɔ ni bɔfo Yohane na ni kɔɔ nakai kojomɔ “maŋtsɛsɛii” lɛ he lɛ ji nɔ ko ni baaha wɔhe ajɔ wɔ babaoo yɛ wɔjwɛŋmɔŋ, jeee nɔ ko ni baakanya jwɛŋmɔŋ naagbai. Nyɛhaa wɔkaia akɛ Yohane etsɔ hiɛ ena ta ni kã ŋwɛi maŋtsɛmɛi a-Maŋtsɛ lɛ kɛ “shikpɔŋ lɛ nɔ maŋtsɛmɛi” lɛ kɛ “amɛtai” lɛ kɛ jeŋ muu fɛɛ maŋkwramɔ gbɛjianɔtoo lɛ teŋ lɛ yɛ ninaa mli. Aye nakai maŋtsɛmɛi lɛ kɛ amɛ shikpɔŋ nɔ sɛɛfilɔi lɛ fɛɛ anɔ kunim ni akpata amɛhiɛ. Enɛ haa maŋtsɛsɛii loo hewalɛ sɛii ni maŋkwramɔŋ nɔyelɔi lɛ taraa nɔ amɛkɛkojoɔ lɛ bakamɔ shi efolo. Yɛ enɛ sɛɛ pɛ ni bɔfo Yohane na ni Nyɔŋmɔ bɔfo ko miikpeleke shi kɛmiiba shikpɔŋ nɔ gbɛ kɛ Satan Abonsam kɛ edaimonioi lɛ afii kɛ kɔsɔŋkɔsɔ kɛ agbɛnɛ bu kwɔŋkwɔŋ lɛ mli ni ashɛrɛ amɛ awo, kɛ ŋwɛi naasɔomɔnɔ̃ ni akɛsɔo amɛnaa koni amɛhi jɛmɛ akɛ gboklɛfoi afii akpe.—Kpoj. 19:11 kɛyashi 20:3.
4 Gbɛ ni atsɔ nɔ akpata nibii agbɛjianɔtoo ni Abonsam yeɔ nɔ nɛɛ hiɛ lɛ biɔ ni tsakemɔ aba kojomɔ ni ato yɛ adesai anɔ lɛ mli. Titri lɛ akɛni agbɛnɛ adesai anɔ ni ajɛɔ ŋwɛi ayeɔ lɛ ebaje maŋtsɛmɛi a-Maŋtsɛ kunimyelɔ lɛ ni atsɛɔ lɛ “Heyelilɔ kɛ Anɔkwafo; ni jalɛ naa ekojoɔ ni ewuɔ ta” yɛ lɛ dɛŋ lɛ. (Kpoj. 19:11-16) No hewɔ lɛ bɔni gbɛjianɔtoo kpakpa yɔɔ lɛ, kojomɔ sɛii heei ba shihilɛ mli. Jeee nɔ ko fe kojolɔi akuu kpakpa ji nɔ ni abaakpa gbɛ yɛ mɛi ni baatara nakai kojomɔ maŋtsɛsɛii heei ni atoɔ yɛ Nyɔŋmɔ hewalɛ ni yɔɔ ŋwɛi lɛ shishi lɛ adɛŋ. Hejɔlɛ yɛ kojomɔ mli ji nɔ ni agbɛnɛ abaanyɛ akpa gbɛ akɛ ebaaba aha adesai ni ayeee amɛ nɔ yɛ gbɛ kpakpa nɔ ni akojooo amɛ yɛ jalɛ naa lɛ.
5, 6. Namɛi baafee kojolɔi ni baatara nakai “maŋtsɛsɛii” lɛ anɔ taakɛ Yesu wiemɔi ni ekɛɛ ebɔfoi anɔkwafoi nyɔŋma kɛ ekome lɛ dani atsɔɔ esɛɛ gbɛ lɛ tsɔɔ lɛ?
5 Namɛi ji nɛkɛ kojolɔi heei ni baaye adesai anɔ nɛɛ? Yesu Kristo wiemɔi ni ekɛha nakai kojolɔi akuu Iɛ anajiaŋdamɔlɔ ko tsɔɔ mɛi ni baafee nakai ŋwɛi kojolɔi akuu lɛ mlibii.
6 Yɛ gbɛkɛ ni atsɔɔ esɛɛ gbɛ ni amɔ lɛ ni Yerusalem saneyelihe wulu lɛ kojo lɛ yɛ gbɛ ni ejaaa nɔ lɛ, no mli lɛ Yesu ekɛɛ ebɔfoi anɔkwafoi ni eshwɛ lɛ akɛ: “Nyɛji mɛi ni kɛmi ehi shi yɛ mikaai lɛ amli; ni mi hu miito maŋtsɛyeli mahanyɛ taakɛ bɔni mi-Tsɛ eto eha mi lɛ, koni nyɛye nii ni nyɛnu yɛ mikpɔlɔ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma kɛ enyɔ lɛ.” (Luka 22:28-30) Nakai bɔfoi anɔkwafoi lɛ ji 144,000 lɛ ni Yesu Kristo ŋɔɔ amɛ ewoɔ kpaŋmɔ kɛha ŋwɛi maŋtsɛyeli kɛ ekojomɔ maŋtsɛsɛii amli lɛ klɛŋklɛŋbii. (Mat. 19:27, 28) Mɔ ni baaye nɛkɛ hefatalɔi kojolɔi 144,000 nɛɛ anɔ ji Kojolɔ Nɔkwɛlɔ, Yesu Kristo.
7. Taakɛ Paulo wiemɔi yɛ Areopago Gwabɔɔhe ni yɔɔ Ateene Iɛ tsɔɔ lɛ mɛɛ gbɛ nɔ aaatsɔ akojo shikpɔŋ muu lɛ tɛɛ yɛ Nyɔŋmɔ be ni eto lɛ mli?
7 Biɛ nɛɛ ji heni bɔfo Paulo wiemɔi lɛ baa jwɛŋmɔ mli yɛ, yɛ be mli ni agbala lɛ kɛtee Areopago Saneyelihe ni yɔɔ Ateene lɛ aaafee afi 51 Ŋ.B. lɛ. Yɛ be mli ni etsɔɔ esane lɛ mli etsɔɔ nɛkɛ kojolɔi ni tamɔ mɛi ni “jaa wɔji pɛpɛɛpɛ” lɛ, Paulo gbe ewiemɔ lɛ naa akɛ: “No hewɔ lɛ, beni aleee lɛ, Nyɔŋmɔ eku ehiɛ efɔ nɔ, shi agbɛnɛ lɛ eewo gbɔmɛi fɛɛ ni yɔɔ he fɛɛ he lɛ kita akɛ amɛtsake amɛtsui, ejaakɛ eto gbi ko, nɔ̃ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa, akɛni ekɛ hemɔkɛyeli eto mɔ fɛɛ mɔ hiɛ, ejaakɛ etee lɛ shi kɛjɛ gbohii ateŋ lɛ.” (Bɔf. 17:22-31) No hewɔ lɛ jeŋ muu lɛ fɛɛ kojomɔ lɛ baaba yɛ “jalɛ naa,” ni mɔ titri ni Nyɔŋmɔ baatsɔ enɔ ekojo ji e-Bi, Yesu Kristo ni etee lɛ shi lɛ.
8, 9. (a) Mɛɛ gbɛ nɔ Kojolɔ ni ahala lɛ nɛɛ baanyɛ akojo adesai yɛ gbɛ ni adesa kojolɔ ko efeko nakai da lɛ nɔ? (b) Taakɛ Yesu wiemɔi ni yɔɔ Yohane 5:27-30 Iɛ tsɔɔ lɛ, mɛɛ gbɛ nɔ eeetsɔ ekwɛ ni akojo mɔ fɛɛ mɔ?
8 Yɛ be mli ni ekɛ mɔ ni ahala lɛ ni ekojo lɛ gbɛi tsɛɔ lɛ yɛ be mli ni bɔfo Paulo ŋmaa enaagbee wolo lɛ eyaha enaanyo sanekpakpa jajelɔ Timoteo Iɛ, ekɛɛ akɛ: “Miima nɔ mi miihao yɛ Nyɔŋmɔ kɛ Nuŋtsɔ Yesu Kristo ni baaba ebakojo hiɛkalɔi kɛ gbohii yɛ epuemɔ, kɛ emaŋtsɛyeli lɛ mli lɛ hiɛ akɛ.” (2 Tim. 4:1) Nɛkɛ Kojolɔ ni ajɛ ŋwɛi ahala lɛ nɛɛ baatsu kojomɔ nitsumɔ nɛɛ yɛ gbɛ ni adesa kojolɔ ko ni yɔɔ shikpɔŋ nɔ efeko nakai da, aloo eeenyɛ etsu nɔ ko ni tamɔ nakai lɛ nɔ; jeee adesai ni yɔɔ wala mli pɛ kɛkɛ ebaakojo amɛ. Ebaakojo adesai ni egboi lɛ hu. Adesa kojolɔ ko ni gbɔmɛi hala lɛ bɛ ni baanyɛ atsɛ gbohii lɛ kɛba koni ekojo amɛ. Shi nɛkɛ kojolɔ ni Nyɔŋmɔ hala lɛ nɛɛ baanyɛ afee nakai. Ni nɛkɛ adesai ni ji gbohii nɛɛ baana afii akpe kojomɔ nɛɛ eyɛ mli akɛ ebiɔ ni akɛ amɛ ajɛ gbohiiaje aba wala mli beni afee ni amɛna kojomɔ ni amɛ kɛ agbɛnɛ “hiɛkalɔi” lɛ fɛɛ yɔɔ hegbɛ akɛ amɛnaa kɛtsɔɔ Kristo afɔleshaa gbele lɛ nɔ lɛ. Kadimɔ Yesu wiemɔi nɛɛ:
9 “Ejaakɛ bɔni tsɛ lɛ teɔ gbohii ashi ni ehaa amɛ wala lɛ, nakai nɔŋŋ bi lɛ hu haa mɛi ni esumɔɔ lɛ wala. Ejaakɛ tsɛ lɛ tete ekojooo mɔ, shi moŋ etuu kojomɔ lɛ fɛɛ ewo bi lɛ dɛ; koni mɛi fɛɛ abu bi lɛ, tamɔ bɔni amɛbuɔ tsɛ lɛ. Mɔ ni ebuuu bi lɛ, ebuuu tsɛ lɛ ni tsu lɛ lɛ hu. Ni eha lɛ hegbɛ akɛ ekojo hu, ejaakɛ gbɔmɔ bi ji lɛ. Enɛ akafeenyɛ naakpɛɛ; ejaakɛ ŋmlɛtswaa lɛ miiba, nɔ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli. Midiɛŋtsɛ minyɛŋ miyiŋ mato mafee nɔ ko; bɔni minuɔ [kɛjɛɔ tsɛ lɛ ŋɔɔ] lɛ, nakai mikojoɔ, ni mikojomɔ lɛ jalɛ kojomɔ ni, ejaakɛ mitaooo nɔ ni midiɛŋtsɛ misumɔɔ, shi moŋ nɔ ni tsɛ lɛ ni tsu mi Iɛ sumɔɔ.”—Yoh. 5:21-23, 27-30.
10. (a) Kojolɔ Iɛ baakpɔ̃ gbohii lɛ kɛjɛ mɛni mli yɛ nakai kojomɔ lɛ hewɔ? (b) Mɛɛ nifeemɔ kɛ nakai kpɔmɔ lɛ baa, no hewɔ lɛ mɛɛ sanebimɔ teɔ shi yɛ yiŋtoo ni yɔɔ gbohiiashitee Iɛ sɛɛ lɛ he?
10 Bo lɛ susumɔ enɛ he! Nɛkɛ Kojolɔ nɛɛ, ni ale lɛ yɛ shikpɔŋ nɔ akɛ gbɔmɔ Bi lɛ baawo okojomɔ afii akpe lɛ hiɛ nyam kɛtsɔ jiemɔ ni eeejie mɛi fɛɛ ni egboi yɛ kaimɔ gbohii abui amli kɛba lɛ nɔ. Afii akpe Kojomɔ Gbi Iɛ baafee gbohiiashitee gbi aha mɛi fɛɛ ni yɔɔ kaimɔ bui amli lɛ, mɛi ni gbɔmɔ Bi lɛ gbo yɛ amɛhewɔ akɛ adesa afɔleshãa ni yeɔ emuu lɛ. Enɛ tsɔɔ adesai fɛɛ ni akpɔ amɛ ni hefatalɔi kojolɔi 144,000 lɛ ni naa gbɛfaŋnɔ yɛ “klɛŋklɛŋ shitee” lɛ ni ji ŋwɛi shitee lɛ fataaa he. (Kpoj. 20:4-6) Agbɛnɛ ani esa akɛ wɔsusu akɛ nɛkɛ nifeemɔ ni suɔmɔ yɔɔ mli ni ji gbohii lɛ ni afũ amɛ ni ajie amɛ kɛba wala mli yɛ shikpɔŋ nɔ Iɛ ji yiŋtoo ko ni akɛbaatsu nii yɛ gbɛ fɔŋ nɔ ni akɛye mɛi ni átee amɛ shi lɛ awui? Ani nɔ ni jɛɔ suɔmɔ nifeemɔ mli baa ji ni akɛye mɔ ni afee nii lɛ aha lɛ awui? Nɔ ni wɔtsɔɔ ji akɛ: Nɛkɛ gbohiiashitee nɛɛ efeŋ nɔ ni baaji mɛi ni abu amɛ akɛ jalɔi lɛ pɛ nɔ̃, shi moŋ kɛha mɛi ni atsɛɔ amɛ “mɛi ni ejaaa” kɛ akɛ amɛ miito amɛhe lɛ hu. “Gbohiiashitee baaba, ni jalɔi kɛ mɛi ni ejaaa fɛɛ baatee shi.” (Bɔf. 24:15) Wɔsheee gbeyei yɛ jalɔi lɛ agbɛfaŋ, shi mɛi ni ejaaa lɛ hu?
11. (a) Mɛɛ sanebimɔ teɔ shi yɛ nɔ hewɔ ni ateɔ “mɛi ni ejaa” Iɛ ashi Iɛ he? (b) Yɛ mɛɛ gbɛ nɔ efɔŋfeelɔ ni musuŋ tsɔ̃ lɛ ni gbo yɛ Yesu masɛi Iɛ sane Iɛ kɔɔ enɛ he?
11 Ani abaajie duromɔ kpo atsɔɔ “mɛi ni ejaaa” ni atee amɛ shi lɛ koni yɛ no sɛɛ lɛ amɛ kɛ kojolɔ ko ni yi wa ni yɔɔ keketee ni baati amɛ tsutsu nibii ni amɛfee ni ejaaa lɛ fɛɛ mli atsɔɔ amɛ ni amɛbo toi ni agbɛnɛ etsɔɔ amɛ akɛ enɛ hewɔ ni ekpataa amɛhiɛ kɛyaa naanɔ koni amɛkahi wala mli kwraa lɛ ayakpe? Mɛɛ sɛɛnamɔ gbohiiashitee lɛ baaji aha nɛkɛ “mɛi ni ejaaa” nɛɛ kɛji akɛ yiŋtoo lɛ pɛ ji enɛ yɛ amɛ gbɛfaŋ? Ani yiŋtoo hewɔ ni ateeɔ “efɔŋfeelɔ” Iɛ ni tsotsoro Yesu Kristo ni asɛŋ lɛ lɛ masɛi yɛ Kalvary ni ekɛɛ lɛ akɛ “Nuŋtsɔ, kaimɔ mi, beni oooba yɛ emaŋtsɛyeli lɛ mli lɛ!” nɛ? Nakai wiemɔi ni yɔɔ miibɔ ni ekɛɛ Yesu lɛ haaa efɔŋfeelɔ lɛ atsɔ hetselɔ, ani efee lɛ nakai? Miishɛjemɔ hetoo ni Yesu kɛha lɛ lɛ etsɔɔɔ akɛ abu efɔŋfeelɔ lɛ jalɔ aloo atsɔ ehemɔkɛyeli nɔ abu Iɛ bem, beni eshwɛ gbii nyɔŋmai ejwɛ kɛ enyɔ ni Yesu ni atee lɛ shi lɛ aaakwɔ kɛya ŋwɛi tsɛ lɛ hiɛ ni ekɛ efɔleshaa ákɛ adesa ni yeɔ emuu lɛ jara lɛ ayaha lɛ lɛ, aloo jeee nakai? (Luka 28:39-43) Nuu nɛɛ gbo akɛ efɔŋfeelɔ ni abu lɛ fɔ ni esa akɛ abu lɛ akɛ “mɛi ni ejaaa” lɛ ateŋ mɔ kome ni abaatee lɛ shi.
KOJOLƆI NI HI SHI DANI KRISTOFOI ABE LƐ SHƐ
12. Mɛni hewɔ ni “jalɔi” Iɛ kɛ “mɛi ni ejaaa” lɛ aaahia nɔ ni fe kpɔmɔ kɛmiijɛ kaimɔ gbohii abui amli kɛkɛ lɛ?
12 Mɛni ji nɔ ni gbohii lɛ ashitee baaji aha mɛi ni atsɛɔ amɛ “mɛi ni ejaaa” lɛ kɛ mɛi ni atsɛɔ amɛ “jalɔi” lɛ? Amɛfɛɛ amɛgboi yɛ esha kɛ nɔ ni jɛ mli ba ni ji gbele ni amɛna kɛjɛ Adam kɛ Hawa toigbolɔi lɛ adɛŋ lɛ hewɔ. No hewɔ lɛ amɛfɛɛ amɛgboi ni amɛ diɛŋtsɛ lɛ amɛbɛ jalɛ ko. (Rom. 5:12; 3:23) No hewɔ lɛ kɛ atee amɛ shi kɛba lɛ ákɛ mɛi ni tsakeko amɛsui lɛ, mɛi ni ji “jalɔi” lɛ po efeŋ mɛi ni amɛye emuu akɛ adesai, aloo mɛi ni amɛye amɛhe kɛjɛ emuu ni ayeee kɛ esha dɛŋ. Enɛ ji anɔkwale yɛ hii kɛ yei ni gbalɔi Elia kɛ Elisha kɛ Nuŋtsɔ Yesu Kristo kɛ ebɔfoi lɛ tee amɛ shi lɛ, mɛi ni akɛ amɛ ba wala mli yɛ shikpɔŋ nɔ lɛ ahe. (Heb. 11:35) Yɛ enɛ hewɔ lɛ, nɔ ni fe kpɔmɔ kɛmiijɛ kaimɔ gbohii abui amli kɛtsɔ shitee kɛmiijɛ gbohii ateŋ nɔ lɛ he baahia “jalɔi” lɛ kɛ “mɛi ni ejaaa” lɛ fɛɛ. Ehe baahia ni akpɔ “jalɔi” lɛ hu kɛjɛ esha kɛ emuu ni adesa yeee lɛ mli. No hewɔ lɛ, ŋwɛi Kojolɔ Yesu Kristo nyɛŋ abu amɛ akɛ mɛi ni leee esha, mɛi ni eye emuu, mɛi ni eye amɛhe kɛjɛ esha fɔbuu shishi amrɔ nɔŋŋ, ni eto eyiŋ yɛ gbi ni atee amɛ shi kɛjɛ gbohii ateŋ lɛ akɛ amɛsa naanɔ wala yɛ shikpɔŋ nɔ.
13. (a) Mɛni hewɔ Nyɔŋmɔ kɛ afii akpe haa Yesu Kristo akɛ efee adesai a-Kojolɔ Iɛ? (b) Mɛni ji nɔ ni “Kojolɔi” awalɔ lɛ tsɔɔ yɛ nɔ ni ebaakpa gbɛ yɛ Nyɔŋmɔ afii akpe Kojolɔ lɛ dɛŋ?
13 Kɛji akɛ kojolɔ lɛ nitsumɔ ji ni ejaje yiŋtooi yɛ gbi ni “jalɔi” kɛ “mɛi ni ejaaa” lɛ aaapue yɛ ehiɛ pɛ lɛ, belɛ mɛni hewɔ ni ahaa lɛ afii akpe ni ekɛtsu nii akɛ kojolɔ yɛ adesai ahe! Akɛ be kakadaŋŋ ni tamɔ nɛkɛ haa kɛha nitsumɔ shi jee ni akɛjaje kojomɔ yiŋtooi aloo fɔbuui. Mɛi ni Nyɔŋmɔ tee amɛ shi akɛ kojolɔi kɛba ewebii ni ehala amɛ yɛ be ni teɔ Kristofoi abe lɛ hiɛ yɛ Biblia mli lɛ fee babaoo fe aŋkroaŋkroi ateŋ saji loo bei ni amɛsaa aloo saji ni amɛkojoɔ kɛkɛ. Nakai “kojolɔi” ni jɛ Nyɔŋmɔ ŋɔɔ lɛ ji ewebii ni ehala amɛ lɛ yiwalaherelɔi. Wolo ko yɛ Biblia lɛ mli ni atsɛɔ lɛ akɛ “Kojolɔi” diɛŋtsɛ. Eji wolo ni nibii ni yɔɔ mli lɛ yɛ miishɛɛ waa! Jɛmɛ wɔkaneɔ hii ekaalɔi ni “shikpɔŋ muu lɛ fɛɛ nɔ kojolɔ” lɛ tee amɛ shi kɛha ewebii ni awaa amɛyi lɛ ayiwalaheremɔ lɛ anitsumɔi wuji. Yijiemɔ ahã kojomɔ gbi ni je shishi yɛ be mli ni Nyɔŋmɔ tee kojolɔ shi ni eye ewebii ni awaa amɛyi lɛ asane eha amɛ lɛ!
14. Mɛni ji nɔ ni wɔkaneɔ yɛ Kojolɔi Ehud kɛ Barak he?
14 Wɔkaneɔ Ehud ni je kojomɔ shishi ni ekometoo egbe Moabbii amaŋtsɛ Eglon ni eshwi tɔgbɔɔ lɛ yɛ gbɛ ni ekaaa nɔ yɛ lɛ diɛŋtsɛ etsu mli ni ejo foi etee eyabua Israelbii anaa ni enyiɛ amɛhiɛ kɛye Moabbii ni gbaa amɛnaa lɛ anɔ kunim lɛ. Wɔkaneɔ Barak ni tsɔɔ akɛ ehala lɛ koni ekojo emaŋ lɛ kɛtsɔ Kanaan maŋtsɛ Yabin asraafoi babaoo ni ha ashe etabilɔi lɛ agbeyei kɛtsɔ shwiilii ohai nɛɛhu kɛ amɛhe kakalai ni esheɔ amɛ gbeyei lɛ anɔ kunim ni eye lɛ nɔ.
15. Yɛ nakai gbɛ nɔ nɔŋŋ lɛ, mɛni hu wɔkaneɔ yɛ Gideon kɛ Yefta he?
15 Agbɛnɛ Gideon, nuu ni yɔɔ kpoo ni wooo ehe nɔ ni ekɛ hii ohai etɛ pɛ ni yɔɔ Nyɔŋmɔ mli hemɔkɛyeli ye Midianbii kɛ bokagbɛ bii ni ebaha Israel shikpɔŋ lɛ nɔ tamɔ baalabii lɛ anɔ kunim lɛ. Yɛ nyɔɔŋ teŋ, beni Gideon kɛ emɛi ohai etɛ lɛ bɔle henyɛlɔi ni kwɔɔ lɛ ŋsra lɛ, amɛkɛ ekomefeemɔ jwara amɛkpuji lɛ ni amɛhole amɛ kɔtii lɛ anɔ, amɛkpa amɛ tɛtrɛmantrɛ lɛ ni amɛbo akɛ “Yehowa kɛ Gideon klante nɛ,” lɛ. Kɛkɛ ni ŋsra lɛ ni amɛtsui efa lɛ jo foi ni amɛgbegbeɔ amɛhe, kɛkɛ ni Gideon kɛ emɛi ohai etɛ lɛ tiu mɛi ni je mli lɛ. Yɛ afii pii asɛɛ lɛ, sane kroko hu te shi yɛ Shiwoo Shikpɔŋ lɛ nɔ, Yehowa tee Yefta, nuu kobɔlɔ lɛ shi, koni ekɛ Amonbii henɔwolɔi lɛ ayakpe. Bɔni Yefta yɔɔ ekaa kɛha Yehowa gbɛ lɛ mli wa aahu akɛ eka kita akɛ lɛ diɛŋtsɛ ekɛ nɔ fɛɛ nɔ ni aaajɛ lɛ diɛŋtsɛ ewe abakpee lɛ yɛ be mli ni eye kunim ni eeba shia lɛ baashã afɔle aha Nyɔŋmɔ. Be mli ni eye kunim ni ekɛ nyamɔ miiba shia lɛ, ebiyoo koome lɛ kɛ lɛ bakpe, ni etsɔɔ akɛ etu ehe eha Nyɔŋmɔ lɛlɛŋ, no hewɔ lɛ ekɛ lɛ ha koni eyasɔmɔ Nyɔŋmɔ.
16, 17. (a) Samson sɔmɔ akɛ Israel kojolɔ yɛ mɛɛ gbɛ nɔ? (b) Mɛni ji nɔ ni mumɔ naa niŋmalɔ lɛ wieɔ yɛ kojolɔi ahe yɛ Hebribii 11:32-34?
16 Namɔ po nuko Samson, nuu ni agba efɔmɔ he sane atsɔɔ efɔlɔi ni ebafee nuu ni yɔɔ gbɔmɔtsoŋ hewalɛ fe fɛɛ ni ehi shikpɔŋ nɔ lɛ! Ekome ekpɔ Israelbii lɛ kɛjɛ amɛhenyɛlɔi Filistibii lɛ adɛŋ, shi yɛ egbele gbi nɔ lɛ, ákɛ Filistibii lɛ agboklɛfonyo ni amɛshwila lɛ lɛ, eha Dagon Sɔlemɔwe lɛ ni yɔɔ Gaza, Filistia lɛ kumɔ eshwie gbɔmɛi ni yeɔ gbijurɔ fe akpei etɛ nɔ, ni egbe Filistibii ni fa yɛ egbele gbi lɛ nɔ fe mɛi ni egbe yɛ ewala be mli.
17 Mɛi ni fata nɛkɛ kojolɔi kɛ hii ni ye kunim yɛ hemɔkɛyeli ni amɛyɔɔ yɛ Nyɔŋmɔ mli hewɔ nɛɛ ahe ji mɛi ni Kristofonyo mumɔ naa niŋmalɔ lɛ wieɔ amɛhe yɛ Hebribii 11:32-34 nɛɛ: “Ni mɛni makɛɛ dɔŋŋ? Ejaakɛ minaŋ mihe deka ni mikɛ aaagba Gideon kɛ Barak, Samson kɛ Yefta, David kɛ Samuel hu, kɛ gbalɔi lɛ ahe sane: Mɛi ni tsɔ hemɔkɛyeli nɔ amɛye maŋtsɛyelii anɔ kunim, amɛtsu jalɛ nii, amɛnine shɛ shiwooi anɔ, amɛtsimɔ jatai anaa, amɛgbe la hewalɛ, amɛje kalantei amli, amɛna hewalɛ kɛjɛ gbedemɔ mli, amɛhe wa yɛ ta mli, amɛwo mɛikpɔji ata lɛ foi.”
18, 19. (a) Ŋamɛi haomɔi ni ba Israelbii lɛ anɔ yɛ be mli ni amɛyahi shiwoo Shikpɔŋ lɛ nɔ lɛ jɛ? (b) Mɛni hewɔ ni ehe bahia akɛ etee kojolɔi sɔrɔtoi ashi aha amɛ lɛ?
18 Shi kɛlɛ Israelbii lɛ diɛŋtsɛ ji mɛi ni kɛ haomɔ ni jɛ amɛhenyɛlɔi adɛŋ lɛ ba amɛnɔ yɛ nakai kojolɔi lɛ agbii lɛ amli, ejaakɛ amɛshi Yehowa, Nyɔŋmɔ hiɛkalɔ lɛ jamɔ krɔŋŋ lɛ. Shi kɛji akɛ amɛku amɛsɛɛ kɛba eŋɔɔ yɛ anɔkwale tsuitsakemɔ kɛ jamɔ mli lɛ, E-naa amɛ mɔbɔ. Taakɛ nɔ ni aŋma yɛ Kojolɔi 2:16-19 lɛ kɛɔ lɛ:
19 “Kɛkɛ ni Yehowa teɔ kojolɔi ashi, ni amɛhereɔ amɛyiwala kɛjɛɔ amɛhaalɔi lɛ adɛŋ. Shi amɛkojolɔi lɛ hu amɛbooo amɛ toi, shi moŋ amɛyabɔɔ ajwamaŋ kɛnyiɛɔ nyɔŋmɔi krokomɛi asɛɛ, ni amɛjaa amɛ; etsɛɛɛ kɛkɛ lɛ amɛje gbɛ ni amɛtsɛmɛi lɛ nyiɛ nɔ ni amɛbo Yehowa kitai lɛ atoi lɛ nɔ; amɛ lɛ amɛbooo toi. Ni kɛji Yehowa tee kojolɔi ashi ha amɛ lɛ, no lɛ Yehowa fataa kojolɔ lɛ he, ni ehereɔ amɛyiwala kɛjɛɔ amɛhenyɛlɔi lɛ adɛŋ gbii abɔ fɛɛ ni kojolɔ lɛ yɔɔ lɛ; ejaakɛ amɛ ŋtsɔi ni amɛdɔmɔɔ yɛ amɛyiwalɔi kɛ amɛhaolɔi lɛ ahewɔ lɛ dɔɔ Yehowa. Shi ebaa mli akɛ kɛ kojolɔ lɛ gbo lɛ, amɛkuɔ amɛsɛɛ ekoŋŋ ni amɛyafiteɔ fe amɛtsɛmɛi lɛ, yɛ nyɔŋmɔi krokomɛi asɛɛ ni amɛyanyiɛɔ ni amɛsɔmɔɔ amɛ ni amɛjaa amɛ lɛ hewɔ; amɛfɔɔɔ amɛnifeemɔi lɛ kɛ amɛkuɛŋtimɔ gbɛ lɛ nɔ nyiɛmɔ.”