NIKASEMƆ 54
Namɔ Ji “Nyɔŋ Anɔkwafo Kɛ Hiɛshikalɔ Lɛ,” Ni Mɛni Etsuɔ?
Yesu ji Kristofoi asafo lɛ Yitso. (Efesobii 5:23) Ŋmɛnɛ lɛ, Yesu ji Maŋtsɛ yɛ ŋwɛi moŋ, shi etsɔɔ “nyɔŋ anɔkwafo kɛ hiɛshikalɔ” lɛ nɔ etsɔɔ ewebii ni yɔɔ shikpɔŋ lɛ nɔ lɛ gbɛ. (Kanemɔ Mateo 24:45.) Yesu diɛŋtsɛ ni kɛ nitsumɔ wo “nyɔŋ” lɛ dɛŋ, no hewɔ lɛ, nyɔŋ lɛ yɛ hegbɛi komɛi, shi loloolo lɛ, eji Kristo nyɔŋ ni esɔmɔɔ Kristo nyɛmimɛi lɛ. Namɔ ji nyɔŋ nɛɛ? Mɛɛ gbɛ nɔ nyɔŋ lɛ tsɔɔ ekwɛɔ wɔ?
1. Namɔ ji “nyɔŋ anɔkwafo kɛ hiɛshikalɔ lɛ”?
Kɛjɛ blema tɔ̃ɔ lɛ, Yehowa halaa nuu kome loo kuu fioo ko ni mli bii ji hii koni amɛtsɔɔ ewebii lɛ gbɛ. (Maleaki 2:7; Hebribii 1:1) Be ni Yesu gbo sɛɛ lɛ, bɔfoi lɛ kɛ onukpai lɛ ni yɔɔ Yerusalem lɛ nyiɛ Nyɔŋmɔ webii lɛ ahiɛ. (Bɔfoi 15:2) Ŋmɛnɛ hu lɛ, asafoŋ onukpai akuu fioo ko ni atsɛɔ amɛ Yehowa Odasefoi A-Gbɛtsɔɔmɔ Kuu lɛ nyiɛɔ Nyɔŋmɔ webii lɛ ahiɛ; amɛhãa amɛ mumɔŋ niyenii, ni amɛkwɛɔ shiɛmɔ nitsumɔ lɛ nɔ. Kuu nɛɛ ji “nyɔŋ anɔkwafo kɛ hiɛshikalɔ lɛ” ni Yesu ehala koni amɛtsu nitsumɔi nɛɛ. (Mateo 24:45a) Gbɛtsɔɔmɔ Kuu lɛ mli bii lɛ fɛɛ ji Kristofoi ni akɛ mumɔ efɔ amɛ mu, ni amɛyɛ hiɛnɔkamɔ akɛ kɛ́ amɛgboi lɛ amɛbaayafata Kristo he yɛ ŋwɛi, yɛ e-Maŋtsɛyeli lɛ mli kɛye nɔ.
2. Mɛɛ mumɔŋ niyenii nyɔŋ anɔkwafo lɛ hãa Nyɔŋmɔ webii lɛ?
Yesu kɛɛ nyɔŋ anɔkwafo nɛɛ baahã ‘enyɛmimɛi Kristofoi lɛ niyenii yɛ be ni sa mli.’ (Mateo 24:45b) Bɔ ni niyenii hãa wɔnáa gbɔmɔtsoŋ hewalɛ lɛ, nakai nɔŋŋ mumɔŋ niyenii, ni ji tsɔɔmɔi ni jɛ Nyɔŋmɔ Wiemɔ lɛ mli lɛ, hãa wɔnáa hewalɛ ni he baahia wɔ koni wɔya nɔ wɔye Yehowa anɔkwa, ni wɔtsu nitsumɔ ni Yesu kɛwo wɔdɛŋ lɛ. (1 Timoteo 4:6) Wɔnáa mumɔŋ niyenii nɛɛ yɛ asafoŋ kpeei, kpokpaa nɔ kpeei, kɛ kpokpaa wulu nɔ kpeei ashishi, kɛ agbɛnɛ hu, yɛ woji kɛ vidioi amli. Nibii nɛɛ waa wɔ ni wɔle nɔ ni Nyɔŋmɔ sumɔɔ, ni ewaa wɔ koni naanyobɔɔ ni yɔɔ wɔ kɛ lɛ teŋ lɛ hu mli awa.
KASEMƆ PII OFATA HE
Obaana nɔ hewɔ ni ehi akɛ wɔyɛ “nyɔŋ anɔkwafo kɛ hiɛshikalɔ lɛ,” ni ji Gbɛtsɔɔmɔ Kuu lɛ.
Gbɛtsɔɔmɔ Kuu lɛ hãa Yehowa Odasefoi ni yɔɔ jeŋ fɛɛ lɛ mumɔŋ niyenii, amɛtsɔɔ amɛ gbɛ, ni amɛwaa amɛ hu
3. Esa akɛ ato Yehowa webii lɛ ahe gbɛjianɔ
Yesu tsɔɔ Gbɛtsɔɔmɔ Kuu lɛ gbɛ, ni amɛtoɔ nitsumɔ ni Yehowa Odasefoi tsuɔ lɛ he gbɛjianɔ. Yesu tsɔ gbɛjianɔ ni tamɔ nakai nɔŋŋ nɔ etsɔɔ blema Kristofoi lɛ gbɛ. Jiemɔ VIDIO lɛ.
Nyɛkanea 1 Korintobii 14:33, 40 lɛ, ni nyɛsusua sanebimɔ nɛɛ he:
Mɛɛ gbɛ nɔ ŋmalɛi nɛɛ hãa wɔnaa akɛ Yehowa miisumɔ ni ato e-Dasefoi lɛ ahe gbɛjianɔ?
4. Nyɔŋ anɔkwafo lɛ toɔ wɔshiɛmɔ nitsumɔ lɛ he gbɛjianɔ
Shiɛmɔ nitsumɔ lɛ ji nitsumɔ ni he hiaa fe fɛɛ ni blema Kristofoi lɛ tsu. Nyɛkanea Bɔfoi 8:14, 25 lɛ, ni nyɛsusua sanebimɔi nɛɛ ahe:
Namɛi to blema Kristofoi lɛ ashiɛmɔ nitsumɔ lɛ he gbɛjianɔ?
Mɛni Petro kɛ Yohane fee yɛ gbɛtsɔɔmɔ ni amɛnanemɛi bɔfoi lɛ kɛhã amɛ lɛ he?
Shiɛmɔ nitsumɔ lɛ ji nitsumɔ ni he hiaa fe fɛɛ ni Gbɛtsɔɔmɔ Kuu lɛ toɔ he gbɛjianɔ. Jiemɔ VIDIO lɛ.
Yesu hã ana akɛ, shiɛmɔ nitsumɔ lɛ he hiaa waa. Nyɛkanea Marko 13:10 lɛ, ni nyɛsusua sanebimɔi nɛɛ ahe:
Mɛni hewɔ Gbɛtsɔɔmɔ Kuu lɛ buɔ shiɛmɔ nitsumɔ lɛ akɛ ehe hiaa waa lɛ?
Mɛni hewɔ ehi waa akɛ wɔyɛ “nyɔŋ anɔkwafo kɛ hiɛshikalɔ lɛ” ni toɔ nitsumɔ nɛɛ ni atsuɔ yɛ jeŋ fɛɛ lɛ he gbɛjianɔ lɛ?
5. Nyɔŋ anɔkwafo lɛ kɛ gbɛtsɔɔmɔ hãa Nyɔŋmɔ webii lɛ
Gbɛtsɔɔmɔ Kuu lɛ kɛ gbɛtsɔɔmɔ hãa Kristofoi ni yɔɔ jeŋ fɛɛ lɛ. Te amɛfeɔ tɛŋŋ amɛnaa gbɛtsɔɔmɔ ni esa akɛ amɛkɛhã? Hã wɔkwɛ bɔ ni blema Kristofoi lɛ agbɛtsɔɔmɔ kuu lɛ fee enɛ. Nyɛkanea Bɔfoi 15:1, 2 lɛ, ni nyɛsusua sanebimɔi nɛɛ ahe:
Mɛɛ sane ko blema Kristofoi lɛ ateŋ mɛi komɛi kɛ amɛhe eyakpãaa gbee yɛ he?
Namɛi aŋɔɔ Paulo, Barnaba, kɛ mɛi krokomɛi lɛ tee koni ayatao sane lɛ naa?
Nyɛkanea Bɔfoi 15:12-18, 23-29 lɛ, ni nyɛsusua sanebimɔ nɛɛ he:
Mɛni blema gbɛtsɔɔmɔ kuu lɛ fee kɛtao Nyɔŋmɔ susumɔ yɛ sane lɛ he, dani amɛkpɛ yiŋ lɛ?—Kwɛmɔ kuku 12, 15, kɛ 28 lɛ.
Nyɛkanea Bɔfoi 15:30, 31 kɛ 16:4, 5 lɛ, ni nyɛsusua sanebimɔi nɛɛ ahe:
Mɛni blema Kristofoi lɛ fee yɛ gbɛtsɔɔmɔ ni gbɛtsɔɔmɔ kuu lɛ kɛhã lɛ he?
Mɛni tsɔɔ akɛ Yehowa jɔɔ amɛtoiboo lɛ nɔ?
Nyɛkanea 2 Timoteo 3:16 kɛ Yakobo 1:5 lɛ, ni nyɛsusua sanebimɔ nɛɛ he:
Ŋmɛnɛ lɛ, kɛ́ Gbɛtsɔɔmɔ Kuu lɛ yaakpɛ yiŋ ko lɛ, nɛgbɛ amɛtaoɔ yelikɛbuamɔ yɛ?
MƐI KOMƐI KƐƆ AKƐ: “Kɛ́ obo Gbɛtsɔɔmɔ Kuu lɛ toi lɛ, gbɔmɛi asɛɛ onyiɛɔ lɛ, jeee Nyɔŋmɔ.”
Mɛni hãa oheɔ oyeɔ waa akɛ, Yesu ji mɔ ni tsɔɔ Gbɛtsɔɔmɔ Kuu lɛ gbɛ?
EMLI OTI
Gbɛtsɔɔmɔ Kuu lɛ ji “nyɔŋ anɔkwafo kɛ hiɛshikalɔ lɛ” ni Kristo ehala lɛ. Ekɛ gbɛtsɔɔmɔ kɛ mumɔŋ niyenii hãa Kristofoi ni yɔɔ jeŋ fɛɛ lɛ.
Mɛni Okase?
Namɔ hala “nyɔŋ anɔkwafo kɛ hiɛshikalɔ lɛ”?
Mɛɛ gbɛ nɔ Gbɛtsɔɔmɔ Kuu lɛ tsɔɔ ekwɛɔ wɔnɔ?
Ani oheɔ oyeɔ akɛ Gbɛtsɔɔmɔ Kuu lɛ ji “nyɔŋ anɔkwafo kɛ hiɛshikalɔ lɛ”?
EHE SAJI KROKOMƐI
Obaana gbɛ ni Gbɛtsɔɔmɔ Kuu lɛ tsɔɔ nɔ etsuɔ enitsumɔ lɛ.
“Namɛi Ji Yehowa Odasefoi Agbɛtsɔɔmɔ Kuu Lɛ?” (jw.org lɛ nɔ sane)
Obaana bɔ ni Gbɛtsɔɔmɔ Kuu lɛ kwɛɔ koni woji kɛ vidioi ni afeɔ lɛ amli saji lɛ afee nɔ ni ja.
Te Gbɛtsɔɔmɔ Kuu lɛ mli bii lɛ naa nitsumɔ ni Yesu kɛwo amɛdɛŋ lɛ amɛhãa tɛŋŋ?
Mɛɛ gbɛ nɔ wɔsafoŋ kpeei lɛ kɛ kpeei wuji lɛ hãa wɔnaa akɛ, Yehowa miitsɔɔ Gbɛtsɔɔmɔ Kuu lɛ gbɛ?