Wolo Ni Ji Enyɔ Ni Akɛmaje Tesalonikabii Lɛ
3 Naagbee lɛ, nyɛmimɛi, nyɛyaa nɔ nyɛsɔlea nyɛhãa wɔ,+ koni Yehowa* wiemɔ lɛ aya nɔ agbɛ ashwã oyayaayai+ ni awo hiɛ nyam, tamɔ bɔ ni eji yɛ nyɛgbɛfaŋ lɛ, 2 koni ajie wɔ kɛjɛ gbɔmɛi gbohii kɛ mɛi fɔji adɛŋ,+ ejaakɛ jeee mɛi fɛɛ yɔɔ hemɔkɛyeli.+ 3 Shi anɔkwafo ji Nuŋtsɔ lɛ, ni ebaawaje nyɛ, ni ebaabu nyɛhe kɛjɛ mɔ fɔŋ lɛ dɛŋ. 4 Agbɛnɛ hu, wɔyɛ nɔmimaa yɛ Nuŋtsɔ lɛ mli yɛ nyɛgbɛfaŋ akɛ nyɛmiitsu wɔgbɛtsɔɔmɔi lɛ ahe nii, ni nyɛbaaya nɔ nyɛtsu he nii. 5 Nuŋtsɔ lɛ aya nɔ atsɔɔ nyɛtsuii agbɛ jogbaŋŋ kɛya suɔmɔ kɛhã Nyɔŋmɔ+ kɛ shifimɔ+ yɛ Kristo lɛ hewɔ lɛ mli.
6 Agbɛnɛ, nyɛmimɛi, wɔkɛ gbɛtsɔɔmɔi miihã nyɛ yɛ wɔ-Nuŋtsɔ Yesu Kristo gbɛ́i mli, akɛ nyɛtsia nyɛhe kɛjea nyɛmi fɛɛ nyɛmi ni enyiɛɛɛ yɛ gbɛjianɔtoo naa,+ ni agbɛnɛ hu enyiɛɛɛ yɛ kusum* ni nyɛná* kɛjɛ wɔdɛŋ lɛ naa lɛ he.+ 7 Ejaakɛ nyɛ diɛŋtsɛ nyɛle bɔ ni esa akɛ nyɛkaseɔ wɔ,+ ejaakɛ wɔba wɔjeŋ yɛ gbɛjianɔtoo naa yɛ nyɛteŋ, 8 ni wɔyeee mɔ ko niyenii efolo.*+ Shi moŋ, wɔtsu nitsumɔ ni wa ni wɔgbo deŋme jenamɔ kɛ jetsɛremɔ koni wɔkɛ jatsu ni jara wa ko akafɔ̃ nyɛteŋ mɔ ko nɔ.+ 9 Jeee akɛ wɔbɛ nakai hegbɛ,+ shi moŋ wɔmiisumɔ akɛ wɔkɛ wɔhe ahã akɛ nɔkwɛmɔnɔ ni nyɛkase wɔ.+ 10 Anɔkwa, be ni wɔkɛ nyɛ yɔɔ lɛ, wɔkɛ famɔ nɛɛ hãa nyɛ akɛ: “Kɛ́ mɔ ko sumɔɔɔ akɛ etsuɔ nii lɛ, ekaye nii hu.”+ 11 Ejaakɛ wɔnuɔ akɛ mɛi komɛi yɛ nyɛteŋ ni amɛnyiɛɛɛ yɛ gbɛjianɔtoo naa,+ ni amɛtsuuu nii kwraa, shi moŋ, amɛkɛ amɛhe woɔ saji ni kɔɔɔ amɛhe eko lɛ amli.+ 12 Nɛkɛ mɛi nɛɛ, wɔmiifã amɛ, ni wɔmiiwie wɔmiitsɔɔ amɛ yɛ Nuŋtsɔ Yesu Kristo mli akɛ amɛtsu nii diŋŋ, ni amɛye niyenii ni amɛ diɛŋtsɛ amɛtsu nii kɛná.+
13 Nyɛmimɛi, nyɛgbɛfaŋ lɛ, nyɛkahãa ekpakpafeemɔ miitɔa nyɛ. 14 Shi kɛ́ mɔ ko booo wɔwiemɔ ni yɔɔ wolo nɛɛ mli lɛ toi lɛ, nyɛyaa nɔ nyɛkadia mɔ nɛɛ, ni nyɛkɛ lɛ akpaa bɔɔ,+ koni ehiɛ agbo. 15 Shi nyɛkabua lɛ akɛ henyɛlɔ, shi moŋ nyɛyaa nɔ nyɛwiea nyɛtsɔa lɛ+ akɛ nyɛmi.
16 Agbɛnɛ, toiŋjɔlɛ Nuŋtsɔ lɛ diɛŋtsɛ ahã nyɛ toiŋjɔlɛ daa yɛ gbɛ fɛɛ gbɛ nɔ.+ Nuŋtsɔ lɛ kɛ nyɛ fɛɛ ahia shi.
17 Mi Paulo, mi diɛŋtsɛ mininenaa ŋamɔ,+ ni ji okadi yɛ miwolo fɛɛ wolo mli nɛ; nɛkɛ ji bɔ ni miŋmaa nii.
18 Wɔ-Nuŋtsɔ Yesu Kristo dromɔ lɛ kɛ nyɛ fɛɛ ahia shi.