Yohane Wolo Ni Ji Etɛ Lɛ
1 Wolo ni onukpa lɛ* kɛmiimaje Gaio, mɔ ni asumɔɔ, ni mi hu misumɔɔ lɛ yɛ anɔkwale mli lɛ.
2 Mɔ ni asumɔɔ, misɔlemɔ ji akɛ oya nɔ oshwere yɛ nibii fɛɛ amli, ni oná gbɔmɔtsoŋ hewalɛ kpakpa hu, tamɔ bɔ ni amrɔ nɛɛ oshwereɔ* lɛ. 3 Ejaakɛ miná miishɛɛ babaoo be ni nyɛmimɛi lɛ ba ni amɛbaye anɔkwale lɛ ni ohiɛ mli lɛ he odase lɛ, bɔ ni oyaa nɔ onyiɛɔ yɛ anɔkwale lɛ mli lɛ.+ 4 Mibɛ miishɛɛ* ni da fe enɛ: akɛ manu akɛ mibii lɛ miiya nɔ amɛmiinyiɛ yɛ anɔkwale lɛ mli.+
5 Mɔ ni asumɔɔ, ohãa anaa akɛ oyeɔ anɔkwa yɛ nɔ ni ofeɔ ohãa nyɛmimɛi lɛ mli, eyɛ mli akɛ amɛji nyɛmimɛi ni oleee amɛ moŋ.+ 6 Amɛbaye osuɔmɔ lɛ he odase amɛtsɔɔ yɛ asafo lɛ hiɛ. Ofainɛ, wo amɛ gbɛ bɔ ni baasa Nyɔŋmɔ hiɛ.+ 7 Ejaakɛ egbɛ́i lɛ hewɔ amɛtee ni amɛheee nɔ ko nɔ ko+ yɛ jeŋmajiaŋbii lɛ adɛŋ lɛ. 8 No hewɔ lɛ, sɔ̃ kã wɔnɔ akɛ wɔfee mɛi ni tamɔ nɛkɛ lɛ gbɔ,+ koni wɔtsɔmɔ nanemɛi nitsulɔi yɛ anɔkwale lɛ mli.+
9 Miŋma wolo ko mimaje asafo lɛ, shi Diotrefe, mɔ ni taoɔ klɛŋklɛŋ gbɛhe yɛ nyɛteŋ lɛ,+ bɛ bulɛ kɛhã nɔ fɛɛ nɔ ni jɛ wɔŋɔɔ lɛ.+ 10 No hewɔ ni kɛ́ miba lɛ, magbala jwɛŋmɔ kɛya nitsumɔi ni etsuɔ lɛ anɔ, bɔ ni ewieɔ wɔhe wiemɔi fɔji etsɔɔ mɛi lɛ.*+ Enɛ po faaa hãaa lɛ, shi ehereee nyɛmimɛi lɛ;+ ni mɛi hu ni sumɔɔ akɛ amɛhere amɛ lɛ, ebɔɔ mɔdɛŋ akɛ etsĩ amɛ gbɛ, ni eshwieɔ amɛ kɛjeɔ asafo lɛ mli.
11 Mɔ ni asumɔɔ, kaakase nɔ gbonyo, shi moŋ kasemɔ nɔ kpakpa.+ Mɔ ni feɔ nɔ kpakpa lɛ, ejɛ Nyɔŋmɔ mli.+ Mɔ ni feɔ nɔ gbonyo lɛ, enako Nyɔŋmɔ.+ 12 Demetrio lɛ, amɛ fɛɛ amɛwieɔ ehe ekpakpa ni anɔkwale lɛ diɛŋtsɛ hu wieɔ ehe ekpakpa. Anɔkwa, wɔ hu wɔyeɔ ehe odase, ni nyɛle akɛ odase ni wɔyeɔ lɛ, anɔkwale ni.
13 Miyɛ nibii pii ni maŋma bo, shi misumɔɔɔ akɛ miyaa nɔ mikɛ pɛn kɛ iŋki ŋmaa bo. 14 Shi mihiɛ kã nɔ akɛ etsɛŋ ni mana bo, ni wɔbaawie hiɛ kɛ hiɛ.
Toiŋjɔlɛ ahã bo.
Nanemɛi lɛ* miiŋa bo. Tsĩi nanemɛi lɛ agbɛíi atã ekomekome oŋa amɛ ohã mi.