Mɛni Hewɔ Esa Akɛ Nyɛtsi Nyɛhe Kɛjɛ Wɔji Ahe
“Bii bibii, nyɛkwɛa nyɛhe ni ahia yɛ wɔji ahewɔ.”—1 YOHANE 5:21.
1. Mɛni hewɔ wɔŋjamɔ loo amaga jamɔ bɛ Yehowa jamɔ mli lɛ?
YEHOWA jeee amaga ni akɛ dade, tso, loo tɛ efee. Anyɛŋ aha ehi shikpɔŋ nɔ sɔlemɔtsu ko mli. Akɛni eji Mumɔ ofe lɛ, ni adesai enaaa lɛ hewɔ lɛ, anyɛŋ afee ehe amaga ko. No hewɔ lɛ esa akɛ Yehowa jamɔ krɔŋŋ lɛ afee nɔ ni wɔŋjamɔ ko kwraa bɛ mli.—2 Mose 33:20; Bɔfoi lɛ Asaji 17:24; 2 Korintobii 3:17.
2. Mɛɛ sanebimɔi esa akɛ wɔsusu he?
2 Kɛ oji Yehowa jalɔ lɛ, no lɛ obaanyɛ obi akɛ, ‘Mɛni ji wɔŋjamɔ loo amaga jamɔ? Mɛɛ gbɛ nɔ Yehowa tsuji tsɔ amɛkpoo enɛ yɛ tsutsu? Ni mɛni hewɔ esa akɛ otsi ohe kɛjɛ wɔŋjamɔ loo amaga jamɔ he?’
Nɔ Ni Wɔŋjamɔ loo Amaga Jamɔ Ji
3, 4. Te abaanyɛ atsɔɔ wɔŋjamɔ loo amaga jamɔ mli aha tɛŋŋ?
3 Wɔŋjamɔ kɔɔ kusum nifeemɔi ahe titri. Wɔŋjamɔ ji jamɔ, suɔmɔ, woo, loo yijiemɔ ni akɛhaa amaga ko. Ni mɛni ji amaga? Eji mfoniri loo nɔ ko ni ashɔ, ní damɔ shi kɛha nɔ ko, aloo okadi ko ni atuɔ he ahaa. Bei pii lɛ, akɛ jamɔ lɛ haa hewalɛ ko ni nɔ kwɔ ni yɔɔ loo asusuɔ akɛ eyɔɔ shihilɛ mli (akɛ adesa, kooloo, loo gbɛjianɔtoo ko). Shi abaanyɛ atsu wɔŋjamɔ he nii hu yɛ nibii ni wala bɛ mli lɛ ahe (tamɔ hewalɛ ko loo adebɔɔ nɔ ko ni wala bɛ mli).
4 Hebri wiemɔi ni afɔɔ kɛ nitsumɔ yɛ Ŋmalɛi lɛ amli ni akɛtoɔ wɔji ahe lɛ maa nɔ ko ni sɛɛnamɔ bɛ he nɔ mi, aloo amɛji wiemɔi ni akɛtsɔɔ nii ni agbeɔ he guɔ. Nɔ ni fata enɛɛmɛi ahe ji wiemɔi ni atsɔɔ shishi akɛ “amaga ni ashɔ̃ loo asɔ̃” (ni miitsɔɔ nɔ ko ni akpɛ loo ashwie); “amaga shwiemɔ nɔ” (ni miitsɔɔ amaga ni ashwie); “amaga ni yɔɔ gbeyei”; “yakayaka amagai” (ni miitsɔɔ yakayaka nii); kɛ “wɔji gbohii.” Afɔɔ Hela wiemɔ ei‘do-lon lɛ shishitsɔɔmɔ akɛ “wɔŋ” loo “amaga.”
5. Mɛni hewɔ abaanyɛ akɛɛ akɛ jeee amagai loo okadii fɛɛ ji wɔji lɛ?
5 Shi jeee amagai loo okadii fɛɛ ji wɔji. Nyɔŋmɔ diɛŋtsɛ kɛɛ lsraelbii lɛ akɛ amɛfee shika kerubim enyɔ amɛha kpaŋmɔ adeka lɛ, ni amɛlo mumɔŋ bɔɔ nii nɛɛ ahe okadi yɛ kpee buu lɛ mamai nyɔŋma ni akɛhaa mli lɛ kɛ muhɔɔ ni foɔ He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ teŋ lɛ amli. (2 Mose 25:1, 18; 26:1, 31-33) Osɔfoi ni sɔmɔɔ yɛ nɛkɛ he nɛɛ pɛ naa nɛkɛ okadii ni akɛtsu nii akɛ amɛfeɔ ŋwɛi kerubim lɛ ahe okadi lɛ. (Okɛto Hebribii 9:24, 25 he.) Eka shi faŋŋ ákɛ akɛ jamɔ haŋ kpee buu lɛ mli kerubim ahe okadii nɛɛ, ejaakɛ ŋwɛibɔfoi jalɔi diɛŋtsɛ lɛ ekpɛlɛɛɛ ni ajaa amɛ.—Kolosebii 2:18; Kpojiemɔ 19:10; 22:8, 9.
Bɔ Ni Yehowa Buɔ Wɔŋjamɔ Ehaa
6. Te Yehowa susuɔ wɔŋjamɔ he ehaa tɛŋŋ?
6 Yehowa tsuji kwɛɔ amɛhe nɔ jogbaŋŋ yɛ wɔŋjamɔ he ejaakɛ eteɔ shi ewoɔ wɔŋjamɔ mli nifeemɔi fɛɛ. Nyɔŋmɔ wo lsraelbii lɛ kita akɛ amɛkafee nɔ ko he amaga kɛha jamɔ. Nɔ ni fata Kitai Nyɔŋma lɛ he ji nɛkɛ wiemɔi nɛɛ: “Kaafee amaga ko loo nɔ ko ni tamɔ nii ni yɔɔ ŋwɛi, loo nii ni yɔɔ shikpɔŋ lɛ nɔ, loo nii ni yɔɔ nu mli yɛ shikpɔŋ lɛ shishi lɛ oha ohe. Kaaja amɛ, ni kaasɔmɔ amɛ hu; ejaakɛ mi, Yehowa, O-Nyɔŋmɔ lɛ, miji Nyɔŋmɔ awuŋayelɔ ni woɔ tsɛmɛi atɔmɔi anyɔmɔ kɛtsɔɔ bii anɔ kɛyashiɔ yinɔbii ni ji etɛ kɛ yinɔbii ni ji ejwɛ ni nyɛɔ mi lɛ anɔ; ni minaa mɛi akpei abɔ ni sumɔɔ mi ni amɛyeɔ mikitai lɛ anɔ lɛ amɔbɔ.”—2 Mose 20:4-6.
7. Mɛni hewɔ Yehowa teɔ shi ewoɔ wɔŋjamɔi sɔrɔtoi fɛɛ lɛ?
7 Mɛni hewɔ Yehowa teɔ shi ewoɔ wɔŋjamɔ fɛɛ lɛ? Titri lɛ, esumɔɔ he ni atuɔ ahaa ekome too, taakɛ atsɔɔ yɛ yiteŋgbɛ yɛ Kitai Nyɔŋma lɛ mli nɔ ni ji enyɔ lɛ mli lɛ. Agbɛnɛ ewie kɛtsɔ egbalɔ Yesaia nɔ akɛ: “Mi ji Yehowa, migbɛi ji no, ni mikɛ minunyam lɛ haŋ mɔ kroko, ni mikɛ miyijiemɔ lɛ hu haŋ amagai.” (Yesaia 42:8) Be ko lɛ wɔŋjamɔ tsɔ lsraelbii lɛ tsɔne aahu akɛ “amɛŋɔ amɛbihii kɛ amɛbiyei amɛshashaa afɔlei amɛha wɔji.” (Lala 106:36, 37 ) Jeee akɛ wɔŋjalɔi kpooɔ akɛ Yehowa jeee anɔkwa Nyɔŋmɔ lɛ kɛkɛ, shi moŋ amɛsɔmɔɔ e-Henyɛlɔ kpeteŋkpele, Satan kɛ edaimonioi lɛ hu.
Anɔkwayeli Yɛ Kaa Shishi
8. Mɛɛ kaa Hebribii etɛ ni ji Shadrak, Meshak, kɛ Abednego kɛkpe?
8 Anɔkwa ni wɔyeɔ Yehowa lɛ hu haa wɔkwɛɔ wɔhe nɔ jogbaŋŋ yɛ wɔŋjamɔ he. Sane ni aŋma afɔ shi yɛ Daniel yitso 3 lɛ feɔ enɛ he mfoniri. Bɔni afee ni ejie shika amaga kpeteŋkpele ko ni ekɛma shi lɛ kpo lɛ, Babilon maŋtsɛ Nebukadnezar bua emaŋtsɛyeli lɛ mli onukpai lɛ fɛɛ anaa. Mɛi ni fata efamɔ lɛ he ji Shadrak, Meshak kɛ Abednego—Hebri maŋ nɔkwɛlɔi etɛ ni kwɛɔ Babilon shikpɔŋ lɛ nɔ nitsumɔi anɔ. Afa mɛi ni yɔɔ jɛmɛ lɛ fɛɛ akɛ amɛkula shi yɛ amaga lɛ hiɛ kɛ amɛnu saŋkutswai lɛ ahe pɛ. Enɛ ji mɔdɛŋ ni Babilon diɛŋtsɛ nyɔŋmɔ, Satan bɔ, koni eha Hebribii etɛ lɛ akula shi aha amaga ni damɔ shi kɛha Babilon Maŋtsɛyeli lɛ. Susumɔ ohe akɛ oyɛ jɛmɛ.
9, 10. (a) Mɛɛ shidaamɔ Hebribii etɛ lɛ kɔ, ni mɛɛ gbɛ nɔ atsɔ awo amɛ enɛ he nyɔmɔ? (b) Mɛɛ hewalɛwoo Yehowa Odasefoi baanyɛ ana kɛjɛ hebribii etɛ lɛ anifeemɔ lɛ mli?
9 Kwɛmɔ! Hebribii etɛ lɛ damɔ shi. Amɛkai Nyɔŋmɔ mla ni teɔ shi ewoɔ wɔji loo amagai ni ashɔshɔi ni aaaja amɛ lɛ. Kɛkɛ ni Nebukadnezar kɛ naagbee famɔ ha amɛ—nyɛkulaa shi, kɛ jeee nakai lɛ gbele! Shi yɛ anɔkwa ni amɛyeɔ Yehowa hewɔ lɛ, amɛkɛɛ: “Kɛji nakai lɛ, wɔ-Nyɔŋmɔ lɛ ni wɔsɔmɔɔ lɛ aaanyɛ ajie wɔ yɛ la kɛ flɔnɔɔ ni tsoɔ grigri lɛ mli, ni eeejie wɔ yɛ odɛŋ, maŋtsɛ. Shi kɛ jeee nakai hu lɛ, maŋtsɛ, na ole akɛ wɔsɔmɔŋ o-nyɔŋmɔi lɛ, ni wɔjaŋ shika amaga ni okɛma shi lɛ.”—Daniel 3:16-18.
10 Ashɛrɛ nɛkɛ Nyɔŋmɔ tsuji anɔkwafoi nɛɛ ashwie flɔnɔɔ ni edɔ grigri nɛɛ mli. Shi Nebukadnezar naa kpɛ ehe beni ena ni gbɔmɛi ejwɛ nyiɛ flɔnɔɔ lɛ mli lɛ, kɛkɛ ni ekɛɛ Hebribii etɛ lɛ akɛ amɛje kpo kɛjɛ flɔnɔɔ lɛ mli, ni amɛje kpo ni la lɛ nyɛɛɛ aye amɛ awui. Kɛkɛ ni maŋtsɛ lɛ bo akɛ: “Ajie Shadrak, Meshak, kɛ Abednego Nyɔŋmɔ lɛ yi akɛ etsu ebɔfo, mɔ ni fata amɛhe fee ejwɛ yɛ flɔnɔɔ lɛ mli lɛ ni ebajie etsuji ni ŋɔ amɛhiɛ amɛfɔ enɔ, ni amɛtsake maŋtsɛ lɛ wiemɔ lɛ hiɛ, ni amɛŋɔ amɛgbɔmɔtsei amɛha, koni amɛkasɔmɔ nyɔŋmɔ ko nyɔŋmɔ ko ni amɛja lɛ, akɛ ja amɛ-Nyɔŋmɔ lɛ kɛkɛ lɛ! . . . Nyɔŋmɔ ko nyɔŋmɔ ko bɛ ni aaanyɛ mɔ ajie nɛkɛ.” (Daniel 3:28, 29) Emuuyeli mli ni nakai Hebribii etɛ lɛ hiɛ lɛ kɛ hewalɛwoo haa ŋmɛnɛŋmɛnɛ gbii nɛɛ amli Yehowa Odasefoi koni amɛye Nyɔŋmɔ anɔkwa, ni amɛkɛ amɛhe akawo je lɛŋ saji amli, ni amɛkwa wɔŋjamɔ.—Yohane 17:16.
Amagai loo Wɔji Ye Fɔ yɛ Kojomɔ
11, 12. (a) Mɛɛ sane ni kɔɔ Yehowa kɛ amaga anyɔŋmɔi ahe Yesaia ŋma fɔ shi? (b) Mɛni ba jeŋmaji lɛ anyɔŋmɔi lɛ anɔ beni Yehowa tswa amɛ mpoa lɛ?
11 Yiŋtoo kroko hewɔ ni esa akɛ wɔtsi wɔhe kɛjɛ wɔŋjamɔ he ji akɛ sɛɛnamɔ ko kwraa bɛ wɔji ajamɔ he. Eyɛ mli akɛ amagai loo wɔji komɛi ni gbɔmɔ kɛ eniji efee lɛ tamɔ nɔ ni wala yɔɔ amɛmli—yɛ bei pii amli lɛ amɛyɛ naabu, hiŋmɛii, kɛ toii—shi amɛnyɛɛɛ amɛwie, amɛnaaa nii, ni amɛnuuu nii, ni amɛnyɛɛɛ amɛfee nɔ ko kwraa amɛha mɛi ni etu amɛhe amɛha amɛ lɛ. (Lala 135:15-18) Ajie enɛ kpo yɛ afii ohai kpaanyɔ D.Ŋ.B. lɛ mli, beni Nyɔŋmɔ gbalɔ lɛ ŋma sane ko yɛ Yesaia 43:8-28, nɔ ni yɛ naagbee lɛ ebatsɔ kojomɔ he sane ko ni ka Yehowa kɛ amaga nyɔŋmɔi lɛ ateŋ lɛ. No mli lɛ Nyɔŋmɔ webii ni ji Israel yɛ afa kome, ni je lɛŋ jeŋmaji lɛ hu yɛ afa kroko.Yehowa tswa jeŋmaji lɛ apasa nyɔŋmɔi lɛ mpoa ni amɛgba “tsutsu saji lɛ” yɛ anɔkwale mli. Amɛteŋ mɔ ko nyɛɛɛ afee nakai. Ni beni etsɔ ehiɛ eha ewebii lɛ, Yehowa kɛɛ: “Nyɛ ji midasefoi . . . ni miji Mawu lɛ!” Jeŋmaji lɛ nyɛɛɛ atsɔɔ akɛ amɛ nyɔŋmɔi lɛ yɛ dani Yehowa ba aloo akɛ amɛbaanyɛ amɛgba. Shi Yehowa tsɔ hiɛ egba Babilon hiɛkpatamɔ kɛ ewebii ni aŋɔ amɛ nom lɛ akpɔmɔ efɔ shi.
12 Kɛfata he lɛ, Nyɔŋmɔ tsuji ni akpɔ amɛ lɛ baakɛɛ, taakɛ atsɔɔ mli yɛ Yesaia 44:1-8 lɛ akɛ, ‘Yehowa nii ji amɛ.’ Lɛ diɛŋtsɛ ekɛɛ: “Mi ji klɛŋklɛŋ mɔ kɛ sɛɛkpee mɔ, ni Nyɔŋmɔ ko bɛ, ja mi.” Nyɔŋmɔi amagai lɛ nyɛɛɛ ajie naa. Yehowa wie yɛ ewebii lɛ ahe ekoŋŋ akɛ: “Nyɛ ji midasefoi,” ni ekɛfata he akɛ: “Ani misɛɛ lɛ, Nyɔŋmɔ ko yɛ? Ni tɛsaa ko hu bɛ, mileee eko.”
13. Mɛni wɔŋjamɔ jieɔ lɛ kpo yɛ wɔŋjalɔ lɛ he?
13 Wɔtsiɔ wɔje kɛjɛɔ wɔŋjamɔ he hu ejaakɛ emli ni wɔkɛ wɔhe aaawo lɛ tsɔɔ akɛ nilee ni wɔbɛ. Wɔŋjalɔ lɛ kɛ tso ni esumɔɔ lɛ fa ko feɔ nyɔŋmɔ ni ejaa lɛ, ni ekɛ efa kroko hu shɛreɔ la ni ekɛhoɔ eniyenii. (Yesaia 44:9-17) Mɛɛ kwashiaiasane nɛ! Mɔ ni feɔ amaga nyɔŋmɔi ni ejaa amɛ lɛ hu hiɛ gboɔ, ejaakɛ enyɛɛɛ eye odase ko ni tsɔɔ mɔ yiŋ akɛ nyɔŋmɔi diɛŋtsɛ ji amɛ. Shi ŋwanejee ko bɛ Nyɔŋmɔ ni Yehowa ji lɛ he, ejaakɛ jeee akɛ egba ewebii lɛ akpɔmɔ kɛmiijɛ Babilon kɛkɛ, shi eha nɛkɛ kpɔmɔ nɛɛ ba mli hu. Aku sɛɛ abahi Yerusalem ekoŋŋ, ni asaa atswa Yuda maji lɛ, ni Babilon “bu kwɔŋkwɔŋ lɛ” mli nui lɛ—Eufrate Faa lɛ—gbi ni emii ni ejeee hefamɔ nɔ dɔŋŋ. (Yesaia 44:18-27) Taakɛ Nyɔŋmɔ gba fɔ shi hu lɛ, Koresh ni ji Persianyo lɛ ye Babilon nɔ kunim.—Yesaia 44:28–45:6.
14. Mɛni abaama nɔ mi kɛya naanɔ yɛ Jeŋ Muu Fɛɛ Kojomɔ He Wulu lɛ?
14 Nakai amaga nyɔŋmɔi lɛ ye fɔ yɛ kojomɔ sane ni kɔɔ nyɔŋmɔ ni amɛji lɛ he lɛ mli. Ni nɔ ni ba Babilon nɔ lɛ baaba eŋmɛnɛŋmɛnɛ beaŋ fa ni yɔɔ, ni ji Babilon kpeteŋkpele, jeŋ apasa jamɔ maŋtsɛyeli lɛ nɔ kɛ̃. Etsɛŋ ni lɛ kɛ enyɔŋmɔi lɛ fɛɛ, kɛ ejamɔ he nibii lɛ fɛɛ, kɛ nibii ni ajaa amɛ akɛ wɔji lɛ fɛɛ baaho aya kɛmiiya naanɔ. (Kpojiemɔ 17:12–18:8) Abaaye odase kɛya naanɔ yɛ Jeŋ Muu Fɛɛ Kojomɔ He Wulu lɛ akɛ Yehowa pɛ ji anɔkwa Nyɔŋmɔ hiɛkalɔ lɛ, ni ehaa egbalɛ Wiemɔ lɛ baa mli.
Afɔlei ni Ashaa Ahaa Daimonioi
15. Mɛni mumɔ krɔŋkrɔŋ lɛ kɛ klɛŋklɛŋ afii oha lɛ mli nɔyeli kuu lɛ tsɔɔ yɛ Yehowa webii kɛ wɔŋjamɔ he?
15 Yehowa webii kwɛɔ amɛhe nɔ jogbaŋŋ hu yɛ wɔŋjamɔ he ejaakɛ Nyɔŋmɔ mumɔ lɛ kɛ egbɛjianɔtoo lɛ kudɔɔ amɛ. Klɛŋklɛŋ afii oha lɛ mli Yehowa tsuji anɔyeli kuu lɛ kɛɛ nanemɛi Kristofoi lɛ akɛ: “Ejaakɛ esa mumɔ krɔŋkrɔŋ lɛ hiɛ ni esa wɔ hu wɔhiɛ akɛ, wɔkɛ jatsu ko akafɔ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji kɛ la kɛ kooloi ni ashɔtɔ kɛ ajwamaŋbɔɔ; kɛji nyɛhi enɛɛmɛi lɛ, nyɛfee jogbaŋŋ. Nyɛhia shi jogbaŋŋ!”—Bɔfoi lɛ Asaji 15:28, 29.
16. Te obaatsɔɔ nɔ ni Paulo wie yɛ nibii ni akɛsha afɔle aha wɔji ahe lɛ mli yɛ bo diɛŋtsɛ owiemɔ mli oha tɛŋŋ?
16 Yiŋtoo kroko hewɔ ni esa akɛ wɔtsi wɔhe kɛjɛ wɔŋjamɔ he ji ni wɔkwa daimonioi ajamɔ. Bɔfo Paulo kɛɛ Korinto Kristofoi lɛ yɛ Nuŋtsɔ lɛ Gbɛkɛnaashi Niyenii lɛ he akɛ: “Nyɛjoa wɔŋjamɔ naa foi! . . . Jɔɔmɔ kpulu lɛ ni wɔjɔɔ lɛ, ani jeee Kristo la lɛ naanyobɔɔ lɛ ni? Aboloo ni wɔkumɔɔ lɛ, ani jeee Kristo gbɔmɔtso lɛ naanyobɔɔ lɛ ni? Ejaakɛ aboloo kome ni, ni wɔyi pii lɛ gbɔmɔtso kome ji wɔ, ejaakɛ wɔ fɛɛ wɔyeɔ aboloo kome lɛ eko. Nyɛkwɛa heloo gbɛfaŋ Israel lɛ: Ani mɛi ni yeɔ afɔleshaa nii lɛ, jeee naanyo amɛkɛ afɔleshaa latɛ lɛ bɔɔ lɛ? Belɛ mɛni mi kɛɛɔ mɔ? Akɛ amaga ji nɔ ko, aloo akɛ amaga afɔle ji nɔ ko? Dabi, shi moŋ miikɛɛ akɛ afɔle ni wɔŋjalɔi lɛ shaa lɛ, daimonioi amɛshaa amɛhaa, shi jeee Nyɔŋmɔ; shi misumɔɔɔ akɛ nyɛkɛ daimonioi bɔɔ naanyo. Nyɛnyɛŋ Nuŋtsɔ Yehowa kpulu lɛ kɛ daimonioi akpulu lɛ nyɛnu shikome; nyɛnyɛŋ ‘Nuŋtsɔ Yehowa okpɔlɔ lɛ nɔ nii’ kɛ daimonioi anɔ lɛ nɔ nii nyɛye shikome. Aloo Nuŋtsɔ Yehowa mli la wɔwoɔ? Ani wɔhe wa fe lɛ?”—1 Korintobii 10:14-22.
17. Mɛɛ shihilɛi amli Kristofonyo baanyɛ aye loo ni akɛsha afɔle aha wɔji yɛ Ŋ.B. klɛŋklɛŋ afii oha lɛ mli, ni mɛni hewɔ?
17 Akɛ kooloo ni agbe lɛ fa ko shaa afɔle ahaa wɔŋ ko, akɛ fa ko haa osɔfoi lɛ, ni jálɔ lɛ naa fa ko ekɛfeɔ niyenii. Shi abaanyɛ ahɔɔ loo lɛ fa ko yɛ jara nɔ. Efeŋ nɔ ni sa akɛ Kristofonyo aaaya wɔŋjalɔi agbatsu mli koni eyaye loo yɛ jɛmɛ, eyɛ mli akɛ ekolɛ jeee kusum nifeemɔ ko ekɛ ehe woɔ mli lɛ, ejaakɛ enɛ baatɔtɔ mɛi krokomɛi anane, aloo eeegbala lɛ kɛaawo apasa jamɔ mli. (1 Korintobii 8:1-13; Kpojiemɔ 2:12, 14, 18, 20) Kooloo ko ni akɛ lɛ shaa afɔle ahaa wɔŋ ko lɛ tsakeee loo lɛ, no hewɔ lɛ Kristofonyo baanyɛ ahe eko yɛ jara nɔ. Agbɛnɛ hu esaaa akɛ ebiɔ he ni loo ni akɛha lɛ yɛ shia ko akɛ eye lɛ jɛ. Shi kɛji akɛ mɔ ko kɛɛ lɛ akɛ “akɛsha afɔle aha amaga lɛ,” eyeŋ, koni ekatɔtɔ mɔ ko nane.—1 Korintobii 10:25-29.
18. Mɛɛ gbɛ nɔ mɛi ni yeɔ nɔ ko ni akɛsha afɔle aha wɔji lɛ kɛ amɛhe bɔɔ daimonioi ahe yɛ?
18 Be ko mli lɛ nɔ ni asusuɔ ji akɛ, beni asha afɔle lɛ agbe naa lɛ, wɔŋ loo nyɔŋmɔ lɛ hiɔ loo lɛ mli, ni eboteɔ jálɔi ni yeɔ eko yɛ afɔleshaa lɛ shishi lɛ agbɔmɔtsei amli. Akɛni mɛi ni yeɔ nii kutuu lɛ kɛ amɛhe bɔɔ naanyo yɛ ekomefeemɔ mli hewɔ lɛ, nakai nɔŋŋ hu mɛi ni yeɔ kooloo ni akɛ lɛ esha afɔle lɛ eko lɛ miiye nii yɛ afɔleshaa latɛ lɛ nɔ ni amɛkɛ nyɔŋmɔ ni ji daimonio ni amaga lɛ damɔ shi kɛha lɛ lɛ miiye nii. Daimonioi tsɔɔ wɔŋjamɔ ni tamɔ nɛkɛ nɔ amɛtsĩɔ gbɔmɛi anaa koni amɛkaja anɔkwa Nyɔŋmɔ kome pɛ lɛ. (Yeremia 10:1-15) Ŋwanejee ko bɛ he akɛ no hewɔ ni esa akɛ Yehowa webii atsi amɛhe kɛjɛ nibii ni akɛsha afɔle aha wɔji loo amagai ahe lɛ! Anɔkwa ni aaaye Nyɔŋmɔ, gbɛtsɔɔmɔ ni jɛ emumɔ krɔŋkrɔŋ lɛ kɛ egbɛjianɔtoo lɛ ŋɔɔ ni wɔɔkpɛlɛ nɔ, kɛ wɔfaishitswaa akɛ wɔkɛ wɔhe woŋ daimonioi ajamɔ mli lɛ hu feɔ kanyamɔi ni yɔɔ hewalɛ waa ni baaha wɔtsi wɔhe kɛjɛ wɔŋjamɔ he ŋmɛnɛ.
Mɛni Hewɔ Ehe Hiaa ni Wɔkwɛ Wɔhe nɔ Jogbaŋŋ Lɛ?
19. Mɛɛ wɔŋjamɔ nɛkɛ hi shi yɛ blema Efeso?
19 Kristofoi kɛ hiɛdɔɔ tsiɔ amɛhe kɛjɛɔ wɔŋjamɔ he ejaakɛ ebaa yɛ gbɛi sɔrɔtoi anɔ, ni wɔŋjamɔ nifeemɔ kome po kɛkɛ baanyɛ aha amɛŋmɛɛ amɛhemɔkɛyeli lɛ he. Bɔfo Yohane kɛɛ nanemɛi heyelilɔi lɛ akɛ: “Nyɛkwɛa nyɛhe ni ahia yɛ wɔji ahewɔ.” (1 Yohane 5:21) Ŋaawoo nɛɛ he miihia ejaakɛ wɔŋjamɔi sɔrɔtoi pii ebɔle amɛhe kɛkpe. Yohane ŋma wolo lɛ kɛjɛ Efeso, maŋ ni kɛ ehe ewo ŋkunyaayeli nifeemɔi kɛ blema saji ni kɔɔ apasa nyɔŋmɔi ahe lɛ mli vii lɛ mli. Je lɛŋ naakpɛɛ nibii kpawo lɛ ekome yɛ Efeso—Atemi sɔlemɔwe lɛ, he ni yiwalɔi kɛ efɔŋfeelɔi yataoɔ abobaahe yɛ kɛ jeŋba shara he kusum nifeemɔi ashihemɔ he lɛ. Jeŋ nilelɔ, Heracleitus ni jɛ Efeso lɛ kɛ gbɛ ni nɔ ewo duŋ ni atsɔɔ nɔ kɛyaa sɔlemɔwe lɛ afɔleshaa latɛ lɛ nɔ lɛ to efɔŋfeemɔ duŋ he, ni ebuɔ jeŋba ni yaa nɔ yɛ sɔlemɔwe lɛ akɛ nɔ ni yɔɔ nyaŋemɔ fe kooloi anɔ po. No hewɔ lɛ, ehe ebahia ni Efeso Kristofoi lɛ adamɔ shi shiŋŋ amɛshi daimonioi ajamɔ, jeŋba shara, kɛ wɔŋjamɔ.
20. Mɛni hewɔ ehe hiaa ni wɔtsi wɔhe kɛjɛ wɔŋjamɔ nifeemɔ bibioo kwraa po he lɛ?
20 Faishitswaa ni mli wa he miihia Kristofoi lɛ koni amɛkɛtsi amɛhe kɛjɛ wɔŋjamɔ ni abuɔ lɛ bibioo kwraa lɛ po he, ejaakɛ jamɔ nifeemɔ kome pɛ ni akɛaaha Abonsam lɛ baafi mpoa ni etswaa akɛ gbɔmɛi yeŋ anɔkwa amɛhaŋ Nyɔŋmɔ yɛ kaa shishi lɛ sɛɛ. (Hiob 1:8-12) Beni eŋɔ “jeŋ maŋtsɛyeli hei kɛ amɛ anunyam fɛɛ etsɔɔ” Yesu lɛ, Satan kɛɛ: “Maŋɔ enɛɛmɛi fɛɛ mahao, kɛji okula shi ni ofee jamɔ nifeemɔ ko oha mi lɛ.” Nakai feemɔ ni Kristo kpoo lɛ ha efi Yehowa sɛɛ yɛ jeŋ muu fɛɛ nɔyeli he sane lɛ mli, ni eha Abonsam fee amalelɔ.—Mateo 4:8-11, NW; Abɛi 27:11.
21. Mɛni anɔkwa Kristofoi kpoo efeemɔ yɛ Roma maŋtsɛ lɛ he?
21 Yesu mra be mli sɛɛnyiɛlɔi lɛ hu efeŋ jamɔ nifeemɔ ko ni amɛkɛmiifi Satan sɛɛ yɛ sane lɛ mli. Eyɛ mli akɛ amɛyɛ bulɛ kɛha nɔyeli ni ji “hegbɛi ni yeɔ nɔ lɛ” moŋ, shi amɛshaŋ tsofa-kɛ-ŋma amɛkɛwoŋ Roma maŋtsɛ lɛ hiɛ nyam, kɛ enɛ baaha amɛlaaje amɛwala tete po. (Romabii 13:1-7) Daniel P. Mannix ŋma yɛ enɛ he akɛ: “Kristofoi lɛ ateŋ mɛi fioo ko pɛ fee nakai, eyɛ mli akɛ aha afɔleshaa latɛ ni la tsoɔ yɛ nɔ daa hi shwɛmɔ belɛ kɛ amɛmiisumɔ ni amɛfee nakai. Nɔ ni ehe hiaa ni gboklɛfonyo lɛ afee pɛ ji ni ekɛ tsofa-kɛ-ŋma fioo ashwã la lɛ nɔ, kɛkɛ lɛ aha lɛ Afɔleshaa he Yijiemɔ Wolo kɛkɛ lɛ aŋmɛɛ ehe. Agbɛnɛ hu atsɔɔ mli jogbaŋŋ ahaa lɛ akɛ ejaaa maŋtsɛ lɛ; shi eekpɛlɛ mɔ krɔŋkrɔŋ loo nyɔŋmɔ ni maŋtsɛ lɛ ji akɛ Roma maŋ lɛ yitso lɛ nɔ kɛkɛ. Ni kɛlɛ, etamɔ nɔ ni Kristofonyo ko bɛ ni kɛ ehe ha hegbɛ ni akɛaajo foi nɛɛ.” (Those About to Die, baafa 137) Kɛ bo hu aka bo nakai nɔŋŋ lɛ, ani ooote shi oshi wɔŋjamɔi fɛɛ?
Ani Obaakwɛ Ohe nɔ Jogbaŋŋ yɛ Wɔŋjamɔ He?
22, 23. Mɛni hewɔ esa akɛ okwɛ ohe nɔ jogbaŋŋ yɛ wɔŋjamɔ he lɛ?
22 Eka shi faŋŋ akɛ, esa akɛ Kristofoi akwɛ amɛhe ni ahi yɛ wɔŋjamɔi sɔrɔtoi fɛɛ he. Yehowa biɔ he ni atuɔ ahaa ekome too. Hebribii anɔkwafoi etɛ lɛ to okadi kpakpa amɛfɔ shi amɛha wɔ kɛtsɔ jamɔ ni amɛkɛ haaa amaga kpeteŋkpele ni Babilon maŋtsɛ Nebukadnezar kɛma shi lɛ nɔ. Yehowa pɛ ji mɔ ni atsɔɔ akɛ eji anɔkwa Nyɔŋmɔ hiɛkalɔ yɛ jeŋ muu fɛɛ kojomɔ he sane ni gbalɔ Yesaia ŋma fɔ shi lɛ mli. Ehe bahia ni emra be mli odasefoi Kristofoi lɛ atsi amɛhe kɛjɛ nibii ni akɛsha afɔle aha wɔji lɛ ahe. Anɔkwafoi babaoo ni yɔɔ amɛteŋ lɛ baaa amɛhe shi amɛhaaa nɔnyɛɛ akɛ amɛtsu wɔŋjamɔ nifeemɔ bibioo ko ni baatsɔɔ akɛ amɛkwa Yehowa lɛ.
23 No hewɔ lɛ, ani bo diɛŋtsɛ lɛ ookwɛ ohe nɔ jogbaŋŋ yɛ wɔji ahewɔ? Ani okɛ jamɔ ni akɛhaa Nyɔŋmɔ kome too miiha lɛ? Ani ofiɔ jeŋ muu fɛɛ maŋtsɛ ni Yehowa ji lɛ sɛɛ ni ojieɔ eyi akɛ anɔkwa Nyɔŋmɔ hiɛkalɔ lɛ? Kɛji nakai ni lɛ, esa akɛ efee ofaishitswaa akɛ obaaya nɔ odamɔ shi shiŋŋ oshi wɔŋjamɔ nifeemɔi fɛɛ. Shi mɛɛ Ŋmalɛ mli saji otii krokomɛi lolo yɔɔ ni baanyɛ aye abua bo koni okwɛ ohe nɔ jogbaŋŋ yɛ wɔŋjamɔi sɔrɔtoi fɛɛ he?
Te Osusuɔ He Ohaa Tɛŋŋ?
◻ Mɛni ji wɔŋjamɔ?
◻ Mɛni hewɔ Yehowa teɔ shi ewoɔ wɔŋjamɔi fɛɛ lɛ?
◻ Mɛɛ shidaamɔ Hebribii etɛ lɛ kɔ yɛ wɔŋjamɔ he?
◻ Yɛ mɛɛ gbɛ nɔ mɛi ni yeɔ nii ni akɛ sha afɔle aha wɔji lɛ baanyɛ afee mɛi ni kɛ daimonioi miibɔ?
◻ Mɛni hewɔ esa akɛ wɔkwɛ wɔhe ni ahi yɛ wɔŋjamɔ he lɛ?
[Mfoniri ni yɔɔ baafa 23]
Eyɛ mli akɛ awo amɛwala he gbeyei moŋ, shi Hebribii etɛ
lɛ kɛ amɛhe wooo wɔŋjamɔ nifeemɔ mli