Nyɛkwɛa Nyɛhe Ni Ahia Yɛ Wɔŋjamɔi Sɔrɔtoi Fɛɛ He
“Mɛɛ ekomefeemɔ Nyɔŋmɔ sɔlemɔwe kɛ amagai yɔɔ?”—2 KORINTOBII 6:16.
1. Akɛ Israel kpeebuu lɛ kɛ sɔlemɔtsui lɛ fee mɛni he mfoniri?
YEHOWA yɛ sɔlemɔwe ko ni amagai loo wɔji bɛ mli. Akɛ Israel kpeebuu ni Mose fee lɛ kɛ sɛɛ mli sɔlemɔtsui ni amamɔ yɛ Yerusalem lɛ fee he mfoniri. Nakai tsui lɛ damɔ shi kɛha “anɔkwa buu lɛ,” Yehowa mumɔŋ sɔlemɔtsu kpeteŋkpele lɛ. (Hebribii 8:1-5) Nakai sɔlemɔtsu lɛ ji gbɛjianɔtoo ni atsɔɔ nɔ abɛŋkɛɔ Nyɔŋmɔ yɛ jamɔ mli ni damɔ Yesu Kristo kpɔmɔ afɔleshaa lɛ nɔ.—Hebribii 9:2-10, 23.
2. Namɛi batsɔmɔ akulashiŋi yɛ Nyɔŋmɔ mumɔŋ sɔlemɔtsu kpeteŋkpele lɛ mli lɛ, ni mɛɛ gbɛhe asafo babaoo lɛ naa mli ŋɔɔmɔ?
2 Kristofoi ni afɔ amɛ mu lɛ ateŋ mɔ fɛɛ mɔ batsɔɔ “akulashiŋ yɛ nyɔŋmɔ . . . sɔlemɔtsu lɛ mli,” ni enaa gbɛhe yɛ ŋwɛi. “Asafo babaoo” ko ni ji Yehowa jalɔi hu “jaa Ŋyɔŋmɔ” yɛ nɔ ni akɛ Jeŋmajiaŋbii akpo lɛ ni yɔɔ sɔlemɔtsu ni Herode ma ekoŋŋ lɛ nɔ lɛ fee he mfoniri lɛ nɔ. Yɛ hemɔkɛyeli ni amɛyɔɔ yɛ afɔle ni Yesu sha lɛ mli hewɔ lɛ, amɛyɛ jalɛ shidaamɔ ni baaha abaa amɛyi kɛtsɔ “amanehulu kpeteŋkpele” lɛ mli.—Kpojiemɔ 3:12; 7:9-15.
3, 4. Akɛ Kristofoi ni afɔ amɛ mu lɛ asafo ni yɔɔ shikpɔŋ nɔ lɛ toɔ mɛni he, ni esa akɛ etsi ehe kɛjɛ mɛni ni aaabule lɛ lɛ he?
3 Akɛ Kristofoi ni afɔ amɛ mu lɛ asafo ni yɔɔ shikpɔŋ nɔ lɛ toɔ sɔlemɔtsu kroko ni wɔŋjamɔ bɛ mli lɛ he. Bɔfo Paulo kɛ mɛi ni akɛ ‘mumɔ krɔŋkrɔŋ esɔo amɛnaa’ nɛɛ wie ni ekɛɛ amɛ akɛ: “Atswa nyɛ ama bɔfoi lɛ kɛ gbalɔi lɛ ashishitoo lɛ, ni ekoŋtɛ ji Yesu Kristo lɛ nɔ, mɔ nɔ ni atsɔ atsɛ̃ tsu muu lɛ fɛɛ awoŋ afee ekome, ni eeda eefee sɔlemɔtsu krɔŋkrɔŋ yɛ Nuŋtsɔ Yehowa mli, mɔ mli ni atswa nyɛ hu awo afee Nyɔŋmɔ shihilɛ he yɛ mumɔ mli lɛ.” (Efesobii 1:13; 2:20-22) Nɛkɛ 144,000 ni asɔo amɛnaa nɛɛ ji “tɛi ni hiɛ kamɔ” ni “akɛ tswaa mumɔŋ tsu ni afee nyɛ osɔfoi aweku krɔŋkrɔŋ.”—1 Petro 2:5; Kpojiemɔ 7:4; 14:1.
4 Akɛni nɛkɛ osɔfoi bibii nɛɛ ji “Nyɔŋmɔ tsu” hewɔ lɛ, eŋmɛɛɛ gbɛ ni abule nɛkɛ sɔlemɔtsu nɛɛ. (1 Korintobii 3:9, 16, 17) Paulo bɔ kɔkɔ akɛ: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ! Ejaakɛ mɛɛ bɔɔ jalɛ kɛ mlatɔmɔ yɔɔ? Aloo mɛɛ yeli la kɛ duŋ yɔɔ? Ni mɛɛ gbeekpamɔ Kristo kɛ Belial yɔɔ? Aloo mɛɛ nijaa mɔ ni heɔ yeɔ kɛ mɔ ni heee yeee yɔɔ? Ni asaŋ mɛɛ ekomefeemɔ Nyɔŋmɔ sɔlemɔwe kɛ amagai yɔɔ?” Esa akɛ Kristofoi ni afɔ amɛ mu lɛ ni “Yehowa Ofe lɛ” nii ji amɛ lɛ aye amɛhe kɛjɛ wɔŋjamɔ he. (2 Korintobii 6:14-18) Esa akɛ asafo babaoo lɛ mli bii lɛ hu akwa amaga jamɔi sɔrɔtoi fɛɛ.
5. Akɛni anɔkwa Kristofoi le akɛ Yehowa sa hetuukɛhamɔ ni akɛhaa ekome too hewɔ lɛ, mɛni amɛfeɔ?
5 Wɔŋjamɔ ni ka shi faŋŋ kɛ nɔ ni yɔɔ nigii fɛɛ yɛ. Dabi, wɔŋjamɔ kɔɔɔ apasa nyɔŋmɔi kɛ nyɔŋmɔyei pɛ he. Eji nɔ fɛɛ nɔ loo mɔ kroko jamɔ ni jeee Yehowa. Akɛ Jeŋ Muu Fɛɛ Maŋtsɛ lɛ, lɛ ji mɔ ni yɔɔ hegbɛ kɛ mɔ ni sa akɛ atuɔ he ahaa ekome too. (5 Mose 4:24) Akɛni anɔkwa Kristofoi le enɛ hewɔ lɛ, amɛboɔ Ŋmalɛ mli kɔkɔbɔi fɛɛ ni teɔ shi woɔ wɔŋjamɔ lɛ toi. (1 Korintobii 10:7) Nyɛhaa wɔsusua wɔŋjamɔi sɔrɔtoi komɛi ni esa akɛ Yehowa tsuji akwa lɛ ahe.
Afee Kristendom Wɔŋjamɔ lɛ He Mfoniri
6. Mɛɛ nihii nii Ezekiel na yɛ ninaa mli?
6 Beni gbalɔ Ezekiel yɔɔ Babilon nomŋɔɔ mli yɛ afi 612 D.Ŋ.B. lɛ, ena nihii nii wuji ni Yudafoi ni ekwa Yehowa jamɔ lɛ feɔ yɛ Yerusalem sɔlemɔtsu lɛ mli lɛ ahe ninaa. Ezekiel na “awuŋayeli amaga.” Ana onukpai nyɔŋmai kpawo ni miisha tsofa-kɛ-ŋma yɛ sɔlemɔtsu lɛ mli. Yei miifo apasa nyɔŋmɔ ko. Ni hii 25 miija hulu lɛ. Mɛni ji nɔ ni nɛkɛ hemɔkɛyeli kwamɔ nifeemɔi nɛɛ tsɔɔ?
7, 8. “Awuŋayeli amaga” lɛ baanyɛ afee mɛni, ni mɛni hewɔ enɛ kanyaa Yehowa koni eye awuŋa lɛ?
7 Nihii nii ni Ezekiel na yɛ ninaa mli lɛ feɔ Kristendom amaga jamɔ lɛ he mfoniri. Akɛ nɔkwɛmɔ nɔ lɛ, ekɛɛ akɛ: “Holemɔ ohiŋmɛii anɔ kɛya kooyigbɛ . . . ni naa, afɔleshaa latɛ lɛ he agbó lɛ kooyigbɛ lɛ nakai awuŋayeli amaga lɛ ma shi yɛ agbo lɛ naa. Ni Yehowa Nyɔŋmɔ kɛɛ mi akɛ: ‘Gbɔmɔ bi, oona nɔ ni amɛfeɔ nɛɛ? Nihii nii wuji ni Israel we lɛ feɔ yɛ biɛ, koni maje mi he krɔŋkrɔŋ lɛ kɛya sɛɛ shɔŋŋ lɛ?’”—Ezekiel 8:1-6.
8 Nakai wɔŋjamɔ awuŋayeli amaga lɛ baanyɛ afee wɔŋ kooi ni damɔ shi kɛha Kanaan bii apasa nyɔŋmɔ-yoo ni amɛbuɔ lɛ akɛ Baal ni ji amɛ nyɔŋmɔ lɛ ŋa lɛ. Bɔ fɛɛ bɔ ni okadi lɛ ji lɛ, eteeɔ Yehowa awuŋayeli shi ejaakɛ ejaa hetuu kɛhamɔ ni Israel kɛhaa ekome too lɛ mli, ni enɛ kuɔ ekitai nɛɛ amli: “Mi ji Yehowa, o-Nyɔŋmɔ lɛ, . . . Kaana nyɔŋmɔi krokomɛi yɛ misɛɛ. Kaafee amaga ko loo nɔ ko ni tamɔ nii ni yɔɔ ŋwɛi, loo nii ni yɔɔ shikpɔŋ lɛ nɔ, loo nii ni yɔɔ nu mli yɛ shikpɔŋ lɛ shishi lɛ oha ohe. Kaaja amɛ, ni kaasɔmɔ amɛ hu; ejaakɛ mi, Yehowa, o-Nyɔŋmɔ lɛ, mi ji Nyɔŋmɔ awuŋayelɔ ni biɔ he ni atuɔ ahaa ekome too.”—2 Mose 20:2-5.
9. Kristendom etee Yehowa awuŋayeli shi yɛ mɛɛ gbɛ nɔ?
9 Awuŋayeli okadi loo amaga ni ajaa yɛ Nyɔŋmɔ sɔlemɔwe lɛ ji nihii nii wuji ni Israelbii ni amɛkwa hemɔkɛyeli lɛ feɔ lɛ ateŋ ekome. Nakai nɔŋŋ Kristendom sɔlemɔ lɛ ebule amɛhe kɛ okadii ni gbeɔ Nyɔŋmɔ he guɔ ni jaa hetuu-kɛhamɔ ni amɛkɛɛ amɛkɛhaa Mɔ ni amɛkɛɛ amɛjaa lɛlɛ mli lɛ. Amɛwoɔ Nyɔŋmɔ mli la koni eye awuŋa hu ejaakɛ osɔfoi lɛ kpooɔ e-Maŋtsɛyeli ni ji adesai ahiɛnɔkamɔ kome pɛ lɛ ni amɛjaa Jeŋmaji Ekomefeemɔ lɛ —“nihii nii . . . ni ma he krɔŋkrɔŋ lɛ,” ni esaaa akɛ emaa lɛ.—Mateo 24:15, 16; Marko 13:14.
10. Mɛni Ezekiel na yɛ sɔlemɔtsu lɛ mli, ni te enɛ tamɔ nɔ ni anaa yɛ Kristendom lɛ ha tɛŋŋ?
10 Beni Ezekiel bote sɔlemɔwe lɛ, ebɔ amaniɛ akɛ: “Ni naa, waamɔ nibii kɛ kooloi ni ahiɔ sɔrɔtoi abɔ, kɛ Israel we lɛ wɔji lɛ fɛɛ mfonirii ni atɛŋ amɛ yɛ gbogbo lɛ he kɛbɔle kɛkpe. Ni Israel we lɛ onukpai lɛ ateŋ hii nyɔŋmai kpawo damɔ amɛhiɛ . . . ni mɔ fɛɛ mɔ hiɛ etsofa-kɛ-ŋma ŋɛsu yɛ edɛŋ, ni tsofa-kɛ-ŋma atatu lɛ ŋma miite shi kɛmiiya ŋwɛi.” Bo lɛ susumɔ enɛ he okwɛ! Naa Israel onukpai yɛ Yehowa sɔlemɔtsu lɛ mli, ni miisha afɔlei amɛha apasa nyɔŋmɔi ni nihiinii ni atɛŋ amɛ yɛ gbogboi lɛ ahe lɛ damɔ shi kɛha amɛ lɛ. (Ezekiel 8:10-12) Kɛ akɛto he lɛ, akɛ loofɔji kɛ ŋa mli kooloi feɔ Kristendom maji ni gbɔmɛi tuɔ amɛhe amɛhaa lɛ ahe mfoniri. Agbɛnɛ hu osɔfoi lɛ ateŋ mɛi pii eye fɔ akɛni amɛye amɛbua ni ashishiu gbɔmɛi lɛ kɛtsɔ yiŋ ni akaa awieɔ ni ejaaa akɛ kooloi bibii ni baa shi mli gbɔmɔ tsake kɛjɛ, moŋ fe ni eeefi Biblia mli anɔkwa sane ni ji nii ni Yehowa Nyɔŋmɔ bɔ lɛ sɛɛ lɛ hewɔ.—Bɔfoi lɛ Asaji 17:24-28.
11. Mɛni hewɔ Israel yei ni amɛkwa hemɔkɛyeli lɛ foɔ Tamuz lɛ?
11 Ezekiel na Israel yei ni ekwa hemɔkɛyeli lɛ yɛ Yehowa we lɛ shinaa lɛ naa ni amɛmiifo Tamuz. (Ezekiel 8:13, 14) Babilonbii kɛ Siriabii buɔ Tamuz akɛ jwɛi ni kwɛ̃ɔ yɛ nugbɔnɛmɔ bei amli ni egboɔ yɛ latsaa be mli lɛ nyɔŋmɔ. Jwɛi lɛ gbele feɔ Tamuz gbele he mfoniri, ni ejalɔi lɛ woɔ yara yɛ ehewɔ daa afi yɛ be mli ni jeŋ dɔlɛ mli ewa waa lɛ. Kɛ jwɛi kwɛ̃ ekoŋŋ yɛ nugbɔnɛmɔ be mli pɛ kɛkɛ lɛ, akɛɛ Tamuz epue ekoŋŋ kɛjɛ shishigbɛ je lɛ mli. Akɛ egbɛi lɛ klɛŋklɛŋ niŋmaa okadi, ni ji blema tau ni esu tamɔ krɔɔs lɛ damɔɔ shi haa lɛ. Enɛ baanyɛ akai wɔ Kristendom wɔŋjamɔ nifeemɔ ni ji woo ni akɛhaa krɔɔs lɛ waa.
12. Mɛni Ezekiel na ni Israel hii hemɔkɛyeli kwalɔi 25 lɛ feɔ, ni mɛni ni tamɔ nakai nɔŋŋ yaa nɔ yɛ Kristendom?
12 No sɛɛ lɛ Ezekiel na hii hemɔkɛyeli kwalɔi 25 yɛ mligbɛ kpo lɛ nɔ ni miija hulu nii ni kuɔ Yehowa kita akɛ akaja amaga ko lɛ mli. (5 Mose 4:15-19) Nakai wɔŋjalɔi lɛ kɛ tso nine ko, ni ji nihii nii ni ekolɛ edamɔ shi kɛha nuu fɔmɔ nii toɔ Nyɔŋmɔ gugɔ naa. Belɛ ebɛ naakpɛɛ akɛ Nyɔŋmɔ booo amɛsɔlemɔi atoi, tamɔ bɔ ni Kristendom baatao eyelikɛbuamɔ shi efoŋ amɛdaaŋ yɛ “amanehulu kpeteŋkpelele” lɛ mli lɛ. (Mateo 24:21) Bɔ ni nakai Israelbii hemɔkɛyeli kwalɔi lɛ tsɔ amɛsɛɛ amɛha Yehowa sɔlemɔwe lɛ ni amɛja hulu ni haa la lɛ, nakai nɔŋŋ Kristendom kuɔ ehiɛ eshwieɔ la ni jɛ Nyɔŋmɔ ŋɔɔ lɛ nɔ, etsɔɔ apasa tsɔɔmɔi, ni ekɛ jamɔ haa jeŋ nilee, ni ekuɔ ehiɛ eshwieɔ jeŋba shara nɔ.—Ezekiel 8:15-18.
13. Mɛɛ gbɛi anɔ nɛkɛ Yehowa Odasefoi tsiɔ amɛhe kɛjɛɔ wɔŋjamɔi sɔrɔtoi fɛɛ ni ana yɛ Ezekiel ninaa lɛ mli lɛ ahe?
13 Yehowa Odasefoi kpooɔ wɔŋjamɔi loo amaga jamɔi sɔrɔtoi ni yaa nɔ yɛ Kristendom loo mfonirifeemɔ mli Yerusalem, taakɛ Ezekiel tsɔ hiɛ ena lɛ. Wɔjaaa okadii ni gbeɔ Nyɔŋmɔ he guɔ. Eyɛ mli akɛ wɔjieɔ bulɛ kpo wɔtsɔɔ nɔyeli “hegbɛi ni yeɔ nɔ” lɛ moŋ, shi husu yɛ heshibaa ni wɔfeɔ wɔhaa amɛ lɛ mli. (Romabii 13:1-7; Marko 12:17; Bɔfoi lɛ Asaji 5:29) Wɔtuu wɔtsui wɔha Nyɔŋmɔ kɛ e-Maŋtsɛyeli lɛ. Wɔkɛ sutsakemɔ ni akaa yiŋ awieɔ lɛ etooo Bɔlɔ lɛ kɛ enibɔɔ lɛ najiaŋ. (Kpojiemɔ 4:11) Wɔkɛ woo haaa krɔss lɛ ni wɔjaaa woloŋlee, jeŋ nilee loo adesai anileei krokomɛi lɛ. (1 Timoteo 6:20, 21) Wɔtsiɔ wɔhe kɛjɛɔ wɔŋjamɔi sɔrɔtoi fɛɛ he. Mɛni ji enɛɛmɛi ateŋ ekomɛi?
Wɔŋjamɔi Krokomɛi
14. Mɛɛ shidaamɔ Yehowa tsuji kɔɔ yɛ Kpojiemɔ 13:1 “kooloo” lɛ he?
14 Kristofoi fataaa gbɔmɛi ahe yɛ jamɔ ni amɛkɛhaa okadi “kooloo” lɛ mli.” Bɔfo Yohane kɛɛ: “Ni mina kooloo ko miije kpo kɛmiijɛ ŋshɔ lɛ mli kɛmiiba ni eyɛ akolontoi nyɔŋma kɛ yitsei kpawo, ni maŋtsɛfaii nyɔŋma bumɔ ekolontoi lɛ anɔ . . . Ni mɛi fɛɛ ni yɔɔ shikpɔŋ lɛ nɔ lɛ aaaja lɛ.” (Kpojiemɔ 13:1, 8) Kooloi baanyɛ afee “maŋtsɛmɛi” loo maŋkwramɔŋ hewalɛi ahe mfoniri. (Daniel 7:17; 8:3-8, 20- 25) No hewɔ lɛ, okadi kooloo lɛ yitsei kpawo lɛ damɔ shi kɛha jeŋ hewalɛi—Mizraim, Ashur, Babilon, Media kɛ Persia, Hela, Roma, kɛ Anglo-Amerika ni efee ekome ni ji Britania kɛ U.S.Amerika ni efee ekome lɛ. Kristendom osɔfoi lɛ ebuuu Nyɔŋmɔ kɛ Kristo kwraa yɛ gbɔmɛi ahiɛ ni amɛnyiɛ kɛyaja Satan, “je nɛŋ lumɔ lɛ” maŋkwramɔŋ gbɛjianɔtoo lɛ hewɔ. (Yohane 12:31) Shi, ákɛ Kristofoi ni kɛ amɛhe wooo maŋ saji amli kɛ mɛi ni fiɔ Maŋtsɛyeli lɛ sɛɛ lɛ, Yehowa tsuji kpooɔ amaga kɛ wɔŋjamɔ ni tamɔ nɛkɛ.—Yakobo 1:27
15. Te Yehowa webii buɔ mɛi ni jieɔ mɛi ahiɛtserɛ yɛ je lɛ mli lɛ amɛhaa tɛŋŋ, ni mɛni Odasefonyo ko wie yɛ enɛ he?
15 Nyɔŋmɔ webii tsiɔ amɛhe hu kɛjɛɔ jamɔ ni amɛkɛaaha mɛi ni jieɔ mɛi ahiɛtserɛ kɛ mɛi ni shiɔ akaŋ yɛ je nɛŋ lɛ he. Beni lalafolɔ ko ni jieɔ mɛi ahiɛtserɛ batsɔ Yehowa Odasefonyo lɛ, ekɛɛɛ “Lalai ni akɛjieɔ mɛi ahiɛtserɛ ni akɛjooɔ lɛ baanyɛ atee akɔnɔi ni esaaa shi . . . Mɔ ni jieɔ mɛi ahiɛtserɛ lɛ laa miishɛɛ kɛ mlijɔlɛ lala ni ekolɛ toibolɔi pii baanu he akɛ elaaje yɛ amɛ gbalashihilɛ mli hefatalɔ lɛ he lɛ ahe saji. Abaleɔ lalafolɔ lɛ yɛ bei pii amli akɛ su ni ehiɛ lɛ he lala elaa lɛ. Mɛi ni kɛ lalafoo kɛ saŋkutswaa efee amɛnitsumɔ lɛ ateŋ mɛi pii ni mile lɛ ji mɛi ni yei sumɔɔ amɛsane waa. Kɛ mɔ ko na ekɛ ehe wo nɛkɛ jeŋ yaka yiŋsusumɔ nɛɛ mli pɛ lɛ, nɔ ni ebaanyɛ ekɛba ji lalafolɔ lɛ ni ajaa lɛ. Ebaanyɛ eje shishi kɛ lalafolɔ lɛ waonaa gbɛi kɛkɛ ni aaabi ni eŋma eha mɛi ni amɛkɛto. Shi mɛi komɛi hu susuɔ lalafolɔ nɛɛ he akɛ amɛ nɔkwɛmɔnɔ kpakpa ko, ni amɛkɛ bulɛ loo woo ni esaaa haa lɛ, ni amɛfeɔ lɛ amɛ nyɔŋmɔ. Ekolɛ amɛkɛ gbɔmɔ nɛɛ mfoniri tsotsoroɔ asa nɔ ni amɛjeɔ shishi amɛwoɔ atadei taakɛ ewoɔ lɛ ni amɛsaa amɛhe hu taakɛ efeɔ lɛ pɛpɛɛpɛ. Esa akɛ Kristofonyo aha ahi amɛjwɛŋmɔ mli akɛ yijiemɔ kɛ mɔ kotomɔ lɛ Nyɔŋmɔ pɛ akɛhaa.”
16. Mɛni tsɔɔ akɛ ŋwɛibɔfoi jalɔi lɛ kpooɔ wɔŋjamɔ?
16 Hɛɛ, Nyɔŋmɔ pɛ sa yijiemɔ loo jamɔ. Beni Yohane ‘ho ebu shi koni eja yɛ bɔfo ni tsɔɔ lɛ naakpɛɛ nibii lɛ naji anaa’ lɛ, nakai mumɔŋ bɔɔ nɔ lɛ ekpɛlɛɛɛ akɛ aaaja lɛ yɛ gbɛ ko gbɛ ko nɔ, shi moŋ ekɛɛ: “Kaakwɛ ni ofee! Ejaakɛ onaanyo tsulɔ kɛ onyɛmimɛi kɛ gbalɔi kɛ mɛi ni toɔ nɛkɛ wolo nɛɛ mli wiemɔi lɛ ateŋ mɔ ko ji mi; Nyɔŋmɔ moŋ oja!” (Kpojiemɔ 22:8, 9) Yehowa gbeyeishemɔ, loo woo ni mli kwɔ waa kɛha lɛ lɛ haa wɔjaa lɛ pɛ. (Kpojiemɔ 14:7) No hewɔ lɛ anɔkwa Nyɔŋmɔ jamɔ hetuu-kɛhamɔ buɔ wɔhe kɛjɛɔ wɔŋjamɔ he.—1 Timoteo 4:8.
17. Te wɔɔfee tɛŋŋ wɔtsi wɔhe kɛjɛ bɔlɛnamɔ mli jeŋba shara ni ji wɔŋjamɔ lɛ he?
17 Bɔlɛnamɔ jeŋba shara ji wɔŋjamɔ loo amaga jamɔ kroko ni Yehowa tsuji kpooɔ. Amɛle akɛ “ajwamaŋbɔlɔ ko ajwamaŋbɔlɔ ko aloo nyaŋemɔ nitsulɔ ko aloo hiɛjoolɔ ko—ni ji wɔŋjalɔ—bɛ gbɛnaa yɛ Kristo kɛ Nyɔŋmɔ maŋtsɛyeli lɛ mli.” (Efesobii 5:5) Enɛ kɔɔ wɔŋjamɔ he ejaakɛ bɔ ni akɔnɔ fɔŋ baa mɔ tsine ehaa lɛ batsɔɔ nɔ ko ni atuɔ he ahaa. Bɔlɛnamɔ mli akɔnɔi ni esaaa kɛ Nyɔŋmɔ gbeyeishemɔ sui kpakpai woɔ oshara mli. Kɛ mɔ ko kɛ ehiŋmɛii kɛ etoii ha yakayaka mfonirii akwɛmɔ lɛ, mɔ lɛ fiteɔ wekukpaa kpakpa ni ekolɛ eka ekɛ Yehowa, Nyɔŋmɔ ni yɔɔ krɔŋkrɔŋ lɛ teŋ lɛ. (Yesaia 6:3) Belɛ bɔni afee ni wɔtsi wɔhe kɛjɛ wɔŋjamɔ ni tamɔ nɛkɛ he lɛ, esa akɛ Nyɔŋmɔ tsuji atsi amɛhe kɛjɛ yakayaka mfonirii akwɛmɔ kɛ lalai ni fiteɔ mɔ lɛ ahe. Ehe miihia ni amɛkɛ amɛhe akpɛtɛ mumɔŋ nibii ni sɛɛnamɔ yɔɔ he ni damɔ Ŋmalɛi lɛ anɔ lɛ ahe, ni esa akɛ amɛya nɔ amɛwo “gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.”—Efesobii 4:22-24.
Kwa Hiɛjoomɔ kɛ Hiɛkɔ̃ɔ
18, 19. (a) Mɛni ji hiɛjoomɔ kɛ hiɛkɔ̃ɔ? (b) Te wɔɔfee tɛŋŋ wɔtsi wɔhe kɛjɛ hiɛjoomɔ kɛ hiɛkɔ̃ɔ ni ji wɔŋjamɔ lɛ he?
18 Kristofoi tsiɔ amɛhe kɛjɛɔ hiɛjoomɔ kɛ hiɛkɔɔ ni tamɔ wɔŋjamɔ nifeemɔi lɛ ahe. Hiɛjoomɔ ji nɔ ko he akɔnɔ babaoo ni anaa fe nine, ni hiɛkɔɔ ji mɔ ko nii ni eyɔɔ lɛ ni hiɛ kɔɔ nɔ loo ashweɔ ni nine ashɛ nɔ. Yesu bɔ kɔkɔ eshi hiɛkɔ̃ɔ, ni ewie niiatsɛ ni hiɛ kɔ̃ɔ nii anɔ ni eninamɔ lɛ he baaa sɛɛnamɔ kɛhaaa lɛ yɛ egbele be mli akɛni “ejeee niiatsɛ yɛ Nyɔŋmɔ gbɛfaŋ” lɛ he. (Luka 12:15-21) Paulo wo nanemɛi heyelilɔi lɛ ŋaa yɛ gbɛ ni sa nɔ akɛ: “Nyɛgbea nyɛhe nii ni yɔɔ shikpɔŋ lɛ nɔ lɛ yɛ . . . hiɛjoomɔ ni ji wɔŋjamɔ lɛ gbɛfaŋ.” (Kolosebii 3:5, NW.
19 Mɛi ni shika suɔmɔ eye amɛ sɛkɛ, ni feɔ fu loo hahaaha yɛ ninumɔ kɛ niyeli he, loo ni amɛhiɛ edɔ ni mɛi anɔ hewalɛ ni amɛaana miiba amɛtsine lɛ feɔ nɛkɛ akɔnɔi loo tsinebaa nii nɛɛ amɛ nyɔŋmɔi loo amɛ amagai. Taakɛ Paulo tsɔɔ mli lɛ, hiɛjoolɔ lɛ, wɔŋjalɔ ji lɛ, ni enine shɛŋ Nyɔŋmɔ Maŋtsɛyeli lɛ nɔ. (1 Korintobii 6:9, 10; Efesobii 5:5) No hewɔ lɛ, abaanyɛ ashwie aŋkroaŋkroi ni abaptisi amɛ ni kɛ amɛhe woɔ wɔŋjamɔ mli akɛ hiɛjoolɔi lɛ kɛjɛ Kristofoi asafo lɛ mli. Shi kɛ wɔkɛ Ŋmalɛi lɛ tsu nii ni wɔkɛ hiɛdɔɔ sɔle lɛ, wɔbaanyɛ wɔtsi wɔhe kɛjɛ hiɛjoomɔ he. Abɛi 30:7-9 kɛɔ akɛ: “Nibii enyɔ mibiɔ yɛ odɛŋ Yehowa Nyɔŋmɔ; kaakama mi, dani magbo. Jiemɔ yakayaka nii kɛ amale yɛ mihe kɛya sɛɛ fɛlɛŋŋ; kaaha miye ohia lɛ, asaŋ kaaha mina nii; lɛɛ mi kɛ niyenii ni sa mi, koni mikatɔ tsɔ, ni mikwao, ni mikɛɛ akɛ: ‘Namɔ ji Yehowa?’ Loo ohia miihia mi, ni miyaju, ni mitɔ mi Nyɔŋmɔ lɛ gbɛi anɔ.” Mumɔ loo su ni tamɔ nɛkɛ baaye abua wɔ ni wɔtsi wɔhe kɛjɛ hiɛjoomɔ kɛ hiɛkɔɔ ni ji wɔŋjamɔ lɛ ahe.
Tsi Ohe Kɛjɛ Bo Diɛŋtsɛ Ohe ni Oooja akɛ Wɔŋ lɛ He
20, 21. Te Yehowa webii feɔ tɛŋŋ amɛtsiɔ amɛhe kɛjɛɔ amɛ diɛŋtsɛ amɛhe ni amɛaaja lɛ he?
20 Yehowa webii tsiɔ amɛhe kɛjɛɔ amɛ diɛŋtsɛ amɛhe ni amɛaaja tamɔ wɔji lɛ he. Efɔɔɔ kaa yɛ je nɛŋ akɛ mɔ ko aaaja lɛ diɛŋtsɛ ehe kɛ esuɔmɔnaa nii. Gbɛihemɔ kɛ anunyam taomɔ haa mɛi komɛi feɔ nii yɛ gbɛi ni ejaaa nɔ. Amɛmiisumɔ ni afee amɛ suɔmɔnaa nii, shi jeee Nyɔŋmɔ suɔmɔnaa nii. Shi wɔnyɛŋ wɔkɛ Nyɔŋmɔ abɔ kɛji akɛ wɔŋmɛɛ wɔhe wɔha wɔ diɛŋtsɛ wɔhe jamɔ kɛtsɔ wɔ diɛŋtsɛ wɔ suɔmɔnaa nii ni wɔɔha afee ni wɔye mɛi krokomɛi anɔ nuŋtsɔmɛi asane lɛ nɔ. (Abɛi 3:32; Mateo 20:20-28; 1 Petro 5:2, 3) Akɛ Yesu sɛɛnyiɛlɔi lɛ, wɔgu je nɛŋ hiɛgbejianii loo shishiumɔ nii lɛ.—2 Korintobii 4:1, 2.
21 Ni Nyɔŋmɔ webii aaatao akɛ amɛaana gbɛi moŋ lɛ, amɛboɔ Paulo ŋaawoo nɛɛ toi: “Kɛ nii nyɛyeɔ jio, nii nyɛnuɔ jio, aloo nɔ kroko ni nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam.” (1 Korintobii 10:31) Akɛni wɔji Yehowa tsuji hewɔ lɛ, wɔmaaa nɔ mi akɛ afee wɔ suɔmɔnaa nii tamɔ oookɛɛ wɔji nyɔŋmɔi ni sa jamɔ, shi moŋ wɔkɛ miishɛɛ feɔ ŋwɛi suɔmɔnaa nii lɛ, ni wɔkpɛlɛɔ gbɛtsɔɔmɔ nɔ kɛjɛɔ “tsulɔ anɔkwafo kɛ nilelɔ” lɛ ŋɔɔ, ni wɔkɛ Yehowa gbɛjianɔtoo lɛ feɔ ekome kɛmɔɔ shi.—Mateo 24:45-47.
Nyɛkwɛa Nyɛhe nɔ Jogbaŋŋ!
22, 23. Mɛɛ gbɛ nɔ wɔɔtsɔ wɔya nɔ wɔtsi wɔhe kɛjɛ wɔŋjamɔ nifeemɔi sɔrɔtoi fɛɛ he?
22 Akɛ Yehowa webii lɛ, wɔkulaaa shi yɛ amagai ni afee amɛ lɛ ahiɛ. Wɔtsiɔ wɔhe kɛjɛɔ wɔŋjamɔi ni yɔɔ nigii lɛ hu he. Yɛ anɔkwale mli lɛ, esa akɛ wɔya nɔ wɔkwa wɔŋjamɔi sɔrɔtoi lɛ fɛɛ. No hewɔ lɛ, wɔyeɔ Yohane ŋaawoo nɛɛ nɔ: “Nyɛkwɛa nyɛhe ni ahia yɛ wɔji ahewɔ.”—1 Yohane 5:21.
23 Kɛ oji Yehowa tsuji lɛ ateŋ mɔ kome lɛ, no lɛ okɛ ohenilee ni Biblia etsɔse lɛ lɛ kɛ ojwɛŋmɔŋ nyɛmɔi lɛ atsu nii be fɛɛ be. (Hebribii 5:14) Kɛkɛ lɛ je lɛ wɔŋjamɔ sui lɛ woŋ ohe muji, shi moŋ obaatamɔ Hebribii anɔkwafoi etɛ lɛ kɛ mra be mli Kristofoi anɔkwafoi lɛ. Okɛ hetuu kɛ hamɔ baaha Yehowa pɛ, ni ebaaye ebua bo ni oya nɔ otsi ohe kɛjɛ wɔŋjamɔ nifeemɔi sɔrɔtoi fɛɛ he.
Te Osusuɔ He Ohaa Tɛŋŋ?
◻ Mɛɛ gbɛ nɔ Yehowa Odasefoi kpooɔ wɔŋjamɔ nifeemɔi ni ana yɛ Ezekiel ninaa lɛ mli lɛ?
◻ Mɛni ji kooloo’” lɛ ni yɔɔ (Kpojiemɔ 13:1) lɛ ni mɛɛ shidaamɔ Yehowa tsuji kɔɔ yɛ enɛ he?
◻ Mɛni hewɔ esa akɛ wɔtsi wɔhe kɛjɛ mɛi ni jieɔ mɛi ahiɛtserɛ kɛ akaŋshilɔi ni ehe gbɛi ni ajaa amɛ lɛ he?
◻ Te wɔɔfee tɛŋŋ wɔtsi wɔhe kɛjɛ wɔ diɛŋtsɛ wɔhe ni wɔɔja tamɔ nyɔŋmɔ ko lɛ he?
◻ Mɛni hewɔ esa akɛ wɔya nɔ wɔtsi wɔhe kɛjɛ wɔŋjamɔ nifeemɔi sɔrɔtoi fɛɛ he?
[Mfoniri ni yɔɔ baafa 26]
Ani ole bɔ ni nihii nii ni ana yɛ Ezekiel ninaa la mli feɔ Kristendom wɔŋjamɔ kɛ amaga jamɔ he mfoniri Iɛ?
[He ni Sane lɛ Jɛ]
Mfoniri (ŋwɛi gbɛ abɛku) lɛ damɔ mfoniri ni Ralph Crane/Bardo Museum sha lɛ nɔ