Yehowa Gbɛjianɔtoo Lɛ Ni Mikɛda Yɛ South Africa

Taakɛ Frans Muller gba

BENI minyɛminuu nukpa David kɛ mi bɛŋkɛɔ gbɛkɛnaashi oketeke ni wɔfɔɔ mli tamɔ kɛjɛɔ Cape Town oketeke shidaamɔ he wulu fe fɛɛ lɛ, wɔhiɛ fee wɔ yaa beni wɔna ni aŋma akɛ “Mɛi Yɛji Pɛ” lɛ. Nationalist Kuu lɛ ji mɛi ni ye oshiki ni afɔ yɛ 1948 lɛ mli kunim, ni amɛkɛ mla ko ni ji hewolonɔ su mligbalamɔ ba.

Shi yɛ anɔkwale mli lɛ, hewolonɔ su mligbalamɔ lɛ etee nɔ aahu yɛ South Africa, taakɛ eji yɛ Afrika maji pii anɔ beni amɛyɔɔ maŋsɛɛ nɔyelii ashishi lɛ. Shi amrɔ nɛɛ akɛ mla miifi sɛɛ, ni aŋmɛɛɛ wɔ gbɛ ni wɔkɛ South Afrikabii krokomɛi ni hewolonɔ diɔ fe wɔ lɛ ata oketeke tsu kome mli dɔŋŋ. Afii nyɔŋmai ejwɛ kɛ enumɔ sɛɛ lɛ, agbɛnɛ aajie hewolonɔ sui amligbalamɔ nɛɛ kwraa.

Beni mla fiɔ hewolonɔ sui amligbalamɔ, ni kɛ kaa ba wɔsɔɔmɔ nitsumɔ lɛ nɔ, yɛ bɔ ni kulɛ wɔbaasumɔ wɔtsu lɛ wɔha hewɔ lɛ mli fɛɛ lɛ, no mli lɛ miisɔmɔ akɛ Yehowa Odasefonyo be-fɛɛ sɔɔlɔ. Amrɔ nɛɛ miye afii 65, shi minyɛɔ mikaiɔ shweremɔ ni yɔɔ naakpɛɛ ni eba yɛ Yehowa asafo lɛ mli yɛ Afrika wuoyigbɛ lɛ, ni miida shi waa yɛ hegbɛ ni mina akɛ mada yɛ mli lɛ he.

Kristofoi Agboshinii Ko

Beni mitsɛ ji obalanyo lɛ, ehaa ekaneɔ Biblia lɛ daa leebi maaŋkpa etsɔɔ minii. Be fioo sɛɛ lɛ, Ataa bana suɔmɔ ní mli wa kɛha Nyɔŋmɔ Wiemɔ lɛ. Beni afɔ mi yɛ 1928 mli lɛ, no mli lɛ mitsɛ miisɔmɔ yɛ Dutch Reformed Church ní yɔɔ Potgietersrus lɛ sɔlemɔ ajinafoi akuu lɛ mli. Nakai afi lɛ mli lɛ, mitsɛkwɛ ko ha lɛ The Harp of God wolo lɛ ekome.

Shi, Ataa kɛɛ Awo akɛ ekɛ wolo lɛ awo la mli ni eshã, ejaakɛ kuu ko ŋma. Shi ekɛto, ni gbi ko beni Ataa nine yashɛ nɔ ni ekɔ lɛ, egbele kɛtee yitso ni ji ’Ani Nyɔŋmɔ Piŋɔ Mɔ Ko?’ lɛ. Eyɛ mli akɛ eyɛ nɔmimaa waa akɛ Biblia Kaselɔi lɛ ejaaa, taakɛ atsɛɔ Yehowa Odasefoi yɛ nakai beaŋ lɛ moŋ, shi bɔ ni esumɔɔ ni ele nɔ ni yɔɔ mli lɛ ye enɔ kunim, ni ebɔi kanemɔ. Enyɛɛɛ eŋmɛɛ wolo lɛ he efɔ shi. Mra mli beni agbɛnɛ je heɔ atsɛre, ni eyaa eyakã shi lɛ, ekɛɛ: “Ma, hm, miikɛɛ bo akɛ amɛ amɛhiɛ anɔkwale lɛ.”

Enɔ jetsɛremɔ lɛ, Ataa ta baisikel nɔ shitooi 30 kɛtee eyatao woji krokomɛi babaoo kɛjɛ Biblia Kaselɔ ni bɛŋkɛ wɔ lɛ ŋɔɔ. Daa gbi lɛ, ekaneɔ nii aahu kɛyashiɔ nyɔɔŋ teŋ tɔ̃ɔ. Ebɔ mɔdɛŋ po akɛ eeetsɔ Dutch Reformed osɔfo lɛ yiŋ yɛ Biblia mli anɔkwalei ni ekaseɔ lɛ ahe, kɛ hiɛnɔkamɔ akɛ sɔlemɔ lɛ baafee tsakemɔi. Shi emɔdɛŋbɔi lɛ yeee omanye ko kwraa, no hewɔ lɛ eshi sɔlemɔ lɛ ni ekɛ ekaa bɔi shiɛmɔ. Biblia mli anɔkwale lɛ batsɔ eshihilɛ gbɛ kɛ nii ni he hiaa fe fɛɛ yɛ wɔshia lɛ. Shihilɛ ni tamɔ nɛkɛ shishi atsɔse mi yɛ.

Sɛɛ mli lɛ, Ataa batsɔ gbɛgbalɔ, loo be-fɛɛ sɔɔlɔ. Ekɛ Model T Ford momo ko ni eyɔɔ lɛ fa gbɛ shitooi babaoo ni eyashiɛ. Afii foo sɛɛ lɛ, wɔweku ni miida oyayaayai lɛ hiamɔ nii ha ekpa gbɛgbamɔ sɔɔmɔ lɛ, shi etee nɔ lolo kɛ ekaa yɛ shiɛmɔ nitsumɔ lɛ mli. Hɔgbaai komɛi yɛ ni wɔfaa gbɛ aaashɛ shitooi 60 ni wɔkɛ lɛ yashiɛɔ yɛ Pietersburg maŋ lɛ mli.

Nitsumɔ ko ni Ye Omanye

Yɛ naagbee lɛ, Ataa gbele shwapo bibioo ko ni ekɛhɔɔ guɔyeli nibii sɔrɔtoi. Etsɛɛɛ ni emli balɛɛ toi enyɔ, ni egbele shwapo ni ji enyɔ. Okwaafoi shikatsɛmɛi komɛi kɛ Ataa fee ekome yɛ nitsumɔ lɛ mli, ni yɛ be ni sa mli lɛ, amɛfee ekome kɛgbele shwapo ni abajieɔ nii yɛ mli kɛ shwapo ni akɛhɔɔ nibii hu ekpaa yɛ hei sɔrɔtoi babaoo.

Minyɛmimɛi hii onukpai lɛ ekomɛi yafata jarayeli nitsumɔ lɛ he, ni amɛna hegbɛ akɛ amɛ hu amɛaatsɔmɔ niiatsɛmɛi. Shi, wɔ mumɔŋ shihilɛ lɛ bɔi shibaa. Wɔnanemɛi kɛ wɔkuuŋbii ni ji jeŋbii lɛ babɔi wɔsane suɔmɔ, ni amɛfɔɔ wɔ nine kɛyaa amɛ okpɔlɔŋmɛɛ shishi. Ní Ataa na oshara lɛ, kɛkɛ ni etsɛ weku lɛ kɛkpe, ni ekpɛ eyiŋ akɛ ebaahɔɔ nitsumɔ lɛ koni efa kɛyahi Pretoria koni wɔnyɛ wɔtsu babaoo yɛ Yehowa sɔɔmɔ mli. Eshi shwapo kome pɛ, ni ekɛwo nitsulɔi ni ewoɔ amɛ nyɔmɔ adɛŋ ni amɛkwɛ nɔ.

Minyɛmimɛi hii onukpai, Koos kɛ David je gbɛgbamɔ shishi, ni amɛfata minyɛmiyoo onukpa, Lina he. Kɛ abua fɛɛ naa lɛ, yɛ nyɔŋ kome ko mli yɛ 1942 lɛ, wɔweku lɛ kɛ ŋmɛlɛtswai 1,000 tsu nii yɛ shiɛmɔ nitsumɔ lɛ mli. Nakai afi lɛ, mijɔɔ miwala nɔ miha Yehowa kɛtsɔ numiimɔ nɔ.

Nɔ Hewɔ ni Mishi Skul Mra Lɛ

Yɛ 1944 mli, beni Jeŋ Ta II mli ewa waa lɛ, Gert Nel, ni eji Yehowa Odasefonyo nɔkwɛlɔ gbɛfalɔ lɛ bi mi akɛ ani miito gbɛjianɔ ni mafata gbɛgbalɔi lɛ ahe lo. Ni mijie naa akɛ: “Hɛɛ, yɛ afii enyɔ mli, kɛ migbe nɔtsamɔ skul lɛ naa.”

Akɛni lɛ hu enuɔ he tamɔ bɔ ni Yehowa Odasefoi krokomɛi pii nuɔ he yɛ nakai beaŋ lɛ hewɔ lɛ, ebɔ mi kɔkɔ akɛ: “Kwɛmɔ ni ahi ni Harmagedon akabanina bo ni ota skul sɛii anɔ lolo.” Akɛni misumɔɔɔ ni ebalɛ nakai hewɔ lɛ, mikpa skul ni mibote gbɛgbamɔ nitsumɔ lɛ mli yɛ January 1, 1945.

He ni aha mi nitsumɔ yɛ klɛŋklɛŋ ji Vereeniging, yɛ Johannesburg masɛí, ni mɛi ni fata mihe ji Piet Wentzel kɛ Danie Otto. Bei pii lɛ, mikɛ nɔ ni fe ŋmɛlɛtswai 200 shiɛɔ daa nyɔŋ nɔ. Yɛ be fioo sɛɛ lɛ, aha Piet nitsumɔ kroko yɛ Pretoria maŋ lɛ mli, ni ehe bahia ni Danie akpa gbɛgbamɔ ni eyaye ebua etsɛ ni eda yɛ afii amli lɛ yɛ ŋmɔ mli. Enɛ ha ebashwɛ mikome too akɛ Odasefonyo ni baatsu shia Biblia mli nikasemɔi 23 ni yɔɔ Vereeníging lɛ ahe nii.

Yɛ no sɛɛ etsɛɛɛ lɛ, miníne shɛ wolo ko nɔ kɛjɛ nitsumɔ he nine lɛ, ni aha mi nitsumɔ kroko yɛ Pretoria. Eyɛ mli akɛ yɛ nakai beaŋ lɛ, minuuu nɔ hewɔ ni aha mi nitsumɔ hee lɛ shishi moŋ, shi sɛɛ mli lɛ, mibayoo akɛ ebafeŋ nilee gbɛ akɛ aaashi obalanyo ni eye afii 17 pɛ lɛ ni ekometoo ehi shi. Tsɔsemɔ babaoo he miihia mi lolo, ni kulɛ minijiaŋ baanyɛ aje wui.

Beni misɔmɔ yɛ Pretoria ni mina niiashikpamɔ ni he hiaa lɛ sɛɛ lɛ, afɔ mi nine akɛ mibafee gbɛgbalɔ krɛdɛɛ. Mi kɛ Piet Wentzel to gbɛjianɔ akɛ wɔkɛ sɔɔmɔ tsɔsemɔ ni anyɛɔ atsuɔ he nii baaha obalaŋtai ni baa Pretoria kɛha gbɛgbamɔ lɛ. No mli lɛ, aha Piet nitsumɔ akɛ nɔkwɛlɔ gbɛfalɔ yɛ nakai kpokpaa lɛ nɔ. Sɛɛ mli lɛ, ekɛ minyɛmiyoo Lina bote gbalashihilɛ mli, ni amrɔ nɛɛ amɛfee ekome kɛmiisɔmɔ yɛ South Africa nitsumɔ he nine lɛ.

Mɛi ni bafee gbɛgbalɔi yɛ Pretoria lɛ ateŋ mɔ kome ji Martie Vos, obalayoo ko ni he yɔɔ fɛo, ni lɛ hu atsɔse lɛ yɛ Odasefoi aweku mli. Wɔbana suɔmɔ ni mli wa wɔha wɔhe, shi no mli lɛ wɔteŋ mɔ ko yeko afii nyɔŋmai enyɔ, wɔdarako bɔ ni wɔɔbote gbalashihilɛ mli. Shi kɛlɛ, kɛ aha wɔ nitsumɔ yɛ hei krokomɛi lɛ, wɔyaa nɔ wɔŋmalaa wɔhe woji ni mɔ nɛ kɛleɔ bɔ ni mɔ nɛ yɔɔ.

Betel Sɔɔmɔ kɛ Gilead Skul

Yɛ 1948 mli lɛ, afɔ mi nine akɛ mibasɔmɔ yɛ Buu-Mɔɔ Asafo lɛ nitsumɔ he nine ni yɔɔ Cape Town lɛ. No mli lɛ, abɛ wɔɔhe kome kɛha wɔyi 17 ni wɔtsuɔ nii yɛ ɔfis tsui etɛ ni ahai kɛ woji akalamɔ nitsumɔ he bibioo ko ni bɛŋkɛ wɔ lɛ mli lɛ. Wɔteŋ mɛi komɛi kɛ wekui komɛi hi amɛshiai, ni mɛi krokomɛi hu hi wɔɔhe tsui amli.

Daa nitsumɔ gbi lɛ, Betel weku lɛ mlibii 17 lɛ buaa amɛhe naa kɛhaa leebi jamɔ yɛ hetsakemɔ he lɛ, yɛ woji akalamɔ nitsumɔ he bibioo lɛ mli. Kɛ eshɛ shwane niyelihe lɛ, esa akɛ wɔteŋ mɛi pii ato wɔ diɛŋtsɛ wɔniyenii he gbɛjianɔ. Kɛkɛ lɛ, yɛ gbi muu nitsumɔ lɛ sɛɛ lɛ, wɔkuɔ wɔsɛɛ kɛyaa hei ni wɔyɔɔ lɛ, yɛ Cape Town maŋ lɛŋ hei sɔrɔtoi. Nɛkɛ gbɛfaai nɛɛ ekome mli, taakɛ mitsi ta momo lɛ, ni mikɛ minyɛminuu David naa kpɛ wɔhe beni wɔna okadi ni akɛkpɛtɛ shi akɛ, “Mɛi Yɛji Pɛ” lɛ.

Beni miyashɛ Cape Town nitsumɔ he nine lɛ klɛŋklɛŋ kwraa lɛ, miyoo akɛ nibii pii yɛ ni makase lolo, no hewɔ lɛ mibi Nyɛminuu Phillips, wɔ nitsumɔ he nine nɔkwɛlɔ lɛ akɛ: “Mɛni sa akɛ mafee ni mihe asa?”

Ni eha mi hetoo akɛ: “Frans, kaahao ohe yɛ bɔ ni ooofee ni oha ohe asa lɛ he. Bo lɛ yaa nɔ nakai nɔŋŋ!” Mibɔɔ mɔdɛŋ be fɛɛ be akɛ mafee nakai, ni mikase akɛ kɛ mɔ ko tee nɔ ekɛ nɔ ni Yehowa gbɛjianɔtoo lɛ kɛhaa yɛ mumɔŋ niyenii kɛ gbɛtsɔɔmɔ gbɛfaŋ lɛ tsu nii lɛ, ehaa mɔ lɛ yaa nɔ edaa yɛ asafo mli.

Yɛ 1950 mli lɛ, afɔ mi nine akɛ miba Buu- Mɔɔ Biblia Skul ni yɔɔ Gilead lɛ klas ni ji 16 lɛ kɛha maŋsɛɛ sanekpakpa shiɛlɔ tsɔsemɔ. No mli lɛ skul lɛ yɛ South Lansing, yɛ New York, aaafee shitooi 250 yɛ Brooklyn kooyigbɛ, yɛ New York. Beni mikɛ be kukuoo tsuɔ nii yɛ Yehowa Odasefoi ajeŋ fɛɛ nitsumɔ he yitso lɛ yɛ Brooklyn lɛ, mi diɛŋtsɛ mina Yehowa gbɛjianɔtoo ni anaa lɛ nitsumɔ lɛ shikwɛ̃ɛ he lɛ miha mihe. Bɔ ni mɛi ni nyiɛɔ hiɛ yɛ jɛmɛ lɛ jɛɔ amɛtsui muu fɛɛ mli amɛtsuɔ nii lɛ ha mibana hiɛsɔɔ babaoo diɛŋtsɛ miha Yehowa gbɛjianɔtoo lɛ.

Mi-Sɔɔmɔ Nitsumɔ ni Tee nɔ Lɛ

Beni miku misɛɛ mitee South Africa lɛ, ahala mi akɛ misɔmɔ akɛ nɔkwɛlɔ gbɛfalɔ yɛ Transvaal kooyigbɛ, he ni atsɔse mi yɛ lɛ. Beni wɔŋmala wɔhe woji aahu afii ekpaa sɛɛ lɛ, mikɛ Martie bote gbalashihilɛ mli yɛ December 1952, ni ebafata mihe yɛ gbɛfaa nitsumɔ lɛ mli. Hiɛsɔɔ ni nyɛmimɛi Kristofoi lɛ naa yɛ wɔsaramɔi ahe lɛ haa wɔtsui nyaa kɛ miishɛɛ babaoo.

Akɛ nɔkwɛmɔ nɔ lɛ, be ko ni wɔsɔmɔɔ asafo ko yɛ okwaafoi akpokpaa ko nɔ lɛ, wɔkɛ weku ko hi shi, ni amɛkɛ dɔlɛ kpa wɔ fai akɛ amɛnaaa mliki amɛha wɔ ni wɔkɛfee tii loo kɔfe. Sɛɛ mli lɛ, wɔbana wɔle akɛ amɛhɔɔ tsinayoo kome pɛ ni amɛyɔɔ lɛ bɔni afee ni amɛna shika amɛkɛhe pɛtrol amɛwo tsɔne lɛ mli ni amɛkɛ wɔ aya shikpɔŋkuku lɛ mli hei ni jɛkɛ lɛ ni wɔyashiɛ wɔtsɔɔ okwaafoi lɛ. Wɔsumɔɔ nyɛmimɛi ni yɔɔ nakai lɛ asane waa!

Bei komɛi lɛ, minuɔ he akɛ mishɛɛɛ kɛha kpokpaa nɔ nitsumɔ lɛ, titri lɛ kɛ miitsu mɛi ni edara lɛ anaagbai ahe nii lɛ. Be ko lɛ, minu he akɛ mihenumɔi fɛɛ eta kwraa, aahu akɛ mikɛɛ Martie akɛ kɛji ena akɛ asaa aha wɔ nitsumɔ ekoŋŋ akɛ gbɛgbalɔi lɛ, ekafee lɛ naakpɛɛ, ejaakɛ mibɛ niiashikpamɔ kwraa. Ema nɔ mi eha mi akɛ eyɛ he miishɛɛ akɛ eeesɔmɔ yɛ gbɛhe fɛɛ gbɛhe mli, bei abɔ ni wɔɔnyɛ wɔhi be-fɛɛ sɔɔmɔ lɛ mli kɛkɛ.

Feemɔ wɔnaa ni kpɛ wɔhe, beni wɔyashɛ asafo ni tsa nɔ lɛ mli, ni aha wɔ nitsumɔ, yɛ wolo ni wɔnine shɛ nɔ lɛ mli, akɛ wɔyasɔmɔ yɛ kpokpaa wulu nɔ nitsumɔ lɛ mli lɛ he mfoniri okwɛ! Wɔkɛ nɔ ni miihe ashɛ afii enyɔ fa gbɛ kɛtee South Africa kɛ Namibia, ni nakai beaŋ lɛ atsɛɔ jɛmɛ South West Africa lɛ hei sɔrɔtoi. Shi, yɛ hewolonɔ sui amligbalamɔ lɛ hewɔ lɛ, bei pii lɛ wɔnitsumɔ lɛ wa. Shii abɔ ji bei ni aŋmɛɛɛ wɔ gbɛ ni wɔya mɛidiji amaji amli, ni bei komɛi lɛ, ahaaa wɔ gbɛŋmɛɛ wolo kɛha kpeei afeemɔ.

Akɛ nɔkwɛmɔ nɔ lɛ, yɛ 1960 mli lɛ, wɔnine shɛ gbɛŋmɛɛ wolo nɔ kɛha kpokpaa wulu nɔ kpee feemɔ yɛ Soweto. Nyɛmimɛi mɛidiji ni jɛ asafoi ni yɔɔ shɔŋŋ lɛ amli lɛ eyahe oketeke kɛ bɔs tikitii momo kɛha gbɛfaa lɛ, shi nɔyeli lɛ nu wɔgbɛjianɔtoo lɛ he ni efo gbɛŋmɛɛ lɛ mli. Kɛkɛ ni wɔtsɔ ŋaa gbɛ nɔ wɔyana maŋ onukpa ko ni sumɔɔ wɔsane yɛ maŋ ko ni jɛkɛmɔ ji shitooi 12, yɛ Johannesburg afã gbɛ. Ejɛ mlihilɛ mli eha wɔ he ko ni hi po fe tsutsu nɔ lɛ, ni wɔfee kpee kɛ ŋɔɔmɔ, ni mɛi ni fa fe 12,000 na he miishɛɛ!

Kwɛ bɔ ni shihilɛ lɛ etsake kwraa yɛ nyɛsɛɛ afii nɛɛ amli! Amrɔ nɛɛ ni aajie hewolonɔ sui amligbalamɔ lɛ, wɔnyɛɔ wɔkpeɔ kutuu yɛ he fɛɛ he, yɛ mɛidiji, mɛi yɛji, mulatofoi, aloo Indiabii akpokpai anɔ. Wɔ fɛɛ wɔtaa shi kutuu ni wɔnaa naanyobɔɔ mli ŋɔɔmɔ, ni hewolonɔ su kɔɔɔ he eko. Ja wiemɔ ni mɔ lɛ nuɔ lɛ pɛ tsɔɔ he ni mɔ lɛ baasumɔ ni eyata.

Dɔlɛ Sane ko ni Ba

Mra mli yɛ 1947 lɛ, mitsɛ tɔ̃ tɔmɔ wulu ko. Eshwapo, ni kɛ he ni ekɛ Awo yɔɔ lɛ teŋ jɛkɛ fe shitooi 120 lɛ babɔi shigbeemɔ ni sɛɛnamɔ jɛɛɛ mli dɔŋŋ, yɛ anɔkwa ni mɔ ni kwɛɔ nɔ lɛ yeee hewɔ, no hewɔ lɛ ekome pɛ eku esɛɛ etee jɛmɛ akɛ lɛ diɛŋtsɛ eyaakwɛ shwapo lɛ nɔ. Bɔ ni etsi ehe kɛjɛ Awo he yɛ be kpalaŋŋ mli lɛ ha eyagbee kaa mli. Nɔ ni jɛ mli ba ji akɛ, ashwie lɛ.

Enɛ ha mikɛ dɔlɛ diɛŋtsɛ bana mile akɛ, ekaa ni wɔɔna wɔha Biblia mli anɔkwale lɛ kɛkɛ faaa. Esa akɛ wɔ fɛɛ wɔkpɛtɛ Biblia shishitoo mlai ahe waa. (1 Korintobii 7:⁠5) Afii pii asɛɛ lɛ,asaa ahe Ataa ekoŋŋ akɛ Kristofoi asafo lɛ mli mɔ kome, ni ekɛ anɔkwayeli sɔmɔ aahu kɛyashi egbo yɛ 1970 mli. Minyɛ awo hu hi shi anɔkwafo aahu kɛyashi lɛ hu egbo yɛ 1991 mli.

Jɔɔmɔ Krokomɛi ni Mina

Yɛ 1958 mli lɛ, mikɛ Martie tee kpee wulu fe fɛɛ ni Yehowa Odasefoi efee da lɛ, yɛ Yankee Stadium kɛ Polo Grounds, yɛ New York. Wɔ miishɛɛ lɛ yi aahu kɛteke nɔ kɛkɛ, akɛ wɔfata Yehowa gbɛjianɔtoo ni yɔɔ naakpɛɛ nɛɛ he. Nakai gbɔmɛi babaoo ni amɛyi fa fe 253,000 lɛ ahe ni wɔfata yɛ Hɔgbaa shwane lɛ ji niiashikpamɔ ko ni wɔhiɛ kpaŋ nɔ kɔkɔɔkɔ. Wɔbasusu akɛ, yɛ anɔkwale mli lɛ, naa ‘asafo babaoo ni jɛ jeŋmaji fɛɛ mli’ lɛlɛŋ ni amɛbua amɛhe naa yɛ toiŋjɔlɛ mli. (Kpojiemɔ 7:​9, 10) Martie hi shi yɛ New York ni etee Gilead Skul lɛ, ni miku misɛɛ kɛtee kpokpaa wulu nɔ nitsumɔ lɛ mli ekoŋŋ yɛ South Africa.

Yɛ 1959 mli, beni Martie ku esɛɛ kɛjɛ Gilead Skul klas ni ji 32 lɛ eba lɛ, afɔ wɔ nine akɛ wɔbasɔmɔ yɛ South Africa nitsumɔ he nine, ni no mli lɛ eyɔɔ Elandsfontein masɛi, yɛ Johannesburg bokagbɛ lɛ. Mina asafo lɛ hiɛyaa yɛ gbɛi sɔrɔtoi babaoo nɔ, yɛ afii abɔ lɛ amli fɛɛ, titri lɛ eshweremɔ yɛ suɔmɔ kɛ mɔ hedɔɔ gbɛfaŋ. Mibana mile akɛ Yehowa kudɔɔ egbɛjianɔtoo lɛ kɛtsɔɔ Yesu Kristo nɔ, ni ekɛ mɛi hu ni kɛ amɛhe baaha lɛ baatsu nii nakai nɔŋŋ.

Yɛ 1962 mli lɛ, miku misɛɛ kɛtee Brooklyn, yɛ New York, kɛha nitsumɔ he nine he tsɔsemɔ skul lɛ yaa. Enɛ ye ebua mi waa, beni ahala mi akɛ South Africa nitsumɔ he nine lɛ nɔkwɛlɔ yɛ 1967 mli lɛ. Yɛ 1976 mli lɛ, ahala Nitsumɔ He Nine Ajinafoi Akuu, no hewɔ lɛ amrɔ nɛɛ sɔ̃ ni ji yiŋkpɛɛi ni he hiaa waa lɛ feemɔ ebakã Kristofoí onukpai enumɔ ní yɔɔ niiashikpamɔ nɔ yɛ South Africa.

Shihilɛ yɛ Hewolonɔ Sui Amligbalamɔ Shishi

Hewolonɔ sui amligbalamɔ he mlai lɛ basa wɔnitsumɔ he nine lɛ nitsumɔ he. Beni ama Elandsfontein Betel Shia lɛ yɛ 1952 mli lɛ, mla lɛ bi ni ama tsu kroko hu yɛ esɛɛ gbɛ kɛha nyɛmimɛi mɛidiji kɛ mulatofoi lɛ. Mla lɛ bi hu ni amɛye nii yɛ afa ni amɛkafutu mɛi yɛji lɛ, yɛ hei ni atsɛɔ jɛmɛ Mɛi Diji ashihilɛ hei lɛ amli. Sɛɛ mli lɛ, ato gbɛjianɔ aha amɛ koni amɛye nii yɛ Betel kpata lɛ shi. Nɛkɛ ji niyeli he gbɛjianɔtoo ni yɔɔ beni wɔtee Betel yɛ 1959 mli lɛ. Mikɛ minyɛmɔ fɛɛ ni miyɔɔ lɛ te shi miwo nɛkɛ mligbalamɔ ni damɔ hewolonɔ sui anɔ nɛɛ bɔ ni manyɛ.

Yɛ be ko sɛɛ lɛ, nɔyeli lɛ fo wolo ni ŋmɛɔ wɔnyɛmimɛi mɛidiji lɛ agbɛ koni amɛhi tsu ni yɔɔ Betel Shia lɛ sɛɛ gbɛ lɛ mli lɛ mli. Esa akɛ nyɛmimɛi lɛ ayahi mɛidiji ashihilɛ hei lɛ aaafee shitooi 12 jɛkɛmɔ. Mɛi komɛi hi shiai ni ahai mli, ni mɛi krokomɛi hu yahi hii oshijafoi ashihilɛ hei. Nɛkɛ shihilɛ ni ejaaa gbɛ nɛɛ tee nɔ nakai aahu afii babaoo.

Betel Mlilɛɛmɔ

Yɛ be ni sa mli lɛ, ehe bahia akɛ alɛɛ Elandsfontein Betel shia lɛ mli. Yɛ be mli ni wɔlɛɛ mli shii etɛ sɛɛ lɛ, agbɛnɛ wɔyashɛ wɔshikpɔŋ lɛ naagbee kwraa. Nɔyeli Kuu lɛ kɛ gbɛtsɔɔmɔ ha akɛ esa akɛ wɔyatao shikpɔŋ hee wɔhe yɛ kpokpaa nɔ he ni maŋ nɔkwɛlɔi lɛ baaŋmɛ wɔ gbɛ ni wɔma Betel tsui sɔrɔtoi, ni wɔnyɛmimɛi mɛidiji lɛ hu ahi shia lɛ mli. Daa leebi lɛ, Betel weku lɛ sɔleɔ ni Yehowa agbele gbɛ kɛha enɛ yɛ gbɛ ko nɔ.

Mɛɛ mlifilimɔ gbi po ebafee nɛkɛ, beni yɛ naagbee lɛ, wɔyana shikpɔŋ ko wɔhe yɛ Krugersdorp maŋ lɛ klotia gbɛ, yɛ Johannesburg anaigbɛ! Shi kɛlɛ, abi ni wɔma tsu kroko kwraa wɔha wɔnyɛmimɛi mɛidiji lɛ. Wɔye nɛkɛ nibimɔ nɛɛ nɔ, shi aŋmɛɛɛ wɔ gbɛ ni wɔha mɛidiji fe 20 abahi nakai tsu lɛ mli. Shi wɔdaa shi babaoo akɛ, yɛ 1980 afii lɛ teŋgbɛ lɛ, nibii babɔi tsakemɔ. Nɔyeli lɛ gbɔjɔ hewolonɔ sui amligbalamɔ he mlai lɛ amli fioo, ni atsɛ mɛidiji, mulatofoi, kɛ India nyɛmimɛi pii kɛba koni amɛbafata wɔhe kɛsɔmɔ yɛ Betel.

Amrɔ nɛɛ wɔyɛ Betel weku ni efee ekome, ni yɔɔ miishɛɛ, he ni aŋkroaŋkroi baanyɛ ahi tsui lɛ ateŋ eko fɛɛ eko ni amɛsumɔɔ mli, ni hewolonɔ su kɔɔɔ he eko. Agbɛnɛ hu, beni wɔkɛ afii babaoo epele he aahu sɛɛ lɛ, yɛ naagbee lɛ akpɛlɛ wɔnɔ yɛ mla naa akɛ jamɔ gbɛjianɔtoo. Ato maŋ lɛ mli mla naa gbɛjianɔtoo ko shishi, ni akɛwo woji amli akɛ “Yehowa Odasefoi ni Jɛ South Africa.” Amrɔ nɛɛ wɔyɛ wɔ diɛŋtsɛ wɔteŋ nyɛmimɛi ni tsuɔ gbalashihilɛ mlibotemɔ he nii, ni Maŋtsɛyeli Asai lɛ miifa babaoo yɛ mɛidiji ashihilɛ hei lɛ, tamɔ mlɛ kwɛ̃ɔ lɛ.

Kwɛ bɔ ni Yehowa gbɛjianɔtoo lɛ etee hiɛ eha kɛjɛ shishijee gbii lɛ amli beni misɔmɔɔ yɛ Cape Town nitsumɔ he nine lɛ! Kɛjɛ weku bibioo ni mɛi 17 yɔɔ mli, ni amɛbɛ Betel Shia lɛ nɔ lɛ, amrɔ nɛɛ wɔda kɛyashɛ Betel weku ni mlibii fe 460, ni wɔyɛ ŋmɛnɛŋmɛnɛ beaŋ Betel tsui sɔrɔtoi kɛ amɛmli kɔmpiutai wuji, wolo-kalamɔ tsɔnei, kɛ Betel Shia fɛfɛo hu! Hɛɛ, mina hegbɛ akɛ mikɛ Yehowa gbɛjianɔtoo lɛ aaada yɛ afii amli yɛ South Africa. Wɔyi efa kɛjɛ aaafee Maŋtsɛyeli shiɛlɔi 400 beni mije shishi yɛ sɔɔmɔ nitsumɔ lɛ mli aaafee afii 50 nɛ lɛ, kɛyashɛ nɔ ni miihe ashɛ mɛi 55,000 ŋmɛnɛ!

Midaa Yehowa shi akɛ, afii 40 ni eho lɛ mli fɛɛ lɛ, mina ŋa ni fiɔ misɛɛ waa ni fata mihe. “Mikpulu lɛ eyi kɛteke nɔ.” (Lala 23:⁠5) Mikɛ Martie fɛɛ daa shi waa akɛ wɔfata Yehowa gbɛjianɔtoo ni mumɔ kudɔɔ lɛ nɛɛ he, ni wɔtswa wɔfai shi akɛ wɔbaaya nɔ wɔsɔmɔ Yehowa yɛ eshia lɛ, yɛ Betel, ni wɔya nɔ wɔkɛ egbɛjianɔtoo ni yaa hiɛ lɛ anyiɛ be fɛɛ be.

[Shikpɔŋ he mfonirii babaoo ni yɔɔ baafa 19]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

ANGOLA

ZAIRE

ZAMBIA

ZIMBABWE

BOTSWANA

NAMIBIA

SWAZILAND

LESOTHO

SOUTH AFRICA

Pretoria

Johannesburg

Cape Town

Port Elizabeth

SOUTH ATLANTIC OCEAN

INDIAN OCEAN

MOZAMBIQUE CHANNEL

[Mfoniri ni yɔɔ baafa 20]

Piet Wentzel kɛ Frans Muller (abɛku) yɛ gbɛgbamɔ nitsumɔ lɛ mli yɛ 1945 mli

[Mfoniri ni yɔɔ baafa 23]

Fruns kɛ Martie Muller