“Maŋtsɛyeli Jajelɔi” Miitsu Nui Babaoo Amli Nii Yɛ Guyana

GUYANA.aNɛkɛ Amerindia wiemɔ nɛɛ shishi ji “shikpɔŋ ni nui babaoo yɔɔ nɔ.” Kwɛ bɔ ni etsɔɔ nɛkɛ Amerika Wuoyigbɛ ‘maŋ pɛ ni wieɔ Ŋleshi Blɔfo nɛɛ shikamɔ mli jogbaŋŋ ehaa. Faai babaoo kɛ amɛniji efolɔ shikpɔŋ lɛ mli yɛ he fɛɛ he, ni amɛlɔgɔɔ shi kɛjɛɔ Guiana Gɔji lɛ anɔ kɛtsɔmɔɔ nugbɛnumɔ kooi haai lɛ amli aahu kɛbaboteɔ Atlantik Ŋshɔ Wulu lɛ mli. Nɛkɛ nui ni hoɔ nɛɛ bafeɔ wala kpãa kɛhaa akrowai kɛ ŋmɔji babaoo ni eshwa hei ni amɛtsɔɔ lɛ.

Yehowa Odasefoi ni yɔɔ Guyana lɛ yooɔ akɛ beni Yesu gba efɔ shi akɛ “aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase” lɛ, nɔ ni baafata he hu ji sanekpakpa lɛ shiɛmɔ kɛha gbɔmɛi ni yɔɔ nɛkɛ faai ahe shikpɔŋkukuji nɛɛ anɔ lɛ. (Mateo 24:14) Enɛ hewɔ lɛ, Odasefoi akui, ni amɛteŋ mɛi pii ji gbɛgbalɔi, kɛ lɛji, agboi kɛ bibii fɛɛ, kɛ afii babaoo etsu nii aahu yɛ Guyana nui lɛ amli fɛɛ koni amɛkɛ sanekpakpa lɛ ayaha gbɔmɛi lɛ.

Bɔni afee ni eye ebua nitsumɔ lɛ, Buu Mɔɔ Asafo lɛ ni yɔɔ Guyana lɛ kɛ tso lɛji enumɔ etsu nii aahu kɛbashi ŋmɛnɛ, ní amɛgbɛi ji Maŋtsɛyeli Jajelɔ I kɛyashi Maŋtsɛyeli Jajelɔ V. Amɛji tso lɛji ni kɛlɛmɔ ji ninetalɔi 24, ni amɛyiteŋ kãmɔ, kɛ amɛshishi V, ni afɔɔ amɛ tsɛmɔ akɛ balahoo, ni Odasefoi aweku ko kpɛɔ ni amɛsaa hu. Odasefoi ni jɛ maŋ lɛ mli lɛ kɛ miishɛɛ tsɛɔ amɛ akɛ Jajelɔi, shi akɛ klɛŋklɛŋ lɛji enyɔ ni akɛje nitsumɔ lɛ shishi lɛ ekpa nitsumɔ yɛ afii babaoo ni amɛsɔmɔ lɛ sɛɛ. Shi, nɔmba III, IV, kɛ V miitsu nii kɛ hewalɛ lolo yɛ Pomeroon, Mahaica, kɛ Demerara faai lɛ anɔ.

Yɛ Demerara Faa lɛ Nɔ

Yɛ Britain kɛ Europa hei komɛi nɛkɛ lɛ, ekolɛ wiemɔ “demerara” lɛ haa akaiɔ kristalo ko ni su tamɔ wuɔfɔ ni asara su fioo yɔɔ mli, ní afeɔ kɛjɛɔ shɛ̃ mli, titri lɛ nɔ ni adũɔ yɛ ŋmɔi wuji ni yɔɔ faa nɛɛ naabui ni ŋmɔtɔ babaoo yɔɔ jɛmɛ lɛ amli lɛ. Yɛ faa lɛ anaigbɛ toi lɛ, gbɛ ni jɛɔ ŋshɔ lɛ naa lɛ tãa yɛ he ni shɛ̃ ŋmɔji lɛ asɛɛ foɔ yɛ lɛ. Kɛjɛ jɛmɛ kɛyaa lɛ, Odasefoi lɛ kɛ amɛhe fɔɔ Maŋtsɛyeli Jajelɔ lɛji lɛ anɔ ni amɛkɛ shɛɛ sane ni ŋɔɔ ni kɔɔ Yehowa Maŋtsɛyeli lɛ he lɛ abaha mɛi ni yɔɔ faai lɛ atoi lɛ​—Hindubii, Muslimbii, kɛ mɛi ni tsɛɔ amɛhe Kristofoi lɛ hu.

Shiɛmɔ he tafaai yɛ Demerara faa lɛ nɔ baanyɛ afee gbi kome gbɛfaa aloo ebaanyɛ eye otsii saŋŋ, kɛjɛ shimaa he kome kɛtee shimaa he kroko, kɛjɛ leebi kɛyashi gbɛkɛ. Kɛji abaawɔ yɛ gbɛfaa lɛ mli lɛ, jeee niyenii pɛ gbɛgbalɔi lɛ hoɔ amɛyeɔ yɛ lɛlɛ lɛ mli kɛkɛ, shi amɛwɔɔ mli hu. Kɛ je na lɛ, akɛ Jajelɔ lɛ fiɔ tsei ni yɔɔ faa lɛ mli lɛ eko aloo akɛfiɔ nɔ ko yɛ lɛji adaamɔ he lɛ kɛ eko yɛ. Akɛ tsei ni kɛlɛmɔ shɛɔ ninetalɔ kpaanyɔ emamɔ shi yɛ lɛlɛ lɛ hiɛ kɛ esɛɛ. Akɛ kpaa fiɔ nɛkɛ tsei ni mamɔ shi jaŋŋ nɛɛ ayiteŋ ni alɛɛɔ abalaa agbo ko mli akɛhaa yiteŋ ní efeɔ tamɔ tsu ni awo, loo nɔhaanɔ. Amɛkamɔɔ ŋmoŋmloi anɔ akɛ saatsei, ni kuŋtu kɛ saanɔbo amɛkɛfeɔ bɛle amɛkaa nɔ. Shi kɛlɛ, wɔ nyɔɔ amɛnɔ oya nɔŋŋ yɛ gbi kakadaŋŋ lɛ sɛɛ.

Abi gbɛgbalɔi lɛ akɛ: “Ani nyɛkɛ nu ní hiɛ ewo muji lɛ juɔ nyɛhe?”

Ni amɛha hetoo akɛ: “Dabi, ja wɔnaaa nu kpakpa! Be fɛɛ be ni wɔtsɔɔ nu ŋma faa bibii lɛ eko nɔ lɛ, wɔyɛɔ nu lɛ eko wɔwoɔ wɔnibii lɛ amli obɔbɔ kɛha nihoomɔ, numɔ, kɛ hejuu.”

Awo amɛtsuishiŋmɛɛ lɛ he nyɔmɔ kɛ niiashikpamɔi babaoo ni ŋɔɔ. Be ko lɛ, nuu ko ba lɛji adaamɔ he lɛ, ni ebadamɔ shi ni egbɛ enaji kɛ eniji fɛɛ mli, ni ebɔi wɔ kwɛmɔ kɛ miishɛɛ. Ni ekane gbɛi ni aŋma yɛ lɛlɛ lɛ yitsogbɛ lɛ waa akɛ: “Maŋtsɛyeli Jajelɔ V!” “Miheɔ miheɔ akɛ Yehowa Odasefoi ji nyɛ. Nyɛ pɛ nyɛkɛ gbɛi ‘maŋtsɛyeli’ lɛ tsuɔ nii yɛ nɛkɛ gbɛ nɔ. Nyɛyɛ nyɛ Maŋtsɛyeli Asa, kɛ agbɛnɛ Maŋtsɛyeli Jajelɔ.”

Kɛjɛ Gilead Kɛtee Pomeroon Faa lɛ He

Nitsumɔ yɛ Pomeroon Faa lɛ naa yɛ sɔrɔto fioo, taakɛ Frederick McAlman kaiɔ lɛ. Beni egbe nikasemɔ naa yɛ Buu-Mɔɔ Biblia Skul ni yɔɔ Gilead lɛ yɛ 1970 mli lɛ sɛɛ afi mli lɛ, eba Charity, ni ji faa naa akrowa ko ni jɛkɛmɔ aaafee shitooi 21 yɛ Pomeroon faa lɛ bokagbɛ, he ni Maŋtsɛyeli shiɛlɔi akuu ni ji mɛi enumɔ komɛi yɔɔ lɛ.

Nyɛminuu McAlman kaiɔ akɛ: “Afii enumɔ sɔŋŋ ho, ni wɔkɛ tablɔŋ wiriɔ Jajelɔ II lɛlɛ lɛ kɛ ‘miishɛɛ’ kɛyaa kɛbaa aahu yɛ Pomeroon faa lɛ nɔ dani wɔna tsɔne ní akɛkpɛtɛɔ lɛlɛ he lɛ eko ni akɛtsu nii dã, ni hewalɛ shɛɔ okpɔŋɔi ekpaa ahewalɛ. Akɛni wɔwiriɔ kɛyaa faa lɛ shishigbɛ hewɔ lɛ, wɔnyɛɔ wɔshiɛɔ yɛ faa lɛ bokagbɛ toi lɛ fɛɛ aahu kɛyashɛɔ Hackney tɔ̃ɔ, ni jɛmɛ kɛ faa lɛ naa feɔ shitooi kpawo. Kɛ wɔshɛ jɛmɛ, wɔwɔɔ yɛ Nyɛmiyoo DeCambra, ni ji yoo ni fɔɔ mɔ ni tsuɔ nii yɛ jɛmɛ fɛɛ lɛ shia ni wɔhe jɔɔ wɔ jogbaŋŋ. Enɔ jetsɛremɔ leebi mra lɛ, wɔtsaa nɔ kɛyaa faa lɛ naabu dani wɔfoɔ faa lɛ kɛyaa anaigbɛ naabu lɛ. Kɛkɛ lɛ wɔtsu nii aahu kɛku wɔsɛɛ shitooi 21 kɛtee Charity.”

Tsɔne ni hewalɛ shɛɔ okpɔŋɔi ekpaa ahewalɛ lɛ sɔmɔ amɛ aahu afii nyɔŋma. Kɛkɛ ni, yɛ 1986 mli lɛ, akɛ ekroko ni hiɛ okpɔŋɔi 15 hewalɛ baye najiaŋ. Yɛ be mli ni ekɛ anɔkwayeli esɔmɔ aahu yɛ Pomeroon faa lɛ nɔ fe afii 21 sɔŋŋ lɛ, Nyɛminuu McAlman baanyɛ ekɛ miishɛɛ henumɔ ko akwɛ nii ni anyɛ atsu ni ji Maŋtsɛyeli Asa hee ni ama yɛ Charity, ni amrɔ nɛɛ asafo kɛ emli shiɛlɔi 43, ni jɛɔ faa lɛ ŋwɛi kɛ eshishi gbɛ fɛɛ kɛfeɔ kpee lɛ. Kɛ aja mli lɛ mɛi ni baa kpee daa lɛ ayi fa fe mɛi 60, ni yɛ Yesu Kristo gbele lɛ Kaimɔ ni afee yɛ 1992 mli lɛ shishi lɛ, amɛna mɛi ni shɛɔ 19O sɔŋŋ!

“Buu-Mɔɔ Nuu” lɛ Taomɔ

Ju ji jarawoo gbi yɛ Charity. No hewɔ lɛ eji be ni hi jogbaŋŋ kɛha sanekpakpa lɛ shiɛmɔ, ni Odasefoi lɛ yaa jɛmɛ kɛ Buu-Mɔɔ kɛ Awake! woji tɛtrɛbii lɛ. Gbi ko yɛ 1970 afii lɛ shishijee gbɛ lɛ, Monica Fitzallen ni jɛ Warimuri yɛ Moruka faa lɛ he lɛ bajara nɔ ni ehe woji tɛtrɛbii enyɔ kɛjɛ Nyɛminuu McAlman ŋɔɔ. Shi beni eyashɛ shia lɛ, ekota woji tɛtrɛbii lɛ ni ekɛtsɛ etadei ashishi yɛ atadei adeka mli.

Monica kaiɔ akɛ: “Woji lɛ hi jɛmɛ afii enyɔ sɔŋŋ ni mikaneee. Kɛkɛ ni hela bamɔ mi ni mihi saa mli be saŋŋ. Beni mihe waa mi lɛ, mibɔi woji fɛɛ ni miyɔɔ ni anyɛɔ akaneɔ lɛ taomɔ jogbaŋŋ yɛ shia lɛ mli fɛɛ koni mana nɔ ko makane ni mihe akafee shoo. Yɛ naagbee lɛ, mikai woji tɛtrɛbii enyɔ lɛ yɛ atadei adeka lɛ mli in mibɔi amɛmli kwɛmɔ.” Eyoo anɔkwale ni jijeɔ yɛ mli lɛ amrɔ nɔŋŋ.

Beni Monica na hewalɛ lɛ, ekɛɛ ewu Eugene, koni eyatao nitsumɔ yɛ Pomeroon faa lɛ masɛi gbɛ bɔni afee ni lɛ yoo lɛ anyɛ atao obalanyo ni kɛ woji tɛtrɛbii lɛ ha lɛ lɛ. Eugene kpɛlɛ, shi he ni ena nitsumɔ yɛ pɛ ji ŋmɔ ko mli yɛ Pomeroon faa lɛ masɛi otsi kome, kɛjɛ Ju kɛyashi Hɔɔ shwane.

Beni shɛɔ nakai Hɔɔ lɛ, no mli lɛ Monica enako nuu ni kɛ woji tɛtrɛbii lɛ ha lɛ lɛ lolo. Aaafee shwane mli lɛ, ebi ewu akɛ bɔ ni nu lɛ hoɔ lɛ, ani amɛbaanyɛ amɛwiri kɛya Charíty ni amɛyatao “Buu-Mɔɔ Nuu” lɛ lo. Beni ewie egbe naa nɔŋŋ pɛ kɛkɛ ni amɛnu naji anaa yɛ ablanaa lɛ nɔ ni amɛna nyɛmiyoo ko kɛ ehiɛ ŋmɔlɔŋmɔlɔ ni eeba koni ekɛ woji tɛtrɛbii heei ni eba lɛ eko abaha amɛ. Monica bi lɛ akɛ: “Ani Buu-Mɔɔ bii lɛ ateŋ mɔ ko ji bo?” Ebi lɛ saji krokomɛi babaoo efata he aahu akɛ ehe bahia ni nyɛmiyoo lɛ aku esɛɛ kɛya lɛlɛ lɛ mli ní eyatsɛ mɔ ko ni ebaye ebua lɛ. Ni namɔ po nɛkɛ mɔ nɛɛ baaji? Jeee mɔ ko mɔ ko fe Nyɛminuu McAlman!

Ato Biblia kasemɔ he gbɛjianɔ kɛtsɔ woloŋmaa nɔ. Be fioo sɛɛ lɛ, Monica ŋma wolo ni ekɛshiɔ Anglikan Sɔlemɔ lɛ eyaha amɛ. Yɛ hetoo-hamɔ mli lɛ, enine shɛ wolo ko nɔ kɛjɛ osɔfo lɛ dɛŋ akɛ: “Kaabo JW bii lɛ atoi. Amɛniiashishinumɔ mli kwɔɔɔ yɛ Biblia lɛ he. Maba ni mikɛ bo abasusu sane lɛ he.” Kɛbashi ŋmɛnɛ, osɔfo lɛ nyɛko eya. Yɛ nakai beaŋ lɛ, abaptisi Monica yɛ 1975 mli. No sɛɛ afi mli lɛ, abaptisi ewu hu, ní nyɛmimɛi lɛ kɛ miishɛɛ tsɛɔ lɛ Uncle Eugene lɛ, yɛ be mli ni eje gbɛ ekpa Biblia lɛ mli jogbaŋŋ lɛ sɛɛ. (Bɔfoi lɛ Asaji 17:​10, 11) Eyɛ mli akɛ he ni amɛyɔɔ lɛ kɛ asafo ni bɛŋkɛ amɛ fe fɛɛ yɛ Charity lɛ teŋ jɛkɛmɔ heɔ ŋmɛlɛtswai 12 yɛ lɛlɛ mli moŋ, shi amɛkã he amɛji shiɛlɔi ni yɔɔ ekaa waa lolo kɛbashi ŋmɛnɛ.

Sanekpakpa Shiɛmɔ Gbɛfaai Kɛtee Maŋ Muu lɛ Teŋ

Yɛ nyɛsɛɛ afii fioo nɛɛ amli lɛ, Buu Mɔɔ Asafo lɛ tsuɔ maŋsɛɛ sanekpakpa shiɛlɔi daa ni amɛfaa gbɛ kɛyaa maŋ lɛŋ shɔŋŋ. Mɛi ni jɛɔ amɛsuɔmɔ mli amɛkɛ amɛhe haa lɛ naa miishɛɛ ni jɛɔ sanekpakpa lɛ ni akɛyahaa gbɔmɛi ni yɔɔ Amerindia shikpɔji nɛɛ kɛ hei krokomɛi ni yɔɔ hei banee kɛ okwaafoi ashikpɔji anɔ kɛ maŋ te lɛŋ faa lɛ ekomɛi ahe lɛ mli baa lɛ mli ŋɔɔmɔ kɛtsɔɔ lɛji ni akɛ tsɔnei ekpɛtɛ amɛhe lɛ anɔ. Akɛni amɛji gbɛgbalɔi yɛ wiemɔ lɛ shishinumɔ diɛŋtsɛ naa hewɔ lɛ, amɛna hegbɛ akɛ amɛkɛ “Yehowa gbɛi” ni hereɔ mɔ yiwala lɛ aaaha gbɔmɛi ni yɔɔ nɛkɛ hei baneei nɛɛ amli lɛ klɛŋklɛŋ kwraa yɛ amɛshihilɛ mli. (Romabii 10:13-15) Esa akɛ nyɛmimɛi lɛ akpee jaramɔ shihilɛi pii anaa, bei komɛi lɛ amɛnyiɛɔ nu hiɛ aahu gbii etɛ dani amɛyashɛɔ nɛkɛ hei nɛɛ ekomɛi. Shi nyɔmɔwoo lɛ sa jogbaŋŋ.

Atee obalanyo ko, ni tsutsu lɛ eyaa Pentecostal sɔlemɔ lɛ, ni eyɔɔ kpokpaa ni afolɔɔ tsei yɛ jɛmɛ, yɛ Kwebanna yɛ Waini Faa lɛ masɛi lɛ ŋɔɔ yɛ maŋsɛɛ sanekpakpa shiɛmɔ he gbɛfaa ni ji klɛŋklɛŋ nɔ lɛ mli yɛ July 1991. Beni atee jɛmɛ ekoŋŋ yɛ October mli lɛ, akɛ lɛ je Biblia mli nikasemɔ shishi. No bafee klɛŋklɛŋ be ni ena yɛ lɛ diɛŋtsɛ e-Biblia mli akɛ Nyɔŋmɔ gbɛi ji Yehowa, ni Yesu jeee Ofe lɛ, ni akɛ, Triniti tsɔɔmɔ lɛ damɔɔɔ Ŋmalɛi anɔ. (Lala 83:​19; 1 Korintobii 11:⁠3) Ena nɔ ni ekaseɔ lɛ he miishɛɛ aahu akɛ, beni nyɛmimɛi lɛ shi lɛ lɛ, lɛ diɛŋtsɛ ebua enanemɛi Pentecostal bii lɛ ekomɛi anaa kutuu ni ebɔi amɛ anɔkwalei ni ekase yɛ Yehowa Nyɔŋmɔ kɛ Yesu Kristo he lɛ tsɔɔmɔ yɛ amɛ diɛŋtsɛ amɛ-Biblia amli. Beni amɛteŋ mɛi pii kpoo anɔkwale lɛ, ekpɛ eyiŋ akɛ agbɛnɛ be eshɛ ni sa akɛ eshi sɔlemɔ lɛ, ni ejo foi kɛjɛ “Babilon Kpeteŋkpele lɛ” mli. (Kpojiemɔ 18:​2, 4) Beni nyɛmimɛi lɛ ba eŋɔɔ ekoŋŋ yɛ February 1992 mli lɛ, ekɛɛ amɛ nɔ ni eba, ni ekɛfata he akɛ: “Miisumɔ mafata nyɛhe. Miisumɔ ni matsɔ Yehowa Odasefoi lɛ ateŋ mɔ ko. Miisumɔ ni matsɔɔ mɛi anɔkwale lɛ!”

Niiashikpamɔi tamɔ enɛɛmɛi yeɔ ebuaa ni ewajeɔ nyɛmimɛi lɛ yɛ nitsumɔ ni kaa mɔ nɛɛ mli. Ebiɔ ni mɛi ni faa gbɛ akɛ maŋsɛɛ sanekpakpa shiɛlɔi lɛ kɛ amɛshia mli ogbɔjɔ shihilɛi lɛ asha afɔle, ni helai tamɔ atridii hu nyɛɔ emɔmɔɔ amɛ, ni amɛŋmɛɔ amɛtsui shi yɛ koo mli shihilɛi amli. Shi mɛi ni shwɛɔ yɛ shia lɛ hu kɛ nibii shaa afɔle. Wekui ahiɛ tseɔ amɛ suɔlɔi, bei komɛi lɛ otsii saŋŋ kɛtsaraa nɔ. Asafoi hiɔ shi ni amɛmli onukpai kɛ obalahii lɛ etee, ni bei komɛi po lɛ, eshwɛɔ nyɛminuu kome pɛ yɛ sɛɛ ni tsuɔ asafo lɛ hiamɔ nii ahe nii. Ni kɛlɛ, mɛɛ miishɛɛ kɛ hewalɛwoo po yɔɔ mli nɛkɛ, kɛ amɛku amɛsɛɛ ni amɛbagba asafo lɛ amɛniiashikpamɔi ni kanyaa mɔ lɛ! Miishɛɛ lɛ haa afɔleshaa lɛ feɔ bibioo kwraa.

Maŋtsɛyeli jajelɔi ni kɛ sanekpakpa lɛ yaa nui babaoo ni yɔɔ Guyana lɛ amli fɛɛ lɛ naa niiashikpamɔ ko ni yɔɔ sɔrɔto kwraa mli ŋɔɔmɔ. Amɛfataa amɛnanemɛi nitsulɔi ni yɔɔ je lɛŋ fɛɛ lɛ ahe, ni amɛkɛ ekaa jɛɔ amɛsuɔmɔ mli amɛkɛ ‘yijiemɔ afɔle haa Nyɔŋmɔ daa, ni no ji naabui ni jajeɔ egbɛi lɛ ayibii lɛ.’​—Hebribii 13:⁠15.

[Shishigbɛ niŋmai]

[Shikpɔŋ he mfonirii babaoo ni yɔɔ baafa 24]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

HONDURAS

NICARAGUA

COSTA RICA

PANAMA

VENEZUELA

COLOMBIA

GUYANA

SURINAME

FRENCH GUIANA

BRAZIL

BOLIVIA

ATLANTIC OCEAN

[Mfoniri ni yɔɔ baafa 26,27]

Abɛku :Odaseyeli yɛ jarawoo gbi nɔ

Ŋwɛi gbɛ: Aasusu sanekpakpa lɛ he yɛ Demerara Faa lɛ naa

Ŋwɛi ninejurɔ: Maŋsɛɛ sanekpakpa shiɛlɔi akuu ni miiwiri kɛmiiku amɛsɛɛ kɛba he ni amɛwɔɔ lɛ