Ani Okɛ Sane Keɔ Taakɛ Yehowa Feɔ LƐ?
“Shi kɛji nyɛkɛ mɛi atɔmɔi ke amɛ lɛ, nyɛ-Tsɛ ni yɔɔ ŋwɛi lɛ kɛaake nyɛ hu; shi kɛji nyɛkɛ mɛi atɔmɔi ekeee amɛ lɛ, nyɛ-Tsɛ lɛ hu kɛ nyɛtɔmɔi lɛ ekeŋ nyɛ.”—MATEO 6:14, 15, NW.
1, 2. Mɛɛ Nyɔŋmɔ nɛkɛ he hiaa wɔ, ni mɛni hewɔ?
“MƆBƆNALƆ kɛ durolɔ ji Yehowa, emli fuuu mra, ni emɔbɔnalɛ fa. Ehiɛɛɛ bei amli daa, ni ebɛɛɛ mɔ ewooo emli kɛyaaa naanɔ. Jeee wɔhe eshai lɛ anaa ekɛ wɔ yeɔ yɛ, ni jeee wɔnishaianii lɛ anaa ewoɔ wɔ nyɔmɔ yɛ. Shi moŋ, bɔ ni ŋwɛi kwɔ fe shikpɔŋ lɛ, nakai emɔbɔnalɛ lɛ fa yɛ mɛi ni sheɔ lɛ lɛ anɔ. Bɔ ni boka kɛ anai teŋ jɛkɛ lɛ, nakai ehaa wɔkɛ wɔnɔtɔmɔi lɛ ateŋ jɛkɛɔ. Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe. Ejaakɛ ele wɔ su kɛ wɔbaŋ, ekaiɔ akɛ su kɛkɛ ji wɔ.”—Lala 103:8-14.
2 Akɛni nɔ̃ sha mli afɔ wɔ yɛ, ni esha mli aŋɔ wɔ hɔ yɛ, ni emuu ni ayeee ni wɔna kɛjɛ fɔmɔ mli lɛ miibɔ mɔdɛŋ be fɛɛ be ni eŋɔ wɔ nom kɛya esha mla lɛ mli hewɔ lɛ, ehe miihia wɔ waa ni wɔná Nyɔŋmɔ ni ‘kaiɔ akɛ su kɛkɛ akɛfee wɔ.’ Beni David etsɔɔ bɔ ni Yehowa ji lɛ mli fɛfɛo yɛ Lala 103 nɛɛ sɛɛ afii ohai etɛ lɛ, Biblia ŋmalɔ kroko, ni ji Mika, jie nɛkɛ Nyɔŋmɔ nɛɛ nɔŋŋ yi yɛ nakai gbɛ nɔ nɔŋŋ yɛ mɔbɔnalɛ mli ni etsɔɔ ekɛ eshai ni afee lɛ keɔ lɛ hewɔ: “Mɛɛ nyɔŋmɔ baanyɛ ni ekɛ ehe ato ohe: ojieɔ tɔmɔ kɛyaa, okɛ mlatɔmɔ keɔ, ohiɛɛɛ mlifu mli kɛyaaa naanɔ shi osumɔɔ ni ojie mɔbɔnalɛ kpo? Naa wɔ mɔbɔ shikome ekoŋŋ, shwishwiamɔ wɔ nishaianii lɛ anɔ, shɛrɛmɔ wɔhe eshai lɛ fɛɛ oshwie ŋshɔŋ.”—Mika 7:18, 19, The Jerusalem Bible.
3. Ákɛ akɛ tɔmɔ loo esha aaake lɛ tsɔɔ mɛni?
3 Yɛ Hela Ŋmalɛi lɛ amli lɛ, wiemɔ kɛha “kɛ-ke” lɛ shishi ji “aŋmɛɛ he.” Kadimɔ akɛ David kɛ Mika ni atsɛ amɛwiemɔi asɛɛ nɛɛ kɛ nakai shishinumɔ lɛ nɔŋŋ haa yɛ wiemɔi ni ŋɔɔ ni tsɔɔ saji amli lɛ mli. Bɔni afee ni wɔyoo bɔ ni eshai ni Yehowa kɛkeɔ lɛ yaa shɔŋŋ ha lɛ, nyɛhaa wɔtia nɔkwɛmɔ nii babaoo ni akɛtsu lɛ amli fioo ko mli. Klɛŋklɛŋ nɔ lɛ tsɔɔ akɛ abaanyɛ atsɔ Yehowa jwɛŋmɔ kɛjɛ hiɛkpatamɔ nɔ kɛba eshai ni akɛkeɔ loo akɛfaa nɔ.
Mose Kpa Fai—Yehowa Bo Toi
4. Mɛɛ Yehowa hewalɛ lɛ kpojiemɔi fɛɛ sɛɛ ni Israelbii lɛ sheɔ gbeyei lolo akɛ amɛaabote Shiwoo Shikpɔŋ lɛ nɔ lɛ?
4 Yehowa jie Israel maŋ lɛ kɛjɛ Mizraim shweshweeshwe kɛbashɛ shikpɔŋ ni ewo shi akɛ ekɛbaaha amɛ akɛ amɛshihilɛ he lɛ masɛi, shi amɛkpoo akɛ amɛaaya amɛhiɛ, amɛmiishe gbɔmɛi foji ni yɔɔ Kanaan lɛ agbeyei. Yɛ be mli ni amɛna bɔ ni Yehowa jie amɛ kɛjɛ Mizraim kɛtsɔ haomɔi nyɔŋma ni kpataa nii ahiɛ lɛ nɔ, ni egbele foijee he kɛtsɔ Ŋshɔ Tsuru lɛ mli, ni ekpata Mizraim asraafoi ni ka akɛ amɛaatiu amɛ lɛ ahiɛ, ni ekɛ e-Mla kpaŋmɔ ni fee amɛ Yehowa maŋ ni ehala lɛ ha amɛ yɛ Sinai Gɔŋ lɛ nɔ, ni ekɛ daa gbi mana ni jɛ ŋwɛi ha amɛ yɛ naakpɛɛ gbɛ nɔ koni ewaje amɛ lɛ fɛɛ sɛɛ lɛ, amɛmiishe gbeyei akɛ amɛaabote Shiwoo Shikpɔŋ lɛ nɔ yɛ Kanaanbii komɛi ni tamɔ oblaŋi lɛ ahewɔ!—4 Mose 14:1-4.
5. Mɛɛ gbɛ saralɔi anɔkwafoi enyɔ lɛ tsɔ nɔ koni amɛwaje Israel?
5 Mose kɛ Aaron kɛ amɛhiɛ bumɔ shi ni amɛhao. Yoshua kɛ Kaleb, saralɔi anɔkwafoi enyɔ lɛ bɔ mɔdɛŋ ni amɛbua Israel naa ni amɛwo amɛ hewalɛ: ‘Shikpɔŋ lɛ hi jogbaŋŋ diɛŋtsɛ, shikpɔŋ ni fufɔ kɛ wo hoɔ yɛ nɔ. Nyɛkashea gbɔmɛi lɛ agbeyei; Yehowa kɛ wɔ yɛ!’ Ni nɛkɛ wiemɔi nɛɛ aaawo amɛ hewalɛ moŋ lɛ, gbɔmɛi atuatselɔi ni amɛtsui efa lɛ ka akɛ amɛaatswia Yoshua kɛ Kaleb tɛi.—4 Mose 14:5-10.
6, 7. (a) Mɛni Yehowa kpɛ eyiŋ akɛ ebaafee beni Israelbii lɛ ekpɛlɛɛɛ nɔ akɛ amɛaaya Shiwoo Shikpɔŋ lɛ nɔ lɛ? (b) Mɛni hewɔ Mose ekpɛlɛɛɛ Yehowa kojomɔ ni ekɛbaa Israel nɔ lɛ nɔ lɛ, ni mɛni jɛ mli ba?
6 Yehowa mli wo la! “Ni Yehowa kɛɛ Mose akɛ: ‘Mɛɛ beyinɔ nɛkɛ maŋ nɛɛ aaafɔ̃ɔ mihe guɔ gbee? Ni mɛɛ beyinɔ amɛaahe minɔ amɛye yɛ okadii fɛɛ ni mifee yɛ amɛteŋ lɛ ahewɔ? Mikɛ gbele-hela aaashwie amɛnɔ ni makpata amɛhiɛ, ni maŋɔ bo moŋ mafee maŋ wulu ni he wa fe amɛ.’ Ni Mose kɛɛ Yehowa akɛ: ‘No lɛ Mizraimbii baanu he, ejaakɛ amɛteŋ ojie nɛkɛ maŋ nɛɛ kɛjɛ yɛ onineshiwalɛ naa, ni amɛaagba nɛkɛ shikpɔŋ nɛɛ nɔ bii lɛ. . . . Ni agbɛnɛ kɛ ogbe nɛkɛ maŋ nɛɛ tamɔ agbeɔ gbɔmɔ kome lɛ, jeŋmaji ni enu ogbɛi ahe lɛ aaakɛɛ akɛ, “Nyɛ ni Yehowa nyɛɛɛ ekɛ maŋ nɛɛ ayashɛ shikpɔŋ ni eka amɛ kita yɛ he lɛ nɔ hewɔ, eyaplenee amɛ yɛ ŋa lɛ nɔ nɛɛ.” ’ ”—4 Mose 14:11-16.
7 Mose kpa eshaifaa he fai, yɛ Yehowa gbɛi lɛ hewɔ: “ ‘No hewɔ lɛ, agbɛnɛ ŋɔɔ nɛkɛ maŋ nɛɛ nɔtɔmɔ lɛ oke amɛ yɛ omɔbɔnalɛ kpeteŋkpele lɛ naa, taakɛ bɔ ni oŋɔ-fa nɛkɛ maŋ nɛɛ kɛjɛ Mizraim aahu kɛbashi bianɛ lɛ!’ Ni Yehowa kɛɛ: ‘Miŋɔ-ke amɛ yɛ owiemɔ lɛ naa.’ ”—4 Mose 14:19, 20.
Manase Wɔŋjamɔ kɛ David Gbalafitemɔ
8. Mɛɛ yinɔsane Maŋtsɛ Manase ni jɛ Yuda lɛ fee efɔ shi?
8 Yehowa eshaifaa he nɔkwɛmɔ nɔ ni ekaaa ji Manase, Maŋtsɛ Hezekia ni fee ekpakpa lɛ binuu lɛ. Manase eye afii 12 beni ebɔi nɔyeli yɛ Yerusalem. Emamɔ hei grɔŋŋi lɛ, emamɔ afɔleshaa latɛi eha Baalim, efee wɔŋ kooi, eja ŋwɛi ŋulamii, ekɛ ehe wo ŋkunyaayeli kɛ ashwaiafeemɔ mli, eto mumɔi atsɛlɔi, okɔmfoi kɛ klamɔi, ni ekɛ amagai mamɔ Yehowa sɔlemɔwe lɛ, ni eha lɛ diɛŋtsɛ ebihii tsɔ la mli yɛ Hinom Jɔɔ lɛ mli. “Efee efɔŋ babaoo yɛ Yehowa hiɛ” ni “Manase laka Yuda kɛ Yerusalembii lɛ, ni amɛfee efɔŋ fe jeŋmaji ni Yehowa kpata amɛhiɛ yɛ Israelbii lɛ ahiɛ lɛ tete.”—2 Kronika 33:1-9.
9. Yehowa tsui he bajɔ kɛha Manase yɛ mɛɛ gbɛ nɔ, ni mɛni jɛ mli ba?
9 Yɛ naagbee lɛ, Yehowa kɛ Ashurbii lɛ ba Yuda nɔ, ni amɛmɔ Manase ni amɛkɛ lɛ tee Babilon. “Shi beni efi lɛ lɛ, ekpa Yehowa, e-Nyɔŋmɔ lɛ fai, ni eba ehe shi babaoo yɛ etsɛmɛi a-Nyɔŋmɔ lɛ hiɛ. Ni beni ekpa lɛ fai lɛ, ebo lɛ toi, ni enu esɔlemɔ lɛ, ni eŋɔ lɛ kɛba Yerusalem yɛ emaŋtsɛyeli lɛ mli ekoŋŋ.” (2 Kronika 33:11-13) Kɛkɛ ni Manase jie maŋsɛɛ nyɔŋmɔi lɛ, amagai lɛ, kɛ afɔleshaa latɛi lɛ, ni ayashɛrɛ amɛ ashwie maŋ lɛ sɛɛ. Kɛkɛ ni eje shishi akɛ eeesha afɔle yɛ Yehowa afɔleshaa latɛ lɛ nɔ, ni eje shishi akɛ eeeha Yuda asɔmɔ anɔkwa Nyɔŋmɔ lɛ ekoŋŋ. Enɛ ji suɔmɔ ni Yehowa yɔɔ akɛ ekɛ eshai aaake lɛ he nɔkwɛmɔ nɔ ni yɔɔ naakpɛɛ, yɛ be mli ni heshibaa, sɔlemɔ, kɛ nifeemɔi ni sa loo etsɔɔ tsuitsakemɔ eje kpo lɛ!—2 Kronika 33:15, 16.
10. Mɛɛ gbɛ nɔ David tsɔ eka akɛ ekɛ esha ni ekɛ Uria ŋa lɛ fee lɛ aaatee?
10 Maŋtsɛ David esha ni ji gbalafitemɔ kɛ Uria, Hitnyo lɛ ŋa lɛ ji sane ni ale jogbaŋŋ. Jeee akɛ ekɛ lɛ fite gbala kɛkɛ, shi eto gbɛjianɔ koni ekɛtsimɔ enifeemɔ lɛ nɔ beni yoo lɛ ŋɔ hɔ lɛ. Maŋtsɛ lɛ ŋmɛ Uria gbɛ koni eshi tawuu he lɛ kɛba shia, ni eekpa gbɛ akɛ ebaaba eshia ni ekɛ eŋa lɛ abana bɔlɛ. Shi yɛ bulɛ ni Uria yɔɔ kɛha enanemɛi asraafoi ni yɔɔ tawuu he lɛ hewɔ lɛ, efeee nakai. Kɛkɛ ni David fɔ lɛ nine koni ebaye nii ni eha etɔ dãa, shi Uria eyaaa eŋa lɛ ŋɔɔ lolo. Kɛkɛ ni David kɛ shɛɛ sane maje etatsɛ lɛ koni eha Uria ayaje he ni ta lɛ mli wa yɛ lɛ, koni no aha agbe Uria, ni nakai ji bɔ ni eba lɛ.—2 Samuel 11:2-25.
11. Mɛɛ gbɛ nɔ atsɔ aha David tsake etsui yɛ ehe esha lɛ hewɔ, ni kɛlɛ epiŋ yɛ mɛɛ gbɛ nɔ?
11 Yehowa tsu egbalɔ Natan kɛtee David ŋɔɔ koni eyakpa maŋtsɛ lɛ esha lɛ he mama. “Kɛkɛ ni David kɛɛ Natan akɛ: ‘Mifee Yehowa shishi esha.’ Ni Natan kɛɛ David akɛ: ‘Yehowa hu etsi ohe esha lɛ eha sɛɛ; ogboŋ!’ ” (2 Samuel 12:13) David nu he akɛ eye fɔ waa yɛ ehe esha lɛ hewɔ ni ejie etsuitsakemɔ lɛ kpo kɛtsɔ sɔlemɔ ni jɛ tsuiŋ tɔŋŋ kɛha Yehowa lɛ nɔ: “Ejaakɛ jeee afɔle otaoɔ, kulɛ maha; shaa afɔle hu, onaaa he tsui. Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpooŋ.” (Lala 51:18, 19) Yehowa kpooo David sɔlemɔ ni jɛ tsuiŋ dɔlɛ mli lɛ. Ni kɛlɛ, agbala David toi waa, koni ekɛ Yehowa wiemɔ ni kɔɔ eshaifaa he ni yɔɔ 2 Mose 34:6, 7 lɛ akpa gbee: “Ni ehaaa mɔ ko mɔ ko aŋɔ ehe aye kwraa.”
Sɔlemɔtsu lɛ ni Salomo Jɔɔ Nɔ Eha
12. Mɛni Salomo bi yɛ sɔlemɔtsu lɛ nɔjɔɔmɔ be lɛ mli, ni te Yehowa here nɔ eha tɛŋŋ?
12 Beni Salomo gbe Yehowa sɔlemɔtsu lɛ maa lɛ naa lɛ, ewie yɛ enɔjɔɔmɔ sɔlemɔ lɛ mli akɛ: “Ni obo otsulɔ kɛ omaŋ Israel fai ni amɛaabakpao yɛ biɛ nɛɛ lɛ toi, ni onu yɛ ŋwɛi ni ji oshihilɛ he lɛ, ni kɛ onu lɛ, ŋɔɔ-fa!” Yehowa ha hetoo: “Naa, kɛ miŋa ŋwɛi naa ni nugbɔ enɛɛɛ, aloo mifa baalabii ni amɛbaye shikpɔŋ lɛ nɔ nii, aloo miha gbele-hela ba mimaŋbii lɛ ateŋ, ni mimaŋ ni aŋɔ migbɛi awo amɛ lɛ ba amɛhe shi, ni amɛkpa fai, ni amɛtao mihiɛ gbɛ, ni amɛkpale kɛjɛ amɛgbɛi fɔji lɛ anɔ lɛ: no lɛ mi hu majɛ ŋwɛi mabo toi, ni maŋɔ amɛhe eshai lɛ mafa amɛ, ni matsa amɛ shikpɔŋ lɛ.”—2 Kronika 6:21; 7:13, 14.
13. Mɛni Ezekiel 33:13-16 tsɔɔ yɛ bɔ ni Yehowa naa loo ekwɛɔ gbɔmɔ ehaa lɛ he?
13 Beni Yehowa kwɛɔ bo nɛɛ, ekpɛlɛɔ onɔ taakɛ oji bianɛ lɛ, shi jeee bɔ ni oji tsutsu. Ebaafee tamɔ bɔ ni Ezekiel 33:13-16 kɛɔ lɛ: “Kɛ mikɛɛ jalɔ akɛ eyi aaana wala, ni eŋɔ ehiɛ efɔ ejalɛ lɛ nɔ ni efee nishaianii lɛ: ejalɛnii fɛɛ ni efee lɛ, akaiŋ eko eko, shi enishaianii ni efee lɛ, nomɛi nɔŋŋ ahewɔ eeegbo yɛ! Shi asaŋ kɛ mikɛɛ efɔŋ feelɔ akɛ: Gbo ooogbo! ni ekpale kɛjɛ ehe esha lɛ mli ni eye jalɛ sane ni efee nɔ ni ja: kɛ efɔŋ feelɔ lɛ kpale awabatoo nii eha, ni ekɛ nɔ ni ekɛ ojotswaa shɔ̃ lɛ ku sɛɛ ha, enyiɛ wala akpɔi lɛ amli, ni efeee nishaianii lɛ: eyi aaana wala kɛ̃, egboŋ! Ehe eshai ni efee lɛ fɛɛ akaiŋ eko eko ahaŋ lɛ: eye jalɛ sane ni efee nɔ ni ja, eyi aaana wala kɛ̃.”
14. Mɛni yɔɔ sɔrɔto yɛ esha ni Yehowa kɛkeɔ lɛ he?
14 Sɔrɔto-feemɔ krɛdɛɛ ko yɛ eshaifaa ni Yehowa Nyɔŋmɔ kɛhaa wɔ lɛ mli, nɔ ko ni ewa kɛha gbɔmɛi akɛ amɛkɛaafata eshai ni amɛkɛkeɔ amɛhe lɛ he—ekɛkeɔ ni ehiɛ kpaa nɔ hu. Gbɔmɛi komɛi baakɛɛ akɛ, ‘Manyɛ ni mikɛ nɔ ni ofee lɛ ake bo, shi minyɛŋ ni maha mihiɛ akpa nɔ (loo mihiɛ kpaŋ nɔ).’ Nɔ ni tamɔɔɔ nakai lɛ, kadimɔ nɔ ni Yehowa kɛɔ akɛ ebaafee: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!”—Yeremia 31:34.
15. Mɛɛ Yehowa eshaifaa he saji aŋmala ashwie shi?
15 Yehowa etee nɔ ekɛ eshai eke ejálɔi ni yɔɔ shikpɔŋ nɔ lɛ afii akpei abɔ nɛ. Etee nɔ ekɛ eshai ni amɛhiɛ kãa he lɛ eke amɛ kɛ pii hu ni amɛhiɛ bɛ nɔ lɛ. Egbɛjianɔtoo ni ji mɔbɔnalɛ, tsuishiŋmɛɛ, kɛ eshaifaa lɛ efee nɔ ni bɛ naagbee. Yesaia 55:7 kɛɔ akɛ: “Ha ni mɔ fɔŋ akwa egbɛ̀i lɛ, ni nɔsha feelɔ akwa ejwɛŋmɔi lɛ, ni eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu!”
Eshaifaa yɛ Kristofoi a-Hela Ŋmalɛi lɛ Amli
16. Mɛni hewɔ wɔbaanyɛ wɔkɛɛ akɛ eshaifaa ni Yesu kɛtsu nii lɛ kɛ Yehowa nɔ̃ lɛ kpaa gbee lɛ?
16 Eshai ni Nyɔŋmɔ kɛkeɔ lɛ he saji eyi Kristofoi a-Hela Ŋmalɛi lɛ amli obɔ. Yesu fɔɔ he wiemɔ, ni tsɔɔ akɛ ekɛ Yehowa jwɛŋmɔ ni kɔɔ sane lɛ he lɛ kpaa gbee. Yesu susumɔ lɛ baa kɛjɛɔ Yehowa ŋɔɔ, ejieɔ bɔ ni Yehowa ji lɛ kpo etsɔɔ, lɛ ji Yehowa su lɛ henɔ pɛpɛɛpɛ; ni aaana lɛ lɛ tsɔɔ akɛ ana Yehowa.—Yohane 12:45-50; 14:9; Hebribii 1:3.
17. Yesu fee bɔ ni Yehowa kɛfaa loo ekɛkeɔ “aahu [babaoo]” lɛ he nɔkwɛmɔ nɔ yɛ mɛɛ gbɛ nɔ?
17 Akɛ Yehowa kɛfaa aahu loo babaoo lɛ jeɔ kpo yɛ Yesu abɛbuai lɛ ekome mli, nɔ ni kɔɔ maŋtsɛ ko ni kɛ tsulɔ ko ni hiɛ lɛ nyɔmɔ talentai 10,000 (aaafee U.S. $33,000,000) ke lɛ lɛ he lɛ. Shi beni nakai tsulɔ lɛ sumɔɔɔ ni ekɛ enaanyo tsulɔ ni hiɛ lɛ nyɔmɔ denarioi oha, (aaafee U.S. $60) keɔ lɛ lɛ, maŋtsɛ lɛ mli fu waa. “ ‘Tsulɔ fɔŋ! akɛni okpa mi fai hewɔ lɛ, miŋɔ nɛkɛ nyɔmɔ nɛɛ fɛɛ mikeo; ani kulɛ jeee bo hu ogbɛnaa ji akɛ ona onaanyo tsulɔ lɛ mɔbɔ, bɔ ni mi hu minao mɔbɔ lɛ?’ Ni enuntsɔ lɛ mli fu, ni eha apiŋ lɛ kɛyashi beyinɔ ni eeebawo lɛ nyɔmɔ lɛ fɛɛ.” Kɛkɛ ni Yesu kɛtsɔɔ nɔ ni edamɔ shi kɛha: “Nakai nɔŋŋ mi-Tsɛ ni yɔɔ ŋwɛi lɛ hu aaaŋɔ-fee nyɛ, kɛji nyɛteŋ mɔ fɛɛ mɔ eŋɔɔɔ enyɛmi nɔtɔmɔ ekeee lɛ kɛjɛɛɛ etsuiŋ lɛ.”—Mateo 18:23-35.
18. Kɛ akɛ jwɛŋmɔ ni Petro hiɛ yɛ eshaifaa he lɛ to Yesu susumɔ he lɛ, te anaa tɛŋŋ?
18 Dani Yesu kɛ abɛbua ni yɔɔ yiteŋgbɛ nɛɛ aaaha lɛ, Petro ba Yesu ŋɔɔ ni ebabi lɛ akɛ: “Nuntsɔ, shii enyiɛ minyɛmi atɔ minɔ ni miŋɔ-fa lɛ? Kɛyashi shii kpawo lo?” Petro susu akɛ emli hi aahu. Eyɛ mli akɛ woloŋmalɔi lɛ kɛ Farisifoi lɛ kɛ husu wo eshaifaa he moŋ, shi Yesu kɛɛ Petro akɛ: “Miikɛɛ bo akɛ, jeee Kɛyashi shii kpawo, shi, Kɛyashi shii nyɔŋmai-kpawo kɛ kpawo.” (Mateo 18:21, 22, NW) Shii kpawo faaa haaa gbi kome, taakɛ Yesu kɛɛ lɛ: “Nyɛkwɛa nyɛhe ni ahia! Kɛji onyɛmi ko tɔ onɔ lɛ, kã ehiɛ; ni kɛji eshwa ehe lɛ, ŋɔɔ-fa lɛ. Ni kɛji shii kpawo etɔ onɔ gbi kome, ni esaa eku esɛɛ eba oŋɔɔ shii kpawo gbi kome ni ekɛɛ: ‘Mishwa mihe’ lɛ, ŋɔɔ-fa lɛ.” (Luka 17:3, 4) Kɛ Yehowa kɛ-ke lɛ, ebuuu he akɔntaa dɔŋŋ—eji miishɛɛ sane kɛha wɔ.
19. Mɛni esa akɛ wɔfee koni wɔnine ashɛ Yehowa dɛŋ eshaifaa nɔ?
19 Kɛ wɔyɛ heshibaa ni no aaaha wɔtsake wɔtsui ni wɔjaje wɔhe eshai lɛ, Yehowa kpɛlɛɔ ejurɔ ni eeefee wɔ yɛ no hewɔ lɛ nɔ: “Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ, koni etsumɔ wɔhe kɛjɛ nii ni ejaaa gbɛ fiaa mli.”—1 Yohane 1:9.
20. Mɛɛ suɔmɔ ni ayɔɔ ákɛ akɛ eshai aaake Stefano jie lɛ kpo?
20 Yesu sɛɛnyiɛlɔ Stefano jie eshaifaa mumɔ ni yɔɔ naakpɛɛ kpo, beni ekɛ faikpamɔ sɔlemɔ bolɔ, yɛ be mli ni asafoi ni mli efu lɛ tswiaa lɛ tɛi lɛ, akɛ: “ ‘Nuntsɔ Yesu, heremɔ mimumɔ lɛ.’ Ni ekula shi, ni ebo kɛ gbee walɛ akɛ: ‘Nuntsɔ [Yehowa], kaaŋɔ nɛkɛ esha nɛɛ oŋmɛ amɛnɔ!’ Ni beni ekɛɛ nɛkɛ lɛ, etsɔ mli ewɔ [yɛ gbele mli].”—Bɔfoi lɛ Asaji 7:59, 60.
21. Mɛni hewɔ suɔmɔ ni Yesu yɔɔ akɛ ekɛ esha aaake Roma asraafoi lɛ yɔɔ naakpɛɛ waa nakai lɛ?
21 Yesu to okadi ni yɔɔ naakpɛɛ kwraa fe enɛ ni tsɔɔ suɔmɔ ni ayɔɔ akɛ akɛ eshai aaake lɛ he nɔkwɛmɔ nɔ efɔ shi. Ehenyɛlɔi lɛ emɔ lɛ, amɛkojo lɛ yɛ gbɛ ni mla eŋmɛɛɛ gbɛ lɛ naa, amɛbu lɛ fɔ, amɛye ehe fɛo, amɛfɛ̃ lajɔ̃ amɛshwie ehe, amɛkɛ kpelebii ni akɛ kooloi ahewolo efee ni eeenyɛ eba akɛ akɛ wui kɛ dadei bibii ehɔlɔ mli yi lɛ, ni yɛ naagbee lɛ amɛshi lɛ ni akala lɛ akpɛtɛ sɛŋmɔtso he ŋmɛlɛtswai babaoo. Romabii lɛ kɛ amɛhe wo enɛ feemɔ mli babaoo. Ni kɛlɛ, beni Yesu gboɔ yɛ piŋmɔ tso lɛ nɔ lɛ, ewie asraafoi ni sɛŋ lɛ lɛ ahe etsɔɔ eŋwɛi Tsɛ lɛ akɛ: “Ataa, ŋɔɔ-fa amɛ; shi amɛleee nɔ ni amɛfeɔ.”—Luka 23:34.
22. Mɛɛ wiemɔi ni jɛ Gɔŋ nɔ Shiɛmɔ lɛ mli esa akɛ wɔbɔ mɔdɛŋ ni wɔkɛtsu nii?
22 Yesu ewie yɛ e-Gɔŋ nɔ Shiɛmɔ lɛ mli akɛ: “Nyɛsumɔa nyɛ henyɛlɔi, . . . ni nyɛsɔlea nyɛhaa mɛi ni waa nyɛyi lɛ.” Ebo nakai shishitoo mla lɛ toi lɛ diɛŋtsɛ kɛyashi eshikpɔŋ nɔ sɔɔmɔ nitsumɔ lɛ naagbee. Ani enɛ miibi babaoo tsɔ yɛ wɔ mɛi ni wɔkɛ wɔheloo ni yeee emuu lɛ mli fatɔɔi lɛ wuɔ lɛ gbɛfaŋ? Kɛ hoo lɛ esa akɛ wɔbɔ mɔdɛŋ ni wɔkɛ wiemɔi ni Yesu tsɔɔ esɛɛnyiɛlɔi lɛ yɛ be mli ni ekɛ sɔlemɔ nɔkwɛmɔ nɔ lɛ eha amɛ lɛ sɛɛ lɛ atsu nii yɛ wɔshihilɛ mli: “Kɛji nyɛkɛ mɛi atɔmɔi fa amɛ lɛ, nyɛ-Tsɛ ni yɔɔ ŋwɛi lɛ kɛaafa nyɛ hu. Shi kɛji nyɛkɛ mɛi atɔmɔi efaaa amɛ lɛ, nyɛ-Tsɛ lɛ hu kɛ nyɛ nɔtɔmɔi efaŋ nyɛ.” (Mateo 5:44, NW; 6:14, 15) Kɛ wɔkɛ eshai ke taakɛ Yehowa kɛkeɔ lɛ, wɔkɛbaake ni wɔhiɛ baakpa nɔ.
Ani Okaiɔ?
◻ Te Yehowa tsuɔ wɔhe eshai ahe nii ehaa tɛŋŋ, ni mɛni hewɔ?
◻ Mɛni hewɔ asaa akɛ Manase bata emaŋtsɛyeli sɛi nɔ ekoŋŋ lɛ?
◻ Mɛɛ Yehowa eshaifaa lɛ he nɔ ko ni yɔɔ sɔrɔto kwraa ewa kɛha adesai akɛ amɛaakase?
◻ Yɛ mɛɛ gbɛ nɔ suɔmɔ ni Yesu yɔɔ akɛ ekɛ esha aaake lɛ yɔɔ naakpɛɛ waa nakai lɛ?
[Mfoniri ni yɔɔ baafa 24]
Natan ye ebua David koni ena bɔ ni Nyɔŋmɔ dɛŋ eshaifaa he hiaa ha