Amɛyɛ Je lɛ Mli Shi Amɛjeee Efã
“Akɛni nyɛjɛɛɛ je lɛŋ . . . lɛ, no hewɔ je lɛ nyɛɔ nyɛ lɛ.”—YOHANE 15:19.
1. Mɛɛ wekukpaa Kristofoi kɛ je lɛ yɔɔ, ni kɛlɛ te je lɛ buɔ amɛ ehaa tɛŋŋ?
YESU kɛɛ ekaselɔi lɛ yɛ naagbee gbɛkɛ ni ekɛ amɛ hi shi lɛ akɛ: “Nyɛjɛɛɛ je lɛŋ.” Mɛɛ jeŋ he ewieɔ lɛ? Ani ewieko yɛ be kroko ni etsɔ hiɛ lɛ mli akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala”? (Yohane 3:16) Eka shi faŋŋ akɛ kaselɔi lɛ ji nakai je lɛ fã, ejaakɛ amɛji mɛi ni ná Yesu mli hemɔkɛyeli klɛŋklɛŋ kɛha naanɔ wala namɔ. Belɛ, mɛni hewɔ agbɛnɛ Yesu wie akɛ ekaselɔi lɛ jɛɛɛ je lɛ mli lɛ mɔ? Ni mɛni hewɔ ewie hu akɛ: “Akɛni nyɛjɛɛɛ je lɛŋ . . . lɛ, no hewɔ je lɛ nyɛɔ nyɛ lɛ”?—Yohane 15:19.
2, 3. (a) Mɛɛ “jeŋ” esaaa akɛ Kristofoi feɔ efã lɛ? (b) Mɛni Biblia lɛ kɛɔ yɛ “jeŋ” ni Kristofoi jɛɛɛ mli lɛ he?
2 Hetoo lɛ ji akɛ Biblia lɛ kɛ wiemɔ “jeŋ” (Hela, koʹsmos) tsuɔ nii yɛ gbɛi sɔrɔtoi anɔ. Taakɛ atsɔɔ mli yɛ nikasemɔ ni tsɔ hiɛ lɛ mli lɛ, bei komɛi lɛ, “je lɛ” kɔɔ adesai fɛɛ ahe kutuu yɛ Biblia lɛ mli. Enɛ ji je lɛ ni Nyɔŋmɔ sumɔ ni Yesu gbo eha amɛ lɛ. Shi kɛlɛ, The Oxford History of Christianity lɛ kɛɔ akɛ: “ ‘Je’ lɛ ji wiemɔ ko ni Kristofoi kɛtsuɔ nii kɛhaa nɔ ko ni etsi ehe kɛjɛ Nyɔŋmɔ he ni eteɔ shi ewoɔ lɛ.” Mɛɛ gbɛ nɔ enɛ feɔ anɔkwale yɛ? Katolik niŋmalɔ Roland Minnerath tsɔɔ mli yɛ ewolo ni gbɛi ji Les chrétiens et le monde (Kristofoi kɛ Je Lɛ) mli akɛ: “Kɛji aŋɔ lɛ yɛ heguɔgbee shishinumɔ naa lɛ, ehaa anaa je lɛ akɛ . . . nɔyelihe ni nɔyeli hewalɛi ni teɔ shi woɔ Nyɔŋmɔ lɛ tsuɔ amɛ nitsumɔ yɛ, ni etsɔɔ shi ni eteɔ ewoɔ Kristo nɔyeli ni eye kunim lɛ nɔ ebafeɔ henyɛlɔi amaŋtsɛyeli ni yɔɔ Satan kudɔmɔ shishi.” Nɛkɛ “je” nɛɛ ji adesai ni etsi amɛhe kɛjɛ Nyɔŋmɔ he lɛ akuu muu lɛ fɛɛ. Anɔkwa Kristofoi jeee je nɛɛ fã, ni no hewɔ lɛ enyɛɔ amɛ.
3 Kɛbaa klɛŋklɛŋ afii oha lɛ naagbee gbɛ lɛ, nɛkɛ je nɛɛ ji nɔ ni yɔɔ Yohane jwɛŋmɔ mli beni eŋma akɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ.” (1 Yohane 2:15, 16) Eŋma hu akɛ: “Wɔle akɛ wɔjɛ Nyɔŋmɔ mli, ni jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Yesu diɛŋtsɛ tsɛ Satan akɛ “je nɛŋ lumɔ lɛ.”—Yohane 12:31; 16:11.
Jeŋ Hewalɛi lɛ Adalɛ
4. Te fee tɛŋŋ ni jeŋ hewalɛi lɛ ba shihilɛ mli?
4 Adesai ajeŋ ni yɔɔ bianɛ ni etsi ehe kɛjɛ Nyɔŋmɔ he lɛ je shishi yɛ Noa gbii lɛ amli Nu Afua lɛ sɛɛ bei fioo mli, beni Noa seshibii lɛ ateŋ mɛi babaoo kpa Yehowa Nyɔŋmɔ jamɔ lɛ. Nimrod ji mɔ ko ni hé gbɛi waa yɛ shishijee gbii lɛ amli, ni eji maŋtiase tolɔ kɛ “gbɔbilɔ kpanaa yɛ Yehowa hiɛ.” (1 Mose 10:8-12) Yɛ nakai afii lɛ amli lɛ, no mli lɛ ato je nɛɛ fã babaoo he gbɛjianɔ awo maŋtiase-maŋtsɛyelii amli, ni amɛkɛ amɛhe feɔ ekome yɛ be kɛ bei amli ni amɛkɛ amɛhe wuɔ tai. (1 Mose 14:1-9) Maŋtiase-maŋtsɛyelii lɛ ekomɛi ye ekrokomɛi anɔ, ni amɛbatsɔmɔ kpokpaa nɔ nɔyelii. Yɛ naagbee lɛ, kpokpaa nɔ nɔyelii lɛ ekomɛi dara ni amɛbatsɔmɔ jeŋ hewalɛi wuji.
5, 6. (a) Mɛni ji jeŋ hewalɛi kpawo ni ba yɛ Biblia yinɔsane mli lɛ? (b) Te afee jeŋ hewalɛi nɛɛ ahe mfoniri aha tɛŋŋ, ni nɛgbɛ amɛhewalɛ lɛ jɛɔ kɛbaa?
5 Yɛ Nimrod nɔkwɛmɔnɔ lɛ sɛɛnyiɛmɔ mli lɛ, jeŋ hewalɛi lɛ anɔyelɔi lɛ jaaa Yehowa, ni enɛ ji anɔkwa sane ko ni je kpo faŋŋ yɛ amɛ yiwalɛ nifeemɔi lɛ amli. Akɛ kooloi awuiyelɔi feɔ nɛkɛ jeŋ hewalɛi nɛɛ ahe mfoniri yɛ Ŋmalɛ lɛ mli, ni beni afii ohai abɔ lɛ hoɔ kɛyaa lɛ, Biblia lɛ wie amɛteŋ ekpaa komɛi ni ná hewalɛ waa yɛ Yehowa webii anɔ lɛ ahe. Mɛnɛɛmɛi ji Mizraim, Ashur, Babilon, Medo-Persia, Hela, kɛ Roma. Yɛ Roma sɛɛ lɛ, agba afɔ shi akɛ jeŋ hewalɛ ni ji kpawo baate shi. (Daniel 7:3-7; 8:3-7, 20, 21; Kpojiemɔ 17:9, 10) Enɛ bafee Anglo-Amerika Jeŋ Hewalɛ lɛ, ni ji Britania Maŋtsɛyeli lɛ kɛ ehefatalɔ ni ji United States, ní yɛ naagbee lɛ, ebaha Britania nɔ kwraa yɛ hewalɛ gbɛfaŋ lɛ. Britania Maŋtsɛyeli lɛ je shishi yɛ be mli ni Roma Maŋtsɛyeli lɛ he naagbee nibii lɛ elaaje kwraa lɛ sɛɛ.a
6 Akɛ kooloo awuiyelɔ ko ni hiɛ yitsei kpawo, ni fã kpo kɛjɛ ŋshɔ ni ji adesai ni efee hamahama lɛ mli lɛ yitsei lɛ feɔ jeŋ hewalɛi kpawo ni tsara nɔ kɛba lɛ ahe mfoniri yɛ Kpojiemɔ wolo lɛ mli. (Yesaia 17:12, 13; 57:20, 21; Kpojiemɔ 13:1) Namɔ kɛ kooloo ni yeɔ nɔ nɛɛ hewalɛ lɛ haa lɛ lɛ? Biblia lɛ haa hetoo akɛ: “Drako lɛ ŋɔ lɛ diɛŋtsɛ ehewalɛ lɛ kɛ emaŋtsɛsɛi lɛ kɛ hegbɛ kpeteŋkpele eha [kooloo] lɛ.” (Kpojiemɔ 13:2) Drako lɛ jeee mɔ ko mɔ ko fe Satan Abonsam.—Luka 4:5, 6; Kpojiemɔ 12:9.
Nyɔŋmɔ Maŋtsɛyeli lɛ Nɔyeli ni Baa Lɛ
7. Mɛni nɔ Kristofoi kɛ amɛhiɛ fɔ̃ɔ, ni te enɛ saa wekukpaa ni kã amɛkɛ je lɛŋ nɔyelii ateŋ lɛ he ehaa tɛŋŋ?
7 Kristofoi kɛ nɔ ni miihe ashɛ afii 2,000 sɔŋŋ esɔle aahu akɛ: “Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.” (Mateo 6:10, NW) Yehowa Odasefoi le akɛ Nyɔŋmɔ Maŋtsɛyeli lɛ pɛ baanyɛ ekɛ toiŋjɔlɛ diɛŋtsɛ aba shikpɔŋ nɔ. Akɛni amɛkwɛɔ Biblia mli gbalɛi jogbaŋŋ hewɔ lɛ, amɛyɛ nɔmimaa diɛŋtsɛ akɛ etsɛŋ ni abaaha sɔlemɔ nɛɛ hetoo, ni ákɛ etsɛŋ ni Maŋtsɛyeli lɛ baakwɛ shikpɔŋ nɔ saji fɛɛ nɔ. (Daniel 2:44) Amɛhe ni amɛkɛkpɛtɛɔ Maŋtsɛyeli nɛɛ he lɛ haa amɛfeɔ mɛi ni kɛ amɛhe wooo je lɛŋ nɔyelii lɛ asaji amli.
8. Te nɔyelii feɔ amɛnii yɛ Nyɔŋmɔ Maŋtsɛyeli lɛ nɔyeli he amɛhaa tɛŋŋ, taakɛ agba afɔ̃ shi yɛ Lala 2 lɛ?
8 Jeŋmaji komɛi kɛɔ akɛ amɛyeɔ jamɔ mli shishitoo mlai anɔ. Shi kɛlɛ, yɛ amɛshihilɛ mli diɛŋtsɛ lɛ, amɛkuɔ amɛhiɛ amɛfɔɔ anɔkwale ni eji akɛ Yehowa ji Jeŋ Muu Fɛɛ Maŋtsɛ, ni ákɛ ekɛ Yesu eta maŋtsɛsɛi nɔ akɛ ŋwɛi Maŋtsɛ ni yɔɔ hewalɛ yɛ shikpɔŋ lɛ nɔ lɛ nɔ. (Daniel 4:17; Kpojiemɔ 11:15) Gbalɛ mli lala ko kɛɔ akɛ: “Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu efee ekome amɛtee Yehowa kɛ [Yesu] mɔ ni efɔ lɛ mu lɛ yinɔ ajina: ‘Nyɛhaa wɔkumɔa amɛgbokɛlɛ lɛ, ni wɔtserɛ amɛkpãi lɛ yɛ wɔhe wɔshwie!’ ” (Lala 2:2, 3) Nɔyelii ekpɛlɛɛɛ ŋwɛi ‘gbokɛlɛi’ loo ‘kpãi’ ni baatsĩ amɛ maŋ nɔyeli hewalɛ ni amɛkɛtsuɔ nii lɛ naa lɛ nɔ. No hewɔ lɛ, Yehowa kɛɔ Yesu, ni ji e-Maŋtsɛ ni ehala lɛ lɛ akɛ: “Bi mi, ni maŋɔ jeŋmaji lɛ mahao akɛ ogboshinii kɛ shikpɔŋ lɛ naagbee hei lɛ hu akɛ ogbɛfaŋnɔ! Oookumɔ amɛ kɛ dadetso, ooojwara amɛ tamɔ gbɛshɔlɔ gbɛ!” (Lala 2:8, 9) Shi kɛlɛ, ‘akumɔŋ’ adesai aje lɛ ni Yesu bagbo eha amɛ lɛ kwraa kɛmɔŋ shi.—Yohane 3:17.
“Kooloo” lɛ “Okadi lɛ” ni Aaatsi He Kɛaajɛ He
9, 10. (a) Abɔɔ wɔ kɔkɔ yɛ mɛni he yɛ Kpojiemɔ wolo lɛ mli? (b) ‘Kooloo lɛ okadi lɛ’ ni mɔ ko aaaná lɛ feɔ mɛni he mfoniri? (d) Mɛɛ kadimɔ nii Nyɔŋmɔ tsuji kpɛlɛɔ nɔ?
9 Kpojiemɔ ni bɔfo Yohane nine shɛ nɔ lɛ bɔ kɔkɔ akɛ, kɛ eshwɛ fioo ni adesai ajeŋ ni etsi ehe kɛjɛ Nyɔŋmɔ he lɛ baaba enaagbee lɛ, ebaaya nɔ ebi ni afee nibii babaoo, ni “ehaa mɛi fɛɛ, mɛi bibii kɛ mɛi wuji, niiatsɛmɛi kɛ ohiafoi, odehei kɛ nyɔji kpɛlɛɔ ni akadiɔ amɛ yɛ amɛninejurɔ loo amɛhiɛŋtsei anɔ; ni mɔ ko nyɛɛɛ nɔ ko ahe loo ehɔ̃ɔ, akɛ ja mɔ ni yɔɔ okadi lɛ.” (Kpojiemɔ 13:16, 17) Mɛni enɛ tsɔɔ? Okadi ni yɔɔ ninejurɔ he lɛ ji okadi ni sa ni tsɔɔ sɛɛfimɔ yɛ ekãa naa. Ni okadi ni yɔɔ hiɛŋtso nɔ lɛ hu? The Expositor’s Greek Testament lɛ kɛɔ akɛ: “Nɛkɛ mfonirifeemɔŋ wiemɔ diɛŋtsɛ nɛɛ miitsɔɔ nɔ ko ni afɔɔ feemɔ, ni ji asraafoi kɛ nyɔji ni akadiɔ amɛ loo aŋmaa nii yɛ amɛhewolo nɔ ni anaa faŋŋ lɛ . . . ; aloo, nɔ ni fe nakai lɛ, eetsɔɔ jamɔ mli nifeemɔ ko ni ji nyɔŋmɔ ko gbɛi ni afiɔ akɛ sɛbɛ lɛ.” Adesai babaoo etsɔ amɛ nifeemɔi kɛ wiemɔi anɔ amɛná nɛkɛ okadi nɛɛ eko yɛ amɛhe yɛ mfonirifeemɔŋ, ni amɛjieɔ amɛhe kpo akɛ “kooloo” lɛ “nyɔji” loo “asraafoi.” (Kpojiemɔ 13:3, 4) Theological Dictionary of the New Testament lɛ kɛɔ yɛ amɛ wɔsɛɛ be he akɛ: “Nyɔŋmɔ henyɛlɔi lɛ ŋmɛɔ gbɛ ni akɛ kooloo lɛ [okadi] lɛ, ni ji teemɔŋ yibɔ okadi ni egbɛi yɔɔ mli lɛ, kadiɔ amɛhiɛŋtsei anɔ kɛ amɛnine kome he. Enɛ haa amɛnáa shika gbɛfaŋ kɛ jarayeli mli hiɛyaa mli hegbɛi wuji, shi ehaa Nyɔŋmɔ mlifu baa amɛnɔ ni ejieɔ amɛ kɛjɛɔ afii akpe maŋtsɛyeli lɛ mli, Kpoj. 13:16; 14:9; 20:4.”
10 Ebiɔ ni ana ekãa babaoo kɛ hiɛmiamɔ ni akɛte shi awo nɔnyɛɛ ni akɛbaa mɔ nɔ koni ehe “okadi lɛ.” (Kpojiemɔ 14:9-12) Shi kɛlɛ, Nyɔŋmɔ tsuji yɛ nɛkɛ hewalɛ nɛɛ, ni yɛ enɛ hewɔ lɛ, bei pii lɛ anyɛɔ amɛ ni awieɔ amɛhe efɔŋ. (Yohane 15:18-20; 17:14, 15) Yɛ nɔ najiaŋ ni amɛaahiɛ kooloo lɛ okadi lɛ, Yesaia wie akɛ amɛaaŋma yɛ mfonirifeemɔŋ, yɛ amɛnine he akɛ, “Yehowa nɔ̃ ji mi.” (Yesaia 44:5) Kɛfata he lɛ, akɛni ‘amɛdɔmɔɔ ŋtsɔi ni amɛyeɔ ŋkɔmɔ’ yɛ nihiinii ni hemɔkɛyeli kwalɔi ajamɔ feɔ lɛ hewɔ lɛ, amɛnáa mfonirifeemɔŋ okadi ko yɛ amɛhiɛŋtso nɔ, ní kadiɔ amɛ akɛ mɛi ni esa akɛ abaa amɛyi beni atsuɔ Yehowa kojomɔi ahe nii lɛ.—Ezekiel 9:1-7.
11. Namɔ eŋmɛ gbɛ akɛ adesai anɔyelii aye nɔ kɛyashi Nyɔŋmɔ Maŋtsɛyeli lɛ baaba ni ebaye shikpɔŋ lɛ nɔ lɛ?
11 Nyɔŋmɔ eŋmɛ adesai anɔyelii agbɛ ni amɛye nɔ kɛyashi be mli ni Kristo ŋwɛi Maŋtsɛyeli lɛ baahe shikpɔŋ nɛɛ nɔyeli hegbɛ lɛ kwraa kɛmɔ shi. Nilelɔ Oscar Cullmann tsĩ ŋwɛi ni ajɛ aŋmɛ maŋkwramɔŋ maji lɛ agbɛ nɛɛ tã yɛ ewolo ni gbɛi ji The State in the New Testament lɛ mli. Eŋma akɛ: “Susumɔ ni yɔɔ haŋtsii ni ayɔɔ yɛ bɔ ni Maŋ lɛ shihilɛ ‘sɛɛ etsɛɛɛ’ lɛ he lɛ ji yiŋtoo hewɔ ni klɛŋklɛŋ Kristofoi lɛ asubaŋ yɛ Maŋ lɛ he lɛ jeee ekome, shi moŋ efeɔ tamɔ nɔ ni ekɛ ehe kpaaa gbee lɛ. Miima nɔ mi akɛ efeɔ tamɔ nakai. Ehe miihia ni wɔtsĩ Romabii 13:1 lɛ pɛ tã, ‘Mɔ fɛɛ mɔ aba ehe shi aha hewalɛi ni yɔɔ lɛ . . . ,’ kɛfata Kpojiemɔ 13 he: Maŋ lɛ ákɛ kooloo lɛ ni jɛ bu kwɔŋkwɔŋ lɛ mli lɛ.”
“Kooloo” lɛ kɛ “Kaisare”
12. Mɛɛ susumɔ ni ŋmɛɔ pɛpɛɛpɛ Yehowa Odasefoi yɔɔ yɛ adesai anɔyelii ahe?
12 Efeŋ nɔ ni ja akɛ aaamu sane naa akɛ, adesai fɛɛ ni hiɛ nɔyeli hegbɛi lɛ ji Satan dɛŋdadei. Mɛi babaoo ejie amɛhe kpo akɛ amɛji gbɔmɛi ni nyiɛɔ shishitoo mlai asɛɛ, tamɔ amralo Sergio Paulo ni awie ehe yɛ Biblia lɛ mli akɛ “nuu hiɛshikalɔ lɛ.” (Bɔfoi lɛ Asaji 13:7) Nɔyelɔi komɛi kɛ ekãa efã kui bibii ahegbɛi ahe, ni amɛ henilee ni Nyɔŋmɔ kɛha amɛ lɛ kudɔɔ amɛ kɛji akɛ amɛleee Yehowa kɛ eyiŋtoi po. (Romabii 2:14, 15) Kaimɔ akɛ, Biblia lɛ kɛ wiemɔ “jeŋ” tsuɔ nii yɛ gbɛi enyɔ ni kɛ amɛhe kpaaa gbee nɔ: adesai aje lɛ, ní Nyɔŋmɔ sumɔɔ ni esa akɛ wɔsumɔ lɛ, kɛ adesai ajeŋ ni etsi ehe kɛjɛ Yehowa he, ni Satan ji enyɔŋmɔ, ni esa akɛ wɔtsi wɔhe kwraa kɛjɛ he lɛ. (Yohane 1:9, 10; 17:14; 2 Korintobii 4:4; Yakobo 4:4) Enɛ hewɔ lɛ, Yehowa tsuji yɛ subaŋ ni ŋmɛɔ pɛpɛɛpɛ yɛ adesai anɔyeli he. Wɔkɛ wɔhe wooo maŋkwramɔ saji amli akɛni wɔsɔmɔɔ akɛ Nyɔŋmɔ Maŋtsɛyeli lɛ najiaŋdamɔlɔi loo bɔfoi, ni wɔjɔɔ wɔwala nɔ wɔha Nyɔŋmɔ lɛ hewɔ. (2 Korintobii 5:20) Yɛ gbɛ kroko nɔ lɛ, wɔjɛɔ wɔ henilee mli wɔbaa wɔhe shi wɔhaa mɛi ni yeɔ nɔ lɛ.
13. (a) Te Yehowa buɔ adesai anɔyelii ehaa tɛŋŋ? (b) Nɛgbɛ Kristofoi aheshibaa kɛha adesai anɔyelii lɛ yashɛɔ?
13 Nɛkɛ nifeemɔ gbɛ ni ŋmɛɔ pɛpɛɛpɛ nɛɛ jieɔ Yehowa Nyɔŋmɔ diɛŋtsɛ susumɔ kpo. Kɛ́ jeŋ hewalɛi, loo Maji bibii kwraa po kɛ amɛ nɔyeli hegbɛ tsu nii yɛ gbɛ fɔŋ nɔ, ni amɛnyɛ amɛ maŋbii anɔ, aloo amɛwa mɛi ni jaa Nyɔŋmɔ lɛ ayi lɛ, no lɛ eka shi faŋŋ akɛ amɛsa bɔ ni awie amɛhe aha yɛ gbalɛ wiemɔ mli akɛ kooloi awuiyelɔi lɛ. (Daniel 7:19-21; Kpojiemɔ 11:7) Shi, kɛ́ maŋ nɔyelii lɛ tsu Nyɔŋmɔ yiŋtoo he nii, ni amɛha mla kɛ gbɛjianɔtoo kpakpa hi shi yɛ jalɛsaneyeli mli lɛ, no lɛ ebuɔ amɛ akɛ ‘etsuji.’ (Romabii 13:6) Yehowa miikpa ewebii agbɛ akɛ amɛjie bulɛ kpo amɛha adesai anɔyelii ni amɛba amɛhe shi amɛha amɛ, shi amɛ heshibaa lɛ jeee nɔ ni husui bɛ he. Kɛ́ gbɔmɛi bi ni Nyɔŋmɔ tsuji afee nibii ni Nyɔŋmɔ mla guɔ aloo amɛgu nibii ni Nyɔŋmɔ biɔ ni etsuji afee lɛ, etsuji nyiɛɔ shidaamɔ ni bɔfoi lɛ kɔ lɛ sɛɛ, akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.”—Bɔfoi lɛ Asaji 5:29, NW.
14. Te Yesu tsɔɔ Kristofoi aheshibaa kɛha adesai anɔyelii lɛ mli eha tɛŋŋ? Ni Paulo hu?
14 Yesu wie akɛ gbɛnaa nii baakã esɛɛnyiɛlɔi lɛ anɔ yɛ nɔyelii kɛ Nyɔŋmɔ fɛɛ gbɛfaŋ, beni ejaje akɛ: “Belɛ nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ!” (Mateo 22:21) Bɔfo Paulo ŋma yɛ mumɔ naa akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ . . . Shi kɛji ofee nɔ ni ji efɔŋ lɛ, she gbeyei! ejaakɛ jeee yaka ehiɛ tsi lɛ; shi eji Nyɔŋmɔ sɔɔlɔ ni kɛ mlifu tɔɔ owele yɛ mɔ ni tsuɔ nifɔjianii lɛ nɔ. No hewɔ lɛ sa akɛ abaa he shi, jeee yɛ mlifu lɛ kɛkɛ hewɔ, shi moŋ henilee hewɔ hu. Enɛ hewɔ ni nyɛtsuɔ onia hu lɛ.” (Romabii 13:1, 4-6) Ehe ebahia ni Kristofoi asusu nibii ni Maŋ lɛ biɔ yɛ amɛdɛŋ lɛ ahe, kɛjɛ Ŋ.B. klɛŋklɛŋ afii oha lɛ mli aahu kɛbashi ŋmɛnɛ. Ehe ebahia ni amɛyoo kɛji nakai nibii ni abiɔ yɛ amɛdɛŋ lɛ ahe nitsumɔ baaha amɛŋmɛɛ amɛjamɔ lɛ he ni akɛsaa, aloo kɛji nɛkɛ nibii ni abiɔ yɛ amɛdɛŋ nɛɛ ja yɛ mla naa ni esa akɛ amɛjɛ amɛhenilee mli amɛtsu he nii.
Maŋbii ni Kɛ Amɛhenilee Tsuɔ Nii
15. Yehowa Odasefoi jɛɔ amɛhenilee mli amɛwoɔ nɔ ni ji Kaisare nii lɛ amɛhaa lɛ yɛ mɛɛ gbɛ nɔ?
15 Maŋkwramɔŋ “hegbɛi ni yeɔ nɔ” lɛ ji Nyɔŋmɔ ‘tsulɔ’ kɛji akɛ amɛtsu amɛgbɛhe ni Nyɔŋmɔ kpɛlɛɔ nɔ, ní hegbɛ ni amɛyɔɔ yɛ “efɔŋfeelɔi aweletɔɔ hewɔ kɛ ekpakpafeelɔi ayijiemɔ hewɔ” lɛ fata he lɛ ahe nii. (1 Petro 2:13, 14) Yehowa tsuji jɛɔ amɛhenilee mli amɛkɛ Kaisare nii ni ebiɔ, ni ja yɛ mla naa yɛ toowoo gbɛfaŋ lɛ haa lɛ, ni amɛyaa shɔŋŋ kɛyashiɔ he ni amɛhenilee ni Biblia lɛ etsɔse lɛ lɛ baaŋmɛ amɛ gbɛ ni “amɛba amɛhe shi amɛha onukpai kɛ nɔyelɔi lɛ, . . . [ni] amɛsaa amɛhe amɛha nitsumɔ kpakpa fɛɛ nitsumɔ kpakpa.” (Tito 3:1) Nɔ ni fata “nitsumɔ kpakpa” he ji mɛi krokomɛi ni aaaye abua amɛ, tamɔ be mli ni oshara ko eba nɛkɛ. Mɛi babaoo eye mlihilɛ ni Yehowa Odasefoi jieɔ lɛ kpo amɛtsɔɔ nanemɛi adesai yɛ shihilɛi nɛɛ amli lɛ he odase.—Galatabii 6:10.
16. Mɛɛ nitsumɔi kpakpai Yehowa Odasefoi jɛɔ amɛhenilee mli amɛtsuɔ amɛhaa nɔyelii kɛ amɛnanemɛi adesai?
16 Yehowa Odasefoi sumɔɔ amɛnanemɛi adesai asane, ni amɛnuɔ he akɛ nitsumɔ kpakpa ni hi fe fɛɛ ni amɛbaanyɛ amɛtsu amɛha amɛ ji ni amɛye amɛbua amɛ ni amɛbaná Nyɔŋmɔ yiŋ ni eto akɛ ekɛ jalɛ “ŋwɛi hee kɛ shikpɔŋ hee” baaba lɛ he anɔkwa nilee. (2 Petro 3:13) Amɛji gbɔmɛi ni he yɔɔ sɛɛnamɔ kɛha adesai ashihilɛ gbɛjianɔtoo, kɛtsɔ Biblia mli jeŋba kpakpa he shishitoo mlai ni nɔ kwɔlɔ ni amɛtsɔɔ ni amɛkɛtsuɔ nii hu lɛ nɔ, ni amɛhereɔ mɛi ayiwala kɛjɛɔ mlatɔmɔ mli. Yehowa tsuji yeɔ mla nɔ ni amɛjieɔ bulɛ kpo amɛtsɔɔ nɔyeli lɛ mli maŋ sɔɔlɔi, onukpai, kojolɔi, kɛ maŋtiase nɔkwɛlɔi, ni amɛkɛ woo haa ‘mɛi anɔ̃ ni ji woo lɛ.’ (Romabii 13:7) Fɔlɔi Odasefoi jɛɔ miishɛɛ mli amɛkɛ amɛbii askul tsɔɔlɔi feɔ ekome ni amɛyeɔ amɛbuaa amɛbii lɛ koni amɛkase nii jogbaŋŋ, bɔni afee ni sɛɛ mli lɛ amɛnyɛ amɛtsu nii ni amɛná amɛdaaŋ ŋmaa ni amɛkafee jatsu yɛ maŋbii lɛ anɔ. (1 Tesalonikabii 4:11, 12) Odasefoi teɔ shi amɛwoɔ hewolonɔ sui ahe jwɛŋmɔ fɔŋ namɔ kɛ kui amligbalamɔ, yɛ amɛ asafoi lɛ amli, ni amɛbuɔ weku shihilɛ ni aaawo mli hewalɛ lɛ akɛ nɔ ni he hiaa waa. (Bɔfoi lɛ Asaji 10:34, 35; Kolosebii 3:18-21) No hewɔ lɛ, amɛkɛ amɛnifeemɔi tsɔɔ akɛ naafolɔmɔi ni akɛshiɔ amɛ akɛ amɛteɔ shi amɛwoɔ weku shihilɛ loo amɛyeee amɛbuaaa akutsoŋ shihilɛ lɛ ji amale. Enɛ hewɔ lɛ, bɔfo Petro wiemɔi lɛ feɔ anɔkwale, akɛ: “Nakai ji Nyɔŋmɔ suɔmɔnaa nii lɛ, akɛ ekpakpa feemɔ nyɛkɛaatsimɔ gbɔmɛi ni bɛ yitsoŋ lɛ akwashiafeemɔ lɛ naa.”—1 Petro 2:15.
17. Kristofoi baanyɛ aya nɔ ‘amɛnyiɛ yɛ nilee mli, yɛ mɛi ni yɔɔ sɛɛ lɛ ahiɛ’ yɛ mɛɛ gbɛ nɔ?
17 No hewɔ lɛ, yɛ be mli ni Kristo anɔkwa sɛɛnyiɛlɔi lɛ ‘jɛɛɛ je lɛ mli’ lɛ, amɛkã he amɛyɛ adesai ajeŋ shihilɛ gbɛjianɔtoo lɛ mli lolo, ni esa akɛ amɛya nɔ ‘amɛnyiɛ yɛ nilee mli, yɛ mɛi ni yɔɔ sɛɛ lɛ ahiɛ.’ (Yohane 17:16; Kolosebii 4:5) Bei abɔ ni Yehowa eŋmɛ hegbɛi ni yeɔ nɔ lɛ agbɛ akɛ amɛtsu nii akɛ esɔɔlɔ lɛ, wɔbaaya nɔ wɔjie bulɛ ni sa kpo wɔtsɔɔ amɛ. (Romabii 13:1-4) Yɛ be mli ni wɔhiɔ shi akɛ mɛi ni kɛ amɛhe wooo maŋkwramɔ saji amli lɛ, wɔsɔleɔ wɔhaa “maŋtsɛmɛi kɛ mɛi fɛɛ ni yeɔ onukpai lɛ,” titri lɛ kɛ́ aabi ni mɛnɛɛmɛi afee yiŋkpɛi ni baanyɛ asa jamɔ mli heyeli he lɛ. Wɔbaaya nɔ wɔfee enɛ “koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli,” bɔni afee ni ‘ahere gbɔmɛi fɛɛ yiwala.’—1 Timoteo 2:1-4.
[Shishigbɛ niŋmai]
a Kwɛmɔ Kpojiemɔ—Enaagbee Kwraa lɛ Ebɛŋkɛ! wolo lɛ, ni Watchtower Bible and Tract Society of New York fee lɛ, yitso 35.
Sanebimɔi ni Akɛtĩɔ Mli
◻ Mɛɛ “jeŋ” Kristofoi ji efã lɛ, shi mɛɛ “jeŋ” amɛnyɛŋ amɛfee efã lɛ?
◻ Mɛni “kooloo” lɛ “okadi” ni yɔɔ mɔ ko nine he loo ehiɛŋtso nɔ lɛ feɔ he mfoniri, ni mɛɛ okadi Yehowa tsuji anɔkwafoi yɔɔ?
◻ Mɛɛ susumɔ ni ŋmɛɔ pɛpɛɛpɛ anɔkwa Kristofoi yɔɔ yɛ adesai anɔyelii ahe?
◻ Mɛni ji gbɛ̀i komɛi ni Yehowa Odasefoi tsɔɔ nɔ amɛyeɔ amɛbuaa kɛha adesai ashihilɛ gbɛjianɔtoo hilɛ?
[Mfoniri ni yɔɔ baafa 16]
Biblia lɛ wieɔ adesai anɔyelii ahe akɛ Nyɔŋmɔ tsulɔ kɛ kooloo awuiyelɔ fɛɛ
[Mfoniri ni yɔɔ baafa 17]
Akɛni amɛjieɔ suɔmɔ kɛ mɔ hesusumɔ kpo amɛtsɔɔ mɛi krokomɛi hewɔ lɛ, Yehowa Odasefoi ahe yɛ sɛɛnamɔ kɛha amɛ akutseiaŋbii