Ní Aaajá Nyɔŋmɔ yɛ Anɔkwale Mli

Kɛ Nyɔŋmɔ baakpɛlɛ wɔjamɔ lɛ nɔ lɛ, no lɛ esa akɛ edamɔ anɔkwale nɔ. (Yohane 4:23) Biblia lɛ wieɔ anɔkwa jálɔi ahe akɛ amɛfata “Nyɔŋmɔ hiɛkalɔ lɛ asafo lɛ, anɔkwale lɛ akulashiŋ kɛ enɔdaamɔ nɔ lɛ” he. (1 Timoteo 3:15) Mɛi ni feɔ Nyɔŋmɔ asafo lɛ jeee mɛi ni heɔ Nyɔŋmɔ Wiemɔ lɛ mli anɔkwale lɛ pɛ amɛyeɔ kɛkɛ, shi, amɛhiɔ shi yɛ naa, ni amɛfãa he, ni amɛhaa aleɔ yɛ shikpɔŋ lɛ nɔ he fɛɛ he.—Mateo 24:14; Romabii 10:9-15.

ALE Yehowa Odasefoi waa yɛ amɛ Biblia kasemɔ nitsumɔ, ni amrɔ nɛɛ atsuɔ yɛ shikpɔji ni fa fe 200 nɔ lɛ hewɔ. Amɛkaseɔ Biblia lɛ, ni amɛtsɔɔ akɛ no ji anɔkwale lɛ, ní amɛkɛ adesai ajeŋ nileei ni gbɔjɔɔ lɛ lɛ fataaa he. Ani ole amɛtsɔɔmɔi ni damɔ Biblia lɛ nɔ lɛ? Mɛi babaoo shashaoɔ shi akɛ amɛaabo Yehowa Odasefoi atoi yɛ amɛhe saji gbohii ni awieɔ yɛ he fɛɛ he lɛ hewɔ. Shi aafɔ̃ nine aatsɛ mɛi ni yɔɔ anɔkwa tsui lɛ koni amɛbakpɛ amɛyiŋ amɛha amɛ diɛŋtsɛ amɛhe kɛji akɛ nɔ ni Odasefoi lɛ tsɔɔ lɛ ji anɔkwale lɛ aloo ejeee nakai. Esaaa akɛ nɛkɛ yiŋkpɛɛ ni he hiaa nɛɛ damɔɔ nɔ ni anu kɛkɛ nɔ. Mɛi babaoo ni epɛi Yehowa Odasefoi atsɔɔmɔi lɛ amli amɛ diɛŋtsɛ lɛ ená he sɛɛ babaoo diɛŋtsɛ.

Anɔkwale lɛ He Nilee Kuɔ Gbeyeishemɔ Naa

Ákɛ nɔkwɛmɔnɔ lɛ, susumɔ Eugenia sane lɛ he okwɛ. Atsɔse lɛ yɛ shia ni hiɛ dɔɔ yɛ Katolik jamɔ mli lɛ mli. Etsɛ fata gbɛjianɔtolɔi ni to paapa lɛ Mexico saramɔ yɛ afi 1979 lɛ he gbɛjianɔ lɛ he. Beni esaraa nanemɛi lɛ, Eugenia kɛ Yehowa Odasefoi kpe. Kɛtsɔ amɛyelikɛbuamɔ nɔ lɛ, ebɔi nɔ ni Biblia lɛ kɛɔ lɛ mlipɛimɔ jogbaŋŋ. Ekaiɔ akɛ: “Shishijee lɛ, mibɔi gbeyeishemɔ. Mina anɔkwale lɛ! Shi enɛ tsɔɔ akɛ miklɛŋklɛŋ hemɔkɛyelii lɛ babaoo ejaaa. Miweku, minanemɛi, mɛi ni misumɔɔ—lɛ fɛɛ ahemɔkɛyelii lɛ ejaaa. Mihe kpokpo. Mitee nɔ mibi mihe bɔ ni miweku lɛ baafee enii eha yɛ nɔ̃ hee ni mina lɛ he. Beni be shwieɔ mli kɛ Yehowa yelikɛbuamɔ naa lɛ, mibɔi tsakemɔ feemɔ yɛ niiashikpamɔ kpele nɛɛ mli. Gbi ko lɛ, mikpɛ miyiŋ akɛ mabɔ naanyo ko ní kɛ weku lɛ bɔɔ, ni ji Nyɔŋmɔ jamɔ he nilelɔ ko lɛ amaniɛ. Migba lɛ bɔ ni misumɔɔ koni matao anɔkwale lɛ fɛɛ lɛ he sane. Kɛkɛ ni ekɛɛ, ‘Kɛji ootao ni ole anɔkwale lɛ, taomɔ Yehowa Odasefoi lɛ.’ ”

Taakɛ Eugenia she he gbeyei lɛ, eweku lɛ shwie lɛ kɛjɛ shia lɛ mli. Shi kɛlɛ, Odasefoi lɛ tee nɔ amɛkɛ mumɔŋ yelikɛbuamɔ ha lɛ. Ewie akɛ: “Awo mi hewalɛ koni madamɔ shi kɛha anɔkwale lɛ. Miyɔse akɛ eji nɔ ni sa akɛ awuɔ he ta. Hiɛmɛɛ ni akɛhere mi yɛ Yehowa Odasefoi lɛ ateŋ lɛ he miihia waa. Minu suɔmɔ he yɛ Kristofoi asafo lɛ mli. Nyɔŋmɔ gbɛjianɔtoo lɛ ni mikɛ mihe kpɛtɛ he gbagbalii lɛ ye ebua mi ni miye gbeyeishemɔ akɛ mi pɛ madamɔ naa lɛ nɔ kunim.”

Susumɔ nɔkwɛmɔnɔ kroko hu he. Sabrina bada ákɛ mɔ ko ni asusuɔ Biblia lɛ mli saji ahe daa yɛ amɛweku lɛ mli. Yɛ anɔkwale mli lɛ, amɛto ‘weku jamɔ’ ko shishi. Eha efee esu akɛ ekɛ ehe baabɔ jamɔi srɔtoi amli bii ahe koni ekpa amɛtɔmɔi lɛ ahe mama. Beni Yehowa Odasefoi lɛ ateŋ mɔ kome kɛɛ ekɛ lɛ baakase Biblia lɛ, ekpɛlɛ nɔ amrɔ nɔŋŋ kɛ yiŋtoo akɛ ebaatsɔɔ akɛ amɛhemɔkɛyelii lɛ ejaaa. Ekaiɔ akɛ: “Beni mikɛ nɔ ni fe afi ekase nii sɛɛ lɛ, mishe gbeyei akɛ miilaaje ‘minɔkwale’ lɛ. Miná lɛ mlɛo akɛ makpa lakamɔ ni yɔɔ jamɔi babaoo ni mikɛbɔ lɛ mli lɛ ahe mama, shi mináaa lɛ mlɛo yɛ mɛnɛɛmɛi agbɛfaŋ.”

Sabrina gbeyeishemɔ lɛ ha ekpa Biblia lɛ ni Yehowa Odasefoi kɛ lɛ kaseɔ lɛ. Shi enu he akɛ efee shwɛm yɛ mumɔŋ. Ekpɛ eyiŋ akɛ ebaaje nikasemɔ lɛ shishi, ni naagbee mli lɛ, ebakpɛlɛ anɔkwale hee ni ena nɛɛ nɔ. Sabrina tee hiɛ kɛyashɛ he ni eesumɔ koni ekɛ mɛi krokomɛi aja nɔ ni ekaseɔ lɛ. Ebi po koni efata Odasefoi lɛ ahe yɛ amɛshia-kɛ-shia shiɛmɔ lɛ mli. Sabrina tsɔɔ mli akɛ: “Dani aaakpɛlɛ minɔ ni mikɛ Yehowa Odasefoi lɛ ashiɛ lɛ, abi mi akɛ: ‘Ani oosumɔ ni otsɔ Yehowa Odasefoi lɛ ateŋ mɔ kome lɛɛlɛŋ?’ Miha hetoo akɛ, ‘Dabi!’ Mibɔi gbeyeishemɔ ekoŋŋ.” Naagbee lɛ, beni etsá nɔ etee kpeei fɛɛ, ní eyɔse Nyɔŋmɔ webii lɛ kɛ bɔ ni amɛkɛ Biblia mli shishitoo mlai tsuɔ nii lɛ, Sabrina bamu sane naa akɛ no ji anɔkwale lɛ lɛɛlɛŋ. Abaptisi lɛ, ni amrɔ nɛɛ eji be-fɛɛ sanekpakpa jajelɔ.

Mɛni Hewɔ Eyɔɔ Srɔto Nakai Lɛ?

Ekolɛ, mɔ ko baabi akɛ, ‘Mɛni hewɔ Yehowa Odasefoi atsɔɔmɔi lɛ yɔɔ srɔto kwraa yɛ jamɔi krokomɛi anɔ he lɛ?’ Nɔ ni Odasefoi lɛ heɔ amɛyeɔ lɛ hesusumɔ kuku baaye abua bo koni ona akɛ, amɛji Kristofoi ni yeɔ anɔkwa, kɛ Biblia kaselɔi ni yɔɔ ekãa. Wɔmiiwo bo hewalɛ koni okwɛ bo diɛŋtsɛ o-Biblia lɛ mli ni okane ŋmalɛi ni yɔɔ amɛhemɔkɛyelii ahe wiemɔi kukuji ni atsɔɔ yɛ ŋwɛigbɛ lɛ amli.

Kɛ́ osusu nɔ ni Yehowa Odasefoi heɔ amɛyeɔ kɛ bɔ ni amɛkɛ amɛhe kpɛtɛɔ nɔ ni Biblia lɛ tsɔɔ lɛ he lɛ he jogbaŋŋ lɛ, abaanyɛ akɛ heyeli ni anɔkwale lɛ kɛhaa lɛ ajɔɔ bo. (Yohane 17:17) Yiŋtoo ko bɛ ni ooodamɔ nɔ oshe anɔkwale lɛ gbeyei. Kaimɔ akɛ Yesu wo shi akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:32.

[Akrabatsa ni yɔɔ baafa 6]

YEHOWA ODASEFOI AHEMƆKƐYELII KOMƐI

◯ Yehowa ji Nyɔŋmɔ ofe lɛ. Egbɛi lɛ jeɔ kpo nɔ ni fe shii 7,000 yɛ mra be mli Biblia woji ni akɛ niji ŋmala lɛ mli.—Lala 83:19.

◯ Yesu Kristo ji Nyɔŋmɔ Bi, mɔ ni ba shikpɔŋ lɛ nɔ ni ekɛ ewala bafɔ̃ shi eha adesai lɛ. (Yohane 3:16, 17) Yehowa Odasefoi nyiɛɔ Yesu Kristo tsɔɔmɔi ni anaa yɛ Sanekpakpai lɛ amli lɛ sɛɛ.

◯ Yehowa Odasefoi lɛ agbɛi lɛ damɔ Yesaia 43:10 ni kɛɔ akɛ: “Yehowa kɛɛ, nyɛji midasefoi” lɛ nɔ.

◯ Maŋtsɛyeli ni gbɔmɛi sɔleɔ yɛ he yɛ “Wɔtsɛ ni yɔɔ ŋwɛi” sɔlemɔ lɛ mli lɛ ji ŋwɛi maŋtsɛyeli ni etsɛŋ ni ebaajie amanehulu kɛ piŋmɔ fɛɛ ni yɔɔ je lɛ mli lɛ kɛya koni egbele gbɛ kɛha Paradeiso ni Biblia lɛ woɔ he shi lɛ.—Yesaia 9:6, 7; Daniel 2:44; Mateo 6:9, 10; Kpojiemɔ 21:3, 4.

◯ Mɔ fɛɛ mɔ ni feɔ Nyɔŋmɔ suɔmɔnaa nii lɛ naa hegbɛ akɛ eeena Maŋtsɛyeli lɛ mli jɔɔmɔi lɛ amli ŋɔɔmɔ kɛya naanɔ.—Yohane 17:3; 1 Yohane 2:17.

◯ Esa akɛ Kristofoi aba amɛjeŋ taakɛ bɔ ni Biblia lɛ tsɔɔ lɛ. Esa akɛ amɛbɔ mɔdɛŋ ni amɛye anɔkwa, amɛhi shi yɛ hetsemɔ mli, amɛhiɛ jeŋba kpakpa mli, ni amɛjie suɔmɔ kpo amɛtsɔɔ amɛnanemɛi.—Mateo 22:39; Yohane 13:35; 1 Korintobii 6:9, 10.

[Mfoniri ni yɔɔ baafa 5]

Yehowa Odasefoi haa gbɔmɛi ni yɔɔ shikpɔji ni fe 200 nɔ leɔ Biblia mli anɔkwale lɛ