Afɔlei Ni Sa Ni Akɛaaha Yehowa

GBI ko yɛ yinɔsane mli lɛ, abaanyɛ ana naakpɛɛ nɔ ko ni sa kadimɔ waa yɛ gbɛ ni atsɔɔ nɔ kɛboteɔ Eden abɔɔ lɛ mli ni kã ebokagbɛ lɛ naa.a Kerubim kãkãlɔi damɔ jɛmɛ ni amɛmiibu, ni bɔ ni amɛmli efu lɛ haa anaa faŋŋ akɛ esaaa akɛ mɔ ko batsɔɔ jɛmɛ. Nakai nɔŋŋ la lilɛi klante ni tsɔmɔɔ ehe lɛ hu tsiɔ mɔ naa, nɔ ni ekolɛ efɔ̃ɔ la etswiaa tsei ni yɔɔ jɛmɛ gbɛkɛ lɛ. (1 Mose 3:24) Bɔ fɛɛ bɔ ni eyɔɔ miishɛɛ ha lɛ fɛɛ sɛɛ lɛ, mɔ fɛɛ mɔ ni aaakwɛ lɛ baadamɔ sɛɛ flɛŋŋ.

Ekolɛ Kain kɛ Habel eyasara jɛmɛ shii abɔ. Akɛni Adam kɛ Hawa fɔ amɛ yɛ abɔɔ lɛ sɛɛ hewɔ lɛ, amɛbaanyɛ amɛsusu bɔ ni Paradeiso mli shihilɛ ji lɛ he kɛkɛ, taakɛ amɛfɔlɔi hi shi be ko ni eho lɛ, kɛ bɔ ni emli tsei kɛ amɛnɔ baai kusuu lɛ náa nu jogbaŋŋ, kɛ aduawai kɛ yeli baai babaoo lɛ. Amrɔ nɛɛ lɛ, ŋwanejee ko bɛ he akɛ nɔ ko bibioo ni abaana yɛ Eden ji he ko ni etsa kusuu ni ahuko mli.

Eka shi faŋŋ akɛ Adam kɛ Hawa etsɔɔ amɛbii lɛ nɔ hewɔ ni abɔɔ lɛ efee he ko ni ahuuu mli lɛ, kɛ nɔ hewɔ ni ashwie amɛ kɛjɛ mli lɛ. (1 Mose 2:17; 3:6, 23) Kwɛ bɔ ni Kain kɛ Habel nijiaŋ baaje wui aha! Amɛbaanyɛ amɛna abɔɔ lɛ, shi amɛnyɛŋ amɛbote mli. Amɛbɛŋkɛ Paradeiso lɛ he kpaakpa moŋ, shi yɛ nakai beaŋ nɔŋŋ lɛ, amɛkɛ lɛ teŋ jɛkɛ. Emuu ni amɛyeee lɛ efite amɛ, nɔ ko bibioo ko pɛ Kain loo Habel baanyɛ afee.

Yɛ anɔkwale mli lɛ, amɛfɔlɔi awekukpaa lɛ nyɛŋ asaa saji lɛ. Beni Nyɔŋmɔ buɔ Hawa fɔ lɛ, ekɛɛ akɛ: “Owu lɛ sɛɛgbɛ oootao, ni lɛ eeeye onɔ.” (1 Mose 3:16) Nakai gbalɛ lɛ ba mli, ekolɛ Adam miiye eŋa lɛ nɔ agbɛnɛ, ni ekolɛ ekɛ lɛ yeee akɛ ehefatalɔ kɛ yelikɛbualɔ dɔŋŋ. Ni etamɔ nɔ ni Hawa baabi nɛkɛ nuu nɛɛ nibii pii tsɔ ni efee eha lɛ. Wiemɔ shishitsɔɔmɔ ko po tee shɔŋŋ yɛ be mli ni etsɔɔ ‘esɛɛgbɛ ni eeetao’ lɛ mli akɛ etsɔɔ “shwelɛ ni anaa tamɔ hela ko.”

Biblia lɛ etsɔɔɔ he ni gbalashihilɛ mli shihilɛ nɛɛ sa bulɛ ni gbekɛbii hii lɛ ná kɛha amɛfɔlɔi lɛ he kɛyashi lɛ mli. Shi eka shi faŋŋ akɛ, Adam kɛ Hawa fee nɔkwɛmɔnɔ gbonyo amɛfɔ̃ shi amɛha amɛbii lɛ.

Gbɛ̀i Srɔtoi Halamɔ

Yɛ naagbee lɛ Habel batsɔ tookwɛlɔ, ni Kain tsɔ okwaafonyo. (1 Mose 4:2) Ŋwanejee ko bɛ he akɛ yɛ be mli ni Habel lɛɔ etooi lɛ, ená be ni fa ni ekɛsusu gbalɛ ni he hiaa waa ni agba afɔ̃ shi dani ashwie efɔlɔi kɛjɛ Eden lɛ he: “Mikɛ nyɛ̃ɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ̃, ni bo hu oootswa enanetsitsi nɔ̃.” (1 Mose 3:15) Ekolɛ Habel baasusu ‘Gbɛ ni Nyɔŋmɔ shiwoo ni kɔɔ seshi ni baatswa onufu lɛ nɔ̃ lɛ aaatsɔ nɔ aba mli, kɛ gbɛ ni aaatsɔ nɔ atswa seshi nɛɛ nanetsitsi nɔ̃?’ lɛ he.

Yɛ be ko sɛɛ, ekolɛ beni Kain kɛ Habel edara saŋŋ lɛ, amɛ fɛɛ amɛshã afɔle amɛha Yehowa. Akɛni tookwɛlɔ ji Habel hewɔ lɛ, ebɛ naakpɛɛ akɛ ekɛ “etooi lɛ akromɔbii lɛ kɛ amɛfɔi lɛ” eko baha. Nɔ ni tamɔɔɔ nakai lɛ, Kain kɛ “shikpɔŋ nibaanii lɛ eko” baha. Yehowa kpɛlɛ Habel afɔleshaa lɛ nɔ, shi “Kain kɛ efɔle lɛ, ehiɛ esɔɔɔ no.” (1 Mose 4:3-5) Mɛni hewɔ ehiɛ esɔɔɔ lɛ?

Mɛi komɛi kɛɔ akɛ, akɛni Habel afɔle lɛ ji ‘etooi lɛ akromɔbii lɛ,’ ni Kain nɔ lɛ ji “shikpɔŋ nibaanii lɛ eko” kɛkɛ lɛ hewɔ. Shi jeee bɔ ni ŋmɔshi nibii ni Kain kɛshã afɔle lɛ yɔɔ lɛ ji naagba lɛ, ejaakɛ sane lɛ tsɔɔ akɛ Yehowa hiɛ sɔ ‘Habel kɛ efɔle lɛ,’ shi ehiɛ esɔɔɔ ‘Kain kɛ efɔle lɛ.’ No hewɔ lɛ bɔ ni jálɔ lɛ tsui mli yɔɔ lɛ ji nɔ ni Yehowa kwɛɔ titri. Beni efee nakai lɛ, mɛni eyɔse? Hebribii 11:4 kɛɔ akɛ, “hemɔkɛyeli” Habel kɛshã afɔle. No hewɔ lɛ eyɛ faŋŋ akɛ Kain bɛ hemɔkɛyeli ni tamɔ Abel nɔ ni ha akpɛlɛ efɔleshãa lɛ nɔ lɛ.

Yɛ enɛ gbɛfaŋ lɛ, esa kadimɔ akɛ lá fɔsemɔ fata Habel afɔleshãa lɛ he. Ekolɛ ebaamu sane naa yɛ gbɛ ni ja nɔ akɛ, Nyɔŋmɔ shiwoo ni tsɔɔ seshi ni abaatswa enanetsitsi nɔ lɛ baakɔ wala ni akɛbaashã afɔle he. No hewɔ lɛ, Habel afɔle lɛ baanyɛ afee faikpamɔ kɛha kpatamɔ, ni etsɔɔ hemɔkɛyeli ni ayɔɔ akɛ Nyɔŋmɔ kɛ eshai ahe afɔleshãa kpatamɔnɔ̃ baaha yɛ be ni sa mli.

Nɔ ni tamɔɔɔ nakai lɛ, ekolɛ Kain kɛ hiɛdɔɔ babaoo susuuu afɔle ni eshãa lɛ he. ‘Efɔle lɛ ji yɔsemɔ ni eyɔse akɛ Nyɔŋmɔ ji yelikɛbualɔ lɛ kɛkɛ,’ taakɛ Biblia saji amlitsɔɔlɔ ni hi shi yɛ afii ohai 19 lɛ susu lɛ. “Etsɔɔ yɛ faŋŋ mli akɛ, eyɔseee mligbalamɔ ko kwraa ni kã ekɛ e-Bɔlɔ lɛ teŋ, ni asaŋ eyɔseee akɛ eshaifaa ko aloo he ni akɛaafɔ̃ kpatamɔ ko nɔ he miihia lɛ.”

Kɛfata he lɛ, akɛni Kain ji kromɔbi hewɔ lɛ, ekolɛ ekɛ henɔwomɔ susu po akɛ lɛ ji shiwoo seshi ni baakpata Onufu, ni ji Satan lɛ hiɛ lɛ. Hawa hu baanyɛ adu hiɛnyam taomɔ ni ji nii ahepelemɔ ni tamɔ nɛkɛ ewo ekromɔ bi lɛ mli. (1 Mose 4:1) Yɛ anɔkwale mli lɛ, kɛ enɛ ji nɔ ni Kain kɛ Hawa kpa gbɛ lɛ, belɛ amɛsusumɔ éjaaa.

Biblia lɛ etsɔɔɔ bɔ ni Yehowa fee ekɛtsɔɔ akɛ ekpɛlɛ Habel afɔleshãa lɛ nɔ. Mɛi komɛi susu akɛ la jɛ ŋwɛi ni ebashã nibii lɛ. Bɔ fɛɛ bɔ ni sane lɛ ji lɛ, beni ena akɛ akpoo efɔle lɛ, “Kain mli wo la naakpa, ni etu ehiɛ.” (1 Mose 4:5) Kain kɛ ehe yaawo oshara mli.

Yehowa Ŋaawoo lɛ, kɛ Bɔ ni Kain Here Nɔ Eha

Yehowa kɛ Kain susu nii ahe. Ebi lɛ akɛ: “Mɛɛba omli ewo la? ni mɛɛba otu ohiɛ nɛɛ?” Enɛ ha Kain hegbɛ babaoo ni ekɛpɛi ehenumɔi kɛ kanyamɔi amli ekwɛ. Yehowa tee nɔ akɛ: “Aso kɛji ofee ekpakpa lɛ, ohiɛ baŋ nyam lo? shi kɛji ofeee ekpakpa lɛ, esha bu shinaa lɛ shi, ni bo osɛɛgbɛ etaoɔ; shi bo lɛ ye enɔ.”—1 Mose 4:6, 7. (Kwɛmɔ akrabatsa ni yɔɔ baafa 23 lɛ mli.)

Kain booo toi. Yɛ no najiaŋ lɛ ekɛ Habel tee ŋa lɛ nɔ, ni eyagbe lɛ. Sɛɛ mli beni Yehowa bi he ni abaana Habel yɛ lɛ, Kain male kɛfata esha ni efee lɛ he. Eha hetoo akɛ: “Mileee; minyɛmi lɛ kwɛlɔ ji mi lo?”—1 Mose 4:8, 9.

Dani Kain aaagbe Habel kɛ egbele lɛ sɛɛ fɛɛ lɛ, ‘efeee ekpakpa.’ Ehala akɛ eeeha esha aye enɔ, ni enɛ hewɔ lɛ ashwie Kain kɛjɛ he ni adesa weku lɛ yɔɔ lɛ. Ekolɛ eji “okadi” akpɔ ko ni awo, bɔ ni afee ni mɔ ko akatɔ Habel gbele lɛ he owele kɛtsɔ Kain gbee nɔ.—1 Mose 4:15.

Sɛɛ mli lɛ, Kain yato maŋtiase, ni ekɛ ebinuu lɛ gbɛi wo maŋtiase lɛ. Ebɛ naakpɛɛ akɛ abale eseshibii lɛ akɛ amɛji yiwalɔi. Yɛ naagbee lɛ Kain tɔkpaa lɛ ba naagbee beni Noa gbii amli Nu Afua lɛ baaloo gbɔmɛi ni ejaaa lɛ fɛɛ kɛtee lɛ.—1 Mose 4:17-24; 7:21-24.

Abaaa Biblia mli saji ni kɔɔ Kain kɛ Habel he lɛ yi koni wɔkane kɛjie wɔhiɛtserɛ kɛkɛ. Shi moŋ “wɔhe nitsɔɔmɔ hewɔ aŋma” ni “ehi ha nitsɔɔmɔ kɛ hiɛkamɔ.” (Romabii 15:4; 2 Timoteo 3:16) Mɛni wɔbaanyɛ wɔkase kɛjɛ sane nɛɛ mli?

Nikasemɔ Kɛha Wɔ

Taakɛ Kain kɛ Habel ji lɛ, aabi koni Kristofoi ni yɔɔ ŋmɛnɛ lɛ ashã afɔle amɛha Nyɔŋmɔ—jeee afɔle diɛŋtsɛ ni ashãa, shi moŋ, “yijiemɔ afɔle . . . no ji naabui ni jajeɔ egbɛi lɛ ayibii lɛ.” (Hebribii 13:15) Amrɔ nɛɛ aatsu enɛ he nii yɛ jeŋ fɛɛ, yɛ be mli ni Yehowa Odasefoi shiɛɔ Nyɔŋmɔ Maŋtsɛyeli lɛ he sanekpakpa lɛ yɛ shikpɔji ni fa fe 230 nɔ lɛ. (Mateo 24:14) Ani ooná nakai nitsumɔ lɛ mli gbɛfaŋnɔ? No lɛ obaaná nɔmimaa akɛ ‘Nyɔŋmɔ jeee mɔ ni yeɔ sane ni ejaaa ni ehiɛ aaakpa onitsumɔ lɛ nɔ kɛ suɔmɔ deŋme ni ogbo yɛ egbɛi lɛ ahewɔ lɛ.’—Hebribii 6:10.

Taakɛ Kain kɛ Habel afɔleshãa lɛ ji lɛ, jeee bɔ ni ofɔleshãa lɛ yɔɔ yɛ kponɔgbɛ lɛ akwɛɔ akɛkojoɔ—akɛ nɔkwɛmɔnɔ lɛ, adamɔɔɔ ŋmɛlɛtswai abɔ ni oyeɔ yɛ sɔɔmɔ nitsumɔ lɛ mli lɛ nɔ. Yehowa kwɛɔ nii kɛyaa shɔŋŋ. Yeremia 17:10 kɛɔ akɛ, ‘etaoɔ tsuiŋ’ ni ‘ekaa sabai ekwɛɔ’ po—kɛboteɔ jwɛŋmɔi, henumɔi, kɛ kanyamɔi ni mɔ ko yɔɔ lɛ mli. No hewɔ lɛ, kanyamɔ ji sane lɛ diɛŋtsɛ, jeee yibɔ. Yɛ anɔkwale mli lɛ, efa jio efaaa jio, kɛ́ suɔmɔ ji nɔ ni kanya mɔ ko ni ejɛ etsui mli eshã afɔle lɛ, no lɛ ejara wa yɛ Nyɔŋmɔ hiɛ.—Okɛ Marko 12:41-44 ato 14:3-9 he.

Yɛ nakai beaŋ nɔŋŋ lɛ, esa akɛ wɔha wɔhiɛ ahi wɔhe nɔ akɛ Yehowa ekpɛlɛɛɛ afɔlei ni yeee emuu nɔ, ni nakai nɔŋŋ hu ekpɛlɛɛɛ tsui fã-kɛ-fã afɔle ni tamɔ Kain nɔ̃ lɛ nɔ. (Maleaki 1:8, 13) Yehowa miitao koni okɛ onɔ̃ ni hi fe fɛɛ lɛ aha lɛ, ni ákɛ, okɛ otsui fɛɛ, osusuma, ojwɛŋmɔ kɛ ohewalɛ fɛɛ asɔmɔ lɛ. (Marko 12:30) Ani oofee nakai? Kɛ nakai lɛ, oyɛ yiŋtoo kpakpa ni ooodamɔ nɔ oha otsui anyɔ omli yɛ afɔle ni oshãa lɛ he. Paulo ŋma akɛ: “Mɔ fɛɛ mɔ aka lɛ diɛŋtsɛ enitsumɔ ekwɛ, ni no dani eeena nɔ ko yɛ lɛ diɛŋtsɛ emli kɛkɛ ni eshwã efɔ̃ nɔ, ni jeee mɔ kroko nɔ̃ lɛ nɔ.”—Galatabii 6:4.

Akɛ tsɔsemɔ kome too lɛ nɔŋŋ ha Kain kɛ Habel. Shi be kɛ shihilɛi lɛ ha amɛteŋ mɔ fɛɛ mɔ ná hegbɛ ni amɛná sui ni yɔɔ srɔto. Awuŋayeli, béi, kɛ mlilawoo fite Kain jeŋba fiofio.

Nɔ ni tamɔɔɔ nakai lɛ, Nyɔŋmɔ kaiɔ Habel akɛ eji nuu ni ja. (Mateo 23:35) Efaishitswaa akɛ eeesa Nyɔŋmɔ hiɛ yɛ gbɛ fɛɛ gbɛ nɔ lɛ ha Habel bafee mɔ ko ni yɔɔ srɔto kwraa bɔ ni haa tsui nyɔɔ mɔ mli yɛ eweku—Adam, Hawa, kɛ Kain ni ejieee hiɛsɔɔ kpo lɛ ateŋ. Biblia lɛ kɛɔ wɔ akɛ, eyɛ mli akɛ Habel egbo moŋ, kɛlɛ ‘ewieɔ lolo.’ Enɔkwayeli yɛ Nyɔŋmɔ sɔɔmɔ mli lɛ fata yinɔsaji ni yɔɔ daa ni yɔɔ Biblia lɛ mli lɛ ahe. Eba akɛ, wɔɔnyiɛ Habel nɔkwɛmɔnɔ lɛ sɛɛ, kɛtsɔ afɔlei ni sa ni wɔɔshã wɔha Nyɔŋmɔ daa lɛ nɔ.—Hebribii 11:4.

[Shishigbɛ niŋmai]

[Akrabatsa/Mfoniri ni yɔɔ baafa 23]

Nɔkwɛmɔ Kɛha Kristofoi Ŋaawolɔi

“MƐƐBA omli ewo la? ni mɛɛba otu ohiɛ nɛɛ?” Yehowa tsɔ nɛkɛ sanebimɔ nɛɛ nɔ ekɛ Kain susu nii ahe yɛ mlihilɛ mli. Enyɛɛɛ Kain nɔ koni etsakɛ, ejaakɛ Kain yɛ jeŋba mli heyeli. (Okɛto 5 Mose 30:19 he.) Shi kɛlɛ, Yehowa shashaooo shi akɛ eeetsɔ Kain nɔ ni baajɛ gbɛ gbonyo ni ekɔ lɛ mli aba. Ebɔ Kain kɔkɔ akɛ: “Kɛji ofeee ekpakpa lɛ, esha bu shinaa lɛ shi, ni bo osɛɛgbɛ etaoɔ.”—1 Mose 4:6,7.

Esa kadimɔ waa akɛ, yɛ hiɛkamɔ ni naa wa nɛɛ fɛɛ sɛɛ lɛ, Yehowa kɛ Kain yeee tamɔ ‘mɔ ko ni anyɛŋ aye abua lɛ.’ Shi moŋ etsɔɔ Kain jɔɔmɔi ni ebaaná kɛ́ etsake egbɛ̀i, ni etsɔɔ nɔmimaa ni eyɔɔ akɛ Kain baanyɛ aye naagba lɛ nɔ kɛji eesumɔ akɛ efee nakai lɛ. Yehowa kɛɛ: “Kɛji ofee ekpakpa lɛ, ohiɛ baŋ nyam lo?” Ebi Kain sane yɛ gbɔmɔgbee mlifu ni ená lɛ he hu akɛ: “Shi bo lɛ ye enɔ.”

Ŋmɛnɛ lɛ esa akɛ onukpai ni yɔɔ Kristofoi asafo lɛ mli lɛ akase Yehowa nɔkwɛmɔnɔ lɛ. Taakɛ ejeɔ kpo yɛ 2 Timoteo 4:2 lɛ, esa akɛ bei komɛi lɛ ‘amɛkã hiɛ,’ ni ‘amɛwo ŋaa’ ni amɛtsɔɔ nɔ ni baajɛ gbɛ ni ejaaa ni mɔ ni etɔ̃ lɛ ekɔ lɛ mli aba lɛ mli yɛ faŋŋ mli. Yɛ nakai beaŋ nɔŋŋ lɛ, esa akɛ onukpai lɛ ‘abɔ kɔkɔ’ hu. Hela wiemɔ pa·ra·ka·leʹo shishi ji “ni awo hewalɛ.” “Ŋaawoo lɛ jeee wiemɔ ni naa wa, jeee kɛ mlifu, aloo ni aaawie hiɛ nyanyaanya,” taakɛ Theological Dictionary of the New Testament lɛ tsɔɔ mli lɛ. “Anɔkwale ni ji akɛ miishɛjemɔ baanyɛ afee eshishinumɔ kroko lɛ, tsɔɔ nɔ kome lɛ nɔŋŋ.”

Nɔ ni sa kadimɔ ji akɛ, Hela wiemɔ ni ji pa·raʹkle·tos ni kɔɔ he lɛ hu baanyɛ atsɔɔ yelikɛbualɔ aloo mɔ ni fiɔ mla saji asɛɛ. No hewɔ lɛ, kɛ onukpai kɛ hiɛkãmɔ ha tɛ̃ɛ po lɛ, esa akɛ amɛkai akɛ amɛji yelikɛbualɔi—jeee mɔ aŋkro ni ŋaawoo he hiaa lɛ lɛ—henyɛlɔi. Taakɛ Yehowa ji lɛ, esa akɛ onukpai lɛ afee nii yɛ anɔkwale mli, amɛtsɔɔ akɛ amɛyɛ hekɛnɔfɔɔ akɛ mɔ ni awoɔ lɛ ŋaa lɛ baanyɛ aye naagba lɛ nɔ.—Okɛto Galatabii 6:1 he.

Yɛ anɔkwale mli lɛ, yɛ naagbee kwraa lɛ edamɔ mɔ lɛ nɔ akɛ ekɛ ŋaawoo lɛ aaatsu nii. (Galatabii 6:5; Filipibii 2:12) Ŋaawolɔi baana akɛ mɛi komɛi kɛ amɛkɔkɔbɔi tsuuu nii, taakɛ Kain hala akɛ eeekpoo kãmɔ ni Bɔlɔ lɛ diɛŋtsɛ kɛhaa lɛ lɛ. Shi kɛlɛ, kɛ onukpai kase Yehowa, ni ji Nɔkwɛmɔnɔ ni yeɔ emuu kɛha Kristofoi ŋaawolɔi lɛ, no lɛ amɛbaaná nɔminaa akɛ amɛfee nɔ ni esa akɛ amɛfee lɛ.