Mɛni Tsɔɔ akɛ Yehowa Sumɔɔ Wɔ?

 1. Mɛni he bɔfo Yohane wo wɔ hewalɛ ni wɔsusu? Ni mɛni hewɔ?

BƆFO Yohane wo wɔ hewalɛ ni wɔhe be kɛjwɛŋ suɔmɔ kpele ni Yehowa ejie kpo etsɔɔ wɔ lɛ nɔ jogbaŋŋ. Wɔkaneɔ yɛ 1 Yohane 3:1 lɛ akɛ: “Nyɛkwɛa suɔmɔ sɔŋŋ ni Tsɛ lɛ kɛsumɔ wɔ!” Kɛ́ wɔjwɛŋ suɔmɔ kpele ni Yehowa yɔɔ kɛhã wɔ lɛ nɔ, ni wɔsusu gbɛi srɔtoi ni etsɔɔ nɔ ejieɔ suɔmɔ nɛɛ kpo etsɔɔ wɔ lɛ he lɛ, wekukpaa ni yɔɔ wɔ kɛ teŋ lɛ mli baawa, ni wɔbaasumɔ lɛ waa fe bɔ ni wɔsumɔɔ lɛ bianɛ lɛ po.

 2. Mɛni hewɔ ewa kɛhã mɛi komɛi akɛ amɛaahe amɛye akɛ Nyɔŋmɔ sumɔɔ amɛ lɛ?

² Mɔbɔ sane ji akɛ, mɛi komɛi heee amɛyeee akɛ Nyɔŋmɔ baanyɛ asumɔ amɛ. Amɛnuɔ he akɛ Nyɔŋmɔ susuuu adesai ahe. Amɛteŋ mɛi komɛi susuɔ akɛ, nɔ pɛ ni Nyɔŋmɔ feɔ ji, ewoɔ mlai ni egbalaa mɛi atoi. Amale jamɔi ehã mɛi komɛi po ená jwɛŋmɔ lɛ akɛ, Nyɔŋmɔ yitsoŋ wa, ni no hewɔ lɛ, mɔ ko mɔ ko nyɛŋ asumɔ lɛ. Yɛ mɛi komɛi hu agbɛfaŋ lɛ, amɛsusuɔ akɛ Nyɔŋmɔ sumɔɔ gbɔmɛi fɛɛ, ekɔɔɔ he eko amɛjeŋba. Shi Biblia lɛ ni okase lɛ eye ebua bo ni obale Yehowa jogbaŋŋ. Okase akɛ esui lɛ ateŋ otu ji suɔmɔ, ni akɛ ekɛ e-Bi lɛ hã akɛ kpɔmɔnɔ kɛhã bo. (Yohane 3:16; 1 Yohane 4:8) Kɛ̃lɛ, eeenyɛ efee akɛ, nibii komɛi ni okɛkpe yɛ shihilɛ mli hewɔ lɛ, ewa kɛhã bo akɛ ooona bɔ ni Yehowa sumɔɔ bo waa hã lɛ jogbaŋŋ.

 3. Mɛni ji nɔ kome ni kɛ́ wɔle lɛ ebaaye ebua wɔ ni wɔna akɛ Yehowa sumɔɔ wɔ?

³ Nɔ kome ni kɛ́ wɔle lɛ ebaaye abua wɔ ni wɔna akɛ Yehowa sumɔɔ wɔ ji akɛ, Yehowa ji mɔ ni bɔ wɔ, ni akɛ, lɛ ehã wɔ wala. (Kanemɔ Lala 100:3-5.) Enɛ hewɔ Biblia lɛ tsɛɔ klɛŋklɛŋ adesa ni abɔ lɛ “Nyɔŋmɔ bi” lɛ. (Luka 3:38) Yesu hu kɛɛ wɔ akɛ, wɔtsɛ Yehowa “wɔ-Tsɛ ni yɔɔ ŋwɛi.” (Mateo 6:9) No hewɔ lɛ, Yehowa ji wɔ-Tsɛ, ni esumɔɔ wɔ tamɔ bɔ ni tsɛ kpakpa sumɔɔ ebii lɛ.

 4. (a) Mɛni tsɛmɛi komɛi feɔ? Shi mɛni hewɔ Yehowa efeŋ ebii nakai kɔkɔɔkɔ lɛ? (b) Mɛni he wɔbaasusu yɛ nikasemɔ nɛɛ mli? Ni mɛni he wɔbaasusu yɛ nikasemɔ ni nyiɛ sɛɛ lɛ mli?

⁴ Mɛi komɛi yɛ ni amɛtsɛmɛi fee amɛ niseniianii be ni amɛji gbekɛbii. Enɛ hewɔ lɛ, kɛ́ akɛɛ tsɛ ko sumɔɔ ebii lɛ, ewa hã amɛ akɛ amɛaanu shishi. Shi Yehowa efeŋ ebii nakai kɔkɔɔkɔ. Lɛ ji Tsɛ kpakpa ni fe fɛɛ ni wɔbaanyɛ wɔná. (Lala 27:10) Esumɔɔ wɔ waa, ni efee nibii pii kɛtsɔɔ akɛ esusuɔ wɔhe. Kɛ́ wɔna akɛ Yehowa sumɔɔ wɔ waa lɛ, wɔ hu wɔbaasumɔ lɛ waa. (Yakobo 4:8) Yɛ nikasemɔ nɛɛ mli lɛ, wɔbaasusu nibii ejwɛ ni Yehowa feɔ kɛtsɔɔ akɛ esumɔɔ wɔ lɛ ahe. Ni yɛ nikasemɔ ni nyiɛ sɛɛ lɛ mli lɛ, wɔbaana nibii ejwɛ ni wɔbaanyɛ wɔfee kɛtsɔɔ akɛ wɔsumɔɔ lɛ.

 5. Mɛni Nyɔŋmɔ hãa adesai fɛɛ?

⁵ Be ni bɔfo Paulo tee Hela maŋ ni atsɛɔ lɛ Atene lɛ mli lɛ, ena amagai babaoo yɛ jɛmɛ, ni mɛi lɛ kɛɛ amagai nɛɛ ni hã amɛ wala. No hewɔ lɛ, egba amɛ “Nyɔŋmɔ ní fee je lɛ kɛ nibii fɛɛ ni yɔɔ mli lɛ” he sane. Ekɛɛ amɛ akɛ, Nyɔŋmɔ ji mɔ ni ‘hãa mɛi fɛɛ wala kɛ mumɔ kɛ nibii fɛɛ,’ ni akɛ “emli wɔyɔɔ wala ni wɔtsiɔ wɔhe ni wɔyɔɔ shihilɛ mli yɛ.” (Bɔfoi 17:24, 25, 28) Yehowa hãa wɔ nibii fɛɛ ni baahã wɔya nɔ wɔhi wala mli, ni wɔná miishɛɛ. Akɛni Yehowa sumɔɔ wɔ hewɔ lɛ, ehã wɔ nibii pii. Susumɔ ekomɛi ahe okwɛ.

 6. Mɛɛ gbɛ nɔ wɔshĩa, ni ji shikpɔŋ lɛ, hãa wɔnaa akɛ Yehowa sumɔɔ wɔ? (Kwɛmɔ mfoniri ni yɔɔ nikasemɔ lɛ shishijee lɛ.)

⁶ Bo lɛ, susumɔ shĩa fɛfɛo ni Yehowa efee ehã wɔ lɛ he okwɛ. (Lala 115:15, 16) Etamɔ nɔ ni esoro shikpɔŋ lɛ kwraa yɛ shibɔlemɔ ŋulamii krokomɛi fɛɛ ni Nyɔŋmɔ bɔ lɛ ahe. Jeŋ shikpalɔi ekpa ŋwɛiniiaŋ, ni amɛna shibɔlemɔ ŋulamii babaoo. Shi shibɔlemɔ ŋulamii ni amɛna lɛ ateŋ ekome folo po bɛ ni adesai baanyɛ ahi nɔ. Yɛ nibii ni baahã wɔya nɔ wɔhi wala mli ni Yehowa kɛduro wɔ yɛ shikpɔŋ lɛ nɔ lɛ sɛɛ lɛ, eduro wɔ nibii fɛfɛji babaoo, kɛ nibii ni baahã wɔhe ajɔ wɔ, wɔhi shi shweshweeshwe, ni wɔná miishɛɛ hu. (Yesaia 45:18) Kɛ́ wɔsusu shĩa fɛfɛo nɛɛ ni wɔ-Tsɛ Yehowa kɛduro wɔ lɛ he lɛ, wɔnaa akɛ, lɛɛlɛŋ, esumɔɔ wɔsane waa.​—Kanemɔ Hiob 38:4, 7; Lala 8:4, 5.

 7. Mɛɛ gbɛ nɔ bɔ ni Yehowa bɔ wɔ ehã lɛ hãa wɔnaa akɛ esumɔɔ wɔ?

⁷ Nɔ kroko yɛ ni hãa wɔnaa akɛ Yehowa sumɔɔ wɔ, no ji akɛ, ebɔ wɔ bɔ ni wɔbaanyɛ wɔkase lɛ. (1 Mose 1:27) Enɛ hewɔ lɛ, wɔnyɛɔ wɔyɔseɔ akɛ esumɔɔ wɔ, ni wɔ hu wɔnyɛɔ wɔsumɔɔ lɛ. Enɛ hãa wɔmii shɛɔ wɔhe, tamɔ bɔ ni gbekɛbii amii shɛɔ amɛhe kɛ́ amɛna akɛ amɛfɔlɔi sumɔɔ amɛ lɛ, ni Yehowa le enɛ. Yesu hu tsɔɔ wɔ akɛ, kɛji wɔhã wekukpaa kpakpa hi wɔ kɛ wɔ-Tsɛ, ni ji Yehowa lɛ teŋ lɛ, wɔbaaná miishɛɛ. (Mateo 5:3) Yehowa ji mɔ ni hãa wɔ “nibii ní wɔnáa mli ŋɔɔmɔ lɛ fɛɛ.” Lɛ ji wɔ-Durolɔ, ni eyɛ faŋŋ akɛ, esumɔɔ wɔ waa diɛŋtsɛ.​—1 Timoteo 6:17; Lala 145:16.

 8. Mɛni hewɔ wɔmiisumɔ ni Yehowa atsɔɔ wɔ nii lɛ?

⁸ Tsɛmɛi sumɔɔ amɛbii, ni amɛsumɔɔɔ ni mɛi lakaa amɛ. Shi fɔlɔi ni yɔɔ ŋmɛnɛ lɛ ateŋ mɛi babaoo kɛ gbɛtsɔɔmɔi ni yɔɔ Biblia lɛ mli lɛ tsuuu nii. Enɛ hewɔ lɛ, amɛnyɛɛɛ amɛtsɔse amɛbii lɛ jogbaŋŋ, ni bei pii lɛ, enɛ kɛ yiŋfutumɔ baa, ni efiteɔ miishɛɛ ni yɔɔ weku lɛ mli lɛ. (Abɛi 14:12) Shi jeee nakai Yehowa yɔɔ. Lɛ ji “Nyɔŋmɔ anɔkwafo” lɛ, no hewɔ lɛ gbɛtsɔɔmɔi ni ekɛhãa wɔ lɛ anɔ bɛ. (Lala 31:6) Eesumɔ ni etsɔɔ wɔ anɔkwalei ni kɔɔ ehe, kɛ bɔ ni esa akɛ wɔjá lɛ wɔhã. Etsɔɔ wɔ bɔ ni esa akɛ wɔhi shi wɔhã, koni wɔná miishɛɛ. (Kanemɔ Lala 43:3.) Nibii ni Yehowa tsɔɔ wɔ lɛ hãa wɔnaa akɛ, esumɔɔ wɔ waa. Mɛni ji nibii nɛɛ ekomɛi?

9, 10. (a) Mɛni Yehowa hãa wɔleɔ yɛ ehe? (b) Mɛni Yehowa hãa wɔleɔ yɛ eyiŋtoo kɛhã wɔ lɛ he?

⁹ Klɛŋklɛŋ kwraa lɛ, Yehowa hãa wɔleɔ ehe sane. Eesumɔ ni wɔle lɛ jogbaŋŋ. (Yakobo 4:8) No hewɔ lɛ, etsɔɔ wɔ egbɛ́i. Atsĩ egbɛ́i lɛ tã yɛ Biblia lɛ mli fe gbɛ́i krokomɛi fɛɛ. Yehowa hãa wɔleɔ esui lɛ hu. Kɛ́ wɔkwɛ nibii ni ebɔ lɛ, wɔbaana akɛ eyɛ hewalɛ, ni ehiɛ kã shi. (Romabii 1:20) Ni kɛ́ wɔkane Biblia lɛ, wɔbaana akɛ eyeɔ jalɛsane, ni esumɔɔ wɔ waa. Kɛ́ wɔkase Yehowa sui ni nɔ bɛ lɛ ahe nii lɛ, wekukpaa ni yɔɔ wɔ kɛ lɛ teŋ lɛ mli baawa.

¹⁰ Kɛfata he lɛ, Yehowa hãa wɔleɔ nɔ hewɔ ni ebɔ wɔ. Ehãa wɔleɔ akɛ, wɔfata eweku lɛ he. Etsɔɔ wɔ nibii ni ekpaa gbɛ yɛ wɔdɛŋ, koni wɔnyɛ wɔkɛ eweku lɛ mli bii lɛ fɛɛ afee ekome kɛtsu nii yɛ toiŋjɔlɛ mli. Biblia lɛ tsɔɔ faŋŋ akɛ, Nyɔŋmɔ ebɔɔɔ wɔ ni wɔ diɛŋtsɛ wɔkpɛ wɔyiŋ yɛ nɔ ni ja kɛ nɔ ni ejaaa he. (Yeremia 10:23) Yehowa le nii fe wɔ. No hewɔ lɛ, ja wɔkpɛlɛ hegbɛ ni eyɔɔ lɛ nɔ, ni wɔbo lɛ toi, dani wɔtoiŋ baajɔ wɔ ni wɔtsui baanyɔ wɔmli. Suɔmɔ ni Yehowa yɔɔ kɛhã wɔ lɛ hewɔ lɛ, ehã wɔle anɔkwale ni he hiaa nɛɛ.

11. Mɛni Yehowa ewo shi akɛ ebaafee ehã wɔ wɔsɛɛ?

¹¹ Tsɛ ni yɔɔ suɔmɔ lɛ susuɔ ebii lɛ awɔsɛɛ he waa. Eesumɔ ni amɛtsui anyɔ amɛmli yɛ shihilɛ mli. Dɔlɛ sane ji akɛ, ŋmɛnɛ lɛ, mɛi babaoo yeɔ amɛtsui yɛ bɔ ni amɛshihilɛ baaji wɔsɛɛ lɛ he, ni mɛi pii hu fiteɔ amɛbe kɛtiuɔ nibii ni he bɛ sɛɛnamɔ tsɔ ko lɛ asɛɛ. (Lala 90:10) Shi Yehowa, ni ji wɔ-Tsɛ lɛ, etsɔɔ wɔ bɔ ni wɔɔfee wɔhã wɔtsui anyɔ wɔmli yɛ shihilɛ mli ŋmɛnɛ, ni ewo wɔ shi akɛ, wɔsɛɛ lɛ, ebaafee nibii kpakpai babaoo ehã wɔ. Enɛ hãa wɔnáa miishɛɛ waa!

12. Mɛɛ gbɛ nɔ Yehowa bɔ mɔdɛŋ akɛ ebaaye ebua Kain kɛ Baruk?

¹² Be ni Yehowa na akɛ Kain miitao eyafee nɔ fɔŋ lɛ, ebɔ mɔdɛŋ akɛ ebaaye ebua lɛ. Ebi lɛ akɛ: “Mɛɛba omli ewo la? ni mɛɛba otu ohiɛ nɛɛ? Aso kɛji ofee ekpakpa lɛ, ohiɛ baŋ nyam lo?” (1 Mose 4:6, 7) Shi, Kain ekpɛlɛɛɛ Yehowa yelikɛbuamɔ lɛ nɔ, no hewɔ lɛ ena amane. (1 Mose 4:11-13) Yehowa wo Baruk hu ŋaa. Ena akɛ susumɔ ni ejaaa ni Baruk hiɛ lɛ hewɔ lɛ, enijiaŋ eje wui, ni etɔ lɛ. No hewɔ lɛ ekɛɛ lɛ akɛ, etsake ejwɛŋmɔ. Baruk bo ŋaa ni Yehowa wo lɛ lɛ toi, ni eyi ná wala.​—Yeremia 45:2-5.

13. Mɛni Yehowa tsuji anɔkwafoi komɛi kase yɛ shihilɛi ni jaraa ni amɛkɛkpe lɛ amli?

¹³ Suɔmɔ ni Yehowa yɔɔ kɛhã wɔ lɛ hewɔ ewoɔ wɔ ŋaa ni etsɔseɔ wɔ kɛ́ wɔtɔ̃ lɛ. (Hebribii 12:6) Kɛ̃lɛ, jeee ja wɔtɔ̃ pɛ dani etsɔseɔ wɔ. Biblia lɛ hãa wɔleɔ akɛ, Yehowa tsɔse etsuji anɔkwafoi komɛi koni amɛnyɛ amɛsɔmɔ lɛ jogbaŋŋ. Akɛ nɔkwɛmɔnɔ lɛ, Yosef, Mose, kɛ David fɛɛ kɛ shihilɛi ni jaraa waa kpe. Shi, Yehowa kwaaa amɛ. Ni nibii ni amɛkase be ni amɛkpeɔ shihilɛi nɛɛ anaa lɛ, ye bua amɛ be ni Yehowa tu sɔ̃i ni tsiitsii ewo amɛdɛŋ lɛ. Kɛ́ wɔkane Biblia lɛ, wɔbaana bɔ ni Yehowa ye bua ewebii lɛ, kɛ bɔ ni etsɔse amɛ, ni no baahã wɔna akɛ, Yehowa sumɔɔ ewebii lɛ asane waa diɛŋtsɛ.​—Kanemɔ Abɛi 3:11, 12.

14. Kɛ́ wɔtɔ̃ po lɛ, mɛɛ gbɛ nɔ Yehowa yaa nɔ ejieɔ suɔmɔ kpo etsɔɔ wɔ?

¹⁴ Kɛ́ wɔtɔ̃ po lɛ, Yehowa baaya nɔ ejie suɔmɔ kpo etsɔɔ wɔ. Ebaatsɔse wɔ, ni kɛ́ wɔkpɛlɛ tsɔsemɔ lɛ nɔ, ni wɔtsake wɔtsui lɛ, ekɛ wɔtɔ̃mɔ lɛ ‘baafa wɔ aahu.’ (Yesaia 55:7) Mɛni enɛ tsɔɔ? Nɔ ni David wie yɛ bɔ ni Yehowa kɛ eshai faa lɛ he lɛ, yeɔ buaa wɔ ni wɔnaa nɔ ni enɛ tsɔɔ, ni ehãa wɔnaa akɛ, wɔ-Tsɛ lɛ naa mɔbɔ waa. Ewie akɛ: “Lɛ ekɛ onishaianii fɛɛ faa, lɛ etsáa ohelai fiaa kwa; lɛ ehereɔ oyiwala kɛjɛɔ bu mli; lɛ ekɛ mlihilɛ kɛ musuŋtsɔlɛ fiɔo akekre; Bɔ ni boka kɛ anai teŋ jekɛ lɛ, nakai ehãa wɔ kɛ wɔnɔtɔmɔi lɛ ateŋ jekɛɔ.” (Lala 103:3, 4, 12) Yehowa tsɔseɔ wɔ, ni ewoɔ wɔ ŋaa yɛ gbɛi srɔtoi anɔ. Kɛ́ etsɔse bo loo ewo bo ŋaa lɛ, ani oboɔ toi ni okɛtsuɔ nii amrɔ nɔŋŋ? Be fɛɛ be lɛ, hã ehi ojwɛŋmɔŋ akɛ, suɔmɔ ni Yehowa yɔɔ kɛhã bo lɛ hewɔ etsɔseɔ bo lɛ.​—Lala 30:6.

15. Mɛɛ gbɛ kroko nɔ Yehowa tsɔɔ ejieɔ suɔmɔ kpo etsɔɔ wɔ?

¹⁵ Tsɛ ni yɔɔ suɔmɔ lɛ buɔ eweku lɛ he koni nɔ ko akaye amɛ awui. Nakai pɛpɛɛpɛ wɔ-Tsɛ Yehowa feɔ ehãa wɔ. Lalatsɛ lɛ wie yɛ Yehowa he akɛ: “Ebaa emɛi krɔŋkrɔŋi lɛ asusumai ayi; ejieɔ amɛ kɛjɛɔ mɛi fɔji adɛŋ.” (Lala 97:10) Biblia lɛ kɛ bɔ ni Yehowa buɔ wɔhe lɛ toɔ bɔ ni wɔbuɔ wɔhiŋmɛii ahe lɛ he. Bo lɛ susumɔ he okwɛ: Kɛ́ nɔ ko yaabote ohiŋmɛii mli lɛ, ohe feɔ oya ni obuɔ he, ejaakɛ ohiŋmɛii lɛ ajara wa kɛhã bo. Nakai nɔŋŋ Yehowa he feɔ oya ni ebuɔ ewebii lɛ ahe, ejaakɛ amɛjara wa kɛhã lɛ.​—Kanemɔ Zakaria 2:12.

16, 17. Mɛɛ gbɛ nɔ Yehowa ebu ewebii lɛ ahe yɛ blema kɛ ŋmɛnɛ fɛɛ?

¹⁶ Gbɛ kome ni Yehowa tsɔɔ nɔ ebuɔ ewebii lɛ ahe ji, kɛtsɔ ŋwɛibɔfoi anɔ. (Lala 91:11) Ŋwɛibɔfo kome gbe Asiria asraafoi 185,000 yɛ gbɛkɛ kome pɛ mli, ni ekɛkpɔ̃ Nyɔŋmɔ webii lɛ. (2 Maŋtsɛmɛi 19:35) Yɛ klɛŋklɛŋ afii 100 lɛ mli lɛ, ŋwɛibɔfoi jie Petro, Paulo, kɛ mɛi krokomɛi kɛjɛ tsuŋwoo mli. (Bɔfoi 5:18-20; 12:6-11) Nyɛsɛɛ nɛɛ, awu ta gbeyeigbeyei ko yɛ Afrika maji lɛ eko nɔ. Maŋ lɛ mli bii lɛ kɛ amɛhe nɔ, aju mɛi anibii, atotoo yei kabonaa, ni agbe mɛi babaoo, ni enɛ hã maŋ lɛ mli fee hirihiri. Eyɛ mli akɛ nyɛmimɛi ni yɔɔ jɛmɛ lɛ ateŋ mɔ ko gbooo moŋ, shi amɛteŋ mɛi babaoo anibii fɛɛ ŋmɛɛ amɛ. Yɛ shihilɛ mli ni amɛtsɔ lɛ fɛɛ sɛɛ lɛ, amɛmiishɛɛ etãaa, ejaakɛ amɛnu he akɛ Yehowa sumɔɔ amɛ waa, ni ebu amɛhe. Be ni nitsumɔhe yitso najiaŋdamɔlɔ ko yasara amɛ, ni ebi amɛ bɔ ni amɛyɔɔ lɛ, amɛhã hetoo akɛ, “Yehowa duromɔ naa lɛ, wɔyɛ jogbaŋŋ!”

¹⁷ Jeee be fɛɛ be Yehowa jieɔ etsuji kɛjɛɔ gbele mli. Yehowa tsuji komɛi, tamɔ Stefano, ye lɛ anɔkwa, shi agbe amɛ. Kɛ̃lɛ, Yehowa buɔ ewebii lɛ ahe akɛ kuu, ni ebɔɔ amɛ kɔkɔ yɛ gbɛi srɔtoi ni Satan baanyɛ atsɔ nɔ alaka amɛ lɛ ahe. (Efesobii 6:10-12) Ŋmɛnɛ lɛ, efeɔ enɛ kɛtsɔ Biblia lɛ kɛ woji ni Yehowa asafo lɛ kalaa lɛ anɔ. Kɔkɔbɔi nɛɛ ekomɛi kɔɔ bɔ ni wɔkɛ Intanɛt lɛ tsuɔ nii wɔhãa lɛ he, ekomɛi kɔɔ shika suɔmɔ he, ni ekomɛi hu kɔɔ sinii, woji, kɛ gemisii ni jeŋba sha kɛ yiwalɛ nifeemɔi yɔɔ mli lɛ ahe. Enɛ hãa wɔnaa faŋŋ akɛ, Yehowa sumɔɔ wɔ ni eetao ebu wɔhe.

18. Te onuɔ he tɛŋŋ yɛ suɔmɔ ni Yehowa yɔɔ kɛhã bo lɛ he?

¹⁸ Be ni Mose shwie eyiŋ yɛ afii babaoo ni ekɛsɔmɔ Yehowa lɛ he lɛ, ena faŋŋ akɛ Yehowa sumɔɔ lɛ. Ewie akɛ: “Hã wɔtɔrɔ leebi kɛ omɔbɔnalɛ lɛ [loo osuɔmɔ lɛ], koni wɔnyá ní wɔmii ashɛ wɔhe yɛ wɔgbii lɛ fɛɛ mli!” (Lala 90:14) Eŋɔɔ wɔnaa waa akɛ, wɔnyɛɔ wɔyɔseɔ gbɛi srɔtoi ni Yehowa tsɔɔ nɔ ejieɔ esuɔmɔ lɛ kpo etsɔɔ wɔ lɛ, ni wɔnáa mli ŋɔɔmɔ. Eji hegbɛ kpele ni wɔná akɛ Yehowa sumɔɔ wɔ! Wɔnuɔ he tamɔ bɔ ni bɔfo Yohane nu he lɛ, ni wɔ hu wɔkɛɔ akɛ: “Nyɛkwɛa suɔmɔ sɔŋŋ ni Tsɛ lɛ kɛsumɔ wɔ!”​—1 Yohane 3:1.