Mɛni Wɔbaanyɛ Wɔfee Kɛtsɔɔ Yehowa akɛ Wɔsumɔɔ Lɛ?

1, 2. Mɛɛ gbɛ nɔ Yehowa eye ebua wɔ ni wɔle nɔ ni wɔbaanyɛ wɔfee kɛtsɔɔ akɛ wɔsumɔɔ lɛ?

GBƐ ni hi fe fɛɛ ni tsɛ ko baanyɛ etsɔ nɔ etsɔɔ ebii nii ji, ni ebaafee nɔkwɛmɔnɔ kpakpa ehã amɛ. Kɛ́ ebii lɛ na akɛ esumɔɔ amɛ lɛ, amɛ hu amɛbaasumɔ lɛ kɛ mɛi krokomɛi. Mɔ ko mɔ ko bɛ ni sumɔɔ wɔ tamɔ bɔ ni wɔ-Tsɛ Yehowa sumɔɔ wɔ lɛ. No hewɔ lɛ, “wɔjieɔ suɔmɔ kpo, ejaakɛ lɛ klɛŋklɛŋ esumɔ wɔ.”​—1 Yohane 4:19.

² Mɛni Yehowa efee kɛtsɔɔ akɛ “lɛ klɛŋklɛŋ esumɔ wɔ”? Biblia lɛ kɛɔ akɛ: “Be ni wɔkã he wɔji eshafeelɔi lɛ, Kristo gbo ehã wɔ.” (Romabii 5:8) Wɔ-Tsɛ Yehowa sumɔɔ wɔ, ni ekɛ e-Bi lɛ hã akɛ kpɔmɔnɔ, koni ekɛkpɔ̃ wɔ kɛjɛ esha kɛ gbele mli. Nikeenii ni jara wa nɛɛ hewɔ lɛ, wɔbaanyɛ wɔkɛ Yehowa abɔ naanyo, ni wɔjie suɔmɔ kpo wɔtsɔɔ lɛ. Nɔ ni Yehowa kɛshã afɔle yɛ wɔ hewɔ lɛ jara wa waa, ni eji nɔkwɛmɔnɔ kɛhã wɔ. Nɔ ni efee lɛ hãa wɔnaa akɛ, esa akɛ wɔ hu wɔjɛ wɔtsui mli wɔkɛ wɔnibii ashã afɔle kɛtsɔɔ akɛ wɔsumɔɔ lɛ.​—1 Yohane 4:10.

3, 4. Mɛni wɔbaanyɛ wɔfee kɛtsɔɔ akɛ wɔsumɔɔ Nyɔŋmɔ?

³ Suɔmɔ ji Yehowa su titri. No hewɔ lɛ, ebɛ naakpɛɛ akɛ Yesu wie akɛ mlai lɛ ateŋ nɔ ni he hiaa fe fɛɛ ji: “Esa akɛ osumɔ Yehowa o-Nyɔŋmɔ lɛ kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.” (Marko 12:30) Yehowa miitao ni wɔsumɔ lɛ kɛ wɔtsui “muu fɛɛ.” Kɛ́ wɔyasumɔ mɔ kroko loo nɔ kroko fe Yehowa lɛ, ebaadɔ lɛ waa. Shi esaaa akɛ suɔmɔ ni wɔyɔɔ kɛhã Yehowa lɛ hiɔ wɔtsui mli pɛ. Yehowa miitao ni wɔsumɔ lɛ kɛ ‘wɔjwɛŋmɔ muu fɛɛ’ kɛ ‘wɔnyɛmɔ fɛɛ.’ Ni tsɔɔ akɛ, esa akɛ bɔ ni wɔsusuɔ nii ahe kɛ nibii ni wɔfeɔ lɛ fɛɛ atsɔɔ akɛ wɔsumɔɔ lɛ.​—Kanemɔ Mika 6:8.

⁴ No hewɔ lɛ, esa akɛ wɔkɛ wɔ nɔ fɛɛ nɔ asumɔ Yehowa. Kɛ́ wɔkɛ Yehowa ye klɛŋklɛŋ gbɛhe yɛ wɔshihilɛ mli lɛ, no tsɔɔ akɛ wɔsumɔɔ lɛ waa. Yɛ nikasemɔ ni tsɔ hiɛ lɛ mli lɛ, wɔsusu nibii ejwɛ ni Yehowa feɔ kɛtsɔɔ akɛ esumɔɔ ebii asane waa lɛ ahe. Yɛ nikasemɔ nɛɛ mli lɛ, wɔbaana gbɛ ni wɔbaanyɛ wɔtsɔ nɔ wɔhã suɔmɔ ni wɔyɔɔ kɛhã Yehowa lɛ mli awa, kɛ bɔ ni wɔbaafee wɔjie suɔmɔ nɛɛ kpo.

 5. Kɛ́ wɔsusu nibii fɛɛ ni Yehowa efee ehã wɔ lɛ ahe lɛ, mɛni esa akɛ wɔtsui atsirɛ wɔ ni wɔfee?

⁵ Ekã shi faŋŋ akɛ, kɛ́ mɔ ko ke bo nɔ ko lɛ, ohiɛ sɔɔ. Ni akɛni ohiɛ sɔɔ nɔ ni eke bo lɛ hewɔ lɛ, okɛtsuɔ nii. Yakobo ŋma akɛ: “Nikeenii kpakpai fɛɛ kɛ nikeenii ni hi kɛwula shi fɛɛ lɛ, ŋwɛi ejɛɔ ekpelekeɔ shi, kɛjɛɔ ŋwɛi lai a-Tsɛ lɛ ŋɔɔ, mɔ ni tsakeee tamɔ hɔɔŋ ni tsiɔ ehe lɛ.” (Yakobo 1:17) Yehowa hãa wɔ nibii fɛɛ ni he hiaa wɔ lɛ, koni wɔya nɔ wɔhi wala mli ni wɔmii ashɛ wɔhe, ni wɔhiɛ sɔɔ nɔ ni efeɔ ehãa wɔ lɛ waa. Wɔle akɛ esumɔɔ wɔ waa, ni wɔmiisumɔ ni wɔhã ena akɛ wɔ hu wɔsumɔɔ lɛ. Ani onuɔ he nakai?

 6. Mɛni ehe bahia ni Israelbii lɛ afee koni Yehowa aya nɔ ajɔɔ amɛ?

⁶ Yehowa hã Israelbii lɛ nibii kpakpai babaoo. Ehã amɛ mlai, ni ehã amɛ nibii fɛɛ ni he hiaa amɛ yɛ shihilɛ mli, ni efee nakai afii ohai abɔ. (5 Mose 4:7, 8) No mli lɛ, Israelbii lɛ le akɛ, kɛ́ amɛbo Yehowa mlai lɛ toi lɛ, no baatsɔɔ akɛ amɛhiɛ sɔɔ nibii ni efeɔ ehãa amɛ lɛ. Akɛ nɔkwɛmɔnɔ lɛ, amɛle akɛ kɛ́ amɛbaashã afɔle amɛhã Yehowa lɛ, esa akɛ amɛkɛ shikpɔŋ lɛ nɔ “klɛŋklɛŋ yibii lɛ amli klɛŋklɛŋnii lɛ,” loo nɔ ni hi fe fɛɛ lɛ afee nakai. (2 Mose 23:19) Israelbii lɛ le akɛ, kɛ́ amɛtee nɔ amɛbo Yehowa toi, ni amɛkɛ amɛnibii lɛ ateŋ nɔ ni hi fe fɛɛ lɛ hã lɛ lɛ, lɛ hu ebaaya nɔ ejɔɔ amɛ.​—Kanemɔ 5 Mose 8:7-11.

 7. Mɛɛ gbɛ nɔ wɔbaanyɛ wɔkɛ ‘nibii ni wɔyɔɔ lɛ’ atsɔɔ Yehowa akɛ wɔsumɔɔ lɛ?

⁷ Kɛ́ wɔ hu wɔkɛ ‘nibii ni wɔyɔɔ lɛ’ hã Yehowa, loo wɔkɛwo ehiɛ nyam lɛ, no baahã ena akɛ wɔsumɔɔ lɛ. (Abɛi 3:9) Akɛ nɔkwɛmɔnɔ lɛ, esa akɛ wɔtsu onia kɛfĩ Maŋtsɛyeli nitsumɔ ni atsuɔ yɛ wɔsafo lɛ mli, kɛ agbɛnɛ hu, yɛ jeŋ fɛɛ lɛ sɛɛ. Pii wɔyɔɔ jio, fioo wɔyɔɔ jio, wɔ fɛɛ wɔbaanyɛ wɔjɛ nibii ni wɔyɔɔ lɛ mli wɔhã Yehowa ana akɛ wɔsumɔɔ lɛ. (2 Korintobii 8:12) Shi nibii krokomɛi hu yɛ ni wɔbaanyɛ wɔfee kɛtsɔɔ Yehowa akɛ wɔsumɔɔ lɛ.

8, 9. Mɛni ji nɔ kroko ni wɔbaanyɛ wɔfee kɛtsɔɔ Yehowa akɛ wɔsumɔɔ lɛ? Mɛni Mike kɛ eweku lɛ fee?

⁸ Yesu kɛɛ wɔ akɛ, wɔya nɔ wɔtao Maŋtsɛyeli lɛ klɛŋklɛŋ, ni wɔkafee yeyeeye yɛ nɔ ni wɔbaaye kɛ nɔ ni wɔbaawo he, ejaakɛ wɔ-Tsɛ lɛ ewo shi akɛ ebaahã wɔ nibii ni he hiaa wɔ lɛ. (Mateo 6:31-33) Wɔheɔ Yehowa wɔyeɔ, ni wɔle akɛ, ebaaye eshiwoo lɛ nɔ. Kɛ́ oosumɔ mɔ ko lɛɛlɛŋ lɛ, ani oheŋ lɛ oyeŋ? No hewɔ lɛ, kɛ́ wɔkɛ wɔhiɛ fɔ̃ɔ Yehowa nɔ yɛ nɔ fɛɛ nɔ mli lɛ, ebaana akɛ wɔsumɔɔ lɛ waa. (Lala 143:8) Wɔbaanyɛ wɔbi wɔhe akɛ: ‘Ani bɔ ni mitoɔ minibii ahe gbɛjianɔ mihãa, kɛ bɔ ni mikɛ mibe kɛ mihewalɛ tsuɔ nii mihãa lɛ, hãa anaa akɛ misumɔɔ Yehowa kɛ mitsui fɛɛ? Gbi fɛɛ gbi lɛ, ani mikɛ mihiɛ fɔ̃ɔ Yehowa nɔ akɛ ebaahã mi nibii ni he hiaa mi lɛ?’

⁹ Nyɛmi nuu ko ni atsɛɔ lɛ Mike kɛ eweku lɛ kɛ amɛhiɛ fɔ̃ Yehowa nɔ. Kɛjɛ Mike gbekɛbiiashi tɔ̃ɔ lɛ, nɔ kome ni eshwe waa ji, ni eyashiɛ yɛ maŋ kroko nɔ. Mike bada, ebote gbalashihilɛ mli, ni amɛfɔ bii enyɔ, kɛ̃lɛ, nakai sane lɛ kã etsui nɔ lolo. Be ni Mike kɛ eweku lɛ kane nyɛmimɛi komɛi ni yasɔmɔ yɛ hei ni hiamɔ lɛ da yɛ lɛ ahe sane lɛ, amɛkpɛ amɛyiŋ akɛ amɛbaahã amɛshihilɛ afee mlɛo. No hewɔ lɛ, amɛhɔ̃ɔ amɛshĩa lɛ, ni amɛyahi shĩa ko ni edaaa tamɔ nɔ ni amɛhɔ̃ɔ lɛ mli. No sɛɛ lɛ, Mike tse mɛi abɔ ni etsuɔ nii ehãa lɛ nɔ, ni eto enitsumɔ lɛ he gbɛjianɔ bɔ ni baahã enyɛ etsɔ Intanɛt lɛ nɔ ekwɛ nitsumɔ lɛ nɔ kɛ́ efã gbɛ kɛtee maŋ kroko nɔ po. Tsakemɔi nɛɛ ni Mike kɛ eweku lɛ fee lɛ hewɔ lɛ, amɛnyɛ amɛfã kɛtee maŋ kroko nɔ amɛyashiɛ, ni enɛ hã amɛná miishɛɛ waa. Mike wie akɛ, “Wɔna akɛ, nɔ ni Yesu wie yɛ Mateo 6:33 lɛ ji anɔkwale.”

10. Taakɛ Maŋtsɛ David fee lɛ, mɛni hewɔ esa akɛ wɔjwɛŋ nibii ni wɔkaseɔ yɛ Yehowa he lɛ anɔ?

¹⁰ Be ko lɛ, Maŋtsɛ David ŋma akɛ: “Ŋwɛi gbaa Mawu anunyam lɛ, ni atatu tsɔɔ eninenaa nitsumɔ lɛ.” Ekɛfata he akɛ: “Yehowa mla lɛ hi kɛwula shi, ehãa susuma tsui nyɔɔ emli; Yehowa odase lɛ ma shi shiŋŋ, ehãa kwashia leɔ nii.” Be ni David jwɛŋ nibii fɛfɛji ni Yehowa ebɔ lɛ, kɛ nilee ni yɔɔ emlai lɛ amli lɛ nɔ lɛ, wekukpaa ni yɔɔ ekɛ lɛ teŋ lɛ mli bawa, ni eshwe akɛ efee nibii ni baahã Yehowa ana akɛ esumɔɔ lɛ. David wie akɛ: “Hã midaaŋ wiemɔi kɛ mitsui mli jwɛŋmɔi asa ohiɛ, Yehowa, mitɛsaa kɛ mikpɔ̃lɔ!”​—Lala 19:2, 8, 15.

11. Kɛ́ wɔsumɔɔ Yehowa lɛ, mɛni no baatsirɛ wɔ ni wɔfee? (Kwɛmɔ mfoniri ni yɔɔ nikasemɔ lɛ shishijee lɛ.)

¹¹ Ŋmɛnɛ lɛ, Yehowa tsɔɔ wɔ nibii pii. Nibii nɛɛ ekomɛi kɔɔ ehe, ni ekomɛi hu kɔɔ eyiŋtoo, nibii ni ebɔ lɛ, kɛ e-Wiemɔ lɛ he. Je lɛ woɔ mɛi hewalɛ ni amɛya yunivɛsitii kɛ amɛhenɔi lɛ koni amɛyakase nii. Kɛ̃lɛ, bei pii lɛ, nibii ni amɛyakaseɔ lɛ hãa suɔmɔ ni amɛyɔɔ kɛhã Nyɔŋmɔ lɛ he jɔɔ. Shi, nibii ni Yehowa tsɔɔ wɔ lɛ hãa wɔleɔ nii, ni wɔhiɛ kãa shi hu. Yehowa miisumɔ ni wɔkɛ nibii ni etsɔɔ wɔ lɛ aye abua wɔ diɛŋtsɛ wɔhe kɛ mɛi krokomɛi. (Abɛi 4:5-7) Akɛ nɔkwɛmɔnɔ lɛ, eesumɔ ni wɔgba mɛi krokomɛi “anɔkwale lɛ he nilee krɔŋŋ lɛ,” ni wɔye wɔbua amɛ koni ahere amɛyiwala. (1 Timoteo 2:4) Kɛ́ wɔtsɔɔ mɛi nɔ ni Nyɔŋmɔ Maŋtsɛyeli lɛ ji, kɛ nɔ ni ebaafee ehã adesai lɛ, no tsɔɔ akɛ wɔsumɔɔ amɛ ni wɔsumɔɔ Yehowa hu.​—Kanemɔ Lala 66:16, 17.

12. Mɛni nyɛmi yoo ko wie yɛ nikeenii ko ni enine shɛ nɔ kɛjɛ Yehowa dɛŋ yɛ egbekɛbiiashi lɛ he?

¹² Gbekɛbii hu baanyɛ asusu nibii ni Yehowa ehã amɛ kɛ nibii ni etsɔɔ amɛ lɛ ahe. Nyɛmi yoo ko ni atsɛɔ lɛ Shannon lɛ kaiɔ kpokpaa wulu nɔ kpee ko ni ekɛ enyɛmi yoo fioo lɛ tee. No mli lɛ, eye afii 11, ni enyɛmi yoo lɛ eye afii 10. Kpee lɛ yitso ji, “Nyɔŋmɔ Jamɔ Hetuu-kɛ-hamɔ.” Yɛ kpee lɛ gbii lɛ ekome nɔ lɛ, ahã gbekɛbii fɛɛ ni yɔɔ kpee lɛ shishi lɛ bata he ko krɛdɛɛ ni asaa ahã amɛ lɛ. Shannon wie akɛ, no mli lɛ eleee nɔ hewɔ, shi etee. Nakai shwane lɛ, afee nɔ ko ni ekpaaa gbɛ kwraa ni hã emii shɛ ehe waa; ahã amɛ fɛɛ wolo ni ji, Questions Young People Ask​—Answers That Work lɛ eko. Te nikeenii nɛɛ hã Shannon nu he tɛŋŋ yɛ Yehowa he? Ewie akɛ: “Nikeenii nɛɛ ji nɔ ni hã mina akɛ, Yehowa yɛ lɛɛlɛŋ, ni akɛ, esumɔɔ mi waa diɛŋtsɛ. Eŋɔɔ wɔnaa waa akɛ Yehowa, wɔ-Nyɔŋmɔ kpele lɛ, keɔ wɔ nibii kpakpai fɛfɛji tamɔ nɛkɛ tswaa!”

13, 14. Kɛ́ Yehowa tsɔse wɔ lɛ, te esa akɛ wɔfee wɔnii tɛŋŋ? Ni mɛni hewɔ?

¹³ Biblia lɛ kɛɔ wɔ akɛ: “Mɔ ni Yehowa sumɔɔ lɛ, lɛ ekãa, tamɔ bɔ ni tsɛ feɔ ebi ni eyɔɔ ehe tsui lɛ.” (Abɛi 3:12) Kɛ́ wɔkpɛlɛ Yehowa tsɔsemɔ nɔ, ni wɔhã etsɔɔ wɔ nii lɛ, wɔbaafee nɔ ni ja, ni wɔtoiŋ baajɔ wɔ. Eji anɔkwale akɛ, “tsɔsemɔ ko bɛ ní amrɔmrɔ lɛ efeɔ mɔ akɛ miishɛɛ nɔ, shi moŋ edɔɔ mɔ.” (Hebribii 12:11) Kɛ̃lɛ, te esa akɛ wɔfee wɔnii tɛŋŋ kɛ́ Yehowa tsɔse wɔ? Esaaa akɛ wɔkpoɔ Yehowa ŋaawoo kɔkɔɔkɔ. Eyɛ mli akɛ bei komɛi lɛ, ekolɛ wɔnyaŋ ŋaawoo lɛ he yɛ shishijee mli, ni wɔmli baafũ moŋ, shi esaaa akɛ wɔkpiliŋɔ wɔtsui. Esa akɛ wɔhã suɔmɔ ni wɔyɔɔ kɛhã Yehowa lɛ atsirɛ wɔ ni wɔbo lɛ toi, ni wɔfee tsakemɔi ni he hiaa lɛ.

¹⁴ Yɛ Maleaki beiaŋ lɛ, Yudafoi lɛ booo Yehowa toi. Amɛkɛ gbɛtsɔɔmɔi ni Yehowa hã amɛ yɛ nibii ni esa akɛ amɛkɛshã afɔle amɛhã lɛ lɛ he lɛ tsuuu nii, no hewɔ lɛ afɔlei ni amɛshã lɛ esaaa ehiɛ. Enɛ hã ekã amɛhiɛ waa. (Kanemɔ Maleaki 1:12, 13.) Anɔkwa, Yehowa wo amɛ ŋaa shii abɔ, shi amɛbooo toi. No hewɔ lɛ, ekɛɛ amɛ akɛ: “Matsu loomɔ kɛaaba nyɛnɔ, ni malomɔ nyɛjɔɔmɔi lɛ.” (Maleaki 2:1, 2) Eyɛ faŋŋ akɛ, kɛ́ wɔbooo ŋaa ni Yehowa woɔ lɛ toi, loo wɔku wɔhiɛ wɔshwie nɔ lɛ, wɔbaafite wekukpaa kpakpa ni yɔɔ wɔ kɛ lɛ teŋ lɛ.

15. Mɛɛ sui esaaa akɛ wɔkaseɔ?

¹⁵ Satan je lɛ woɔ mɛi hewalɛ ni amɛwo amɛhe nɔ, ni amɛfo amɛ pɛ amɛnɔ mli. Mɛi babaoo sumɔɔɔ ni awoɔ amɛ ŋaa, loo atsɔɔ amɛ nɔ ni amɛfee. Mɛi komɛi hu yɛ ni kɛ́ aawo amɛ ŋaa lɛ, amɛkwaa amɛfeɔ tamɔ nɔ ni amɛmiibo toi, shi jeee ni amɛkɛbaatsu nii. Esaaa akɛ wɔkaseɔ amɛ. Biblia lɛ woɔ wɔ ŋaa akɛ, ‘wɔkahã shihilɛ gbɛjianɔtoo nɛɛ shɔ̃ wɔ.’ Moŋ lɛ, wɔyɔse nɔ ni Yehowa taoɔ ni wɔfee, ni wɔtsu he nii. (Romabii 12:2) Yehowa tsɔɔ esafo lɛ nɔ ewoɔ wɔ ŋaa yɛ be naa. Akɛ nɔkwɛmɔnɔ lɛ, ewoɔ wɔ ŋaa yɛ bɔ ni esa kɛ hii kɛ yei kɛ amɛhe aye ahã, bɔ ni wɔbaafee wɔhala nanemɛi kpakpai, kɛ bɔ ni wɔbaafee wɔkwɛ wɔhe nɔ jogbaŋŋ yɛ nibii ni wɔkɛjieɔ wɔhiɛtserɛ lɛ ahe lɛ he. Kɛ́ wɔjɛ wɔtsui mli wɔkpɛlɛ Yehowa tsɔsemɔ lɛ nɔ, ni wɔkɛtsu nii yɛ wɔshihilɛ mli lɛ, no baatsɔɔ akɛ wɔhiɛ sɔɔ gbɛtsɔɔmɔi ni ekɛhãa wɔ lɛ, ni wɔsumɔɔ lɛ waa.​—Yohane 14:31; Romabii 6:17.

16, 17. (a) Dani wɔbaakpɛ wɔyiŋ yɛ sane ko he lɛ, mɛni hewɔ esa akɛ wɔtao Yehowa susumɔ yɛ sane lɛ he? (b) Yɛ nɔ najiaŋ ni Israelbii lɛ kɛ amɛhiɛ baafɔ̃ Yehowa nɔ lɛ, mɛni amɛfee?

¹⁶ Gbekɛbii bibii kɛ amɛhiɛ fɔ̃ɔ amɛfɔlɔi anɔ kɛhã yelikɛbuamɔ kɛ hebuu. Bei komɛi lɛ, onukpai komɛi po yaa amɛfɔlɔi aŋɔɔ kɛhã yelikɛbuamɔ. Eyɛ mli akɛ, amɛ diɛŋtsɛ amɛbaanyɛ amɛkpɛ amɛyiŋ yɛ nɔ ni amɛbaafee he moŋ, shi amɛle akɛ, amɛfɔlɔi lɛ baanyɛ awo amɛ ŋaa kpakpa. Yehowa, wɔ-Tsɛ lɛ, ehã wɔ hegbɛ ni wɔ diɛŋtsɛ wɔkpɛ wɔyiŋ yɛ saji ahe. Shi esa akɛ wɔbi edɛŋ yelikɛbuamɔ, ni wɔbɔ mɔdɛŋ wɔtao egbɛtsɔɔmɔ sɛɛgbɛ be fɛɛ be ni ehe baahia ni wɔkpɛ wɔyiŋ yɛ nɔ ko he. Kɛ́ wɔfee nakai lɛ, no baatsɔɔ akɛ wɔkɛ wɔhiɛ fɔ̃ɔ enɔ kwraa, ni wɔsumɔɔ lɛ. Ni kɛ́ wɔkɛ wɔhiɛ fɔ̃ enɔ lɛ, ekɛ emumɔ krɔŋkrɔŋ lɛ baaye abua wɔ ni wɔfee nɔ ni ja.​—Filipibii 2:13.

¹⁷ Yɛ Samuel beiaŋ lɛ, Filistibii lɛ ye Israelbii lɛ anɔ kunim yɛ ta mli. Shi yɛ nɔ najiaŋ ni Israelbii lɛ baabi Yehowa nɔ ni esa akɛ amɛfee yɛ sane lɛ he lɛ, amɛkɛɛ akɛ: “Nyɛhãa wɔyaŋɔa Yehowa kpaŋmɔ adeka lɛ kɛjɛa Shilo kɛbaa wɔŋɔɔ, ní eba wɔteŋ, ní ehere wɔyiwala kɛjɛ wɔhenyɛlɔi lɛ adɛŋ!” Mɛni jɛ nɔ ni amɛfee lɛ mli kɛba? “Agbe [Israelbii] babaoo diɛŋtsɛ, ejaakɛ mɛi ní nyɔ yɛ Israel ji hii nanenɔnyiɛlɔi akpei nyɔŋmai etɛ. Ni Nyɔŋmɔ adeka lɛ ashɔ̃.” (1 Samuel 4:2-4, 10, 11) Israelbii lɛ yasusu akɛ kɛ́ Adeka lɛ ná ebashɛ amɛteŋ pɛ, Yehowa baaye ebua amɛ ni ebu amɛhe. Enɛ hewɔ lɛ, amɛbiii Yehowa dɛŋ yelikɛbuamɔ loo esusumɔ yɛ sane lɛ he. Moŋ lɛ, amɛfee nɔ ni amɛ amɛsusuɔ akɛ no ja, ni enɛ hewɔ amɛna amane lɛ.​—Kanemɔ Abɛi 14:12.

18. Mɛni Biblia lɛ ewie yɛ wɔhiɛ ni wɔkɛaaafɔ̃ Yehowa nɔ lɛ he? Ni mɛni esa akɛ ofee yɛ he?

¹⁸ Lalatsɛ ko ni sumɔ Yehowa waa, ni kɛ ehiɛ fɔ̃ enɔ lɛ ŋma akɛ: “Okɛ ohiɛ afɔ̃ Nyɔŋmɔ nɔ! Shi majie eyi kɛ̃, mɔ ni ji mihiɛ yelikɛbuamɔ kɛ mi-Nyɔŋmɔ lɛ. Misusuma edɔ kɔmɔɔ yɛ mimli, no hewɔ lɛ mikaiɔ bo.” (Lala 42:6, 7) Ani nakai ji bɔ ni onaa Yehowa? Ani okɛ ohiɛ fɔ̃ɔ enɔ? Ani onuɔ he akɛ ebɛŋkɛ bo? Kɛ́ onuɔ he nakai po lɛ, ekolɛ ehe baahia ni okɛ ohiɛ afɔ̃ enɔ waa fe bɔ ni ofeɔ bianɛ lɛ po. Biblia lɛ kɛɔ wɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”​—Abɛi 3:5, 6.

19. Mɛni obaafee kɛtsɔɔ Yehowa akɛ osumɔɔ lɛ?

¹⁹ Yehowa sumɔ wɔ klɛŋklɛŋ, ni nɔ ni efee lɛ ji nɔkwɛmɔnɔ kɛhã wɔ koni wɔ hu wɔsumɔ lɛ. No hewɔ lɛ, nyɛhãa wɔyaa nɔ wɔsusua nibii babaoo ni efee ehã wɔ, kɛ bɔ ni esumɔɔ wɔ waa lɛ he daa, ni wɔfee nibii ni baahã ena akɛ, wɔsumɔɔ lɛ kɛ wɔtsui muu fɛɛ, wɔsusuma muu fɛɛ, wɔjwɛŋmɔ muu fɛɛ, kɛ wɔnyɛmɔ fɛɛ.​—Marko 12:30.