“Nyɛkaia Mɛi Ni Nyiɛɔ Hiɛ Yɛ Nyɛteŋ” Lɛ

ABAANYƐ atsɔɔ bɔfo Paulo wiemɔi nɛɛ ni aŋma yɛ Hebribii 13:7 lɛ shishi hu akɛ: “Nyɛkaia mɛi ni tsɔɔ nyɛ gbɛ lɛ.” Kɛjɛ afi 33 Ŋ.B. Pentekoste gbi lɛ nɔ kɛbaa lɛ, Nuŋtsɔ Yesu Kristo bɔfoi anɔkwafoi lɛ sɔmɔ akɛ gbɛtsɔɔmɔ kuu, ni amɛkɛ gbɛtsɔɔmɔi hã Kristofoi asafo ni ato shishi ehee lɛ. (Bɔf. 6:2-4) Be ni shɛɔ afi 49 Ŋ.B. lɛ, no mli lɛ, jeee Yesu bɔfoi lɛ pɛ sɔmɔɔ akɛ gbɛtsɔɔmɔ kuu nɛɛ mli bii. Be ni akpɛ yiŋ yɛ ketiafoo sane lɛ he lɛ, no mli lɛ, mɛi ni feɔ gbɛtsɔɔmɔ kuu lɛ ji “bɔfoi lɛ kɛ onukpai lɛ” ni yɔɔ Yerusalem lɛ. (Bɔf. 15:1, 2) Nɔ ni gbɛtsɔɔmɔ kuu lɛ tsu ji, amɛsusu saji ni kɔɔ Kristofoi fɛɛ ni yɔɔ he fɛɛ he lɛ ahe, ni amɛkɛ gbɛtsɔɔmɔi hã yɛ he. Amɛŋmala woji amɛmaje asafoi lɛ, ni amɛkɛ famɔi hu hã. Enɛ waje asafoi lɛ ni ehã kaselɔi lɛ tee nɔ amɛfee ekome yɛ bɔ ni amɛsusuɔ nii ahe amɛhãa kɛ bɔ ni amɛfeɔ amɛnii amɛhãa lɛ mli. Asafoi lɛ bo gbɛtsɔɔmɔi ni gbɛtsɔɔmɔ kuu lɛ kɛhã amɛ lɛ toi ni amɛba amɛhe shi amɛhã amɛ, ni no hã Yehowa jɔɔ amɛ ni amɛshwere.​—Bɔf. 8:1, 14, 15; 15:22-31; 16:4, 5; Heb. 13:17.

² Bɔfoi lɛ agbele sɛɛ lɛ, jamɔkwamɔ kpele lɛ ba. (2 Tes. 2:3-12) Tamɔ bɔ ni Yesu gba yɛ nɔkwɛmɔnɔ ni kɔɔ wiiti lɛ kɛ jwɛi lɛ he lɛ mli lɛ, adu jwɛi lɛ (ni ji, amale Kristofoi) afutu wiiti lɛ (ni ji, Kristofoi ni afɔ amɛ mu lɛ). Aŋmɛ kui enyɔ lɛ gbɛ afii babaoo ni amɛdara kɛyashi nikpamɔ be lɛ. Biblia lɛ kɛɛ nikpamɔ be nɛɛ ji “jeŋ ko naagbee gbii.” (Mat. 13:24-30, 36-43) Eyɛ mli akɛ Yesu tee nɔ ejɔɔ aŋkroaŋkroi ni ji Kristofoi ni afɔ amɛ mu ni hi shi dani nikpamɔ be lɛ shɛ lɛ moŋ, shi no mli lɛ abɛ gbɛtsɔɔmɔ kuu, ni tsɔɔ akɛ, abɛ kuu pɔtɛɛ ko yɛ shikpɔŋ lɛ nɔ ni Yesu tsɔɔ amɛnɔ ekɛ gbɛtsɔɔmɔ hãa esɛɛnyiɛlɔi lɛ. (Mat. 28:20) Shi Yesu gba akɛ, yɛ nikpamɔ be lɛ mli lɛ, nibii baatsake.

³ Yɛ abɛbuai loo nɔkwɛmɔnii ni Yesu Kristo gba be ni etsɔɔ nɔ ni baakadi “je lɛ naagbee gbii lɛ” ateŋ ekome mli lɛ, ebi akɛ: “Namɔ tuuntu ji nyɔŋ anɔkwafo kɛ hiɛshikalɔ lɛ?” (Mat. 24:3, 42-47) Yesu tsɔɔ akɛ nyɔŋ anɔkwafo nɛɛ baatsu nii kɛ hiɛdɔɔ koni ehã Nyɔŋmɔ webii lɛ mumɔŋ niyenii “yɛ be ni sa mli.” Yɛ blema Kristofoi lɛ abeiaŋ lɛ, Yesu halaaa mɔ aŋkro ko akɛ lɛ enyiɛ hiɛ yɛ asafo lɛ mli. Moŋ lɛ, ehã hii komɛi tsu nii akɛ kuu, ni amɛnyiɛ hiɛ yɛ asafo lɛ mli. Nakai nɔŋŋ nyɔŋ anɔkwafo ni Yesu baatsɔ enɔ enyiɛ asafo lɛ hiɛ yɛ naagbee gbii lɛ amli lɛ ji kuu, shi jeee gbɔmɔ kome.

⁴ Namɛi Yesu hala koni amɛlɛ esɛɛnyiɛlɔi lɛ? Ehala Kristofoi ni afɔ amɛ mu ni yɔɔ shikpɔŋ lɛ nɔ lɛ, ni enɛ sa jogbaŋŋ. Mɛni hewɔ? Biblia lɛ tsɛɔ Kristofoi ni afɔ amɛ mu lɛ akɛ “osɔfoi ni ji maŋtsɛmɛi,” ni ehãa wɔleɔ akɛ ahã amɛ nitsumɔ akɛ, ‘amɛjaje mɔ ni tsɛ amɛ kɛjɛ duŋ mli kɛba lɛ diɛŋtsɛ enaakpɛɛ la lɛ he lɛ “agbojei lɛ amɛtsɔɔ yɛ he fɛɛ he.”’ (1 Pet. 2:9; Mal. 2:7; Kpo. 12:17) Ani mɛi fɛɛ ni afɔ amɛ mu ni yɔɔ shikpɔŋ lɛ nɔ lɛ ni feɔ nyɔŋ anɔkwafo lɛ? Dabi. Be ni Yesu tsɔ naakpɛɛ gbɛ nɔ elɛ hii aaafee 5,000 kɛ yei kɛ gbekɛbii bibii lɛ, ekɛ niyenii lɛ hã ekaselɔi lɛ, ni ekaselɔi lɛ hu kɛhã mɛi lɛ. (Mat. 14:19) Etsɔ mɛi fioo anɔ elɛ mɛi babaoo. Ŋmɛnɛ lɛ, eetsɔ nakai gbɛ nɔŋŋ nɔ ekɛ mumɔŋ niyenii miihã wɔ.

⁵ No hewɔ lɛ, “shĩa nɔkwɛlɔ anɔkwafo lɛ, hiɛshikalɔ lɛ,” ji mɛi ni afɔ amɛ mu lɛ ateŋ hii fioo ni tsuɔ nii akɛ kuu kɛtoɔ mumɔŋ niyenii he gbɛjianɔ ni amɛkɛhãa yɛ naagbee gbii nɛɛ amli. (Luka 12:42) Kɛjɛ be ni naagbee gbii lɛ je shishi aahu kɛbashi ŋmɛnɛ lɛ, hii ni afɔ amɛ mu lɛ ateŋ mɛi ni feɔ “nyɔŋ anɔkwafo kɛ hiɛshikalɔ lɛ” fɛɛ sɔmɔɔ yɛ nitsumɔhe yitso lɛ. Ŋmɛnɛ lɛ, hii ni afɔ amɛ mu nɛɛ ji mɛi ni sɔmɔɔ akɛ Yehowa Odasefoi A-Gbɛtsɔɔmɔ Kuu lɛ.

⁶ Kristo tsɔɔ nyɔŋ nɛɛ nɔ ehãa wɔleɔ Biblia mli gbalɛi ni eba mli, kɛ agbɛnɛ hu, bɔ ni wɔbaafee wɔkɛ Biblia mli shishitoo mlai atsu nii yɛ wɔshihilɛ mli. Yehowa Odasefoi asafoi ni yɔɔ jeŋ fɛɛ lɛ anɔ nyɔŋ lɛ tsɔɔ ekɛ mumɔŋ niyenii nɛɛ hãa, ni ekɛhãa yɛ be ni sa mli. (Yes. 43:10; Gal. 6:16) Yɛ blema lɛ, nyɔŋ loo shĩa nɔkwɛlɔ ni amuɔ afɔ̃ɔ enɔ lɛ ji mɔ ni kwɛɔ enuŋtsɔ lɛ shĩabii loo nibii anɔ. Nakai nɔŋŋ Yesu kɛ nitsumɔ ewo nyɔŋ anɔkwafo kɛ hiɛshikalɔ lɛ dɛŋ akɛ ekwɛ eshĩabii lɛ kɛ enibii lɛ anɔ. No hewɔ lɛ, nyɔŋ anɔkwafo lɛ kwɛɔ heloonaa nibii ni asafo lɛ yɔɔ lɛ, shiɛmɔ nitsumɔ lɛ, kɛ kpeei bibii kɛ kpeei wuji anɔ. Kɛfata he lɛ, nyɔŋ lɛ holeɔ nɔkwɛlɔi ni tsuɔ sɔ̃i srɔtoi ahe nii yɛ asafo lɛ mli, ni ekwɛɔ ni afeɔ woji, vidioi, kɛ nibii krokomɛi ni akɛkaseɔ Biblia lɛ. Nuŋtsɔ lɛ ‘webii lɛ’ náa nibii nɛɛ fɛɛ ni nyɔŋ lɛ feɔ lɛ ahe sɛɛ.​—Mat. 24:45.

⁷ Shi, namɛi ji nuŋtsɔ lɛ ‘webii lɛ’? Amɛji mɛi ni alɛɔ lɛ. Be ko ni eho lɛ, mɛi ni afɔ amɛ mu sɔŋŋ ni feɔ nuŋtsɔ lɛ webii lɛ. Shi sɛɛ mli lɛ, “gwantɛŋi krokomɛi” asafoku babaoo ko bafata nuŋtsɔ lɛ webii lɛ ahe. (Yoh. 10:16) Mɛi ni afɔ amɛ mu lɛ kɛ gwantɛŋi krokomɛi lɛ fɛɛ yeɔ mumɔŋ niyenii ni nyɔŋ anɔkwafo lɛ toɔ he gbɛjianɔ lɛ.

⁸ Kɛ́ Yesu ba koni ebakojo je lɛ ni ekpãtã hiɛ yɛ amanehulu kpeteŋkpele lɛ mli lɛ, ekɛ nyɔŋ anɔkwafo lɛ “baato nibii fɛɛ ni eyɔɔ lɛ anɔ.” (Mat. 24:46, 47) Mɛi ni feɔ nyɔŋ anɔkwafo lɛ baaya ŋwɛi. Amɛ kɛ mɛi 144,000 lɛ mli bii krokomɛi lɛ kɛ Kristo baaye nɔ yɛ ŋwɛi. Eyɛ mli akɛ nakai beiaŋ lɛ, nyɔŋ anɔkwafo kɛ hiɛshikalɔ ko ehiŋ shikpɔŋ lɛ nɔ dɔŋŋ moŋ, shi Yehowa kɛ Yesu baatsɔ mɛi ni baasɔmɔ akɛ “lumɛi” lɛ anɔ amɛkɛ gbɛtsɔɔmɔ ahã Mesia Maŋtsɛyeli lɛ shishi bii ni yɔɔ shikpɔŋ lɛ nɔ lɛ.​—Lala 45:16.

⁹ Yiŋtoi babaoo ahewɔ esa akɛ ‘wɔkai mɛi ni nyiɛɔ hiɛ’ lɛ ni wɔkɛ wɔnifeemɔ atsɔɔ akɛ wɔheɔ amɛ wɔyeɔ. Anɔkwa, kɛ́ wɔfee nakai lɛ, wɔbaaná he sɛɛ. Mɛni hewɔ? Bɔfo Paulo wie akɛ: “Amɛmiibu nyɛhe, ni amɛbaabu enɛ he akɔntaa, koni amɛkɛ miishɛɛ afee enɛ, shi jeee kɛ mligbigblimɔ, ejaakɛ no baaye nyɛ awui.” (Heb. 13:17) Ehe miihia ni wɔbo gbɛtsɔɔmɔi ni mɛi ni nyiɛɔ hiɛ lɛ kɛhãa wɔ lɛ toi ni wɔba wɔhe shi wɔhã amɛ, ejaakɛ amɛbuɔ wɔhe koni wɔkafee nɔ ko ni baafite wɔ kɛ Yehowa teŋ, ni amɛyeɔ amɛbuaa wɔ ni wɔhe awa yɛ hemɔkɛyeli lɛ mli.

¹⁰ Paulo wie yɛ 1 Korintobii 16:14 lɛ akɛ: “Nyɛfea nyɛnii fɛɛ yɛ suɔmɔ mli.” Nyɛmimɛi ni nyiɛɔ hiɛ lɛ jɛɔ suɔmɔ, ni ji su ni nɔ bɛ lɛ mli amɛkɛ gbɛtsɔɔmɔi hãa Nyɔŋmɔ webii lɛ. Biblia lɛ kɛɔ yɛ 1 Korintobii 13:4-8 lɛ akɛ: “Suɔmɔ toɔ etsui shi ni emli hi. Suɔmɔ yeee awuŋa. Eshwãaa, enaaa ehe tsɔ, efeee nii ni bulɛ bɛ he, epeleee ehãaa lɛ pɛ ehe, emli wooo la. Ekɛ efɔŋ etooo emli. Enáaa miishɛɛ yɛ nii ni ejaaa he, shi moŋ enáa miishɛɛ yɛ anɔkwale he. Edamɔɔ nibii fɛɛ naa, eheɔ nibii fɛɛ eyeɔ, ehiɛ kãa nibii fɛɛ nɔ, efiɔ shi yɛ nibii fɛɛ mli. Suɔmɔ sɛɛ efooo kɔkɔɔkɔ.” Akɛni amɛjɛɔ suɔmɔ mli amɛkɛ gbɛtsɔɔmɔi ni he yɔɔ sɛɛnamɔ hãa Yehowa tsuji lɛ hewɔ lɛ, wɔbaanyɛ wɔná nɔmimaa akɛ gbɛtsɔɔmɔi ni amɛkɛhãa wɔ lɛ baabu wɔhe. Kɛfata he lɛ, gbɛtsɔɔmɔi ni amɛkɛhãa wɔ lɛ hãa wɔnaa akɛ Yehowa sumɔɔ wɔ.

¹¹ Mɛi ni Yehowa tsɔ amɛnɔ ekɛ gbɛtsɔɔmɔ hã yɛ blema Kristofoi lɛ abeiaŋ lɛ yeee emuu, ni nakai nɔŋŋ eji ŋmɛnɛ. Anɔkwa, kɛjɛ blema tɔ̃ɔ lɛ, hii ni yeee emuu nɔŋŋ Yehowa kɛtsuɔ eyiŋtoi ahe nii. Akɛ nɔkwɛmɔnɔ lɛ, Yehowa hã Noa kpɛ adeka ni eshiɛ akɛ abaakpãtã mɛi fɔji ahiɛ. (1 Mo. 6:13, 14, 22; 2 Pet. 2:5) Yehowa hala Mose koni enyiɛ Israelbii lɛ ahiɛ kɛshi Ejipt. (2 Mo. 3:10) Hii ni Yehowa kɛ emumɔ lɛ tsirɛ amɛ ni amɛŋma Biblia lɛ hu yeee emuu. (2 Tim. 3:16; 2 Pet. 1:21) Eyɛ mli akɛ hii ni Yehowa ehala akɛ amɛkwɛ shiɛmɔ kɛ kaselɔfeemɔ nitsumɔ lɛ nɔ lɛ yeee emuu moŋ, shi no hãaa hemɔkɛyeli ni wɔyɔɔ akɛ Yehowa asafo lɛ nɛ lɛ mli agbɔjɔ. Ehãa emli waa moŋ, ejaakɛ wɔle akɛ gbɔmɛi ni yeee emuu nyɛŋ atsu nibii ni asafo lɛ tsuɔ ŋmɛnɛ lɛ kɔkɔɔkɔ, ja Yehowa fi amɛsɛɛ. Nibii ni nyɔŋ anɔkwafo lɛ etsɔ mli kɛ shihilɛi ni mli wawai ni enyɛ edamɔ naa lɛ hãa wɔnaa akɛ, Nyɔŋmɔ mumɔ lɛ ni kudɔɔ lɛ. Ŋmɛnɛ lɛ, Yehowa miijɔɔ esafo lɛ fã ni yɔɔ shikpɔŋ lɛ nɔ lɛ waa. Enɛ hewɔ lɛ, wɔjɛɔ wɔtsui muu fɛɛ mli wɔ kɛ lɛ feɔ ekome ni wɔkɛ wɔhiɛ fɔ̃ɔ enɔ kwraa.

¹² Kɛ́ mɛi ni atu sɔɔmɔ hegbɛi awo amɛdɛŋ yɛ asafo lɛ mli lɛ kpɛlɛ sɔ̃i ni kɛ hegbɛi nɛɛ nyiɛ lɛ anɔ kɛ miishɛɛ ni amɛtsu he nii jogbaŋŋ lɛ, no tsɔɔ akɛ amɛheɔ amɛyeɔ akɛ Yehowa asafo lɛ nɛ. (Bɔf. 20:28) Esa akɛ wɔ fɛɛ wɔkɛ ekãa ashiɛ Maŋtsɛyeli lɛ he sane lɛ yɛ shĩa fɛɛ shĩa, wɔfee sɛɛkuukɛsaramɔi, ni wɔfee Biblia mli nikasemɔi. (Mat. 24:14; 28:19, 20) Kɛfata he lɛ, esa akɛ wɔya asafoŋ kpeei kɛ kpeei bibii kɛ kpeei wuji fɛɛ, ni wɔsaa wɔhe dani wɔya. Kɛ́ wɔfee nakai lɛ, wɔbaaná mumɔŋ niyenii ni nɔ bɛ ni nyɔŋ anɔkwafo lɛ eto he gbɛjianɔ ehã wɔ lɛ he sɛɛ jogbaŋŋ. Kɛ́ wɔkɛ wɔnyɛmimɛi lɛ kpe yɛ Kristofoi ahenaabuamɔi nɛɛ ashishi lɛ, wɔwoɔ wɔhe hewalɛ ni no hãa wɔhemɔkɛyeli lɛ mli waa waa.​—Heb. 10:24, 25.

¹³ Kɛ́ wɔkɛ wɔheloonaa nibii ye wɔbua asafo lɛ, no hu tsɔɔ akɛ wɔle akɛ Yehowa asafo lɛ nɛ. (Abɛi 3:9, 10) Kɛ́ wɔna akɛ ehia wɔnyɛmi ko lɛ, wɔyeɔ wɔbuaa lɛ amrɔ nɔŋŋ. (Gal. 6:10; 1 Tim. 6:18) Suɔmɔ ni wɔyɔɔ kɛhã wɔnyɛmimɛi lɛ hewɔ wɔfeɔ enɛ, ni be fɛɛ be lɛ, wɔkwɛɔ nɔ ni wɔbaanyɛ wɔfee kɛtsɔɔ akɛ wɔhiɛ sɔɔ nibii kpakpai ni Yehowa kɛ esafo lɛ feɔ amɛhãa wɔ lɛ.​—Yoh. 13:35.

¹⁴ Kɛ́ wɔkɛ gbɛtsɔɔmɔi ni asafo lɛ kɛhãa wɔ lɛ tsu nii lɛ, no hu tsɔɔ akɛ wɔheɔ wɔyeɔ akɛ Yehowa asafo lɛ nɛ. Esa akɛ wɔba wɔhe shi ni wɔkɛ gbɛtsɔɔmɔi ni asafoŋ onukpai, kpokpaa nɔkwɛlɔi kɛ nɔkwɛlɔi krokomɛi kɛhãa wɔ lɛ atsu nii. Nyɛmimɛi hii nɛɛ fata “mɛi ni nyiɛɔ hiɛ” ni esa akɛ wɔbo amɛ toi ni wɔba wɔhe shi wɔhã amɛ lɛ ahe. (Heb. 13:7, 17) Kɛ́ wɔnuuu gbɛtsɔɔmɔi ni amɛkɛhãa wɔ lɛ ekomɛi ashishi jogbaŋŋ po lɛ, wɔle akɛ, kɛ́ wɔkɛtsu nii lɛ, wɔbaaná he sɛɛ. Kɛ́ wɔbo Yehowa Wiemɔ lɛ kɛ esafo lɛ toi lɛ, no baatsɔɔ akɛ wɔbaa wɔhe shi wɔhãa Yesu Kristo, wɔ-Nuŋtsɔ lɛ, ni Yehowa baajɔɔ wɔ.

¹⁵ Nibii ni wɔsusu he nɛɛ ehã wɔna faŋŋ akɛ, wɔbaanyɛ wɔmu wɔfɔ̃ nyɔŋ anɔkwafo kɛ hiɛshikalɔ lɛ nɔ. Satan, ni ji je nɛɛ nyɔŋmɔ lɛ, miifee bɔ fɛɛ bɔ ni ebaanyɛ koni egbe Yehowa gbɛ́i lɛ kɛ esafo lɛ he guɔ. (2 Kor. 4:4) Kaahã elaka bo! (2 Kor. 2:11) Satan le akɛ, eshwɛ “be fioo” ni akɛ lɛ baawo bu kwɔŋkwɔŋ lɛ mli, ni etswa efai shi akɛ, ebaahã Yehowa webii lɛ ateŋ mɛi babaoo atse amɛhe kɛje Nyɔŋmɔ he. (Kpo. 12:12) Satan emia egbaja mli. No hewɔ lɛ, esa akɛ wɔ hu wɔtsi wɔbɛŋkɛ Yehowa waa fe tsutsu lɛ po. Nyɛhãa wɔkɛ wɔhiɛ afɔ̃a Yehowa kɛ nyɔŋ lɛ, ni ji kuu ni etsɔɔ nɔ ekɛ gbɛtsɔɔmɔ hãa wɔ ŋmɛnɛ lɛ nɔ. Kɛ́ wɔfee nakai lɛ, ebaahã wɔfee ekome akɛ nyɛmimɛi.