Daa Ni Wa​—Te Kristofonyo Lɛ Susuɔ Enɛ He Ehaa Tɛŋŋ?

“NAMƆ naa nɔ? Namɔ naa haomɔ? Namɔ naa bei? Namɔ naa ŋkɔmɔyeli? Namɔ naa pilamɔi yakatswaa? Namɔ naa hiŋmɛii ni etsu faa? Mɛi ni tsɛɔ yɛ wein he lɛ, mɛi ni yaa yasaa amɛnaa wein ni afutu mli lɛ.” (Abɛi 23:​29, 30) Hɛɛ, Biblia lɛ kpɛlɛɔ nɔ akɛ daa ni wa numɔ baanyɛ ekɛ nibii gbohii aba: obaasusu nibii ni bɛ mli lɛ ahe, obaawo ohe hiɛgbele, jwɛŋmɔ mli helai komɛi, gbɔmɔtsoŋ helai, weku mli naagbai, kɛ ohia po.

Kadimɔ akɛ Biblia ŋmalɛ ni yɔɔ yiteŋgbɛ nɛɛ wieɔ mɛi ni “tsɛɔ yɛ wein he” lɛ ahe akɛ daatɔlɔi! Kɛha gbɔmɛi ni tamɔ nɛkɛ lɛ, daa ni wa tamɔ ebɔɔ, ejaakɛ yɛ be babaoo mli lɛ, ekɛ gbɔmɔtsoŋ kɛ jwɛŋmɔŋ helai baa. (Abɛi 23:32-35) Mɛi ni nuɔ daa waa lɛ baanyɛ alaaje henɔyeli ni amɛje shishi amɛfee nibii ní kɛ amɛnuko daa lɛ amɛhiɛ aaagbo akɛ amɛaafee nakai. No hewɔ lɛ, Biblia lɛ bɔɔ kɔkɔ akɛ: “Kaaŋɔ ohe ofutu daatɔlɔi kɛ mɛi ni feɔ loo he fu lɛ! Ejaakɛ daatɔlɔ lɛ fulɔ lɛ, amɛaaye ohia, ni wɔdɔiwɔɔ aaaha mɔ abu mamashwɛi.” (Abɛi 23:​20, 21) Abuɔ daatɔɔ hu akɛ efata “heloo lɛ nitsumɔi” ni baanyɛ atsi mɔ ko naa koni ekabote Nyɔŋmɔ Maŋtsɛyeli lɛ mli lɛ he.​—Galatabii 5:​19, 21; 1 Korintobii 6:⁠10,

‘Nilee Bɛ Mli’​—Kɛha Namɛi?

Ani enɛ tsɔɔ akɛ agu akɛ Kristofoi akanu daa ni wa kwraa lo? Ni nɔ ni osɔfo lɛ kɛɔ hu, ni atsɔ hiɛ atsi ta yɛ nikasemɔ ni tsɔ hiɛ lɛ mli lɛ, ni akɛɛ edamɔ Abɛi 20:1 nɔ lɛ akɛ “nilelɔi enuuu wein kwraa” lɛ hu? Ga Biblia lɛ tsɔɔ kuku nɛɛ shishi akɛ: “Wein lɛ hefɛoyelɔ ni, ni daa ni wa lɛ, hoofeelɔ ni. Ni mɔ fɛɛ mɔ ni no haa edidaa lɛ, eleee nii.” Agbɛnɛ Biblia lɛ kaaa mɛi ni nuɔ wein lɛ ahiɛ, shi moŋ mɔ ni no haa adidaa aloo elakaa lɛ lɛ! No hewɔ lɛ, “mɛi ni tsɛɔ yɛ wein he lɛ” kɛ “daatɔlɔi” lɛ​—mɛnɛɛmɛi ji mɛi ni “leee nii” lɛ.

Agbɛnɛ susumɔ Yesaia 5:​11, 22 he. Nɛkɛ kukuji nɛɛ kaneɔ nɛkɛ: “Kpoo ha mɛi ni teɔ shi maŋkɛ mra, ni amɛyanyiɛɔ daa ni wa sɛɛ, mɛi ni traa shi kɛyashiɔ jenamɔ yiwaa ni wein haa amɛhiɛ woɔ la. Kpoo ha mɛi ni feɔ ekaa kɛ wein numɔ, ni amɛhe waa amɛ kɛ daa ni wa futumɔ.” Mɛni Yesaia wieɔ shiɔ lɛ? Ani ejeee daanumɔ ni tekeɔ nɔ ni ji akɛ aaanu daa kɛjɛ “maŋkɛ mra” kɛyashi “jenamɔ yiwaa” lɛ?

Nyɔŋmɔ tsuji anɔkwafoi​—tamɔ Abraham, Isak, kɛ Yesu​—ji mɛi ni abɔ amaniɛ akɛ amɛnu wein kɛ hiɛshikamɔ (1 Mose 14:​18; 27:​25; Luka 7:34) Biblia lɛ hu tsiɔ wein ta akɛ efata jɔɔmɔi ni baa kɛjɛɔ Yehowa ŋɔɔ lɛ he. (1 Mose 27:​37; 5 Mose 11:​14; Yesaia 25:6-8) Biblia lɛ po tsɔɔ akɛ wein ni aaanu kɛ hiɛshikamɔ lɛ he baa sɛɛnamɔ. Lalatsɛ lɛ kɛɛ, wein “haa adesa tsui nyɔɔ emli.” (Lala 104: 15) Bɔfo Paulo wo Timoteo ŋaa akɛ: “Kaanu nu [ni ewo muji lɛ] sɔŋŋ, shi nuu wein fioo yɛ omusu kɛ ohelai ni yeɔo kpitiokpitio lɛ ahewɔ.​—1 Timoteo 5:⁠23.

Wein Loo Weintso Yibii Amli Nu?

Mɛi komɛi jeɔ ŋwane akɛ “wein” ni awiɛ he yɛ Biblia ŋmalɛi nɛɛ amli lɛ ji weintso nɔ yibii amli nu. Shi McClintock kɛ Strong Cyclopedia lɛ kaiɔ wɔ akɛ “Biblia lɛ kɛ sɔrɔtofeemɔ ko baaa daa ni tɔɔ mɔ kɛ wein ni etɔɔɔ mɔ lɛ teŋ​—ewieee he aloo nɔ ko bɛ ni tsɔɔ akɛ mligbalamɔ ko ni tamɔ nakai yɛ.” Nɔ ni kɛ enɛ kpaa gbee Iɛ yɛ Biblia mli lɛ, anuɔ “wein” shishi akɛ eji daa ni tɔɔ mɔ ni akɛtoɔ “daa ni wa” he.​—1 Mose 9:​21; Luka 1:​15; 5 Mose 14:​26; Abɛi 31: 4, 6.

Nɔ ni yɔɔ miishɛɛ lɛ, klɛŋklɛŋ naakpɛɛ nii ni Yesu fee ji nu ni eha etsɔ wein. Nɔ ni aŋma yɛ Biblia lɛ mli pɛ kɛɔ akɛ: “Shi beni piafonyo lɛ sa enaa . . . wein, ni eleee he ni jɛ, . . . lɛ, piafonyo lɛ tsɛ ayɛmforowu lɛ, ni ekɛɛ lɛ akɛ: Mɔ fɛɛ mɔ lɛ, wein kpakpa akɛbamaa shi klɛŋklɛŋ, ni beni mɛi lɛ etɔrɔ, no dani amɛkɛ nɔ ni eŋɔɔɔ lɛ baa; shi bo lɛ oŋɔ wein kpakpa lɛ moŋ oto kɛbashi be nɛɛ.” (Yohane 2:​9, 10) Hɛɛ, “wein kpakpa” ni Yesu fee lɛ ji wein diɛŋtsɛ.

Eji anɔkwale akɛ jamɔ mli hiɛnyiɛlɔi ni buɔ amɛhe jalɔi yɛ Yesu bei lɛ amli lɛ wie amɛshi lɛ akɛni enuɔ wein yɛ be kɛ bei amli hewɔ. Yesu kɛɛ: “Yohane Baptisilɔ lɛ ba ni eyeee abolo ni enuuu wein ni nyɛkɛɛ: Daimonio yɛ emli. Gbɔmɔbi lɛ ba ni eyeɔ nii ni enuɔ nɔ ko, ni nyɛkɛɛ: Naa, nuu folɔ kɛ daanulɔ, toohelɔi kɛ eshafeelɔi ashieŋtsɛ!” (Luka 7:​33, 34) Mɛni baanyɛ afee sɔrɔtofeemɔ ni ka Yesu ni nuɔ nii kɛ Yohane ni enuuu nii lɛ teŋ kɛji akɛ daa ni waaa loo weintso nɔ yibii amli nu pɛ enuɔ? Kaimɔ akɛ, awie yɛ Yohane he akɛ “enuŋ wein loo daa ni wa ko.”​—Luka 1:⁠15.

Eka shi faŋŋ akɛ Yesu ewieee eshiii daa ni wa ni aaanu kɛ hiɛshikamɔ lɛ. Yɛ egbii lɛ amli lɛ wein ni anuɔ lɛ fata Hehoo gbijurɔyeli lɛ he.a Ni wein diɛŋtsɛ tee nɔ efee Nuŋtsɔ lɛ gbɛkɛnaashi niyenii ni akɛto Hehoo lɛ najiaŋ lɛ fa.

Ebiɔ Hiɛshikamɔ

No hewɔ Iɛ Biblia lɛ etsiii daa ni wa ni anuɔ lɛ naa. Bei pii yɛ ni kɛ mɔ ko aaanu daa ni wa aloo enuŋ lɛ, ebaato eyiŋ yɛ he. Shi Biblia lɛ wieɔ shiɔ daatɔɔ kɛ fufeemɔ: “Kaaŋɔ ohe ofutu daatɔlɔi kɛ mɛi ni feɔ loo he fu lɛ! Ejaakɛ daatɔlɔ kɛ fulɔ lɛ, amɛaaye ohia.” (Abɛi 23:​20, 21) No hewɔ lɛ esa akɛ mɔ fɛɛ mɔ ajie hiɛshikamɔ kɛ henɔyeli kpo. “Nyɛkatɔrɔa daa, nɔ mli ni sakasakafeemɔ yɔɔ lɛ, shi moŋ nyɛyimɔa obɔbɔ kɛ mumɔ lɛ.” Kaimɔ akɛ, henɔyeli ji Nyɔŋmɔ mumɔ lɛ yibii lɛ ateŋ ekome​—Efesobii 5:​18; Galatabii 5:​19-23.

Yɛ anɔkwale mli lɛ, ehe ehiaaa ni mɔ ko atɔ daa ni ekɛ haomɔi aba enɔ yɛ daa ni wa hewɔ. Wolo bibioo ko ni U.S. National Institute on Drug Abuse lɛ fee lɛ kaiɔ wɔ akɛ: “Kɛ mɔ ko nu daa lɛ, daa lɛ tsɔɔ emusuŋ kɛboteɔ ela mli ni eyashɛɔ ansɔ lɛ mli oya. Ejeɔ shishi ebaa ansɔ lɛ fai ni yeɔ jwɛŋmɔ kɛ henumɔ lɛ nɔ lɛ shi. Gbɔmɔ lɛ nuɔ he akɛ nɔ ko etsiii enaa, eye ehe.” Nɛkɛ “nɔ ko etsiii enaa” su nɛɛ baaha ekɛ ehe ayabote jeŋba mli osharai amli.

Oshara kroko hu baa yɛ be mli ni mɔ lɛ miikudɔ tsɔne. Taakɛ akɔntaabuu ko tsɔɔ lɛ, agbeɔ gbɔmɛi 25,000 daa afi yɛ U.S. Amerika yɛ tsɔnekudɔlɔi ni etɔrɔ daa lɛ hewɔ. Eka shi faŋŋ akɛ mɛi pii ji mɛi ni ebuuu bɔ ni daa ni wa nyɛɔ ebaa amɛhenumɔi ashi ehaa lɛ. Shi Kristofoi susuɔ wala he akɛ eji nikee nii ni jɛ Yehowa ŋɔɔ. (Lala 36:10) ‘Ani ebaafee nɔ ni kɛ nɛkɛ susumɔ nɛɛ kpaa gbee akɛ mɔ ko kɛ Iɛ diɛŋtsɛ ewala kɛ mɛi krokomɛi awala aaawo oshara mli yɛ be mli ni ekudɔɔ tsɔne beni daa ni wa eha ehenumɔi eba shi lɛ? No hewɔ lɛ Kristofoi pii ekpɛ amɛyiŋ akɛ amɛtaŋ daa ni wa he kwraa yɛ be mli ni amɛkudɔɔ tsɔne lɛ.

Kristofonyo lɛ hu susuɔ bɔ ni edaanumɔ lɛ saa mɛi krokomɛi ahe lɛ he. Ŋwanejee ko bɛ he akɛ enɛ hewɔ ni awoɔ nɔkwɛlɔi Kristofoi, asafoŋ sɔɔlɔi kɛ yeimeji fɛɛ ahewalɛ akɛ amɛkatsɔmɔ “daatɔlɔi” lɛ. (1 Timoteo 3:​2, 8; Tito 2:​2, 3) Yɛ be mli ni mɔ kɔ baanyɛ afee mɔ ni nuɔ daa ni wa babaoo ni kɛlɛ enyɛɔ edamɔɔ naa lɛ, esa akɛ ekwɛ jogbaŋŋ ni ekɛ hiɛshikamɔ anu edaa lɛ bɔni afee ni ekana mɛi krokomɛi anɔ hewalɛ yɛ gbɛ fɔŋ nɔ. Ní asaŋ ekabɔ mɔdɛŋ ni enyɛ daa ni wa nɔ eha mɔ ko ni sumɔɔɔ akɛ enuɔ lɛ. Biblia lɛ kɛɔ lolo akɛ: “Ehi akɛ oyeee loo ni asaŋ onuuu wein loo nɔ ko ni baato onyɛmi pampi.”​—Romabii 14:⁠21.

Shihilɛi komɛi baabi ni atsi he kɛjɛ daanumɔ he kwraa. Susumɔ hɔŋɔɔ he. International Herald Tribune (nɔ ni afee yɛ Paris) lɛ gbalaa jwɛŋmɔ kɛtee nikasemɔ ko ni tee nɔ yɛ University of North Carolina (U.S.A.) lɛ nɔ ni ebɔ amaniɛ akɛ “daa ni aaatɔ waa shikome ko yɛ be mli ni hɔŋɔɔ eje shishi lɛ baanyɛ aye gbekɛ ni daa lɛ gbɔmɔtso kɛ jwɛŋmɔ awui.’” Esa akɛ yei kɛ hiɛdɔɔ aŋmɛ daanumɔ he oshara ni baanyɛ aba yɛ hɔŋɔɔ shishijee nɛɛ jogbaŋŋ amɛkwɛ.

Mɛi ni ale amɛ akɛ amɛtɔɔ aloo amɛnyɛɛɛ amɛkɛ hiɛshikamɔ anu daa lɛ hu baanyɛ asusu he akɛ ehi akɛ amɛaakpa kwraa.b Eji nilee gbɛ hu akɛ onuuu daa yɛ mɔ ni ale lɛ akɛ eji daatɔlɔ loo mɔ ni ehenilee buɔ daanumɔ fɔ lɛ hiɛ. Agbɛnɛ ni ooonu daa ni wa dani Kristofoi akpeei aje shishi aloo dani okɛ ohe awo maŋshiɛmɔ mli lɛ hu esaaa. Blema Levibii lɛ to enɛ he Okadi amɛha wɔ yɛ daa ni amɛtsi amɛhe kɛjɛ he yɛ be mli ni amɛmiisɔmɔ yɛ sɔlemɔwe lɛ.​—3 Mose 10:​8-10.

Yɛ naagbee lɛ, esa akɛ akɛ bulɛ aha maŋ lɛ mlai lɛ. Maji komɛi yɛ ni agu daa ni wa kwraa. Hei krokomɛi hu yɛ ni onukpai ni eye afii komɛi pɛ aŋmɛɔ amɛ gbɛ ni amɛnu daa. Kristofonyo boɔ “hegbɛi ni yeɔ no” lɛ amlai ni tamɔ nɛkɛ lɛ toi.​—Romabii 13:⁠1.

Shi, kɛji akɛ obaanu daa ni wa aloo onuŋ aloo bɔ ni obaanu lɛ fa aloo efaaa hu lɛ, enɛ fɛɛ damɔ oyiŋkpɛi anɔ. Kɛ wɔkɛ sanesɛɛkɔmɔ tsu nii ni wɔjɛ wɔsuɔmɔ mli wɔkɛ hiɛshikamɔ fee nii lɛ, ewoɔ Nyɔŋmɔ hiɛ nyam. No hewɔ lɛ nyiɛmɔ nilee gbɛ nɛɛ nɔ koni “kɛ nii nyɛyeɔ jio, nii nyɛnuɔ jio, aloo nɔ kroko ni nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam.”​—1 Korintobii 10:⁠31.

[Shishigbɛ niŋmai]

[Mfoniri ni yɔɔ baafa 6]

Kristofonyo baanyɛ akpoo daa ni wa numɔ yɛ mɔ kroko henilee hewɔ