Abaaye “Naagbee Henyɛlɔ” lɛ Nɔ Kunim!
EKOLƐ osheɔ duŋ gbeyei yɛ be mli ni oji gbekɛ lɛ. Saji kɛ adesãi komɛi ni haa mɔ tsui fãa baaha oye otsui. Kwɛ bɔ ni otsui nyɔ omli ha beni onyɛ loo otsɛ shi kane ni asũ yɛ omasɛi yɛ be mli ni obɔɔ mɔdɛŋ ni owɔ lɛ!
Gbele hu woɔ mɛi ahe gbeyei nakai nɔŋŋ. Ni kɛlɛ, ehe ehiaaa ni ebaa lɛ nakai. Mɛni hewɔ? Yɛ nɔ ni gbele ji diɛŋtsɛ lɛ hewɔ.
Le Ohenyɛlɔ Lɛ
Blema Israel Maŋtsɛ Salomo nilelɔ lɛ jaje akɛ: “Shi hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko.” (Jajelɔ 9:5) Yɛ wiemɔ ni jɛ mumɔŋ ni anaa yɛ bo diɛŋtsɛ o-Biblia lɛ mli lɛ hewɔ lɛ, gbele ji wala mli ni abɛ kɛkɛ. Gbohii lɛ leee nɔ ko nɔ ko kwraa.
Yɛ be mli ni ewieɔ gbele he yɛ mfoniri-feemɔ gbɛ nɔ lɛ, Kristofonyo bɔfo Paulo ŋma akɛ: “Bo gbele, nɛgbɛ okunimyeli lɛ yɔɔ? Gbele, nɛgbɛ ogai lɛ yɔɔ?” Mɛni ji gai ni kɛ atsɛ̃ ni kɛ gbele baa lɛ? Paulo kɛɛ: “Gai ni kɛ gbele baa ji esha.” (1 Korintobii 15: 55, 56; Hoshea 13:14, New World Translation) Belɛ, mɛni ji gai ni gbeɔ mɔ nɛɛ shishijee? Paulo tsi ta yɛ he ko yɛ Ŋmalɛi lɛ amli akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Romabii 5:12) Bɔfo lɛ shiii yiŋkɔshikɔshi-feemɔ ko yɛ mɔ ni nakai “gbɔmɔ kome” lɛ ji he, beni ekɛɔ akɛ: “Adam mli ni mɛi fɛɛ gboiɔ yɛ” lɛ. (1 Korintobii 15:22) Hɛɛ, yɛ wɔ klɛŋklɛŋ blematsɛ Adam toigbele hewɔ lɛ, etsɛɛɛ ni gbele gai lɛ naa wɔ fɛɛ nɔ hewalɛ.—1 Mose 3:1-19.
Kɛ wɔyɛ gbɔmɔtsoŋ hewalɛ kpakpa kɛ weku ni suɔmɔ yɔɔ mli yɛ shihilɛi ni ŋɔɔ mli lɛ, wɔteŋ mɔ ko sumɔŋ akɛ eeegbo. Shi, taakɛ Biblia lɛ kɛɔ lɛ, “be kɛ shihilɛ mli nibii ni baa trukaa ni aleee” baanyɛ ashɔ wɔwala kɛjɛ wɔdɛŋ. (Jajelɔ 9:11, NW) Yɛ anɔkwale mli lɛ, wɔleee nɔ ni baaba wɔwala nɔ wɔ. (Yakobo 4:14) Nɔ kome yɛ ni ji anɔkwale—wɔ fɛɛ wɔna esha kɛ gbele akɛ gboshinii. No hewɔ lɛ gbele gbɔbiɔ wɔ ni etswiaa wɔ nii akɛ henyɛlɔ ko.
Suɔlɔ ko Gbele ni Aaanyɛ Adamɔ Naa
Gbele bafeɔ henyɛlɔ krɛdɛɛ kɛ etswa suɔlɔ ko nɔ̃ lɛ. Ŋa ko ni kã gbele-hela saa nɔ kɛɛ ewu lɛ, yɛ be mli ni esusuɔ gbele he lɛ akɛ: “Ebaawa kɛha bo.” Mɛni hewɔ eeenyɛ ekɛɛ nakai? Ejaakɛ Biblia lɛ kɛɔ akɛ: “Nɔ fɛɛ nɔ tsumɔ ni onine aaashɛ nɔ lɛ, okɛ ohewalɛ atsu; ejaakɛ nitsumɔ loo yiŋshwiemɔ loo nilee loo ŋaa ko bɛ gbohiiaje [adesai akwamaŋ gbonyobu] he ni oyaa lɛ.” (Jajelɔ 9:10) Gbohii lɛ apiŋmɔ sɛɛ efo. Shi awerɛho ni tamɔ jatsu lɛ bagbeeɔ wekumɛi kɛ nanemɛi ni eshwɛ yɛ esɛɛ lɛ anɔ. Ani aaanyɛ afee nɔ ko yɛ piŋmɔ ni tamɔ nɛkɛ he?
Miishɛjemɔ wiemɔi pii yɛ Nyɔŋmɔ Wiemɔ ni ji Biblia lɛ baafai amli. Akɛ nɔkwɛmɔ nɔ lɛ, lalai lɛ akanemɔ kɛ enɔjwɛŋmɔ ji tsuiwoo jɛɛhe kome. Nɔ ni shɛjeɔ mɔ mii diɛŋtsɛ ji nɛkɛ wiemɔi nɛɛ: “Ajie Nuŋtsɔ lɛ [Yehowa] yi! Daanɛɛ etereɔ wɔjatsui lɛ ehaa wɔ; Mawu lɛ nɔŋŋ ji wɔyiwalaheremɔ.”—Lala 68:20.
Miishɛjemɔ jɛɛhe kroko ji Kristofoi asafo lɛ. Bɔfo Paulo ŋma yɛ Ŋ.B. klɛŋklɛŋ afii oha lɛ mli akɛ: “Yei okulafoi ni ji okulafoi lɛlɛŋ lɛ, wo amɛ. Shi kɛ yoo okulafo ko yɛ bii loo nabii [ni baanyɛ akwɛ lɛ loo amɛtsu hiamɔ nii ahe nii] lɛ, amɛkase Nyɔŋmɔ gbeyeishemɔ yɛ amɛ diɛŋtsɛ amɛwe tsutsu, ni amɛto amɛfɔlɔi lɛ anajiaŋ pɛpɛɛpɛ; ejaakɛ enɛ yɛ fɛo ni eŋɔɔ Nyɔŋmɔ naa. Akaŋɔ yoo okulafo ni nako aye afii nyɔŋmai ekpaa (awo sɔɔmɔ lɛ mli), ja mɔ ni gbã nuu kome, mɔ ni atãa ehe sane kpakpa akɛ etsu nijuji, no ji: kɛ elɛ bii, kɛ efee mɛi agbɔ, kɛ efɔ mɛi krɔŋkrɔŋi anaji ahe, kɛ eye ebua mɛi ni naa amanehulu lɛ, kɛ edi nitsumɔ kpakpa fɛɛ nitsumɔ kpakpa sɛɛ lɛ.” (1 Timoteo 5:3, 4, 9, 10) Yehowa Odasefoi ni yɔɔ ŋmɛnɛ lɛ hu yeɔ buaa ni amɛshɛjeɔ nanemɛi heyelilɔi ni tamɔ nɛkɛ lɛ amii.
Yɛ bei pii amli lɛ, tsakemɔ kpele ni esa akɛ mɔ ni agbo ashi lɛ lɛ afee ji henumɔŋ nɔ. Nuu ko ni ehefatalɔ gbo afii enyɔ ni tsɔ enɛ hiɛ lɛ ŋma akɛ: “Misumɔɔ miŋa lɛ jogbaŋŋ. Eji miwala shihilɛ mli awerɛho be ni fe fɛɛ, ni ewa kɛha mi akɛ madamɔ naa.” Mɔ ni ebote gbalashihilɛ mli lɛ kɛ ehefatalɔ lɛ ehi shi yɛ adesa wekukpaa ni bɛŋkɛ kpaakpa fe fɛɛ mli. Yɛ adebɔɔ su naa lɛ, kɛ gbalashihilɛ mli hefatalɔ ko gbo lɛ, hefatalɔ ni shwɛɔ yɛ sɛɛ lɛ nuɔ he akɛ elaaje nii agbo. Namɔ ŋɔɔ mɔ ni tamɔ nɛkɛ baanyɛ atsɔ ehe kɛya kɛha yelikɛbuamɔ?
Nanemɛi Kristofoi kpakpai baanyɛ atswa mɔ ama shi yɛ shihilɛi ni tamɔ nɛkɛ mli. Abɛbua ko ni nilee yɔɔ mli kɛɔ akɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi ha haomɔ be.” (Abɛi 17:17) Yelikɛbuamɔ—ni jɛ nanemɛi ni fiɔ mɔ sɛɛ waa diɛŋtsɛ lɛ aŋɔɔ he hiaa yoo okulafo loo nuu okulafo lɛ. Nanemɛi nilelɔi woɔ mɔ ni werɛ eho ehe lɛ hewalɛ ni ewie, kɛ nakai feemɔ po kɛ yaafonui baa. Ekolɛ Kristofonyo ko ni etsɔ piŋmɔ kɛ tsuiŋdɔlɛ ni tamɔ nɛkɛ mli yɛ ehefatalɔ ní gbo hewɔ lɛ baanyɛ ni ekɛ yelikɛbuamɔ ni mlihilɛ yɔɔ mli aha yɛ gbɛ ko nɔ. Biblia lɛ woɔ ŋaa akɛ: “Nyɛshɛjea mɛi ni tsui faa lɛ amii.” 1 Tesalonikabii 5:14) Shi kaimɔ akɛ yei okulafoi kɛ hii okulafoi ahiɛ tseɔ amɛgbalashihilɛ mli hefatalɔi ni eshi amɛ lɛ. No hewɔ lɛ esa akɛ mɛi ni agbo ashi amɛ lɛ agba amɛ teemɔŋ saji amɛtsɔɔ mɛi krokomɛi yɛ shihilɛi ni haa mɔ fɛɛ mɔ hiɛɔ jeŋba ni he tse mli lɛ pɛ shishi.—1 Petro 2:12.
Tsabaa ni hi fe fɛɛ ni kuɔ dɔlɛ ni gbele kɛbaa lɛ naa ji mɛi krokomɛi ni ayeɔ abuaa amɛ ni deka bɛ mli kwraa—ni ejeee nitsumɔ ni yɔɔ mlɛo kɛha mɛi ni heɔ yeɔ akɛ amɛji mɛi ni yelikɛbuamɔ he hiaa amɛ lɛ! Biɛ ji he ni su ni pɛsɛmkunya bɛ mli tsuɔ nii yɛ lɛ. Suɔmɔ mli ni ajɛɔ afeɔ nii ahaa mɛi krokomɛi lɛ shwieɔ awerɛho kɛ ŋkɔmɔyeli, ejaakɛ Yesu kɛɛ: “Nɔ hamɔ mli yɛ jɔɔmɔ fe hemɔ.”—Bɔfoi lɛ Asaji 20:35.
Gbele Nɔ Kunimyeli
Wobi ni tsɛɔ mɔ lɛ waa mɔ he waa, ni enyɛɔ egbeɔ mɔ po. Shi kɛ ajie gai ni wobi lɛ tsɛ̃ wo ohewolo mli lɛ pɛ lɛ etsɛɛɛ ni ohe jɔɔ bo. Shi mɛɛ hiɛnɔkamɔ yɔɔ akɛ wɔhe baajɔ wɔ kɛjɛ gai ni kɛ gbele baa lɛ mli?
Yɛ be mli ni etsɔɔ mli akɛ esha ji gai ni kɛ gbele baa lɛ, Paulo bo akɛ: “Shi shidaa aha Nyɔŋmɔ, mɔ ni tsɔ wɔ-Nuŋtsɔ Yesu Kristo nɔ ni eha wɔye kunim lɛ.” (1 Korintobii 15:57) Gbele nɔ kunimyeli lɛ kɔɔ Kristo he yɛ mɛɛ gbɛ nɔ? Yesu tsɔɔ akɛ nakai eji beni ewie lɛ diɛŋtsɛ ehe akɛ: “Gbɔmɔ bi lɛ baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) Hɛɛ, kɛha mɛi ni tsɔɔ hemɔkɛyeli yɛ Nyɔŋmɔ Bi, Yesu Kristo mli, kɛ kpɔmɔ afɔle ni Yehowa tsɔ enɔ ekɛha lɛ mli lɛ, gbele ni ana kɛjɛ Adam mli lɛ efeŋ nɔ ni baaha —amɛlaaje kwraa kɛya naanɔ.—Yohane 3:16.
Nɔ ni haa mɔ tsui nyɔɔ emli diɛŋtsɛ ji Yesu wiemɔi nɛɛ: “Ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.”—Yohane 5:28, 29.
Nyɔŋmɔ gbalɔ Yesaia tsɔ hiɛ egba afii ohai abɔ ni eho lɛ amli akɛ: “[Yehowa Nyɔŋmɔ] eeemi gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui.” (Yesaia 25:8) Ni Biblia lɛ kɛ gbɛkpamɔ ni yɔɔ naakpɛɛ nɛɛ hu haa yɛ Kpojiemɔ 21:4: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Akɛni Biblia mli hiɛnɔkamɔ nɛɛ ewaje mɛi ni wɔɔ yɛ gbele mli lɛ hewɔ lɛ, ehe ehiaaa ni mɛi ni agbo ashi amɛ lɛ “aye ŋkɔmɔ tamɔ mɛi ni eshwɛ lɛ, mɛi ni bɛ nɔhiɛkamɔ ko lɛ.”—1 Tesalonikabii 4:13.
Bɔɔ mɔdɛŋ ni ofee nɔ ni Nyɔŋmɔ esaa eto adesai, taakɛ ajie lɛ kpo yɛ Biblia lɛ mli lɛ he mfoniri yɛ ojwɛŋmɔ mli. “Amanehulu kpeteŋkpele” lɛ ni baa lɛ tsɔɔ hiɛkpatamɔ kɛha ŋmɛnɛŋmɛnɛ yiwalɛ nibii agbɛjianɔtoo nɛɛ. (Kpojiemɔ 7:14) Abaakpata mɛi ni diɔ apasa jamɔ sɛɛ lɛ ahiɛ. Maŋkwramɔŋ kɛ jarayeli mli hiɛjoolɔi ni haa hɔmɔ kɛ tawuu baa lɛ bɛ dɔŋŋ. Yesu Kristo yaa nɔ ni ekɛ Satan Abonsam, ni kɛ adesai agbele babaoo eba lɛ woɔ bu kwɔŋkwɔŋ lɛ mli. Kɛkɛ lɛ Kristo eje e-Afii Akpe Nɔyeli, ni emli ni ekɛ ekpɔmɔ afɔleshaa lɛ jara lɛ tsuɔ adesai ahe nii lɛ shishi. Gbohii lɛ kuɔ amɛsɛɛ kɛbaa shitee ni amɛhiɛ ka nɔ lɛ mli, ni la ni jɛɔ Nyɔŋmɔ Wiemɔ lɛ mli lɛ kpɛɔ kaŋkaŋ aahu akɛ hemɔkɛyelii gbohii ni kɔɔ gbele, ni ji adesai ahenyɛlɔ lɛ he lɛ bɛ dɔŋŋ. Kɛkɛ lɛ mɛi ni yɔɔ wala mli fɛɛ ena hegbɛ ni amɛkɛaakase Nyɔŋmɔ gbɛi ní amɛhi shi yɛ ejalɛ taomɔ nii anaa.—Abɛi 4:18; Bɔfoi lɛ Asaji 24:15; Hebribii 2:14, 15 Kpojiemɔ 18:4-8; 19:19-21; 20:1-3.
Paulo kɛɔ akɛ, ‘yɛ no sɛɛ lɛ, Kristo Yesu kɛ Maŋtsɛyeli lɛ haa e-Nyɔŋmɔ kɛ Tsɛ lɛ. Ejaakɛ eyeɔ maŋtsɛ kɛyashiɔ be mli ni Nyɔŋmɔ kɛ ehenyɛlɔi fɛɛ aaafee enajiashi maaŋoo. Ejaakɛ naagbee henyɛlɔ ni aaafo esɛɛ ji gbele.’ (1 Korintobii 15:24-26) Fatɔɔi fɛɛ ni jɛ Adam hewɔ lɛ bɛ dɔŋŋ. Naagbee kaa ko baa agbɛnɛ, ni mɛi ni sumɔɔ Nyɔŋmɔ lɛ kɛ anɔkwayeli jeɔ mli shweshweeshwe. (Kpojiemɔ 20:4-10) Akɛni aha amɛye emuu hewɔ lɛ, nɛkɛ adesai toibolɔi nɛɛ hiɔ shi, jeee afii nyɔŋmai kpawo, loo afii oha kɛ nyɔŋma, shi kɛmiiya naanɔ. Mɛɛ nikeenii ni jɛ Nyɔŋmɔ ŋɔɔ kɛtsɔ esuɔmɔ Bi lɛ nɔ enɛ ji nɛkɛ!—Romabii 6:23.
No hewɔ lɛ, be enyiɛ obaasumɔ ni ohi shi kɛyata? Owala shihilɛ mli baanyɛ akpa kɛya yinɔi fɛɛ mli. Ni akɛni oyɔɔ wala mli yɛ je nɛɛ “naagbee be” lɛ mli hewɔ lɛ, ekolɛ ogboŋ kwraa. (Daniel 12:4; Yohane 11:25, 26; 17:3) Kɛ ofee ŋwɛi suɔmɔnaa nii lɛ, obaanyɛ ohi shi kɛyabote Nyɔŋmɔ shiwoo jeŋ hee lɛ mli.—2 Petro 3:13.
Shi kɛ oda saŋŋ yɛ afii amli lɛ, obaanyɛ osusu gbele ni aaaba onɔ lɛ he yɛ gbɛ ni ja nɔ. Yɛ anɔkwale mli lɛ, gbohiiashitee he hiɛnɔkamɔ lɛ kɛ miishɛɛ baa. Shi ekolɛ obaasusu bɔ ni Yehowa baato weku shihilɛ he gbɛjianɔ aha yɛ nakai nibii agbɛjianɔtoo hee lɛ mli lɛ he. Kaagba ohe naa yɛ nɛkɛ saji nɛɛ ahe, ejaakɛ Yehowa baato mɛi ni yeɔ lɛ anɔkwa daa lɛ anaanɔ miishɛɛ he gbɛjianɔ aha amɛ.
Yɛ be mli ni jaramɔ bei ni ji Satan yiwalɛ nibii agbɛjianɔtoo lɛ “naagbee gbii” nɛɛ yaa ehiɛ kɛyaa enaagbee lɛ, kaaha gbele he gbeyeishemɔ miishɔ hegbɛ ni okɛaasɔmɔ Yehowa bianɛ lɛ kɛmiijɛ odɛŋ. (2 Timoteo 3:1) Kɛ olaaje suɔlɔ ko yɛ gbele mli lɛ, okɛ anɔkwale ni eji akɛ gbele hewalɛ lɛ sɛɛ etsɛŋ lɛ ashɛje omii. (Kpojiemɔ 20:13, 14) Okɛ ohiɛ afɔ gbohiiashitee he hiɛnɔkamɔ lɛ nɔ. Kɛkɛ lɛ, kɛ obote jeŋ hee lɛ mli kɛtsɔ amanehulu kpeteŋkpele lɛ mli ni oje loo kɛtsɔ gbohiiashitee lɛ nɔ hu lɛ, na nɔmimaa yɛ anɔkwale ni eji akɛ, abaafo gbele, ni ji naagbee henyɛlɔ lɛ sɛɛ lɛ mli,—Kpojiemɔ 7:9, 14.
[Mfoniri ni yɔɔ baafa 5]
Nanemɛi Kristofoi kpakpai baanyɛ atswa mɔ ni yeɔ awerɛho lɛ ama shi yɛ mumɔŋ
[Mfoniri ni yɔɔ baafa 7]
Mɛi krokomɛi ayelikɛbuamɔ ni deka bɛ mli kwraa baanyɛ aba awerɛho ni suɔlɔ ko gbele kɛbaa lɛ shi